Tatajajj Iglesia Unida de Canadá ukankir ancianönwa. Ukatwa sullka kullakajampirojj wawanakar Bibliat yatichaski ukarojj sapa domingo alwajj khitapjjerïtu. Once alwa horasarojj yaqha tantachäwiruw tatajampejj sarapjjarakirïta. Jaypʼurusti mamajampiw salonar sarapjjarakirïta. Nanakatakejj uka pä religionanakajj janiw kunans igualäpkänti.

Mamajajj kuntï yateqkäna ukwa Bob ukat Marion Hutcheson sat amigonakapar yatiyäna, jupanakajj Testigöjjapjjarakïnwa. 1958 maranjja, Bob jilatampi Marion kullakampejj kimsa wawapampir nayampirojj “Voluntad Divina” sat asamblea internacionalaruw irpapjjetäna, ukajj Nueva York markanwa kimsaqallqo urunakajj apasïna. Uka asamblearu nayar irpañatakejj kunjamsa chʼam tukupjjpachäna uk jichhakiw amuyta, ukajj wal yanaptʼawayitu, ukatwa wali valoranit uñjta.

Waynitükasajj camponwa jakayäta, walja animalanakaw ukan utjarakïna, uka animalanak uñjañajj wal gustitäna. Ukatwa Veterinaria estudiañ wal munayäta. Mamajajj congregacionankir mä ancianoruw kuntï lurañ amtkayäta uk yatiyatayna, ukatwa uka jilatajj ‘qhepa urunakan’ jakaskatas munasiñampi amtayitäna. Universidadar walja maranak sarasajj “¿janit Jehová Diosamp sum apasitam aptʼaskäta?” sasaw jisktʼarakitäna (2 Tim. 3:1). Kuntï siskitäna uk amuytʼasajja, janiw universidadar sarañ amtjjayätti.

 Colegio tukuyasajj kunsa luräjja uk janiw yatkayätti. Sapa semana tukuyaw predikir misturïta, ukampis predicañajj janiw gustkitänti, janjamakiw precursorat sirvkiristti sasaw amuyarakiyäta. Tatajampi tiojampejj janiw Testigöpkänti, Toronto markankir wali uñtʼat mä empresan sapür trabajiñajwa munapjjäna, uka empresajj seguronak churirïnwa. Tiojajj uka empresan wali importante cargonïnwa, ukatwa ukan trabaj-jjayäta.

Jukʼamp horanakaw uka empresan trabajirïta, jan Testigöpki uka jaqenakampiw uru jurnäl trabajirïta. Awisakiw salonarus predikiris sarjjayäta. Uka tiempon abuelitojampiw jakayäta, jupajj janiw Testigökänti, ukampis qhepat jiwjjänwa, ukatwa yaqha cheqar jakir sarjjayäta.

1958 maran mä asamblear apapkitäna uka Bob jilatampi Marion kullakampejja, nayatakejj awk taykjamäpjjänwa. Nayarojj jupanakamp jakañatakiw jawstʼapjjetäna, Diosar jukʼamp serviñatakis yanaptʼapjjarakitänwa. Ukatwa 1960 maran jupanakan John sat mä yoqapamp chikajj bautisasta. Niyakejjay John jilatajj precursoräjjchïnjja, jukʼamp predicañwa munjjarakiyäta. Jilatanakajj Diosar serviñan nayrar sartaskatajwa uñjapjjäna, ukatwa tiempompejj siervo de la Escuela del Ministerio Teocrático a ukham uttʼayapjjetäna.

1966 maranjja, taqe chuym predikir Randi Berge sat precursora kullakampiw casarasta, kawkintï predikirinakajj munaski ukar yanaptʼiriw sarañ munarakïna. Circuito jilatajj wal yanaptʼapjjetäna, Orillia (Ontario) markankir congregacionar sarapjjañajatakiw chʼamañchtʼapjjarakitäna. Nanakajj taqe kun apthapisisaw sarjjapjjayäta.

Randi esposajajj taqe chuym predikirïnwa, nayajj jupjam predikañwa munarakiyäta. Ukatwa Orillia markar purisajj precursorat serviñ qalltayäta, suma yatichirïñatakiw chʼamachasirakiyäta. Bibliat yatichasasa, cheqa yatichäwinak uñtʼapjjañapatak yaqhanakar yanaptʼasas wal kusisirïta. Orillia markankir mä chacha warmir cambiapjjañapatak yanaptʼañasa, jakäwinakap Diosar katuyasipjjañapatak yanaptʼañas mä bendicionapunïnwa.

Mä kutejj Toronto markar sarkayäta ukanjja, Arnold MacNamara jilataruw uñtʼayäta, jupajj Betelat encargatäpkäna uka jilatanakat maynïrïnwa. “¿Janit precursor especialat serviñ munapkasma?” sasaw jisktʼitäna. Uk jisktʼatajj jankʼakiw jupar akham sayäta: “¡Kun janisti! Quebec markaruk jan khitapjjestati” sasa. Inglés aru parlir canadiense jaqenakajja, Quebec markankiri francés aru parlir canadiense jaqenakarojj jiskʼachapjjerïnwa, ukamp apayasisaw ukham sayäta. Uka maranakanjja, Canadá markat tʼaqaqtañatakiw mä qhawqha politiconakajj Quebec provincian sartasipjjäna.

Arnold jilatajj akham sitänwa: “Sucursalajj Quebec markarukiw precursor especialanak khitaski” sasa. Jan kamsjjasaw iyaw sisjjayäta. Esposajan ukar servir sarañ wal munatap yatjjayätwa. Tiempompejj wali sum amtapjjatajwa amuyayäta.

Phesqa semananak francés aru yatichapkitäna uka qhepatjja, nanakampiru yaqha chacha warmimpiruw Rimouski markar khitapjjetäna, uka markajj Montreal markat noreste toqer 540 kilometronak sarañankiwa. Janïraw francés aru sum parlañ yatipkayätti, ukajj mä tantachäwin anuncionak liykayäta ukhaw amuyasïna. Jutïr asamblean “Austria markat delegadonakaw purinipjjani” sañat sipansa, “walja avestruz jamachʼi delegadonakaw purinipjjani” sasaw satätjja.

Rimouski markanjja, janiw uka chacha warmimpikejj jakapkayätti. Uka viviendanjja, wal predikiri pusi solter kullakanakampi Huberdeau familiampiw jakapjjayäta, uka familiajj pä phuchanïnwa. Uka familiaw paqallqo cuartonakan mä ut alquiläna, taqeniw pagapjjarakiyäta. Niyakejjay uka utan fachadapas columnanakapas janqʼöchïnjja, “Janqʼo Uta” sasaw sapjjayäta. Ukanjja 12 jan ukajj 14 ukhaniw jakapjjayäta. Randi esposajamp precursor especialat servisajj alwat arumkamaw predicapjjerïta. Juyphi pachanjja, jaypʼunakajj wali thaya chʼamaka ukhamïrïkchïnsa nanakar compañtʼañatakejj mä jilatas jan ukajj mä kullakas utjapuniriwa, ukat walpun yuspärapjjerïta.

Wali trabajtʼiri uka precursoranakamp wali sum apasipjjatajatjja, mä jachʼa familiäjjapjjayätwa. Mä rat kusistʼañatakejj nin phichasaw juntʼuchasipjjerïta, empanadar uñtasit pierogis phayañatakis mä uruw utjapjjetäna, kuntï munapkayäta ukampiw ukar uchapjjerïta. Niyakejjay mä jilatar music tukañajj gustchïnjja, walja sabadonakaw arumanakajj cantapjjerïta thoqopjjarakirïta.

Rimouski markanjja, waljaniw Bibliat yateqañ qalltapjjäna. Phesqa maranakatjja, walja Bibliat yateqerinakaw bautisasjjapjjäna, ukajj walpun kusisiyapjjetäna. Congregacionan 35 publicadoranakaw utj-jjarakïna.

Quebec markan serviñajj walpun yanaptʼapjjetäna: jukʼamp suma predikirïñatakiw yanaptʼapjjetäna. Jehová Diosajj predicacionan yanaptʼapjjetänwa, jakañatak munaski ukanaks janipuniw faltayapkitänti. Francés aru parlirinakar munasiñwa yateqapjjayäta, francés arumpisa uka markankir costumbrenakapampis wali yatitäjjapjjayätwa. Ukaw yaqha markanakan costumbrenakapar yatinoqtañatakisa munasiñatakis yanaptʼawayapjjetu (2 Cor. 6:13).

Tiempompejja, “¿Tracadie markar sarapjjasmati?” sasaw sucursalat jisktʼanipjjetäna, uka markajj Nueva Brunswick markat inti jalsu toqenkiwa, lamar qota jakʼankarakiwa. Janiw ukar khitatäñ suyapkayätti. Ukhakiw mä vivienda alquilañatakejj mä contrato firmasipkayäta, mä escuelanwa profesorat chikat uru trabajiskayäta. Bibliat yateqerinakat waljaniw ukhak publicadoräsipkäna, mä salonaw lurasiskarakïna. Tracadie markar sarañajj janiw nanakatak faciläkänti.

Sabadompi domingompejj wal uka toqet orasipjjayäta. Tracadie marka uñjir sarasajj janiw Rimouski  markampejj kunans igualäkänti. Niyakejjay Jehová Diosajj uka markan servipjjañaj munchïnjja, sarapjjäwa sasaw sapjjayäta. Nanakajj Jehová Diosaruw yantʼapjjayäta, kunjamsa jupajj nanakatak thak jistʼaräna uksa uñjapjjarakiyätwa (Mal. 3:10). Randi esposajajj Jehová Diosamp wali sum apasitapatjja, mayninakar yanaptʼir chuymanïnwa, kusisitaw kuns lurarakïna, ukaw Tracadie markar facilak sarjjañatak yanaptʼapjjetäna.

Tracadie markanjja, Robert Ross jilatakiw ancianot serviskäna. Robert jilatampi Linda esposapampejj precursorat serviñatakiw uka markar sarapjjatayna, jilïr wawapajj naskäna ukat uksaruw uka markan quedasjjapjjatayna. Wawapar uywasajj ocupatäpkchïnsa, wali wajjtʼasirïpjjänwa, taqe chuymaw predicapjjarakïna, ukaw nanakar wal chʼamañchtʼapjjetäna.

Tracadie markan pä mara precursorat servisipkayäta ukhamaruw circuitot servipjjañajatak invitapjjetäna. Paqallq maranakaw inglés congregacionanakar visitapjjayäta, ukatjja Quebec markankir francés uru parlir mä circuitoruw khitapjjarakitäna. Ukanjja, Léonce Crépeault b sat superintendente de distrito jilatajj discurso arstʼatajat felicittʼapunirïtuwa. “¿Kunsa jukʼamp sum discursañatak lurasma?” sasaw jisktʼarakirïtu. Nayat ukham llakisitapatjja, discursonakajajj qhan amuykaña yanaptʼkiri ukhamäjjänwa.

1978 maranjja, Montreal markan “Fe Victoriosa” sat mä asamblea internacionalaw apasïna, uka asambleat janipuniw armaskäti. Departamento de Alimentos ukanwa yanaptʼayäta, uka asamblearojj 80.000 jaqenakan jutapjjañapwa suyapjjayäta. Janiw nayrjamajj manqʼajj wakichasjjänti, taqe kunaw mayjtʼäna: yaqha maquinanakaw utj-jjäna, yaqha manqʼanakaw phayasjjäna, manqʼa wakichañajj mayjjtʼjjarakïnwa. Manqʼañanak refrigerañatakejja, niya 20 remolque sat jachʼa carronakaw utjäna, ukampis awisajj uka refrigeradoranakajj janiw sum funcionirïkiti. Janirakiw taqe kun wakichañatakejj tiempopar estadionar mantañ puedipkayätti, asambleajj apasiñapäkäna uka mä uru nayrajj anatirinakaw uka estadio alquilasisajj anatasipkäna. Ukar mantapkayäta ukhajj chika arumäjjänwa. ¡Juntʼüm umtʼasiñatakejj janïr qhanjtankipanwa hornonakajj naktayatäjjañapäna! Wali qaritäpkchiyätsa wali trabajtʼiri, wali experienciani, wali kusisit taqe kuns lurir jilat kullakanakat waljanakwa yateqayäta. Ukham trabajiñajj mayachtʼapjjetänwa, jichhakamaw jupanakamp amigösipkakta. Quebec markan  apaskäna uka asambleajj jan armkañapunïnwa, 1940, 1950 maranakan enemigonakajajj uñisiñat arknaqapkitäna uka Quebec provincianwa asambleajj apasïna.

Montreal markan apaskäna uka jachʼa asambleanakanjja, waljanakwa yaqha superintendente jilatanakat yateqayäta. Mä kutejja, David Splane jilataw superintendente de asambleat yanaptʼaskäna, jichhajj uka jilatajj Cuerpo Gobernantenkirinakat maynïriwa. Yaqha asambleanjja, nayarakiw superintendente de asambleat yanaptʼaskayäta, David jilatajj wal yanaptʼitäna.

Esposajampejj 36 maranakaw circuitot serviwayapjjta. 2011 maranjja, Escuela para Ancianos de Congregación ukan instructorat serviñajatakiw invitapjjetäna. Esposajampejj pä maranakwa 75 kunayman ikiñanakan ikipjjayäta. Chʼamäkchïnsa kunayman bendicionanakaw utjäna. Seman tukuyarojja, kunjamsa Cuerpo Gobernantejj Diosamp sum apasipjjañapatakejj jupanakar yanaptʼäna uk uñjasajj walpun ancianonakajj yuspärapjjeri.

Qhepatjja Escuela para Evangelizadores del Reino ukan instructorat serviñajatakiw uttʼayapjjetäna. Awisajja yateqerinakajj paqallq horanak clasenkasasa, kimsa horanak sapür tareanak lurasasa, pusi jan ukajj phesqa horanak asignacionanak wakichasas wal llakisipjjeri. Mayni instructorampejj Jehová Diosan yanaptʼapampikiw taqe ukanak phoqapjjasma sasaw sapjjerïta. Janipuniw ak armkäti: Jehová Diosan yanaptʼapamp jukʼampinak lurasajj wal yateqerinakajj musparapjjeri.

Mamajajj mayninakat llakisipunirïnwa, ukaw Bibliat yateqerinakapar nayrar sartapjjañapatakisa tatajan Bibliat istʼañapatakis yanaptʼäna. Mamajajj jiwjjäna ukhat kimsa urunakatjja, taqenitak arstʼäwi discurso istʼañatakiw salonar purinïna, janiw uk suyapkayätti. Ukat uksarojj 26 maranakaw tantachäwinakarojj jan faltasis sarjjäna. Jupajj janis bautisaskchïnjja, nayraqatapuniw salonarojj puriniri sasaw ancianonakajj tatajat sapjjetu.

Mamajajj kimsa kullakanakajatakisa nayatakis wali yateqaskañapunïnwa. Kullakanakajajj esposonakapamp chikaw Jehová Diosat jan jitheqtas servisipki. Paninejj Betelanwa servisipki: maynejj Portugal markana, maynisti Haití markana.

Jichhajj Hamilton (Ontario) markanwa esposajampejj precursor especialat servisipkta. Circuitot servisipkayäta ukhajja, revisitanakaparu, Bibliat yateqerinakapar yatichañatak jilat kullakanakar compañtʼañajj wal gustapjjetäna. Jichhajj Bibliat yateqerinakanïñasa, Diosar serviñan nayrar sartapjjatap uñjañas wal gustapjjetu. Congregacionankir jilat kullakanakarus wali sum uñtʼapjjarakta, kunjamsa Jehová Diosajj walinsa jan walinsa jupanakat llakisi uk uñjañajj wal chʼamañchtʼapjjetu.

Kunjamsa jilat kullakanakajj nanakat wal llakisipjjäna uk amtasajja, esposajampejj wal yuspärapjjta. Mayninakarojj Jehová Diosar jukʼamp servipjjañapatakiw chʼamañchtʼapjjta, ukhamatwa mayninakat ‘qhawqsa llakisipjjta’ uk uñachtʼayañatak chʼamachasipjjta (2 Cor. 7:6, 7). Mä familianjja, kullakampi, yoqapampi, phuchapampikiw precursoräpjjäna. Ukatwa esposoparojj “¿janit precursoräñ munkasma?” sasin jisktʼayäta. Ukampis jilatajj kimsaniruw precursoräpjjañapatak yanaptʼaskta sarakitänwa. Nayajj akham jisktʼarakiyäta: “¿Janit Jehová Diosajj jumat sipans jukʼamp sum jupanakar cuidkaspa?” sasa. Familiapjam precursorat kusisita serviñapatakiw chʼamañchtʼayäta, sojjta phajjsinakat jilatajj precursoräjjänwa.

Randi esposajampejja, Jehová Diosan ‘musparkañ luratanakapat jutïr wawanakarojj’ parlasipkaktwa, kunjamtï nanakajj Jehová Diosar kusisit serviwayapkta ukhamarak jupanakajj kusisit servipjjaspa ukwa munapjjta (Sal. 71:17, 18).