1, 2. Jumatï bautisasiñatak jan wakichtʼatäkstajja, ¿kunatsa jan desanimasiñamäki? (Nayrïr paginankir fotonak uñjjattʼäta).

 JUMATÏ bautisasiñ amtjjstajja, uk amtatamajj wali askipuniwa. Ukhamajj ¿bautisasiñatakejj wakichtʼatäjjtati? Jumatï wakichtʼatjam amuyassta, ancianonakas bautisasiñam munapjjarakchi ukhajja, bautisasiñam jan qhepatak jaytamti. Ukhamatwa Jehová Diosar servisajj wali kusisit jakasïta.

² Ukampis ¿janïraw bautisasiñatak wakichtʼatäktati sapjjtamti? Jan ukajj ¿janis wakichtʼatäkasma ukhamti amuyasta? Jan desanimasimti. Jumajj waynäkasasa, tawaqökasasa jan ukajj jilïrëjjasasa, bautisasiñkamajj chʼamachasiskakiñamawa.

3. ¿Etiopía markankir palacion trabajir mä jaqejj kunsa Feliper säna, ukampis kuna jisktʼas utjaspa? (Hechos 8:36, 38).

³ (Hechos 8:36, 38 liytʼäta). Etiopía markankir palacion trabajir mä jaqejj akham sasaw suma yatiyäwinak yatiyir Feliperojj jisktʼäna: “¿Kunarak bautisasiñajatak jarkʼitaspasti?” sasa. Jupan bautisasiñ munatapajj qhanaw amuyasïna. Ukampis ¿bautisasiñatakejj wakichtʼatänti?

4. ¿Kunjamsa Etiopía markankir jaqejj jukʼampinak yateqañ munatap uñachtʼayäna?

⁴ Etiopía markankir jaqejj “Diosar adoririw Jerusalén markar saratayna” (Hech. 8:27). Ukhamajj judionakan religionaparuw jupajj mantäna. Hebreo Arut Qellqatanak uñtʼänwa, uka taypiw Jehová Diosat yateqäna. Ukampis jupajj jukʼampinak yatiñ munäna. Kunapachatï Felipejj thakin jikjjatkäna  ukhajj ¿kunsa uka jaqejj luraskäna? Jupajj Isaías profetan mä rollop liyiskäna (Hech. 8:28). Uka qellqatan jan fácil amuykañ yatichäwinakaw utjäna. Etiopía markankir jaqejj janiw fácil amuyañjam yatichäwinakak yateqañ munkänti, jan ukasti jukʼampinak yateqañ munäna.

5. ¿Kunsa Etiopía markankir jaqejj yateqkäna ukarjamajj luräna?

⁵ Uka chachajj palacion trabajir wali aytat chachänwa, jupajj “Etiopía marka apnaqer Candace reinan serviripänwa, juparakiw taqpach qollqep apnaqäna” (Hech. 8:27). Walja lurañanakanïsajj janiw tiemponïkpachänti. Ukampis Jehová Diosar adorañatakejj tiempo apstʼasïnwa. Janiw cheqa yatichäwinakak yateqkänti, jan ukasti kuntï yateqkäna ukarjamaw luräna. Jehová Diosar adorañatakejj Etiopía markat Jerusalén markankir temploruw viajïna. Ukatakejj wali jay viajpachäna, qollqsa gastasirakpachänwa, ukhamäkchïnsa uka jaqejj Jehová Diosaruw adorañ munäna.

6, 7. ¿Kunsa Etiopía markankir jaqejj Jehová Diosar jukʼamp munasiñatak luräna?

⁶ Kuntï Etiopía markankir jaqejj jan yatkäna ukwa Felipejj jupar qhanañchäna, juparojj wali wakiskir cheqa yatichäwinakwa qhanañchäna. Ukanakat mayajja Jesusajj Mesiasätapawa (Hech. 8:34, 35). Taqe kuntï Jesusajj jupa layku lurkäna ukanak yatiñajj Etiopía markankir jaqerojj chuymaparuw purtʼpachäna. Uk yatisajj ¿kunsa luräna? Jupajj inas jan kuns lurkchispänti, judionakan religionapar mantir wali aytat jaqëskakisapänwa. Ukampis Jehová Diosarus Jesusarus jukʼampiw munasïna, ukatwa bautisasiñ amtäna, Jesusan arkiripäjjañwa amtarakïna. Felipejj bautisasiñapatak wakichtʼatätap amuyänwa, ukatwa uka jaqer bautisäna.

⁷ Etiopía markankir jaqen sarnaqäwipaw bautisasiñatak wakichtʼasiñamatakejj yanaptʼätam. Jupjamarakiw jan kunat payachasisajj akham säta: “¿Kunarak bautisasiñajatak jarkʼitaspasti?” sasa. Etiopía markankir jaqejj yatjjataskakïnwa, kuntï yateqkäna ukarjamaw luräna, Jehová Diosarus jukʼampiw munasïna. Kunjamsa jupjam lurasma ukwa jichhajj yatjjataskañäni.

8. ¿Kunsa Juan 17:3 textorjamajj lurañasa?

⁸ (Juan 17:3 liytʼäta, notapampi). ¿Jesusan uka arunakapajj Bibliat yateqañ qalltañamatakit yanaptʼawaytam? Waljaniruw uka arunakapajj yanaptʼawayi. Uka arunakapajj yateqaskakiñatakiw yanaptʼarakistu. Mä “sapa cheqpach Diosar” uñtʼañajj janiw kunapachas tukuskaniti (Ecl. 3:11). Wiñayatakiw yateqaskakiñäni. Jehová Diosar jukʼamp uñtʼasajj jukʼampiw jupar jakʼachasiñäni (Sal. 73:28).

9. Biblian jan fácil amuykañ yatichäwinakap yatjjatasajj ¿kunsa lurañasa?

 ⁹ Jehová Diosat yateqañ qallttan ukhajja, fácil amuykañanakwa yateqañ qallttanjja. Hebreonakar qellqkäna uka cartapanjja, apóstol Pablojj ‘qallta yatichäwinaka’ sasaw ukarojj sarakïna. Ukampejj janiw ‘qallta yatichäwinakajj’ janis wali importantëkaspa ukham sañ munkänti, jan ukasti uka yatichäwinakajj mä wawar yanaptʼki uka lecher uñtasitäkaspas ukhamwa parlaskäna (Heb. 5:12; 6:1). Pablojj qallta yatichäwinakat sipans jukʼampinak yateqapjjañapataki ukhamarak Biblian jan fácil amuykañ yatichäwinakap yateqapjjañapatakiw cristianonakar chʼamañchäna. ¿Jumajj ukanak walti yateqañ munarakta? ¿Nayrar sartaskakiñatakisa, Jehová Diosata amtanakapat yateqaskakiñatakis chʼamachasiñ munaraktati?

10. ¿Kunatsa yaqhepatakejj yateqañajj wali chʼamäspa?

¹⁰ Yaqhepatakejj yateqañajj wali chʼamäspawa. ¿Jumatakejj kunjamasa? ¿Escuelanti liyiñsa yateqañsa yateqta? ¿Yateqañajj gustayätamti, wals yateqkasma ukhamti amuyasiyäta? ¿Jan ukajj libronakat yatjjatañajj chʼamäkaspas ukhamcha amuyjjayäta? Ukhamächi ukhajja, janiw jumakejj ukham amuyktati. Ukampis Jehová Diosaw yanaptʼätam. Jupajj janiw pantjasirïkiti, janirakiw jupjam yatichirejj utjkiti.

11. ¿Kunatsa Jehová Diosajj ‘Jachʼa Yatichirejja’?

¹¹ Jehová Diosajj ‘Jachʼa Yatichiriwa’, ukwa jupa pachpat qhanañchi (Is. 30:20, 21). Jupajj pacienciampi, munasiñampi, khuyapayasiñampiw yatichi, yateqerinakapajj kunanakansa sumäpjje ukwa uñji (Sal. 130:3). Janipuniw kuntï jan lurirjamäksna uk lurañas maykistuti. Kuna laykutejj jupaw lejjwis jan ukajj lajjwis lurawayi, ukajj mä suma regalopawa (Sal. 139:14). Ukhamarus yateqañ munañasatakiw lurawayistu, wiñayatak yateqaskaksna yateqasajj kusisitässna ukwa muni. Ukatwa jichhatpachajj Biblian cheqa yatichäwinakap ‘yateqañ munañatakejj’ wal chʼamachasiñasa (1 Ped. 2:2). ¿Kunas ukatakejj yanaptʼiristam? Kuntï phoqkasma uk lurañ amtam, sapa kut Biblia liytʼam, yatjjatarakim (Jos. 1:8). Jehová Diosan yanaptʼapampejja, Bibliat liytʼañasa, Diosat yateqañas sapa kutiw jukʼamp gustätam.

12. ¿Kunatsa Jesusan jakäwipatsa, kunanaktï aka oraqenkkasajj lurkäna ukanakats yatjjatañasa?

¹² Jesusan jakäwipata, kunanaktï aka oraqenkkasajj lurkäna ukanakat sapa kuti lupʼiñatakejj tiempo apstʼasim. Jesusan kayup arkañajj wali wakiskiriwa, jukʼampis aka qhepa urunakan Jehová Diosar serviñataki (1 Ped. 2:21). Kuna jan walinakansa arkirinakapajj uñjasipjjani uk wali qhanwa Jesusajj qhanañchäna (Luc. 14:27, 28). Arkirinakapajj Diosat jan jitheqtas jupjam servipjjañapätapsa yatirakïnwa (Juan 16:33). Jesusan jakäwipat yatjjatam, kunanaksa sapüru jupat yateqasiñatakejj lurasma uk amtam.

13. ¿Kunsa Jehová Diosar mayiskakiñama, ukat kunatsa?

¹³ Janiw aleq yatiñatakikejj yateqañasäkiti. Jiwasajj Jehová Diosaruw uñtʼañasa, munasiñasa, confiyañasaraki (1 Cor. 8:1-3). Jehová Diosat jukʼamp jukʼampi yatjjataskakim, jupar jukʼamp confiyañatakis mayisiskakim (Luc. 17:5). Mayiskäta ukjja, taqe chuymaw churätam. Kunatï Diosasat cheqäki uk yatjjatasin jupar confiyäta ukhajja, nayrar sartaskakïtawa (Sant. 2:26).

14. ¿Yateqatarjam lurañasajj kunja wakiskirisa uk kunjamsa Pedrojj qhanstayäna? (Dibujo uñjjattʼarakïta).

¹⁴ Criston arkirinakapajj kunatsa yateqapki ukarjam lurapjjañapapuni ukwa apóstol Pedrojj  qhanstayäna. Ukatakejj Noé chachan sarnaqäwipampiw qhanañchäna. Uka tiempon jakiri jan wali jaqenakar tukjañatakejj uma juicio apayanëjja sasaw Jehová Diosajj Noé chachar säna. Ukampis janiw uk pasañapätap yatiñakejj wakiskänti, jan ukasti Noé chachasa familiapasa salvasiñatakejj may lurapjjañapänwa. Janïr Uma Juiciojj qalltkäna uka tiempot parlañatakejja, “arcan lurasiñapkamajj” sasaw Pedrojj säna (1 Ped. 3:20). Noé chachasa familiapasa kuntï Jehová Diosajj siskäna ukarjamaw lurapjjäna, mä jachʼa arca lurapjjarakïna (Heb. 11:7). Ukjjarusti Pedrojj kuntï Noé chachajj lurkäna ukjja, bautismompiw igualtʼayäna. Akham sänwa: “Kunatï paskäna ukajja, bautismor uñtasitawa. Jumanakajj uka bautismo taypiw jichhajj Jesucriston jaktatapat salvatäsipktajja” sasa (1 Ped. 3:21). Cheqas bautisasiñatak wakichtʼaskta ukajja, kuntï Noé chachasa familiapasa walja maranak arca lurapkäna ukamp sasispawa. Ukhamajj ¿kunsa bautisasiñatakejj lurañama?

15. ¿Cheqpach arrepentisiñajj kamsañs munaraki?

¹⁵ Mä toqetjja, taqe chuymaw juchanakasat arrepentisiñasa (Hech. 2:37, 38). Cheqpach arrepentisiñajj cambiaña sañ munaraki. Qʼañu juchan sarnaqañasa, cigarro fumañasa, jan wali arunak arsuñasa, jan ukajj usuchjir arunak parlañasa, yaqha jan wali lurañanakas Jehová Diosatakejj janiw walïkiti, ¿jumajj ukanak jaytjjtati? (1 Cor. 6:9, 10; 2 Cor. 7:1; Efes. 4:29). Janitï ukanak jaytkstajja, ukanak jaytañatak chʼamachasiskakim. Jumatï yanaptʼsa, uka toqet ewjjtʼanaksa munsta ukhajja, Bibliat yatichirimampi jan ukajj ancianonakampiw parltʼasma. Jumatï waynäsksta jan ukajj tawaqösksta, awk taykamamp jakaskaraksta ukhajja, kuna jan walitï bautisasiñatak jarkʼasktam uk apanukuñatak jupanakar yanaptʼa mayim.

16. ¿Kunanakamps Jehová Diosar sapür adorañatakejj lurañasa?

¹⁶ Kunanaktï Jehová Diosar adorañatak lurañasäki ukanak sapür lurañamajj wakisirakiwa. Ukanak taypinkiw tantachäwinakar sarañasa, ukan arstʼañasa (Heb. 10:24, 25). Janïr bautisatäkasin publicadoräjjäta ukhajja, predikirejj sarañamapuniwa. Jumatï sapa kuti predikäta ukhajja, uk lurañajj jumatak  kusiskañäniwa (2 Tim. 4:5). Jumatï waynäsksta jan ukajj tawaqösksta, awk taykamamp jakaskaraksta ukhajja, akham sasin jisktʼasim: “¿Sapa kutit jupanakajj tantachäwir sarañatakisa jan ukajj predikir sarañatakis jariyapjjetu? ¿Jan ukajj chuymajatcha uk lurtjja?” sasa. Ukanak lurañajj chuymamat mistchi ukhajja, Jehová Diosar confiyatamasa, jupar munasitamasa, jupar yuspäratamas qhanaw amuyasini. Kunanaktï Jehová Diosar adorañatak lurañasäki ukanak sapür lurasajja, ‘Dios chuymätamwa uñachtʼayasktajja’, ukanak lurasajj Jehová Diosarus regalonak churkasma ukhamawa (2 Ped. 3:11; Heb. 13:15). Jan obligatäsin chuymatpach regalonak churtan ukajj wal Jehová Diosar kusisiyi (2 Corintios 9:7 uñjjattʼarakïta). Jiwasajj kunatï sumäki uk Jehová Diosar churasajj wal kusisiraktanjja.

17, 18. ¿Kunas bautismor puriñatakejj yanaptʼätam, kunatsa ukajj yanaptʼätam? (Proverbios 3:3-6).

¹⁷ Bautisasiñatak chʼamachaskasajj jan walinakanwa uñjasirakïta. Inas yaqhepajj jumat burlasipjjchini jan ukajj Jehová Diosar adoratam laykojj arknaqapjjchïtam (2 Tim. 3:12). Jan ukajj inas mä jan wal jaytañatak chʼamachaskasin awisajj uka pachpa lurañar kuttʼsta. Jan ukajj inas bautismor puriñajj jumatak wali chʼamächi, inas ukajj llakisiyarakstam. ¿Kunas jan desanimasiñamatakejj yanaptʼätam? Jehová Diosar munasiñaw yanaptʼätam, ukajj wali importantewa.

¹⁸ Jehová Diosar munasitamajj wali sumapuniwa (Proverbios 3:3-6 liytʼäta). Jumatï Jehová Diosar taqe chʼamamamp munassta ukhajja, jan waltʼäwinakan uñjaskasas nayrar mistuskakïtawa. Biblian walja kutiw kunjamsa Jehová Diosajj servirinakapar munasiñampi jan jaytjasiñamp uñji uk qhanañchi. Ukhamajj janiw jupajj servirinakapar jaytanukkiti, wiñayatakiw jupanakar munasiraki (Sal. 100:5). Jumajj Diosar uñtasit luratarakïtawa (Gén. 1:26). Ukhamajj ¿kunjamsa uka kasta munasiñ uñachtʼayasma?

19. ¿Kuntï Jehová Diosajj juma layku lurki ukat yuspärañatakejj kunanaksa lurasma? (Gálatas 2:20).

¹⁹ Mä toqetjja yuspärasirïñamawa (1 Tes. 5:18). Sapüruw akham sasin jisktʼasiñama: “¿Kunjamsa Jehová Diosajj nayar munasitap jichhürojj uñachtʼayitu?” sasa. Ukjjarusti, Diosar oraskäta ukhajj uka toqet yuspärtʼam. Kunjamsa Diosajj munasiñap uñachtʼaytam ukajj jumatakipunïkaspas ukham uñjam, apóstol Pablojj ukhamwa uñjäna (Gálatas 2:20  liytʼäta). Akham sasin jisktʼasirakim: “¿Jehová Diosar munasitaj jupar uñachtʼayañ munaraktti?” sasa. Jupar munasitamaw Supayan yantʼanakapar jan jaltʼañatakisa, jan walinakar saykatañatakisa, kunanaktï Diosar adorañatak lurañasäki ukanak lurañatakis yanaptʼätam. Ukhamatwa alajjpachankir Awkimar munasitam sapür uñachtʼayäta.

20. ¿Jehová Diosar jakäwis katuyasiñatakejj kun lurañas wakisi, ukat kunatsa uka amtar puriñajj wali wakiskirejja?

²⁰ Tiempompejja, Jehová Diosar wal munasitamat wali wakiskir mä oración luräta, uka oración taypiw jakäwim jupar katuyasïta. Jehová Diosar jakäwim katuyasjjäta ukhajja, wiñayatakiw jupankjjäta. Jehová Diosar jakäwim katuyaskta ukhajja, sumankkasasa jan walinkkasas serviskakïmawa sasaw Diosar mä promesan arstajja. Uka promesajj may kutikiw jakañ vidan lurasi. Cheqas Diosar jakäwis katuyasktan ukajj wali wakiskir amtar puriñamp sasiwa. Ukampis ak amtapunim: taqe suma amtanakar purkta ukanakatjja, Diosar jakäwim katuyasiñ amtatamaw jukʼamp sumajja (Sal. 50:14). Supayajj Jehová Diosar munasiñam apaqañwa munani, ukhamat jupar jan sirvjjañamataki. Ukampis ¡janipun Supayamp atipayasimti! (Job 27:5). Alajjpachankir Awkimar wal munasitamaw arsutamamp phoqañatakisa jupar jukʼamp jakʼachasiñatakis yanaptʼätam.

21. ¿Kunatsa bautisasiñajj qalltakïskiw sistanjja?

²¹ Jehová Diosar jakäwim katuyasjjäta ukhajja, bautisasiñ munatam ancianonakaruw yatiyañama. Ukampis ak amtañamawa, bautisasitamampejj janiw taqe kunas ukjaruk tukuskiti, jan ukasti Jehová Diosar wiñayatak servitaman qalltapakïskiwa. Ukhamajj jichhatpachaw alajjpachankir Awkimar jukʼamp munasiñatak chʼamachasiñama, uka munasiñajj sapür jiltañapatakejj jukʼampinak lurañwa amtañama. Ukaw bautisasiñ amtkta uk phoqañatak yanaptʼätam. Uka urojj jan armkañ urüniwa. Ukampis ukajj qalltakïskiwa. Jehová Diosampir Jesús Yoqapampir munasitamajj jukʼampiw jiljjattaskakiñapa.