1. ¿Bautisata waynitunakajj kunsa lurapjjaspa?

WAYNITUNAKA, niyakejjay jumanakajj wali chʼamani ukhamäsipkstajja, congregacionan wal yanaptʼapjjasma (Prov. 20:29, TNM). Jilat kullakanakar yanaptʼañatakejj waljanakwa lurapjjasma. Jumanakat waljaniw congregacionan yanapiripjam serviñ munapjjpachätajja. Ukampis yaqhep waynitunakajja inas akham amuyapjjchispa: ‘Wakiskiri luräwinak phoqañatakejj janiw experiencianïkiti, waynitüskiwa sasaw nayat amuyapjjaspa’ sasa. ¿Jumajj ukhamarakti amuyasta? Waynitukïskstasa, jichhatpachaw congregacionankir jilat kullakanakamp confiykayäñataki, respetop ganasiñatak chʼamachasisma.

2. ¿Kunanakatsa aka yatichäwin yatjjataskañäni?

² Aka yatichäwinjja, David reyitwa yatjjataskañäni. Ukatsti Judá markankir Asá, Jehosafat reyinakatwa mä qhawqha yatjjataskarakiñäni. Kuna jan walinakansa uñjasipjjäna, ukhaman uñjasisajj kunsa lurapjjäna, kunsa waynitunakajj yateqasipjjaspa ukanakatwa yatjjatarakiñäni.

3. ¿Kunjamsa waynitunakajj edadani jilat kullakanakar yanaptʼapjjaspa?

³ Davidajj waynitüskäna ukhajja, kunayman lurañanakwa yateqäna, ukajj mayninakar wal yanaptʼäna. Jehová Diosampejj wali sumwa apasïna; música toctʼañ sum yateqañatakis wal chʼamachasirakïna, ukhamatwa Diosajj uttʼaykäna uka Saúl reyirojj yanaptʼäna (1 Sam. 16:16, 23). Waynitunakajja, David reyjamarakiw waljanak lurañ yatipjje, ukampiw congregacionan  yanaptʼapjjaspa. Sañäni, edadani jilat kullakanakajja Bibliat sapak yatjjatañatakisa, tantachäwinakatakis janiw tabletapa celularap apnaqañ sum yatipkiti, ukhamajj uka aparatonak apnaqañwa yatichapjjasma. Jupanakajj ukham yanaptʼapjjatamat wal yuspärapjjätam.

4. Davidat yateqasisajja, ¿kun lurañatakis waynitunakajj chʼamachasipjjañapa? (Nayrïr paginankir dibujo uñjjattʼäta).

⁴ Davidajj lurañanakap sum phoqerïnwa confiykayarakïnwa. Sañäni, waynitüskäna ukhajja, awkipajj ovejanak cuidañapatakiw jupar encargäna, uk lurañajj chʼamäkchïnsa sum cuidañatakiw chʼamachasïna. Mä qhawqha tiempotjja, Davidajj akham sasaw Saúl reyir säna: “Kunapachatejj aka juman servirimajja, ovejanakap awatiskäna ukapachajja, mä leonasa, jan ukajj mä ososa jutirïnjja, ukat mä oveja tamat apasjjerïna ukapachajj, nayajj qhepat arktirïyäta, ukat uka oveja aparirïtjja” sasa (1 Sam. 17:34, 35). Davidajj ovejanak cuidañatak encargatätap yatïnwa, ukatwa jan ajjsartʼasa jan walinakat jarkʼaqäna. Waynitunakajja, Davidjamarakiw kuna luräwtï katoqapki uk sum phoqañatak chʼamachasipjjañapa.

5. Salmo 25:14 qellqatarjamajja, ¿kunas waynitunakatakejj jukʼamp importantëñapa?

⁵ Davidajja, waynitüskäna ukhatpachaw Jehová Diosampejj wali sum apasïna. Jupatakejj ukaw arpa tocañ sum yatiñat sipansa, jan ajjsarirïñat sipans wali importantëna. Davidatakejja, Jehová Diosajj janiw Diosapakïkänti, jan ukasti suma amigopänwa (Salmo 25:14 * liytʼañataki). Waynitunaka, jumanakatakejj Diosampi jukʼamp sum apasiñaw wali importantëñaparaki. Uktï lurapjjäta ukhajja, congregacionan jukʼamp luräwinakwa katoqapjjäta.

6. ¿Kunsa yaqhepanakajj Davidat amuyapjjäna?

⁶ Yaqhepanakajja, Davidajj janis luräwinakap phoqerïkaspa, sinti waynäkaspas ukhamwa amuyapjjäna. Sañäni, Davidajj nayaw Goliatampejj nuwasirista säna ukhajja, Saúl reyejj janiw munkänti, ‘jumajj wawäsktawa’ sasaw säna (1 Sam. 17:31-33). Uka nayrasti, pachpa jilapaw Davidajj janis luräwinakap sum phoqerïkaspa ukham sarakïna (1 Sam. 17:26-30). Ukampis Diosajj janiw jupanakjam amuykänti, kunattejj Davidarojj  sumwa uñtʼäna. Davidasti Jehová Dios amigojaw chʼam churitani sasaw confiyarakïna. Ukhamatwa Goliatarojj atipjäna (1 Sam. 17:45, 48-51).

7. ¿Kunsa Davidan experienciapat yateqasma?

⁷ Kunatï Davidar paskäna ukat ¿kunsa yateqasma? Maya, paciencianïñamawa. Wawäskayäta ukhatpach uñtʼapktam ukanakajja, inas wawarjamak uñjasipkchïtam tiempompiw waynäjjatam amuyasipkani. Ukampis Diosajj janiw ukham uñjktamti. Jupajj sumwa uñtʼtamjja, kunsa lurasma uksa yatirakiwa (1 Sam. 16:7). Paya, Jehová Diosamp jukʼamp sum apasiñatakiw chʼamachasiñama. Davidajja, Jehová Diosan luratanakap uñjasa, ukanakajj kunsa Jupat yatichäna ukanakat lupʼisaw Diosamp jukʼamp sum apasïna (Sal. 8:3, 4; 139:14; Rom. 1:20). Kimsa, Jehová Diosaruw chʼama mayisiñama. Sañäni, yateqer masinakamatï Testigötamat larusipjjätam ukhajja, Diosaruw ukanak aguantañatakejj yanaptʼa mayisiñama. Ukhamarusa, kuntï Bibliasa Bibliat apstʼat qellqatanakasa ukat videonakas siski uka ewjjtʼanakarjam lurañatakiw chʼamachasiñamaraki. Ukampis kunjamsa Jehová Diosajj jan waltʼäwinak atipjañatakejj yanaptʼtam uk uñjasajja, jukʼampiw Jupar confiyäta. Mayninakasti Diosar confiyatam uñjasajj jukʼampiw jumar confiyapjjarakïtam.

8, 9. 1) ¿Kunas Davidarojj pacienciampi suytʼañatak yanaptʼäna? 2) ¿Kunsa waynitunakajj Davidat yateqasipjjaspa?

⁸ Davidajj yaqha jan walinwa uñjasirakïna. Reyïñataki ajllitäjjäna uka qhepatjja, walja maranakaw reyjam apnaqañatakejj suyañapäna (1 Sam. 16:13; 2 Sam. 2:3, 4). ¿Kunas pacienciampi suytʼañatakejj yanaptʼäna? Aleq ukhamaki suyasa aynachtʼañat sipansa, kuntï lurirjamäkäna uk lurañatakiw chʼamachasïna. Sañäni, Saúl reyit escapasin filisteo oraqen jakkäna ukhajja, israelitanakan enemigonakapampiw nuwasïna. Ukhamatwa Judá markan oraqep jarkʼaqäna (1 Sam. 27:1-12).

⁹ ¿Kunsa Davidat yateqasma? Jehová Diosar jukʼamp serviñjamäskchi ukhajj serviñamawa, jilat kullakanakar yanaptʼañas wakischi ukhajj yanaptʼañamawa. Ricardo * sat jilatat jichhajj parltʼañäni. Jupajja, waynitüskäna ukhatpachaw precursor regularat serviñ munäna, ukampis janiw wakichtʼatäkänti. Ukhamäkchïnsa janiw aynachtʼkänti, antisas jukʼamp predicañatakiw chʼamachasïna. Jupajj akham siwa: “Jehová Diosar ukham serviñataki chʼamachasitajajj wali wakiskirïtapjja, jichhaw amuyta. Bibliat yatjjatañ munapki uka jaqenakar yanaptʼañatakiw chʼamachasiyäta. Jupanakamp wasitampi parltʼañatakis sumwa wakichtʼasirakiyäta. Yamas maynirojj Bibliat yatichañwa qalltta. Jukʼamp predicasajja, janiw ajjsarjjayätti” sasa. Jichhajja, Ricardojj congregacionan yanapiripatwa serviski, yateqaskay precursor regulararakiwa.

10. ¿Kunsa Davidajj mä wakiskir amtar puriñatakejj luräna?

¹⁰ Davidajj kuna yaqha jan walinsa uñjasirakïna uk uñjarakiñäni. Saúl reyit escapasin filisteo oraqen jakkäna uka pachajja, Davidampi jaqenakapampejj familianakap jaytasaw mä guerrar sarapjjäna. Ukañkamasti, enemigonakapaw utanakapar sarasajj taqe familianakap preso apasjjapjjäna. Uk uñjasajja, Davidajj nuwasiñatak wali experiencianïtap yatisajj familianakap aparasinjjañwa amtaspäna. Ukampis uk lurañat sipansa, Jehová Diosan yanaptʼapwa thaqäna. Abiatar sat sacerdote toqew Diosar akham jisktʼäna: “¿Uka lunthata jaqenakarojj arktañajjati?” sasa.  Jehová Diosasti “arktaskakim, jikjjatätawa” sasaw sarakïna (1 Sam. 30:7-10). ¿Kunsa ukat yateqasma?

11. ¿Kunsa amtanakar janïr purkasajj lurasma?

¹¹ Amtanakar janïr purkasajja, nayraqatajj yaqhanakaruw uka toqet jisktʼasiñama. Awk taykamampi jan ukajj experienciani jilïr irpirinakampiw parltʼañama. Jupanakaw suma ewjjtʼanak churapjjeristam. Jehová Diosajj jilïr irpirinakaruw jumar yanaptʼañapatakejj uttʼayi. Jupanakarojj confiyarakiwa, jumasti jupanakar confiyarakismawa. Jehová Diosajja, jupanakarojj congregacionaruw mä ‘regaljam’ churi (Efes. 4:8). Jumatï jupanakat yateqasïta, ewjjtʼanakaparus istʼarakïta ukhajja, suma amtanakaruw purïta. Jichhajja, kunsa Asá reyit yateqsna uk uñjarakiñäni.

12. ¿Asá reyejj apnaqañ qalltkäna ukhajj kunjam jaqënsa?

¹² Asá reyejj waynäskäna ukhajja, humilde chuymanïnwa jan ajjsaririrakïnwa. Sañäni, Abías sat awkipan jiwatapat jupajj reyëjjäna ukhajja, uka markankir idolonak qʼal tukjañwa qalltäna. Ukatjja, ‘Judá markajj Jehová Diosaru makatjjañapataki nayra awkinakapan Diosaparu, ukhamarak leyinakapsa mandamiento arunakapsa phoqañapatakiw mayïna’ (2 Crón. 14:1-7). Zérah sat etíope jaqejj mä millón soldadonakampi Judá marka contra jutäna ukhajja, Asá reyejj amuytʼasirïtap laykojj Jehová Diosaruw yanaptʼa mayïna. Akham sasaw ruwtʼasïna: ‘Jehová Dios Tata, jumatakejj pachpakiwa chʼamanirusa, jan chʼamanirusa yanaptʼañajja. Ukampisa ¡yanaptʼapjjetaya, nanakan Tatit Diosajja, nanakasti jumaruwa confiyasipjjsma’ sasa. Asá reyin uka suma arunakapajja, jupajj Jehová Diosaw nayarusa markajarus salvapjjetani sasin taqe chuyma confiyatapwa uñachtʼayistu. Asá reyejj alajjpachankir Awkiparuw confiyasïna, Jehová Diosasti etiopenakarojj atipjänwa (2 Crón. 14:8-12).

13. Mä qhawqha tiempo pasatatjja, ¿kunas Asá reyirojj pasäna, ukat kunatsa?

¹³ Cheqas mä millón soldadonak jupa contra jutir uñjasajja, Asá reyejj wal sustjaspachäna. Ukampis Jehová Diosaruw confiyäna, ukatwa uka ejercitorojj atipjäna. Mä qhawqha tiempotjja, Israel markan Baasá sat qhoru reyipaw jupar ajjsarayäna. Ukajj janis sinti ajjsarañjamäkchïnjja, Asá reyejj  janiw Jehová Diosar yanaptʼa maykänti, antisas Siria markankir reyirukiw yanaptʼa mayïna. Ukham amtatapat jan walinakanwa uñjasïna. Jehová Diosajj Hananí sat profetap toqejj jupar akham sänwa: “Siria markankiri reyin ejercitopajja jumarojj apanukjjtamwa, Tatitu Diosamaru jan iyawsatam layku, jan ukasti Siria markankir reyiru alkatasitam layku” sasa. Ukhat uksarojja, Asá reyejj sapa kutiw guerran uñjasïna (2 Crón. 16:7, 9; 1 Rey. 15:32).

14. 1) ¿Kunjamsa Jehová Diosar confiyatam uñachtʼayasma? 2) 1 Timoteo 4:12 textorjamajja, ¿kunsa ukham lurasajj jikjjatäta?

¹⁴ ¿Kunsa Asá reyin sarnaqäwipat yateqasma? Humilde chuymanïñamapuniwa, Jehová Diosaruw confiyañamaraki. Bautisaskta ukhajja, Jehová Diosar taqe chuyma confiyatamwa uñachtʼaytajja. Jehová Diosasti familiap taypiruw wali munasiñampi katoqtamjja. ¡Ukajj mä suma bendicionawa! Jichhasti Jehová Diosar confiyaskakitamwa uñachtʼayañama. Cheqas wali wakiskir amtanakar puriñatakejja, Diosar yanaptʼa mayiñajj janiw chʼamäkiti. Ukampis janiw ukatakik yanaptʼa mayiñamäkiti, jan ukasti kusistʼañ ajlliñatakisa, trabajotakisa jan ukajj yaqha ukhamanakatakis yanaptʼap mayiñamapuniwa. Mä arunjja, taqe kunatakiw yanaptʼap mayisiñama. Juman yatiñamaruk confiyañat sipansa, Biblian kawkïr wiñay yatichäwipas yanaptʼiristam ukwa thaqañama, ukarjamaw lurañamaraki (Prov. 3:5, 6). Ukham lurasajja, Jehová Diosaruw kusisiyäta, jilat kullakanakan respetopsa ganasirakïtawa (1 Timoteo 4:12 liytʼañataki).

15. 2 Crónicas 18:1-3 ukat 19:2 textonakarjamajja, ¿Jehosafat reyejj kunanakansa pantjasïna?

¹⁵ Cheqas jumajj nanakjam pantjasir jaqerakïtawa, ukhamajja awisajj pantjasïtawa. Ukampis ukajj janiw Jehová Diosar serviñat jumar jarkʼañapäkiti. Jehosafat reyit amuytʼam jupajja, yateqaskay sarnaqeri jaqënwa. Apnaqañ qalltkäna ukhajja, ‘awkipana Diosaparuw servïna, mandamiento arunakapwa phoqarakïna’. Judá oraqenkir markanakan Jehová Dios toqet yatichapjjañapatakisa, pʼeqtʼirinakwa khitarakïna (2 Crón. 17:4, 7). Suma chuymanïkchïnsa, awisajj Jehosafat reyejj jan wali amtanakaruw purïna. Ukatwa mä kutejj Jehová Diosan khitanit mä chachajj jupar cheqañchäna (2 Crónicas 18:1-3; 19:2  liytʼañataki). Kunsa uka sarnaqäwit yateqasma uk uñjañäni.

16. ¿Kunsa Rajeev jilatan experienciapat yateqasma?

¹⁶ Waynitu jilata, kuna ewjjtʼanaktï mayninakat katoqkta ukarojj istʼam, ukarjam lurarakim. Walja waynitunakatakejja, jakäwipan Jehová Diosar serviñ nayrar uchañajj chʼamakiwa. Inas jumatakejj ukhamarakïchi. Ukampis jan aynachtʼamti, Rajeev sat jilatan experienciapat amuytʼam. Waynitüskäna ukhajj kunsa luräna uka toqet jupajj akham siwa: “Uka maranakanjja, kun lurañajas wakisïna uk janiw amuytʼaskayätti. Tantachäwinakaru, predikir sarañat sipansa, mayni waynitunakjamarakiw kusistʼañaruki, jan ukajj anatañaruk chuym uchayäta” sasa. ¿Kunas jilatar yanaptʼäna? Mä jilïr irpir jilataw wali munasiñampi ewjjtʼäna. Rajeev jilatajj akham siwa: “Jilatajja, kuntï 1 Timoteo 4:8 texton siski ukarjamaw amuytʼayitäna” sasa. Rajeev jilatajj humilde chuymampiw uka ewjjtʼa katoqtʼasïna. Ukatsti, kunas jakäwipan nayrankañapa ukwa amuytʼasirakïna. Jilatajj akham saskakiwa: “Diosar serviñan kuna lurañanakatï utjki ukanak nayrar uchañwa amtayäta” sasa. ¿Ukat kunas pasäna? Jilatajj akham siwa: “Jilatajj ewjjtʼkitäna ukhat mä qhawqha maranak pasatatjja, congregacionan yanapiripjam serviñajatakiw uttʼayapjjetu” sasa.

17. ¿Jehová Diosar servir waynitunakarojj kunjamsa jilat kullakanakajj uñjapjje?

¹⁷ Waynitu jilata, congregacionankir jilat kullakanakajja, jupanakamp chika Jehová Diosar ‘mayachtʼata servitamjja’ wali valoranitwa uñjapjje (Sof. 3:9). Kuna luräwinaktï katoqkta uk kusisita, taqe chuyma phoqatam uñjasas wal kusisipjjaraki. Respetonakapsa ganastawa, confiyapjjaraktamwa (1 Juan 2:14).

18. Proverbios 27:11 textorjamajja, ¿kunsa Jehová Diosajj jupar servipki uka waynitunakat amuyi?

¹⁸ Waynitu jilata, Jehová Diosajj wal munastam, confiyaraktamwa, uk janipun armamti. Qhepa urunakanjja, walja waynanakaw chuymapat amtasa servipjjani sasaw Diosajj arsuwayäna (Sal. 110:1-3, TNM). Jumajj Diosar wal munastajja, jukʼamp sum serviñwa munaraktajja, uk Jupajj yatiwa. Ukhamajj pacienciampi mayninakar uñjam, juma pachpatakis paciencianirakïma. Pantjasïta ukhajja, maynitï ewjjtʼätam jan ukajj cheqañchätam ukhajj taqe chuyma katoqtʼasim. Jehová Diosaw jupanak toqejj yanaptʼasktam, uk janipun armamti (Heb. 12:6). Kuna luräwtï katoqkta uk sum phoqam. Jukʼampisa, Jehová Diosar kusisiyañatak chʼamachasim (Proverbios 27:11 liytʼañataki).