1, 2. ¿Khitinakas Bibliat yateqerirojj bautisasiñapatak yanaptʼaspa?

FIYI sat markan jakiri, Amy sat mä kullakajj akham siwa: “Kuntï Bibliat yateqaskayäta ukajj wal gustitäna, cheqapunïskatapatsa janirakiw pächaskayätti, ukampis janiw cambiykayätti. Jilat kullakanakampi chikachasiñaw cambiañatakisa bautisasiñatakis yanaptʼawayitu” sasa. ¿Kunsa ukat yateqsna? Bibliat yateqerinakajja, jilat kullakanakan yanaptʼapampiw nayrar sartapjjaspa, bautisasiñsa amtapjjarakispa.

² Congregación jiltañapatakejj taqe publicadoranakaw yanaptʼapjjsna (Efes. 4:16). Vanuatu markankiri Leilani sat precursorajj akham siwa: “Mä säwiw utji, ‘mä wawa uywañatakejj mä markaw munasi’ sasa. Jaqenakaru Bibliat yatichañatakejj ukhamarakiw munasi. Sañäni, Diosan markapar maynin mantañapatakejja, taqe jilat kullakanakan yanaptʼapaw munasi” sasa. Jilïr jaqer tukuñapkamajja, mä wawajj taqen yanaptʼapwa katoqawayi. Sañäni, familianakapa, amigonakapa, yatichirinakapaw chʼamañchtʼawayapjje, wali wakiskirinak yatichawayapjje. Yateqerin bautisasiñapatakejja, ukhamarakiw taqe publicadoranakajj yanaptʼapjjsna. Ewjjtʼasa, chʼamañchtʼasa, yateqaskay sarnaqasaw yanaptʼsna (Prov. 15:22).

3. Ana, Dorín ukat Leilani jilat kullakanakajj kuntï sapki ukat ¿kunsa yateqtanjja?

³ Bibliattï maynir yatichaskstanjja, ¿kunatsa jilat kullakanakajj yateqerisar yanaptʼañ munapjjepan jan jarkʼañasäki? Moldavia sat markankiri Ana kullakajj precursora especialatwa serviski, jupajj akham siwa: “Bibliat yateqerejja, kunayman  toqet yanaptʼatäñwa muni, ukampis yatichiripajj janiw taqe ukanakan yanaptʼañ puedkaspati” sasa. Uka pachpa markan jakasiri, Dorín sat jilatajj precursor especialatwa serviskaraki. Jupajj akham sarakiwa: “Cheqas jilat kullakanakaw yateqerir mä kun sasas chuymapar purtʼapjje, nayajj janiw ukham yanaptʼkirïskayätti” sasa. Kunatsa yanaptʼayasiñajj wali wakiskiri uka toqet Leilani kullakajj akham sarakiwa: “Jilat kullakanakan yateqerir munasiñampi uñjapjjatapaw cheqapun Diosan markapätap amuyañapatak yanaptʼaspa” sasa (Juan 13:35).

4. ¿Kunanakatsa aka yatichäwin yatjjataskañäni?

⁴ “¿Kunjamsa maynin Bibliat yateqeriparojj yanaptʼirista?” sasin inas jisktʼasiskstan. Mä jilatasa jan ukajj kullakas Bibliat yatichki ukar compañtʼañasatak invittʼistaspa ukhajja, ¿kunsa lursna? Mä yateqerejj tantachäwinakar jutani ukhajja, ¿kunsa lurañasa? Ukanakatwa aka yatichäwin yatjjataskañäni. Jilïr irpirinakajj kunjamsa yateqerinakan bautisasiñapatakejj yanaptʼapjjaspa uksa yatjjatarakiñäniwa.

5. Bibliat yatichirejj compañtʼañasatak invittʼistu ukhajj ¿kun lurañas waktʼistu?

⁵ Yatichiriw yateqeriparojj Bibliat amuytʼañapatak yanaptʼañapa. Ukampis jupatï compañtʼañasatak invittʼchistojja, yanaptʼañasatakiw invittʼistu uk amtañasapuniwa (Ecl. 4:9, 10). Ukhamajj ¿kunjamsa yanaptʼsna?

6. Bibliat yatichirir compañkañäni ukhajja, ¿kunjamsa Proverbios 20:18 texton siski ukarjam lursna?

⁶ Sumwa wakichtʼasiñasa. Nayraqatajja, yatichiriruw yateqeripat mä jukʼa jiwasar cuenttʼañapatak mayiñasa (Proverbios 20:18 liytʼañataki). Inas yateqeripajj kunjamasa, kawkïr yatichäwitsa yatjjatapjjani, kunjam yanaptʼañsa jichhürojj amti uk jisktʼsna. Ukatjja, kun lurañasas wakisispa, kun lurañas jan wakiskaspa, kunas yateqeripan nayrar sartañapatakejj chʼamañchtʼaspa ukanakatwa jisktʼaraksna. Cheqas yatichirejj janiw yateqeripat taqe kun awisañapajj wakiskiti. Ukampis kuntï siskistani uk sumwa istʼañasa. Joy sat mä misionera kullakajj ukanakatwa compañtʼiriparojj parli. Jupajj akham siwa: “Compañirijar ukanak parltʼañajja, yateqerijar sum yanaptʼañapataki, yatichaskta ukhas sum arstʼañapatakiw yanaptʼi” sasa.

7. ¿Kunatsa sum wakichtʼasiñasajj wali importantejja?

⁷ Compañtʼañatakejja, nayraqatajj kuna yatichäwittï yatjjatapkani ukwa wakichtʼasiñasa (Esd. 7:10). Párrafo 3 ukan Dorín jilatatwa parlaniwaytanjja. Jupajj akham siwa: “Compañirijajj suma wakichtʼata sari ukhajj wal kusista. Ukham wakichtʼasisajj sumwa arstʼani” sasa. Cheqas compañtʼañatak sum  wakichtʼasiñäni ukhajja, yateqerejj panpachaniru wakichtʼat amuyasajj ukhamarakiw lurañ munani. Ukampis uka yatichäwi sum wakichtʼasiñ jan puedkstan ukhajja, kuna wakiskir puntonakas utji ukaksa jikjjatañasawa.

8. Orañasatak invittʼistani ukhajj ¿kunjamatsa kunatï wakiski uk maysna?

⁸ Yatichañatakejja, orasiñajj wali importantewa. Ukhamajja, orañatak invittʼistani ukhajj kunjamsa orañäni uk janïräkipanwa amuykiptʼasiñasa. Ukhamatwa kunatï wakiski uk mayiñäni (Sal. 141:2). Japón markankiri, Hanae sat kullakajja, kunjamsa yatichiripar compañkäna uka kullakajj Diosar mayirïna, uk jichhakamas amtaskakiwa. Jupajj akham siwa: “Uka kullakan Diosamp sum apasitapajj qhana amuykayänwa. Nayajj jupjamäñwa munayäta. Oracionan sutij aytirïna ukhajja, wali munatäkiristsa ukhamaw jikjjatasirïta” sasa.

9. Santiago 1:19 textorjamajja, ¿kunjamsa Bibliat yatichirir compañkasajj sum yanaptʼsna?

⁹ Bibliat yatichirirojj yanaptʼañasawa. Nigeria markankiri, Omamuyovbi sat kullakajj precursora especialawa. Jupajj akham siwa: “Suma compañtʼiri jilat kullakajja, yatichasktan ukhajj sumwa istʼi, sumwa arstʼaraki. Janiw jupak parlkiti, yatichiriw yateqerir yatichañapa uk janiw armkiti” sasa. Ukhamajj ¿kunapachas parlañasa, ukat kamsañasasa? (Prov. 25:11). Yatichirimpi yateqerimpejj parlaski uk sumwa istʼañasa (Santiago 1:19 liytʼañataki). Ukhamatwa wakiskani ukhajj jankʼak yanaptʼañäni. Ukampis amuyumpiw uk lurañasa, janiw jiwasak parlañasäkiti ni yatichirirus pantjasiyañasäkiti, janirakiw yaqha toqetsa parlañasäkiti. Ukhamajja, kuna toqettï yatjjatasipki uk sum amuyañapatakejj mä uñachtʼäwimpi jan ukajj mä jisktʼampiw mä jukʼa qhanañchtʼsna. Awisajj janis yanaptʼirjamäksna ukhamwa amuyassna. Ukampis yateqerir felicittʼañäni, jupan amigopäñatakis chʼamachasiñäni ukhajja, nayrar sartañapatakejj yanaptʼañäniwa.

10. ¿Kunjamsa experienciasajj mä yateqerir yanaptʼaspa?

¹⁰ Experienciaswa cuenttʼañasa. Wakischi ukhajja, kunjamsa Diosar uñtʼawaytan, mä jan waltʼäwirus atipjawaytan, kunjamsa Diosajj yanaptʼawayistu ukanakatwa yateqerir mä jukʼa cuenttʼsna (Sal. 78:4, 7). Inas ukpun istʼañ munaskchïna. Ukhamajja, experienciasajj Diosar jukʼamp confiyañapataki, bautisasiñ amtañapatakiw yanaptʼaspa. Kuna jan waltʼäwintï uñjaski uk atipjañatakis yanaptʼarakispawa (1 Ped. 5:9). Brasil markankiri Gabriel jilatat parltʼañäni. Jupajj precursorawa, yateqaskäna ukhajj kunas yanaptʼatayna uka toqet akham siwa: “Jilat kullakanakajj experienciap cuenttʼapkitäna ukajja, Diosajj  problemanakas sum uñtʼatapwa yatichitäna. Jupanakatï jan waltʼäwir atipjawayapjjchejja, nayajj atipjarakiristwa” sasa.

11, 12. Bibliat yateqerinakajj tantachäwir jutapkani ukhajja, ¿kunatsa wali munasiñampi katoqtʼañasa?

¹¹ Yateqerejj nayrar sartañataki, bautisasiñatakejj tantachäwinakaruw jan faltasis sarañapa, askinaksa apsuñaparakiwa (Heb. 10:24, 25). Nayrïr kutejj yatichiripan invittʼataw jutaspa. Ukhamajja, taqeniw jutaskakiñapatak chʼamañchtʼañasa. ¿Kunjamsa uk lursna?

¹² Munasiñampiw yateqerir katoqtʼañasa (Rom. 15:7). Tantachäwir jutipan yateqerir sum katoqtʼañäni ukhajja, jutañ munaskakispawa. Ukhamajj munasiñampi arunttʼapjjañäni, jilat kullakanakarus uñtʼayapjjarakiñäni, ukampis janiw mayjtʼasiyañasäkiti. Janirakiw ‘mayninakaw yanaptʼaskani’ sasins amuyañasäkiti. Yatichiripajj qheptʼataw purinispa, jan ukajj tantachäwin lurañanakampi ocupatäskaspawa. Ukhamajj kuntï yateqerejj siskani uk sumwa istʼañasa, yanaptʼañasarakiwa. Uk uñjasajj ¿kunsa jupajj amuyani? Dimitri sat jilatat parltʼañäni, jilatan bautisasitapat mä qhawqha maranakakiw pasaski, ukampis congregacionan yanapiripatwa serviski. Tantachäwir nayrïr kuti sarkäna ukat amtasajj akham siwa: “Tantachasiñ Uta anqanwa ajjsartʼayasisa suyaskayäta. Ukhamaruw mä jilatajj uñjitu, ukatsti jupaw tantachäwir irpantitu. Waljanirakiw arunttʼapjjetäna. Ukajj wal gustitäna, tantachäwinakajj sapüru utjaspa sasaw amuyayäta. Janipuniw kunapachas ukham jikjjatasirïktti” sasa.

13. Sum sarnaqatas uñjasajja, ¿kunsa yateqerinakajj amuyapjjaspa?

¹³ Yateqaskayäñasawa. Suma sarnaqatas uñjasajja, yateqerejj kunatï cheqäki uk jikjjatatapwa amuyaspa (Mat. 5:16). Moldavia markankiri, Vitali sat precursor jilatajj akham siwa: “Jilat kullakanakajj kunjamsa jakapjjäna, amuyapjjäna, sarnaqapjjäna uk uñjasaw Testigonakajj cheqapun Diosan markapätap amuyayäta” sasa.

14. ¿Kunjamsa suma sarnaqatasajj nayrar sartaskakiñapatak maynir yanaptʼaspa?

¹⁴ Yateqeritï bautisasiñ munchejja, kuntï Bibliat yateqki ukarjamaw sarnaqañapa. Cheqas uk lurañajj janiw faciläkaniti. Ukampis kunjamsa Biblian ewjjtʼanakaparjam sarnaqañajj yanaptʼistu uk uñjasajja, jiwasat yateqasiñ munaspawa (1 Cor. 11:1). Párrafo 8 ukan Hanae sat kullakat parltʼaniwayktan uka kullakajj akham siwa: “Jilat kullakanakajj kuntï yateqkayäta ukarjamaw sarnaqapjjäna. Uk uñjasajja, mayninakar chʼamañchtʼaña, perdonaña, munasirïñwa yateqta. Jilat kullakanakajj  mayninakat sumpunwa parlapjjerïna. Nayajj jupanakjamäñwa munarakiyäta” sasa.

15. Proverbios 27:17 textorjamajja, ¿kunatsa tantachäwinakar jutapki uka yateqerinakan amigopäñasa?

¹⁵ Yateqerin amigopäñasawa. Yateqerejj tantachäwinakar jutkani ukhajja, jupamp parltʼañasapuniwa (Filip. 2:4). Sum uñtʼañatakiw chʼamachasiñasa. ¿Kunjamsa uk lursna? Familiapata, trabajopata, kuntï Bibliat yateqaski ukanakatwa jisktʼsna, ukampis janiw taqe kunat jiskhiñasäkiti. Ukatjja, kuna cambionaktï lurawayki ukanakatwa felicittʼsna. Ukhamatwa amigopar tuksna, nayrar sartañapatakisa, bautisasiñapatakis yanaptʼaraksna (Proverbios 27:17 liytʼañataki). Hanae kullakajja, precursora regularäjjewa. Tantachäwinakar sarañ qalltkäna ukhajj kunjamas jikjjatasïna uka toqet akham siwa: “Congregacionan amigonak jikjjatasajj jukʼampiw tantachäwinakar sarañ munjjayäta. Wali qaritäskirita ukhas sarapunirïtwa. Congregacionankir amiganakajampïñajj wali kusiskañänwa, ukaw Diosar jan uñtʼir amigonakaj jaytañatak yanaptʼawayitu. Niyakejjay Jehová Diosarusa, jilat kullakanakarus jukʼamp jakʼachasiñ munchiyätjja, bautisasiñwa amtayäta” sasa.

16. Yateqerin congregacionan sum jikjjatasiñapatakejj ¿kunsa luraraksna?

¹⁶ Yateqerin nayrar sartaskipana, cambionak luraskipanjja, congregacionankir jilatasäjjaspasa jan ukajj kullakasäjjaspasa ukham amuyasiñapatakiw yanaptʼañasa. Mayjja, utasaruw invittʼsna (Heb. 13:2). Moldavia markankiri, Denís sat jilatajja, Bibliat yateqaskäna uka tiempot amtasajj akham siwa: “Jilat kullakanakajja, walja kutiw esposajampirojj jupanakamp chikäpjjañajatak utanakapar invittʼapjjeritäna. Kunjamsa Diosajj yanaptʼatayna, ukanak cuenttʼapjjerïtu ukajj walpun chʼamañchtʼapjjerïtu. Cheqas ukanakaw Jehová Diosar cheqapun serviñ munapjjañajataki, sumaw jakasipjjä sasin confiyañatakis yanaptʼawayapjjetu” sasa. Ukhamajja, Bibliat yateqeritï publicadoräjjchi ukhajja, jiwasamp predicañapatakiw invittʼsna. Brasil markankiri Diego jilatajj akham siwa: “Walja jilatanakaw jupamp predicañatak invittʼapjjeritäna. Ukajj jupanakar sum uñtʼañatakiw yanaptʼitäna. Waljanakwa jupanakat yateqta, Jehová Diosarusa Jesusarus jukʼampiw jakʼachasirakiyäta” sasa.

17. ¿Kunsa jilïr irpirinakajj yateqerinak layku lurapjjaspa?

¹⁷ Bibliat yateqerinakatakejj tiempo apstʼasipjjañapawa. Jilïr irpirinaka, yateqerinakar munasiñampi uñjapjjäta, jupanakat llakisipjjatam uñachtʼayapjjäta ukhajja, bautisasipjjañapatakiw yanaptʼapjjasma. Ukhamajj ¿sapa tantachäwinakan jupanakamp mä ratukis  parltʼapjjasmati? Jumanakatï sutip amtasipjjäta, yamas tantachäwin arstʼañ qalltasipki ukhajj sutipat sapjjäta ukhajja, jupanakat llakisipjjatam amuyapjjaniwa. Jilïr irpirinaka, mä publicadorajj yatichir sarki ukhajj ¿compañtʼañatak awisajj tiempo apstʼasipjjasmati? Ukham lurasajja, yateqerinakarojj wal yanaptʼapjjasma. Nigeria markankiri, Jackie sat precursora kullakajj akham siwa: “Bibliat yatichañatak mä jilïr irpirejj compañtʼirïtu ukhajja, yateqerinakajat waljaniw uk yatisajj musparapjjeri. Mä yateqerijajj akham sänwa: ‘Iglesiajankir pastorajj janiw kunäkipansa uk lurkaspati. Jupajj wali qollqenïpki jan ukajj pagapkaspa ukanakan utaparukiw visitir sari’” sasa. Jichhajj uka yateqerejja, tantachäwinakar sarjjewa.

18. ¿Kunjamsa jilïr irpirinakajj kuntï Hechos 20:28 texton siski ukarjam phoqapjjaspa?

¹⁸ Yatichirinakaruw sum yatichapjjañapatak yanaptʼapjjaspa, chʼamañchtʼapjjaspa. Jilïr irpirinaka, jumanakaw jilat kullakanakarojj sum predicapjjañapataki, suma yatichirïpjjañapatak yanaptʼapjjañama (Hechos 20:28 liytʼañataki). Maynitï juma jakʼan yatichañ ajjsarayaschi ukhajja, jumaw yatichasma. Jackie kullakajj akham siwa: “Jilïr irpirinakajja, yateqerinakajat jisktʼapjjapunituwa. Bibliat yatichkasin mä kunan yanaptʼa munkta ukhajja, suma ewjjtʼanakwa churapjjetu” sasa. Jilïr irpirinakajja, yatichirinakan jan aynachtʼapjjañapatakisa nayrar sartasipkakiñapatakis wal yanaptʼapjjaspa (1 Tes. 5:11). Jackie kullakajj akham saskakiwa: “Jilïr irpirinakajj chʼamañchtʼapjjetu, chʼamachasitaj valoranit uñjapjje ukajj wal gustito. Arunakapajj kunjamtï mä vaso thaya umajj wali caloran phajtaykistojja ukhamawa. Chʼamañchtʼkir arunakapajj jukʼamp sum lurañataki, Bibliat kusisita yatichaskakiñatakiw yanaptʼarakitu” sasa (Prov. 25:25).

19. ¿Kunatsa taqenis wal kusissna?

¹⁹ Inas jichhajj Bibliat jan yatichkstanti, ukampis Diosar serviñan jiltañapatakejj maynir yanaptʼsnawa. Yatichirir compañktan ukhajja, janiw jiwasak parlañasäkiti, antisas sum wakichtʼasisajj jukʼa arunakampikiw sum arstʼañasa, ukhamatwa yatichirir yanaptʼañäni. Yateqerinakajj tantachäwir jutapkani ukhajja, amigopäñatakiw chʼamachasiñasa, yateqaskayäñasarakiwa. Jilïr irpirinakajja, yateqerinakamp parltʼañatak tiempo apstʼasisaw jupanakar chʼamañchtʼapjjaspa. Yatichirinakarusti, Bibliat sum yatichapjjañapatak yanaptʼasa, felicittʼasaw chʼamañchtʼapjjarakispa. Mayniru Jehová Diosar munasiñapataki, serviñapataki mä jukʼaks yanaptʼstan ukhajja, wal kusistanjja.