1. Mateo 24:9 textorjamajja, ¿akapachajj uñiskistu ukhajj kunatsa jan mayjtʼasiñasäki?

JEHOVÁ DIOSAJJ munañataki, munatäñatakiw lurawayistu. Ukatwa uñisitajj chuym ustʼayastanjja, sustjasiraktanjja. Europa cheqankir Georgina sat kullakajj akham siwa: “14 maranïskayäta ukhajja, Diosar servitajatwa mamitajajj uñisitäna. Ukatwa wal llakisiyäta sapakiw jikjjatasirakiyäta, jan suma jaqëpachätwa sasaw amuyasiyäta” sasa. * Danilo jilatajj akham sarakiwa: “Soldadonakajj Testigötajat nuwjapjjetäna, insultapjjetäna, ajjsarayapjjetäna ukhajja, sustjasiyätwa jiskʼachataw amuyasiyäta” sasa. Jaqenakajj uñisipjjestu ukajj wal chuym ustʼayistu, ukampis janiw mayjtʼasktanti, kunattejj uñisitaw uñjasipjjäta sasaw Jesusajj säna (Mateo 24:9 liytʼañataki).

2, 3. ¿Kunatsa akapachajj uñisistu?

² Akapachajj kunjamtï Jesusar uñiskänjja, ukhamarakiw ‘jan akapachankirïtasat’ uñisistu (Juan 15:17-19). Gobiernonakar respetkstansa, janiw politicar mitisktanti, banderarus aruntktanti ni himno nacionalsa cantktanti. Jehová Diosarukiw adortanjja. Supayampi arkirinakapampejj Jupa conträpkchisa, Diosakiw jaqenakar gobernañatakejj derechoni sasaw arjjattanjja (Gén. 3:1-5, 15). Reinopakiw taqe jan walinak askichani, enemigonakaparus niyaw tukjani sasaw predicaraktanjja (Dan. 2:44; Apoc. 19:19-21). Ukajja, llampʼu chuymaninakatakejj  suma yatiyäwiwa, jan wali jaqenakatakisti jan wali yatiyäwiwa (Sal. 37:10, 11).

³ Akapachajj Diosan leyinakaparjam sarnaqatasatwa uñisirakistu, Diosan leyinakapajj kunjamatï akapachankir jaqenakajj sarnaqapki uka contrawa. Sañäni, jaqenakajj qʼañu juchanak lurañajj walikïkaspas ukhamwa uñjapjje, uka pachpa juchanakatwa Diosajj Sodoma, Gomorra markanakarojj tʼunjäna (Jud. 7). Qʼañu juchanakan sarnaqañat sipansa, Biblian yatichäwiparjamaw sarnaqtanjja, ukatwa jaqenakajj jiskʼachapjjestu, suma sum tukurïpjjtawa sasin sapjjarakistu (1 Ped. 4:3, 4).

4. Jaqenakajj uñisipjjestani ukhajj ¿kunjam jaqëñas aguantañatak yanaptʼistani?

⁴ Jaqenakajj uñisipjjestani toqepjjestani ukhajj ¿kunjam jaqëñas aguantañatak yanaptʼistani? Diosaw yanaptʼitani sasin confiyañaw yanaptʼistani. Diosar confiyañajj mä escudomp sasiwa, ukaw ‘Supayan aqkir flechanakap jiwarayañatak’ yanaptʼistu (Efes. 6:16). Janiw ukakïkiti, munasirïñaw yanaptʼarakistu. ¿Kunatsa? Munasir jaqejj ‘janiw jankʼak coleraskiti’, amukiw taqe kunsa tʼaqesi, aguantaraki (1 Cor. 13:4-7, 13). Kunjamsa Jehová Diosaru, jilat kullakanakaru, enemigonakasar munasiñajj uñisipkistu uk aguantañatak yanaptʼistu uk jichhajj uñjañäni.

5. ¿Kunsa Awkipar munasitap laykojj Jesusajj luräna?

⁵ Enemigonakapajj janïr jiwaykäna uka arumajja, Jesusajj jupat jan jitheqtir arkirinakaparojj akham sänwa: “Kunjamtejj alajjpachankir Awkejj siskitu ukarjamaw nayajj luraskta, ukhamat akapachajj Awkir munasitaj yatiñapataki” sasa (Juan 14:31). Jesusajj Awkipar munasitap laykuw kuna jan walinakantï uñjaskäna uk aguantäna. Jiwasarojj Diosar munasiñaw aguantañatak yanaptʼarakistani.

6. Romanos 5:3-5 textorjamajja, ¿akapachajj uñiskistu ukhajj kunjamas jikjjatastanjja?

⁶ Diosan servirinakaparojja, Jupar munasiñaw arknaqat uñjaskasajj aguantañatak nayratpachas yanaptʼawayi. Sañäni, judionakan jachʼa tribunalapajj jan predicapjjañapatak apostolonakar jarkʼkäna ukhajja, Diosar munasiñaw ‘jaqenakar istʼañat sipansa Jupar istʼañatak’ yanaptʼäna (Hech. 5:29; 1 Juan 5:3). Gobiernonakampi arknaqat uñjasipki uka jilat kullakanakarojja, Jehová Diosar munasiñarakiw Jupat jan jitheqtañatak yanaptʼawayi. Akapachajj uñiskistu ukhajj janiw aynachtʼktanti, kusisitakïsktanwa (Hech. 5:41; Romanos 5:3-5 liytʼañataki).

7. Familiasajj Diosar serviñat jarkʼkistu ukhajja, ¿kunsa lurtanjja?

⁷ Familiasajj Diosar serviñat jarkʼkistu ukhaw aguantañajj jukʼamp chʼamäspa. Jehová Diosar uñtʼañ munatas amuyapjje ukhajja, engañjayasksnasa, loqheksnasa ukhamwa piensapjjaspa (Marcos 3:21 uñjjattʼarakïta). Inas toqepjjchistaspa nuwañ kun munapjjchistaspa. Ukampis janiw mayjtʼasiñasäkiti, “jaqen enemigopajj pachpa utapatwa sartani” sasaw Jesusajj säna (Mat. 10:36). Familiasajj uñisipkistpansa janiw jupanakar kunäkipansa uñisktanti. Antisas Diosar jukʼamp munasisajja, jukʼampirakiw mayninakar munastanjja (Mat. 22:37-39). Ukampis jaqemp sumat uñjatäñ laykukejj janipuniw Diosan leyinakapsa ni Biblian wiñay yatichäwinakapsa pʼakintkañäniti.

8, 9. ¿Kunas mä kullakarojj jarkʼata uñjaskäna ukhajj Diosat jan jitheqtañatak yanaptʼäna?

⁸ Párrafo 1 ukan Georgina kullakatwa parlaniwaytanjja, jupajj mamitapan jarkʼatpachas janipuniw Diosat jitheqtkänti. Jupajj akham siwa: “Mamitajamppachaw Testigonakamp Bibliat yatjjatañ qalltapjjta. Ukampis sojjta phajjsinakatjja, tantachäwinakaruw sarañ  munjjayäta, mamitajajj jarkʼjjetänwa. Jupajj apostatanakampiw chikachasiskatayna, kuntï sapkäna ukwa nayar sarakitäna. Jupajj toqjjetänwa, ñikʼutatwa jiyanoqetäna, kunkat kunwa qʼaptʼitäna, qellqatanaksa basuraruw jaqontarapitäna. 15 maranïkasaw bautisasta. Diosar jan sirvjjañajatakejja, mamitajajj munañaparjam taqe kuns lurir wayn tawaqonakar yanaptʼañatak utjkäna uka utaruw apitäna. Ukanjja, yaqhepanakajj drogasipjjänwa jan walinakwa lurapjjarakïna. Jiwasar munasiñapäki cuidañapäki uka familiasajj Diosar serviñat jarkʼistu ukhajja, aguantañajj jukʼamp chʼamawa” sasa.

⁹ Kunas aguantañatak yanaptʼäna uka toqet parlkasajj Georgina kullakajj akham siwa: “Mamitajajj naya contra saytʼkäna ukürurakiw Biblia taqpach liyiñ tukuyjjayäta. Kuntï yateqkayäta ukajj cheqäskapunitapat janiw pächaskayätti, Jehová Diosar jukʼamp jakʼachasitajwa amuyasiyäta. Sapa kutiw orasiyäta, Jupasti istʼarakitänwa. Uka utan jakkayäta ukhaw mä kullakajj utapar invittʼitu, panijaw Bibliat yatjjatapjjayäta. Jilat kullakanakajj uka tiempon wal chʼamañchtʼapjjetäna. Jupanakan familiapäkiristsa ukhamaw amuyasiyäta. Cheqas Diosaw enemigonakasat sipan jukʼamp chʼamanejja, uk qhanwa uñjawayta” sasa.

10. ¿Kunatsa jan pächasktanjja?

¹⁰ Pablojja, janiw kunas “Diosan munasiñapat apaqkistaspati, Cristo Jesús Tatitus taypiw Diosajj munasistu” sasaw qellqäna (Rom. 8:38, 39). Awisajj tʼaqeskchiñänisa, Jehová Diosajj janipuniw jaytanukkistaniti. Jupaw chuymachtʼistani chʼamañchtʼarakistani. Kunjamtï Georgina kullakat yateqktanjja, jilat kullakanakas toqew Diosajj yanaptʼarakistani.

11. Jesusajj Juan 15:12, 13 texton munasirïñat parlkäna ukajj ¿kunjamsa discipulonakapar yanaptʼaspäna?

¹¹ Janïr jiwayatäkäna uka arumajja, Jesusajj maynit maynikam munasipjjañapatakiw discipulonakapar amtayäna (Juan 15:12, 13 liytʼañataki). Ukaw mayachtʼatäpjjañapataki, akapachankir jaqenakan uñisitäkasas aguantapjjañapatak yanaptʼañapäna, ukwa Jesusajj yatïna. Tesalonicankir congregacionajj qalltatpachaw arknaqat uñjasipjjäna. Ukampis uka cristianonakajj munasirïpjjatapata, Diosar jan jitheqtas servirïpjjatapat wali yateqaskayäpjjänwa (1 Tes. 1:3, 6, 7). Pablojja, jupanakan ‘munasiñanakapajj jukʼampi utjaskakiñapatakiw’  chʼamañchtʼäna (1 Tes. 4:9, 10). Ukham munasiñaw llakitanakar chuymachtʼañatakisa, jan chʼamaninakar yanaptʼañatakis chʼamañchaspäna (1 Tes. 5:14). Jupanakajj Pablon ewjjtʼaparjamaw lurapjjäna, ukatwa niya mä mara qhepat payïr cartapan jupanakar akham säna: ‘Maynit maynikam munasiñanakamajj jukʼampiw jiljjattaski’ sasa (2 Tes. 1:3-5). Cheqas munasirïpjjatapaw jan waltʼäwinak aguantañatakisa, arknaqat uñjasipkäna uk aguantañatakis yanaptʼäna.

12. Mä markan ¿kunjamsa jilat kullakanakajj guerra utjkäna ukhajj munasiñ uñachtʼayasipjjäna?

¹² Nayrïr parrafon parlaniwayktan uka Danilompiru esposapampirojj kunas pasäna uk uñjañäni. Markapan guerrajj utjkäna ukhajja, tantachäwinakar sarasipkakïnwa, predicañatakis chʼamachasisipkakïnwa, manqʼañanakapatsa jilat kullakanakar churasipkakïnwa. Mä urojj armantat soldadonakaw utapar purinipjjäna. Jupajj akham siwa: “Diosar serviñ jaytjjañajatakiw obligañ munapjjetäna. Ukampis jan munatajat nuwjapjjetänwa, pistolampiw disparapkitaspas ukham lurapjjäna, ukampis pʼeqe patäj toqerukiw disparapjjäna. Esposamar violañatakejj kuttʼanipjjäwa sasaw janïr sarkasajj ajjsarayapjjetäna. Uk yatisajja, jilat kullakanakajj jankʼakiw trenat yaqha markar khitjjapjjetäna. Munasiñampiw uñjapjjetäna, uk janipuniw armaskäti. Yaqha markar puripjjayäta ukhasti, ukankir jilat kullakanakaw manqʼa churapjjetäna, uta, trabajo jikjjatañatakis yanaptʼapjjarakitänwa. Mä qhawqha tiempotjja, nanakajj ukhamarakiw guerra utjipan markapat escapanir jilat kullakanakar katoqapjjayäta” sasa. Cheqas uñisipkistu ukhajj jilat kullakanakan munasiñapaw aguantañatak yanaptʼistaspa, ukwa uka experiencianakajj uñachtʼayistu.

13. Jaqejj uñiskistu ukhajj ¿kunjamsa espíritu santojj Jehová Diosar serviskakiñatak yanaptʼistu?

¹³ Jesusajj enemigonakamar munasipjjañamawa sasaw sistu (Mat. 5:44, 45). Cheqas ukajj chʼamakiwa, ukampis espíritu santon yanaptʼapampejj enemigonakasar munassnawa. Espíritu santon achupat yaqhepajja, munasiña, paciencianïña, khuyapayasirïña, suma chuymanïña, llampʼu chuymanïña, munañasampi jan apnaqayasiña ukanakawa, ukaw uñisipkistu uk aguantañatakejj yanaptʼistu (Gál. 5:22, 23). Diosar serviñ jarkʼirinakat waljanejja, esposapana jan ukajj esposopana,  wawapana, vecinopan ukham jaqëtap laykuw cambiawayapjje. Yamas yaqhepanakajj Testigöjjapjjewa. Ukhamajja, Diosar servitasat uñisipkistu ukanakar munasiñajj chʼamächi ukhajja Jehová Diosaruw espíritu santop mayisiñasa (Luc. 11:13). Kuntï Diosajj siski ukar istʼañapuniw taqe kunat sipansa jukʼamp wakiskirejja, uk janipun armapjjañäniti (Prov. 3:5-7).

14, 15. Romanos 12:17-21 textojj ¿kunjamsa mä kullakarojj esposopar munasiñampi uñjañatak yanaptʼäna?

¹⁴ Oriente Medio toqenkiri, Yasmín sat kullakat amuytʼañäni. Testigöjjäna ukhajja, esposopajj engañapkaspas ukham amuyasajj Diosar jan serviñapatakiw jarkʼäna. Jan wali arunakampiw toqjjäna, familiaranakaparu, mä religión pʼeqtʼiriru, mä layqampiruw esposapar ajjsarayañapataki, familiarus tʼaqjtaykaspa ukham amuyayañapatak mayïna. Mä kutejja, tantachäwir sarasaw jilat kullakanakar toqjjäna. Yasmín kullakajj jan wal luratajj walja kutiw jachäna.

¹⁵ Tantachäwinakan jilat kullakanakaw chuymachtʼapjjäna, chʼamañchtʼapjjarakïna. Jilïr irpirinakasti, Romanos 12:17-21 (liytʼañataki) textorjam lurañapatakiw ewjjtʼapjjäna. Yasmín kullakajj akham siwa: “Bibliajj kuntï siski ukar istʼañajj chʼamakïnwa, ukampis Diosaruw yanaptʼa mayisiyäta, ukatsti Bibliarjam lurañatakiw chʼamachasiyäta. Esposojajj cocin piso aleqat qʼañuchirïna ukhajj nayaw qʼomachirïta; jiskʼachatajj suma chuymampiw uñjayäta, usuntirïna ukhajj nayaw cuidirïta” sasa.

16, 17. ¿Kunsa Yasmín kullakat yateqsna?

¹⁶ Munasiñampi uñjatapajj kunjamsa esposopan cambiañapatak yanaptʼäna uka toqet Yasmín kullakajj akham siwa: “Esposojajj jan kʼarisirïtaj amuyasajja, jukʼampiw confiyjjetäna. Religionat parlapjjerïta ukhajja, respetompiw istʼirïtu, utan sumankañ utjañapatakis chʼamachasirakïnwa. Jichhajj tantachäwinakar sarañajatakis chʼamañchʼarakituwa. Nayrat sipan jukʼamp sumwa apasjjapjjta, sumaw jakasjjapjjarakta. ‘Mä urojj Diosan cheqa yatichäwinakap istʼjjaniwa, jupampiw Jehová Diosar sirvjjapjjä’ sasaw suytʼaskta” sasa.

¹⁷ ‘Munasir jaqejj taqe kunansa amukiw tʼaqesi, suytʼi, taqe kun aguanti’, ukwa Yasmín kullakan experienciapajj uñachtʼayistu (1 Cor. 13:4, 7). Uñisiñajj chʼamaniwa, ukampis munasiñajj jukʼamp chʼamaniwa. Uñisiñajj maynin chuymap wal usuchjaspa, ukampis munasiñajj qollaspawa, ukhamatwa maynejj jan jiwas contrajjaspati. Mayninakar munasiñamp  uñjtan ukhajja, Jehová Diosaruw kusisiytanjja. Ukhamajja, Diosar serviñat jarkʼapkistu ukanakajj uñisiskakchistanisa, kusisitakïsksnawa, uk jichhajj uñjañäni.

18. Uñisitäkasas ¿kunatsa kusisitakïsksna?

¹⁸ ‘Jaqenakajj uñisipjjätam ukhajj kusisiñanïpjjtawa’ sasaw Jesusajj säna (Luc. 6:22). Cheqas janiw jaqen uñisitäñ thaqktanti ni Diosar servitas layku tʼaqesiyatäñsa munktanti. Ukhamajj ¿kunatsa uñisitäkasas kusisitakïsksna? Maya, aguantktan ukhajja, Diosamp sumat uñjatätanwa (1 Ped. 4:13, 14). Paya, Diosar jukʼampiw confiytanjja (1 Ped. 1:7). Kimsa, wiñay jakañwa katoqañäni, ukajj wali valoraniwa (Rom. 2:6, 7).

19. ¿Kunatsa apostolonakajj jawqʼjat uñjaskasas kusisitakïsipkäna?

¹⁹ Jesusajj jaktanjjäna uka qhepatjja, kuna kusisiñattï parlkäna, uka kusisiñwa apostolonakapajj jikjjatapjjäna. Jupanakar jawqʼjapkchïnsa, Jesusan sutipjjar janiw parlapjjätati sapkchïnsa, kusisitakïsipkänwa. ¿Kunatsa? “Jesusan sutip layku phenqʼachat uñjasipjjatapatjja Diosajj wali sum jupanakar uñjäna” (Hech. 5:40-42). Jesusar jukʼamp munasipjjatap laykojj janiw enemigonakapan uñisitäñ ajjsarapkänti. Ukatwa suma yatiyäwinak ‘sapüru’ yatiyasipkakïna. Jichhürun ukhamarakiw jilat kullakanakajj jan walinakan uñjaskasas Diosar jan jitheqtas servisipkaki. Jehová Diosajj janiw luratanakapatsa ni sutipar munasipjjatapatsa armaskaniti, ukwa jupanakajj yatipjje (Heb. 6:10).

20. ¿Kunsa akjjar jutki uka yatichäwin yatjjataskañäni?

²⁰ Aka jan wali pachan tukusiñapkamajja, jaqenakajj uñisisipkakistaniwa (Juan 15:19). Ukampis janiw ajjsarañasäkiti. Kunjamtï akjjar jutki uka yatichäwin yatjjatkañänejja, Diosaw jupat jan jitheqtir servirinakaparojj chʼamañchtʼani, jarkʼaqarakini (2 Tes. 3:3). Ukhamajj Jehová Diosaru, jilat kullakanakaru, enemigonakasar munasisipkakiñäni. Ukham lurañäni ukhajj mayachtʼatäñäniwa, Diosarus jukʼampiw confiyañäni, jachʼañcharakiñäniwa, munasiñajj uñisiñat sipan jukʼamp chʼamanïtapwa uñachtʼayarakiñäni.