1. ¿Kunanaksa Bibliat yateqkasajj yateqayäta?

 BIBLIAT yatichapkayätam ukhajj ¿kunanaksa yateqayäta uk amtastati? Inas Diosajj sutinïtap yateqasajj wal musparchiyäta. Infiernon jan utjatap yatiñasa, Diosajj jaqenakar ukan jan tʼaqesiyatap yateqañas inas wal chuymachtʼchiyätam. Munat familiaranakamana jan ukajj munat amigonakaman jiwatat jaktanipjjañap yateqasasa, jupanakamp mä Paraison jakapjjañamätam yatisas wal kusispachätajja.

2. Biblian cheqa yatichäwinakap yateqasajj ¿kunanakampsa nayrar sartaskatam uñachtʼayañatakejj lurawayta? (Efesios 5:1, 2).

² Diosan Arupat yatjjatkasajja, Jehová Diosar munasitamajj jukʼampiw jiljjattäna. Uka munasiñaw yateqkayäta ukarjam lurañatak chʼamañchtʼayätamjja. Biblian wiñay yatichäwinakapamp yanaptʼayasisaw jukʼamp suma amtanakar puriyätajja. Diosar kusisiyañatakisti jan wali amuyunakamsa luratanakamsa apanukjjayätawa. Kunjamtï mä wawajj tatapat yateqaskejja, ukhamarakiw jumajj wali munasiri alajjpachankir Awkimat yateqasiñ qalltayätajja (Efesios 5:1, 2 liytʼäta).

3. ¿Kunanaksa jisktʼassna?

³ Akham sasaw jisktʼasiñasa: “¿Bautisaskta uka tiempot sipans jukʼampit jichhajj Jehová Diosar munastjja? ¿Jehová Diosjamat amuytjja, luraraktjja, jukʼampis kunanaktï nayajj jilat kullakanakar munasiñ uñachtʼayañatak lurkta ukanti ukajj uñjasi?” sasa. Janitï nayrjam munasirëjjstan ukhajj jan aynachtʼañäniti. Nayrïr cristianonakarojj ukajj pasarakïnwa. Ukampis Jesusajj janiw jupanakar apanukkänti, jiwasarojj janirakiw apanukkistaniti (Apoc. 2:4, 7). Biblian cheqa yatichäwinakap yateqkayätan ukhajj munasiñasajj jiltänwa, ukhamarakiw jichhajj jiltaysna, Jesusajj uk yatiwa.

4. ¿Kunanakatsa aka yatichäwin yatjjataskañäni?

 ⁴ Aka yatichäwinjja, kunjamsa Jehová Diosar munasiñsa jaqe masisar munasiñsa jiltaysna ukwa yatjjatañäni. Ukatsti kunjamsa munasiñ jiltayktan ukajj jiwasarus mayninakarus yanaptʼistu ukwa yatjjatarakiñäni.

5, 6. 1) ¿Predickasajj kuna jan walinakansa apóstol Pablojj uñjasïna? 2) ¿Kunas Jehová Diosar serviskakiñatak yanaptʼäna?

⁵ Apóstol Pablojj predickasajj wali kusisitäkchïnsa, kunayman jan walinakanwa uñjasirakïna. Viajiñajj janis faciläkchïnjja, jilapartejj wali jayanakwa viajirïna. Viajkasajja, awisajj ‘jawiranakan jan waltʼäwinakanwa uñjasiri’, ‘lunthatanakamp jan waltʼayataw uñjasirakirïna’, awisajj enemigonakapamp jan waltʼayataw uñjasirïna (2 Cor. 11:23-27). Janiw ukakïkänti, cristiano jilat kullakanakapas jupanakar yanaptʼañatak chʼamachasitap janiw valoranit uñjapkänti (2 Cor. 10:10; Filip. 4:15).

⁶ ¿Kunas Pablorojj Diosar serviskakiñapatak yanaptʼäna? Qellqatanakata, kunanakatï jupar paskäna ukanakatwa Jehová Diosajj kunjam chuymanisa uk yateqäna. Jehová Diosajj qhawqsa jupar munasïna ukat janiw payachaskänti (Rom. 8:38, 39; Efes. 2:4, 5). Ukhamätapatwa Pablojj Jehová Diosar wal munasïna. Uka munasiñjja “santo jilatanakar” serviskakisaw uñachtʼayäna (Heb. 6:10).

7. ¿Kunanakas Jehová Diosar munasitas jiltayañatakejj yanaptʼistaspa?

⁷ Diosar munasitas jiltañapatakejja, Bibliat taqe chuymaw yatjjatañasa. Biblia liytʼktan ukhajja, kunsa uka versiculonakajj yatichistu ukwa amuytʼañasa. Akhamwa jisktʼasiñasa: “¿Jehová Diosajj nayar munasitap kunjamsa aka versiculonakajj uñachtʼayi? ¿Kunjamsa aka versiculonakajj Jehová Diosar munasiñatak yanaptʼitu?” sasa.

8. ¿Kunjamsa oracionajj Diosar jukʼamp munasiñatak yanaptʼistu?

⁸ Jehová Diosar jukʼamp munasiñatakejja, sapür oraskasajj chuymatpachaw jupar orasiñasa (Sal. 25:4, 5). Jehová Diosasti oracionanakasarojj jaysarakiniwa (1 Juan 3:21, 22). Asia toqen jakasiri Khanh b sat kullakajj akham siwa: “Qalltanjja, kuntï Jehová Diosat yatkayäta ukarjamakiw jupar munasiyäta. Ukampis kunjamsa oracionanakajar jaysitäna uk uñjasajj jukʼampiw Jehová Diosar munasjjayäta, ukarakiw kunanakatï jupar kusisiyki ukanak lurañatak yanaptʼawayitu” sasa.

9. ¿Kunjamsa Timoteojj jilat kullakanakar munasitap uñachtʼayäna?

⁹ Pablojj cristianöjjäna ukhat mä qhawqha maranak qhepatjja, yateqaskañ sarnaqer Timoteo waynaruw uñtʼäna. Timoteojj Jehová Diosarusa jaqenakarus wal munasïna. Ukatwa Pablojj akham sasin Timoteot Filipos markankirinakar qellqäna: “Nayatakejj janiw khitis jupjamajj utjkiti, jupajj cheqpachapuniw jumanakat llakisi” sasa (Filip. 2:20). Pablojj janiw Timoteon suma organiztʼirïtapsa discursonak suma arstʼirïtapsa qhanstaykänti, jan ukasti qhawqsa jilat kullakanakar munasïna ukaw jupatak jukʼamp importantëna. Congregacionankirinakajj Timoteon visitap wal suyapjjpachäna (1 Cor. 4:17).

10. ¿Kunjamanakatsa Anna kullakampi esposopampejj jilat kullakanakar munasipjjatap uñachtʼayapjjäna?

¹⁰ Kunjamanakatsa jilat kullakanakar yanaptʼsna uk amuyañatakiw chʼamachasiraktanjja (Heb. 13:16). ¿Pasïr yatichäwin parlaniwayktan uka Anna kullakat amtastati? Mä  jachʼa thayajj paskäna uka qhepatjja, esposopampiw mä Testigo familiar visitir sarapjjäna. Uka familian utapan uta techop jalaqtatapwa uñjapjjäna. Uka familian usktʼasiñatak qʼoma isinakapajj janiw utjkänti. Kuns lurapjjäna uk Anna kullakajj akham siwa: “Isinakap apasajj tʼajjsoqapjjayätwa, planchtʼata suktʼata ukham kuttʼayjjapjjayäta. Kuntï lurapkayäta ukajj janiw kuna chʼamäkänsa, ukampis ukham lurapjjatajat wali sum uka familiampejj apasipjjta” sasa. Munasiñatwa Anna kullakampi esposopampejj jilat kullakanakar yanaptʼapjjäna (1 Juan 3:17, 18).

11. 1) ¿Munasiñ uñachtʼayktan ukajj kunjamsa mayninakar yanaptʼi? 2) Proverbios 19:17 textorjamajj ¿kunjamsa Jehová Diosajj mayninakar munasitas uñji?

¹¹ Mayninakar munasiñampi khuyapayasiñampi uñjtan ukhajja, Jehová Diosat yateqasiñatak chʼamachasitaswa uñachtʼayasktanjja. Ukham chʼamachasitasjja wali valoranitwa mayninakajj uñjapjje. Párrafo 8 ukan parlaniwayktan uka Khanh kullakajja, jupar yanaptʼapkäna taqe ukanakat munasiñampiw amti, jupajj akham siwa: “Predicañatak irpapkitäna taqe uka kullakanakaruw wal yuspärta. Jupanakajj wali munasirïpjjänwa. Nayar irptiriw jutapjjeri, mä kun manqtʼasiñatakisa jan ukajj almuerztʼañatakis invitapjjetänwa, ukatsti sumakiw utar puriyjjapjjarakitäna. Jupanakan wal chʼamachasipjjatap jichhakiw amuyta, ukampis munasiñampiw uk lurapjjäna” sasa. Cheqas janiw taqenejj yanaptʼatasat yuspärapkistaniti. Yanaptʼapkäna ukanakat parlkasajj Khanh kullakajj akham siwa: “Yanaptʼapkitäna uka kullakanakar taqpachaniruw yanaptʼañ munarakirista, ukampis jupanakat yaqhepajj kawkjansa jakapjje uk janiw yatkti. Ukampis Jehová Diosaw uk yati, jupanakar bendisiñapatakis oraraktwa” sasa. Mayninakat mä jukʼaksa khuyaptʼayaskstanjja, Jehová Diosajj uk uñjiwa. Wali valorani sacrificiotwa uk uñji, manu kuttʼayañapäkaspas ukhamwa  Jehová Diosajj uñjaraki (Proverbios 19:17 liytʼäta).

12. ¿Kunjamsa bautisat jilatanakajj congregacionankirinakar munasiñ uñachtʼayapjjaspa? (Fotonak uñjjattʼarakïta).

¹² Jumatï mä jilatästajja, ¿kunjamsa congregacionankirinakar munasiñ uñachtʼayasma? Jupanakar yanaptʼasaw uk uñachtʼayasma. Jordan sat mä wayna jilatajja, kunsa jilat kullakanakar jukʼamp yanaptʼañatakejj lurirista sasaw mä anciano jilatar jisktʼäna. Uka ancianojj Diosar serviñan nayrar sartatapat felicittʼänwa, ukat mejorañapatakiw mä qhawqha ewjjtʼanak churarakïna. Salón del Reino ukar janïrjjat puriniñapataki, mayninakar arunttʼañapataki, tantachäwinakan comentarionak arstʼañapataki, grupopamp predicacionar sapa kuti mistuñapataki, kunjamanakatsa jilat kullakanakar yanaptʼaspa uk amuyañapatakiw ewjjtʼäna. Jilatan ewjjtʼaparjam lurasajja, Jordan jilatajj janiw congregacionan jukʼamp luräwinak katoqañatakik wakichtʼaskänti, jan ukasti jilat kullakanakar jukʼamp munasiñwa yateqäna. Ukatsti jilatajj akwa yateqarakïna: janiw maynejj siervo ministerialat uttʼayatäjje ukhakejj mayninakar yanaptʼañ qalltkiti, jan ukasti yanaptʼaskakiñapawa (1 Tim. 3:8-10, 13).

13. ¿Kunas Christian jilatarojj ancianot wasitat serviñatakejj yanaptʼäna?

¹³ Inas jumajj ancianota jan ukajj siervo ministerialat nayrajj sirvchiyäta. Kunanaktï munasiñat lurkayäta ukanakjja Jehová Diosajj janiw armkiti (1 Cor. 15:58). Kunanaktï jichhajj munasiñat luraskakta ukanaksa uñjaskiwa. Christian jilatajj ancianot apaqayasïna ukhajj wali llaktʼatänwa. Ukampis jupajj janiw aynachtʼkänti, jilatajj akham siwa: “Janis nayajj ancianot sirvjjchiyätjja, kunanaktï lurirjamäkayäta ukanak Jehová Diosar munasiñat luraskakiyätwa” sasa. Tiempompejj wasitatwa ancianot uttʼayatäjjäna. Christian jilatajj  akham saskakiwa: “Ancianot serviñatak wasitat jisktʼapjjetäna ukhajj payachasiyätwa. Ukampis Jehová Diosatï khuyaptʼayasiñapat congregacionan wasitat ancianot serviñaj munchïnjja, jupar munasiñatsa jilat kullakanakar munasiñatsa iyawsayätwa” sasa.

14. ¿Kunsa Georgia markankir kullakat yateqsna?

¹⁴ Jehová Diosan servirinakapajj jan Testigöpki ukanakar munasiñ uñachtʼayaraktanwa (Mat. 22:37-39). República de Georgia markankir Elena kullakat parltʼañäni, jupajj akham siwa: “Qalltanjja, Jehová Diosar munasitaj laykukiw predikir misturïta. Ukampis alajjpachankir Awkijar munasitaj jiltatapatjja, jaqe masijar munasiñajj jiltarakïnwa. Jaqenakajj kuna jan walinakansa uñjasipjje, kunanakatsa yatiñ munapjjaspa ukanakatwa lupʼirïta. Ukaw jaqenakar jukʼamp yanaptʼañ munañajatakejj yanaptʼitäna” sasa (Rom. 10:13-15).

15, 16. Kunjamtï fotonakan uñjaskejja, ¿kunjamsa mayninakar munasiñ uñachtʼayañajj yanaptʼi?

¹⁵ Jilat kullakanakar munasiñ uñachtʼayasajj mayninakaruw yanaptʼaraktanjja. COVID-19 pandemianjja, Paolo jilatampi esposapampejj celularanakapa tabletanakap apnaqañatakiw walja jilïr kullakanakar yanaptʼapjjäna, ukhamat ukanakamp predicapjjañapataki. Mä kullakatak celularap apnaqañajj wali chʼamäkchïnsa, apnaqañ yateqänwa, familiaranakaparus Jesusan jiwatap amtañatakiw invitäna. Uka tantachäwirojj sojjta tunkaniw videoconferencia  toqejj conectasipjjäna. Paolo jilatampina esposapampin chʼamachasipjjatapajja, uka kullakarus familiaranakaparus wal yanaptʼäna. Paolo jilatarojj akham sasaw uka kullakajj qellqäna: “Nayjam jilïrinakar yatichatamat walpun yuspärsma. Jehová Diosajj nanakat llakisitapatsa jumanakan paciencianïpjjatamatsa janipuniw armaskäti” sasa.

¹⁶ Ukanak uñjasaw Paolo jilatajj munasiñ uñachtʼayañajj kunja wakiskirisa uk yateqäna. Mä kun yatiñat sipansa jan ukajj mä kun sum lurtʼañ yatiñat sipansa, munasiñaw jukʼamp importantejja, ukwa yateqarakïna. Jupajj akham siwa: “Mä tiempon superintendente de circuitot serviyäta. Inas jilat kullakanakajj discursojat jan amtasjjapjjchiti, ukampis kunanak lurasas jupanakar yanaptʼawayta uk amtasipjjewa” sasa.

17. ¿Kunjamsa munasiñ uñachtʼayañajj yanaptʼistu?

¹⁷ Mayninakar munasiñ uñachtʼayktan ukhajja, jiwasajj jan suyat bendicionanakwa katoqaraksna. Ukaw Nueva Zelanda markankir Jonathan jilatampejj pasäna, mä sábado chika urojj mä precursoraruw sapaki wali caloran predicaskir uñjäna. Jonathan jilatajj sapa sábado jaypʼunak jupamp predicañatakiw amtäna. Munasiñat ukham luratapajj kunjamsa yanaptʼani uk janiw amuykänti. Jonathan jilatajj akham siwa: “Janiw predicañajj gustkitänti. Ukampis precursor jilatar sum yatichatap uñjañampi predicacionan jupar sum saratap uñjañampiw predicañ wal munañajatak yanaptʼawayitu. Uka jilatajj wali suma amigojänwa, Diosar serviñan jukʼamp jiltañatakisa, kusisit predicañatakisa, Jehová Diosamp jukʼamp suma amigöñatakis wal yanaptʼawayitu” sasa.

18. ¿Kun lurañassa Jehová Diosajj muni?

¹⁸ Jehová Diosajj taqeni jupar munassna jaqe masisarus munasiraksna ukwa muni. Kunjamtï yatjjataniwayktanjja, Jehová Diosar jukʼamp munasiñatakejj Biblia liyiñasawa, kuntï liyktan ukjjat lupʼiñasawa, sapüruw orasiñasaraki. Jilat kullakanakar wal munasitasajj luratanakasanwa uñjasiñapa. Munasitasajj jukʼamp jiltani ukhajja, Jehová Diosampis jilat kullakanakasampis jukʼamp sumaw apasiñäni. ¡Wiñayatakiw jupanakampejj suma amigöpjjañäni!