Casarasipki ukanakajj kusisita, jan jaljtasa, wiñayatak jakasipjjaspa ukwa Jehová Diosajj muni (Mat. 19:4-6). Jumatï casarasiñ munstajja, ¿kunjamsa mä suma esposa jan ukajj mä suma esposo jikjjatasma? Niyakejjay Jehová Diosajj lurchistojja, maynimp uñtʼaskasasa, matrimonions kusisita jakasiñatakejj kun lurañasasa uk Jupaw sum yati. Jumatï Biblian wiñay yatichäwinakaparjam sarnaqäta ukhajj kusisitaw jakasïta. Uka wiñay yatichäwinakat mä qhawqha uñjañäni.

Nayraqatajj akwa jiwas pachpat amuytʼasiñasa: ‘Jaqen chuymapajj taqe kunat sipans jukʼamp engañasiriwa, ratukiw kuns muni’ (Jer. 17:9). Casarasiñ munapki ukanakajj uñtʼasiñatak panipa mistupjje ukhajja, ratukiw munasiñampi apayasipjjaspa, ukatsti jan suma amtanakaruw puripjjaspa. Chuymapampi apayasisaki casarasipjjaspa ukhajja, qhepat chuyma ustʼataw uñjasipjjaspa (Prov. 28:26, TNM). Ukhamajja, uñtʼasisipki ukanakajj janiw janïr sum uñtʼaskasajj qhawqsa munasipjje uk sasipjjañapäkiti, ni promesanaksa lurasipjjañapäkiti.

Proverbios 22:3 textojj akham siwa: ‘Amuytʼasir jaqejja mä jan waltʼäwi uñjasajj imantasjjewa, ukampis jan experienciani jaqenakajja jan waltʼäwirojj mantasipkakiwa ukatsti jan walinakan uñjasisajj tʼaqesipjjewa’ sasa. ¿Internetan maynimp uñtʼasiñatak utjki ukajj kuna jan walinakansa maynir uñjasiyaspa? Yaqhepanakajj Internet toqe jan uñtʼatanakampi uñtʼasisajj engañjataw uñjasipjje. Janiw ukakïkiti, jan wali jaqenakajj Internetan yaqha sutimpiw mä cuenta jistʼarapjje, ukhamatwa jaqenakar engañjapjje, qollqsa lunthatapjjaraki. Uka jan wali luririnakajj Jehová Diosan Testigopatwa awisajj pasayasipjje.

Maysa toqetsti, Internetan maynimp uñtʼasiñatak utjki ukanakat yaqhepanjja, khitimpis maynejj casarasispa ukwa computadoran programanakap toqe uñachtʼayapjje. Ukampis uka programanakajj cheqapunit pareja jikjjatañatak yanaptʼi ukajj janiw yatiskiti. Ukhamajj ¿khitimpis maynejj casarasini uk ajlliñapatakejj computadoran programanakapar confiyañapajj walïspati? Janiwa. Computadoran programanakapajj janiw Biblian wiñay yatichäwinakapjam confiykayäkiti (Prov. 1:7; 3:5-7).

Proverbios 14:15 textonwa mä suma yatichäwejj utjaraki. Ukan akham siwa: ‘Jan experienciani jaqejja taqe kuntï jupar sapki ukjja creyikiwa, ukampis amuytʼasir jaqejja kunsa lurani uk sum amuytʼasi’ sasa. Maynejj suma esposäniti, jan ukajj  suma esposöniti uk janïr amtkasajj sumwa jupar uñtʼañapa. Ukampis Internet toqejj janiw maynir sum uñtʼkaspati. Maynejj perfilap uñjasasa, walja horanak Internet toqe panipa parlasas ¿sumti maynir uñtʼaspa? Janiwa. Yaqhepajja, munatapar jikjjatjjapjjaspasa ukhamwa amuyapjjäna, ukampis ajanuy ajanu uñtʼasisajj janiw kunjamtï amuyapkäna ukhamäkänti.

Mä Salmo qellqerejj akham sänwa: ‘Janiw nayajj engañir jaqenakampejj chikachaskti, janiw kʼari chuyman jaqenakampejj chikachaskti’ sasa (Sal. 26:4). Jukʼamp munkayäñatakejj Internetar fotonakap kʼarisisa apkatañajj walikïskaspasa ukhamwa walja jaqenakajj amuyapjje. Kunjam jaqëpjjesa ukasa, jan wali jaqëtapas janiw mensajenakapan qhan amuyaskaspati. Inas yaqhepanakajj Jehová Diosan Testigopätwa sasin sapjjchispa, ukampis ¿bautisatäpjjeti? ¿Amuytʼasiri cristianöpjjeti? ¿Jehová Diosampejj sumti apasipjje? ¿Congregacionan respetompit jupar uñjapjje? ¿Jan ukajj jan walinak lurirïpjjecha, ‘jan wali jaqenakäpjjecha’? (1 Cor. 15:33; 2 Tim. 2:20, 21). ¿Casarasiñatakejj Bibliarjam librëpjjeti? Maynejj taqe ukanakwa yatiñapa. Ukampis jupar sum uñtʼiri jilat kullakanakar jan jisktʼkani ukhajja, ukanak yatiñajj chʼamakïspawa (Prov. 15:22). Diosar jan jitheqtas serviri mä jilat kullakajja, janipuniw jan bautisatampejj casarasiñ amtkaspati, ukhamat “mä yukurojj chʼulla chʼulla yapintat” uka jaqemp jan uñjasiñataki (2 Cor. 6:14; 1 Cor. 7:39).

Niyakejjay Internetan maynimp uñtʼasiñatak utjki uka cheqanakajj peligrosöchejja, yaqha toqenakatwa maynejj mä jilataru jan ukajj mä kullakar uñtʼaspa, ukhamat suma esposa, jan ukajj suma esposo jikjjatañapataki. Tantachasiñajj jan jarkʼatäki ukhajja, tantachäwinakana, jachʼa tantachäwinakana ukat yaqha ukhamanakanwa mayni Testigonakar uñtʼaspa.

COVID-19 usu utjatap laykojj janiw Tantachasiñ Utan tantachasiñ puedjjtanti, ukatwa videoconferencia toqe Diosar adorañatak tantachastanjja. Ukanwa maynejj soltero jilat kullakanakar uñtʼaspa. Kunjamsa demostracionanakap lurapjje ukwa maynejj ukan uñjaspa, qhawqsa Jehová Diosar confiyi uk arstʼirsa istʼarakispawa (1 Tim. 6:11, 12). Tantachäwi tukuyarojja, jiskʼa salanakanwa mä qhawqhanejj parltʼasipjjaspa. Maysa toqetsti, kusistʼañatakejj videoconferencia toqe mä qhawqha jilat kullakanakajj tantachasipki ukanwa khititï gustki ukarojj uñtʼaspa. Ukhamatwa kunjamsa mayninakar uñji, kunjam jaqesa ukanak yatispa (1 Ped. 3:4). Tiempompejj jukʼamp sum uñtʼasjjasajja, mä pachpa amtanïpjjeti janicha, matrimonion sumti apasipjjaspa janicha ukanak sum yatjjapjjani.

Mä soltero jilatasa jan ukajj mä soltera kullakas khitimpis casarasini uk amtkasajj Biblian ewjjtʼanakaparjam lurani ukhajja, kusisitaw casarasisajj jakasipjjani. Kunjamtï Bibliajj siski ukhamäniwa: ‘Khititï mä suma esposa jan ukajj mä suma esposo jikjjatki ukajja, mä bendición jikjjati, Jehová Diosampis suma uñjatarakiwa’ (Prov. 18:22).