1. ¿Kunatsa janïr mä jan waltʼäwi utjkipan wakichtʼatäñasa?

 WAKICHTʼATÄÑAJJ waljaniruw salvi. Mä jan waltʼäwejj utjki ukhajja, jilapartejj wakichtʼatäpki ukanakajj salvasipjjaspawa, yaqhanakarus yanaptʼapjjarakispawa. Europa toqenjja jaqenakar yanaptʼir mä organizacionajj akham siwa: “Suma wakichtʼatäñajj waljaniruw salvaspa” sasa.

2. ¿Kunatsa jachʼa tʼaqesiñ tiempotakejj wakichtʼasiñasa? (Mateo 24:44).

² “Jachʼa tʼaqesiñ” tiempojj mä akatjamatwa qalltani (Mat. 24:21). Ukampis yaqha jan waltʼäwinakat sipansa, janiw ukajj mä akatjamat taqenir katjkaniti. Mä 2.000 maranak nayrajja, Jesusajj wakichtʼatäpjjam sasaw arkirinakapar säna (Mateo 24:44 liytʼäta). Jiwasatï uka ewjjtʼarjam lurañäni ukhajja, uka jachʼa tʼaqesiñ tiempon salvasiñajj jukʼamp faciläniwa, yaqhanakarus salvasipjjañapatakiw yanaptʼarakiñäni (Luc. 21:36).

3. ¿Kunatsa jachʼa tʼaqesiñ tiempotak wakichtʼatäñatakejj aguantañasa, sinttʼasirïñasa, munasirïñas wakisini?

³ Jachʼa tʼaqesiñ tiempotak wakichtʼatäñatakejja, aguantaña, sinttʼasirïña, munasirïñaw yanaptʼistani. Juchañchir yatiyäw yatiyañas mayipkistani ukhasa, jaqenakajj jiwas contra saytʼapkani ukhas ¿kunsa lurañäni? (Apoc. 16:21). Jehová Diosar istʼañatakisa, jupaw jarkʼaqestani sasin confiyañatakis aguantirïñasaw wakisini. Jilat kullakanakasajj utjirinakapat aptʼasipjjani jan ukajj jan kunan uñjasipjjani ukhajj ¿kunsa lurañäni? (Hab. 3:17, 18). Kunanaktï jupanakajj necesitapkani ukanakamp yanaptʼañatakejj sinttʼasirïñasaw wakisini. Mayachtʼat markanakajj atacapkistani ukhajj inas mä jiskʼa lugaran jilat kullakanakamp chik jakañasächini, ¿kunas ukhajj wakisini? (Ezeq. 38:10-12). Uka horasan jilat kullakanakasar jukʼamp munasiñaw wakisini.

4. ¿Kunjamsa Bibliajj aguantañatakisa, sinttʼasirïñatakisa, munasirïñatakis chʼamañchistu?

⁴ Diosan Arupajj jukʼamp aguantañataki, sinttʼasirïñataki, munasirïñatakiw  chʼamañchistu. Lucas 21:19 textojj akham siwa: “Aguantapjjatam laykojj vidams salvasipjjätawa” sasa. Colosenses 3:12 textojj akham ewjjtʼistu: “Chuymatpach sinttʼasiñampi [...] isthapisipjjam” sasa. 1 Tesalonicenses 4:9, 10 textojj akham sarakiwa: “Jumanakarojj Diosaw maynit maynikam munasiñ yatichasipktamjja. […] Ukampis jilatanaka, jukʼamp munasipjjañamatakiw chʼamañchtʼanipjjsma” sasa. Khitinakatï aguantasipkäna, sinttʼasirïpkäna, munasirïpkäna ukanakaruw uka arunakajj qellqasïna. Ukampis ukhamäñatakejj chʼamachasisipkakiñapänwa. Jiwasarojj uk lurañaw waktʼarakistu. ¿Kunas ukatak yanaptʼistani? Aka yatichäwinjja, ukhamäñatakejj kunsa nayrïr cristianonakajj lurapjjäna, jachʼa tʼaqesiñ tiempotak wakichtʼatäñatakejj kunjamsa jupanakat yateqassna ukanak yateqaskañäni.

5. ¿Kunsa nayrïr cristianonakajj aguantañatak lurapjjäna?

⁵ Nayrïr cristianonakajj aguantirïpjjañapänwa (Heb. 10:36). Jakañ vidan utjki uka llakinakat sipansa, Diosar servipjjatap laykojj yaqha jan walinakanwa uñjasipjjäna. Waljaniw judío religión pʼeqtʼirinakampi Romankir autoridadanakamp arknaqat uñjasipjjäna, familianakapas jupanak contraw saytʼarakïna (Mat. 10:21). Kʼari yatichäwinakapamp congregación tʼaqjtayañ munir apostatanakats wal amuyasipjjañapänwa (Hech. 20:29, 30). Ukhamanakan uñjaskasas cristianonakajj aguantapjjänwa (Apoc. 2:3). ¿Kunas jupanakar yanaptʼäna? Kunjamsa yaqhanakajj aguantapjjäna ukwa Hebreo Arut Qellqatanakan liytʼapjjäna, ukanakat maynejj Job chachawa (Sant. 5:10, 11). Jehová Diosaruw oracionan chʼam mayisipjjäna (Hech. 4:29-31). Aguantapjjatap laykojj kuna bendicionanakas utjani uk amtapjjapunirïnwa (Hech. 5:41).

6. Diosar serviñat jarkʼapkistani ukhajj ¿kunsa Merita kullakjam aguantañatakejj lursna?

⁶ Bibliansa Bibliat apstʼat qellqatanakasansa, kunjamsa yaqhanakajj aguantapjjäna uka toqet parlir walja sarnaqäwinakaw utji, jiwasatï uka sarnaqäwinakat sapa kuti lupʼiñäni ukhajja, aguantarakiñäniwa. Ukaw Albania markankir Merita sat mä kullakarojj nayrar sarantaskakiñatakejj yanaptʼäna, juparojj familiapaw Diosar serviñat jarkʼañatakejj tʼaqesiyäna. Kullakajj akham siwa: “Job chachan sarnaqäwipat Biblian yateqkayäta ukhajja, chuymarupuniw purtʼitäna. Job chachajj wal tʼaqesïna, janirakiw khitis ukham tʼaqesiyäna uk yatkänti. Ukhamäkchïnsa, Job 27:5 texton ‘¡Jiwañajkamajj janipuniw Diosar taqpach chuymamp serviñ apanukkäti!’ sasaw jupajj säna. Ukajj kunjamsa jupajj nayat sipans jukʼamp jachʼa yantʼanakar saykatäna ukwa amuytʼayitäna. Job chachajj khitis tʼaqesiyaskäna uk janis yatkchïnjja, nayajj yatiyätwa” sasa.

7. Janis jichhajj kuna jan walins uñjaskstajja, ¿kun lurañs jichhatpach yateqañama?

⁷ Maysa toqetjja, kunjamas jikjjatastan uk Jehová Diosar sapa kuti awistʼasiñaw aguantañatak yanaptʼistani (Filip. 4:6; 1 Tes. 5:17). Inas jichhajj sinti jan walin jan uñjaskstati. Ukampis ¿kunsa coleratäkta, jan kamachirjamäkta, jan ukajj aynachtʼatäkta ukhajj lurta? ¿Jehová Diosan yanaptʼap thaqtati? Jumatï sapürus utjki uka jan walinakar saykatañatak Jehová Diosar thaqapunïta ukhajja, jutïrin jukʼamp jan walinakajj utjkani ukarojj saykatarakïtawa. Kunapachasa ukat kunjamsa yanaptʼätam uk Diosajj yatiwa, janirakiw ukat payachasktati (Sal. 27:1, 3).

8. Jichhatï aguantañ yatiñänejja, jutïrin aguantarakiñäniwa, ¿kunjamsa Mira kullakan experienciapajj uk uñachtʼayi? (Santiago 1:2-4; foto uñjjattʼarakïta).

⁸ Jichhatï jan walinakan aguantañänejja, jachʼa tʼaqesiñ tiempon aguantarakiñäniwa (Rom. 5:3). ¿Kunatsa ukham sistanjja? Walja jilat  kullakanakaw “mä yantʼan aguantasajj yaqha yantʼar saykatañatakejj jukʼamp chʼamanïtwa” sasin sapjje. Jehová Diosan yanaptʼapamp aguantasajja, qhawqsa Diosajj jupanakar yanaptʼañ muni ukar jukʼampiw confiyapjje. Uka confianzampiw jutïr yantʼar saykatapjje (Santiago 1:2-4 liytʼäta). Albania markankir Mira sat mä precursora kullakarojja, nayra tiempon jan walinak aguantañajj jichhürunakan aguantañatakiw yanaptʼaraki. Awisajj jupakis sinti jan walinakan uñjaskaspa ukhamwa amuyasi. Ukampis ukham amuyi ukhajj kunjamsa aka 20 qhepa maranakan Jehová Diosajj jupar yanaptʼawayi ukwa amtaraki, akham sasaw chuymapan jupa pachpar sasiraki: “Jan Diosat jitheqtamti. Walja maranak Diosar servitamsa, kunayman jan walinakar Jehová Diosan yanaptʼapamp atipjatams jan ina chʼusar aptʼasimti” sasa. Taqe kunanaktï Jehová Diosajj aguantañamatak lurawayki ukanakwa amthapirakisma. Sapa kuti mä jan wal aguantkta uk Jehová Diosajj uñjaskiwa, bendisirakïtamwa, janipun ukat payachasimti (Mat. 5:10-12). Jachʼa tʼaqesiñ tiempojj qalltani ukhajja, jumajj aguantañ yatjjätawa, aguantaskakïtawa.

9. ¿Kunjamsa Antioquía de Siria cheqankir jilat kullakanakajj sinttʼasirïpjjatap uñachtʼayapjjäna?

⁹ Judea markankir cristianonakajj manqʼat pistʼat uñjasipkäna ukhajj kunas pasäna uk amuytʼañäni. Antioquía de Siria cheqankir jilat kullakanakajj uk yatipjjäna ukhajja, jupanakat wal sinttʼasipjjäna. Qhawqsa jupanakat sinttʼasipjjäna uk luratanakapampiw uñachtʼayapjjäna. “Ukatwa discipulonakajj Judean jakir jilatanakar yanaptʼanak apayañ amtapjjäna, qhawqhatï sapa maynin utjkäna ukarjama” (Hech. 11:27-30). Manqʼat pistʼat uñjasir jilat kullakanakajj wali jayansa jakapkchïnjja, Antioquía markankir cristianonakajj kunjamat yanaptʼañs munapjjapunïnwa (1 Juan 3:17, 18).

10. Jilat kullakanakasajj mä akatjamat jan walin uñjasipjje ukhajj ¿kunjamanakatsa jupanakat sinttʼasitas uñachtʼaysna? (Foto uñjjattʼarakïta).

¹⁰ Jilat kullakanakajj mä akatjamat jan walin uñjasipjjatap yatktan ukhajja, jiwasajj ukhamarakiw jupanakat sinttʼasna. Akanak lurasaw ratuk yanaptʼsna: anciano jilatanakaruw yanaptʼañ munatas yatiysna, obra mundial ukaruw donacionanakas chursna, ukhaman tʼaqesirinakatakiw oracionan mayirapiraksna (Prov. 17:17). b 2020 maranjja, COVID-19 pandemian yanaptʼañatakejj 950 Comités de Socorro ukanakaw oraqpachan uttʼayasiwayi. Labores de socorro ukan yanaptʼirinakarojj taqeniruw wal yuspärtanjja. Jilat kullakanakapat wal sinttʼasipjjatapatwa yanaptʼapjje, Diosan Arupampiw chuymachtʼapjje, awisanakajj utanakapsa salonanaksa askichapjjewa jan ukajj wasitat lurapjjaraki (2 Corintios 8:1-4 liytʼarakïta).

11. ¿Kunjamsa mayninakat sinttʼasisajj alajjpachankir Awkisar jachʼañchtanjja?

¹¹ Mä jan waltʼäwin uñjasipki ukanakat sinttʼasitas yaqhanakajj uñjapjjarakiwa. 2019 maranjja, Bahamas toqen Dorian sat mä jachʼa thayaw mä Salón del Reino tukjäna. Uka salonajj wasitat lurasiskäna ukhajja, jilatanakajj mä contratistaruw mä qhawqha lurañapatak mä presupuesto apsuñapatak mayipjjäna. Contratistajj akham sänwa: “Nayajj yanaptʼañ munarakiristwa. Jachʼa maquinanakatsa, trabajo luratatsa, materialanakats janiw cobrapkämati. Kunjamsa jumanakkam sum uñjasipjjta ukajj wali musparkañawa” sasa. Jilaparte jaqenakajj janiw Jehová Diosar uñtʼapkiti, ukampis kunsa Testigonakajj lurtan uk amuyapjjewa. Kunjamsa sinttʼasirïtasajj khuyapayasir Diosar uñtʼapjjañapatak yaqhanakar  yanaptʼi ukajj mä privilegiowa, cheqas “Diosan khuyapayasiñapajj wali jachʼawa” (Efes. 2:4).

12. ¿Kunjamsa jichha tiempon sinttʼasiñajj jachʼa tʼaqesiñ tiempotak wakichtʼistu? (Apocalipsis 13:16, 17).

¹² ¿Kunatsa jachʼa tʼaqesiñ tiempon sinttʼasirïñasajj wakisini? Kuna laykutejj Bibliarjamajja, gobiernonakar jan apoyirinakajj jichhasa jachʼa tʼaqesiñ tiemponsa, jan walinakanwa uñjasipjjani (Apocalipsis 13:16, 17 liytʼäta). Inas jilat kullakanakasajj kunanakatï jakañatak wakiski ukanakamp yanaptʼatäñ munapjjchini. Kunapachatï Jesucristo Reyisajj jaqenakar juzgañatak jutkani ukhajj mayninakat sinttʼasitaswa uñjani, “Reino katoqapjjam” sasaw sarakistani (Mat. 25:34-40).

13. ¿Kunsa nayrïr cristianonakajj jupanakkam jukʼamp munasiñatakejj lurapjjäna? (Romanos 15:7).

¹³ Nayrïr patak maranakanjja, cristianonakan munasipjjatapajj qhanaw uñjasïna. Ukampis ¿jupanakkam munasiñajj facilakïpachänti? Romankir congregacionat amuytʼañäni, kunayman jilat kullakanakaw ukan utjäna. Yaqhepajj Moisesan Leyiparjam uywat judionakäpjjänwa. Yaqha markanakat jutir jilat kullakanakas utjarakïnwa, kunayman costumbrenakanïpjjänwa. Inas yaqhepajj esclavöpjjchïna, yaqhepajj janiraki, inas yaqhepajj esclavonakanïpjjchïna. ¿Kunas sum apasiñatakisa sapa kut jukʼamp munasiñatakis jupanakar yanaptʼäna? Apóstol Pablojj akham sasaw jupanakar ewjjtʼäna: “Maynit maynikam katoqtʼasipjjam” sasa (Romanos 15:7 liytʼäta). ¿Ukampejj kamsañs munäna? “Maynit maynikam katoqtʼasipjjam” sasin traducitäki ukajja, munasiñamp maynir katoqtʼaña jan ukajj sum katoqtʼaña sañ muni, kunjamtï maynejj utapar maynir katoqtʼki jan ukajj amigonakap taypir katoqtʼki ukhama. Mä kutejja, Filemonan utapat escapkäna uka Onesimor katoqtʼañapatakiw Pablojj jupar mayïna. Akham sasa: “Juparojj wali munasiñampi katoqtʼam” sasa (Filem. 17). Priscilampi Aquilampejj Apolosat sipans jukʼampinak cristianonakan yatichäwinakapat yatipjjäna, ukampis munasiñampiw Apolosar uñjapjjäna, jupanakamp chikaw irpapjjarakïna (Hech. 18:26). Jupanakajj janis igualäpkchïnjja, janiw tʼaqa tʼaq sarnaqapkänti, antisas maynit maynikamaw katoqtʼasipjjäna.

14. ¿Kunjamsa Anna kullakampi esposopampejj munasiñ uñachtʼayapjjäna?

¹⁴ Jiwasajj ukhamarakiw jilat kullakanakar sum katoqtʼasasa, amigonakas taypir katoqtʼasas munasitas uñachtʼaysna. Ukhamatwa jupanakajj munasiñamp uñjapjjarakistani (2 Cor. 6:11-13). Kunas Anna kullakampir esposopampirojj pasäna uk amuytʼañäni, jupanakajj África Occidental toqenwa misionerot servisipkäna. Uksa toqen yaqha markar khitatäpkäna ukat mä jukʼarojj COVID-19 pandemiaw qalltäna, janirakiw congregacionampejj mä lugaran tantachasiñ puedipkänti. ¿Kunsa jupanakajj jilat kullakanakar munasiñ uñachtʼayañatak lurapjjäna? Jilat kullakanakarojj jukʼamp sum uñtʼañ munapjjsma sasaw videoconferencia toqejj sapjjäna. Ukajj jilat kullakanakan chuymaparuw purtʼäna, ukatwa jilat kullakanakajj telefonot jawsapjjäna, mensajenaks apayapjjäna. ¿Kunatsa uka misioneronakajj congregacionankirinakar uñtʼañatak chʼamachasipjjäna? Anna kullakajj akham siwa: “Kunjamsa jilat kullakanakajj jan wali horasansa suma horasans nayampir familiajampir wali munasiñamp uñjapjjetäna ukajj chuymajankapuniwa. Uk amuytʼañaw mayninakar munasiñamp uñjañatak yanaptʼitu” sasa.

15. ¿Kunsa Vanessa kullakat jilat kullakanakar munasiñamp uñjañatak yateqasma? (Foto uñjjattʼarakïta).

¹⁵ Congregacionanakan kunayman chuymani kunaymanin jilsur walja jilat kullakanakaw utji. ¿Kunas taqenir jukʼamp munasiñatak yanaptʼistani? Kunja suma chuymanïpjjesa uk  uñtʼañatakiw chʼamachasiñasa. Nueva Zelanda markankir Vanessa sat mä kullakatakejja, congregacionapankir yaqhep jilat kullakanakamp sum apasiñajj janiw faciläkänti, kunjam jaqëpjjänsa ukaw jupar colerayäna. Jupanakat jitheqtañat sipansa, jupanakar jukʼamp jakʼachasiñ amtäna. Uk lurasaw kunas Jehová Diosarojj jupanakat gusti uk amuyäna. Kullakajj akham siwa: “Niyakejjay esposojarojj superintendente de circuitot uttʼayapjjchïnjja, walja jilat kullakanakampiw jikisipjjerïta, jupanakajj janiw igualäpkarakiti. Ukampis jichhajj janiw mayninakamp sum apasiñajj nayatak chʼamäjjeti. Ukham jan igualäpjjatapajj wal gustarakitu. Cheqas Jehová Diosarojj wal ukajj gustaraki, ukatwa kunayman jaqenak markapar irpaniraki” sasa. Ukhamajj ¿kunjamsa jilat kullakanakasar munasitas uñachtʼaysna? Kunjamtï Jehová Diosajj jupanakar uñjki ukham uñjañatakiw chʼamachasiñasa (2 Cor. 8:24).

16. ¿Kunatsa jachʼa tʼaqesiñ tiempon munasiñajj wali wakiskirïni? (Foto uñjjattʼarakïta).

¹⁶ Jachʼa tʼaqesiñ tiempon jilat kullakanakasar munasiñajj wali wakiskirïniwa. ¿Kunjamsa Jehová Diosajj jachʼa tʼaqesiñ tiempon jarkʼaqestani? Nayra Babilonia markar atacapkäna ukhajj kuna instruccionanaksa Jehová Diosajj markapar churäna uk amuytʼañäni, jupajj akham sänwa: “Nayan markaja, sarasin manqhäjjankir utanakamar mantam, punkunak llawkatasinim. Mä rat imantasim, Diosan colerasiñapajj pasañapkama” sasa (Is. 26:20). Jachʼa tʼaqesiñ tiempon inas uka pachpa instruccionanakar istʼañasajj wakischini. “Manqhäjjankir utanakamar mantam” sasinjja, congregacionanakatwa parlaskaspa. Jiwasatï uka tiempon jilat kullakanakasamp mayachtʼatäñäni ukhajja, Jehová Diosajj arsutaparjamaw jarkʼaqestani. Ukhamajj janiw jilat kullakanakasampejj aleq ukhamak sum apasiñajj wakiskiti, jupanakarojj cheqpachapuniw munasiñasa. Janitï jupanakar ukham munaskañänejja, inas jan salvaskchiñäniti.

17. Jichhatpach wakichtʼasiñäni ukhajj ¿kunsa jachʼa tʼaqesiñ tiempon lurañäni?

¹⁷ “Jehová Diosan jachʼa urupajj” purinkani uka tiemponjja, taqe jaqenakaw wal tʼaqesipjjani (Sof. 1:14, 15). Diosan servirinakapajj ukhamarakiw jan walin uñjasiñäni. Ukampis jichhatpach wakichtʼasiñäni ukhajja, tranquilokïñäniwa, mayninakarus yanaptʼarakiñäniwa. Aguantirïsajja, kuna jan walirus saykatakiñäniwa. Sinttʼasirïsajja, puedkañäni ukarjamaw jilat kullakanakasar ratuk yanaptʼañäni, kuntï munapkani uks churañäni. Jupanakar munasitasatjja, jupanakampejj mayachtʼatäñäniwa. Jehová Diosajj machaq mundon wiñay jakañwa churistani, ukan janiw jan waltʼäwinakasa tʼaqesiñanakas amtatäjjaniti (Is. 65:17).