Kunatsa jan kuttʼapkäna uk janiw Bibliajj siskiti. Ukampis kunatsa jan kuttʼapkpachäna uk amuytʼañasatakejj mä qhawqhanakwa qhanañchistu.

Mä angelaw Mariarojj “usuriptätawa, mä yoqall wawa ususïta” sasin yatiyäna. Kunapachatï angelajj uk yatiykäna ukhajja, Mariampi Joseampejj Galilea markankir Nazaret markanwa jakasipkäna (Luc. 1:26-31; 2:4). Qhepatjja, Egipto markat sarjjasajj Nazaret markaruw kuttʼjjapjjäna. Jesusajj ukanwa mä nazareno jaqjam jilsüna (Mat. 2:19-23). Ukatwa Jesusata, Joseata, Mariata parlktan ukhajj Nazaret markat amtastanjja.

Mariajj Judá markankir Elisabet sat mä familiaranïnwa. Elisabetajj Zacarías sacerdoten esposapänwa, Bautisir Juanan mamaparakïnwa (Luc. 1:5, 9, 13, 36). Mariajj Elisabetaruw visitäna, ukatwa jupampejj kimsa phajjsinak Judá markan quedasïna. Ukatjja Mariajj Nazaret markaruw kuttʼjjäna (Luc. 1:39, 40, 56). Ukhamajj Mariajj Judá mark sum uñtʼäna.

Tiempompejja, Reyejj taqe jaqenakan ‘qellqayasipjjañapatakiw’ mä ley apsüna, Joseajj ukar istʼasaw Nazaret markat Belenar viajïna, uka markajj ‘Davidan markapa’ satänwa, profeciarjamajj uka markanwa Mesiasajj nasiñapäna (Luc. 2:3, 4; 1 Sam. 17:15; 20:6; Miq. 5:2). Jesusajj nasjjäna ukhajja, Joseajj janiw Mariarojj ukhak nasit wawamp Nazaret markar kuttʼañatak maykänti. Jupanakajj Belén markanwa quedasipjjäna, uka markajj Jerusalenat niya 9 kilometronak sarañankänwa. Ukhamïpansti, Jesús wawar templor apañasa Leyirjam ofrenda loqtañas jupanakatakejj jukʼamp faciläspänwa (Lev. 12:2, 6-8; Luc. 2:22-24).

Diosan angelapajj janïräkipanwa Mariarojj wawamajj ‘Davidan tronop’ katoqani, “Reyjam apnaqani” sasin yatiyjjäna. Inas Joseampi Mariampejj Jesusajj Davidan markapan nasiñap wali importantet uñjapjjchïna (Luc. 1:32, 33; 2:11, 17). Inas “Belén markan quedasiñaw jukʼamp walïspa, Diosan instruccionanakap suyañasäspawa” sasin amuyapjjchïna.

Warawaranak uñchʼukisin yatirinakajj purinipkäna ukhajj qhawqha tiempos Joseampi Mariampejj Belén markankjjapjjäna uk janiw yatktanti, ukampis Jesús wawajj jilsutäjjänwa, janiw ñuñuskir wawäjjänti, jupanakajj mä utanwa Belenan jakasipkäna (Mat. 2:11). Amuyatajja, Nazaret marka alay toqer kuttʼañat sipans Belén markan jakañatakiw quedasipjjäna.

Herodes reyejja, “Belenankiri [...] taqe yoqall wawanakar jiwarayir sarapjjam, pä maranit aynacharu” sasaw ordenäna (Mat. 2:16). Herodesan ukham ordenatapat kunsa lurapjjañapäna uk Jehová Diosaw Joseampir Mariampirojj yatiyäna, ukatwa jupanakajj Jesús wawamp Egipto markar escapjjapjjäna, Herodesan jiwañapkamaw uka markankasipkäna. Ukatsti Joseajj familiapampiw Nazaret markar sarjjäna. ¿Kunatsa Belén markar jan kuttʼapkäna? Kuna laykutejj Herodesan Arquelao yoqapaw uka tiempon Judea markan reyit apnaqaskäna, jupajj jan sinttʼasir jaqënwa. Ukhamarus mä angelaw Josearojj mä jan waltʼäwi utjañapätap yatiyäna. Jesusajj Nazaretanwa jiwañat salvasispäna, Diosan serviripjamaw jilsurakispäna (Mat. 2:19-22; 13:55; Luc. 2:39, 52).

Amuyatajja, janïr Jesusajj jiwkäna ukhamarak janïr alajjpachar sarañatak mä suytʼäwejj utjkäna ukhaw Joseajj jiwjjäna. Ukhamajj aka oraqen jakañatakiw Joseajj jaktanini. Waljaniw jupamp parltʼañsa jupat jukʼamp yatiñsa munapjjani. Jesusajj naskäna uka qhepat kunatsa jupamp Mariampejj Belenan quedasipjjäna uksa jisktʼapjjarakiniwa.