1. ¿Jehová Diosajj sapa mayni jiwasar munasistuwa sasajj kunatsa sissna?

 DIOSAW serviripäñasatak sapa maynir jawsistu (Juan 6:44). ¿Kunsa ukajj uñachtʼayi? Aka oraqpachankir walja millón jaqenakajj kunjamäpjjesa uk sapa maynir uñjkasajja, suma chuymanïtaswa Diosajj uñjistu, jupajj munasitaniwa sasaw amuyaraki (1 Crón. 28:9). Diosajj uñtʼistuwa, kunjamäsktansa uk amuyistuwa, munasirakistuwa. Ukajj wal chuymachtʼistu.

2. Jehová Diosajj sapa mayni jiwasanakar munasitapjja, ¿kuna uñachtʼäwimpis Jesusajj amuytʼayistu?

² Jehová Diosajj wal munasistu, sapa mayni jilat kullakanakarus wal munasiraki. Qhawqsa munasistu uk amuyañasatakejj mä uñachtʼäwimpiw Jesusajj qhanañchäna. Mä awatiritï 100 ovejanakapat may chhaqayani ukhajja ¿kunsa lurani? ‘99 ovejanak mä qollu patar jaytawayasajj chhaqat ovejapar thaqeriw sarani’. Jikjjatasasti janiw ovejatak colerkaniti, antisas wal kusisini. ¿Kunsa ukajj yatichistu? Diosatakejja, sapa mayni ovejanakapaw wali valorani. Jesusajj akham sänwa: “Jupajj janiw aka jiskʼanakat maynin chhaqañapsa munkiti” sasa (Mat. 18:12-14).

3. ¿Kunanakatsa aka yatichäwin yatjjataskañäni?

³ Jilat kullakanakarojj janiw luratasampisa arsutasampis aynachtʼayañ munktanti. Aka yatichäwin aka jisktʼanakaruw qhanañchaskañäni: ¿kunjamatsa mayninakar jan lanktʼasiyksna?, ¿maynejj chuym ustʼayistani ukhajj kunsa lursna? Nayraqatajj Mateo capítulo 18 ukan ‘aka jiskʼanaka’ siski ukat mä jukʼa parltʼañäni.

4. ¿‘Aka jiskʼanaka’ siski ukajj khitinakapjjesa?

⁴ ‘Aka jiskʼanaka’ siski ukajj Jesusan taqe discipulonakapäpjjewa. Jupanakajj edadanïpkpasa janisa, ‘wawanakar’  uñtasitäpjjewa, kunattejj Jesusamp yatichayasiñatakejj jankʼakïpjjewa (Mat. 18:3). Kunayman markata, kunayman costumbreni, mayj mayj amuyuni ukhamäpkchisa, taqeniw Cristor confiyapjje. Jupasti walirak jupanakar munasi (Mat. 18:6; Juan 1:12).

5. Maynejj Jupan servirinakapat maynir tʼaqesiyi, lanktʼasiyi ukhajja, ¿kunjamas Jehová Diosajj jikjjatasi?

⁵ Jehová Diosatakejja, taqe ‘uka jiskʼanakaw’ wali valoranïpjje. Uk sum amuytʼañatakejj kunjamsa wawanakar uñjtan uka toqet lupʼiñäni. Wawanakarojj munasiñampiw uñjtanjja, jupanakajj janiw chʼamanïpkiti, janiw experiencianïpkiti, janiw jilïr jaqenakjam amuytʼasirïpkiti, ukatwa wal jarkʼaqañ muntanjja. Cheqas janiw khiti jaqerus maynin tʼaqesiyañap munktanti, ukampis maynejj mä wawaru tʼaqesiyi ukhajj wal colertanjja. Diosampejj niya ukhamarakiw pasi. Jupajj servirinakaparojj jarkʼaqañwa muni. Maynejj Jupan servirinakapat maynir tʼaqesiyi, lanktʼasiyi ukhajja, Diosajj wal chuym ustʼayasi, ukatsti walirak colerasi (Is. 63:9, TNM; Mar. 9:42).

6. 1 Corintios 1:26-29 textorjamajja, ¿kunjamsa akapachankir jaqenakajj Jesusan discipulonakapar uñjapjje?

⁶ ¿Kunansa Jesusan discipulonakapajj ‘jiskʼanakjamäpjjaraki’? Amuytʼañataki, akapachankir jaqenakajja, wali qollqenïpki, wali uñtʼatäpki, autoridadanïpki ukanakarukiw wali importantet uñjapjje. Ukampis Jesusan discipulonakapat jilapartejj janiw ukhamäpkiti. Ukatwa, ‘jiskʼanakäpkaspasa’ mä arunjja, janis importantëpkaspa, janis yäqañjamäpkaspa ukham akapachankir jaqenakajj uñjapjje (1 Corintios 1:26-29 liytʼañataki). Ukampis Diosajj janiw servirinakapar ukham uñjkiti.

7. ¿Jilat kullakanakar kunjam uñjañassa Diosajj muni?

⁷ Jehová Diosar jukʼa, jan ukajj walja maranakas serviskstanjja, taqeniruw wal munasistu. Diosatakitï jilat kullakanakajj wali importantëchejja, jiwasanakatakejj ukhamäñaparakiwa. Ukhamajja, ‘taqpach creyente masinakasaruw munasiñasa’, janiw mä qhawqhaniruk munasiñasäkiti (1 Ped. 2:17). Jilat kullakanakar jarkʼaqañataki, cuidañatak kunatï wakiski uk lurañatakejj jankʼakïñasawa. Jiwasatï mä jilataru, jan ukajj mä kullakar chuym ustʼayatas yatstanjja, janis kunas paskaspa ukham janiw amuyañasäkiti, jupajj nayar perdonañapawa, armjjañapawa, sasas sañasäkiti. ¿Kunatsa yaqhepajj chuym ustʼayasipjjaspa? Kunjamtï jilsuwayapki ukarjamaw janis valoranïkaspa ukham amuyasisin chuym ustʼayasipjjaspa. Yaqhepajj jichhakiw Diosan markapar mantasipki, mayninakan pantjasitanakap perdonañ janïraw yateqapkiti, ukatwa chuym ustʼayasipjjaspa. Kunatäskpansaya, uk askichañatakejj chʼamachasiñasawa. Ukampis maynitï mä kunatsa jankʼak chuym ustʼayasiñ yatchi ukhajja, ¿kunsa lurañapa? Ukhamätapajj jan walïtapwa amuyasiñapa, ukatsti jan ukhamäñatakiw chʼamachasiñapa. Ukhamatwa sumaki jikjjatasini, mayninakarus yanaptʼarakini.

8. ¿Kuna kasta amuyunakampis Jesusan discipulonakapajj apayasipjjäna?

⁸ ¿Kunatsa “aka jiskʼanakat” Jesusajj parläna? Discipulonakapaw “¿khitis alajjpachankir Reinon jilïrïnejja?” sasin jisktʼapjjäna, ukatwa parläna (Mat. 18:1). Uka tiemponjja, walja judionakaw wali importantet uñjatäñ munapjjerïna. Uka toqet yatjjattʼat mä jaqejj akham siwa: “Chachanakajj jachʼañchatäña, wali uñtʼatäña, respetatäñwa wal munapjjerïna” sasa.

9. ¿Kunsa Jesusan discipulonakapajj lurapjjañapäna?

⁹ Judionakajj mayninakat jilïrïpkaspasa ukhamwa amuyasipjjerïna, Jesusan discipulonakapajj jan ukhamäñatakiw chʼamachasipjjañapäna, ukatwa Jesusajj akham ewjjtʼäna:  “Khititejj jumanak taypin jilïrïki ukajja, sullkar tukuñapawa. Khititejj pʼeqtʼirïki ukajja serviñaparakiwa” sasa (Luc. 22:26). ‘Sullkäksnas’ ukham tukuñatakejja, mayninakajj jiwasat “jilïrïpkaspas” ukham amuyañasawa (Filip. 2:3). Ukham amuyañatak chʼamachasiñäni ukhajja, janiw mayninakar chuym ustʼaykañäniti.

10. ¿Apóstol Pablon kawkïr ewjjtʼaparus istʼañasa?

¹⁰ Taqe jilat kullakanakaw mä kunansa jiwasat jilankapjje. Ukjja, kuna sumanaktï lurapki uk uñjañatak chʼamachasisaw amuyañäni. Pablojj kuntï Corinto markankir jilat kullakanakar ewjjtʼkäna ukaruw istʼañasa. Jupajj akham sänwa: “¿Khitis jumarojj mayninakat sipans jukʼamp jilar uchtamjja? ¿Janit jumajj taqe kunsa Diosat katoqkta? Jumatï taqe kuns Diosat katoqstajja, ¿kunatarak chʼamachasitamatsa katoqkasma ukham jachʼa jachʼa tuktasti?” sasa (1 Cor. 4:7). Ukhamajj janipuniw jachʼañchatäñ suyañasäkiti, jiwasas mayninakat jilïrïksna ukhamsa amuyasiñasäkiti. Mä jilatatï discursonak sum arstʼañ yatchi, jan ukajj mä kullakatï waljaniru Bibliat yatichaskchi ukhajja, Jehová Diosarupuniw jachʼañchañapa.

11. ¿Jesusajj mä reyimpita esclavompit parlkäna ukat kunsa yateqsna?

¹¹ Jesusajj mayninakar jan lanktʼayapjjañapataki discipulonakapar ewjjtʼasajja, mä reyimpita mä esclavopampitwa parläna. Jan kunampis phoqerjamäkäna uka manupwa reyejj esclavopar perdonäna. Ukampis qhepatjja, uka esclavojj mayni esclavo masipar jukʼa manup janiw perdonkänti. Reyisti, jan khuyaptʼayasir esclavorojj carcelaruw llawintayäna. ¿Kunsa yateqtan? Jesusajj akham sänwa: “Janitï jumanakajj jilatamar taqe chuyma perdonapkäta ukhajja, alajjpachankir Awkijajj ukhamarakiw jumanakar uñjapjjätam” sasa (Mat. 18:21-35).

12. Maynir jan perdonañ munksna ukhajja, ¿kunjamsa mayninakar jan waltʼaysna?

¹² Kuntï jan khuyaptʼayasir esclavojj lurkäna ukajj janiw juparuk jan waltʼaykänti, yaqhanakarus jan waltʼayarakïnwa. Nayraqatjja, esclavo masiparojj jan wali chuymampiw uñjäna, ‘carcelaruw llawintayäna, manup phoqañapkama’. Ukatsti, uk uñjiri yaqha esclavonakaruw jan waltʼayarakïna. Jesusajj akham sänwa: “Ukanak uñjasasti mayni esclavonakajj wal llaktʼasipjjäna” sasa. Luratanakasajj ukhamarakiw mayninakar jan waltʼayaspa. ¿Jiwasar jan wal luratapat maynir jan perdonksna ukhajj kunas pasaspa? Maya, jan perdonañ munasajj chuymapwa ustʼaysna. Sañäni, janiw munasiñamp uñjjsnati, janiw jupampis parljjsnati. Paya, jilat kullakanakajj maynimpi jan sum apasitas amuyasajj mayjtʼasipjjaspawa.

13. ¿Kunatï mä precursora kullakarojj paskäna ukat kunsa yateqtanjja?

¹³ Mayninakar perdontan ukhajja, jupanakasa jiwasas sumakiw jikjjatastanjja. Ukaw Cristina * sat mä precursorampejj pasäna. Juparojj congregacionapankir mä kullakaw chuym ustʼayäna, kullakajj akham siwa: “Arunakapajja, mä cuchillompis chuymar jununtkitaspa ukhamwa awisajj ustʼayitäna. Janiw jupamp predicañs munirïkti. Ukatsti, janiw taqe chuyma predikjjayätti, ni kusisitäjjayätsa” sasa. Chuyma ustʼatäñatakejj razonanïkaspas ukhamwa Cristinajj amuyasïna. Ukampis kullakatak jan chuyma ustʼat sarnaqaña, jan jupa pachpatak llakisiñwa amtäna. Antisas La Atalaya 15 de octubre, 1999 revistan “Perdonemos de corazón” siski uka yatichäwirjam humilde chuymampi lurañwa amtäna. Ukatsti, kullakarojj perdonänwa. Jupajj akham siwa:  “Cheqas taqeniw machaq jaqëñampi isthapisiñatak chʼamachasisktanjja, uk jichhaw amuyta. Jehová Diosasti, khuyaptʼayasiñampiw sapüru perdonistu, perdonasajj mä jathi qʼepsa apaqaskirista ukhamaw jichhajj jikjjatasjjta, kusisitäjjaraktwa” sasa.

14. 1) Mateo 18:21, 22 textorjamajja, ¿kunas amuyatajj apóstol Pedrorojj pasäna? 2) ¿Jiwasatï ukhaman uñjassna ukhajj kunas perdonañatak yanaptʼistaspa?

¹⁴ Mayninakar perdonañasawa, uk lurasajj cheqapwa lurasktanjja. Ukampis ukham lurañajj chʼamakïspawa. Amuyatajja, Pedrorus ukaw awisajj pasarakïna (Mateo 18:21, 22 liytʼañataki). ¿Kunas yanaptʼistaspa? Maya, Diosajj qhawqha kutis perdonistu uka toqetwa lupʼiñasa (Mat. 18:32, 33). Diosamp perdonatäñatakejj janis askïkstanjja, Jupajj sapa kutiw perdonistu (Sal. 103:8-10, TNM). Janiw ukakïkiti, “jiwasanakajj maynit maynikam munasiñatak obligatätanwa”. Ukhamasti perdonañäniti janicha uk janiw amtksnati, jilat kullakanakasar perdonañasawa (1 Juan 4:11). Paya, maynir perdontan ukhajj kunas pasi uka toqet lupʼiñaw yanaptʼistaspa. Sañäni, perdonasajja jan wal lurkistu uka jaqerojj yanaptʼtanwa, congregacionas mayachtʼatarakiwa, Diosampis sumwa apasiraktanjja, ukatsti sumakiw jikjjatasjjtanjja (2 Cor. 2:7; Col. 3:14). Kimsa, Diosar orasiñaw yanaptʼarakistaspa, Jupaw mayninakar perdonañas muni. Supayajj jilat kullakanakampi jan sum apasiñas munki ukar janipun istʼañäniti (Efes. 4:26, 27). Supayan trampapar jan jaltʼañatakejj Jehová Diosan yanaptʼapwa muntanjja.

15. Colosenses 3:13 textorjamajja, ¿mä jilatatï jan ukajj mä kullakatï luratapampi colerayistani ukhajj kunsa lursna?

¹⁵ ¿Mä jilatana jan ukajj mä kullakan luratapajj colerayistaspa ukhajj kunsa lursna? Jupamp sumankañatakiw wal chʼamachasiñasa. Kunjamas jikjjatastan uk Jehová Diosaruw taqpach cuenttʼañasa. Chuym ustʼaykistu uka  jilataru jan ukajj uka kullakar bendisiñapatakiw Diosar mayiñasa, kunjamtï Jupajj uñjki, wali valoranit uñjki ukanak uñjañatakiw mayisiñasa (Luc. 6:28). Kuntï lurkistu uk jan perdonañ puedkstan ukhajja, kunjamatsa jupamp parltʼsna ukwa amuytʼañasa. Janipuniw ina chʼusatsa uk lurkistaspa ukham amuyañasäkiti (Mat. 5:23, 24; 1 Cor. 13:7). Jupamp parlkañäni ukhajja, kuntï lurkäna ukajj jiwasar yanaptʼañatakïkaspänsa ukhamwa amuytʼañasa. Ukampis ¿jan sumankthapiñ munkani ukhajj kunsa lursna? Bibliajj akham siwa: “Maynit maynikam aguantasisipkakim” sasa. Ukhamajj pacienciamp uñjaskakiñasawa (Colosenses 3:13 liytʼañataki). Janiw jupatak colerata sarnaqañasäkiti, ukham lurasajj Diosamp sum apasiñwa aptʼassna. Jan kunas lanktʼasiyistpanti. Ukhamatwa Diosar taqe kunat sipans jukʼamp munasitas uñachtʼayañäni (Sal. 119:165).

16. ¿Kunsa sapa maynejj lurañasa?

¹⁶ ‘Mä sapa tamaki’, ‘mä sapa awatiriniki’ Diosar mayachtʼata servitasatjja wal yuspärtanjja (Juan 10:16). Organizados para hacer la voluntad de Jehová sat libron página 165 ukan akham siwa: “Jiwasajj Diosan markapan mayachtʼatäñapatakiw yanaptʼañasa” sasa. Ukatsti akham sarakiwa: “Jehová Diosajj kunjamtï jilat kullakanakar uñjki ukham uñjañäni ukhajja, jupanakampejj sumaw apasiñäni” sasa. Diosajj taqeniruw ‘jiskʼanakaparjama’ uñjistu, wali valoranitwa uñjistu. Jiwasajj ukhamarakiw jilat kullakanakasar valoranit uñjañasa. Diosajj kuntï jilat kullakanakasar yanaptʼañataki cuidañatak lurktan ukjja, valoranitwa uñji (Mat. 10:42).

17. ¿Kun lurañsa amtañasa?

¹⁷ Jilat kullakanakar wal munastanjja, ukhamajj “janipun mä jilatasan nayraqataparojj mä lanktʼayir qalsa jan ukajj kunatejj saranukuykaspa uksa uchañäniti” (Rom. 14:13). Jilat kullakanakajj jiwasat jilankapkaspasa ukham amuyapjjañäni, taqe chuymarak perdonapjjañäni, janipun mayninakan luratapampejj lanktʼasiñäniti. Antisas “kunanakatï mayninakamp sumankañataki ukhamarak maynit maynikam chʼamañchtʼasiñatak yanaptʼkistu ukanak lurañatakejj chʼamachasiskakiñäni” (Rom. 14:19).