Jesusajja, 29 maran bautisaskäna ukhaw Jachʼa Jilïr Sacerdotet ajllitäna. ¿Kunjamatsa uk yattanjja? Bautisasisajja, Jesusajj Diosan munañap lurañ munatapwa uñachtʼayäna. Mä arunjja vidap sacrificion churañ munatapwa uñachtʼayäna (Gál. 1:4; Heb. 10:5-10). Altarajj Diosan munañapampi sasiwa. Jesusajj sacrificiot vidap churkäna ukhajja, altaransa jiwkaspa ukhamänwa. Altarajja, Jesusajj bautisaskäna ukhat aksaruw utji. Diosan templopajja, Jehová Diosar cheqaparjam adorktan taqe ukanakawa, ukajj Jesusan jiwatapjjar uttʼayatawa. Uka templojja, Jesusajj bautisaskäna ukhat aksaruw utjaraki. Kunjamtï altarajj mä templon importantëkejja, ukhamarakiw Diosan munañap lurañajj Jupar cheqaparjam adorañatak wali importantejja (Mat. 3:16, 17; Heb. 5:4-6).

Diosan templopajj utj-jjäna ukhajja, jachʼa jilïr sacerdotew munasirakïna. Ukatwa Jehová Diosajj Jesusaru Jachʼa Jilïr Sacerdotëñapatak “espíritu santompi ajllïna, chʼamsa churarakïna” (Hech. 10:37, 38; Mar. 1:9-11). ¿Kunjamatsa Jesusajj janïr jiwkasina, janïr jiwatat jaktkasin Jachʼa Jilïr Sacerdotëñatak ajllitätap yattanjja? Uk qhanañchañatakejja, Aarón sacerdotempita, jupa qhepat ajllitäpkäna uka sacerdotenakat amuytʼañaw yanaptʼistu.

Moisesan Leyiparjamajja, jachʼa jilïr sacerdotekiw nayra tabernaculonsa, templonsa Santísimo lugarar mantaspäna. Mä cortinaw Santo lugarampi Santísimo lugarampi jaljäna. Jachʼa jilïr sacerdotejja, Juchanak Perdonayasiñatak Urukiw cortin pasasajj Santísimo lugarar mantirïna (Heb. 9:1-3, 6, 7). Aaronasa, qhepat jupa lanti sacerdotet servipkäna ukanakasa, cortin taypi janïr paskasaw jilïr sacerdotet ajllitäjjapjjäna. Jesusajj ukhamarakiw janïr jiwkasin Diosan templopan serviñatak Jilïr Sacerdotet ajllitäjjäna. Cortinajj Jesusan cuerpopawa, uka cortina pasasaw alajjpachar Jesusajj sarjjäna (Heb. 10:20). Ukatwa apóstol Pablojj akham säna: “Cristojj jachʼa jilïr sacerdotja[maw]” jutäna, ukatjja “pachpa alajjpacharuw jupajj mantäna” sasa (Heb. 9:11, 24).

¿Kunapachas machaq pactojj phoqasiñ qalltäna?

Jesusajj alajjpachar sarasajj sacrificiot churat vidap Awkipar katuykäna ukhajja, machaq pacto phoqasiñ qalltañapatakiw yanaptʼaskäna. ¿Machaq pacton phoqasiñ qalltañapatakejj kunanakas lurasïna? Uk kimsa toqet uñjañäni.

Maya, Jesusajj Jehová Dios nayraqataruw saräna. Paya, sacrificion churata perfecto vidapwa Jesusajj Awkipar katuyäna. Kimsa, Jehová Diosajj uka sacrificio katoqasïnwa. Taqe ukanakajj lurasïna ukhaw machaq pactojj phoqasiñ qalltäna.

Biblianjja kuna urus Diosajj Jesusan sacrificiop katoqasïna uk janiw siskiti. Ukhamasti kuna urupunis machaq pactojj phoqasiñ qalltäna uk janiw yatksnati. Ukampisa, Pentecostés fiesta urutak tunka urunak faltkipanwa Jesusajj alajjpachar makatäna (Hech. 1:3). Uka urunakanwa Jesusajj sacrificiot churata vidap Jehová Diosar katuyjjpachäna, Diosas katoqasirakpachäna (Heb. 9:12). Jehová Diosajj Jesusan sacrificiop katoqasïnwa, ukajj Pentecostés urunwa qhan uñjasïna (Hech. 2:1-4, 32, 33). Uka uruw machaq pacton phoqasiñ qalltatapajj qhan amuyasirakïna.

Ukhamasti, Jehová Diosajj Jesusan sacrificiop katoqkäna ukhaw machaq pactojj Jachʼa Jilïr Sacerdote Jesusampejj phoqasiñ qalltäna, Jesusajj ‘machaq pacton Yanapiripawa’ (Heb. 7:25; 8:1-3, 6; 9:13-15).