AKA “qhepa urunakanjja”, Jehová Diosaw markaparojj irpaski, Jupat jan jitheqtapjjañapatakis yanaptʼaskaraki, ukjja taqeniw yattanjja (2 Tim. 3:1). Ukampis sapa mayniw Diosar istʼañasa. Chʼusa lugaran jakapkäna uka israelitanakat yateqasisaw jiwasajj Diosar istʼañasaraki. Trompeta tuktʼasipanjja israelitanakajj jankʼakiw kasupjjañapäna.

Jehová Diosajja, qollqe metalat pä trompeta lurañapatakiw Moisesar mayïna, ukanakajj martillompi leqʼsusa luratäñapänwa. Trompetajj “jaqenakar tantachañataki” ukhamarak ‘sarjjarupjjañapatakiw’ tuktʼasirïna (Núm. 10:2). Sacerdotenakajj kunayman sonidonwa uka trompetanak tuktʼapjjañapäna, ukhamat israelitanakajj kun lurapjjañapasa uk yatipjjañapataki (Núm. 10:3-8). Jichhürunakanjja, Diosan servirinakapajj kunaymanitsa ‘trompetajj phustʼaskaspa’ ukhamwa istʼaraktanjja. Kunjamatsa trompetajj tuktʼasi ukwa kimsa toqet yatjjataskañäni. 1) Jachʼa tantachäwinakar invitkistu ukha. 2) Jilïr irpirinakar wakichtʼaski ukha. 3) Congregacionanakar cambionakat yatiyaski ukha.

Jehová Diosajj ‘taqpach markaru’ tabernaculon inti jalsu toqer tantachthapiñ munäna ukhajja, sacerdotenakajj paypach trompetwa tuktʼapjjerïna (Núm. 10:3). Israelitanakan tribunakapajj pusir jaljataw tabernáculo jakʼan carpanakap uttʼayapjjäna, taqeniw trompeta tuktʼir sum istʼapjjäna. Tabernáculo jakʼankirinakajj ratukiw tabernaculor puripjjpachäna. Ukampis jayankapkäna ukanakatakejj jukʼamp tiempow munasïna, jukʼampwa chʼamachasipjjañaparakïna. Ukhampachasa, Jehová Diosajj taqeni tantachasipjjaspa, arunakapsa istʼapjjaspa ukwa munäna.

Jichhürunakanjja Jehová Diosajj ukhamarakiw jachʼa tantachäwinakar invittʼistu. Ukampis janiw mä tabernaculor sarktanti, jan ukasti kimsa uru jachʼa tantachäwiru, yaqha ukham jachʼa tantachäwinakaruw sartanjja, ukanakanwa suma yatichäwinak katoqtanjja. Diosan servirinakapajj oraqpachanwa mä pachpa toqetak yatjjatapjje. Ukar sarañatakejja, yaqhep jilat kullakanakajj wali jaywa viajapjje. Ukham chʼamachasipjjatapajj jan inamayätapwa amuyapjje.

Jaya cheqanakan jakiri jilat kullakanakajja, ¿jachʼa tantachäwinak apaski ukanak istʼapjjarakiti? Jichhürunakanjja, computadoranakaw wal yanaptʼistu, uka jachʼa tantachäwinakjja video toqew uñtapjje, ukhamatwa jachʼa tantachäwinkapkaspas ukham amuyasipjje. Sañäni, Benín markankir sucursalajj central mundialat visit katoqkäna ukhajja, Arlit (Níger) markankir jilat kullakanakajj video toqew uka tantachäwi uñtapjjäna, uka minero jiskʼa markajj desierto del Sahara ukankiwa. Ukarojj jilat kullakanakampi istʼañ muniri jaqenakampiw sarapjjäna, taqenejj pä tunka mayanïpjjänwa. Kawkintï  jachʼa tantachäwejj apaskäna ukanjja 44.131 ukhaniw tantachasipjjäna, uka jiskʼa markankir jilat kullakanakajj ukankapkaspas ukhamwa amuyasipjjäna. Mä jilatajj akham sasaw qellqäna: “Uka jachʼa tantachäwi mä videon uñtapjjatajat walpun yuspärta. Ukajj qhawqsa jilat kullakanakajj munasipjjetu ukwa mayampi uñachtʼayapjjetu” sasa.

Sacerdotenakajj mä trompetak tuktʼapjjäna ukhajja, “tribunakan jilïrinakapakiw” tabernaculon tantachasipjjerïna (Núm. 10:4). Ukanwa Moisesajj jupanakar yatichirïna, tribunakan kunanak lurapjjañapas wakisi ukanaksa yatiyarakirïna. Jiwasajj mä tribun pʼeqtiripäsäna ukhajja, ¿janit uka tantachäwinkañatakisa yatichäwinakap sum istʼañatakisa chʼamachaskasänjja?

Jichhürunakanjja jilïr irpirinakajj janiw congregacionan jefenakapäpkiti, janirakiw Diosan ovejanakaparojj ‘munañanakaparuk apnaqapjjañapäkiti’ (1 Ped. 5:1-3). Antisas Diosan ovejanakapar sum uñjañatakiw chʼamachasipjje. Ukatwa jukʼamp yatichatäñatak mä escuelar invittʼapki ukhajj jilïr irpirinakajj taqe chuyma sarapjje, ukanakat mayajj Jilïr Irpirinakataki ukat Congregacionan Yanapirinakapatak Escuelawa. Ukham escuelanakanwa congregacionan kunanak lurañas wakiski ukanak yateqapjje. Ukham yatichatäpjje ukhajja, jilïr irpirinakasa jilat kullakanakasa jukʼampiw Jehová Diosar jakʼachasipjje. Janis taqenejj uka escuelar sarkstanjja, kuntï jilïr irpirinakajj yateqanipki ukajj jiwasar yanaptʼarakistuwa.

Awisajja sacerdotenakajj walja kutiw trompetanak tuktʼapjjerïna. Ukham tuktʼasïna ukhajja, taqpach israelitanakaw campamentonakap apthapis sarjjarupjjañapäna (Núm. 10:5, 6). Taqe ukajja, israelitanakajj campamentot suma organistʼat sartapjjatapwa uñachtʼayäna, ukampis taqeniw wal chʼamachasipjjañapäna. Inas yaqhep israelitatakejj uka mayitar jankʼak istʼañajj chʼamakïchïna. ¿Kunatsa chʼamakïpachäna?

Yaqhepajja inas sapa ratosa, akatjamatsa trompet tuktʼapkaspa ukham amuyapjjchïna. Bibliarjamajja, qenayajj mä arumaw tabernáculo patjjan quedasirïna, awisasti “pä uru, mä phajjsi” jan ukajj jukʼamp tiempow quedasirïna (Núm. 9:21, 22). ¿Qhawqha kutis israelitanakajj yaqha cheqar sarjjapjjpachäna? Números libron 33 capituloparjamajja, israelitanakajj mä 40 cheqanakanwa campamentonakap saytʼayapjjäna.

“Uka jachʼa ajjsarkañ wasara” taypinjja, awisajj inas yaqhep israelitanakajj mä suma chʼiwir puripjjchïna (Deut. 1:19). Ukatwa awisajj yaqha cheqar sarjjañajj janis walïkaspa ukham amuyapjjchïna.

Trompetajj walja kuti tuktʼasïna ukhajja, taqpach tribunakaw istʼapjjäna, ukampis janiw taqpach tribunakajj mä pachpa tiempon juntok sartapjjañapäkänti. Inas yaqhepatakejj sartapjjañap horasa suyañajj chʼamakïchïna. Trompetajj walja kuti tuktʼasïna ukhajja, inti jalsu toqenkiri Judá, Isacar, Zabulón tribunakaw nayraqat sartapjjañapäna (Núm. 2:3-7; 10:5, 6). Jupanakajj sarjjapjjäna ukhajja, sacerdotenakajj mayampwa walja kuti tuktʼapjjerïna, ukhamat sur toqenkir tribunakan sartapjjañapataki. Ukhamwa taqpach tribunakan sartañapkamajj trompetanak tuktʼapjjerïna.

Jiwasatakejj kuna cambionakatï Diosan markapan utjki ukanakar yatinoqtañajj inas chʼamakïchïna. Mä akatjamatsa walja cambionakajj utjkaspa ukham inas amuyarakchiyätan. Jan ukajj inas kunjamtï nayrajj luraskäna ukajj jiwasatak wali sumächïna, ‘jan ukham mayjtʼayapjjaspänti’ sasin sarakchiyätan. Inas uka cambionakar pacienciampi uñjañasa, yatinoqtañasa chʼamakirakïchïna. Ukampis ukanakar yatinoqtañasawa. Ukham lurañatak chʼamachasiñäni ukhajja, Diosajj bendisistaniwa.

Moisesajj jakaskäna uka tiemponjja, Jehová Diosaw walja millón chachanakaru warminakaru wawanakaru wasaran irpäna. Diosajj jan yanapkaspäna janirak irpkaspäna ukhajj jiwarapjjaspänwa. Jiwasarojj ukhamarakiw Jehová Diosajj aka jan wali qhepa urunakan irpaskistu. Cheqas Diosaw jupat jan jitheqtañasatakisa, jupar jukʼamp confiyañasatakisa yanaptʼaskistu. Ukhamajja Diosar confiyiri nayra israelitanakjam istʼasirïñatakiw chʼamachasiñasa, jupanakajj ratukiw trompeta tuktʼir istʼasajj sarjjarupjjerïna.