Gálatas 5:22, 23 textonjja, mä cristianojj kunjam chuymanïñapas ukanakat llätunkaw qellqata. Uka texton akham siwa: “Espíritu santon achupajj akanakawa: munasiña, kusisiña, sumankaña, paciencianïña, khuyapayasirïña, suma chuymanïña, Diosar confiyaña, llampʼu chuymanïña, munañasampi jan apnaqayasiña” sasa. Ukampis espíritu santojja, jukʼampinak uñachtʼayañatakiw yanaptʼistaspa.

¿Kunjamatsa uk yattanjja? Apóstol Pablojj espíritu santon achupat janïr parlkasajj akham sänwa: “Jañchin lurañanakapajj [...] akanakawa: qʼañu juch luraña, ajjtaskañanak luraña, jucha jan phenqʼani luraña, idolonakar adoraña, espiritunakampi parlaña, uñisisiñanaka, chʼajjwañanaka, celasiñanaka, colerampi atipayasiñanaka, jiskhisiñanaka, tʼaqa tʼaq sarnaqañanaka, sectanak uñstayañanaka, envidiasiñanaka, machjasiñanaka, jan wali loqhe fiestanaka, ukanakar uñtata yaqha juchanakampi” sasa (Gál. 5:19-21). “Ukanakar uñtata yaqha juchanakampi” sasinjja, Pablojj jukʼampinakaw ‘jañchin lurañanakap’ taypin utji sañwa munaskäna, ukanakat yaqhepajj Colosenses 3:5 textonwa uñstaraki. Niya pachparakiw Gálatas 5:22, 23 texton llätunka suma cualidadanakajj uñstki ukamp pasi. Kawknïr cualidadanaktï espíritu santon yanaptʼapamp uñachtʼayksna ukanakjja, Pablojj janiw uka texton taqpach aytkänti.

¿Kunjamatsa uk yattanjja? Pablojj Éfeso markankiri congregacionar qellqkäna ukampi, Gálatas texton utjki ukamp igualtʼayañaw uk yatiñatak yanaptʼistu. Pablojj akham sasaw uka congregacionar qellqäna: “Qhanajj taqe kunansa suma chuymanïñataki, kunatejj cheqapäki uk lurañataki ukhamarak cheqapar sarnaqañatakiw yanaptʼistu” sasa (Efes. 5:8, 9). Kunjamtï uñjktanjja, ‘suma chuymanïñasa’, kunatï cheqapäki ukasa, cheqapar sarnaqañas qhanatwa juti, ukhamäkchisa suma chuymanïñajj espíritu santon achupat maynïrirakiwa.

Pablojj akhamwa Timoteor sarakïna: “Cheqapar sarnaqañataki, Dios chuymäñataki, Diosar confiyañataki, munasir jaqëñataki, aguantañataki, llampʼu chuymanïñataki chʼamachasim” sasa (1 Tim. 6:11). Uka sojjta cualidadanakatjja Diosar confiyaña, munasir jaqëña, llampʼu chuymanïña, ukanakakiw ‘espíritu santon achup’ taypinki. Ukampis Timoteorojj espíritu santokiw cheqapar sarnaqañataki, Dios chuymäñataki, aguantañatak yanaptʼaspäna (Colosenses 3:12; 2 Pedro 1:5-7 uñjjattʼarakïta).

Ukhamajja, kawknïr cualidadanaksa espíritu santon yanaptʼapampejj uñachtʼaysna ukanakjja, Pablojj janiw Gálatas 5:22, 23 texton taqpach siskänti. Espíritu santon achup taypinkki uka llätunka cualidadanak uñachtʼayañatakejj Diosan espiritupaw yanaptʼistaspa, ukampis suma amuytʼasir cristianöñatakejj jukʼamp cualidadanak uñachtʼayañatakiw chʼamachasiñasa, ukhamatakwa ‘Diosan munañaparjam luratäki uka machaq jaqëñampi isthapisiñäni. Ukajj cheqaparjam sarnaqañataki, Dios chuymäñataki luratawa’ (Efes. 4:24).