1, 2. ¿Kuna jan walinakansa Lot chachjamajj uñjasiraktanjja?

 AKAPACHANKIR jaqenakan jan wal sarnaqapjjatap uñjasajja, cheqapar sarnaqer Lot chachjamarakiw jikjjatastanjja. Alajjpachankir Awkisajj jaqenakan jan wali luratanakap uñisitap jupajj yatïnwa, ukatwa “jan wali jaqenakan jan phenqʼani jucha luratanakapajj walpun Lot chacharojj llakisiyäna” (2 Ped. 2:7, 8). Lot chachajj Jehová Diosar wal munasïna, wal respetarakïna, ukatwa uka tiempon jakir jaqenakan jan wal sarnaqapjjatap uñisïna. Jiwasajj ukham jaqenak taypinwa jakaraktanjja. Jupanakajj Diosan leyinakapar mä jukʼak respetapjje jan ukajj janiw ni mä jukʼsa respetapkiti. Ukhamäkchisa, jiwasatï Jehová Diosar munasiñäni, jupar ajjsartʼañ yateqarakiñäni ukhajja, qʼañu juchanakat jitheqtasajj qʼom sarnaqaskakiñäniwa (Prov. 14:2).

² Qʼom sarnaqañasatakejja, Jehová Diosajj Proverbios librompiw chʼamañchtʼistu. Chachanakasa, warminakasa, wayn tawaqonakasa, jilïrinakas taqeniw cristianonakajj Proverbios libron suma ewjjanakapampejj yanaptʼayassna.

3. Proverbios 17:3 textorjamajj ¿kuna razonatsa chuymas jarkʼaqasiñasa? (Fotonak uñjjattʼarakïta).

³ ¿Kuna wakiskir razonatsa chuymas jarkʼaqasiñasa? Kuna laykutejj Jehová Diosaw chuymanak uñantirejja. ¿Ukajj kamsañs muni? Kuntï jaqejj jan uñjki ukwa Jehová Diosajj uñji. Kunanakatï chuymasan utjki ukanak taqpachwa jupajj uñjaraki (Proverbios 17:3 liytʼäta). Jehová Diosan ewjjanakap wali valoranit uñjtan ukhajja, jupajj munasistuwa. Chuymasatï jakañ churir yatiñampi phoqtʼatächi ukhajja, janiw Supayampin jupan apnaqat aka mundompin kʼarinakapas jan wali amuyunakapas chuymasan utjkaniti (Juan 4:14; 1 Juan 5:18, 19). Jehová Diosar jukʼamp jakʼachasiñäni ukhajja, jukʼampiw jupar munasiñäni, respetarakiñäni. Janiw kunatï Dios Awkisan chuymap ustʼaykaspa  uk lurkañäniti, janirakiw jupa contra juchachasiñas amuyusan utjkaniti. Mä yantʼan uñjasisajj akham sasaw jisktʼasiñäni: “¿Kunjamarak nayar wal munaskitu wal yanaptʼkarakitu ukan chuymap amanut ustʼayiriststi?” sasa (1 Juan 4:9, 10).

4. ¿Kunjamsa Diosar ajjsartʼañajj mä kullakar jarkʼaqäna?

⁴ Croacia markankir Marta b kullakajj niyapuniw qʼañu jucha lurañar purtʼasïna. Kullakajj akham siwa: “Janiw sum amuytʼasiñ puedkayätti. Uka jucha lurañajj mä ratukis kusistʼaykchitaspänjja, uk jan lurañatak chʼamachasiñajj janiw faciläkänti. Ukampis Jehová Diosar ajjsartʼañaw jarkʼaqetäna” sasa. ¿Kunjamsa ukajj yanaptʼäna? Jehová Diosar ajjsartʼataj laykojja, mä jan wali amtar purisajj kuna jan walinakansa uñjasirista uka toqetwa lupʼiyäta sasaw Marta kullakajj qhanañchi. Jiwasajj ukhamarakwa lursna, kuna jan walinakantï uñjasksna ukanakatjja, Jehová Diosar llakisiyaña, wiñayatak jupar jan adorjjaña, ukanakaw jukʼamp jan walïspa (Gén. 6:5, 6).

5. ¿Kunatï Leo jilatar paskäna ukat kunsa yateqta?

⁵ Jehová Diosar ajjsartʼirejja, janiw jan wali amigonakampejj chikachaskiti. Ukwa República Democrática del Congo markankir Leo sat jilatajj yateqäna. Pusi maranak bautisatäjjäna ukhajja, jan wali amigonakampiw chikachasiñ qalltäna. Nayatï jan walinak jan lurkäjja, janiw Jehová Dios contrajj juchachaskäti sasaw jupajj amuyäna. Ukampis jan wali amigonakapamp apayasisajj machantasiñ yateqjjäna, qʼañu juchanak lurjjarakïna. Qhepatjja, kuntï Jehová Diosar servir tatap mamapajj yatichkäna ukwa amtasïna, kunja kusisitänsa uks amtasirakïnwa. Ukatwa jupajj kunatï walïki uk wasitat lurañ qalltjjäna, ancianonakan yanaptʼapampejj Jehová Diosan ukar kuttʼjjarakïnwa. Jichhasti wali kusisitaw ancianotsa precursor especialats serviski.

6. ¿Kuna pä kasta warminakatsa yatjjataskañäni?

 ⁶ Jichhajj Proverbios capítulo 9 ukat yatjjatañäni, taqeniw chachanakas warminakas uka capitulot suma yatichäwinak yateqsna. Ukanjja pä kasta warminakatwa parli. Maynejj yatiñampi sasiwa, maynisti jan amuytʼasirïñampi sasirakiwa. c Jutïr parrafonakat yatjjatkasajj ak amtañamawa: Supayan apnaqat aka mundonjja, qʼañu juch lurañasa pornografias waliw utji (Efes. 4:19). Ukatwa Jehová Diosar ajjsartʼaskakiñas jan walinakat jitheqtañas wali importantejja (Prov. 16:6). Yateqkañäni uka pä warminakajja, jan experiencianinakaru jan ukajj ‘jan amuytʼasirinakaruw’ parljjayapjje. Manqtʼasiñatakis utapar invitapkaspa ukhamawa (Prov. 9:1, 5, 6, 13, 16, 17). Ukampis uka pä warmin utanakapar saririnakarojj kunas pasi uk jichhajj uñjañäni.

7. Proverbios 9:13-18 textorjamajj ¿kunas ‘jan amuytʼasir warmin’ invitadonakaparojj pasi? (Dibujo uñjjattʼarakïta).

⁷ Kamsasas ‘jan amuytʼasir warmejj’ utapar inviti uk liytʼañäni (Proverbios 9:13-18 liytʼäta). Jupajj jan phenqʼaniw akham sasin arnaqasi: “¡Khititï jan experiencianïki ukajj akar jutpan!” sasa. Ukham sasaw jan experiencianinakarojj sum manqtʼasipjjañapatak inviti. ¿Utapar mantirinakarojj kunas pasi? ‘Invitadonakapajj Sepultura manqhanakankiwa’. Proverbios libronjja, janiw aka capitulonak ukham warmit parlkiti. Nayrïr capitulonakapanjja, ‘saranukut warmimpit’ ‘qʼañu juchan sarnaqer warmimpit’ amuyasiñasatakiw ewjjtʼistu. Ukan akham sistuwa: “Utapar sarañajja jiwañar sarañampi sasiwa” sasa (Prov. 2:11-19). Proverbios 5:3-10 textonjja, ‘saranukut yaqha warmit’ amuyasiñasatakiw ewjjtʼarakistu. Jupat akham siwa: “Kayunakapajj jiwañaruw saraqapjje” sasa.

8. ¿‘Jan amuytʼasir warmin’ arup istʼirinakajj kuna amtarus puripjjañapa?

⁸ ‘Jan amuytʼasir warmin’ arup istʼirinakajja, utapar jawski uka invitacionar istʼapjjaniti janicha uka amtar puripjjañapawa. ¿Kunapachas jiwasajj uka amtar puriñasäspa? Inas qʼañu jucha lurañataki jan ukajj pornografía uñjañatak yantʼat uñjassna. ¿Ukhamanakan uñjasisajj kuna amtarus puriñäni?

9, 10. ¿Kunatsa qʼañu juchanakan jan sarnaqañasäki?

⁹ Qʼañu juchar jan purtʼasiñatakejj walja wakiskir razonanakaw utji. Proverbios libronjja, ‘jan amuytʼasir warmejj’ akham siwa: “Lunthatat umanakajj mojjsawa” sasa. ¿Uka “lunthatat umanakajj” kunamp sasisa? Casarat mä chacha warmejj ikthapki ukajj mojjsa um umtʼañamp saskaspas ukhamwa Biblian qhanañchi (Prov. 5:15-18). Leyinakarjam casarat mä chacha warmejj  ikthapki ukajj walikïskiwa. Ukampis ‘lunthatat umanakampejj’ janiw pachpäkiti. Ukanakajj Diosan leyinakap pʼakintir qʼañu jucha lurañanakamp sasispawa. Jilapartejja, qʼañu jucha luririnakajj lunthatanakjamaw qʼañu juchanak jamasan lurapjje. Jamasans jan walinak lurapkaspa ukham amuyirinakatakejja, uka “lunthatat umanakajj” wali mojjsäspawa. Ukampis ukham amuyasajj mayni pachpaw engañjasi. Jehová Diosajj taqe kunwa uñji, janiw khitis juparojj engañjkaspati. Diosamp suma uñjatäñ aptʼasiñajj janipuniw akchʼas walïkiti, janiw ukajj kuna mojjsäkisa (1 Cor. 6:9, 10). Ukampis janiw ukakïkiti.

¹⁰ Qʼañu juchan sarnaqerinakajj inas phenqʼasipjjchispa, jupanak pachpas jan munasjjapjjchispati, jan munkasaw wawanïpjjaspa jan ukajj familiapaw tukusispa. Cheqas ‘jan amuytʼasir warmin’ invitacionaparojj janiw istʼañasäkiti, ukhamatwa yatiñanïtas uñachtʼayañäni. Qʼañu juchar purtʼasirinakat waljanejja, janiw Jehová Diosamp sum apasiñak aptʼasipkiti, jan ukasti jiwañar apir jan wali usunak aptasipjjaraki (Prov. 7:23, 26). Proverbios capítulo 9 tuktʼayañatakejja, akham sasaw versículo 18 ukan qhanañchi: “Invitadonakapas Sepultura manqhanakankiwa” sasa. Ukhamajj niyakejjay uka invitacionajj ukham jan walir puriychejja, ¿kunatsa uka invitacionar walja jaqenakajj istʼapjjpacha? (Prov. 9:13-18).

11. ¿Kunatsa pornografía uñchʼukiñajj jan walipunejja?

¹¹ Taqe cheqan utjiri yaqha yantʼajj pornografiawa. Yaqhepatakejj uk uñchʼukiñajj janiw kuna jan walïkisa, ukampis ukajj janiw cheqäkiti. Pornografiajj mayni pachparuw jan waltʼayi, mayni pachpar respetasiñsa yaqhanakar respetañsa chhaqtayiwa, jaytañajj wali chʼamarakiwa. Kuna qʼañunaktï uñjksna ukajja, amuyusat janiw fácil chhaqtkaspati. Pornografiajj janiw jan walinak lurañ munañ chhaqtaykaniti, antisaw ukanak jukʼamp utjayaspa (Col. 3:5; Sant. 1:14, 15). Cheqas pornografía uñchʼukirinakat waljaniw qʼañu jucha lurañar purtʼasipjje.

12. Qʼañu jucha lurañar apir mä videosa jan ukajj yaqha ukhamanakas uñstistaspa ukhajj ¿kunsa lurañasa?

¹² Mä celularana, mä computadorana jan ukajj yaqha ukhamanakan pornografiajj uñstaspa ukhajj ¿kunsa mä cristianojj lurañapa? Jankʼakiw maysar uñtañapa. Uk lurañatakejj ak amtañaw yanaptʼistaspa: taqe kunat sipans Jehová Diosan amigopäñaw jukʼamp importantejja. Maysa toqetjja, jan pornografiat uñjatäki uka fotonaka, videonaka, jan ukajj yaqha ukhamanakaw utjaspa, ukampis ukanakajj jan wali amuyunakwa jiwasan utjayaspa. Janirakiw ukanak uñjañasäkiti. ¿Kunatsa? Kuna laykutejj janiw ni chuymasans adulterio jucha lurañ munktanti (Mat. 5:28, 29). Tailandia markankir David sat mä anciano jilatajj akham siwa: “Nayajj akham sasaw jisktʼasirïta: ‘Akanakajj janis pornografiäkchejja, ¿uñjaskakiñajajj Jehová Diosatak walikïskaspati?’ sasa. Ukham amuytʼasiñaw suma amtanakar puriñatak yanaptʼitu” sasa.

13. ¿Kunas suma amtanakar puriñatak yanaptʼistani?

¹³ Jiwasatï Jehová Diosar chuym ustʼayañ ajjsartʼañäni ukhajja, suma amtanakar puriñajj facilakïniwa. Ukatwa Proverbios 9:10 textojj akham sasin qhanañchi: “Jehová Diosar ajjsarañajj yatiñan qalltapawa” sasa. Ukaw Proverbios capítulo 9 qallta versiculonakapan qhan amuyasi, ukanjja ‘cheqpach yatiñajj’ mä warmimp sasiwa.

14. ¿Kuna yaqha invitacionas Proverbios 9:1-6 texton utji?

¹⁴ (Proverbios 9:1-6 liytʼäta). Uka textonjja, khititï Luririsäki, yatiñ churirïki uka Jehová Diosan mä invitacionapatwa parli (Prov. 2:6; Rom. 16:27). Proverbios libron uka versiculonakapanjja, paqallqo columnanakani mä jachʼa utatwa parli. Ukajj kunja khuyapayasiris Jehová  Diosajj ukwa amuytʼayistu, jupajj khitinakatï yatiñani ewjjtʼanakaparjam sarnaqañ munapki ukanakarojj taqeniruw sum katoqtʼi.

15. ¿Kun lurañatakis Diosajj invitistu?

¹⁵ ‘Cheqpach yatiñamp’ saski uka warmejja, Jehová Diosajj wali khuyaptʼayasirïtapa walja sumanak churirïtapwa uñachtʼayi. Jupan taqe kunaw wakichtʼatäjje: aychasa vinosa wakichtʼatawa, mesapas wakichtʼatarakiwa (Prov. 9:2). Ukhamarus Proverbios 9:4, 5 textonjja, ‘cheqpach yatiñajj’ akham sasaw jan amuytʼasirinakarojj saraki: “Jutapjjam, nayan tʼantʼaj manqʼapjjam” sasa. ¿Kunatsa uka invitacionapar istʼañasa? Jehová Diosajj wawanakaparojj jarkʼaqañwa muni, yatiñ churañ munaraki. Jupajj janiw jan walinakan uñjasis yateqañas munkiti, janirakiw nayra pantjasitanakas laykojj llakita sarnaqañas munkiti. Ukatwa ‘cheqapar sarnaqer jaqenakatakejj Diosajj yatiñ imaski’ (Prov. 2:7). Jiwasatï Diosar ajjsartʼañänejja, juparojj kusisiyañäniwa, yatiñani ewjjtʼanakaparjamaw sarnaqarakiñäni. Ukanak lurasajj kusisitätanwa (Sant. 1:25).

16. Jehová Diosar ajjsartʼatapat ¿kun lurañsa Alan jilatajj amtäna, ukat kunas pasarakïna?

¹⁶ Kunjamsa Jehová Diosar ajjsartʼañajj suma amtanakar puriñatak yanaptʼistu uk jichhajj uñjañäni. Alan sat mä anciano jilatajj profesoratwa mä escuelan trabaji. Jupajj akham siwa: “Profesor masinakajat waljanejja, pornografía uñchʼukiñajj educación sexual toqet yatichañatakejj wal yanaptʼasi sasaw amuyapjje” sasa. Ukampis Alan jilatatakejj ukham amuyañajj kʼarïnwa. Jilatajj kunsa luräna uk akham sasaw qhanañchi: “Jehová Diosar ajjsartʼataj laykojja, nayajj janipuniw uka pornografianak uñchʼukkäti sasaw sayäta. Kunatsa ukanak jan uñchʼukiñ munkayäta ukjja, profesor masinakajarojj sum qhanañchtʼarakiyäta” sasa. Ukhamatwa jupajj “amuytʼasirïñ thaknam sarapjjarakim” sasin ‘cheqpach yatiñajj’ ewjjtʼki ukarjam luräna (Prov. 9:6). Profesor masinakapat yaqhepanakajja, jilatan uka peliculanak jan uñtañ munatapat wal musparapjjäna, ukatwa Bibliat yateqañ qalltapjjäna, tantachäwinakarus sarapjjarakïna.

17, 18. ¿‘Cheqpach yatiñan’ invitacionapar istʼirinakajj kuna bendicionanaksa jichhürunakan katoqapjje, kunsa jutïrin katoqapjjarakini? (Dibujo uñjjattʼarakïta).

¹⁷ Jutïrin kusisit jakasiñasatakejj kun lurañasas uk yatichañatakejja, Jehová Diosajj uka pä warminakatwa parlistu. Khitinakatï ‘jan amuytʼasiri’ jachʼat parliri warmin invitacionapar istʼapki ukanakajja, qʼañu juchanakan sarnaqasaw kusistʼañ munapjje. Jupanakajj jichhürutakwa llakisipjje, kunjamsa jutïrin luratanakapajj jan waltʼayani uk janiw amuyasipkiti. Cheqas luratanakapajj ‘Sepultur manqharuw’ apani (Prov. 9:13, 17, 18).

 ¹⁸ ¡Ukampis ‘cheqpach yatiñan’ invitacionapar istʼirinakajj sumaw jakasipjje! Jupanakajj wali kusisitäpjjewa, kuna laykutejj suma wakichtʼat manqʼar uñtatwa Diosan yatichäwinakap katoqapjje, ukanakajj walja suma manqʼanakar uñtasitawa (Is. 65:13). Jehová Diosajj Isaías profeta toqejj akham siwa: “Sum istʼapjjeta, suma manqʼäkis uk manqʼapjjam, suma manqʼanak manqʼasajj kusisipjjätawa” sasa (Is. 55:1, 2). Kuntï Jehová Diosajj munaski ukar munasiña, kuntï uñiski ukar uñisiñwa yateqasktanjja (Sal. 97:10). Yaqhanakar ‘cheqpach yatiñ’ jikjjatapjjañapatak invitasajj wali kusisitätanwa. Proverbios capítulo 9 ukan parlki uka sirvientanakar uñtasitätanwa, jupanakajj ‘markan alto lugaranakapatwa’ artʼapjje. Jiwasajj jupanakjamarakiw akham sasin artʼastanjja: “¡Khititï jan experiencianïki ukajj akar jutpan!” sasa. Jiwasasa uka invitacionar istʼirinakasa, walja bendicionanakwa jichhürunakan katoqtanjja. Janiw ukakïkiti. Jutïrinjja, walja bendicionanakwa katoqarakiñäni. Jiwasatï “amuytʼasirïñ thaknam” saraskakiñäni ukhajja, wiñayatakiw jakañäni (Prov. 9:3, 4, 6).

19. Eclesiastés 12:13, 14 textorjamajj ¿kunsa lurañasa? (“ Diosar ajjsartʼañajj yanaptʼistuwa” sat recuadro liytʼarakïta).

¹⁹ (Eclesiastés 12:13, 14 liytʼäta). Aka qhepa urunakan jan wali jaqenak taypins jakstanjja, Jehová Diosar ajjsartʼaskakiñasawa. Ukhamatwa chuymas jarkʼaqañäni, qʼañu juchanakat jitheqtañäni, janirakiw Diosats jitheqtkañäniti. Jehová Diosar munasitasatsa taqe chuyma respetatasatsa, ‘cheqpach yatiñ’ thaqasipkakiñapataki, ukjjat yateqasipkakiñapatakiw taqenir invitasipkakiñäni.