1. ¿Kunjamsa oracionar uñjañasa?

 ALAJJPACHA ukat aka oraqe Lurir Diosajja, mä jachʼa privilegio churistu: oración toqew jupar jakʼachassna. Jupampejj kuna arutsa, kuna horasans taqe chuymaw parltʼassna. Jupamp istʼatäñatakejj janiw mä horariojj wakiskiti. Hospitalan mä ikiñankkasasa jan ukajj carcelankkasasa, jupajj istʼitaniwa sasaw munasir Awkisar orassna. Oración utjatapat wal yuspärtanjja.

2. David reyitakejj oracionajj mä jachʼa privilegiönwa, ¿kunjamsa uk uñachtʼayäna?

² David reyitakejja, oracionajj mä jachʼa privilegiönwa. Jupajj mä cancionan akham sasaw Jehová Diosar säna: “Oracionajajj inciensor uñtata juma nayraqatan wakichtʼatäpan” sasa (Sal. 141:1, 2). Jupajj jakkäna uka tiemponjja, Jehová Diosar adorañatakejj mä sagrado inciensow apnaqasïna. Uka inciensjja, sacerdotenakaw wali amuyumpi wakichtʼapjjerïna (Éx. 30:34, 35). Inciensot parlkasajja, “alajjpachankir Awkijar oracionanakajan kamsäsa uk sumwa amuytʼasëjja” sañwa Davidajj munaskäna. Jiwasajj ukhamwa lurañ munaraktanjja, kuna laykutejj oracionanakasajj Jehová Diosar kusisiyañapwa muntanjja.

3. ¿Kunjam chuymampis Jehová Diosar orasiñasa, ukat kunatsa?

³ Oraskasajj wali respetompiw Jehová Diosamp parltʼasiñasa. Isaías, Ezequiel, Daniel, Juan chachanakajj kuna musparkañ visionanaksa uñjapjjäna uk amuytʼapjjañäni. Uñjapkäna uka visionanakajj janis igualäpkchïnjja, Jehová Diosajj wali musparkañ Reyïtapwa ukanakajj uñachtʼayäna. Isaías  profetajja, Jehová Diosaruw “jachʼa ukhamarak alto tronon qontʼat uñ[jäna]” (Is. 6:1-3). Ezequiel profetasti, alajjpachankir carropan qontʼatwa Diosar uñjäna, “juparojj mä qhanaw muytpachar qhantʼarakïna, [mä] kurmir uñtata” (Ezeq. 1:26-28). Danielasti ‘Nayra Tiempotpach Jakir Awkiruw uñjäna’, isipajj janqʼönwa, qontʼatäkäna uka tronotsti aqaskir ninaw misturakïna (Dan. 7:9, 10). Apóstol Juanasti Jehová Diosarojj mä tronon qontʼatwa uñjarakïna, “uka trono muytpachanjja mä kurmiw utjäna, uka kurmejj esmeraldar uñtasitänwa” (Apoc. 4:2-4). Jehová Diosajj kunja jachʼasa uka toqet lupʼiñajja, jupar orasiñajj mä jachʼa privilegiötapwa amtayistu, wali respetompi orasiñas wali importantëtapwa amtayarakistu. Ukhamajj ¿kunanakatsa oracionanakasan mayissna?

4. ¿Jesusajj yatichkäna uka oracionan nayrïr arunakapat kunsa yateqtanjja? (Mateo 6:9, 10).

⁴ (Mateo 6:9, 10 liytʼäta). Jesusajj mä Qollun yatichkäna ukhajja, Diosajj oración katoqasiñapatakejj kunjamsa orasipjjañapäna ukwa Jesusajj discipulonakapar yatichäna. “Akham sasaw orasipjjañama” siskäna ukjjarojja, kunanakatï wali importantëki ukanakwa nayraqat aytäna. Diosan sutipajj jachʼañchatäñapataki, taqe enemigonakapar tukjkani uka Reinon jutañapataki, ukat aka oraqetaki ukhamarak jaqenakatak arsuwayki uka bendicionanakajj phoqasiñapatakiw mayïna. Uka toqenakat oracionanakasan ayttan ukhajja, Jehová Diosan munañapajj jiwasatak wali importantëtapwa uñachtʼaytanjja.

5. ¿Jiwas pachpatak orasiñajj walikïskiti?

⁵ Ukatsti Jesusajj orasiñ yatichkäna ukanjja, jiwas pachpatak orasiñajj walikïskatapwa uñachtʼayarakïna. Sapüru manqʼa churapjjeta, juchanakajat perdonapjjeta, yantʼanakat jarkʼaqapjjeta, Supayats jarkʼaqapjjeta sasaw Jehová Diosar oracionan mayissna (Mat. 6:11-13). Taqe ukanak Jehová Diosar mayistan ukhajja, jupan yanaptʼap munatasa, kusisiyañ munataswa uñachtʼaytanjja.

6. ¿Jesusajj yatichkäna uka pachpa arunakampit orasiñasa?

⁶ Jesusan discipulonakapajja, janiw kuntï jupajj orasiñ yatichkäna uka pachpa arunakamp orasipjjañapäkänti, Jesusajj janiw uk munkänti. Yaqha oracionanakapanjja, kunanakatï  uka horasajj llakisiykäna ukanakatwa Jesusajj orasïna (Mat. 26:39, 42; Juan 17:1-26). Jiwasajj ukhamarakiw kunatï llakisiykistu ukanakat orasiñasa. Mä amtar puriñasäki ukhajja, yatiña, amuytʼaña churita sasaw Diosar mayissna (Sal. 119:33, 34). Mä asignacionajj jiwasatak chʼamächi ukhajja, Jehová Diosaruw yatiña, amuytʼaña mayisiraksna (Prov. 2:6). Awk taykanakajj wawanakapatakiw orapjjaspa, wawanakasti awk taykapatakiw orapjjarakispa. Bibliat yateqerinakasatakisa, khitinakarutï predikktan jupanakatakis taqeniw orarapsna, cheqas ukwa lurañasa. Ukampis janiw kunanaktï munktan ukanakak oracionan mayiñasäkiti.

7. ¿Kunatsa oracionanakasan Jehová Diosar jachʼañchañasa?

⁷ Oracionanakasan Jehová Diosar jachʼañchañ janiw armasiñasäkarakiti. Jupakiw jachʼañchatäñatakejj derechoni. Mä salmo qellqerejj akham sänwa: “Jumajj suma Diosätawa, perdonañatakis jankʼakirakïtawa” sasa. Ukat akham sarakïnwa: “Jumajj khuyapayasiri, sinttʼasiri Diosätawa, pacienciani, wali munasiri jan jaytjasiri, arunakam phoqeri Diosarakïtawa” sasa (Sal. 86:5, 15). Ukhamajja Jehová Diosajj kunjam chuymanisa, kunanaksa luri ukanak yatisajj jupar jachʼañchañatakejj walja razonanakaw utjistu.

8. ¿Kunanakatsa oracionanakasan Jehová Diosar jukʼamp yuspärsna? (Salmo 104:12-15, 24).

⁸ Jehová Diosar jachʼañchañasäkchisa, taqe kunanaktï churkistu ukanakat oracionanakasan jupar yuspärañasarakiwa. Kunayman suma coloranakan panqaranakata, kunayman suma manqʼanakata, amigonakasatwa yuspärsna. Munasir Awkisajja, taqe ukanaksa, yaqha ukhamanaksa jiwasan kusisitäñasatakiw churistu (Salmo 104:12-15, 24 liytʼäta). Jehová Diosajj jupar confiyaskakiñatakejj walja yatichäwinakwa churistu, jutïritak mä suytʼäwsa churarakistuwa, ukanakatwa jupar jukʼamp yuspärañasa.

9. ¿Jehová Diosar yuspärañ jan armañatakejj kunsa lursna? (1 Tesalonicenses 5:17, 18).

⁹ Taqe kunanaktï Jehová Diosajj jiwasanak layku lurki ukanakat jupar yuspärañ facilakwa armassna. ¿Kunsa jan armasiñatakejj lursna? Kunanaktï mayisktan ukanakwa mä listar qellqtʼassna, ukatjja sapa kutiw kunjamsa  Jehová Diosajj mayisitasar jaysistu uk listasan uñjjatsna. Ukatsti oracionanwa jiwasar yanaptʼatapat yuspärsna (1 Tesalonicenses 5:17, 18 liytʼäta). Mayninakajj yuspärapjjestu ukhajja, wali munata, kusisita ukhamaw jikjjatastanjja. Oracionanakasar jaysatapat Jehová Diosar yuspärtan ukhajja, ukhamarakiw jupajj kusisi (Col. 3:15). Ukampis ¿kuna yaqha toqetsa Jehová Diosar yuspärañasaraki? Uk jichhajj uñjañäni.

10. ¿Kunatsa Jesusar aka oraqer khitanitapat Jehová Diosar yuspärañasa? (1 Pedro 2:21).

¹⁰ (1 Pedro 2:21 liytʼäta). Jehová Diosajj munat Yoqapar jiwasar yatichañapatak khitanitapatjja, jupar yuspärañasawa. Jesusan sarnaqäwipat yatjjatasajja, Jehová Diosarojj jukʼamp sumwa uñtʼtanjja, kunsa jupar kusisiyañatakejj lursna uksa yateqaraktanwa. Jesusan sacrificiot loqtasitapar confiyañäni ukhajja, Jehová Diosan amigopäsnawa, jupampis sumankaraksnawa (Rom. 5:1).

11. ¿Kunatsa Jesusan sutipjjar orastanjja?

¹¹ Jehová Diosarojj Yoqap taypiw orassna, ukatwa jupar yuspärañasa. Jehová Diosajj Jesús taypiw kunanaktï mayisktan ukanak churistu. Yoqapan sutipjjar orasktan ukhajja, Diosajj istʼistuwa, jaysarakistuwa. Jesusajj akham sänwa: “Kunanaktï sutij-jjar mayipkäta ukanakwa nayajj lurarakëjja, ukhamat Awkejj Yoqap taypi jachʼañchatäñapataki” sasa (Juan 14:13, 14).

12. ¿Kunatsa Jesusan sacrificiot loqtasitapat Jehová Diosar yuspärtanjja?

¹² Jesusan jakäwip sacrificiot loqtasitapatwa Diosajj juchanakas perdonistu. Jesusajj ‘jachʼa jilïr sacerdotesawa’, ‘jupajj alajjpachan Diosan tronopan kupëjjapar qontʼatawa’ sasaw Bibliajj qhanañchi (Heb. 8:1). Ukatjja jiwasajj mä yanapirinïtanwa, “jupajj Awkimp chikäki uka Jesucristowa” sasaw Bibliajj qhanañcharaki (1 Juan 2:1). Jiwasat khuyaptʼayasiri, qhawqtï lurañ puedktan uk amuyiri, ‘jiwasanakatak ruwtʼiri’ mä Jachʼa Jilïr Sacerdote jiwasanakar churatapat wal Jehová Diosar yuspärtanjja (Rom. 8:34; Heb. 4:15). Janitï Jesusajj jakäwip sacrificiot loqtaskaspänjja, pantjasiri jaqenakjamajj janiw Jehová Diosar oracionan jakʼachasiñ puedksnati. Jehová Diosajj wali valorani mä regalo, mä arunjja munat Yoqapar jiwasar churatapat janiw kunampis yuspärañ puedksnati.

13. Janïr jiwayatäkäna uka arumajj ¿kunjamsa Jesusajj discipulonakapar munasitap uñachtʼayäna?

¹³ Janïr jiwayatäkäna uka arumajja, Jesusajj wali jayaw discipulonakapatak oräna, Supayat jarkʼaqañapatakiw Awkipar mayirakïna (Juan 17:15). Ukhamatwa discipulonakapar wal munasitap uñachtʼayäna. Jesusan tʼaqesiyat uñjasiñapatakejj jukʼakis faltjjchïnjja, apostolonakapat llakisiskakïnwa.

14. ¿Kunjamsa jilat kullakanakasar munasitas uñachtʼaytanjja?

¹⁴ Jesusat yateqasisajja, janiw kunanakatï jiwasatak wakiski ukanakak oracionasan mayktanti, jan ukasti jilat kullakanakasatakejj oraraktanwa. Ukham lurasaw Jesusajj maynit maynikam munasipjjam siskäna uka mandator istʼatas uñachtʼaytanjja, jilat kullakanakasar qhawqsa munastan ukwa Jehová Diosar uñachtʼayaraktanjja (Juan 13:34). Jilat kullakanakasatak oración lurasajj tiempsa aptʼasksna ukham janiw amuyañasäkiti. Bibliajj akham siwa: “Cheqapar sarnaqer jaqen ruwtʼasitapajj wali chʼamaniwa” sasa (Sant. 5:16).

15. ¿Kunatsa jilat kullakanakasatakejj orañasa?

¹⁵ Jilat kullakanakasajj kunayman jan walinakanwa uñjasipjje, ukatwa jupanakatak  orañasa. Jupanakajj usuntata, guerranakamp jan waltʼayata, arknaqata, terremotonakana jan ukajj yaqha ukhamanakanwa uñjasipjje. Ukatwa aguantapjjañapatak jupanakar yanaptʼam sasin Jehová Diosar orasiñasa. Labores de socorro ukan yanaptʼañatak wal chʼamachasipki uka jilat kullakanakatakiw oraraksna. Ukhamanakan uñjasir jilat kullakanakarojj inas jumajj uñtʼsta. ¿Janit sutinakap aytasin orarapkasma? Aguantapjjañapatak jilat kullakanakar yanaptʼam sasin Jehová Diosar mayisajja, jupanakar cheqapun munasitaswa uñachtʼaytanjja.

16. ¿Kunatsa pʼeqtʼapkistu uka jilatanakatak orarapiñasa?

¹⁶ Congregación pʼeqtʼir jilatanakatak oraraptan ukhajja, jupanakajj wal yuspärapjje. Uka oracionanakajj wal jupanakar yanaptʼi. Apóstol Pablojj ukhamaw jikjjatasïna. Jupajj akham sänwa: “Ukhamarakiy sum parlañatak yanaptʼa katoqañajatakejj nayatak orarapipjjeta, ukhamat Diosan imantat amtapat suma yatiyäwinak jan ajjsaras yatiyañajataki” sasa (Efes. 6:19). Jichha tiemponjja, pʼeqtʼapkistu uka jilatanakajj wali trabajtʼirïpjjarakiwa. Taqe kunanaktï lurapki ukanak bendisiñapatak Jehová Diosar mayisajja, jupanakar munasitaswa uñachtʼaytanjja.

17, 18. ¿Kuna ratunakas mayninak nayraqatan orañ mayipjjestaspa, ukat kunsa amtañasa?

¹⁷ Awisajj mayninak nayraqatan orañasatakiw mayipjjestaspa. Amuytʼañataki, Bibliat yatichir mä kullakajja, inas jupar compañki uka kullakarojj yateqeripatak orañap maychispa. Compañki uka kullakajj inas yateqerir jan sum uñtʼkchiti, ukatwa Bibliat yatjjatañ tukuyar orañ munaspa. Ukhamatwa yateqerir yanaptʼañatakejj oracionan kamsanisa uk sum yatjjani.

¹⁸ Mä jilatarojj predikir mistuñatak tantachäwina, jan ukajj congregacionan mä tantachäwin orañapatak mayipjjani ukhajj ¿kunsa jupajj amtañapa? Orapkani uka jilatanakajj kuna amtampis uka tantachäwejj apasi ukwa amtapjjañapa. Oracionanakajj janiw congregacionar ewjjsuñatakïkiti, ni yatiyäwinak yatiyañatakïkisa. Jilaparte tantachäwinakanjja, cancionampi oracionampejj phesqa minutonwa tuktʼayasiñapa. Ukhamasti oración lurkani  uka jilatajj janiw “walja arunak” oracionan arsuñapäkiti, yamas tantachäwi qalltanakan janiw wali jay orañapäkiti (Mat. 6:7).

19. ¿Jehová Diosajj juzgkani uka urutak wakichtʼatäñatakejj kunas yanaptʼistani?

¹⁹ Niyakejjay Jehová Diosajj juzgkani uka urojj jakʼachasisinkchejja, oración lurañajj jukʼamp importantëñapawa. Oracionat parlkasinjja, Jesusajj akham sänwa: “Jumanakajj amuyasipjjapunim, Diosar taqe chuym mayisiñsa janirak jaytapjjamti, ukhamat taqe kunanakatï pasañapäki ukanakat escapapjjañamataki” sasa (Luc. 21:36). Jiwasatï sapa kuti orasiñäni ukhajja, janiw Jehová Diosar serviñan ikjkañäniti, Jehová Diosan juzgañ urupajj purinkani ukhas wakichtʼatäñäniwa.

20. ¿Oracionanakasajj suma olorani inciensor uñtatäñapatakejj kunsa lursna?

²⁰ ¿Kunanaksa aka yatichäwin yatjjatawaytanjja? Jehová Diosar orasiñ wali valoranit uñjañasawa. Kunanakatï Jehová Diosatak jukʼamp importantëki ukanakwa nayraqat oracionanakasan aytañasa. Jehová Diosarojj Yoqapar khitanitapatsa, Reinopats yuspärañasawa, jilat kullakanakasatakis orañasarakiwa. Kunatï jakañatak wakiski ukanak jiwasar jan faltañapataki, Jehová Diosar jukʼamp confiyaskakiñatakiw orasiraksna. Oracionanakasan kamsañänisa ukanakat sum amuytʼasajja, oracionar wali valoranit uñjataswa uñachtʼaytanjja. Ukhamtï lurañänejja, Jehová Diosatakejj oracionasajj suma olorani inciensor uñtatäniwa, ‘juparojj wal kusisiyani’ (Prov. 15:8).