1. ¿Kunatsa Jehová Diosajj mayninakamp jan igualaykistu?

JEHOVÁ DIOSAROJJ jan taqe kunas mä igualakïtapajj wal gusti. Jupajj kunayman kasta animalanaka, plantanaka, jaqenakwa lurawayi. Janiw pä igual jaqejj utjkiti, ukatwa Diosajj janipun khitimpis igualaykistuti. Antisas kunjam jaqëtansa, kunjam chuymanïtansa ukwa uñjistu (1 Sam. 16:7). Kunanaksa sum lurañ yattan, kunanaksa jan sum lurañ yatktan, kunjamsa jilsuwaytan uks yatirakiwa. Qhawqtï lurañ puedktan ukakwa mayistu. Jupatwa yateqasiñasa, kunjamtï uñjkistu ukhamwa uñjasiñasaraki. Ukhamtï lurañänejja, ‘suma amuytʼasirïtaswa’ uñachtʼayañäni, janirakiw mayninakat sipan jilanksnasa, minusäksnas ukham amuyaskañäniti (Rom. 12:3).

2. ¿Kunatsa mayninakamp igualayasiñajj jan walïki?

² Mayninakan suma luratanakapat yateqasiñajj walikïskiwa, sañäni, predicañ sum yatki uka jilatata jan ukajj kullakatwa yateqassna (Heb. 13:7). Ukajj suma yatichirïñatakiw yanaptʼistaspa (Filip. 3:17). Ukampis maynin suma luräwinakapat yateqasiñampi, maynejj jiwasat sipan jukʼamp sumti luri janicha uk igualayañampejj janiw pachpäkiti. Maynimp igualayassna ukhajja, envidiasiriruw tukjjsna, aynachtʼjjsnawa, jan ukajj janis kunatak sirvksna ukhamaw amuyassna. Kunjamtï pasïr yatichäwin yatjjataniwayktanjja, congregacionankir jilat kullakanakat jilanksnas ukham amuyasiñajj Jehová Diosamp sum apasiñwa aptʼasiyistaspa. Ukatwa Jupajj munasiñampi akham sistu: “Sapa mayniw pachpa luratanakapat amuykiptʼasiñapa,  ukhamatwa luratanakaparjam kusisini. Jupajj janiw luratanakapjja yaqhan luratanakapampejj igualayañapäkiti” sasa (Gál. 6:4).

3. ¿Jehová Diosar serviñan kunanak luratamatsa wal kusista?

³ Jehová Diosajja, jupar serviñan kunanaksa jichhakamajj sum lurañ yateqawaytan ukanakat kusisiñaswa muni. Sañäni, bautisatäjjstan ukhajja, uka amta phoqatasat kusisiñasawa. Ukjja, jiwas pachpaw Diosar munasiñat amtawaytanjja. Ukhat jichhakamajj qhawqsa lurawaytan uk amuytʼañäni. Biblia liyiñasa yatjjatañas inas jichhajj wal gustjjchistu. Oracionasas inas jukʼamp sumäjjchi (Sal. 141:2). Inas jaqenakampi Bibliat parlañ qalltañajj jukʼamp facilakëjjchi, predicañ herramientanak apnaqañas facilakëjjarakchi. Diosajj inas jukʼamp suma esposöñataki, esposäñataki, awkïñataki jan ukajj taykäñataki yanaptʼarakchistu. Taqe uka cambionak luratasat wal kusisiñasawa.

4. ¿Kunanakatsa yatjjataskañäni?

⁴ Mayninakarojja, Diosar serviñatak kunanaktï lurasipki ukanakat kusisitäpjjañapataki, mayninakamp jan igualayasiñapatakiw yanaptʼsna. Aka yatichäwinjja, kunjamsa awk taykanakajj wawanakapar yanaptʼapjjaspa, kunjamsa casadonakajj yanaptʼasipjjaspa, kunjamsa ancianonakasa, congregacionas jilat kullakanakar yanaptʼapjjaspa ukwa yatjjataskañäni. Ukatjja, Bibliankir mä qhawqha textonakatwa yatjjatarakiñäni, ukaw kuntï lurañ puedksna uk phoqañatak yanaptʼistani.

5. Efesios 6:4 textorjamajja, ¿kunsa awk taykanakajj jan lurapjjañapäki?

⁵ Awk taykanakajja, janiw wawaparojj yaqhampi igualayañapäkiti, ni qhawqtï lurañ puedki ukat sipan jukʼamp lurañapsa mayipjjañapäkiti. Ukham lurapjjaspa ukhajj wawapar aynachtʼayaspawa (Efesios 6:4 liytʼañataki). Sachiko * sat mä kullakajj akham siwa: “Yatichirinakajajja, compañeronakajat sipans jukʼamp suma nota apsuñajwa suyapjjäna. Yamas mamitajajj suma yateqerïñajwa munäna, ukhamat yatichirinakajasa, jan Testigo awkijas Diosan markapat sum parlapjjañapataki. Examenan janipun akchʼas pantjasiñajwa mamitajajj munäna, ukajj janiw phoqañjamäkänti. Colegio tukuyatajat walja maranakas pasjjchejja, Diosatak wal trabajitajajj janis Jupatak sumäkaspa ukhamwa awisajj amuyta” sasa.

6. Kuntï Salmo 131:1, 2 qellqatajj siski ukat ¿kunsa awk taykanakajj yateqapjjaspa?

 ⁶ Awk taykanakajja, kuntï Salmo 131:1, 2 * (liytʼañataki) qellqatajj siski ukat mä wakiskir yatichäwi yateqapjjaspa. Davidajj akham sänwa: ‘Janiw nayajj kunanakatï wali jachʼäki ukanak jikjjatañ thaqkti, janirakiw kunanaktï nayajj jan jikjjatirjamäkta ukanaksa thaqkti’ sasa. Jupajj humildëtapatwa sumak jikjjatasïna, kusisitarakïna. ¿Kunsa awk taykanakajj Davidat yateqapjjaspa? Humildëñatakejja, qhawqtï lurañ puedipki ukat jukʼamp lurañ janiw suyapjjañapäkiti, janirakiw wawanakapats uk suyapjjañapäkiti. Wawanakaparu mä kun lurapjjañapataki chʼamañchkasajja, jupanakan sum jikjjatasipjjañapatakejj kunanaksa sum lurañ yatipjje kunanaksa jan sum lurañ yatipki ukarjamaw amuytʼapjjañapa. Marina sat mä kullakajj akham siwa: “Mamitajajj janipuniw kimsa jilanakajampisa ni yaqha wawanakampis igualayirïkituti. Janiw taqenis mä igualaki lurañ yatktanti, Diosatakis taqeniw valoranïtanjja sasaw yatichitäna, ukham yatichatapaw mayninakamp jan igualayasiñatak yanaptʼitu” sasa.

7, 8. ¿Kunjamsa mä esposojj esposapar respetatap uñachtʼayaspa?

⁷ Cristiano chachajj esposapar respetompiw uñjañapa (1 Ped. 3:7). ¿Kunjamsa uk luraspa? Valoranitwa esposapar uñjañapa. Qhawqtï lurañ puedki ukat sipan janiw jukʼamp lurañap mayiñapäkiti, janirakiw mayni warminakampis igualayañapäkiti. ¿Mayninakamp igualayañajj kunjamsa maynir jan waltʼayaspa? Rosa kullakat parltʼañäni. Esposopajj janiw Testigökiti, juparojj sapa kutiw yaqha warminakamp igualayi. Chuyma usuchjir arunakapajja, janis kunatak sirvkaspa ukhamwa kullakar amuyayi, janis khitis jupar cheqapun munkaspa ukhamwa amuyayaraki. Kullakajj akham siwa: “Jehová Diosajj nayar valoranit uñjatap sapa kuti amtayatäñwa munta” sasa. Ukampis cristiano chachanakajja, esposaparojj wali respetompiw uñjapjje, ukhamatwa esposapampisa Jehová Diosampis sum apasipjje. *

⁸ Esposapar respetirinakajja esposapat sum parlapjje, munasipjjewa, felicitapjjarakiwa (Prov. 31:28). Pasïr yatichäwin parlaniwayktan uka Katerina kullakan esposopajj ukwa luräna, ukaw kullakarojj janis kunatak sirvkaspa ukham jan amuyasiñatak yanaptʼäna. Katerinajj jiskʼäskäna ukhajja, mamitapajj jiskʼachirïnwa, walja kutiw yaqha wawanakampi, amiganakapamp igualayirïna. Ukatwa jupajj yaqhanakamp igualayasjjarakïna, Diosar uñtʼjjasas igualayasiskakïnwa. Ukampis esposopaw jan igualayasiñapataki, jupa pachpat sum amuyañapatak yanaptʼäna. Kullakajj akham siwa: “Esposojajj munasituwa, kuna sumanaktï lurkta ukat felicittʼituwa, nayatakis orarakiwa. Diosajj kunjam suma Diosäkitï ukwa amtayitu, naya pachpat jan wal jan amuyañatakis yanaptʼarakituwa” sasa.

9, 10. ¿Kunjamsa mä kullakarojj ancianonakajj yanaptʼapjjäna?

⁹ ¿Kunjamsa ancianonakajj mayninakampi igualayasirinakarojj yanaptʼapjjaspa? Elena kullakat parltʼañäni, jiskʼäskäna ukhajja, janiw khitis juparojj ‘sumwa lurtajja’ sasin sirïkänti. Kullakajj akham siwa: “Ajjsarirïyätwa, mayni wawanakajj nayat sipan jukʼamp sumsa  lurkaspa ukhamwa amuyasirïta. Jiskʼatpachaw yaqhanakamp igualayasirïyäta” sasa. Testigöjjasas Elenajj igualayasiskakïnwa, ukatwa congregacionan janis yanaptʼkaspa ukham amuyasïna. Ukampis jichhajj wali kusisita precursoräjjewa. ¿Kunas cambiañatak yanaptʼawayi?

¹⁰ Elenarojj ancianonakaw yanaptʼapjjäna munasiñamp uñjapjjarakïna. Congregacionatak valoranïtapwa yatiyapjjäna, sum luratapats felicitapjjarakïnwa. Kullakajj akham siwa: “Awisajja, yanaptʼa munir kullakanakar chʼamañchtʼañajatakiw ancianonakajj mayipjjetäna. Ukaw congregacionan nayan yanaptʼaj munasitap amuyayitäna. Ancianonakajja, yaqhep tawaq kullakanakar chʼamañchtʼatajat munasiñampiw yuspärapjjetäna, ukatsti 1 Tesalonicenses 1:2, 3 textwa liytʼarapipjjetäna, ukajj chuymarupuniw purtʼitäna. Munasiri ancianonakan utjatapatwa jichhajj congregacionan wali valoranïtaj amuyasta” sasa.

11. ¿Isaías 57:15 texton ‘llaktʼat sarnaqerinakat’ parlki ukanakarojj kunjamsa yanaptʼsna?

¹¹ (Isaías 57:15 liytʼañataki). Jehová Diosajj ‘llaktʼat sarnaqapki’ ukanakat wal llakisi. Jiwasanakasa ancianonakasa, ukham jikjjatasirinakarojj chʼamañchtʼaraksnawa. Jupanakat taqe chuyma llakisisaw chʼamañchtʼsna. Diosajj qhawqsa ovejanakapar munasi uk uñachtʼayañaswa Jupajj muni (Col. 3:12). Maysa toqetjja, humildësa llampʼu chuymanïsaw jupanakar yanaptʼaraksna. Jiwasas sum lurañ yatksna ukham janiw amuyayañasäkiti, ukham lurasajj mayninakan envidiasipjjañapatakiw chʼamañchsna. Arsutasampisa luratasampis maynit maynikamaw chʼamañchtʼasiñasa (1 Ped. 4:10, 11).

12. ¿Kunatsa humilde jaqenakarojj Jesusamp chikäñajj gustäna? (Nayrïr paginankir dibujo uñjjattʼäta).

¹² Jesusajj kunjamsa discipulonakapar uñjirïna ukat yateqasisaw mayninakar sum uñjsna. Jesusjam wali importante jaqejj janis utjkchïnjja, ‘llampʼu chuymanïnwa, humilde chuymanirakïnwa’ (Mat. 11:28-30). Wali yatiñanïtapatsa, waljanak yatitapatsa janiw jachʼa jachʼa tukkänti. Jaqenakarojj fácil amuykañ arunakampi, fácil amuykañ uñachtʼäwinakampiw yatichäna, ukaw humilde jaqenakan chuymapar purtʼäna (Luc. 10:21). Jachʼa jachʼa tukuri religión pʼeqtʼirinakat sipansa, Diosatak wali valoranïpjjatapwa Jesusajj jaqenakar amuyayäna (Juan 6:37). Aleq jaqenakarus respetompipuniw uñjirïna.

13. ¿Kunatsa Jesusajj khuyapayasiñampi munasiñampiw discipulonakapar uñjäna sasajj sissna?

¹³ Jesusajj khuyapayasiñampi munasiñampiw discipulonakapar uñjirïna. Jan mä igualaki lurañ yatipjjatapsa, jan mä igualaki jakasipjjatapsa yatïnwa, ukhamajj janiw mä pachpa luräwik katoqapkaspänti, ni mä igualaksa predicapkaspänti. Ukampis qhawqsa sapa maynejj chʼamachasipjjäna uk valoranitwa uñjäna. Ukajj talento qollqenakat parlir uñachtʼäwinwa qhan amuyasi. Ukanjja, kunjamsa mä uywirejj sapa mayni esclavonakapar “chʼamaparjam” mä trabajo churäna ukatwa parläna. Trabajop sum phoqeri uka pä esclavonakat mayniw jukʼamp ganäna. Ukampis uywiripajj sapa mayniruw akham sasin felicitäna: “Suma phoqeri esclavo, ¡walik ukham lurtajja” sasa (Mat. 25:14-23).

14. ¿Kunjamsa Jesusat yateqasisajj mayninakar uñjsna?

¹⁴ Jesusajj khuyapayasiñampi munasiñampiw uñjarakistu. Jan mä pachpak lurañ yatitassa, jakasitassa yatiwa, qhawqtï lurañ puedktan ukarjam wal chʼamachasitasat kusisirakiwa. ¿Kunjamsa jupat yateqassna? Mä jilatana jan ukajj mä kullakan mayninakjam jan lurañ pueditapat janis kunatak sirvkaspa ukham amuyasiñap janiw munktanti. Janirakiw phenqʼachatjam amuyasiñapsa munktanti. Antisas  Diosar serviñatak wal chʼamachasipjjatapat jilat kullakanakar felicittʼapjjapuniñäni.

15, 16. ¿Kunanaktï lurirjamäkäna ukarjam amtañajj kunjamsa mä kullakar yanaptʼawayi?

¹⁵ Mä kun phoqañ amtampi Diosar sirvtan ukhajja, kusisitaw jakastanjja. Ukampis uka amtanakajj qhawqtï lurañ puedktan ukarjamäñapawa, janiw mayninakan amtapar arkañasäkiti. Ukhamtï lursnajja, aynachtʼsnawa, llakisiraksnawa (Luc. 14:28). Midori sat precursorarojj kunas pasäna uk uñjañäni.

¹⁶ Midori kullakajj wawäskäna ukhajja, jan Testigo awkipajj jilapampi kullakapampi, escuelankir masinakapamp igualayasaw jiskʼachirïna. Kullakajj akham siwa: “Janis kunatak sirvkirista ukhamaw jikjjatasirïta” sasa. Ukampis tiempompejj janiw ukham jikjjatasjjänti. Jupajj akham saskakiwa: “Biblia sapüru liyiñaw sumak jikjjatasiñataki Diosas nayar munasitap amuyasiñatak yanaptʼitäna” sasa. Janiw ukakïkiti, kunanaktï lurirjamäkäna uk lurañwa amtäna, Jehová Diosaruw ukanak phoqañatakejj yanaptʼa mayisirakïna. Ukham lurañaw kunanaktï Diosatak lurañ puedki uk lurasajj kusisitäñatak yanaptʼäna.

17. ¿Kunjamsa cristianonakajj ‘amuyunakas machaqar tukuyaskaksna’, ukham lurasajj kunanaksa jikjjatañäni?

¹⁷ Janis kunatak sirvksna ukham jan amuyasjjañatakejj tiempow munasi. Ukatwa “jumanakajj amuyunakam machaqar tukuyasipkakim” sasin Jehová Diosajj ewjjtʼistu (Efes. 4:23, 24). Ukatakejja, orasiñasawa, Biblia liyiñasawa, kuntï liyktan ukat lupʼiñasarakiwa. Ukanak luraskakiñäni, Diosarus chʼam mayiskakiñäni. Jupajj espíritu santopampiw mayninakamp jan igualayasiñatak yanaptʼistani. Diosarakiw jachʼa jachʼat tukjjtan jan ukajj envidiasirëjjtañcha uk amuyasiñatak yanaptʼistani,  ukhamächi ukhajj jankʼak cambiañatakis yanaptʼarakistani.

18. 2 Crónicas 6:29, 30 textojj ¿kunjamsa jumar chuymachtʼtam?

¹⁸ (2 Crónicas 6:29, 30 * liytʼañataki). Kunjamas jikjjatastan uk Jehová Diosajj yatiwa. Akapachan espiritup contra, pantjasitanakas contra nuwasiskatas yatirakiwa. Ukanakar atipjañatak wal chʼamachasiskatas uñjasajj jukʼampiw munasistu.

19. ¿Jehová Diosajj qhawqsa munasistu uk uñachtʼayañatakejj kuna toqetsa Jupajj parli?

¹⁹ Diosajj qhawqsa munasistu uk amuyasiñatakejj mä taykajj wawapar qhawqsa munasi uka toqetwa parli (Is. 49:15). Rachel sat kullakajj akham siwa: “Stephanie wawajajj janïr nasiñapäkäna ukhaw nasjjäna. Nayrïr kuti uñjkta ukhajja, wali jiskʼitakipunïnwa... Nayrïr phajjsejj hospitalan qheparkäna ukhajj sapüruw ichjjartʼasiyäta, doctoranakajj janiw uk jarkʼkitänti. Wawajampïñajj jupar jukʼamp munasiñatakiw yanaptʼawayitu. Jichhajj sojjta maranëjjewa, jupa mita wawanakat sipans jukʼamp jiskʼakirakiwa, ukampis jakañatak wal chʼamachasiwayi, ukatwa jupar wal munasta. Walirak kusisiyitu” sasa. Jiwasat jukʼamp sumäki uk churañatak chʼamachasitas uñjasajja, ukhamarakiw Jehová Diosajj wal munasistu, ¿uk yatiñajj wali chuymachtʼkirejjaya?

20. ¿Kunatsa kusisipjjsna?

²⁰ Diosan familiapanjja, sapa mayniw wali valoranïtanjja, janiw jiwasar uñtasitajj khitis utjkiti. Jehová Diosajj janiw mayninakat sipan jukʼamp sum lurañ yatitasat markapar irpankistuti, jan ukasti, humildëtasata, Jupat yatiñ munatasata, cambiañ munatasatwa irpanistu (Sal. 25:9). Jupar serviñatak qhawqtï lurañ puedktan ukarjam chʼamachasitasat wal kusisi, janiw ukat pächasktanti. Aguantatasasa, Jupar jan jitheqtas servitasas ‘suma chuymanïtaswa’ uñachtʼayi (Luc. 8:15). Ukhamajja, kunatï jiwasat jukʼamp sumäki uk Diosar churaskakiñäni. Ukhamtï lurañänejja, kuntï jiwas pachpajj lurktan ukat kusisiñäniwa.