1. Salmo 18:46 textorjamajj ¿kunampis Davidajj Jehová Diosar igualtʼayäna?

 NIYAKEJJAY jan wali pachan jakstanjja, mä akatjamatwa jan waltʼäwin uñjassna, jakäwisajj qʼal cambiarakispa. Ukampis Jehová Diosaruw yanaptʼa mayissna. Pasïr yatichäwinjja, Jehová Diosajj jakkir Diosawa, yanaptʼapunistaniwa sasaw yateqaniwaytanjja. Kunjamtï Davidajj siskänjja, kunjamsa yanaptʼistu uk uñjasajj “¡Jehová Diosajj jakaskiwa!” sasaw jukʼamp confiytanjja (Salmo 18:46 liytʼäta). Ukampis uka arunak arskäna uka qhepatjja, Diosarojj ‘nayan Qarqaja’ jan ukajj ‘nayan Jaqheja’ sasaw Davidajj säna. ¿Kunatsa Davidajj jakkir Jehová Diosarojj jan jakkir mä qarqamp igualtʼayäna?

2. ¿Kunanaksa aka yatichäwin yatjjataskañäni?

² Aka yatichäwinjja, kunatsa Bibliajj Jehová Diosajj mä qarqar uñtasitawa sasin qhanañchi, kunsa jupat yateqsna ukwa yatjjataskañäni. Kunatsa Jehová Diosar mä Qarqasarjam uñjsna, kunjamanakats Jehová Diosat yateqassna ukanakwa yatjjataskarakiñäni.

¿KUNATSA JEHOVÁ DIOSAJJ MÄ QARQAR UÑTASITAJJA?

3. ¿Kamsasas Bibliajj qarqat parli? (Dibujo uñjjattʼäta).

³ Jehová Diosajj kunjam chuymanisa uk amuyañasatakiw Bibliajj mä qarqäkaspas ukham parli. Biblian walja cheqanakanjja, Jehová Diosajj kunja suma chuymanisa uka toqet jachʼañchañatakejj servirinakapajj mä qarqatwa parlapjje. Nayrïr kutejj Deuteronomio 32:4 textonwa Jehová Diosajj “Qarqasawa” sasin parli. Anajj akham sasaw mayisirakïna: “Nanakan Diosaja, jumjam suma uttʼata qarqajj janiw utjkiti” sasa (1 Sam. 2:2). Habacuc profetajj “nayan Qarqaja” sasaw Jehová Diosat sarakïna (Hab. 1:12). Salmo 73 qellqerejja, “Diosaw chuymajar jarkʼaqe, jupaw nayan qarqajajja” sasaw sarakïna (Sal. 73:26). Jehová Diosajj “janiw yaqha Qarqajj utjkiti” sasaw jupa pachpat sarakïna (Is. 44:8). ¿Kunatsa Jehová Diosajj mä qarqar uñtasitajja?  Uk amuyañatakejj kimsa toqet yatjjatañäni, kunjamatsa ‘jiwasan Qarqasäspaʼ uks yatjjatarakiñäniwa (Deut. 32:31).

4. ¿Kunatsa Jehová Diosajj imantasiñatak mä qarqar uñtasitajja? (Salmo 94:22).

⁴ Jehová Diosajj imantasiñasawa. Jallump thayamp sartanki ukhajja, maynejj qarqankir mä jachʼa pʼiyaruw imantasispa. Ukhamarakiw sinti jan walinakan uñjastan ukhajj Jehová Diosajj jarkʼaqestaspa (Salmo 94:22 liytʼäta). Jupamp sum apasiñatakisa wiñayatak mä jan walin jan uñjasiñatakis yanaptʼarakistuwa. Janiw ukakïkiti, jutïrin wiñayatakiw kunanakatï tʼaqesiykistu, sumankañ apaqkarakistu ukanak chhaqtayani (Ezeq. 34:25, 26).

5. ¿Kunsa Jehová Diosar imantasiñatakejj lursna?

⁵ Jehová Diosajj imantasiñasäspawa, ukatakejj orasiñasawa. Orasktan ukhajja, ‘Diosan sumankañap’ katoqtanjja, ukaw chuymassa amuyussa jarkʼaqestu (Filip. 4:6, 7). Artiom jilatat amuytʼañäni, juparojj Diosar confiyatap laykuw carcelar llawintapjjäna. Carcelankkäna ukhajj walja kutiw jupar wal jisksupjjäna, humillapjjarakïnwa. Jilatajj akham siwa: “Sapa kut jisksupkitäna ukhajja, wal sustjasirïta. […] Jehová Diosaruw sumak jikjjatasiñatakisa yatiñsa mayisirïta. Kunjam jisksutpachas Jehová Diosat jan jitheqtañatakiw chʼamachasirïta […]. Jehová Diosarojj jarkʼaqasiñatak mä jachʼa muralläkaspas ukhamwa uñjayäta” sasa.

6. ¿Kunatsa Jehová Diosar confiyapunsna? (Isaías 26:3, 4).

⁶ Jehová Diosajj confiykañawa. Kunjamtï mä jachʼa qarqasa jan ukajj mä qollus lugarapat jan onjjtkejja, ukhamarakiw Jehová Diosajj jiwasar yanaptʼañatakejj jakʼasankapunini. Niyakejjay ‘wiñay Qarqächejja’, juparojj confiysnawa (Isaías 26:3, 4 liytʼäta). Promesanakap phoqañatakisa, oracionanakas istʼañatakisa, jiwasar yanaptʼañatakis Jehová Diosajj wiñayatakiw jakani. Janipuniw servirinakapar jaytjkaniti, taqe chuymaw ukar confiytanjja (2 Sam. 22:26). Diosajj janipuniw luratanakasat armaskaniti, luratasarjamaw pago churarakistani (Heb. 6:10; 11:6).

7. ¿Kunjamsa Jehová Diosar confiyañajj yanaptʼistu? (Foto uñjjattʼarakïta).

⁷ Maysa toqetjja, Jehová Diosan Qarqasäñapatakejj taqe chuymaw jupar confiyañasa. Sinti jan walinakan uñjasktan ukhas jupar istʼañajj wal yanaptʼistu (Is. 48:17, 18). Kunjamsa yanaptʼistu uk sapa kuti uñjasajj jukʼampiw jupar confiytanjja. Ukham confiyañajja, “Jehová Diosakipuniw jan walinak atipjañatakejj yanaptʼistani” sasin jan payachasiñatakiw yanaptʼistu. Awisajj mä jan waltʼäwin uñjasktan ukhajj janiw khiti yanapiris utjkaspati, ukampis Jehová Diosajj jiwasar yanaptʼaskatapa, jiwasampipunïskatapwa amuyassna. Vladímir jilatajj akham siwa: “Carcelankasaw Jehová Diosar jukʼamp jakʼachasiyäta. Sapak carcelar llawintapjjetäna, janirakiw misturjamäkayätti, ukatwa Jehová Diosar jukʼamp confiyañ yateqayäta” sasa.

8. 1) ¿Kunatsa Jehová Diosajj janiw cambykiti sasin sistanjja? 2) Jehová Diosar mä Qarqasarjam uñjañajj ¿kunjamsa yanaptʼistu? (Salmo 62:6, 7).

 ⁸ Jehová Diosajj janiw cambykiti. Jehová Diosajj mä jachʼa qarqaru jan ukajj mä qollur uñtasitaw jan cambykiti ni onjjtkarakisa. Jupajj pachpakïskiwa, amtanakaps janipuniw mayjtʼaykiti (Mal. 3:6). Adanampi Evampejj Jehová Dios contra saytʼapkäna ukhajja, kuntï Diosajj jaqenakatak amtkäna uk janiw mayjtʼaykänti. Jehová Diosajj janiw “amtap contrajj saytʼkaspati” sasaw apóstol Pablojj säna (2 Tim. 2:13). Ukhamajj kunas kunäskpan jan ukajj kuns jaqenakajj lurasipkpan, amtanakapsa leyinakaps janiw mayjtʼaykaniti. Ukanak yatiñajja, jan waltʼäwinakan uñjaskañäni ukhajj “jupajj yanaptʼapunistaniwa, kuntï jutïritak arsuwayki ukanaks phoqapuniniwa” sasin confiyañatakiw yanaptʼistu (Salmo 62:6, 7 liytʼäta).

9. ¿Kunsa Tatiana kullakan experienciapat yateqta?

⁹ Jehová Diosar mä qarqasarjam uñjañatakejja, jupajj kunjam chuymanisa, aka oraqetakis jaqenakatakis kuna amtanisa uka toqet lupʼiñasarakiwa. Ukaw sinti jan walinakan tranquilokïñatakisa jan sint llakisiñatakis yanaptʼistani (Sal. 16:8). Ukaw Tatiana kullakampejj pasäna, jupajj Diosar confiyatap laykuw utapan arrestat uñjasïna. Kullakajj akham siwa: “Sapak utajar llawintapjjetäna” sasa. Ukatsti sarakiwa: “Qalltan walpun llakisiyäta, walja kutirakiw desanimasiyäta” sasa. Kullakajj Jehová Diosampita, Diosan aka oraqetak amtapampitwa lupʼïna, ukaw kunatsa uka yantʼan aguantañapajj wali wakiskirïna uk amuyañatak yanaptʼäna. Ukarakiw jan sint llakisiñatak yanaptʼäna, Diosat jan jitheqtañatakis chʼam churarakïna. Kullakajj akham saskakiwa: “Ukhamatwa kunatsa llawintat uñjasiyäta uk amuytʼasiyäta, kunatï Diosar gustki uk lurañwa munarakta. Ukaw naya pachpatak jan sint llakisiñatak yanaptʼitäna” sasa.

10. Jehová Diosajj Qarqajawa sañatakejj ¿kunas yanaptʼiristam?

¹⁰ Akat jukʼampirojj sinti jan walinakaw utjani, Jehová Diosar jukʼamp confiyañaw wakisirakini. Ukhamajj jichhatpachaw “jupaw aguantañatakisa jupat jan jitheqtañatakis kuntï necesitkä uk churitani” sasin confiyañasa. ¿Kunas ukatakejj yanaptʼiristam? Biblian utjki uka sarnaqäwinaka, jilat kullakanakan experiencianakapwa liytʼañama. Liytʼasajj lupʼiñamarakiwa, kunjamsa Jehová Diosajj mä qarqätap servirinakapar uñachtʼayäna uks amuyañamarakiwa. Ukaw Jehová Diosajj Qarqajaw sañatakejj yanaptʼätam.

JEHOVÁ DIOSAT YATEQASIPJJAÑÄNI

11. ¿Kunatsa Jehová Diosat yateqasiñasa? (“ ¿Kunsa wayna jilatanakajj lurapjjaspa?” sat recuadro liytʼarakïta).

¹¹ Kunatsa Jehová Diosajj mä qarqar uñtasitawa sasin sissna ukanakat mä qhawqhanak yatjjataniwayjjtanwa. Jichhajj kunjamsa jupat yateqassna ukwa yatjjatarakiñäni. Jupjam chuymanïñatak chʼamachasisajja, congregacionankir  jilat kullakanakarojj jukʼampiw yanaptʼañäni. Ak amuytʼañäni, Jesusajj Cefas sutimpiw Simonar uchäna (Cefas sutejj “Pedro” sañ muni), ukajj “qarqat kʼutaqat qala” sañ muni (Juan 1:42). Uka suti uchasajja, “Pedrow congregacionar chʼamañchtʼani, Diosar confiyapjjañapatakis yanaptʼani” sañwa Jesusajj munaskäna. Bibliarjamajja, ancianonakajj “mä jachʼa qarqan chʼiwipar” uñtasitäpjjewa, jilat kullakanakaruw jarkʼaqapjjaraki (Is. 32:2). Cheqas taqeniw Jehová Diosat yateqasisajj suma chuymanïsna, ukat qarqanakjamarakiw congregacionankirinakarojj Diosar confiyapjjañapatak yanaptʼsna (Efes. 5:1).

12. ¿Kunsa mä imantasiñar uñtasitäñatakejj lursna?

¹² Mä imantasiñar uñtasitäñamawa. Jilat kullakanakatï mä desastre natural utjatapat utap aptʼasipjjani jan ukajj guerranak utjatapat utap jaytapjjani ukhajja, utasaruw katoqtʼsna. Aka ‘qhepa urunakajj’ jan walit jukʼamp jan waliruw saraski, ukhamajj maynit maynikam yanaptʼasiñatakejj jukʼamp oportunidadanakaw utjani (2 Tim. 3:1). Maysa toqetjja, jilat kullakanakasar munasiñamp uñjtan, Diosar servisipkakiñapatakis yanaptʼaraktan ukhaw mä imantasiñar uñtatätanjja. Ukatakejj munasiñampiw jupanakar Salonan katoqtʼañasa, ukhamatwa taqenin kusisitäpjjañapatakisa, munasiñ utjañapatakis yanaptʼañäni. Jichhürunakan jaqenakajj janiw munasiñamp uñjasjjapjjeti. Ukhamajj jilat kullakanakajj tantachäwinakan seguro ukat munata jikjjatasipjjaspa ukwa muntanjja.

13. ¿Kunjamsa ancianonakajj mä imantasiñar uñtasitäpjjaspa? (Foto uñjjattʼarakïta).

¹³ Jan waltʼäwinakan uñjasir jilat kullakanakatakejj ukhamarakiw ancianonakajj mä imantasiñar uñtasitäpjjaspa. Kunapachatï desastres naturales ukajj utjki jan ukajj maynin jankʼak qollayasiñapajj wakiski ukhajja, jilat kullakanakar yanaptʼañatakejj jankʼakiw kuns  lurapjje. Ancianonakajj Bibliampiw jilat kullakanakar yanaptʼapjje, chʼamañchtʼapjjaraki. Jupanakatï mä ancianon munasirïtapa, sinttʼasirïtapa, istʼañatakis jankʼakïtap amuyapjjani ukhajja, juparuw yanaptʼa mayiñatakejj thaqapjjaspa. Ukham chuymanïpjjatapat jilat kullakanakajj wali munataw jikjjatasipjje, Bibliamp ewjjtʼatas jankʼakiw ukarjam lurapjjani (1 Tes. 2:7, 8, 11).

14. ¿Kunsa jiwasar confiyapjjañapatakejj lursna?

¹⁴ Confiykayäñamawa. Cheqas yanaptʼa munapkani ukhajj jiwasar yanaptʼa mayipjjestaspa uk taqeniw muntanjja (Prov. 17:17). ¿Kunsa jiwasar confiyapjjañapatakejj lursna? Jehová Diosjam suma chuymanïñatakiw sapür chʼamachasiñasa, ukatakejj inas arsutas phoqañatakisa horasapar puriñatakis chʼamachassna (Mat. 5:37). Maynitejj yanaptʼa necesitani ukhajja, jankʼakiw yanaptʼañasaraki. Ukhamarus mä asignación churapkistani ukhajja, instruccionanakarjam lurañatakiw chʼamachasiñasa.

15. Ancianonakajj confiykañäpki ukhajj ¿kunjamsa congregacionankirinakajj beneficiasipjje?

¹⁵ Ancianonakajj confiykañäpki ukhajja, congregacionankirinakajj kunaymanitwa beneficiasipjje. Jilat kullakanakajj ancianonakar jan ajjsartʼas mä kun mayiñatak jawsapjje ukhajja, jilat kullakanakan suma uñjatäpjjañapatakiw  yanaptʼi. Ancianonakajj jilat kullakanakar yanaptʼañatak jankʼakïpjje ukhajja, jilat kullakanakajj wali munataw jikjjatasipjje. Kunapachatï jupanakajj amuyuparjamak ewjjtʼañat sipans Bibliarjama, qellqatanakasarjam ewjjtʼapki ukhajja, jilat kullakanakajj jupanakar confiyapjjarakiwa. Ancianonakajj jupanakaruk awistʼasipki ukanak jan yaqhanakar yatiyapki, arsutaps phoqapjjaraki ukhajja, jilat kullakanakajj jukʼampiw jupanakar confiyapjje.

16. Kunatï Jehová Diosatak walïki uk lurañajj ¿kunjamsa yanaptʼistu, ukat kunjamsa mayninakar yanaptʼaraki?

¹⁶ Kunatï Jehová Diosatak walïki uk lurañamawa. Jiwasatï Jehová Diosar taqe kunan istʼañäni, Biblian wiñay yatichäwinakaparjam taqe kuns amtarakiñäni ukhajja, mayninakatakejj yateqaskayäñäniwa. Jiwasatï Bibliat yatjjatasin Diosar jukʼamp confiyañäni ukhajja, janiw jupat jitheqtkañäniti, leyinakaps phoqarakiñäniwa. Janiw payachaskañäniti, akapachan utjir kʼari yatichäwinakats amuyasiñäniwa, janirakiw ukanakamp apayaskañäniti (Efes. 4:14; Sant. 1:6-8). Ukhamarus Jehová Diosampiru promesanakapampir confiytan ukhajja, jan wali yatiyäwinak katoqasas janiw aynachtʼktanti (Sal. 112:7, 8). Jan walinakan uñjasipki ukanakarus yanaptʼaraktanwa (1 Tes. 3:2, 3).

17. ¿Kunjamsa ancianonakajj congregacionankirinakar yanaptʼapjje?

¹⁷ Ancianonakajj janiw kunans jiljapjjañapäkiti, wali amuyumpiw kuns lurapjjañapa, amuytʼirïpjjañapawa, taqe kuns suma lurirïpjjañapawa. ‘Diosan cheqa arunakaparjam yatichasajja’, congregacionankirinakaruw tranquilokïpjjañapataki, Diosar confiyapjjañapatak yanaptʼapjje (Tito 1:9; 1 Tim. 3:1-3). Ancianonakajj yateqaskañäpjje, jilat kullakanakarus sum uñjapjjaraki ukhajja, tantachäwinakat jan faltasipjjañapataki, predicacionar mistupjjañapataki, Bibliat sapak yatjjatapjjañapatakiw jupanakar yanaptʼapjje. Jilat kullakanakajj jan waltʼäwin uñjasipjjatapat wal llakisipjje ukhajja, ancianonakajj Jehová Diosampiru promesanakapampir confiyapjjañapatakiw yanaptʼapjje.

18. ¿Kunatsa Jehová Diosar jachʼañchañsa jakʼapankañsa muntanjja? (“ ¿Kunjamsa Jehová Diosar jakʼachassna?” sat recuadro liytʼäta).

¹⁸ Jehová Diosajj kunja suma chuymanisa uk yatjjatasajja, Davidjamarakiw “Jehová Diosaw nayan Qarqajajja, jupajj jachʼañchatäpan” sasin sistanjja (Sal. 144:1). Jehová Diosarojj confiytanwa, jutïrins confiyaskakiñäniwa. “Jehová Diosajj jakʼapankañatakejj yanaptʼapunitaniwa” sasaw wali jilïrëjjasas confiyaskakiñäni. Ukhamajj taqe chuymaw “jupaw nayan Qarqajajja” sasin sissna (Sal. 92:14, 15).