1. ¿Kunatsa Diosan markapan mayachtʼata jakastanjja?

¿DIOSAN markapankañajj wali kusiskañajjaya? Taqeniw Jehová Diosajj pʼeqtʼirinakar uttʼayki ukar respetañatak chʼamachastanjja, ukatwa kusisita mayachtʼata Diosan markapan jakastanjja, Diosajj pʼeqtʼirinak uttʼayawayki uk sum amuyañäni ukhajja, jukʼamp mayachtʼatäñäniwa.

2. ¿Kuna jisktʼanakarus aka yatichäwin qhanañchaskañäni?

² Aka yatichäwinjja, khitinakas congregacionan autoridadanïpjje ukwa yatjjataskañäni. Aka jisktʼanakaruw qhanañchaskarakiñäni: ¿kullakanakajj congregacionan kuna luräwinïpjjesa?, ¿taqe jilatanakat kullakanakan pʼeqtʼiripajja? ¿Familia pʼeqtʼirejj kunjamtï esposaparusa wawanakaparus pʼeqtʼki uka pachparakti jilïr irpirinakajj jilat kullakanakar pʼeqtʼaspa? Nayraqatajja, kullakanakajj congregacionan kuna luräwinïpjjesa, kunjamsa jupanakar uñjañasa ukwa yatjjataskañäni.

3. ¿Kullakanakajj kunanaktï lurapki uk jukʼamp valoranit uñjañatakejj kunas yanaptʼistani?

³ Cristiana kullakanakajja, familiapar sum uñjañataki, predicañataki, congregacionan jilat kullakanakar yanaptʼañatak wal chʼamachasipjje, ukatwa wali valoranit uñjtanjja. Ukampis kunjamsa Jehová Diosasa Jesusas kullakanakar uñjapjje, apóstol Pablos kunjamsa uñjirïna ukanakat lupʼiñäni ukhajja, jukʼamp valoranitwa jupanakar uñjañäni.

4. Jehová Diosajj chachanakarusa warminakarus pachpa valoranitwa uñji ¿kunjamsa Bibliajj uk qhanañchi?

 ⁴ Jehová Diosajj chachanakarusa warminakarus pachpa valoranitwa uñji sasaw Bibliajj qhanañchi. Amuytʼañataki, apostolonakajj jakkäna uka tiemponjja, Jehová Diosajj chachanakarusa warminakarus milagronak lurapjjañapataki kunayman aru parlapjjañapatakiw espíritu santop churäna (Hech. 2:1-4, 15-18). Jesusamp chika apnaqanipjjañapatakis chachanakaru warminakaruw ajlliwayaraki (Gál. 3:26-29). Ukhamarakiw Jehová Diosajj chachanakarusa warminakarus wiñay jakañ aka oraqen churani (Apoc. 7:9, 10, 13-15). Jesusajja, chachanakaru warminakaruw predicapjjañapataki, suma yatiyäwinak yatichapjjañapatak mayïna (Mat. 28:19, 20). Sañäni, Hechos libronjja Priscila sat kullakatwa parli. Jupampi Áquila sat esposopampejja, Qellqatanak wali sum uñtʼiri Apolos chacharuw Diosan arunakap “cheqaparjam wali sum qhanañchapjjäna” (Hech. 18:24-26).

5. Lucas 10:38, 39, 42 textorjamajja, ¿kunjamsa Jesusajj warminakar uñjirïna?

⁵ Jesusajj respetompiw warminakar uñjirïna. Fariseonakajja, warminakarojj jiskʼachapjjerïnwa, janiw jaqenak nayraqatan jupanakamp parlapjjerïkänti, yamas Qellqatanakat janipuniw warminakamp parlapjjerïkänti. Ukampis Jesusajj janiw fariseonakjamäkänti, antisas wali wakiskir cheqa yatichäwinakatwa chachanakampisa warminakampis parlirïna (Lucas 10:38, 39, 42 liytʼañataki). * Predikir sarirïkäna ukhasa, walja warminakaw jupamp chik sarapjjerïna, Jesusajj janiw jupanakar jarkʼirïkänti (Luc. 8:1-3). Yaqhep warminakarojja, jaktatap apostolonakapar yatiyañapatakiw khitäna (Juan 20:16-18).

6. ¿Kunjamsa apóstol Pablojj warminakar respetatap uñachtʼayäna?

⁶ Apóstol Pablojja warminakar respetompi uñjañapatakiw Timoteor ewjjtʼäna. ‘Jilïr warminakarojj taykamarjamaʼ, ‘tawaq warminakarusti kullakamarjamaw uñjañama’ sasaw Timoteor säna (1 Tim. 5:1, 2). Apóstol Pablojja, Diosar jukʼamp confiyañapatakiw Timoteor yanaptʼäna, ukhamäkchïnsa awichamampi mamitamampiw “sagrado qellqatanak” jiskʼatpach yatichapjjtamjja sasaw Timoteor säna (2 Tim. 1:5; 3:14, 15). Romankir cristianonakar carta qellqkäna ukhajja, Pablojj walja kullakanakaruw sutipat aruntäna. Uka kullakanakajj kuntï lurapkäna ukanak amuyasasti jupanakarojj wal yuspäräna (Rom. 16:1-4, 6, 12; Filip. 4:3).

7. ¿Kuna jisktʼanakarus qhanañchaskañäni?

⁷ Kunjamtï yatjjataniwayktanjja, Bibliajj janiw kullakanakajj jilatanakat sipan minus valoranïkaspas ukham yatichkiti. Kullakanakajj wali munasirïpjjatapata wajjtʼasirïpjjatapatjja, congregacionarojj wal yanaptʼapjje, ukasti congregacionan sumankañ utjañapataki mayachtʼatäñapatakiw yanaptʼi, ukatwa jilïr irpirinakajj jupanakar wal yuspärapjje. Ukampis aka jisktʼanakar qhanañchañaw wakisiraki: ¿kunatsa Jehová Diosajj kullakanakar pʼeqep chʼoqtʼasipjjañap awisajj mayi? Jilatanakakiw jilïr irpirita, congregacionan yanapiripat uttʼayatäpjje, ukhamajj ¿taqe jilatanakat kullakanakan pʼeqepäpjje?

8. Efesios 5:23 textorjamajja, ¿kunatsa taqe jilatanakajj jan taqpach kullakanakan pʼeqepäki?

⁸ Janiwa, Cristo sapakiw congregacionankir taqe kullakanakan pʼeqepajja (Efesios  5:23 liytʼañataki). Familianjja, esposow esposapan pʼeqepajja, ukampis bautisata yoqall wawapajj janiw mamapan pʼeqepäkaspati (Efes. 6:1, 2). Congregacionanjja, jilïr irpirinakajj janiw kullakanakarusa jilatanakarus taqe kunan pʼeqtʼapkaspati (1 Tes. 5:12; Heb. 13:17). ¿Awk taykapampi jan jakjje uka soltera kullakat kamsaraksnasa? Jupajj awk taykapar respetaskakiwa, ukampis janiw awkipajj jupar pʼeqtʼjjeti. Jilïr irpirinakarus respetarakiwa; ukampis congregacionankir jilatanakjamarakiw mä pʼeqtʼiriniki, jupajj Jesusawa.

9. ¿Kunatsa awisajj kullakanakajj pʼeqep chʼoqtʼasipjjañapa?

⁹ Cheqas Jehová Diosajja, chachanakaruw congregación pʼeqtʼapjjañapatakejj uttʼayi, janiw warminakarojj uttʼaykiti (1 Tim. 2:12). ¿Kunatsa? Kuna amtampitï Jesusarojj chachanakjjar pʼeqtʼañapatak uttʼaykejja, ukhamarakiw chachanakarojj congregacionajj suma organiztʼatäñapatak uttʼayi. Mä kullakarutï kuntï jilatanakaki lurapjjañapäki uk lurañapajj wakisini ukhajja, kullakajj pʼeqep chʼoqtʼasiñapawa ukwa Jehová Diosajj mayi (1 Cor. 11:4-7). * Ukjja, janiw kullakar jiskʼachañatak maykiti, jan ukasti Jupajj pʼeqtʼirinak uttʼayki ukanakar respetatap uñachtʼayañapatakiw mayi. Jichhajj aka jisktʼar qhanañchañäni: ¿familia pʼeqtʼirinakasa jilïr irpirinakas qhawqha autoridadanïpjjesa?

10. ¿Kunatsa mä jilïr irpirejj jilat kullakanakajj kunsa lurapjjañapa kunsa jan lurapjjañapäki uk sañatak derechonïkaspas ukham amuyasispa?

¹⁰ Jilïr irpirinakajj Cristoruw munasipjje, Jehová Diosampi Yoqapampejj ‘ovejanakapar’  cuidañapatak mayki ukanakarus munasipjjarakiwa (Juan 21:15-17). Mä jilïr irpirejj congregacionat wal llakisi, ukatwa jilat kullakanakan awkipäkaspas ukham amuyasispa. Inas akham amuychispa: “Mä familia pʼeqtʼiritï familiapar jarkʼaqañatakejj kunsa familiapajj lurañapa, kunsa jan lurañapäki uk sañatak derechonïchejja, jilïr irpirejj congregacionar jarkʼaqañatakejj kunsa jilat kullakanakajj lurapjjañapa, kunsa jan lurapjjañapäkaraki uk sañatakejj derechonirakiwa” sasa. Awisajj jilat kullakanakaw jilïr irpirinakarojj jupanak lanti amtapjjañapatak mayispa, ukatwa jupanakajj ukham amuyapjjarakispa. Ukampis ¿jilïr irpirinakasa familia pʼeqtʼirinakas mä pachpa autoridadanikïpjjeti?

11. ¿Kunanakansa familia pʼeqtʼirin pʼeqtʼatapampi jilïr irpirinakan pʼeqtʼatapampejj igualakejja?

¹¹ Familia pʼeqtʼirin pʼeqtʼatapampi jilïr irpirin pʼeqtʼatapampejj mä qhawqhanakan igualakiwa sasaw apóstol Pablojj säna (1 Tim. 3:4, 5). Sañäni, Jehová Diosajja, familia pʼeqtʼirir esposapasa wawanakapas istʼaspa ukwa muni, jilat kullakanakajj jilïr irpirinakar istʼapjjaspa ukwa munaraki (Col. 3:20). Familia pʼeqtʼirinakasa jilïr irpirinakas  khitinakat encargatäpkitï ukanakarojj munasipjjañapawa, valoranitwa uñjapjjañaparaki. Jehová Diosamp sum apasipjjañapatakis yanaptʼapjjañapawa, ukwa Diosajj munaraki. Familiapar sum pʼeqtʼapki uka jilatanakjamarakiw yanaptʼa munapki uka jilat kullakanakar jilïr irpirinakajj yanaptʼapjje (Sant. 2:15-17). Janiw ukakïkiti, Jehová Diosajja, jilïr irpirinakasa familia pʼeqtʼirinakas mayninakar Diosan leyinakap istʼapjjañapatak yanaptʼapjjaspa, Biblian ‘kunatï qellqatäki ukarjamak lurapjjaspa’ ukwa muni (1 Cor. 4:6).

12, 13. Romanos 7:2 textorjamajja, ¿familia pʼeqtʼirinakan pʼeqtʼatapampi jilïr irpirinakan pʼeqtʼatapampejj kunansa mayjajja?

¹² Ukampis jilïr irpirinakan pʼeqtʼatapampi familia pʼeqtʼirinakan pʼeqtʼatapampejj janiw igualäkarakiti. Sañäni, Jehová Diosajja, jilïr irpirinakarojj congregacionan juezäpjjañapataki, juch lurasin jan arrepentisirinakar jaqsupjjañapatakiw autoridad churi (1 Cor. 5:11-13).

¹³ Maysa toqetjja, kuntï jilïr irpirinakajj jan lurapkaspa uk lurapjjañapatakiw Jehová Diosajj familia pʼeqtʼirinakarojj autoridad churi. Ukanakat mayajja, familiapajj kunsa lurañapa kunsa jan lurañapäki uk sañatakisa phoqayañatakis derechoniwa (Romanos 7:2 liytʼañataki). Sañäni, arumanakajj kuna horasas wawanakapajj utar purinipjjañapa uk sañatakisa, jan ukar istʼapjjatapat cheqañchañatakis derechoniwa (Efes. 6:1). Ukampis janïr ukanak amtkasajja, jupatï munasirïchi ukhajj esposapamp ‘mä jañchikïpjjatap’ laykojj jupampiw parltʼani (Mat. 19:6). *

14. 1) Marcos 10:45 textorjamajja, ¿kunatsa Jehová Diosajj congregación pʼeqtʼañapatakejj Jesusar uttʼayäna? 2) ¿Cuerpo Gobernantejj kuna luräwinisa? (“ Cuerpo Gobernanten luräwinakapa” sat recuadro uñjjattʼäta).

¹⁴ Jehová Diosajj Yoqapan vidapampiw congregacionankir jilat kullakanakan vidapsa, taqe khitinakatï Jesusar confiyapkani uka jaqenakan vidapsa alawayi (Marcos 10:45 liytʼañataki; Hech. 20:28; 1 Cor. 15:21, 22). Ukatwa Jehová Diosajj congregación pʼeqtʼañapatakejj Jesusar uttʼayawayi. Ukhamajja, Jesusajj kunsa jaqenakasa, familianakasa, congregacionankir jilat kullakanakas lurapjjañapa uk sañatakisa phoqayañatakis derechoniwa (Gál. 6:2). Ukampis janiw kunsa lurañasa kunsa jan lurañasäki ukak siskistuti, jan ukasti sapa mayniruw munasiñampi uñjistu cuidarakistu (Efes. 5:29).

15, 16. ¿Kuntï Marley kullakasa Benjamin jilatas siski ukat kunsa yateqsna?

¹⁵ Kullakanakajja, Jesusajj khiti jilatanakarutï congregación cuidañapatak uttʼayki ukanakar istʼasaw Jesusar respetapjjatap uñachtʼayapjje. Estados Unidos markan jakasiri Marley kullakajj akham siwa: “Esposjamasa congregacionan mä kullakjamas kuna luräwinïktï uk wali valoranitwa uñjta. Jehová Diosajj esposojarusa, jilïr irpirinakarus pʼeqtʼañapatak uttʼayki ukar respetaskakiñajatakejj chʼamachasiskakiñajawa. Ukatakejja, esposojasa congregacionajankir jilïr irpirinakas wal yanaptʼapjjetu, jupanakajj respetompiw uñjapjjetu, kuntï lurkta uksa valoranitwa uñjapjjaraki” sasa. Walja kullakanakaw uka kullakjam jikjjatasipjjaraki.

¹⁶ Jehová Diosajja, jilatanakaruw pʼeqtʼirinakjam uttʼayi, jupanakajj kullakanakaru munasiñampi respetompi uñjasaw uk sum amuyapjjatap uñachtʼayapjje. Inglaterra markan jakasiri Benjamin jilatajj akham siwa: “Kullakanakajj tantachäwinakan arstʼapki ukanakat waljanakwa yateqta. Kunjamsa Bibliat jukʼamp sum yatjjatirista, predikirista, jaqenakarus yatichirista uka ewjjtʼanakapatsa waljanakwa yateqarakta. Kuntï jupanakajj lurapki ukajj wali valoraniwa” sasa.

17. ¿Jehová Diosajj pʼeqtʼirinak uttʼayki ukar kunatsa respetañasa?

¹⁷ Jehová Diosajj kunatsa pʼeqtʼirinak uttʼayi uk congregacionankir chachanakasa, warminakasa, familia pʼeqtʼirinakasa, jilïr irpirinakasa ukat taqenis amuyapjjañäni, ukar respetapjjarakiñäni ukhajja, congregacionan sumankañaw utjani. Jukʼampisa munasir Jehová Dios Awkisaruw jachʼañchañäni (Sal. 150:6).