1. Nayrïr patak maranakanjja, ¿kun lurapjjañapsa walja jaqenakar mayisïna?

 WALJA chachanaka ukhamarak warminakaw Jerusalén markar viajipjjäna. Jupanakajj walja markanakatwa jutapjjäna, kunayman arunakwa parlapjjarakïna. Uka urojj wali musparkañaw pasäna. Mä akatjamatwa yaqhep judionakajj uka jaqenakan arunakap parlañ qalltapjjäna. Ukham yaqha aru parlapjjatapajj musparkañänwa, ukampis kuntï uka judionakajj sapkäna, kuntï apóstol Pedros taqenir siskäna ukaw jukʼamp musparkañänjja. Jupajja, Jesusar confiyapjjäta ukhajj salvasipjjätawa sasaw qhanañchäna. Uka arunakajj jaqenakan chuymaparuw purtʼäna, ukatwa akham jisktʼapjjäna: “¿Kun lurapjjañajas wakisispa?” sasa. Pedrojj akham sänwa: “Sapa maynis [...] bautisasipjjam” sasa (Hech. 2:37, 38).

2. ¿Kuna toqetsa aka yatichäwin yatjjataskañäni? (Nayrïr paginankir foto uñjjattʼäta).

² Uka qhepat kunatï paskäna ukajj wali musparkañänwa. Uka urojj 3.000 jaqenakaw bautisasisajj Jesusan discipulopar tukjjapjjäna. Kuntï Jesusajj discipulonakapar lurañ maykäna ukajj uka uruw qalltäna, ukajj jichha tiempokamaw lurasiski. Jichha tiemponjja, mä yateqerirojj janiw mä qhawqha horanaka yatichasaki bautisasiñapatak yanaptʼksnati. Jan ukasti, ukar puriñapatakejj inas walja phajjsinaka, mä mara, jan ukajj walja maranak munaschini. Kunjamtï Bibliat yatichirinakajj yatipkejja, Jesusan discipulopar tukuyañatakejj chʼamachasiñaw wakisi. Aka yatichäwinjja, kunsa yateqerin bautisasiñapatakejj lursna ukwa yatjjataskañäni.

3. Mateo 28:19, 20 textorjamajja, ¿kunsa yateqerejj bautisasiñatak lurañapa?

³ Janïr bautisaskasajja, yateqerejj kuntï Bibliat yateqki ukarjamaw sarnaqañapa (Mateo 28:19, 20 liytʼañataki). Ukham luri ukhajja, kunjamtï mä ‘amuyasir jaqejj’ manqhakam oraq allsusajj qarqa patjjar uta cimiento uchantki ukhamawa (Mat. 7:24, 25; Luc. 6:47, 48). Kuntï Bibliat yateqaski ukarjam sarnaqañapatakejj kunjamsa yateqerir yanaptʼsna uk kimsa toqet uñjañäni.

4. ¿Kunjamsa yateqerin nayrar sartañapatakejj yanaptʼsna? (“ Yateqerejj kunanaksa luraspa uk amtañapataki, ukarjam phoqañapatakiw yanaptʼañasa” sat recuadro uñjjattʼäta).

⁴ Kunanaksa luraspa uk amtañapatakiw yateqerir yanaptʼañasa. ¿Kunatsa ukajj wali wakiskiri? Akham amuytʼañäni: mä thaknam jayar viajsna ukhajja, inas kawkjantï suma lugaranakajj uñatattʼasiñatak utjki ukjar saytʼsna. Ukham lursna ukhajja, viajejj janis jayäkaspa ukhamäniwa. Mä yateqerimpejj ukhamarakiw pasani, jupatï jukʼa tiempon phoqañjamäki uk lurañ amtani, ukarjam phoqarakini ukhajja, bautismor puriñajj jupatak janiw chʼamäkaniti. Yateqerin nayrar sartañapatakejja, Disfrute de la vida sat libron “Propóngase esto” siski uka recuadrompiw yanaptʼsna. Sapa yatichäwi tukuyasajja, kuntï yateqawayki ukajj kunjamsa kuntï lurañ amtki ukar yanaptʼi ukwa amuytʼayañasa. Jiwasatï yateqerin yaqha lurañap munarakstan ukhajja, “Más objetivos” siski ukar qellqtʼañapatakiw maysna. Uka cheqankkasajja, kuna amtanaksa jichpachasa, ukat qhepatsa phoqañ amtawayi ukanakatwa jupamp parltʼañasa.

5. Marcos 10:17-22 texton siski ukarjamajja, ¿Jesusajj wali qollqen mä jaqerojj kamsänsa, ukat kunatsa?

⁵ Yateqerin cambiañapatakejj yanaptʼañasawa (Marcos 10:17-22 liytʼañataki). Jesusajj  wali qollqen mä jaqerojj kunanakamatï utjktam ukanak qʼal aljam sasaw säna, ukampis uk lurañajj jan facilätap Jesusajj yatïnwa (Mar. 10:23). ¿Kunatsa uk säna? Jupar wal munasïna. Awisajja, yateqerisajj janis wakichtʼatäkaspa ukham amuyasajj ‘kuntï yateqaskta ukarjam lurañamawa’ sañ ajjsarsnawa. Cheqas machaq jaqëñamp isthapisiñasa, yaqhep cambionak lurañas tiempotakiwa (Col. 3:9, 10). Ukampis qalltatpach uka toqet parlañäni ukhajja, jankʼakiw cambionak lurañatak chʼamachasini. Ukham parltʼatasaw jupanakar munasitas uñachtʼayani (Sal. 141:5; Prov. 27:17).

6. ¿Kunatsa yateqerisar kunsa amuyi ukanak jisktʼañajj wali wakiskiri?

⁶ Kunsa amuyi uk yateqerisar jisktʼañajj wali wakiskiriwa. Ukham jisktʼañajja, kunjamsa amuyaski, kunarus creyiski ukanak yatiñatakiw yanaptʼistani. Ukham sapa kuti lurañäni ukhajja, kunanakat parlañatï chʼamäki ukanakat jupamp parlañajj qhepat facilakïniwa. Disfrute de la vida sat libronjja, kunsa yateqerejj amuyaski uk yatiñatakejj walja jisktʼanakaw utji. Sañäni, 4 yatichäwipanjja akhamwa jisktʼi: “¿Cómo cree que se siente Jehová cuando usted usa su nombre?” sasa. 9 yatichäwipansti akhamwa jisktʼaraki: “¿Sobre qué cosas le gustaría orar?” sasa. Qalltanjja, yateqerisatakejj ukham jisktʼanakar qhanañchañajj chʼamakïspawa. Ukhamajja, yatjjatasktan uka yatichäwin kuna textonakasa, fotonakasa, dibujonakas utji ukanakat piensañapatakiw yatichsna.

7. ¿Kunjamsa mayninakan experienciapampi yateqerir yanaptʼsna?

⁷ Kunsa lurañapa uk yateqerisajj amuyjjani ukhajja, kunsa yaqhepanakajj cambiañatak lurawayapjje uk cuenttʼasaw cambiañapatak yanaptʼsna. Sañäni, jupatakitï tantachäwinakar sarañajj chʼamächi ukhajja, Jehová Diosajj nayat wal llakisi sat video uñachtʼaysna, ukajj Disfrute de la vida sat libron “Descubra algo más” sat seccionan 14 yatichäwipanwa uñsti. Uka machaq libronjja, “Profundicemos en el tema” jan ukajj “Descubra algo más” siski uka seccionanakan walja experiencianakaw utji. * Yateqerisarojj janiw mayninakamp akham sasin igualayañasäkiti: “Jupatï cambiañ puedchejja, jumajj cambiarakismawa” sasa. Jupa pachpaw uka amtar puriñapa. Videon uñstki uka jilataru jan ukajj uka kullakarojj kunanakas Biblian yatichäwinakaparjam sarnaqañatak yanaptʼäna ukwa qhanstayañasa. Sañäni, kuna wakiskir textosa jan ukajj kun lurañas yanaptʼäna ukwa qhanstaysna. Wakisini ukhajja, kunjamsa Jehová Diosajj yanaptʼäna ukwa qhanstaysna.

8. ¿Jehová Diosar munasiñapatakejj kunjamsa yateqerir yanaptʼsna?

⁸ Jehová Diosar munasiñapatakiw yateqerir yanaptʼañasa. Jehová Diosajj kunjam Diosasa uka toqet parltʼañatak tiempo apstʼasiñasawa. Diosajj kusisir Diosätapa, jupar munasipki ukanakar yanaptʼirïtap amuyañapatakiw yateqerir yanaptʼañasa (1 Tim. 1:11; Heb. 11:6). Kuntï yateqki ukarjam sarnaqasajj kuna askinaksa jikjjatani ukwa qhanañchtʼañasa. ‘Uka askinakajja, Jehová Diosajj jumar wal munasitapwa uñachtʼayi’ sasaw qhanañchtʼañasaraki (Is. 48:17, 18). Diosar jukʼamp munasisajja, jukʼampiw cambionak lurañ munani (1 Juan 5:3).

9. Marcos 10:29, 30 textorjamajja, ¿bautisasiñataki waljanak jaytatapat kunsa yateqerejj jikjjatani?

⁹ Yateqerejja, bautisasiñatakejj waljanak jaytañapaw wakisini. Párrafo 5 ukan parlaniwayktan uka qamir jaqjamaw yaqhepanakajj kunanakapatï utjki ukanak apanukuñapäni. Sañäni, trabajopatï Biblian yatichäwinakap conträchi ukhajja, inas uk jaytañapajj wakischini. Waljanejja, Diosar jan munasiri nayra amigonakap jaytapjjañapäniwa. Yaqhepasti, Testigonak conträpki uka familiaranakapan uñisitaw uñjasipjjarakini. Yaqhepatakejj ukanak jaytañajj chʼamäniwa sasaw Jesusajj säna. Ukampis Diosan markapanjja wali munasir familia jikjjatapjjani sasaw sarakïna (Marcos 10:29, 30 liytʼañataki). ¿Kunjamsa yateqerirojj uka suma regalo katoqañapatak yanaptʼsna?

10. ¿Kuntï Manuel jilatajj siski ukat kunsa yateqsna?

¹⁰ Yateqerin amigopäñasawa. Yateqerit llakisiñasawa. ¿Kunatsa? México markankiri Manuel jilatajj kamsisa uk uñjañäni. Bibliat yatjjataskäna uka tiempot amtasajj akham siwa: “Yatichirijajja, Bibliat janïr yatichkasajj kunjamäsktsa uk jisktʼapunirïtuwa. Ukaw jan ajjsarañataki, kunatï paskitäna uk cuenttʼañatak yanaptʼitäna. Jupajj cheqapun nayat llakisitapwa amuyayäta” sasa.

11. ¿Kunatsa yateqerimpi chikachasiñajj wakisi?

¹¹ Jesusajj discipulonakapampïñatak tiempo apsusirïnwa, jiwasajj ukhamarakiw yateqerisampïñatak tiempo apsusiñasa (Juan 3:22). Jupatï nayrar sartaskchi, invittʼañas walikjamätap amuystan ukhajja, juntʼüm umtʼasiñataki, manqtʼasiñataki, jan ukajj JW Broadcasting programa uñtañatakiw utasar invittʼsna. Jukʼampisa, familiaranakapajj markan fiestanakap amtasipki ukhaw jan sapakïñapatak invittʼsna, jupajj wal yuspäristani. Uganda markankiri, Kazibwe sat jilatajj akham siwa: “Yatichirijampi Bibliat yatjjatasasa, jupampi chikachasisas waljanakwa Jehová Diosat yateqta.  Diosajj qhawqsa sapa mayni servirinakapat llakisi, servirinakapajj kunja kusisitäpjjesa ukwa uñjta. Nayajj ukwa munarakiyäta” sasa.

12. ¿Kunatsa mayn mayni publicadoranakamp Bibliat yatichir sarañasa?

¹² Yateqerir Bibliat yatichañatakejj mayn maynimpiw sarañasa. Awisajj sapaki jan ukajj mä pachpa publicadorampikiw yatichirejj sarañ munsna. Ukham lurañajj facilakïspawa, ukampis mayn mayni publicadoramp sarañaw yateqerir jukʼamp yanaptʼani. Moldavia markan jakasiri, Dimitri sat jilatajj akham siwa: “Yatichirijampejj mayn mayni jilatanakaw jutapjjeri. Sapa mayniw wali sum qhanañchtʼapjjeri, ukaw kuntï yateqkayäta ukanak yaqha toqet amuytʼañatak yanaptʼitäna. Tantachäwir nayrïr kuti sarkayäta ukhas janiw ajjsarkayätti, kuna laykutejj walja jilat kullakanakaruw uñtʼjjayäta” sasa.

13. ¿Kunatsa tantachäwinakar sarañapatak yateqerir yanaptʼañasa?

¹³ Tantachäwinakar sarañapatakiw yateqerir yanaptʼañasa. ¿Kunatsa? Tantachasiñajj Jehová Diosan mandatopawa, tantachasisasti Juparuw adoraskaraktanjja (Heb. 10:24, 25). Janiw ukakïkiti, congregacionankir jilat kullakanakajj Diosar serviñan familiasarakiwa. Jupanakampi tantachäwinkañajja, mä suma manqʼa manqtʼasiñatak tantachtʼatäksnas ukhamawa. Tantachäwinakar jutañapatak yateqerir yanaptʼasajja, bautisasiñapatakiw yanaptʼaskaraktanjja. Ukampis tantachäwinakar nayrïr kuti sarañajj jupatak chʼamakïspawa. ¿Kunjamsa Disfrute de la vida sat librompejj yanaptʼsna?

14. ¿Kunjamsa yateqerir tantachäwinakar sarañapatak yanaptʼsna?

¹⁴ Yateqerin tantachäwinakar sarañapatakejja, Disfrute de la vida sat libron 10 yatichäwipampiw yanaptʼsna. Janïr uka libro mistkipanjja, yatichañatak experienciani yaqhep jilat kullakanakaruw uka yatichäwimpi yateqeripar yatichapjjañapatak mayisïna. Ukajj tantachäwinakar sarapjjañapatakejj walpun yateqerinakar yanaptʼawayi. Cheqas yateqerin tantachäwir sarañapatakejj janiw 10 yatichäwir puriñkam suyañasäkiti. Jan ukasti, qalltatpachwa tantachäwinakar jutañapatak sapa kuti invittʼañasa. Sapa mayni yateqerinakaw mayj mayjäpjje, kunayman jan walinwa uñjasipjjaraki. Ukhamajja, sapa mayni yateqerinakajj kunan yanaptʼatäñsa muni, kunjamsa yanaptʼsna ukwa amuytʼañasa. Tantachäwinakar janis jankʼak sarkchinejja, janiw qarjtañasäkiti. Pacienciamp invittʼaskakiñasawa.

15. ¿Kunanakas yateqerirojj ajjsarayaspa?

¹⁵ Bibliat yatjjataskayätan ukhajja, ¿Jehová Diosan Testigopäñ ajjsarayasiyätanti? Utat ut predicañ janipuniw puedkäti sasin inas amuychiyätan. Familiaranakajasa amigonakajas naya contraw saytʼapjjani sasin inas ajjsarchiyätan. Ukhamächïna ukhajja, kunjamas yateqerisajj jikjjatasi uk amuysnawa. Yaqhepajj ajjsarayasipjjaniwa sasaw Jesusajj säna. Ukampis ajjsarañajj janiw jumanakarojj Diosar serviñat jarkʼañapäkiti sasaw discipulonakapar chʼamañchtʼäna (Mat. 10:16, 17, 27, 28). ¿Kunjamsa Jesusajj jan ajjsarapjjañapatak yanaptʼäna? ¿Jiwasajj kunjamsa Jesusjam yanaptʼaraksna?

16. Kuntï yateqaski uk mayninakar parltʼañapatakejj ¿kunjamsa yateqerir yatichsna?

¹⁶ Kuntï yateqki uk yaqhanakar parlañapatakiw yateqerir jukʼat jukʼat yatichañasa. Jesusajj predicapjjañapatak discipulonakapar khitkäna ukhajj ajjsarayasipjjpachänwa. Ukampis khitinakarusa ukat kunjamsa predicapjjañapäna  ukatakejj yanaptʼänwa (Mat. 10:5-7). ¿Kunjamsa jupat yateqassna? Khitinakarus predicaspa ukatakiw yateqerir yanaptʼañasa. Sañäni, ‘¿khitis Bibliat mä kun yatiñ munaspa?’ sasaw jupar jisktʼsna. Ukatsti, kunjamsa fácil amuykaña qhanañchtʼaspa ukatakiw yanaptʼañasa. Wakisini ukhajja, Disfrute de la vida sat libron “Lo que algunos dicen” ukat “Lo que algunos preguntan” siski uka seccionanakamp yanaptʼasisaw yateqerimp ensaytʼsna. Ukham lurkasajja, Bibliampi fácil amuykaña, jan chuym ustʼayasa qhanañchtʼañapatakiw yateqerir yatichañasa.

17. Mateo 10:19, 20, 29-31 textompejj ¿kunjamsa Diosar confiyañapatakejj yateqerir yanaptʼsna?

¹⁷ Jehová Diosar confiyañapatakiw yateqerir yanaptʼañasa. Jesusajja, Jehová Diosajj wal munasipjjtam, Jupaw yanaptʼapjjätam sasaw discipulonakapar säna (Mateo 10:19, 20, 29-31 liytʼañataki). Jiwasasti, Jehová Diosaw yanaptʼaskätam sasaw yateqerir amtayañasaraki. Kunanak lurañtï amtaski uka toqet jupamp chik orasaw Diosar confiyañ yatichsna. Polonia markan jakasiri, Franciszek sat jilatajj akham siwa: “Yatichirijajja, kunanaksa lurañ amtaskayäta ukanakatwa oracionanakapan mayirïna. Kunjamsa Jehová Diosajj jupar istʼäna uk uñjasajja, ukhamarakiw orasiñ qalltta. Machaq trabajojanjja, tantachäwinakar sarañatakisa jachʼa tantachäwir sarañatakis permiso churapjjetänwa, ukhaw Jehová Diosajj kunjamsa yanaptʼaskitäna uk amuyta” sasa.

18. ¿Bibliat yatichañatak chʼamachasitas kunjamsa Jehová Diosajj uñji?

¹⁸ Jehová Diosajj Bibliat yateqerinakasat wal llakisi. Jupar uñtʼapjjañapataki jaqenakar Bibliat yatichañatak chʼamachasitas valoranitwa uñji, wal munasirakistu (Is. 52:7). Inas jichhajj jan khitirus Bibliat yatichkstanti, ukampis yatichirinakar compañtʼasaw Bibliat yateqasipki ukanakar bautisasipjjañapatakejj yanaptʼsna.