1. 1 Pedro 5:2 textorjamajj ¿kuna suma luräwinïpjjes ancianonakajja?

 JEHOVÁ DIOSAJJ ancianonakaruw munat ovejanakap cuidapjjañapatak uttʼayi. Ancianonakajja, jilat kullakanakapar yanaptʼañ wali valoranitwa uñjapjje, suma ‘awatirïñatakiw’ chʼamachasipjjaraki (Jer. 23:4; 1 Pedro 5:2 liytʼäta). ¡Congregacionanakan ukham jilatanak utjatapat walpun yuspärtanjja!

2. ¿Kuna jan walinakansa yaqhep ancianonakajj uñjasipjje?

² Congregacionan luräwinakapamp phoqkasinjja, ancianonakajj kunayman jan walinakanwa uñjasipjje. Mä toqetjja, congregacionankir jilat kullakanakar cuidañatakejj wal trabajipjjañapawa. Kunas Estados Unidos markankir Tony sat anciano jilatampejj pasäna uk amuytʼañäni. Congregacionan luräwinak katoqasiniti janicha uk amtañatakejj jukʼamp humilde chuymanïñapänwa, ukwa jilatajj amuyasïna. Tony jilatajj akham siwa: “COVID-19 pandemiajj qalltkäna ukhajja, tantachäwinakampi predicacionampi organizañatakejj walja lurañanakaw utjäna, kun luram satas iyaw sasakiw lurirïta. Ukampis wals chʼamachaskchiyätjja, jukʼamp lurañanakajj utjaskakïnwa. Tiempompejj janiw nayrjamajj Biblia liyjjayätti, janirakiw sapakejj Bibliat sum yatjjatjjayätti, oracionanakajas janiw sumäjjänti” sasa. Kosovo markankir Ilir sat mä ancianojja, yaqha jan walinwa uñjasïna. Jupajj jakkäna uka cheqan guerraw utjäna, Diosan markapajj churki uka instruccionanakarjam lurañajj jupatak wali chʼamänwa. Jilatajj akham siwa: “Sinti jan walinakajj utjki ukan jakir jilat kullakanakar yanaptʼañajatakiw sucursalajj mayitäna, uk yatisajj wal ajjsarayasiyäta. Jan ajjsarirïñajj nayatak janiw faciläkänti, Diosan markapajj churki uka instruccionanakajj janis nanakatakjamäkaspa ukhamwa amuyayäta” sasa. Asia toqenkir Tim sat mä misionero jilatatakejja, congregacionan taqpach lurañanakapamp phoqañajj wali chʼamänwa. Jilatajj akham siwa: “Awisajja, jilat kullakanakar yanaptʼañatakejj wali qaritäjjayätwa” sasa. ¿Kunsa ancianonakajj ukhamanakan uñjasisajj lurapjjaspa?

3. ¿Kunsa taqenis Gedeonat yateqassna?

 ³ Ancianonakajj juezat servir Gedeonat waljanak yateqasipjjaspa (Heb. 6:12; 11:32). Gedeonajj Diosan markaparuw jarkʼaqäna, awatirakïnwa (Juec. 2:16; 1 Crón. 17:6). Jichha tiemponjja, ancianonakajj Gedeonjamarakiw Diosan markaparojj mä jan wali tiempon uñjapjjañapa (Hech. 20:28; 2 Tim. 3:1). Gedeonajj humilde chuymanïtapa, istʼasirïtapa, aguantirïtapwa uñachtʼayäna, ukanakat walja suma yatichäwinakwa yateqapjjaspa. Ukhamarus congregacionan taqeniw uka juezat yateqasisajj kunanaktï ancianonakajj lurapki ukanak sapürutjam jukʼamp valoranit uñjañasa, taqe chuymaw yanaptʼañasaraki (Heb. 13:17).

4. ¿Kunjamsa Gedeonajj humilde chuymanïtap uñachtʼayäna?

⁴ Gedeonajj humilde chuymanïnwa. b Israelitanakajj wali chʼamani madianitanakamp apnaqatäpkäna ukhajja, Diosajj israelitanakar salvañamatakiw ajllistamjja sasaw mä angelajj Gedeonar yatiyäna, ukampis Gedeonajj humilde chuymampiw jupar akham säna: “Manasés tribu taypin familiajajj jukʼanikiwa, tatajan familiap taypins janirakiw kuna yäqat jaqëktsa” sasa (Juec. 6:15). Gedeonajj israelitanakar qhespiyañatak janis kunäkaspa ukhamwa amuyasïna. Ukampis Jehová Diosajj uk phoqañap yatïnwa, Diosan yanaptʼapampejj phoqarakïnwa.

5. ¿Kunjamanakansa ancianonakan humilde chuymanïpjjatapajj yantʼat uñjasispa?

⁵ Ancianonakajj humilde chuymanïñatakiw wal chʼamachasipjje (Miq. 6:8; Hech. 20:18, 19). Kunanaksa sum lurañ yatipjje, kunanaksa jikjjatapjje ukanakat janiw jachʼañchasipkiti, pantjasipki ukhasa jan ukajj mä kunas jan sumar mistki ukhasa janirakiw jupanak pachpajj wal juchañchasipkiti. Ukampis awisanakajja, humilde chuymanïpjjatapajj yantʼataw uñjasispa. Inas mä ancianojj Diosan markapan walja lurañanak katoqaschi, ukampis jan taqpach phoqañ puedjjchiti. Inas mä asignación sum phoqatapat wal felicitapjjchi jan ukajj mä trabajo luratapat jupa toq parlapjjarakchi. Ukhamanakan ¿kunjamsa ancianonakarojj Gedeonat yateqasiñajj yanaptʼaspa?

6. ¿Kunsa Gedeonjam humilde chuymanïñatakejj ancianonakajj lurapjjañapa? (Foto uñjjattʼarakïta).

⁶ Yanaptʼa mayipjjam. Humilde chuyman jaqejja, jan taqe kun lurirjamätap amuyasiwa. Humilde chuymanïtapatjja, Gedeonajj mayninakaruw yanaptʼa mayïna (Juec. 6:27, 35; 7:24).  Amuytʼasir ancianonakajj ukhamwa lurapjjaraki. Párrafo 2 ukan parlaniwayktan uka Tony jilatajj akham siwa: “Lurirjamäkayäta ukat sipans jukʼamp lurañanakwa katoqasirïta, jiskʼatpachaw ukhamäyäta. Ukatwa familjam Bibliat yatjjatapkayäta ukhajj humilde chuymanïñ toqet parlapjjayäta, esposajarojj kunsa uka toqet amuyi uk arstʼañapatakiw mayirakiyäta. Ukatjja Internetan jw.org cheqankir mä video uñtayäta, uka videojj Jesusat yateqasisa mayninakar wakichtʼapjjañäni ukat confiyapjjarakiñäni satawa” sasa. Tony jilatajj mayninakaruw yanaptʼa mayïna, kunjamsa ukajj jupar yanaptʼäna uk akham sasaw qhanañchi: “Congregacionan taqe kunaw sum lurasiski, kunanakatï Jehová Diosamp suma amigöñatak yanaptʼkitaspa ukanak lurañatakis jukʼamp tiemponëjjtwa” sasa.

7. Jupanak toq parlapki ukhajj ¿kunsa ancianonakajj Gedeonat yateqasipjjaspa? (Santiago 3:13).

⁷ Jumanak toq parlapjjani ukhajj jan colerasipjjamti. Mä ancianojj jupa toq parlapki ukhaw yantʼat uñjasispa. Ukhamanakanjja, Gedeonat yateqasiñaw ancianonakar yanaptʼarakispa. Gedeonajj pantjasir jaqëtap yatïnwa, Efraín tribunkir chachanakajj jupa toqe arusipjjäna ukhajja, janiw jankʼak coleraskänti (Juec. 8:1-3). Colerasiñat sipansa, Gedeonajj humilde chuymampiw jupanakar istʼäna, wali munasiñampiw pacienciayäna. Yatiñani ancianonakajj Gedeonjamäpjjarakiwa. Jupa toqe parlapjje ukhajja, wali atencionampiw jupanakar istʼi, llampʼu chuymampiw jaysaraki (Santiago 3:13 liytʼäta). Ukham lurasajj congregacionan sumankañ utjañapatakiw yanaptʼapjje.

8. ¿Kunsa ancianonakajj mayninakan jachʼañchatajj lurapjjañapa? Mä experienciamp uk qhanañchtʼam.

⁸ Jehová Diosarupun jachʼañchapjjam. Madianitanakar atipjatapat Gedeonar jachʼañchapjjäna ukhajja, jupajj Jehová Diosar jachʼañchapjjañapatakiw markar yanaptʼäna (Juec. 8:22, 23). ¿Kunjamsa ancianonakajj Gedeonat yateqasipjjatap uñachtʼayapjjaspa? Mä luräw sum phoqasajj Jehová Diosarupuniw jachʼañchapjjañapa (1 Cor. 4:6, 7). Mä ancianorutï sum yatichatapat felicittʼapjjchi ukhajja, kuntï yatichki ukajj Diosan Arupat jutatapwa qhanstayaspa, kunanaktï Diosan markapajj yatichkistu ukanakat taqen yateqataswa qhanstayarakispa. Awisajja, kunjamsa yatichasipki ukajj Jehová Diosarut jachʼañchi jan ukajj jupanak pachparuch jachʼañchi ukwa ancianonakajj jisktʼasipjjañapa. Kunas Timothy jilatarojj pasäna uk amuytʼañäni. Ancianot serviñapatak uttʼayapkäna ukhajja, discursonak taqenitak arstʼañajj wal jupar gustäna. Jilatajj akham siwa: “Mä discurso arstʼañ waktʼitäna ukhajja, wali jay parlasaw qalltirïta, uñachtʼäwinakajas wali jachʼanakänwa, musparkañ arstʼañatakiw chʼamachasirïta, ukatwa jilat kullakanakajj wal jachʼañchapjjerïtu. Ukampis Jehová Diosata jan ukajj Bibliat yateqañat sipansa, jilat kullakanakajj nayarukiw jachʼañchjjapjjetäna” sasa. Tiempompejja, Timothy jilatajj kunjamtï yatichkäna uk mayjtʼayañ wakisitapwa amuyasïna, ukhamat jan juparuk jachʼañchapjjañapataki (Prov. 27:21). ¿Kunsa ukham lurasajj jikjjatäna? Jilatajj akham siwa: “Jilat kullakanakajj kunjamsa discursojajj mä jan waltʼäwir saykatañatakisa, mä jan walin aguantañatakisa, Jehová Diosar jukʼamp jakʼachasiñatakis yanaptʼawayi ukwa cuenttʼapjjetu. Nayra maranakan jachʼañchapkitäna ukanakat sipansa kuntï jilat kullakanakajj sapki uk istʼasajj jukʼamp kusisitätwa” sasa.

9. ¿Kunjamanakansa Gedeonan istʼasirïtapasa jan ajjsarirïtapas yantʼat uñjasïna? (Nayrïr paginankir dibujo uñjjattʼäta).

⁹ Jehová Diosajj Gedeonar juezat uttʼaykäna uka qhepatjja, Gedeonan istʼasirïtapasa jan ajjsarirïtapas yantʼataw uñjasïna. Jupajj tatapan utjkäna uka Baal diosan altarap tʼunthapiñapänwa, uk lurasajj jan walinakanwa uñjasispäna (Juec. 6:25, 26). Qhepatjja, Gedeonajj mä  jachʼa ejército tantachtʼäna, ukampis Jehová Diosajj pä kutiw uka ejército jukʼaptayañapatak mayïna (Juec. 7:2-7). Qheparusti Jehová Diosan ordenatajj enemigon campamentoparuw chika arumajj atacarakïna (Juec. 7:9-11).

10. ¿Kunjamsa mä ancianon istʼasirïtapajj yantʼat uñjasispa?

¹⁰ Ancianonakajj jankʼakiw istʼasipjjañapa (Sant. 3:17). Mä ancianojj istʼasirïki ukhajja, kuntï Bibliasa Diosan markapas siski ukarojj taqe chuymaw istʼi, ukhamatwa mayninakatak wali yateqaskañajja. Ukampis inas istʼasirïñajj jupatak chʼamakïchispa. Awisajja inas Diosan markapajj apayanki uka machaq instruccionanakarjam lurañajj chʼamakïchispa. Inas awisajj “¿mä instruccionajj jiwasatakjamäskiti jan ukajj ukarjam lurañajj walikïskiti?” sasin jisktʼaschispa. Jan ukajj inas kuntï mayipki uk lurasajj carcelar llawintapjjchispa. Ukhamanakan ¿kunjamsa ancianonakajj Gedeonjam istʼasirïpjjaspa?

11. ¿Kunas ancianonakarojj istʼasirïñatak yanaptʼaspa?

¹¹ Instruccionanak katoqasajj ukarjam lurapjjam. Kunjamsa Gedeonajj tatapan altarap tʼunthapiñapäna, kawkinsa mä altar lurañapäna, kuna animalsa sacrificiot loqtañapäna taqe ukanak Jehová Diosaw jupar säna. Gedeonajj janiw ukanak contrajj parlkänti, kuntï Jehová Diosajj siskäna ukarjamapuniw luräna. Jichhürunakanjja, ancianonakajj cartanaka, anuncionaka, ewjjtʼanak toqew Jehová Diosan markapat instruccionanak katoqapjje. Taqe ukanakaw jan walinakan jan uñjasiñatakisa, Jehová Diosan jakʼapankaskakiñatakis yanaptʼistu. Niyakejjay ancianonakajj Jehová Diosan markapajj apayanki uka instruccionanakarjampun phoqapjjchejja, jupanakarojj wal munastanjja. Ancianonakan istʼasirïpjjatapajj taqpach congregacionaruw yanaptʼi (Sal. 119:112).

12. Diosan markapajj mä cambio lurki ukhajj ¿kunjamsa ancianonakajj Hebreos 13:17 textorjam lurapjjaspa?

¹² Cambionakajj utjki ukarjam lurañatakejj jankʼakïpjjam. Amtapjjañäni, Jehová Diosajj niya taqpach soldadonakapar utanakapar khitjjañapatakiw Gedeonar mayïna (Juec. 7:8). Inas Gedeonajj akham amuychïna: “¿Uk lurañajj wakisipunpachati? ¿Ukham lurasajj taqe kunas walikïskpachäniti?” sasa. Ukhamäkchïnsa Gedeonajj istʼasïnwa. ¿Kunjamsa ancianonakajj Gedeonat yateqasipjjaspa? Kuna cambionaktï Jehová Diosan markapajj lurki ukarjam lurasaw yateqasipjjaspa (Hebreos 13:17 liytʼäta). 2014 maran kunas pasäna uk amuytʼañäni, Salón del Reino, Salón de Asambleas ukanak lurañatakejj kunjamsa qollqejj apnaqasini ukwa Cuerpo Gobernantejj cambiäna (2 Cor. 8:12-14). Nayra maranakanjja, mä salón lurañatakejj congregacionanakaruw qollqejj maytʼasirïna, ukatsti kuttʼayjjapjjañaparakïnwa. Ukampis jichhajja, oraqpachankir congregacionanakan qollqepajj mayarukiw apnaqasjje, ukhamat munaski uka cheqanakan tantachasiñ utanak lurañataki, uka cheqankir congregacionanakajj qhawqtï puedipki uk churapjjarakispawa. José sat mä anciano jilatajj uka cambio utjatapat payachasïnwa. Akham sasaw amuyäna: “Inas ukajj yaqha markanakatak walikïchispa, akan janiw ukajj walïkaniti. Janiw ni mä salonas luraskaniti” sasa.  Ukhampachas uka jilatajj uka cambio utjatapar apoyänwa. Kunas ukatak yanaptʼäna uk akham sasaw qhanañchi: “Kuntï Proverbios 3:5, 6 textojj siski ukwa amtasiyäta, Jehová Diosaruw confiyañajäna. ¡Kunanakatï uka cambiompejj jikjjatasiwayki ukajj wali musparkañänwa! Janiw walja salonanakakejj luraskänti, jan ukasti taqenin mä igualak utjañapatakiw yanaptʼapjjayäta” sasa.

13. 1) ¿Kunarus Gedeonajj taqe chuym confiyäna? 2) ¿Kunsa ancianonakajj Gedeonat yateqasisajj lurapjjaspa? (Foto uñjjattʼarakïta).

¹³ Jehová Diosan munañap jan ajjsartʼas lurapjjam. Gedeonajj jan walinakanwa uñjasïna, ajjsararakïnwa, ukhampachas Jehová Diosarojj istʼänwa (Juec. 9:17). Jehová Diosajj jupampïskatap uñachtʼayäna ukhajja, Gedeonajj Diosaw markapar arjjatañatak yanaptʼitani sasaw taqe chuym confiyjjäna. Predicacionas tantachasiñas jarkʼatäki uka lugaranakan jakir ancianonakajj Gedeonjamäpjjarakiwa. Jupanakajj tantachäwinak organizapjjatapatsa predicación sarayapjjatapatsa, arrestata, jisksuta, trabajonakapat jaqsuta, jan ukajj jan walinakan uñjasipjjañap yatipkchisa, jan ajjsarasaw ukanak lurasipkaki. c Jachʼa tʼaqesiñ tiempon jan walinakans uñjasipkchinejja, Diosan markapajj churkani uka instruccionanak jan ajjsartʼasaw ancianonakajj phoqapjjañapäni. Inas jachʼa qala chhijchhinakar uñtatäki uka juchañchir yatiyäwi yatiyañatakejj instruccionanak katoqapjjchini. Jan ukajj inas Magog oraqenkir Gog satäki ukajj atakkistani ukhajj kunjamsa salvassna uka toqet instruccionanak katoqapjjchini (Ezeq. 38:18; Apoc. 16:21).

14. ¿Kunjamsa Gedeonajj aguantatap uñachtʼayäna?

¹⁴ Gedeonajj Israel markan juezapäkäna ukhajja, wal qarïna, janiw chʼamapat sintiskänti. Madianitanakajj arum toqer nuwasïwit escapasipkäna ukhajja, Gedeonajj Jezreel vallet Jordán jawirkamaw arktäna, uka jawira jakʼanakajj chʼapinakamp phoqantatäpachänwa (Juec. 7:22). ¿Gedeonajj jawirarukit quedasjjäna? ¡Janiwa!  Gedeonasa jupamp chik sarir 300 chachanakas wali qaritäpkchïnsa, jawir paskatasajj arktasipkakïnwa. Ukatsti madianitanakar jikjjatasajj atipjapjjänwa (Juec. 8:4-12).

15. ¿Kunatsa mä ancianotak aguantañajj chʼamakïspa?

¹⁵ Congregacionar uñjañas familiar uñjañas mä ancianorojj wal qariyaspa. ¿Kunjamsa uka ancianonakarojj Gedeonat yateqasiñajj yanaptʼaspa?

16, 17. 1) ¿Kunas Gedeonarojj aguantañatak yanaptʼäna? 2) ¿Kunarus ancianonakajj confiyapjjañapa? (Isaías 40:28-31; foto uñjjattʼarakïta).

¹⁶ Jehová Diosaw chʼam churitani sasin confiyapjjam. Ukwa Gedeonajj luräna, Jehová Diosajj yanaptʼapunïnwa (Juec. 6:14, 34). Mä kutejja, Gedeonampi jupamp chik sarir chachanakampejj kayukiw pä madianita reyinakar arktapjjäna, amuyatajj camellor qonjjatataw uka reyinakajj escapasipkäna (Juec. 8:12, 21). Ukampis Diosan yanaptʼapampejja, jupanakar jikjjatasajj atipjapjjänwa. Jichhürunakan ancianonakajj ukhamarakiw Jehová Diosar confiyapjjañapa. “Jupajj janipuniw qarjtkiti, ni thayjtkisa”. Jupaw ancianonakarojj munapkani ukhajj chʼam churani (Isaías 40:28-31 liytʼäta).

¹⁷ Matthew jilatat amuytʼañäni, jupajj Comité de Enlace con los Hospitales ukanwa yanaptʼaski. ¿Kunas aguantañatak yanaptʼi? Jilatajj akham siwa: “Kuntï Filipenses 4:13 textojj siski uk phoqasir naya pachpaw uñjta. Walja kutiw qaritäkta ukhasa, jan kun lurirjamäjjta ukhas Jehová Diosar wal ruwtʼasta, ukhamat jilat kullakanakajar yanaptʼañatak nayar chʼam churañapataki. Ukhaman uñjaskta ukhajja, kunjamsa Jehová Diosajj aguantañatak chʼam churitu uk qhan amuyasirakta” sasa. Jan walinakan uñjaskasas ancianonakajj Gedeonjamarakiw Diosan ovejitanakapar wali munasiñamp uñjapjje. Ukampis humilde chuymanïpjjañapawa, kunanaktï lurañ munapki taqe ukanak janiw lurañ puedipkapuniniti, uk amuyasipjjañaparakiwa. Ukhamäkchinisa, ruwtʼasitasarojj Jehová Diosajj istʼistaniwa, nayrar sarantaskakiñatakejj chʼam churistani sasaw ancianonakajj confiyapjjañapa (Sal. 116:1; Filip. 2:13).

18. Yatjjataniwayktan ukarjamajj ¿kunjamsa ancianonakajj Gedeonat yateqasipjjaspa?

¹⁸ Kunjamtï yatjjataniwayktanjja, ancianonakajj Gedeonat waljanakwa yateqapjjaspa. Diosan markapan lurañanak katoqapkani ukhasa, mä kun lurapjjatapat jupanak toq arusipjjani jan ukajj jachʼañchapjjani ukhasa, humilde chuymanïpjjañapawa. Istʼasiri jan ajjsariri ukhamäpjjañapawa, akapachan tukusiñap jakʼachasinkipan jichhaw jukʼamp ukhamäpjjañapa. Kunas kunäskpan Jehová Diosaw aguantañatakejj chʼam churitani sasaw confiyapjjañapa. Ukham wal chʼamachasir awatirinakarojj wali valoranitwa uñjtanjja, ‘wali munasiñampiw uñjaraktanjja’ (Filip. 2:29).