1. Kuntï 3 Juan 3, 4 texton siski ukarjamajja, ¿kunas wal kusisiyistu?

 APÓSTOL JUANAJJA khitinakarutï Diosat yatichkäna ukanakajj Diosar taqe chuyma servisipkakitap yatisajj wal kusisïna. Uka cristianonakajj walja jan walinakanwa uñjasipjjäna, ukatwa yanaptʼañatak chʼamachasïna, ukhamat Diosar jukʼamp confiyapjjañapataki. Jupanakarojj wawanakaparjamaw Juanajj uñjäna. Wawanakasasa jan ukajj Bibliat yatichktan ukanakasa bautisasipjje, Diosarus taqe chuyma servisipkaki ukhajja ukhamarakiw wal kusistanjja (3 Juan 3, 4 liytʼañataki).

2. ¿Kunatsa Juanajj cartanak qellqäna?

² Apóstol Juanajja, inas Éfeso markana jan ukajj uka jakʼan 98 maran jakchïna. Patmos islan carcelan llawintata uñjaskäna ukat mistjjasajj inas Éfeso markar sarjjchïna. Uka tiemponjja Jehová Diosan espiritupaw kimsa cartanak qellqañapatak yanaptʼäna. Uka cartanakjja, Diosat jan jitheqtiri jilat kullakanakan Jesusar confiyasipkakiñapataki, cheqa yatichäwin sarnaqasipkakiñapatakiw Juanajj qellqäna.

3. ¿Kuna jisktʼanakarus aka yatichäwin qhanañchaskañäni?

³ Uka tiemponjja, apostolonakat Juanakiw jakjjäna, juparojja kunjamsa apostatanakajj congregacionar engañjasipkäna ukaw wal llakisiyäna (1 Juan 2:18, 19, 26). * Uka apostatanakajj Diosar uñtʼapjjtwa sapkchïnsa, janiw Diosan mandamientonakap phoqapkänti. Juanajj kamsasas Diosan amuytʼayatäsajj jupanakar ewjjtʼäna uk yatjjatañäni. Yatjjatkasajj aka kimsa jisktʼanakaruw qhanañchañäni: ¿Cheqa yatichäwin sarnaqañajj kamsañsa muni? ¿Kuna jan walinakas cheqa yatichäwit saranukuyistaspa? ¿Kunjamsa cheqa yatichäwit jan saranukuñatakejj maynit maynikam yanaptʼassna?

4. Kuntï 1 Juan 2:3-6; 2 Juan 4, 6 textonakan siski ukarjamajja, ¿cheqa yatichäwin sarnaqañatakejj kunsa lurañasa?

⁴ Cheqa yatichäwin sarnaqañatakejja, kunsa Bibliajj yatichi ukwa nayraqat yatiñasa. Ukatsti Jehová Diosan ‘mandamientonakap phoqañasarakiwa’ (1 Juan 2:3-6; 2 Juan 4, 6 liytʼañataki). Kunjamsa Diosan mandamientonakap phoqañasa uk Jesusaw yatichawayistu. Ukhamasti Jesusat yateqasis sarnaqañatak chʼamachasisajja, Jehová Diosaruw istʼasktanjja (Juan 8:29; 1 Ped. 2:21).

5. ¿Kunanakarus taqe chuyma confiyañasa?

⁵ Cheqa yatichäwin sarnaqañatakejja, ‘Jehová Diosajj janiw kʼarisir Diosäkiti, kuntï Jupajj Biblian siski ukajj cheqawa’ sasaw taqe chuym confiyañasa. Ukatsti Jesusapuniw jutañapäkäna uka Mesiasajja sasaw confiyañasaraki. Jichhürunakanjja, Jesusajj Diosan Reinopan reyit ajllitätap waljaniw jan creyipkiti. Juanajja “walja engañjirinakaw uñstaski” sasaw säna, uka engañjirinakaw khitinakatï Jehová Diosatsa Jesusatsa pächasipki ukanakar cheqa yatichäwinakat saranukuyaspa sasaw sarakïna (2 Juan 7-11). Juanajj akham sasaw qellqarakïna: “¿Khitis kʼarejja, janit khititejj Jesusan Cristötap jan creyki ukäki?” sasa (1 Juan 2:22). Bibliat sum yatjjatañäni ukhakiw jan engañjatäkañäniti. Ukhakirakiw Jehová Diosarusa Jesusarusa sum uñtʼañäni (Juan 17:3). Ukatsti cheqa yatichäwinkatasatsa janiw pächaskañäniti.

6. ¿Kunas cristiano wayn tawaqonakar cheqa yatichäwit saranukuyaspa?

⁶ Jaqenakan yatichäwinakapampi jan engañjayasiñatakejja, taqe cristianonakaw wal amuyasiñasa (1 Juan 2:26). Yamas wayn tawaqonakaw jukʼamp amuyasipjjañapa. Francia markankiri, 25 marani Alexia * sat kullakajj akham siwa: “Colegionkaskayäta ukhajja, evolucionampita jaqenakan yatichäwinakapampitwa yatichapjjetäna. Awisajj uka yatichäwinakajja, kunatï cheqäki ukatwa pächasiyitäna. Awisasti uka yatichäwinakat jukʼamp yatiñwa munayäta. Ukampis ‘kuntï profesoranakajajj yatichapkitu ukanakar facilak creyiñat sipansa, kuntï Bibliajj yatichki ukanak liytʼañajarakiwa’ sasaw amuyayäta” sasa. Alexia kullakajja, La vida... ¿cómo se presentó aquí? ¿Por evolución, o por creación? sat librotwa yatjjatäna. Mä qhawqha semananakat janiw  pächasjjänti. Uka kullakajj akham saskakiwa: “Naya pachpaw Bibliajj kuntï yatichki ukajj cheqätap yatjjatayäta. Ukatjja ukarjam sarnaqañajj sum jakasiñataki, kusisit jakasiñatakiw yanaptʼitani sasaw amuyayäta” sasa.

7. ¿Kunsa jan lurañasäki, kunatsa?

⁷ Wayn tawaqonakasa jilïrinakasa, jan walinak lurkasin Diosar sumsa servisksna ukham janiw tukuñasäkiti. Apóstol Juanajja, cheqa yatichäwin sarnaqkasajj janiw qʼañu juchanak lurañasäkiti sasaw säna (1 Juan 1:6). Jehová Diosar kusisiyañ munstan ukhajja, taqenis luratanakas uñjapkaspa ukhamwa sarnaqañasa. Cheqas taqe luratanakaswa Diosajj uñjaski, janiw kuna juchsa Diosat imtʼksnati (Heb. 4:13).

8. ¿Kuna jan wali amuyunaksa apanukuñasa?

⁸ Janiw kunjamtï jaqenakajj juchanak lurañar uñjapki ukham uñjañasäkiti. Apóstol Juanajj akham sänwa: “Jiwasatejj ‘janiw juchanïktanti’ sisstan ukhajja, jiwas pachpaw engañjasisktanjja” sasa (1 Juan 1:8). Apóstol Juanajj jakkäna uka tiemponjja, ‘kuntï Diosajj uñiski ukanak lurkasas Diosan amigopäsksnawa’ sasaw apostatanakajj sapjjäna. Jichhürunakanjja, waljaniw uka pachp amuyapjjaraki. Diosarojj creyipjjtwa sapkchisa, janiw kunjamtï Diosajj jucha lurañar uñjki ukham uñjapkiti, yamas chacha warmi ikthapiñ toqet Diosajj kamsisa uk janiw istʼañ munapkiti. Kunanakatï Jehová Diosatak qʼañu juchäki ukanakjja, ‘maynejj muñchi ukhajj luraskaspawa, ukajj sapa maynitäjjewa, janiw juchäkiti’ sasaw jaqenakajj sapjje.

9. ¿Kunjamsa wayn tawaqonakarojj Biblian yatichäwinakaparjam sarnaqañajj yanaptʼi?

⁹ Cristiano wayn tawaqonakarojja, trabajonsa colegionsa compañeronakapajj qʼañu juchanak lurañ toqet jupanakjam amuyapjjañapatakiw chʼamañchapjjaspa. Ukaw Aleksandar sat jilatarojj pasäna. Jupajj akham siwa: “Colegiojanjja yaqhep tawaqonakajj jupampi ikintasiñajatakiw wal parljjayapjjetäna.  ‘Jumarojj chachanakaw gustpachätamjja ukatwa jan mä tawaqompis parlktati’ sasaw sapjjarakitäna” sasa. Jumajj inas ukham yantʼanakan uñjasiraksta. Ukampis Biblian yatichäwinakaparjam sarnaqäta ukhajja, janiw kunatsa juchañchaskätati, janirakiw usuntkätati, ni kunatsa chuym usuyaskätati, Jehová Diosan suma amigopäskakïtawa. Tentacionanakar sapakuti atipjäta ukhajja, kunatï walïki ukanak lurañajj jukʼamp faciläniwa. Kuntï jaqenakajj chacha warmi ikthapiñ toqet amuyapki ukajja, Supayatwa juti. Ukhamasti akapachankir jaqenakjam jan amuyasajj ‘Supayaruw atipjasktajja’ (1 Juan 2:14).

10. ¿Kunjamsa 1 Juan 1:9 textojj qʼoma concienciampi Diosar serviñatak yanaptʼistu?

¹⁰ Kunas jan juchäki kunas juchajja ukjja Jehová Diosakiw sistaspa. Jiwasajj jan juchachasiñatakiw wal chʼamachastanjja. Ukampis mä juchar purtʼastan ukhajja, oracionanwa Diosar yatiytanjja (1 Juan 1:9 liytʼañataki). Mä jachʼa juchar purtʼastan ukhasti, jilïr irpirinakan yanaptʼapwa thaqaraktanjja. ¿Kunatsa? Jehová Diosaw jupanakarojj jiwasar yanaptʼapjjañapatak uttʼayi (Sant. 5:14-16). Nayrajj juchanakarus purtʼaskchiyätanjja, janiw ukanakat juchañchasjjañasäkiti. ¿Kunatsa? Wali munasir Jehová Dios Awkisajj Wawaparuw jiwas layku jiwañapatak khitanïna, ukhamat juchanakasat perdonatäñasataki. Juchanakasat taqe chuyma arrepentistan ukhajja, Diosajj perdonistuwa. Ukhamatwa qʼoma concienciampi Jupar serviskaksna (1 Juan 2:1, 2, 12; 3:19, 20).

11. ¿Kunjamsa apostatanakan kʼari yatichäwinakapampi jan engañjayasksna?

¹¹ Apostatanakan yatichäwinakap janiw istʼañasäkiti. Cristiano congregacionajj utj-jjäna ukhatpachaw Supayajj engañjiri jaqenakampi cristianonakar engañjaski, ukhamat cristianonakajj Diosar jan confiyjjapjjañapataki. Ukatwa kunas cheqa yatichäwejja, kunas  kʼari yatichäwejja ukanak sum amuyañasa. * Jehová Diosar jan confiyjjañataki, jilat kullakanakasar jan munasjjañatakejja enemigonakasajj Internetampi, redes sociales ukanakampiw engañjistaspa. Janiw uka kʼari yatichäwinakar creyiñasäkiti, ukanakajj Supayatwa juti (1 Juan 4:1, 6; Apoc. 12:9).

12. ¿Kunatsa yateqktan ukanakar taqe chuyma confiyañasa?

¹² Supayan yantʼanakapar atipjañ munstan ukhajja, Jesusar jukʼamp confiyañataki, Diosajj kunjamsa Jesús toqejj amtanakap phoqaski ukar jukʼamp confiyañatakiw chʼamachasiñasa. Ukatsti Jehová Diosajj markapar uñjapjjañapatak suma phoqeri amuyasir esclavor uttʼayki ukarus confiyañasarakiwa (Mat. 24:45-47). Bibliat yatjjatapuniñäni ukhajja, Diosar confiyatasajj manqhakam saphintata mä qoqar uñtatäniwa. Pablojj Colosas markankir congregacionar qellqasajj niya uka pachpwa akham sarakïna: “Kunjamtï Cristo Jesús Tatitur katoqapktajja, uka pachparak jumanakajj jupamp mayakïsin sarnaqasipkakim. [...] Cristor suma saphintatäpjjam, suma saytʼatäpjjarakim, Cristor confiyañanjja suma uttʼayatäpjjam” sasa (Col. 2:6, 7). Ukhamtï Diosar confiyañänejja, janiw Supayasa ni arkirinakapasa Diosat jitheqtaykistaniti (2 Juan 8, 9).

13. ¿Kunsa yattanjja, kunatsa?

¹³ Akapachankir jaqenakajj uñisistaniwa, uk sum yattanjja (1 Juan 3:13). Juanajj akham sänwa: “Akapachajj Supayan amparapankiwa” sasa (1 Juan 5:19). Akapachan tukusiñapajj sapürutjamaw jukʼamp jakʼachasisinki, ukatwa Supayajj nayrat sipansa jukʼamp coleratäjje (Apoc. 12:12). Supayajj janiw qʼañu juchanakampikisa, ni apostatanakan yatichäwinakapampikisa Diosat apaqañ munkistuti, jan ukasti tʼaqesiyasaw Diosat apaqañ munarakistu. Supayajj jukʼa tiemponikëjjatap laykuw predicación jarkʼañatakisa, Diosar jan confiyjjañasatakisa jukʼamp chʼamachasiski. Ukatwa yaqhep markanakan kunanaktï Jehová Diosan Testigonakapajj lurktan ukanakat mä jukʼakisa, jan ukajj taqpachasa jarkʼat uñjasi. Ukhampachas uka markanakankir jilat kullakanakajj aguantasipkakiwa. Kunsay Supayajj luraskistpan, jan jitheqtas Diosar serviskakiñäniwa.

14. ¿Kunjamsa jilat kullakanakarojj cheqa yatichäwit jan saranukupjjañapatak yanaptʼsna?

¹⁴ Jilat kullakanakasat sinttʼasisaw cheqa yatichäwit jan saranukupjjañapatak yanaptʼsna (1 Juan 3:10, 11, 16-18). Walinsa jan walinsa maynit maynikamaw munasiñampi uñjasiñasa. Sañäni, ¿mä jilatasa jan ukajj mä kullakasa, familiapat maynin jiwatapatti chuymachtʼatäñ muni, jan ukajj kunan yanaptʼatäñcha muni? ¿Mä terremoto pasatapatti jilat kullakanakajj Tantachasiñ Uta jan ukajj utanakapa mayampi lurañatak yanaptʼa munapjje? Jilat kullakanakasar wal munasitasjja, janiw arunakampik uñachtʼayktanti, jan ukasti luratanakasampiw uñachtʼaytanjja.

15. ¿Kunsa 1 Juan 4:7, 8 textorjamajj lurañasa?

¹⁵ Maynit maynikam munasiñampi uñjasktan ukhajja, alajjpachankir Awkisatwa yateqasisktanjja (1 Juan 4:7, 8 liytʼañataki). Mayninakan pantjasitanakap perdonasaw munasirïtas uñachtʼayaraktanjja. Uk amuytʼañäni, maynejj chuym ustʼaykistu ukhajja, munasiñaw perdonañatakisa, pantjasitap armjjañatakisa yanaptʼistu (Col. 3:13). Kunas Aldo jilatar pasäna uk uñjañäni. Jupa kasta jaqenakat jan wal parlirwa respetompi uñjkäna  uka jilatar istʼäna, ukaw jupar chuym ustʼayäna. Aldojj akham siwa: “Uka jilatar respetaskakiñatakejj walpun Diosar orasiyäta” sasa. Ukatsti jupampi predikir sarañatakiw parlarakïna. Ukanwa kunja chuyma ustʼatänsa uk yatiyäna. Jilatajj akham saskakiwa: “Kunjamsa arunakapajj chuym ustʼayitäna uk yatisajja, uka jilatajj perdón mayisïna. Arupanwa taqe chuyma arrepentisitapajj qhanäna. Ukatjja mayampiw amigöjjapjjayäta, uka jan walsa armjjapjjarakiyätwa” sasa.

16, 17. ¿Kunanak lurañsa taqe chuym amtañasa?

¹⁶ Apóstol Juanajj jilat kullakanakar wal munasïna, Diosar taqe chuyma confiyapjjaspa ukwa munarakïna. Qhawqsa jupanakar munasïna, jupanakatsa llakisirakïna ukajja, kimsa cartanakapanwa qhan uñjasi. Cristompi chika alajjpachat gobernanipkani uka jilatanakasa kullakanakasa, apóstol Juanjam munasirïpjjarakiniwa, uk yatiñajj wal chʼamañchtʼistu (1 Juan 2:27).

¹⁷ Yatjjataniwayktan ukanakjja wali valoranit uñjañasawa. Cheqa yatichäwinakat janipuniw saranukuñasäkiti, Jehová Diosarus taqe kunanwa istʼañasa. Bibliat yatjjatañasapuniwa, kuntï Biblian yateqktan ukarus confiyañasawa. Jesusar jukʼamp confiyañatak chʼamachasiñasawa. Jaqenakan amuyunakapsa, apostatanakan kʼari yatichäwinakapsa janiw istʼañasäkiti. Jan walinak lurkasin Diosar sumsa servisksna ukham jan tukuñataki, jan juchachasiñatakiw chʼamachasiñasa. Jehová Diosan mandamientonakaparjamaw sarnaqañasa. Jilat kullakanakasarojj Diosat jan jitheqtapjjañapatakiw yanaptʼañasa, ukjja chuym ustʼayapkistu ukanakar perdonasa, yanaptʼa munapki ukanakar yanaptʼasaw lursna. Taqe ukanak lurañäni ukhajja, kuna jan walinakan uñjaskasasa janipuniw cheqa yatichäwinakat saranukkañäniti.