¿Kunatsa mä ‘jaqejj’ Rut warmimp casarasisajj “herenciajsa aptʼasiristwa” sasin säna? (Rut 4:1, 6).

Bibliajj qellqaskäna uka tiemponjja, mä chachajj jan wawanïsin jiwäna ukhajj aka jisktʼanakaw utjiri: “¿Kunas oraqenakapampejj pasani? ¿Familiapan sutipajj wiñayatakit chhaqtani?” sasa. Uka jisktʼanakarojj Moisesar churat Leyiw qhanañchäna.

Mä chachatï jiwaspäna jan ukajj pobrëjjatapat oraqenakap aljaspäna ukhajja, jilapa jan ukajj jakʼa familiapaw uka oraq mayamp alaspäna. Ukhamatwa oraqenakapajj familiankaskakispäna (Lev. 25:23-28; Núm. 27:8-11).

¿Jiwirin familiapan sutip jan chhaqtañapatakejj kunas lurasiñapäna? Jiwirin jilapaw jiwirin warmipampejj casarasiñapäna, ukhamat wawa utjayasajj jiwirin sutip utjayaskakiñataki, oraqeps herenciat katoqañapataki. Ukajj cuñadampi casarasiña satänwa, uk utjatapaw viuda warmirojj jan llakisiñatak yanaptʼäna (Deut. 25:5-7; Mat. 22:23-28). Rut warmimpejj uka costumbrerjamaw lurasïna.

Noemí warmit amuytʼañäni. Jupajj Elimélec chachamp casaratänwa. Ukampis chachapasa pä yoqanakapas jiwjjapjjäna ukhajja, janiw familiapat jupar uñjirejj utj-jjänti (Rut 1:1-5). Noemí warmejj Judá markar kuttʼjjäna ukhajja, Boaz chacharojj oraqenak mayamp alañapatakiw mayïta sasaw Rut yojjchʼaparojj säna, Boaz chachajj Elimélec chachan jakʼa familiarapänwa (Rut 2:1, 19, 20; 3:1-4). Ukampis Boaz chachajj jukʼamp jakʼa familiarap utjatapwa yatïna, juparuw mayamp uk alañajj waktʼäna (Rut 3:9, 12, 13). Biblianjja, uka chachat parlañatakejj ‘jaqe’ siwa.

Qalltanjja, uka ‘jaqejj’ oraqenakap mayamp alañatakejj iyaw sänwa (Rut 4:1-4). Uk alañatak qollq gastañapätap yatïnwa, Noemí warmin wali jilïrïtapsa, Elimélec chachan oraqep herenciat katoqañatak jan wawanïrjamätapsa yatirakïnwa. Uka oraqenakajj uka jaqen herenciap taypinkaspänwa. Ukhamajja, oraqenak alasajj ganïrjamäkaspas ukham amuyäna.

Ukampis uka jaqejj Rut warmimp casarasiñapätap yatïna ukhajja, uka oraq janiw alañ munjjänti. Akham sänwa: “Janiw alaskiristti, alasajj pachpa herenciajsa aptʼasiristwa” sasa (Rut 4:5, 6). ¿Kunatsa jan alañ munjjäna?

Uka jaqetï jan ukajj yaqha jakʼa familiaratï Rut warmimp casarasispäna, yoqall wawanïspäna ukhajja, uka wawaw Elimélec chachan oraqenakap herenciat katjjaspäna. ¿Kunjamsa ukajj uka jaqen herrenciap ‘aptʼasiyaspäna’? Bibliajj janiw uk qhanañchkiti, ukampis mä qhawqhanak amuytʼañäni.

• Maya, uka jaqejj ina chʼusarus qollqep aptʼasiñapäkaspa ukham inas amuychïna, kuna laykutejj Elimélec chachan oraqenakapajj Rut warmin yoqapankjjaspänwa, janiw uka jaqenkjjaspänti.

• Paya, Noemí ukhamarak Rut warminakaruw uywañapäna.

• Kimsa, Rut warmimpi uka jaqempitï wawanakanïpjjaspän ukhajja, uka wawanakajj uka jaqen wawanakapampiw herencia jaljasipjjaspäna.

• Pusi, uka jaqetï jan yaqha wawanakanïkaspäna, Rut warmimp wawanïpjjaspäna ukhajja, uka wawanakakiw Elimélec chachan oraqenakapsa uka jaqen oraqenakaps herenciat katuspäna. Ukhamajj Elimélec chachan sutip apkaspäna uka wawaw oraqenakap katuspäna, janiw sutip apirejj utjkaspänti. Uka jaqejj herenciap jan aptʼasiñ munatap laykojj janiw Noemí warmir yanaptʼañ munkänti. Ukatwa Boaz chachar uka luräwi churäna, juparuw uka oraq mayamp alañajj waktʼarakïna. Boaz chachajj iyaw sänwa, ukatsti akham sarakïnwa: “Ukhamatwa jiwirin oraqepajj wawanakapankaskakini” sasa (Rut 4:10).

Amuyatajja, uka jaqetakejj sutip jan chhaqtañapa, ukhamarak herenciapaw jukʼamp importantënjja. ¡Uka jaqejj jupatak llakisïna! Ukampis ukham chʼamachasitapajj inamayakïnwa, sutipas armatäjjewa. Ukhamarus janiw Boaz chachjam mä jachʼa bendición katoqkänti, Boaz chachajj Jesucristo Mesiasan nayra awkinakapan sutinakap taypinkiwa. Uka jaqejj jupatak llakisisasa yanaptʼa munapki ukanakar jan yanaptʼasas jan walinpun uñjasiwayi, ukajj wali llakkañawa (Mat. 1:5; Luc. 3:23, 32).