Mä mara qhepatjja, ‘Sudáfrica cheqankir sucursalan voluntarionakaw munasi’ sasaw Betelan trabajirinakar yatiyapjjetäna, ukanjja mä machaq prensa rotativa maquinaw instalasiñapäna. Nayaw sarirista sasaw sayäta, nayar ajllipjjetäna ukhajj wal kusisiyäta. Janiw nayaruk ajllipkitänti, Dennis Leech, Bill McLellan, Ken Nordin jilatanakarus ajllipjjarakïnwa, uka kimsa jilatanakajj Canadá markatäpjjarakïnwa. Aksat viajiñatakikiw pasaje alaraqapjjetäna.

Mamitajar telefonot jawsasajj akham sayätwa: “Mamita may sañ munsma, Sudáfrica markaruw jakir sarjjä” sasa. Mamitajajj janiw sinti parlirïkänti, ukampis Jehová Diosar wal confiyäna, Jupampis sumwa apasirakïna. Jukʼaksa siskchitänjja, nayan sarañaj munatap amuyjjayätwa. Papitujas mamitajas jayar sarañ amtatajat llakitäpkchïnsa, janiw jarkʼapkitänti.

Nayraqatajja, kimsa phajjsinakaw Brooklyn Betelar sarapjjta, ukanwa imprimiña mä máquina apnaqañ yateqanipjjta. Uka qhepatsti carganak apiri mä barcoruw Ciudad del Cabo (Sudáfrica) sat markar viajipjjta. Ukhajja, 20 maranëjjayätwa. Ciudad del Cabo markar purisajja, arum cheqarojj trenatwa Johannesburgo sat markar viajipjjta. Qhantatirojja, Karroo cheqankir mä jiskʼa markaruw saytʼapjjta, uka markajj niya wasarjamänwa, wali laqʼakïnwa, wali calorarakïnwa. Ventanat puspachani uñtapjjayäta ukhajja, kawkirus juttan sasaw sapjjayäta. Kunjamakis uka machaq asignación phoqañäni sasaw llakisipjjayäta. Mä qhawqha maranakat uka cheqankir jiskʼa markanakar kuttʼapjjayäta ukhajja, jaqenakajj wali munasiri, suman jakasirïpjjatapwa amuyapjjayäta.

Mä qhawqha maranakajj linotipia sat maquinampiw asignacionajan trabajiwayta, uka máquina apnaqañajj wali chʼamänwa. Trabajojajja, Yatiyañataki ukat ¡Sartapjjañäni! sat revistanak imprimiñatak letranak wakichañänwa. Sucursalajja, África cheqan utjki uka walja arunakaruw revistanak imprimïna, janiw Sudáfrica markatakik imprimkänti, África cheqankir yaqha markanakatakis imprimirakïnwa. Uka machaq maquinampi wal trabajisitapajj wal kusisiyapjjetäna, nanakas ukïpanwa wali jaya markakam puripjjarakta.

Qhepatsti, traducción, impresión, Bibliat apstʼat qellqatanak apayaski uka toqenakat encargasir oficinanwa trabajta, jan tiemponiw trabajiyäta, wali kusisitarakïyätwa.

1968 maran Laura Bowen sat kullakampiw casarasipjjta, jupajj Betel jakʼanwa jakasïna. Precursoränwa, Departamento de Traducción ukatakiw qellqañamp yanaptʼarakïna. Uka tiemponjja, Betelankkasin casarasirinakajja, janiw Betelan quedasipjjerïkänti, ukatwa nanakarojj precursor especialat khitjjapjjetäna. Mä jukʼa llakitäyätwa, Betelanjja 10 maranakaw serviyäta, janiw manqʼatsa, utatsa llakiskayätti. Precursor especialanakaru mä jukʼa qollqempi yanaptʼapkitäna uk ‘kunjamsa alcanzayañäni’ sasaw llakisipjjayäta. Phajjsinjja sapa mayniw 25 rands qollqe katoqapjjayäta (ukajj uka tiempon mä 35 dolarakïnwa). Ukjja, qhawqha qellqatanaktï jaytapjjañajäkäna, horanaka, revisitanaktï lurapjjañajäkäna uk phoqasakiw katoqapjjayäta. Uka qollqejj alquilerataki, manqʼañataki, pasajetaki, qollayasiñataki ukat yaqha ukhamanakatakiw alcanzañapäna.

Océano Índico qota thiyankir Durban marka jakʼankir mä jiskʼa grupon yanaptʼapjjañajatakiw asignapjjetäna. India markat jutir walja jaqenakaw ukan jakapjjäna. Jupanakajja, 1875 maranakanwa azúcar fabrican trabajiñatak Sudáfrica markar jutapkäna ukanakan wawanakapäpjjänwa. Yaqha trabajonëjjapjjchïnsa, janiw costumbrenakapatsa, manqʼanakapatsa ukat yaqha ukhamanakats armasipkänti. Jupanakajj inglés arwa parlapjjäna, ukhamatwa jupanakar facilak predicapjjayäta.

Precursor especialanakajja, sapa phajjsejj 150 horanakwa predicapjjañapäna. Ukatwa nayrïr urojj Laura esposajampejj 6 horanak lurañ amtapjjta. Janiw revisitanakasa estudionakas utjapkitänti, ukhamajja 6 horanakaw utat uta wali caloran predicapjjañajäna. Jaypach predickasin reloj uñjjatasta ukhajja, 40 minutonakakiw pasaskatayna, ¿precursor especialjamajj phoqañ puedipjjäti? sasaw jisktʼasipjjayäta.

Ukatsti jankʼakiw mä programa sum waktʼayasipjjta, sapüruw manqtʼasiñatakejj mä kunitsa waktʼayasipjjerïta, cafeysitsa apasipjjarakirïta. Samartʼañ munapjjerïta ukhajja, qoqan chʼiwiparuw Volkswagen jiskʼa auto saytʼayasisajj samartʼapjjerïta, awisajja India markat jutirinakan wawanakapaw nanakar uñchʼukir jutapjjeri. Ukampis mä qhawqha urunaka ukham predikjjapjjayäta uka qhepatjja, mä pä kimsa hora predicasajj ratukiw horanakajj pasawayjjäna.

Uka territorion jaqenakar Diosan arunakap yatiyañajj wali kusiskañänwa. India markat jutiri jaqenakajj respetasiri, munasiri, katoqtʼasiri, Diosarus munasiri ukhamäpjjänwa. Uka territorionkir jaqenakajj hinduismo religionankapkchïnsa, waljaniw sum istʼapjjetäna. Jupanakarojja Jehová Diosata, Jesusata, Bibliata, jutïrin sum jakasjjañäni ukata, jiwatanakatak mä suma suytʼäwi utjki ukanakat yatiñajj wal gustäna. Mä mara pasatatjja pä tunkaniruw Bibliat yatichjjapjjayäta. Chika urunakajja, sapüruw kawkïr familiampitï Bibliat yatjjatapkayäta ukamp manqʼasipjjerïta, wali kusisitäpjjayätwa.

Mä jukʼa qhepatsti, yaqha asignacionwa katoqapjjarakta. Océano Índico qota jakʼanakan superintendente de circuitot visitapjjañajatakiw invitapjjetäna. Sapa semanaw kawkïr congregacionanakarutï visitapkayäta ukankir mä familian utapan alojasipjjerïta, chʼamañchtʼañatakejj jilat kullakanakampiw predikir mistupjjerïta. Jupanakajj familiaparjamaw uñjapjjetäna, ukatwa jupanakampïñasa, wawanakapampïñasa, utan uywasipkäna uka animalanakapampïñas wal gustapjjetäna. Pä mara ukham kusisita visitasipkayäta ukhajja, sucursalatwa jawsanipjjetäna, mayamp Betelan trabajipjjañajatakiw invitapjjetäna. “Nanakajj wali kusisitaw akan servisipkta” sasaw sayäta, ukampis ukar sarañatakejj jankʼakïpjjayätwa.

Betelanjja, Departamento de Servicio ukan trabajiñatakiw asignapjjetu, ukanjja wali experienciani jilatanakampiw trabajiyäta. Uka tiemponjja, superintendente de circuito jilatajj mä congregacionar visitasajj mä informwa sucursalar apayirïna. Ukatsti, Departamento de Servicio ukajj mä cartwa congregacionar apayarakirïna. Uka cartanakajja, jilat kullakanakar chʼamañchtʼañataki, kuna ewjjtʼanakatï munaskäna ukanak yatiyañatakïnwa. Secretariot trabajipkäna uka jilatanakajja, superintendente de circuitonakajj informe apayanipkäna uk xhosa ukat zulú arunakat inglés aruruw traducipjjañapäna. Ukatsti sucursalajj inglés arut cartanak qellqkäna ukjja, África cheqan parlapki uka arunakaruw tratucipjjañaparakïna. Ukajj jupanakatak  wali chʼamänwa, uka jilatanakan ukham traducipjjatapat wal yuspärta, ukaw chʼiyar jañchin jilat kullakanakajj kuna jan walinakansa uñjasipjjäna uk amuyañatak yanaptʼitäna.

Uka tiemponjja, Sudáfrica markankirinakajj apartheid sat mä leyejj utjkäna ukarjamaw jakapjjäna. Janqʼo jañchininakasa, chʼiyar jañchininakasa ukat yaqha kasta jañchininakas yaqha yaqhaw jakapjjañapäna, ukhamasti yaqha kasta jañchininakajj jukʼakwa yaqha kasta jañchininakampi chikachasipjjerïna. Chʼiyar jañchini jilat kullakanakajja, pachpa arupatwa parlapjjäna, pachpa arupatwa predicapjjäna, arup parlki uka congregacionaruw sarapjjarakïna.

Niyakejjay inglés aru parlir territorionakar asignapjjchitänjja, chʼiyar jañchini jilat kullakanakarojj jukʼanirukiw uñtʼayäta. Ukampis Departamento de Servicio ukan trabajisajja, jukʼampiw kunjamsa jakasipjjäna uk uñtʼawayta. Uka markankiri Diosar jan uñtʼir jaqenakan costumbrenakapa, religionanakap kawsajj kuna jan walinakansa jilat kullakanakajj uñjasipjjäna ukanakwa yatiyäta. Jupanakajj jan ajjsartʼasaw jan wali costumbrenak jaytapjjäna, janirakiw espiritunakampi parlapkäna ukanakarus mitisipkänti, ukham lurapjjatapatjja, familiapasa markankirinakas jupanak contraw saytʼapjjäna. Jiskʼa markanakanjja, jaqenakajj wali pobrew jakasipjjäna. Jukʼanikiw liyiñsa qellqañsa yatipjjäna, yaqhepajj janiw akchʼas yatipkänti, ukampis Bibliar respetapjjänwa.

Diosar libre serviñ toqeta, akapachar jan mitisiñ toqet juicionakan cheqapar uñjasiñapatakiw yanaptʼawayta. Testigo wayn tawaqetanakajja, escuelan religionanakan oracionanakap jan mayiñ munapjjatapata, himnonakap jan cantañ munapjjatapat escuelat jaqsutaw uñjasipjjäna. Ukhamäkchïnsa jupanakajj janiw ajjsarapkänti, Jehová Diosar jan jitheqtas servisipkakïnwa, uk uñjañajj Diosar jukʼamp confiyañatakiw yanaptʼitäna.

África cheqankiri Suazilandia (jichhajj Esuatini satäjjewa) sasin uñtʼatäkäna uka jiskʼa markanjja, jilat kullakanakajj ukhamarakiw jan walinakan uñjasipjjäna. Sobhuza II sat reyejj jiwjjäna ukhajja, llakitäpjjatap uñachtʼayañatakejj kuna costumbrenaktï mayni jiwipan lurapjjerïkäna uk lurapjjañapatakiw mayisïna. Chachanakajja, ñikʼutap wali qʼarwa mururasipjjañapäna, warminakasti ñikʼutap khuchhurasisajj wali jiskʼakwa jaytapjjañapäna. Uka costumbrenakajj nayra jiwatanakar adorañatakïnwa, ukatwa ukanak jan lurañ munapjjepan walja jilat kullakanakar arknaqasïna. Jehová Diosaru jan jitheqtasa  servipjjatapajj chuymaruw purtʼapjjetäna. África cheqankiri jilat kullakanakajja, kunjamsa Jehová Diosaru jan jitheqtas sirvsna, paciencianïsna ukwa yatichapjjetäna, ukajj Diosar jukʼamp confiyañatakiw yanaptʼapjjetäna.

1981 maranjja, wasitampiw imprentan trabajta, ukanjja computadoranakampi imprimisiñapatakiw yanaptʼawayta. Ukajj wali kusiskañänwa. Janiw nayrjam imprimisjjänti. Uka markankiri mä empresan aljiripajja, sucursalaruw fotocomponedora sat mä máquina gratisaki yantʼañapatak maytʼäna. Uka qhepatsti, llätunka linotipia maquinanakjja, phesqa fotocomponedora maquinanakampiw cambiasjjäna. Mä machaq rotativa maquinas instalasirakïnwa. Nayrat sipans jukʼampiw imprimjjapjjayäta.

Computadoranakampi trabajiñajja, MEPS (Sistema Electrónico de Edición Plurilingüe) sat programampi kunjamsa letranakajj sum organiztʼasispa ukatakiw machaq yanaptʼanak uñstayapjjta. Canadá markat pusi betelitanakajj Sudáfrica markar puripkta ukhat aksarojja, tecnología toqet walja cambionakaw utjawayi (Is. 60:17). Ukhakamajja, puspachaniw Jehová Diosar wal munasiri precursora kullakanakamp casarasipjjta. Bill jilatampi nayampejj Betelanwa trabajisipkakiyäta. Ken jilatampi Dennis jilatampisti, uka jakʼanwa familianakapamp jakapjjäna.

Sucursalan jukʼampiw trabajojj jiljjattaskakïna. Sapürutjamaw jukʼamp arunakaru Bibliat apstʼat qellqatanakajj traducisjjäna, imprimisjjäna, yaqha sucursalanakar apayasjjarakïna. Ukatwa yaqha Betel utajj munasjjäna. Ukatsti jilatanakajj Johannesburgo sat markat inti jalanta toqeruw mä suma lugaran Betel uta utachapjjäna, ukatjja 1987 maranwa dedicasïna. Diosan markap ukham jiltir uñjañasa, Sudáfrica markan Comité de Sucursalan walja maranak trabajiñas wali kusiskañapunïnwa.

2001 maranjja, Estados Unidos markan ukhak uttʼayaskäna uka Comité de Sucursalan serviñajatakiw invittʼapjjetu, janiw uk suyapkayätti. Sudáfrica markan amigonak jaytañasa, trabajo jaytañas llakisiyapkchitänsa, Estados Unidos markankir betelitanakampi trabajiñ wal munapjjarakiyäta.

Laura esposajan mamitapar jaytañaw wal llakisiyapjjetäna, jupajj edadanëjjänwa. Nueva York markankjjasajj janiw juparojj cuidañ puedjjapjjeriskayätti. Ukampis esposajan kimsa kullakanakapajja, ‘nanakaw mamitarojj cuidapjjä, qollqempis yanaptʼapjjä’ sasaw sapjjetäna. Ukatsti, ‘niyakejjay precursorat jan servipkstejja, jumanakajj asignacionaman servisipkakiñamatakejj nanakaw mamitarojj cuidapjjä’ sasaw sapjjarakitäna. Ukham lurapjjatapat walpun jupanakar yuspärapjjta.

Toronto (Canadá) markankir jilajampi esposapampejj ukhamarakiw mamitajar cuidasa yanaptʼapjjetäna, mamitajajj viudäjjänwa. Ukhakamajja, 20 maranak jilaw mamitajajj jupanakamp chika jakjjäna. Nueva York markar purjjapjjayäta uka qhepatjja, mamitajajj jiwjjänwa. Jupanakan ukhakam cuidapjjatapat walpun yuspärapjjta. Edadani awk taykar cuidañajj chʼamäkchisa, jupanakar cuidañ layku jakäwinakap mayjtʼayiri familianïñajj mä suma bendicionawa.

Estados Unidos markanjja, nayraqatajj imprentan trabajiñatakiw asignapjjetu. Jichhajja, jichhak misturi maquinanakampiw ukajj lurasjje, trabajiñas facilakëjjewa. Jichhanakakiw Departamento de Compras ukan trabajta. Aka 20 qhepa maranakan Jehová Diosaru aka jachʼa sucursalan serviñajj wali kusiskañapuniwa. Jichhajja, mä 5.000 betelitanakampi, mä 2.000 voluntario jilat kullakanakampiw akan trabaj-jjapjje.

60 maranak nayrajj janiw akan trabajiñ pienskayätti. Laura esposajajj taqe aka maranakanwa sum yanaptʼawayitu. Wali kusisitaw jakasipjjta. Kunayman asignación katoqapjjta, kunayman jilat kullakanakampi trabajipjjta ukanak wali valoranitwa uñjapjjta. Jupanakat yaqhepajja, aka oraqpachan walja sucursalanak visitapkta ukanakanwa servisipki. Jichhajj niyakejjay 80 jila maranëjjstjja, jukʼa trabajokwa churjjapjjetu, walja wayna jilatanakaw ukat encargasjjapjje.

Salmonak qellqer mä chachajj akham sänwa: ‘Kawkïr markatejj Jehová Diosarojj Diosaparjam adorki ukajj kusisitawa’ sasa (Sal. 33:12). Uka arunakajj cheqäskapuniwa. Jehová Diosatak kusisit markapamp chika trabajitajat walpun yuspärta.