1. ¿Kun lurasas Jehová Diosar kusisiysna?

 WAL munasktan ukarus necesitki ukarjam mä suma regalo chursna ukham amuytʼañäni. Jupatï uka regal imasjjakispa, armasjjarakispa ukhajj ¿janit mayjtʼasksna? Ukampis jupatï uka regalot wal yuspäristaspa, ukat uka regal uchtʼasispa jan ukajj apnaqaspa ukhajj wal kusissna. ¿Kunsa ukat yateqsna? Jehová Diosajj Yoqaparuw jiwas layk jiwañapatak churawayi. Wali valorani uka regalompita munasiñapampit Jehová Diosar yuspäratas uñachtʼaytan ukhajja, ¡walpun jupajj kusispacha! (Juan 3:16; Rom. 5:7, 8).

2. ¿Kunsa aka yatichäwin yatjjataskañäni?

² Maranak pasjjepanjja, inas Jesusan jiwatapat jan yuspärjjsnati. Ukatï pasaspajja, Jehová Diosajj churkistu uka wali suma regal jan uñjkañ lugararus imksna ukat armasjjaraksnasa ukhamäspawa. Uk jiwasar jan pasañapatakejja, kuntï Jehová Diosas Jesusas jiwas layk lurawayapki ukat sapa kutiw yuspärañasa, lupʼiñasaraki. Cheqas aka yatichäwejj ukatakiw yanaptʼistani. Kunjamsa Jesusan jiwatapajj jichha tiemponsa jutïrins yanaptʼistani uka toqetwa yatjjataskañäni. Kunjamsa Jehová Diosar munasirïtapat yuspäratas uñachtʼaysna, jukʼampis kunjamsa Jesusan jiwatapajj amtaski uka semananakajj yuspäratas uñachtʼaysna ukwa yatjjataskarakiñäni.

 ¿KUNJAMSA JICHHA TIEMPON YANAPTʼISTU?

3. ¿Kunjamsa Jesusan jiwatapajj jichha tiempon yanaptʼistu?

³ Criston sacrificiot loqtasitapajj yanaptʼjjestuwa, ukanakat mayajj akawa: Jesusan jiwatapatwa Jehová Diosajj juchanakas perdonistu. Ukampis janiw obligatakejj perdonkistuti, jan ukasti taqe chuymaw perdonistu. Davidajj wal yuspärasaw mä cancionan akham sasin cantäna: “Jehová Dios Tata, jumajj suma Diosätawa, perdonañatakis jankʼakirakïtawa” sasa (Sal. 86:5; 103:3, 10-13).

4. ¿Khitinak laykus Jehová Diosajj Yoqapar sacrificiot loqtäna? (Lucas 5:32; 1 Timoteo 1:15).

⁴ Yaqhepanakajj Jehová Diosamp perdonatäñatakejj janis walïpkaspa ukham amuyasipjje. Cheqas janiw khitis Diosamp predonatäñ meresktanti. Apóstol Pablojj akham sänwa: “Janirakiw apóstol satäñatakis walïkti” sasa. Ukat sarakïnwa: “Diosan wali khuyapayasiñapatwa nayajj apostoljam serviskta” sasa (1 Cor. 15:9, 10). Juchanakasat arrepentistan ukhajja, Jehová Diosajj perdonistuwa, ukampis janiw perdonatäñ meresitas laykojj perdonkistuti, jan ukasti jiwasar munasitap laykuw perdonistu. Ukhamajj jiwasatï Jehová Diosamp perdonatäñatakejj janis walïksna ukham amuyasstan ukhajja, ak amtañasawa: jupajj janiw perfecto jaqenak laykojj Yoqapar sacrificiot loqtkänti, jan ukasti juchanakapat arrepentisir pantjasir jaqenak laykuw loqtäna (Lucas 5:32; 1 Timoteo 1:15 liytʼäta).

5. Jehová Diosamp perdonatäñ janiw khitis mereskiti sasajj ¿kunatsa sissna?

⁵ Walja maranakas Jehová Diosar sirvjjstanjja, janipuniw Jehová Diosan perdonap mä kun lurasas jikjjatksna ukham amuyañasäkiti. Cheqas kunanaktï jupa laykojj lurawayktan ukanak wali valoranitwa jupajj uñji (Heb. 6:10). Ukampis janiw jupar servitas laykojj mä pagökaspas ukham Yoqapar churkistuti, jan ukasti mä regalor uñtasitwa churistu. Ukhamajj jupamp perdonatäñ meresksnasa, jupamp suma uñjatäñajj wakisipunkaspasa ukham amuystan ukhajja, Criston jiwas layk jiwañapajj janiw wakiskänti sisksnas ukhamäspawa (Gálatas 2:21 liytʼarakïta).

6. ¿Kunatsa apóstol Pablojj Jehová Diosar serviñan wal chʼamachasïna?

⁶ Pablojj waljanak lurkasas janiw Diosamp perdonatäkaspänti, uk jupajj sum yatïna. Ukhamajj ¿kunatsa Jehová Diosar serviñan wal chʼamachasïna? Jupajj Diosan wali khuyapayasirïtapat yuspäratap uñachtʼayañwa munäna (Efes. 3:7). Jiwasampejj ukhamarakiwa, taqe chuymaw jupar serviskaktanjja, janiw perdonayasiñ laykukejj sirvktanti, jan ukasti jupar yuspäratas uñachtʼayañatakiw sirvtanjja.

7. ¿Kunjamsa Jesusan jiwatapajj jichha tiempon yanaptʼarakistu? (Romanos 5:1; Santiago 2:23).

⁷ Jesusan jiwas layku jiwatapatjja, jichha tiempon Jehová Diosampejj wali sumaw apasiraksna. a Kunjamtï pasïr yatichäwin yatjjataniwayktanjja, naskayätan ukhajj janiw Jehová Diosampejj sum apaskayätanti. Ukampis Jesusan jiwatapat ‘Diosampejj sumanksnawa’, juparojj jakʼachasiraksnawa (Romanos 5:1; Santiago 2:23 liytʼäta).

8. ¿Kunatsa oracionat Jehová Diosar yuspärañasa?

⁸ Jehová Diosamp sum apasitasat juparojj orassnawa, ukajj mä jachʼa privilegiowa. Jupajj janiw tantachäwinakan taqenin istʼkat oraski uka oracionanakak istʼkiti, jan ukasti sapa maynin oracionanakapwa istʼi. Oracionajj tranquilok jikjjatasiñatakiw yanaptʼistu,  chuymasans sumakiw jikjjatastanjja, jukʼampis Diosamp sum apasiñatakiw yanaptʼistu, ukaw jukʼamp wakiskirejja (Sal. 65:2; Sant. 4:8; 1 Juan 5:14). Jesusajj aka oraqenkkäna ukhajja, sapa kutiw Jehová Diosar orasirïna, kuna laykutejj jupan istʼaskatap yatïnwa, jupamp jukʼamp sum apasiñatakejj kunjamsa orasiñajj yanaptʼaspa uks yatirakïnwa (Luc. 5:16). Jesusan sacrificiot loqtasitap laykuw Jehová Diosamp suma amigösna, juparus orasiraksna, walpun ukat yuspärtanjja.

¿KUNJAMSA JUTÏRIN YANAPTʼISTANI?

9. ¿Kunjamsa Jesusan jiwatapajj Jehová Diosat jan jitheqtir servirinakaparojj jutïrin yanaptʼani?

⁹ Jehová Diosajj wiñay jakañwa jupat jan jitheqtir servirinakaparojj churani. Niyakejjay jiwañajj nayratpach utjchejja, janjakiw wiñay jakañajj utjkaspati sasaw waljanejj amuyapjje. Ukampis Jehová Diosajj wiñay jakapjjañapatakiw jaqenakar lurawayi, wiñay jakañaw utjani siski ukajj janis creyiñjamäkchejja, Jehová Diosajj Yoqapar mä sacrificior uñtat churawayki ukajj janiw creyiñjamäkarakiti. Cheqas uka pago churasaw Jehová Diosajj wiñay jakañ suytʼäw churistu (Rom. 8:32).

10. ¿Kunsa ajllitanakas yaqha ovejanakas wal suyasipki?

¹⁰ Niyakejjay Jesusan jiwatapajj jutïrin wal yanaptʼchistanejja, Jehová Diosajj jichhatpach wal lupʼiñaswa muni. Ajllitanakajj alajjpachan jakaña, Jesucristomp chik aka oraq apnaqaniñ wal suyasipki (Apoc. 20:6). Yaqha ovejanakat uñtʼatäpki ukanakajj aka oraqen mä Paraison jakasiñwa suyasipki, ukan janiw usuyasiñasa ni tʼaqesiñas utj-jjaniti (Apoc. 21:3, 4). ¿Jumajj aka oraqen wiñay jakasiñti suyaskta? Uka suytʼäwejj alajjpachar sarañat sipans janiw minusäkiti. Jaqenakajj wiñay jakañatak lurtʼatätanwa. Ukhamajj aka oraqen wiñay jakasisajj wali kusisitäñäniwa.

11, 12. ¿Paraison kuna bendicionanak phoqasiñaps wal suyasktanjja? (Dibujonak uñjjattʼarakïta).

¹¹ Paraison kunjamsa jakasiñäni uk amuytʼam. Usuntañatsa jiwañats janiw llakisjjañäniti (Is. 25:8; 33:24). Kunanaktï munktan  ukanakwa Jehová Diosajj churistani. ¿Kunanak yateqañas gustiristam? ¿Animalanakat yatjjatañajj gustiristamti? ¿Mä instrumento tukañ yateqañajj gustiristamti? ¿Dibujañ yateqañajj gustiristamti? Paraisonjja, arquitectonaka, utanak luririnaka, yapuchirinaka, manqʼa phayirinaka, herramientanak luririnaka, panqar ayrurinaka, ukanak cuidirinaka, ukat yaqha ukhamanakaw munasini (Is. 35:1; 65:21). Niyakejjay wiñay jakchiñänejja, ¡kuntï yateqañ munkañäni ukwa yateqañäni!

¹² ¡Jiwatat jaktirinakar katoqañajj wali kusiskañäniwa! (Hech. 24:15). Jehová Diosata, taqe luratanakapat yateqaskakiñas wali kusiskañarakïniwa (Sal. 104:24; Is. 11:9). Ukampis akaw jukʼamp sumäni: Jehová Diosar servisajj janiw kuna jan wali luratats juchañchasjjañäniti. ¿Janejjay taqe uka bendicionanak ‘juchanakan mä qhawqha tiempo kusistʼañ’ laykojj jaytkasmatejja? (Heb. 11:25). Aka tiempon mä kun katoqañat sipansa, Paraison wali sum jakaskañäni ukaw jukʼamp sumäni. Ak amtapunim: janiw Paraison jakañ suyjjañäniti, jan ukasti ukanwa jakjjañäni. Taqe ukanakajj Jehová Diosan jiwasar wal munasitapatwa phoqasini, jupajj jiwasar wal munasitap laykuw Yoqaparus sacrificiot loqtäna.

YUSPÄRATAS UÑACHTʼAYAÑÄNI

13. ¿Kunjamsa Jehová Diosar munasirïtapat yuspäratas uñachtʼaysna? (2 Corintios 6:1).

¹³ Yoqapar jiwas layk jiwañapatak khitanitapat ¿kunjamsa Jehová Diosar yuspäratas uñachtʼaytanjja? Jupar serviñ jakäwisan nayrar uchasaw yuspäratas uñachtʼaytanjja (Mat. 6:33). Jesusajja, khitinakatï jakasipki ukanakajj “jan jupanak pachpataki jakjjapjjañapataki, jan ukasti khititï jupanak layku jiwki, jaktayatäkaraki” ukanak laykuw jiwäna (2 Cor. 5:15). Jehová Diosajj wali khuyapayasiñampiw uñjistu, janipuniw uk aleq ukhamak uñjañasäkiti (2 Corintios 6:1 liytʼäta).

14. ¿Kunjamsa Jehová Diosan instruccionanakapar confiyatas uñachtʼaysna?

¹⁴ Jehová Diosan munasirïtapar yuspäratas uñachtʼayañatakejja, instruccionanakapar confiyataswa uñachtʼayañasaraki. Amtanakar puriñasäki ukhaw uk lursna. Qhawqsa estudiañäni, jan ukajj kuna trabajsa katoqañäni uka toqenakat mä amtar puriñasächi ukhajja, Jehová Diosajj kun lurañassa muni ukwa sum amuytʼasiñasa (1 Cor. 10:31; 2 Cor. 5:7). Diosar confiyatas luratanakasamp uñachtʼaytan ukhajja, Diosar confiyatasasa jupamp sum apasitasas jukʼampiw jiljjatti. Wiñay jakasiñajj cheqpachapuniw utjani sasin jukʼampiw confiyaraktanjja (Rom. 5:3-5; Sant. 2:21, 22).

15. Jesusan jiwatapajj amtaskani uka semananakajj ¿kunjamsa yuspäratas uñachtʼaysna?

¹⁵ ¿Kunjamsa Jesusan jiwatapata Jehová Diosan munasirïtapat yuspäratas uñachtʼayaraksna? Jesusan jiwatapajj amtaskani uka semananakajj qhawqtï lurirjamäktan uk lurasaw  uk uñachtʼaysna. Jiwasajj ukar sarañ amtkchiñänisa, yaqhanakaruw ukar sarapjjañapatak invittʼaraksna (1 Tim. 2:4). Invittʼañäni ukhajja, uka tantachäwejj kunjamänisa ukwa jupanakar qhanañchtʼañasa. ¿Kunatsa Jesusajj jiwäna? ukat Jesusan jiwatap amtapjjañäni sat videonakwa uñtaysna, ukajj jw.org cheqankiwa. Ancianonakajj inactivonakar invitañatakiw chʼamachasipjjarakini. Jehová Diosan mä chhaqat ovejitapatï markapar kuttʼaniñ amtani ukhajja, alajjpachansa aka oraqens wali kusisiñaw utjani (Luc. 15:4-7). Uka tantachäwinjja, janiw jiwaskamakejj aruntasiñasäkiti, jan ukasti jichhak jutapki jan ukajj wali jaya tiempot jutapki ukanakaruw arunttʼañasa. ¡Taqenirupuniw wali sum katoqtʼañasa! (Rom. 12:13).

16. Jesusan jiwatapajj amtaskani uka semananakajj ¿kunatsa Jehová Diosar serviñan jukʼamp lurañ amtañasa?

¹⁶ Jesusan jiwatapajj amtaskani uka semananakan Diosar serviñan jukʼamp lurasaw kunanaktï Jehová Diosasa, Jesusas jiwas layk lurawayapki ukanakat yuspäratas uñachtʼaysna. Jukʼamp predicañäni ukhajj jukʼampiw Jehová Diosan yanaptʼap uñjañäni, juparus jukʼampiw confiyarakiñäni (1 Cor. 3:9). Jesusan jiwatapajj amtaskani uka semananakatak Bibliat apstʼat textonak utjki ukanak liytʼañasarakiwa, ukajj Diosan Arupat sapür yatjjatañataki sat folletonkiwa, ukat Tantachäwin yatjjatañataki (Guía de actividades) sat qellqatankarakiwa. Bibliat sapak yatjjatktan ukhaw uka textonakat jukʼamp yatjjataraksna.

17. ¿Kunas Jehová Diosar wal kusisiyi? (“ ¿Kunjamsa Jehová Diosan munasirïtapat yuspärsna?” sat recuadro liytʼarakïta).

¹⁷ Janitï aka yatichäwin yatjjatktan ukanakamp phoqerjamäkstajja, janiw llakisiñamäkiti. Amtapunim, Jehová Diosajj janiw luratanakam mayninakan luratanakapamp igualaykiti. Jupajj qhawqsa jupar munasta uk wali valoranit uñji, Jesusan jiwatapat qhawqsa yuspärta uk uñjasajj wal kusisiraki (1 Sam. 16:7; Mar. 12:41-44).

18. ¿Kunatsa Diosarus Jesusarus wal yuspärtanjja?

¹⁸ Jesusan jiwas layk jiwatapatwa juchanakasajj perdonatäspa, Jehová Diosan amigopäsna, wiñay jakañatak suytʼäwinirakïsna. Jehová Diosan munasirïtapar yuspäratas uñachtʼayapjjapuniñäni, jupan munasirïtapatwa taqe uka bendicionanak katoqsna (1 Juan 4:19). Jesusajj jiwasar wal munasitapat jakäwip loqtasiwayki ukat yuspäratas uñachtʼayapjjarakiñäni (Juan 15:13).