Nayajj Saint Paul (Minnesota) sat markanwa 1954 maran nasiyäta. Familiajanjja catolicöpjjayätwa, janiw pobrepkayätti ni walja qollqenïpkayätsa. Phesqa wawanakat nayajj payïrïtwa. Wawäkasajja, católica escuelankayätwa, tatacuran yanapiriparakiyätwa, ukampis janiw Bibliat sum yatkayätti. Diosaw taqe kunsa luri sasinsa creykchiyätjja, iglesiarojj janiw confiykayätti.

Facultad de Derecho William Mitchell ukan mä mara yateqjjayäta ukhajja, Testigo mä chacha warmiw utar leqtʼanipjjäna, isi tʼajjsuskataj uñjasajja, ‘kuttʼanipjjäwa’ sasaw munasiñamp sapjjetäna. Kuttʼanipkäna ukhajja, akham sasaw jisktʼayäta: “¿Kunatsa jan wali jaqenakajj suma jaqenakat sipansa jukʼamp sum jakasipjje? ¿Kunas kusisit jakasiñatak munasi?” sasa. Ukatjja, La verdad que lleva a vida eterna sat librompi, Traducción del Nuevo Mundo de las Santas Escrituras sat chʼojjña tapani Bibliampwa katoqasiyäta. Bibliat yatjjatañwa qalltarakiyäta. Kuntï jan yatkayäta ukanakwa yateqayäta. Diosan Reinopaw aka oraq apnaqjjani sasin yatjjatasajj wali  kusisitäyätwa. Jaqenakan gobiernopajj janiw jan walinak chhaqtaykaspati, antisas jukʼamp jan walinakakwa utjayi sasaw amuyjjayäta.

1982 mara qalltaw Jehová Diosar vidaj katuyasiyäta, uka pachpa mararakiw “Verdad del Reino” sat asamblean bautisasiyäta. Uka asambleajj St. Paul Civic Center sat estadionwa apasïna. Qhepa semanajja, abogadot trabajiñatak licencia apsuñataki mä exámen chuririw uka pachpa lugarar kuttʼayäta. Octubre phajjsi qalltaw uka exámen aprobataj yatiyapjjetäna.

Uka asambleanjja, Mike Richardson sat jilataruw uñtʼayäta, jupajj Brooklyn (Nueva York) markankir Betelanwa servïna. Uka jilataw Betelan Oficina de Asuntos Legales utj-jjatap yatiyitäna. Ukhajj kuntï Etiopía markankir mä jilïr oficialajj siskäna ukwa amtasiyäta, arunakapajj Hechos 8:36 texton qellqatawa. Uk amtasisajj akhamwa jisktʼasiyäta: “¿Kunarak Oficina de Asuntos Legales ukan yanaptʼañatak jarkʼitusti?” sasa. Ukhamasti Betelan yanaptʼañatakiw mä solicitud phoqantayäta.

Awk taykajajj janiw Testigöñaj munapkänti. ¿Betelan trabajiñajj kunjamsa abogado profecionamar yanaptʼani? sasaw tatajajj jisktʼitäna. ‘Voluntariotwa saräjja, kunjamtï yaqha betelitanakarus churapki uka pachparakwa sapa phajjsejj mä jukʼa qollq churapjjetani’ sasaw tatajar sarakiyäta.

Niyakejjay tribunalan trabajo katoqaschiyätjja, ukwa Betelar janïr sarkasajj phoqañajäna. 1984 maranwa Brooklyn markankiri Betelan serviñ qalltayäta. Oficina de Asuntos Legales ukan yanaptʼañatakiw asignapjjetäna. Kuntï tribunalan trabajis yateqkayäta ukajj Betelan wal yanaptʼitäna.

1983 maran noviembre phajjsinwa, Jehová Diosan Testigonakapajj Jersey City (Nueva Jersey) sat markan Stanley sat teatro alapjjäna. Uka teatron lusampi umampi mayamp instalañatakiw jilatanakajj permisonak mayipjjäna. Testigonakajj uka markankiri autoridadanakamp tantachasipkäna ukhajja, ‘jachʼa tantachäwinak apasiñapatakiw uka teatro munapjjta’ sasaw jupanakar sapjjäna. Ukampis mä problemaw utjäna. Uka markan leyinakaparjamajja, iglesianakajj janiw marka taypinkañapäkänti. Ukampis uka teatrojj taypinkänwa, negocionakaw uka jakʼan lurasirakirïna, ukatwa permiso churañ jan munapkänti. Jilatanakajj autoridadanakar mayampsa uka toqet quejasipkchïnjja inamayakïnwa.

 Mä semana Betelankjjayäta ukhajja, jilatanakajj Saint Paul (Minnesota) markankir tribunalaruw sarapjjäna. Niyakejjay uka tribunalan nayrajj trabajchiyätjja, uka toqenakat yatiyätwa. Testigonakan mä abogadopajj akham sänwa: ‘Stanley teatronjja, peliculanaka conciertonaka yaqha ukhamanakaw presentasirïna. Ukhamajj ¿kunatsa Diosar adorañataki uka teatron tantachasiñajj jan walïkaspa?’ sasa. Tribunalajj uka juicio wal uñakiptʼasajja, Jersey City markan autoridadanakajj Diosaru libre adorañatak derechonak jan respetatapwa qhanstayäna. Ukatjja, teatrotak permisonak churañapatakiw autoridadanakar mayïna. Ukanak uñjasajja, kunjamsa Jehová Diosajj munañap lurasiskakiñapatakejj leyinak toqe markapar yanaptʼi ukwa amuyayäta. Uka juicion mä jukʼa yanaptʼasajj walpun kusisiyäta.

Permisonëjjapjjäna ukhajja, teatro askichañwa qalltapjjäna, janïr maräkipanwa askichañ tukuyapjjäna. 8 de septiembre, 1985 maranwa Galaad Escuelata, clase 79 ukajj uka teatron graduasïna. Jichhürunakanjja uka teatrojj Salón de Asambleas sasin uñtʼatäjjewa. Janïr Betelankkasajj yaqha cheqan abogadjam trabajkayäta ukat sipansa, teatrotak permiso mayipkäna uka abogadonakamp chika Jehová Diosatak trabajiñaw jukʼamp kusisiyitäna. Qhepatjja, walja juicionakanwa yanaptʼawayta, Jehová Diosaw uk lurañatak yanaptʼitäna.

80 maranakanjja doctoranakasa hospitalanakasa Testigonakajj wila jan uchayasis qollayasiñ munapkäna ukarojj janiw respetapkänti. Usur warminakaw jukʼamp jan walin uñjasipjjäna. Usur warminakajj wila jan uchayasiñatakejj janiw derechonïpkiti sasaw juezanakajj sapjjäna. ¿Kunatsa? Wila jan uchayasitapat jiwaspäna ukhajja, wawapajj jan taykaniw jilsuspäna.

1988 maran 29 de diciembre uruw Denise Nicoleau kullakajj wawap ususïna, ukhajj wilaw wal phalläna. Wilan utjki uka hemoglobinajj 5.0 ukats minusakiw cuerpopan utj-jjäna, ukatwa doctorapajj ‘wila uchayasiñamawa’ säna. Ukampis kullakajj janiw munkänti. Qhepür alwajja, hospitalajj kullakar wil uchañatakiw mä juezarojj autorización mayïna. Juezajj janiw Denise kullakarusa ni esposoparusa jisktʼkänti, janirakiw ‘wilwa uchapjjätam’ sasin yatiykänti.

Kullakan esposopasa familiaranakapas wila uchapjjañap janis munapkchïnjja, viernes 30 de diciembre uruw kullakar hospitalan wila uchapjjäna. Uka jaypʼurojj yaqhep familiaranakaparu, yaqhep jilïr irpirinakaruw policiajj katuntäna. Wila jan uchapjjañapatakiw doctoranakar jarkʼapjjäna sasaw jupanakar juchañchapjjäna. Sábado  31 de diciembre alwajja, kunatï hospitalan paskäna ukajj taqpach noticianakanwa Nueva York markansa uka jakʼanakansa yatiyasïna.

Ukatwa lunes alwajj jachʼa tribunalar yatiyir sarayäta, ukanjja Milton Mollen sat jilïr juezampiw parlayäta. Kunas pasäna uk yatiykasajja, kunjamsa maynïr juezajj jan jisktʼasin wila uchapjjañapatak mä autorización churäna ukwa jukʼamp qhanañchayäta. Mollen juezajj ‘jaypʼur kuttʼanim, ukanwa kunanakas pasäna, leyinakajj uka toqet kamsisa ukanak parltʼañäniʼ sasin sitäna. Hospitalan abogadoparus jaypʼutak jawsayarakïnwa. Philip Brumley superintendentejaw compañitäna. Juez nayraqatan mayni abogadompejj niyaw toqtasipjjayäta. Brumley jilatajj akham sasaw cuadernopar qellqtʼanitäna: “Jan sinti jachʼat parlamti” sasa. Kuntï hospitalan abogadopajj siskäna ukajj jan walïtap uñachtʼayañatakejj colerataw jachʼat parljjayäta, ukatwa qellqtʼanitapajj wali wakiskirïna.

Mä hora pasatatjja, Mollen juezajj qharür alwpachaw uk askichañäni sasaw säna. Oficinapat mistusipkayäta ukhajja, akham sapjjetänwa: “Hospitalan abogadopatakejj janiw faciläkaniti” sasa. Ukham sasinjja, hospitalajj wila uchañatak derechoniwa sasin uñachtʼayañajj abogadotak chʼamäniwa sañwa munaskäna. Uk istʼasajja, Diosaw aka juicion atipañatak yanaptʼistani sasaw confiyayäta. Jehová Diosajj kunjamsa nanak toqe amtap phoqaskäna uk uñjañajj wali kusiskañänwa.

Ukürojj wali arumkamaw juicion kamsapjjäsa uk wakichapjjayäta. Tribunalajj Brooklyn markankir Betelat mä qhawqha cuadranak sarañankakïnwa. Ukatwa Oficina de Asuntos Legales ukan yanapirinakat jilapartejj kayuk sarapjjäna. Tribunalankiri pusi juezanakajj kuntï sapkayäta uk istʼasajja, mayni juezajj wila uchañatak hospitalar mä orden churkäna uk anulapjjänwa. Uka juicion Denise kullakaw atipäna, kullakar jan istʼasin wila uchapjjañapatak orden churasajja, hospitalan juezapajj kullakan derechonakapwa jan respetkänti sasaw juezanakajj sapjjäna.

Qhepatjja, Nueva York markan jilïr tribunalapajja, Denise kullakajj wila jan uchayasis qollayasiñatak derechoniwa sasaw sarakïna. Estados Unidos markan jachʼa tribunalanakapan wila jan uchayasiñ toqet pusi juicionak atipañatak yanaptʼkayäta ukanakat nayrïrejj Denise kullakatänwa. (“ Jachʼa tribunalanakanwa atipapjjayäta”  sat recuadro uñjjattʼäta). Betelanjja, divorcionakata, khitinakas wawanak uywani uka toqeta, oraqenakata ukhamaraki edificionak toqet parlir juicionakanwa abogado jilat kullakanakamp trabajiyäta.

Dawn sat kullakar uñtʼkayäta ukhajja, kimsa wawanïnwa, divorciatarakïnwa. Jupajj wal trabajïna, precursorarakïnwa. Dawn kullakajj jan walinakansa jakäwipan uñjaskchïnjja, Diosar taqe chuym serviskakïnwa, ukaw nayar wal gustitäna. 1992 maran “Portadores de Luz” sat asamblearuw Nueva York markan sarapjjayäta, ukanwa uñtʼasiñatak jupamp parlayäta. Mä mara pasatatjja casarasjjapjjayätwa, nayajj Betelan yanaptʼaskakiyätwa. Diosar taqe chuym serviri, kusisit sarnaqer esposanïñajj nayatak Diosan mä suma regalopawa. Kunjamtï Proverbios 31:12 texton siskejja esposajajj sapüruw wal yanaptʼitu.

Casarasipkayäta ukhajja, esposajan wawanakapajj 11, 13 ukat 16 maranakanïpjjänwa. Nayajj jupanakatak suma awkïñwa munayäta, ukatwa kunjamsa padrastronakajj wawanak uywaspa uka toqet parlir qellqatanak sum yatjjatayäta, ukhamat ukarjam lurañataki. Familiajan problemanakajj utjkchïnsa, wawanakajj mä munasir tataparjama, confiykay amigoparjamaw uñjapjjetäna, ukaw wal kusisiyitäna. Wawanakajan amigonakaparojj sumwa utan katoqapjjerïta, wali kusisitäpjjarakiriwa.

2013 maranjja, tatajampiru esposajan tatapampiru mamapampir cuidiriw Wisconsin markar esposajampejj sarjjapjjayäta. Ukhamäkchïnsa Betelan yanaptʼaskakiyätwa. Leyinak toqet Diosan markapar yanaptʼaskakiñajatakiw invittʼapjjetäna, voluntariotwa sarayäta.

2018 maran septiembre phajjsinwa mallqʼat usutätaj amuyasiyäta. Doctorajajj kunas pasitäna uk janiw sañ puedkitänti, ukampis yaqha doctoraw neurólogo doctoramp uñjayasinim sitäna. 2019 maran enero phajjsinwa neurólogo doctorajj parálisis supranuclear progresiva (PSP) usunïpachätawa sasin yatiyitäna. Uka usojj jukʼa uñtʼatakiwa.

Nayajj chhullunkhaya patjjan patinañ jiskʼatpachwa sum yatta, ukampis neurólogo doctorar sarkayäta ukhat kimsa uru pasatatjja, patinkasajj tinkusaw ampar pʼakjasta. Ukhamatwa musculonakajajj jan sum funcionjjatap amuyasiyäta. Usujajj ratukiw jan waltʼayaskitu. Parlañasa, onjjtañasa, mallantañas sapürutjamaw jukʼamp chʼamäjje.

Diosan markapar abogadot yanaptʼatajat wali kusisitätwa. Doctoranaka, abogadonaka, juezanakajj liyipki uka revistanakatak walja articulonak qellqatajasa, seminarionakan oraqpachan arstʼatajas nayatak wali kusiskañawa. Taqe ukanak lurañajja, Jehová Diosan servirinakapajj wila jan uchayasis qollayasiñatak derechonïpki uka toqet saytʼasiñatakiw yanaptʼawayitu. Ukampis kunjamtï Lucas 17:10 texton siskejja, ‘jan kunatak servir esclavokïtwa. Kuna lurañatï wakiskäna ukakwa lurtjja’.