1. ¿Kunsa Jehová Diosan urupan salvasiñatakejj lurañasa?

 BIBLIANJJA, ‘Jehová Diosan urupat’ parlki ukhajj Diosajj enemigonakapar tukjkani markapar salvkani uka tiempotwa parli. Nayra tiempon Diosajj yaqhep markanakar castigänwa (Is. 13:1, 6; Ezeq. 13:5; Sof. 1:8). Niya puriniñampïski uka ‘Jehová Diosan urupajja’, politiconakajj Jachʼa Babiloniar atacapkani ukampiw qalltani, Armagedonampiw tukuyarakini. Uka ‘urun’ salvasiñatakejj jichhatpachaw wakichtʼasiñasa. Jesusajj janiw “jachʼa tʼaqesiñ” urutak wakichtʼatäpjjam sasakejj yatichkänti, jan ukasti “wakichtʼatäpjjapunim” sasaw yatichäna (Luc. 12:40; Mat. 24:21).

2. ¿Kunatsa 1 Tesalonicenses librot yatjjatañasajj wakisi?

² 1 Tesalonicenses libronjja, apóstol Pablojj Jehová Diosan jachʼa urupatak wakichtʼatäpjjañapatakiw cristianonakar yanaptʼañ munäna, ukatwa uñachtʼäwinakamp yatichäna. Diosan urupan puriniñapatak walja tiempo faltaskatap Pablojj yatïnwa (2 Tes. 2:1-3). Ukampis niyas uka urojj purinjjaspa ukham wakichtʼasipjjañapatakiw chʼamañchtʼäna. Jiwasajj uka ewjjtʼarjamaw sarnaqañasaraki. Pablojj aka kimsa toqenakatwa qhanañchtʼäna: 1) ¿Kunjamsa Jehová Diosan urupajj jutañapäna? 2) ¿Khitinakas jan salvasipjjañapäkäna? 3) ¿Kunsa wakichtʼatäñatakejj lurañasa? Ukanakat jichhajj yatjjatañäni.

3. ¿Kunjamsa Jehová Diosan urupajj mä lunthatar uñtat arum jutani? (Dibujonak uñjjattʼarakïta).

³ ‘Mä lunthatjamaw arum jutani’ (1 Tes. 5:2). Kunjamsa Jehová Diosan urupajj jutani uk qhanañchtʼañatakejj kimsa uñachtʼäwinakatwa apóstol Pablojj parläna. Ukanakat akaw nayrïrejja. Lunthatanakajj jan khitis suyki ukhaw ratuki chʼamak aruman lunthatsupjje. Jehová Diosan urupajj niya ukhamarakiw ratuk purinini, aka mundonkir niya taqpach jaqenakarus mä akatjamat katjarakini.  Niyakejjay taqe kunas ratuk paschinejja, inas cheqpach cristianonakatakejj mä akatjamat ratuk pasarakchini. Ukampis jiwasajj janiw tukjatäkañäniti, jan wali jaqenakakiw tukjatäni.

4. ¿Kunjamsa Jehová Diosan urupajj mä warmir partojj waytki ukham jutani?

⁴ “Kunjamtï mä usur warmirojj partojj waytki” ukhamaw jutani (1 Tes. 5:3). Mä usur warmejja, kuna horas partojj waytani uk janiw yatkiti, ukampis uka urun puriniñapat janiw payachaskiti. Jilapartejj mä akatjamatwa partojj wayti, walpun tʼaqesiyi, ususiñ horasajj kunjamats purinikipuniniwa. Jehová Diosan urupampejj ukhamarakiwa, janis kuna urusa kuna horasas qalltani uk yatkstanjja, uka urun puriniñapat janiw payachasktanti. Diosajj mä akatjamat jan wali jaqenakar juchañchani, janirakiw escapañ puedipkaniti, uk jiwasajj yattanwa.

5. ¿Kunatsa jachʼa tʼaqesiñ tiempojj qhantatir uñtataw purinini sasin sistanjja?

⁵ Kunjamtï qhantatejj purinki ukhamaw purinini. Pablojj kimsïr uñachtʼäwipanjja, wasitatwa arum lunthatasirinakat parli, ukampis janiw nayrïr uñachtʼäwipjamäkiti. Amuyatajja, Jehová Diosan urupajj qhantatir uñtatas purinkaspa ukhamwa qhanañchi (1 Tes. 5:4). Inas lunthatanakajj lunthatasiñar chuyma uchatäsipkchi, kuna horas uk jan amuyasipkchiti. Inas qhanjtanjjatap jan amuyasipkchiti, inas inti jalsunitapat katjayasipjjañapätap jan amuyasipkarakchiti. Jachʼa tʼaqesiñ tiempon niya ukhamaw pasarakini, khitinakatï lunthatanakjam chʼamakan jan walinak lurapki, kunatï Diosatakejj jan walïki ukanak lurañ munasipkaki ukanakajja, katjayasipjjaniwa. Jiwasajj janiw jupanakjamäktanti, Jehová Diosan urupatak wakichtʼatätas uñachtʼaytanwa. ¿Kunjamsa uk uñachtʼaytanjja? Jehová Diosajj uñiski ukanak janiw lurktanti, taqe kunansa suma chuymanïñataki, “kunatejj cheqapäki uk lurañataki ukhamarak cheqapar sarnaqañatakiw” chʼamachastanjja (Efes. 5:8-12). Khitinakas Jehová Diosan urupan jan salvasipkani uk qhanañchañatakejj apóstol Pablojj pä uñachtʼäwinakampiw parlarakïna.

6. ¿Kunatsa niya taqe jaqenakajj ikitäpkaspas ukhamäpjje? (1 Tesalonicenses 5:6, 7).

⁶ ‘Ikirinaka’ (1 Tesalonicenses 5:6, 7 liytʼäta). Jehová Diosan urupan jan salvasirinakajj ikir jaqenakar uñtasitäpjjewa sasaw Pablojj qhanañchäna. Maynejj ikiski ukhajja, jupa jakʼan kun pasaskatapsa tiempon pasaskatapsa janiw amuykiti, janirakiw kunanakatï pasaski ukan importantëtapsa amuykiti, janiw kun lurañs puedkarakiti. Jichhürunakan ukhamarakiw Diosar serviñan pasaski, jilaparte jaqenakajj ikisipkiwa (Rom. 11:8). Kunanakas ‘qhepa urunakan’ jakaskatas uñachtʼayi uk janiw amuyapkiti, jachʼa tʼaqesiñ tiempon jakʼankataps janirakiw amuyapkiti. Kunanakas mundpachan mayjtʼaski uk amuyasajja, yaqhepajj amuytatasipjjewa, Diosan Reinopats yatiñ munapjjarakiwa. Ukampis waljanejj mä qhawqha tiempokiw Diosan Reinopat yatiñ munapjje, ukat jankʼakiw wasitat ikjjapjjaraki. Yaqhepajj mä juicio urun utjañapar creyipkchisa, uka urun puriniñapatakejj walja tiempos faltkaspa ukham amuyapjje (2 Ped. 3:3, 4). Ukampis jan ikjañasatak ewjjtʼkistu ukjja, jiwasajj sapürutjamaw wali importantet uñjtanjja.

7. ¿Kunatsa Diosajj tukjkani uka jaqenakajj machirinakar uñtasitäpjje?

⁷ ‘Machirinaka’. Diosajj tukjkani uka jaqenakajj machirinakar uñtasitäpjjewa sasaw apóstol Pablojj qhanañchäna. Machantat mä jaqejja, janiw sum amuytʼasiñ puedkiti, jan wali amtanakaruw puriraki. Ukar uñtasitarakiw jan wali jaqenakajj Diosan ewjjanakapar jan istʼañ munapkiti, tukjatäñar apki uka jakañ vida ajllipjjaraki. Ukampis apóstol Pablojj cristianonakarojj wali amuyumpi sarnaqapjjañapataki jan machantatäpjjañapatakiw ewjjtʼäna (1 Tes. 5:6). Biblia toqet yatjjattʼat mä jaqejja, jan machantatäki “uka jaqejj tranquilokiwa, janiw may may amuykiti, janïr kun lurkasajj sum amuytʼasi, ukhamatwa suma amtanakar puri” sasaw qhanañchi. ¿Kunatsa tranquilokïñasa, jan may may amuyirïñas wakisi? Kuna laykutejj facilakiw politicar mitisjjsna, kunanakatï aka mundon pasaski ukanakampis apayasjjsna. Jehová Diosan urupan jakʼachasisinkipanjja, jukʼampiw ukanakar mitisiñasatakejj waytʼapjjestani. Ukampis kunjamsa ukanakar saykatañäni ukat janiw llakisiñasäkiti, Jehová Diosan espíritu santopaw tranquilokïñatakisa, jan may may amuyañatakisa, suma amtanakar puriñatakis yanaptʼistani (Luc. 12:11, 12).

8. 1 Tesalonicenses 5:8 textorjamajj ¿kunas jan ikjañatakisa wali amuyump sarnaqaskakiñatakis wakisi? (Dibujo uñjjattʼarakïta).

⁸ ‘Pecho jarkʼaqasiñ chalecompi cascompi uskuntasiñäni’. Amuytʼasiri ukhamarak armaduramp uskuntat soldadonakar uñtasitäksnasa ukhamwa Pablojj parläna (1 Tesalonicenses 5:8 liytʼäta). Guerrajj utjki uka tiemponjja, mä soldadojj nuwasiñatak wakichtʼatäñapapuniwa. Jiwasajj ukhamäñasarakiwa. Pecho jarkʼaqasiñ chalecompjam Diosar confiyañampi munasiñampi uskuntasiñäni, cascor uñtasitäki uka suytʼañampi uskuntasiñäni ukhajja, Jehová Diosan urupatak wakichtʼatätaswa uñachtʼayañäni. Ukanakaw wal yanaptʼistu.

9. ¿Kunjamsa Diosar confiyañajj jarkʼaqestu?

⁹ Kunjamtï pecho jarkʼaqasiñ chalecojj mä soldadon chuymap jarkʼaqkejja, ukhamarakiw Diosar confiyañampi munasiñampejj chuymas jarkʼaqestu. Ukanakaw Diosar serviskakiñatakisa Jesusar arkaskakiñatakis yanaptʼistu. ¿Jehová Diosar confiyañajj kunatakis yanaptʼistani? Jupar taqe chuyma thaqerinakar bendisirïtapat jan payachasiñatakiw yanaptʼistani (Heb. 11:6). Jan walinakan uñjaskasas Diosar confiyañaw Jesucristo Pʼeqtʼirisat jan jitheqtañatak yanaptʼistani. Diosar jukʼamp confiyañatakisa jan walinakar saykatañatakisa, kunjamsa jilat kullakanakajj arknaqat uñjaskasas jan ukajj qollqet  pistʼat uñjaskasas Jesucristot jan jitheqtapkäna uk amuytʼañäni. Jukʼamp yänak munañampi jan apayasiñatakejja, kunatï wakiski ukampik jakasiri Diosan Reinop nayrar uchiri jilat kullakanakat yateqasipjjañäni. b

10. ¿Kunjamsa Diosar munasiñasa jaqe masisar munasiñas yanaptʼistu?

¹⁰ Jan ikjañatakis wali amuyump sarnaqaskakiñatakis munasiñaw yanaptʼarakistu (Mat. 22:37-39). Predicatasat jan walinakansa uñjaskchiñänejja, Diosar munasitasat predicaskaktanwa (2 Tim. 1:7, 8). Niyakejjay jiwasjam jan creyipki ukanakar munasstanjja, jupanakar yatiyañatakejj chʼamachasipuntanwa, teléfono toqesa carta toqesa yatiyaraktanwa. Jupanakajj mä urojj cambiapjjaspawa, kunatï walïki uk lurañwa qalltapjjaspa sasaw confiytanjja (Ezeq. 18:27, 28).

11. ¿Kunjamsa jilat kullakanakasar munasiñajj yanaptʼistu? (1 Tesalonicenses 5:11).

¹¹ Jilat kullakanakasarojj munasiraktanwa, maynit maynikam chʼamañchtʼasisa yanaptʼasisaw munasiñ uñachtʼaytanjja (1 Tesalonicenses 5:11 liytʼäta). Guerranjja soldadonakajj jupanakkamaw yanaptʼasipjje. Ukampis guerrankkasajj jan amuyasisaw compañeropar usuchjaspa, uksti janiw aleqat lurkaspati. Jiwasampejj ukhamarakiwa, jilat kullakanakarojj janipuniw amanut usuchjksnati, janirakiw jan wal luratajj jan walimp kuttʼayksnati (1 Tes. 5:13, 15). Jilat kullakanakar munasitasjja, congregación sarayapki uka jilatanakar respetasaw uñachtʼayaraktanjja (1 Tes. 5:12). Tesalónica congregacionat amuytʼañäni. Apóstol Pablojj jupanakar carta qellqkäna ukhajja, congregacionjam uttʼayaskäna ukhat janiw ni mä maras paskänti. Inas ukankir ancianonakajj jukʼa experiencianïpjjatapat pantjasipjjchïna, ukampis jilat kullakanakajj jupanakar respetapjjañapänwa. Jachʼa tʼaqesiñ tiempo jakʼachasinkipanjja, inas congregacionankir ancianonakan yanaptʼap jukʼamp thaqchiñäni, kuna laykutejj inas central mundialana ukhamarak sucursalan yanaptʼap jan katoqjjchiñäniti. Ukatwa ancianonakar munasiñsa respetañsa yateqañasa, jichhaw uk lurañajj wali importantejja. Kunas kunäskpan wali amuyump sarnaqasipkakiñäni, ancianonakan pantjasitanakap jan uñchʼukiñäniti. Antisas ak  amtapjjañäni, Jehová Diosaw jupat jan jitheqtiri ancianonakarojj Cristo toqejj irpaski.

12. ¿Kunjamsa suytʼäwisajj amuyus jarkʼaqestu?

¹² Kunjamtï cascojj soldadon pʼeqep jarkʼaqkejja, ukhamarakiw salvación suytʼañajj amuyunakas jarkʼaqestu. Niyakejjay suytʼäwisajj chuymasankchejja, jiwasatakejj aka mundojj churañ munkistu ukanakajj jan kunatak serviriwa (Filip. 3:8). Chuymasankki uka suytʼäwisajj sumak jikjjatasiñataki jan aynachtʼañatakiw yanaptʼarakistu. Ukaw África toqen servir Wallace jilatampiru Laurinda kullakampirojj pasäna. Nayraqatajj maynin tatapaw jiwjjäna, ukjjarojj maynin mamapaw jiwjjarakïna. Ukajj kimsa semananakwa pasäna. COVID-19 pandemianjja, janiw familiapampïñatakejj markapar sarañ puedipkänti. Jilatajj akham sänwa: “Jiwatat jaktañ suytʼäwejj walpun yanaptʼitu, janïr jiwapkäna uka qhepa urunakan kunjamäsipkänsa ukat lupʼiñat sipansa, machaq mundon jaktanipkani uka nayrïr urunakajj kunjamäpjjanisa ukatwa lupʼta. Uka suytʼäwi utjatapat tranquilokïtwa, jupanakan jiwjjapjjatapat janiw sint llakiskti” sasa.

13. ¿Kunsa espíritu santo katoqañatakejj lursna?

¹³ “Janirak espíritu santon ninapsa jiwarayapjjamti” (1 Tes. 5:19). Espíritu santojj jiwas manqhan aqer mä ninar uñtasitawa sasaw apóstol Pablojj säna. Uka espíritu santonïtasatwa kunatï walïki uk taqe chuym lurañ muntanjja, Diosar jukʼamp serviñatakis chʼamanirakïtanjja (Rom. 12:11). ¿Kunsa espíritu santo katoqañatakejj lursna? Diosaruw mayiñasa, Arupatwa yatjjatañasa, markapamp mayachtʼatäñasarakiwa. Uktï lurañänejja, ‘espíritu santon achuparjamaw’ sarnaqañäni (Gál. 5:22, 23).

14. ¿Diosan espíritu santop katoqaskakiñatakejj kunanaksa jan lurañasäki? (Fotonak uñjjattʼarakïta).

¹⁴ Jehová Diosajj espíritu santop churkchistusa, wal amuyasiñasawa, janiw kunas ‘espíritu santon ninap’ jiwarayañap munktanti. Jehová Diosajj espíritu santo jiwasar churañapatakejja, janiw juchan sarnaqañasäkiti, amuyunakasas qʼomäñapawa. Jiwasatï qʼañu amuyunakanëjjsna, ukanakamp apayasjjaraksna ukhajja, janiw espíritu santojj jiwasampëjjaspati (1 Tes. 4:7, 8). ¿Kunanakampitsa amuyasiñasa? Pablojj akham sänwa: “Janirak profecía arunakarojj jiskʼachapjjamti”  sasa (1 Tes. 5:20). Uka versiculon ‘profecía arunaka’ siski ukajja, Diosajj espíritu santop toqe churki uka yatiyäwinakatwa parlaski. Jehová Diosan urupat parlki uka yatiyäwisa, uka urojj wali jakʼankatapat parlki uka yatiyäwisa, uka taypinkarakiwa. Jehová Diosan urup puriniñapatakejj walja tiempos faltkaspa ukham jiwasajj janiw amuyktanti, janirakiw Armagedonan puriniñaps janiw uñjkañäniti sasin sisktanti. Jan ukasti Jehová Diosan urup puriniñapajj wali jakʼankkaspas ukhamwa amuytanjja, mä arunjja niyas purinjjaspa ukhamwa amuytanjja. Ukatwa juchanakat jitheqtañatakejj chʼamachastanjja, sapüruw kunanakatï ‘Dios chuymätas uñachtʼayki’ ukanak lurtanjja (2 Ped. 3:11, 12).

15. ¿Kunsa jan khitimp engañjayasiñatakejj lurañasa? (1 Tesalonicenses 5:21).

¹⁵ Akat mä jukʼa tiemporojja, Diosan enemigonakapajj aka arunakwa yatiyapjjani: “¡Suman jakasiñampi jan ajjsaras jakasiñampiw utj-jje!” sasa (1 Tes. 5:3). Demonionakan amuytʼayat yatiyäwinakwa taqe cheqan arsupjjani, ukaw niya taqe jaqenakar engañjani (Apoc. 16:13, 14). ¿Jiwasajj engañjayasirakiñäniti? Jiwasatï ‘taqe kunas ukhamapunïskiti janicha uk sum amuykiptʼañäni’ ukhajja, janiw engañjayaskañäniti (1 Tesalonicenses 5:21 liytʼäta). Uka texton “sum amuykiptʼapjjam” siski uka griego arojja, wali valorani metalanakajj cheqati janicha uk sum amuytʼañatwa parlaski. Jiwasajj ukhamarakiw kuntï istʼktan jan ukajj liytʼktan ukajj cheqati janicha uk sum amuykiptʼañasa. Tesalonicankir cristianonakan uk lurapjjañapajj wali importantënwa, jachʼa tʼaqesiñ tiempo jakʼachasisinkipanjja, jiwasan uk lurañasajj jukʼamp importantëniwa. Taqe kuntï sapkistu ukanakar jan amuytʼasis creyiñat sipansa, kuntï liytʼktan jan ukajj istʼktan ukajj Bibliajj yatichki Jehová Diosan markapajj siski ukarjamati janicha uk wali sum amuykiptʼtanjja. Ukhamtï lurañänejja, janiw demonionakan kʼari yatiyäwinakapajj engañjkistaniti (Prov. 14:15; 1 Tim. 4:1).

16. ¿Kuna kusiskañ suytʼäwis utjistu, ukat kunsa jichhürunakan lurañasa?

¹⁶ Jehová Diosan servirinakapajj grupjamaw jakkirpach jachʼa tʼaqesiñ tiempo pasapjjani, ukampis kunas qharürojj sapa maynir pasistani uk janiw yatktanti (Sant. 4:14). Jachʼa tʼaqesiñ tiempo paskchiñänisa jan ukajj janïr uka tiempo purinkipan jiwjjchiñänisa, Diosajj jupat jan jitheqtkañäni ukhajj wiñay jakañampiw bendisistani. Ajllit cristianonakajj Cristomp chikaw alajjpachankapjjani, yaqha ovejanakasti aka oraqenwa mä paraison jakapjjarakini. Uka urun puriniñapkamajj kunanaktï jutïrin katoqkañäni ukanakat lupʼisipkakiñäni, Jehová Diosan urupatakis wakichtʼatäpjjañäni.