Segunda Guerra Mundialajj utjkäna ukhaw tataj mamajajj Estonia markat Alemania markar jakir sarjjapjjatayna, ukanwa nasiyäta. Ukatjja Canadá markaruw jakir sarjjapjjayäta. Ottawa sat marka jakʼanwa jakañ qalltapjjayäta. Wallpanakamp chikaw mä jiskʼa utan jakapjjayäta. Wali probrëpkchiyätsa, juntʼümatakejj kʼawnanïpjjayätwa.

Mä urojja, Jehová Diosan Testigonakapajj Apocalipsis 21:3, 4 texto mamajatak liytʼarapipjjäna. Kuntï yatichapkäna ukajj mamajan chuymaparuw purtʼäna, jachaqtʼasirakïnwa. Tataj mamajajj Bibliat yateqasipkakïnwa, mä qhawqha tiempotjja panpachaniw bautisasjjapjjäna.

Tataj mamajajj jukʼaksa inglés aru yatipkchïnjja, taqe chuymaw Diosar servipjjäna. Tatajajj Sudbury (Ontario) markanwa níquel umatatayañ fabrican trabajïna, awisajj paqaras ukan trabajirïkchïnjja, niya taqpach sabadonakaw Sylvia sullka kullakajampir nayampir predikir irpapjjerïtu. Sapa semanaw familiajampejj Yatiyañataki revistat yatjjatapjjerïta. Tataj mamajajj Jehová Diosar taqe chuym munasiñwa yatichapjjetäna, ukatwa 10 maranïkasajj 1956 maran jakäwejj Diosar katuyasta. Tataj mamajan Diosar wal munasipjjatapaw Diosar serviskakiñatak yanaptʼawayitu.

Colegio tukuyasajj janiw Jehová Diosar serviñ nayrar uchjjayätti. Precursorat servisajj janiw avionat viajiñatakis mundpach uñtʼañatakis qollqenïkäti sasaw amuyayäta. Jakkayäta ukanwa disconak uchas mä radion trabajiyäta, ukajj wal nayar gustitäna. Ukampis niyakejjay jaypʼut arumkam trabajchiyätjja, niya taqpach tantachäwinakatwa chhaqasjjayäta, jilapartejj Diosar jan munasipki uka jaqenakampiw chikachasjjayäta. Qhepatsti, Bibliarjam yatichat concienciajaw cambiañatak yanaptʼitäna.

Oshawa (Ontario) markaruw sarjjayäta. Ukanwa Ray Norman jilatarusa, Lesli kullakaparusa, yaqha precursoranakarus uñtʼayäta. Jupanakajj munasiñampiw katoqtʼapjjetäna, kunja kusisitäpjjänsa uk uñjañaw kunsa jakäwijan luräjja uk amuytʼasiñatak yanaptʼitäna. Jupanakaw precursorat serviñatak chʼamachtʼapjjetäna. Ukatwa septiembre de 1966 maran precursorat serviñ qalltayäta. Nayajj wali kusisitaw jakasiyäta. Ukampis jan suykayäta uka bendicionanakwa katoqayäta, jakäwijan taqe kunaw cambiarakïna.

Colegionkaskayäta ukhajja, Toronto (Canadá) markankir Betelan serviñatakiw mä solicitud phoqantayäta. Qhepatjja, precursoräkayäta ukhaw  Betelan pusi mara serviñatak invitapjjetäna. Ukampis niyakejjay Lesli kullakar wal munasjjchiyätjja, Betelankasajj janiw uñj-jjäti sasaw ajjsarayasiyäta. Diosar wal orasisajj Betelar sarañwa amtayäta, Lesli kullakat wali llaktʼataw despidisjjayäta.

Lavanderianwa Betelan trabajiyäta, qhepat secretariot trabaj-jjayäta. Ukañkamasti Lesli kullakarojj Gatineau (Quebec) markan serviñapatakiw precursora especialat uttʼayapjjäna. Walja kutiw kunsa luraskpacha sasin lupʼirïta, suma amtarut purpachätjja sasaw jisktʼasirakirïta. Ukhamaruw Lesli kullakan Ray jilapajj Betelan serviñatak purinïna, ukajj wali kusiskañänwa, mä cuartonak jakapjjayäta. Lesli kullakampejj wasitatwa parljjapjjayäta. 27 de febrero de 1971 maranwa casarasipjjta, uka urunwa Betelan pusi mara serviñ phoqayäta.

Quebec markankir francés aru parlir mä congregacionaruw asignapjjetäna. Mä qhawqha maranakatjja superintendente de circuitot serviñatakiw invitapjjetäna. Niyakejjay 28 maranïchiyätjja, circuitot serviñatakejj sinti waynäkiristsa janis experiencianïkirista ukhamwa amuyasiyäta. Ukampis Jeremías 1:7, 8 textow wal chʼamañchtʼitäna. Lesli esposajajj walja kutiw automp accidentasitayna, janirakiw sum ikiñ puedkänti, ukatwa kunjamsa circuitot servipjäjja sasin llakisirïta. Ukampis esposajajj akham sitänwa: “Jehová Diosatï mä kun lurañatak invitchistojj ¿janit yantʼañasäkaspa?” sasa. Ukatwa uka asignación katoqasipjjayäta, 17 maranakaw circuitot sirvipjjayäta.

Circuitot servisajj wali ocupatayätwa, Lesli esposajampïñatakis janiw tiemponïrïkti. Ukampis esposajampïñatak tiempo apstʼasiñajj kunja wakiskirisa ukwa yateqayäta. Mä lunes alwajj punkujan timbrepwa tuktʼanipjjäna. Punk llawirta ukhajj janiw khitis ukan utjkänti, mä canastampi mä mantelampikiw utjäna, uka canastan frutampi, quesompi, tʼantʼampi, mä vinompi, copanakampiw utjäna, mä jiskʼa papelar akham sasin qellqtʼatarakïnwa: “Campon manqtʼasiñatak esposamar irpam” sasa. Uka urojj wali sumaw luptʼasinkäna. Ukampis mä qhawqha discursonak wakichtʼasiñajänwa, ukatwa esposajarojj janiw sarañ puedkañäniti sasin sayäta. Jupajj walikiw siskchitänsa, mä jukʼa llaktʼatänwa. Wakichtʼasiñatak qontʼasjjayäta ukhajja, chuymajajj janiw uttʼjjetänti. Ukatsti Efesios 5:25, 28 textot amtasiyäta. ¿Esposajajj kunjamas chuymapan jikjjatasïna uk amuyañajatakit Jehová Diosajj uka textomp amtayaskitäna? Mä oración lurasajja, “sarañäni” sasaw esposajar sayäta. Jupajj wal kusisïna. Jawir jakʼankir mä suma lugararuw autot sarapjjayäta, mantel jantʼaktʼasipjjarakiyäta. Uka urojj wali sum kusistʼapjjayäta. Discursonaks wakichtʼasirakiyätwa.

Columbia Británica markat Terranova markakamajj walja circuitonak visitapjjayäta, wal disfrutapjjarakiyäta. ¡Viajiñ munkayäta ukajj phoqasiskänwa! Awisajj Escuela de Galaad ukar sarañwa piensayäta, ukampis janiw yaqha markan serviñ munkayätti. Misioneröñajj jukʼamp suma jaqenakatakïkaspasa, janis nayatakjamäkaspa ukhamwa amuyayäta. Ukhamarus usunakampi guerranakampi utjki uka Africar khitatäñ ajjsarayätwa. Asignapkitäna ukan kusisitaw serviskayäta.

Nayra Unión Soviética ukankir yaqhep markanakanjja, 1992 maran predicañasa tantachasiñas janiw jarkʼatäjjänti. Ukatwa “¿Estonia markan misionerot serviñ munapjjasmati?” sasin jisktʼapjjetäna. Mä akatjamatwa uk jisktʼapjjetäna, ukampis Jehová Diosaruw orasipjjayäta. Mayampiw akham jisktʼasipjjarakiyäta: “Jehová Diosatï mä kun lurañatak invitchistojj ¿janit yantʼañasäkaspa?” sasa. Uka invitacionarojj iyawsapjjayätwa, chuymajansti akham sarakiyätwa: “Walikïskiwa, janiw Africar sarktanti” sasa.

Jankʼakiw estonio aru yateqañ qalltapjjayäta. Mä qhawqha phajjsinakat circuitot serviñatakiw invitapjjetäna. Países bálticos ukankir kimsa markanakansa Kaliningrado (Rusia) markansa, 46 congregacionanakaru walja gruponakampiruw visitapjjañajäna. Ukatwa letón, lituano, ruso arunakat mä qhawqha yateqapjjañajäna. Nanakatak ukajj chʼamänwa. Ukampis jilat kullakanakajj chʼamachasipjjatajat yuspärapjjetänwa, wal yanaptʼapjjarakitäna. 1999 maranjja, mä sucursalaw Estonia markan utj-jjäna, Toomas Edur, Lembit Reile, Tommi Kauko jilatanakamp chikaw Comité de Sucursalan serviñajatak uttʼayapjjetäna.

Ukanjja markanakapat Siberiar apat walja Testigonakaruw uñtʼapjjayäta. Jupanakajj carcelan wal tʼaqesipjjäna, familianakapats wali jayankapjjänwa, ukampis janiw kunapachas aynachtʼapkänti, kusisitaw taqe chuym predicasipkakïna. Jupanakat akwa yateqapjjayäta: maynejj jan walin uñjaskasas aguantaspawa, kusisitarakïspawa.

Maranakajj ratukiw pasäna, samartʼañatakis janiw tiempo apsusipjjerïkti, ukatwa Lesli esposajajj jan waltʼasajj wal fatigasjjarakïna. Ukhakamajj janiw fibromialgia usunïtap amuyapkayätti. Ukatwa Canadá markar kuttʼjjañ amtapjjayäta. Patterson (Nueva York) markan Comité de Sucursal ukankirinakatak mä escuelar invitapjjetäna ukhajja, janiw ukar sarañ puedipkäti sasaw amuyayäta. Ukampis wal orasisajj iyawsapjjayätwa. Ukham amtapjjatajarojj Jehová Diosajj bendisïnwa. Uka tiemponwa esposajarojj usupat waliptañapatak doctoranakajj yanaptʼapjjäna. Ukhamätapatwa servisipkayäta ukar wasitat kuttʼapjjta.

2008 maran mä arumajja, Estonia markar kuttʼasipkayäta ukhaw central mundialat jawsanipjjetäna, “¿República Democrática del Congo markar servir sarañ munapjjasmati?” sasaw jisktʼapjjetäna. Nayajj janiw kamsirjamäkayätsa, ukhamarus qharurpachaw kuntï amtapkäta uk awisanipjjetäta sasaw sapjjetäna. Uka arum sum iktʼasiñapatakejj janiw Lesli esposajarojj kuns siskayätti. Ukampis kunas Africar sarañatakejj ajjsarayitäna uk paqar arumaw Jehová Diosar awisayäta.

Qhepärmanthejj Lesli esposajaruw awisayäta, jupampejj akham sapjjayätwa: “Jehová Diosajj Africar sarañatakiw invitistu. Janitï yantʼkañänejja, janiw puedkañäniti, janiw disfrutkañäniti sasajj janiw sisksnati” sasa. Ukatwa 16 maranak Estoniankasajj Kinsasa markar avionat sarapjjta. Ukankir sucursalajj mä suma jardinanïnwa, samartʼañatakis sumarakïnwa. Nayraqatajj Lesli esposajajj mä tarjeta  cuartor uchäna, ukjja Canadá markat sarjjapjjta ukhatpachaw imasipjjta, ukan akham sänwa: “Ayruntapktam ukan panqarañamawa” sasa. Jilat kullakanakar uñtʼasasa, yaqhanakar Bibliat yatichasasa, yaqha markan misionerot servisas kunja kusisitas jakasipjjerista ukwa amuyapjjerïta. Tiempompejja África toqenkir 13 sucursalanakaruw visitapjjayäta, ukhamatwa kunayman costumbrenakan markanak uñtʼapjjayäta. Janiw ajjsarjjayätti, África toqer nanakar khitatapat yuspärapjjarakiyätwa.

Kinsasa markan kunayman manqʼanak malltʼayapjjetäna, janipuniw manqʼkiristti sañjamäkäna uka laqʼonakwa manqʼapjjayäta. Ukampis jilat kullakanakar wali sum manqʼer uñjasajj malltʼapjjayätwa, gustapjjarakitänwa.

Markat inti jalsu toqeruw viajipjjta, ukhamat jilat kullakanakar chʼamañchtʼañataki, kunanaktï necesitapkäna ukanak jaytaniñataki. Uka cheqan guerrilleronakaw markanakar atacapjjerïna, warminakarus wawanakarus jan walinak lurapjjerïna. Jilat kullakanakat waljanejj jukʼa utjirinikïpjjänwa. Ukampis jupanakan jiwatat jaktañar suytʼapjjatapasa, Jehová Diosar munasipjjatapasa, Diosan markapat jan jitheqtapjjatapas wali musparkañänwa. Jupanakar uñjañajj kunjamsa Diosar servisipkta uk amuytʼasiñatakisa, jupar wal confiyañatakis wal yanaptʼapjjetäna. Yaqhep jilat kullakanakajj utanakapsa cosechanakaps aptʼasipjjänwa. Cheqas kunanakatï utjkistu ukajj janiw wiñayatakïkiti, mä ratunakwa aptʼassna, antisas Jehová Diosan amigopäñaw jukʼamp importantejja, ukwa ukajj amtayitäna. Sinti jan walinakans uñjasipkchïnjja, jilat kullakanakajj janiw ukanakar sint chuym uchapjjerïkänti. Ukham chuymanïpjjatap uñjañajja, uñjasipkayäta uka jan waltʼäwinakarus usunakarus jan ajjsartʼas saykatañatakiw yanaptʼapjjetäna.

Hong Kong markankir sucursalar servir sarapjjañajatakiw mä akatjamat mayipjjarakitäna. Janipuniw kunapachas Asia toqen jakañ piensapjjerïkti. Ukampis niyakejjay kawkirutï asignapjjetäna ukan Jehová Diosajj munasiñamp yanaptʼapjjchitänjja, uka kutin janiw payachasipkayätti. 2013 maranwa Africat sarjjapjjayäta, munat amigonakajatsa, kuna  sumanakatï ukan utjkäna ukanakatsa jachtʼasisaw despidisipjjayäta.

Hong Kong markan kunjamänisa uk janirakiw yatipkayätti, yaqha markanakat jutir walja jaqenakani markan jakañajj janiw faciläkänti, chino cantonés aru yateqañas wali chʼamänwa. Ukampis jilat kullakanakajj munasiñampiw katoqtʼapjjetäna, uka markan manqʼanakapas wal gustapjjetäna. Sucursalan lurañanakajj waliw utjäna, ukampis utanakas oraqenakas wali jilaw cuestäna. Ukatwa Cuerpo Gobernantejj sucursalan jilaparte oraqenakapsa utanakapsa aljañ amtäna. 2015 maran Corea del Sur markaruw sarjjapjjayäta, ukanwa jichhakamas servisipkta. Aka markan parlaski uka aru yateqañajj chʼamakirakiwa. Janis sum yateqapkstjja, “coreano arut jukʼamp sum parltʼasjjapjjtajja” sasaw jilat kullakanakajj chʼamañchtʼapjjetu.

Machaq amigonakanïñajj janiw faciläkapuniti. Ukampis utar jutapjjañapatak invittan ukhajja, mayninakarojj mä jukʼa tiemponakwa uñtʼasispa, ukwa yateqapjjta. Taqe jilat kullakanakaw chuymanakapan niya kikpakïpjje, Jehová Diosajj taqenir munasiñatakiw lurtʼawayistu, machaq amigonakanïsnawa, taqeniruw munasiraksna (2 Cor. 6:11).

Jehová Diosat yateqasisaw jaqenakar munasiñasa. Diosajj jiwasar munasitapsa, jiwasar yanaptʼataps uñjañasarakiwa. Desanimatäpkayäta ukhasa, mayninakan chuymanakapar purtʼpachätanti janicha sasin jisktʼasipkayäta ukhasa, amigonakajajj chʼamachtʼañatak qellqanipkitäna uka tarjetanaka cartanak wasitat liytʼapjjerïta. Jehová Diosajj oracionanakaj jaysapjjetänwa, munapkayäta ukhas yanaptʼapjjetänwa, chʼamañchtʼapjjetänwa, uk qhanwa uñjapjjayäta.

Taqe aka maranakanjja, wali ocupatäkasas juntüñatak tiempo apstʼasiñajj wali wakiskirïtapwa esposajampejj amuyapjjta. Mayni pachpat lartʼasiñajj wali wakiskirïtapwa amuyapjjarakta, yamas yaqha aru yateqasktan ukhaw ukhamäñajj wakisi. Sapa arumaw kunatï wal gustapkitäna ukat lupʼipjjerïta, Jehová Diosarus ukanakat yuspärapjjerïta.

Cheqas janipuniw misioneröñsa yaqha markanakan jakañsa pienskayätti. Ukampis Jehová Diosan yanaptʼapampejj taqe kunaw phoqasispa, uk uñjañajj wal kusisiyitu. Nayajj Jeremías profetjamarakiw akham sista: “Jehová Dios Tata, [...] jumaw iyawsayistajja” sasa (Jer. 20:7). Jan suyapkayäta uka suma walja bendicionanakwa churapjjetu. ¡Avionat viajiñ munkayäta uks phoqarakiwa! Kawkjanakarutï wawäkasajj avionat sarañ munkayäta ukat sipans jukʼamp lugaranakaruw viajta. Phesqa continentenakankir sucursalanakaruw visitapjjta. Walpun Lesli esposajarojj yuspärta, taqpach asignacionanakajampi phoqañatakejj walpun yanaptʼawayitu, suma chuymanïtapwa uñachtʼayaraki.

Jehová Diosar munasiñatwa taqe kuns lurapjjta, uk amtapjjapuntwa. Kunapachatï Jehová Diosajj amparap jistʼarkani, “kunanaktï taqe jakirinakajj munapki” uk churkarakini ukhajja, wiñay jakasjjañäni ukhajj jichhürunakan katoqtan uka bendicionanakat sipans jukʼamp bendicionanak katoqañäni (Sal. 145:16).