Awk taykajajj janïr casaratäpkäna uka pachaw Jehová Diosar uñtʼapjjäna, niya 1920 maranakana. Nayajj Inglaterra markanwa 1939 maran nasiwayta. Jiskʼatpachaw awk taykajamp tantachäwinakar sarayäta, Diosan Arunakap Yatiyañatak Escuela sat tantachäwejj wal gustitäna. Uka escuelan nayrïr asignación churapkitäna uk amtasipuntwa, ukhajj sojjta maranikïskayätwa, atrilar alcanzañatakejj mä cajón pataruw saytʼasiyäta. Walja jilat kullakanakar tantachasit uñjasajj ajjsarayasiyätwa.

Predicacionan kunjamsa parltʼirïsta ukjja, papitujajj mä tarjetaruw qellqtʼarapitäna. Nayrïr kuti sapaki mä utan predickayäta ukhajja, kimsaqallqo maraniyätwa. Mistunkäna uka chachajja, tarjeta liytʼasajj jankʼakiw “Sea Dios veraz” sat libro katoqasïna. Uk uñjasajj wali kusisitapuniw papitujar cuenttʼir tʼijuyäta. Predicacionasa tantachäwinakas wal kusisiyitäna, Jehová Diosar sapürunjam serviñ munañatakiw chʼamañchtʼarakitäna.

Papitujajj La Atalaya revista sapa phajjsi katoqañajatak qellqayitäna ukhajja, jukʼampiw Diosan Arupajj chuymar purtʼitäna. Sapa kuti katoqasajj jankʼakiw liysuyäta, Jehová Diosar jukʼamp confiyasajja, jakäwij Jupar katuyasiñwa amtjjayäta.

1950 maranjja, “Aumento de la Teocracia” sat jachʼa tantachäwiw Nueva York markan apasïna, ukarojj awk taykajampiw delegadot sarapjjayäta. Jueves 3 de agosto urutak apstʼat programajja, “Día del misionero” sat pʼeqeñchäwinïnwa. Bautisasirinakatak discursjja, Carey Barber sat jilataw arstʼäna, jupajj Cuerpo Gobernantenwa qhepat servïna, discursop tukuyarojj pä jisktʼa bautisasirinakar jisktʼapkitäna ukhajja saytʼasisajj “¡jïsa!” sasaw jachʼat sayäta. Uka pachajj 11 maranikïskayätwa, ukhamäkchïnsa kuntï lurkayäta ukajj  wali wakiskirïtapwa amuyayäta. Ukampis jan nadañ yatitajatjja, umar mantañ wal ajjsarayasiyäta. Tiojaw jan ajjsarañatak chʼamañchtʼitäna piscinkamaw compañarakitäna, mä ratukiw umar chhaqaranttayäta, janiw kayujas manqhakam purkänti. Mayniw bautisitäna, yaqha jilatarakiw piscinat irpsjjetäna. Ukürut jichhakamajja, Jehová Diosaw cheqa thakin irpaskitu.

Escuela tukuyasajja, precursorat serviñwa munayäta. Ukampis profesoranakajaw universidadar sarañatak wal chʼamañchapjjetäna, ukatwa jupanakar istʼasajj universidadar sarta. Universidadankjjasasti, Jehová Diosarojj janiw sum serviñ puedjjäti janirakiw sums estudiañ puedjjäti sasaw jankʼaki amuyasiyäta, ukatwa universidad jaytjjañ amtjjayäta. Jehová Diosar taqe chuyma mayisisajja, profesoranakajaruw aka mara tukuyarojj universidad jaytjjäwa sasin wali respetompi carta qellqayäta, ukatsti Jehová Diosar confiyasajj jankʼakiw precursorat serviñ qallta.

Julio, 1957 maranwa Wellingborough sat markan precursorat serviñ qalltta. Ukatsti, experienciani mä jilatamp nayar asignañapatakiw Londres markankir Betelar mayta. Ukhamatwa Bert Vaisey wali trabajtʼir jilatampi predicayäta, jupaw taqe kunan wal yanaptʼawayitu, predicañatak mä suma horario wakichtʼasiñsa yanaptʼawayarakituwa. Congregacionanjja, edadani sojjta kullakanakampi, Vaisey jilatamp nayampikïpjjayätwa, tantachäwitak wakichtʼasiñasa ukan arstʼañasa Jehová Diosar jukʼamp confiyañatakiw yanaptʼawayitu, Jupar jachʼañchañatakis yanaptʼawayarakituwa.

Cuartelar jan sarañ munatajatjja, carcelaruw mä qhawqha tiempo jistʼantapjjetu, uka qhepatjja Barbara sat precursora especial kullakaruw uñtʼawayta. 1959 maranwa jupamp casarasipjjta, kawkjar sarañatakis dispuestokïpjjayätwa. Qalltanjja, Lancashire markaruw khitapjjetäna, ukajj Inglaterra markat inti jalanta alay toqenkiwa (noroeste), ukatjja enero, 1961 maran Londres markankir Betelaruw Jilïr Irpirinakataki ukat Congregacionan Yanapirinakapatak Escuelar sarañatak invitapjjetu. Ukajj mä phajjsiw apasïna, escuela tukuyarojja, congregacionanak tumptʼirit serviñajatakiw uttʼayapjjetäna, uk janiw suykayätti. Pä semanaw Birmingham sat markan congregacionanak tumptʼiri wali experienciani mä jilatajj kunjamsa trabajiñäja uk yatichitäna, esposajas compañarakitänwa. Ukatsti Lancashire ukat Cheshire sat cheqanakaruw khitapjjetäna.

Agosto, 1962 maranjja, vacacionankasipkayäta ukhaw sucursalat mä carta katoqapjjta, sobre manqhansti Galaad Escuelar sarañatak invitacionanakaw utjäna. Barbara esposajampejj Jehová Diosaruw orasipjjta, ukatsti formularionak phoqantasajj jankʼakiw sucursalar apayapjjta. Phesqa phajjsinak pasatatsti, Brooklyn (Nueva York) markaruw Galaad escuelar clase 38 ukar sarapjjta, 10 phajjsinakaw uka escuelajj apasïna.

Galaad escuelanjja, janiw Bibliata, Diosan markapajj kunjam organiztʼatasa ukak yateqapkti, jan ukasti aka oraqpachankir jilat kullakanakajj kunjamsa Jehová Diosar servipjje uksa  yateqapjjaraktwa. Janiw 25 maranipkayätsa, ukhamajj compañeronakajat wal yateqapjjta. Nayajj Fred Rusk jilatampiw sapüru trabajiyäta ukajj mä suma privilegiönwa, uka jilatatjja Bibliampipun ewjjtʼañwa yateqawayta. Escuelanjja, wali experienciani jilatanakaw discursonak arstʼapjjäna, jupanakat yaqhepajj Nathan Knorr, Frederick Franz, Karl Klein jilatanakänwa. Alexander Macmillan jilatajj wali humildënwa, jupats wal yateqapjjarakta. Diosan markapajj 1914 marat 1919 qallta marakamajj jan waltʼayataw uñjasïna, Macmillan jilatajj kunjamsa Jehová Diosajj uka tiempon markapar irpäna uk amuyañatakiw mä discursopan yanaptʼapjjetäna.

Niya escuela tukuyarojja, Knorr jilatajj África cheqankir Burundi markaruw asignapjjäma sasaw esposajampirojj sapjjetäna. Uk yatisasti jankʼakiw Betelankir bibliotecar sarapjjta, ukatjja qhawqha publicadoranakas ukhakamajj Burundi markan utjäna ukwa Anuario libron thaqtapjjta. Ukampis Burundi markan qhawqha publicadoranakas utji uk janiw jikjjatapkti. Ukhamasti, kawkjantï jan predicaskäna uka territorioruw predikir sarapjjañajäna. Jukʼakwa uka markat yatipjjarakiyäta, wal ajjsarayasipjjayäta ukampis Jehová Diosar orasiñaw jan ajjsarañatak wal yanaptʼapjjetäna.

Uka asignacionanjja, culturasa, arusa, climas mayjänwa. Francés aru yateqapjjañajänwa. Kawkjansa jakapjjä ukatakis mä uta thaqapjjañajarakïnwa. Uka cheqar puripjjta ukhat pä uru pasatatjja, Harry Arnott jilataw Zambia markar asignacionapar sarkasin visittʼapjjetu, jupampejj juntuw Galaad escuelankapjjayäta jupaw mä uta jikjjatañatak yanaptʼapjjetu. Uka utanwa misioneronakjam nayrïr kuti jakapjjta. Uka qhepatjja, Jehová Diosan Testigonakapat jan kuns yatipkäna uka autoridadanakaw nanakat mayj amuyjjapjjäna. Uka asignacionan yatinoqtasipkayäta ukhamaruw uka autoridadanakajj ‘trabajiñatak jan permiso apsupkäta ukhajj janiw aka markan jakapkasmati’ sasin jarkʼapjjetäna. Ukhamïpanwa Uganda markar sarjjapjjta.

Uganda markar jan visa papelamp mantañajj mä jukʼa ajjsarayapjjetänwa, ukampis Jehová Diosaruw confiyapjjayäta. Canadá markat jutir mä jilataw ukan servïna, jupaw inmigracionan trabajiri oficialamp parläna. Ukatwa ‘permiso apsuñkamajj mä qhawqha phajjsinak aka markan quedasipjjasmawa’ sasin oficialajj sapjjetäna, ukanwa Jehová Diosan yanaptʼap qhan uñjapjjta.

 Uganda markan asignacionajj janiw nayra asignacionjamakänti, Diosan Reinopat yatiyirinakajj utj-jjänwa, ukampis 28 Testigonakakiw markpachan utjäna. Predicapkayät uka territorionjja, walja jaqenakaw inglés aru parlapjjäna. Ukampis jupanakan Diosar sum uñtʼapjjañapatakejja, uka cheqan parlaski uka arunakat mays yateqapjjañajänwa. Ukatwa luganda aru yateqañ amtapjjta, predicañ qalltapkayäta uka Kampala markanjja, jilapartejj uka arwa parlapjjäna. Walja maranakatwa luganda aru sum parljjapjjayäta, ukajj predicacionan walpun yanaptʼapjjetäna. Bibliat yateqerinakarojj kunansa yanaptʼapjjerista uk sum amuyapjjayäta, jupanakajja kunanakas llakisiyäna, Bibliat yateqasajj kunjamas jikjjatasipjjäna ukanak qhanwa sapjjetäna.

Jaqenakar Diosar servipjjañapatak yanaptʼasajja, wali kusisitäpjjayätwa, ukampis congregacionanak tumptʼirit asignapjjetäna ukhajja, jukʼamp kusisitäpjjayätwa. Kenia markankir sucursalajj mayipkitäna ukarjamajja, kawkjarus precursor especialanakajj khitasispa uk uñjañatakiw markpach viajipjjta. Uka viajenakan jaqenakajj janis Testigonakar uñtʼapkchïnjja, wali munasiñampiw katoqtʼapjjetäna. Utajankapkiristsa ukhamaw jikjjatasipjjayäta, manqʼsa phaytʼarapipjjetänwa.

Uka qhepatjja, yaqha kasta viajinakwa lurarakta. Kampala markat Kenia markankir Mombasa puertokamajja, pä uruw trenat viajta, ukatsti océano Índico Seychelles islakamajj barcotwa sararakta. Uka qhepatjja, 1965 marat 1972 marakamajj Barbara esposajampiw walja kuti uka islar visitapjjta, ukan pä publicadoranakakiw utjäna qhepatsti grupojjänwa, tiempompejj mä suma congregacionaruw tukjjäna. Janiw uka lugaranakaruk viajkti, qhepatsti Eritrea, Etiopía ukat Sudán markankir jilat kullakanakar visittʼañatakis viajiraktwa.

Uganda markanjja, mä akatjamatwa política toqet jan waltʼayasiñajj utjäna, mä grupo militaranakaw gobiernor jaqoqapjjäna, ukhamïpansti walja maranakaw jan waltʼäwinakajj utjäna. Ukhaw Bibliajj “Cesarankkis ukjja Cesarar churapjjam” siski uka ewjjtʼar istʼañajj kunja wakiskirisa uk amuyayäta (Mar. 12:17). Mä kutejja, ‘uta jakʼaman utjki uka policía utaruw qellqayasir sarapjjañama’ sasaw yaqha markat jutirinakar mayisïna. Uk satajja, jankʼakiw qellqayasir sarapjjta. Mä qhawqha urunakatjja, yaqha misionero jilatampi Kampala markan autot sarasipkayäta ukhamaruw mä policiajj thakin saytʼayapjjetu, walpun sustjasipjjta, jumanakajj uñaqerïpjjtawa sasaw jachʼa comisariar apapjjetu. Ukanjja, ‘misioneronakäpjjtwa, janiw kuna jan wali amtampis jutapkti, uta jakʼajan utjki uka policía utarus qellqayasjjapjjtwa’ sasaw sapjjayäta. Ukampis janiw istʼapkitänti. Ukatjja armantat policianakaw kawkjantï jakasipkayäta uka jakʼankir policía utar apapjjetäna. Ukansti, qellqayasir uñjapkitäna uka oficialaw uñtʼapjjetäna ukatsti, “antutapjjam” sasaw jupanakar säna. Uk uñjasajj wal kusisipjjayäta.

Uka tiemponjja, militaranakajj thakinakan wal controlapjjerïna, ajjsarayasiñjamänwa, soldadonakajj machantatäpjjerïna ukhajj jukʼamp ajjsarayasiñjamänwa. Ukampis orasipjjapunirïtwa, controlanak sumak pasasajj wal kusisipjjerïta. 1973 maransti, yaqha markat jutir misioneronakarojj Uganda markat mistjjapjjañajatakiw obligapjjetäna.

Wasitampiw yaqha asignación katoqapjjta. Jichha kutinsti, Costa de Marfil África occidental  cheqaruw sarapjjañajäna, ukajj janiw nanakatak faciläkänti. Wasitampiw yaqha culturar yatinoqtapjjañajäna, francés arsa mayampiw parlapjjañajäna, yaqha markat jutir misioneronakamp jakañsa yatinoqtapjjañajarakïnwa. Ukampis Jehová Diosajj yanaptʼasipkakitänwa, humilde chuymani walja jaqenakaw Diosan arunakap wal yatjjatañ munapjjäna. Nanakasti, Jehová Diosaruw wal confiyasipjjayäta, Jupasti cheqa thaknäm irpasipkakitänwa.

Mä akatjamatwa jan wali noticia katoqapjjta, Barbara esposamajj canceraniwa sasaw doctoranakajj sapjjetäna. Ukatwa qollayasiñapatakejj walja kuti Europa cheqar viajipjjta. Jukʼampi jan walëjjepanjja, 1983 maranwa África cheqat sarjjapjjta, uka asignación jaytasajj wali llakitäpjjayätwa.

Londres markankir Betelanjja, esposajajj jukʼampiw jan waltʼjjäna, ukatsti jiwjjänwa. Betelankir jilat kullakanakaw wal yanaptʼapjjetäna. Jukʼampis mä chacha warmiw jan sint llakisiñataki, Jehová Diosar confiyaskakiñatak yanaptʼitäna. Mä qhawqha tiempotjja, mä voluntaria externa kullakaruw Betelan uñtʼta, jupajj Ann satänwa, precursora especialatwa nayrajj servitayna. Jehová Diosar wal munasïna, Jupar serviñaw nayrankarakïna. Ukatwa jupampejj 1989 maran casarasipjjta, ukhat jichhakamajj Betelanwa servisipkta.

1995 marat 2018 marakamajja, niya 60 markanakaruw central mundialan mä representantipjam visitta (nayrajja superintendente de zona sasaw jupanakar uñtʼasïna). Kunaymaninsa Diosan servirinakapajj uñjaskchinejja, Jehová Diosajj bendisipuniwa, ukwa uka visitanakan uñjawayta.

2017 maransti, ukham visitkasajj Africaruw wasitat visitta. Ann esposajampi Burundi markar visitañasa, uka markankañas wali kusiskañänwa. Diosan markapajj qhawqsa jiljjattäna uk uñjañas wali kusiskañänwa. Kawkjantï 1964 maran predickayäta ukanjja, jichhajj Betel utaw utj-jje, uka Betelajj 15.500 jila publicadoranakatwa encargasi.

2018 maranjja, kawkïr markanakarutï visitañäjakäna uka programanwa Costa de Marfil marka qellqtʼat uñjta. Uk uñjasajj wal kusista, Abiyán jachʼa markaru purkasajj utajarus purkirista ukhamaw jikjjatasiyäta. Betelan alojasipkayäta uka cuartonjja, Betelan jakir jilat kullakanakan teléfono numerop mä listan uñkasajja, mä uñtʼat sutwa uñjta, Sossou sata, jupajj cuarto ladojanwa jakäna. Abiyán markan sirvkayäta ukhajj mä jilatajj superintendente de ciudad ukhamaw servïna, jupäpachaw sasaw amuyayäta, ukampis janiw jupäkänti yoqapänwa.

Kuntï Jehová Diosajj siskäna uk phoqasir uñjawaytwa. Jan walinakan uñjasisajj akwa yateqta: Jehová Diosarutï confiyañänejja, Jupaw cheqa thakin irpistani. Ukhamajja, wiñay jakañar apki uka thakinjam saraskakiñäni (Prov. 4:18).