1, 2. ¿Bautisasjjasajj kuna bendicionanaksa maynejj katoqe?

 MAYNEJJ bautisasjje ukhajja, Jehová Diosan familiap taypinkjjewa. ¡Ukajj wali kusiskañawa! Khitinakatï Jehová Diosamp wali sum apasipkta ukanakajja, salmonak qellqeri Davidjamaw amuyapjjarakpachätajja, jupajj akham sänwa: “Khitirutï [juma Jehová Diosajj] ajlliskta, juman ukar irpanirakta ukajj kusisitawa, juparuw pationakaman jakañapatakejj ajllistajja irpaniraktajja” sasa (Sal. 65:4).

² Jehová Diosajj janiw taqenirojj pationakapar mantaykiti. Kunjamtï pasïr yatichäwin yatjjataniwayktanjja, khitinakatï amigopäñ munapjjatap uñachtʼayapki ukanakarukiw Jehová Diosajj jakʼachasi (Sant. 4:8). Jehová Diosar jakäwip katuyasirinakas bautisasirinakas Jehová Diosampejj wali sum apasjjapjje. Jehová Diosajj akham sasaw jupanakar saraki: “Bendicionanakwa jumanakjjarojj warjjatanëjja, jan kunas jumanakar faltañapkama” sasa (Mal. 3:10; Jer. 17:7, 8).

3. Diosar jakäwis katuyasktan bautisasiraktan uka cristianonakajj ¿kuna luräwinakampis phoqañasa? (Eclesiastés 5:4, 5).

³ Cheqas bautisasktan ukhajj Diosar serviñwa qallttanjja. Taqe cristianonakaw yantʼanakana jan walinakan uñjaskasas kuntï Jehová Diosar arsuwayktan uk phoqañataki, jupat jan jitheqtañatak chʼamachasiñ muntanjja (Eclesiastés 5:4, 5 liytʼäta). Jesusatwa yateqasiñasaraki, mandamientonakaparus istʼañasarakiwa (Mat. 28:19, 20; 1 Ped. 2:21). Aka yatichäwiw uk lurañatakejj yanaptʼistani.

 JAN WALINAKANA YANTʼANAKAN UÑJASKASAS JESUSAR ‘ARKASKAKIM’

4. ¿Kunjamsa Jesusan discipulonakapajj mä ‘tʼaqesiñ lawsa’ apksna ukhamajja? (Lucas 9:23).

⁴ Bautisasjjä uka qhepat wali sumaw jakasjjäjja sasin janiw piensañamäkiti. Jesusajj sapa mayni discipulonakajajj “tʼaqesiñ lawap sapür apjjaruspan ukat arkaskakitpan” sasaw säna (Lucas 9:23 liytʼäta). Uka arunakampejj ¿sapürus arkirinakapajj tʼaqesipjjañapäkaspa ukhamti sañ munaskäna? Janiwa. Jan ukasti akwa sañ munaskäna: arkirinakapajj bendicionanak katoqapjjañapäkchïnsa, jan walinakan uñjasipjjañaparakïnwa, ukanakat yaqhepajj jupanakar tʼaqesiyañapänwa (2 Tim. 3:12).

5. Reino layku sacrificionak luririnakarojj ¿kuna bendicionanak churañsa Jesusajj arsuwayi?

⁵ Inas familiamajj juma contra saytʼaschi, jan ukajj inas Diosan Reinop nayrar uchañatakejj walja qollqenïña walja yänakanïñ jaytsta (Mat. 6:33). Jumatï ukhaman uñjasstajja, Jehová Diosajj taqe kuntï jupa layku lurawaykta uk yatiwa, janiw ukat payachasiñamäkiti (Heb. 6:10). Inas Jesusan aka arunakap cheqätap uñjawaysta, jupajj akham sänwa: “Khititejj naya layku ukhamarak suma yatiyäwinak laykojj utsa, jilanaksa, kullakanaksa, tayksa, awksa, wawanaksa, oraqenaksa jaytki ukajja, taqe ukanakat sipansa 100 ukhampwa jichha tiempon katoqani: utanaka, jilanaka, kullakanaka, taykanaka, wawanaka, oraqenaka. Arknaqatas uñjasirakiniwa, ukampis jutir pachanjja wiñay jakañ katoqani” sasa (Mar. 10:29, 30). Katoqawaykta uka bendicionanakajja, kuna sacrificionaktï lurawaykta ukanakat sipans jukʼamp waljäpachawa (Sal. 37:4).

6. Bautisasjjäta uka qhepat ¿kunatsa ‘jañchin munañanakap’ contra nuwasiskakiñamajj wakisini?

⁶ Bautisasjjäta uka qhepatjja, ‘jañchin munañanakap’ contra nuwasiskakiñamäniwa (1 Juan 2:16). Kuna laykutejj pantjasir jaqëskakïtawa. Inas awisanakajj apóstol Pabljam jikjjatasirakchïta, jupajj akham sänwa: “Kunjam jaqëktï chuymajanjja, ukarjamaw nayajj Diosan leyipat wal kusista, ukampis cuerpojan yaqha leyin utjatapwa uñjta. Uka leyisti amuyujan utjki uka ley contraw wal nuwasi, cuerpojan utjki uka juchan leyiparuw mä presor uñtat aparakitu” sasa (Rom. 7:22, 23). Inas jan wali munañanak contra nuwaskasajj wali aynachtʼat jikjjataschïta. Ukampis kuntï Jehová Diosar jakäwim katuyasisajj arsuwaykta uka toqet lupʼiñaw tentacionanakar saykatañatak chʼam churätam. Mä tentacionan uñjasïta ukhajja, kuntï Diosar jakäwim katuyasisajj arsuwaykta ukaw sum jakasiskakiñatakejj yanaptʼätam. ¿Kunatsa ukham sistanjja?

7. Jehová Diosar jakäwis katuyasitasajj ¿kunjamsa jupat jan jitheqtañatak yanaptʼistani?

⁷ Kunapachatï maynejj Jehová Diosar jakäwip katuyasjje ukhajja, jupa pachpat armtʼasjjewa. ¿Uka arunakajj kamsañs muni? Jehová Diosajj uñiski uka jan wali munañanaka, maynitakik taqe kun munañanak apanukuña sañ muni (Mat. 16:24). Ukhamajj mä yantʼan uñjaskañäni ukhajj janiw kuns lurañäni uk piensañasajj wakiskaniti. Jehová Diosat jan jitheqtañakwa amtañäni. Jupar kusisiyañwa amtarakiñäni. Diosar jakäwis katuyasisajj taqpach yaqha amtanakas jaytanukuñwa arsuwaytanjja. Job chachjamäñasawa, jupajj sinti jan walinakan uñjaskasas jan payachasisaw akham säna: “Janipuniw Diosar taqpach chuymamp serviñ apanukkäti” sasa (Job 27:5).

8. ¿Kunjamsa Diosar jakäwis katuyasitasat lupʼiñajj tentacionanakar jan puriñatakejj yanaptʼistani?

⁸ Jehová Diosan munañap lurañatak  arsuwayktan uka toqet lupʼiñaw kunayman tentacionanakat jitheqtañatakejj chʼam churistani. Ak amuytʼañäni: mä casadarusa jan ukajj mä casadorus ¿coqueteysnati? ¡Janiwa! Diosar jakäwis katuyasisajj uk apanukjjtanwa. Chuymasantï jan wali munañanak jan jiltaykañänejja, janiw qhepat ukanak apsuñajj wakisjjaniti. “Jan wali jaqenakan thakiparojj” janiw ni mä jukʼsa jakʼachaskañäniti (Prov. 4:14, 15).

9. Jehová Diosar serviñ nayrar uchaskakiñatakejj ¿kunjamsa Diosar jakäwis katuyasitasat lupʼiñajj yanaptʼistu?

⁹ Jiwasarutï mä trabajo churañ munapjjestaspa, ukampis uka trabajojj taqe tantachäwinakar sarañat jarkʼistaspa ukhajj ¿kunsa lurañäni? Janiw katoqaskañäniti. Kuna laykutejj janïr uka trabajo churañ munapkistäna ukhaw uka kasta trabajo jan katoqasiñ amtjjayätanjja. Janiw uka trabajo katoqasjjasakejj Jehová Diosar nayrar uchañ thaqkañäniti. Jesusat yateqasiñaw yanaptʼistaspa. Kunjamtï jupajj Jehová Dios Awkipar kusisiyañ amtkänjja, ukhamarakiw jiwasajj jakäwis katuyasktan uka Diosatakejj kunanakatï jan walïki ukanak jan payachasis ratuk apanukuñasa (Mat. 4:10; Juan 8:29).

10. Bautisasjjtan uka qhepat ¿kunjamsa Jehová Diosajj Jesusar arkaskakiñatak yanaptʼistani?

¹⁰ Problemanakana, yantʼanakan uñjasiñajja, kunatsa Jesusar arkaskakiñ amttan uk uñachtʼayañatakiw yanaptʼistu. Cheqas Jehová Diosaw uk lurañatakejj yanaptʼistu, kuna laykutejj Bibliajj akham siwa: “Diosajj arunakap phoqeriwa, jupajj janiw munkaniti jumanakajj jan aguantirjamäpkta ukat jukʼampi yantʼatäpjjañamjja. Jupaw yantʼanakan aguantapjjañamatakejj yanaptʼapjjätam” sasa (1 Cor. 10:13).

 ¿KUNSA JESUSAR ARKASKAKIÑATAKEJJ LURASMA?

11. ¿Kunanaksa Jesusar arkaskakiñatakejj lurasma? (Fotonak uñjjattʼarakïta).

¹¹ Jesusajj taqe chuymaw Jehová Diosar servïna, orasiñaw Awkip jakʼapankaskakiñatakejj yanaptʼarakïna (Luc. 6:12). Bautisasjjäta uka qhepat ¿kunsa Jesusar arkaskakiñatakejj lurasma? Kunanakatï Jehová Diosar jukʼamp jakʼachasiñatakejj yanaptʼkiristam ukanakwa yateqañama, ukanak luraskakiñamawa. Bibliajj akham siwa: “Kawkjakamajjay Diosar serviñan jiltawaystan uka thaknam sum sarnaqaskakiñäni” sasa (Filip. 3:16). Awispachajja, Jehová Diosar jukʼamp serviñ amtapkäna uka jilat kullakanakan experiencianakapwa istʼäta. Inas jupanakajj Escuela para Evangelizadores del Reino ukar sarapjjchi, jan ukajj inas kawkjantï predicañatakejj yanapajj munaski uka cheqar sarjjapjjchi. ¿Jumajj ukham lurarakismati? ¡Jïsa, lurasmawa! Jehová Diosan servirinakapajj kunjamanakatsa jukʼamp predicapjjaspa uk thaqapjjapuniwa (Hech. 16:9). Ukampis jumatï añchhitajj jan uk lurañ puedksta ukhajja, khitinakatï puedipki ukanakat sipans minusäkasmas ukham janiw amuyasiñamäkiti. Cristianonakajj tʼijusktan uka tʼijüwinjja, aguantañaw jukʼamp importantejja (Mat. 10:22). Janipun ak armamti: jumatï kunjamanakan uñjaskasasa jan ukajj mä kun sum lurasas Jehová Diosar sum serviñatak chʼamachasisksta ukhajja, jupajj wal kusisi. Ukhamtï lurätajja, bautisasjjät uka qhepats Jesusar arkaskakïtawa (Sal. 26:1).

12, 13. Jumatï jan nayrjam kusisitäjjsta ukhajj ¿kunsa lurasma? (1 Corintios 9:16, 17; “ ¿Kunsa tʼijuskakiñatakejj lursna?” sat recuadro liytʼarakïta).

¹² ¿Janis taqe chuym orasjjasma ukhamti amuyasta? Jan ukajj ¿janis predicacionansa  Biblia liykasas nayrjam disfrutjjasma ukhamti amuyasta? Jumatï bautisaskta uka qhepat ukhaman uñjassta ukhajja, janis Jehová Diosajj espíritu santop churjjeristam ukham janiw amuyañamäkiti. Pantjasir jaqenakjamajj ukhamanakan uñjasiñajj utjaspawa. Jumatï jan nayrjam kusisitäjjsta ukhajja, apóstol Pablotwa lupʼisma. Jupajj Jesusat yateqasiñatak chʼamachaskchïnsa, awisanakajj janiw kunatï cheqapäki uk taqe chuyma lurañatakejj chʼamapajj utj-jjänti, uk jupajj sum amuyasïna (1 Corintios 9:16, 17 liytʼäta). Jupajj akham sänwa: “Nayatejj jan munkasas uka luräwimpi phoqäjja, Tatitojj churkitu uka lurañampiw nayajj phoqaskta” sasa. Mä arunjja, awisanakajj jan chʼamanjamas amuyaskchïnjja, apóstol Pablojj Diosar serviskakiñwa amtäna.

¹³ Kunanak lurañs amtäta ukhajja, janiw kunjamtï chuymaman jikjjataskta ukampejj apayasiñamäkiti. Jan ukasti jan lurañ munkäta ukhas kunatï walïki uk lurañ amtam. Tiempompejj luratanakamajj sum jikjjatasiñatakiw yanaptʼätam. Jumatï Bibliat sapak yatjjataskakïta, orasiskakïta, tantachäwinakarus predicacionarus saraskakïta ukhajja, bautisasjjasajj Jesusar arkaskakïtawa. Jilat kullakanakajj Diosar serviñan aguantatam uñjasajja, wali chʼamañchtʼatäpjjaniwa (1 Tes. 5:11).

“AMUYKIPTʼASISIPKAKIM”

14. ¿Kunanaksa sapa kut amuykiptʼasiñama, ukat kunatsa? (2 Corintios 13:5).

¹⁴ Bautisasjjäta uka qhepatjja, kunjamsa jakaskta, kunanaksa luraskta ukanak sapa kut amuykiptʼasiñamajj wal yanaptʼätam (2 Corintios 13:5 liytʼäta). Sapürut orasiskta uk amuykiptʼasiñamawa, Biblia liyisktati, Bibliat yatjjatasktati, tantachäwinakarus predicacionarus sarasktati uk amuykiptʼasiñamarakiwa. Ukanak lurkasajj beneficiasiñataki disfrutañatakiw chʼamachasiñama. Akham sasaw jisktʼasirakisma: “¿Biblian yatichäwinakap qhanañchiristti? ¿Kunsa jukʼamp kusisit predicañatakejj luriristjja? ¿Kunanaktï oracionan mayiskta ukajj qhanati, Jehová Diosar taqe chuyma confiyatajti uñachtʼayaraki? ¿Taqe tantachäwinakar sarañatakit chʼamachastjja? ¿Kuns tantachäwinakan wali atencionamp istʼañatakisa jukʼamp sum comentañatakis luriristjja?” sasa.

15, 16. ¿Kunsa Robert jilatan experienciapat yateqta?

¹⁵ Kunanakan chʼamachasiñamas wakisi uk amuykiptʼañamarakiwa. Kunatsa uk lurañajj wali wakiskiri uk amuyañatakejj mä experienciat parltʼañäni. Robert jilatajj akham siwa: “Mä 20 maranïkayäta ukhajja, semanan mä qhawqha horanakakiw trabajiyäta. Mä urojja, trabaj tukuyatarojj mä compañeraw  utapar invititäna. Janiw khitis utajankkiti, ‘panisakiw ukan kusistʼañäni’ sasaw sitäna. Qalltanjja, jan sarañatakejj kunaymaninak parlayäta, ukampis qhepat janiw sarkäti sasaw sayäta, kunatsa jan sarkäjja uks qhanañcharakiyätwa” sasa. Robert jilatajj janiw uka tentacionamp apayaskänti, ukajj walikïskiwa. Ukampis kunatï paskäna uk amuytʼasajja, kunsa jukʼamp sum luraspäna ukwa amuytʼasïna. Jupajj akham sarakiwa: “Joseyajj jan payachasisaw Potifaran esposaparojj ‘janiwa’ sasin jankʼak säna, nayajj janiw Joseyjamajj siskayätti (Gén. 39:7-9). Uka compañerajar janiw sañajj nayatak wali chʼamänwa, ukampis ukham chʼamätap janiw pienskayätti. Kunatï paskäna ukajja, Diosamp jukʼamp sum apasiñatak chʼamachasiñajj kunja wakiskirisa uk amuyañatakiw yanaptʼitäna” sasa.

¹⁶ Jumajj mä tentacionans uñjaskasma, ukat uk rechazkasmas ukham amuytʼañäni. Ukhaman uñjasisajj ¿janit Robert jilatjam amuykiptʼaskasma? Akham sasaw jisktʼasisma: “¿Ratukit janiw sistjja?” sasa. Mä kunan chʼamachasiñam wakisitap amuysta ukhajj jan desanimasimti, jan ukasti kunans chʼamachasiñama uk amuyasitamajj wali askiwa. Uka toqet Jehová Diosar yatiyam, jupar taqe chuyma istʼañ munañatakis chʼamachasirakim (Sal. 139:23, 24).

17. Robert jilatan experienciaparjamajj ¿kunjamsa Jehová Diosat jan jitheqtasajj sutip jachʼañchtanjja?

¹⁷ Robert jilatan experienciapajj janiw ukharuk tukuykiti. Jupajj akham saskakiwa: “Compañerajan invitacionapar rechazayäta ukhajja, jupajj ‘yantʼar atipjtawa’ sasaw sitäna. ‘¿Kunatsa ukham sista?’ sasin jisktʼayäta ukhajja, ‘Testigo wayn tawaqonakajj taqeniw puedipki ukhajj jamasat jan walinak lurapjje sasaw nayrajj Testigökäna uka amigojajj situ’ sasaw uka compañerajajj yatiyitäna. Ukatwa nayar yantʼañ amtatap amigopar satayna. ¡Jehová Diosan sutip jan qʼañuchatajat walpun kusista!” sasa.

18. Bautisasjjäta uka qhepat ¿kun lurañsa jumajj amtta? (“ Yanaptʼkir pä yatichäwinaka” sat recuadro liytʼarakïta).

¹⁸ Jehová Diosar jakäwim katuyaskta, bautisasirakta ukhajja, kunas kunäskpan Jehová Diosan sutip jachʼañchañ munatamwa uñachtʼaytajja. Kuna jan walinakansa uñjasta, kuna tentacionanakarus atipjta ukanak Jehová Diosajj uñjaskiwa, janiw ukat payachasiñamäkiti. Jupat jan jitheqtañatak chʼamachasitam jupajj uñjaskiwa, ukham luratamat bendisïtamwa. Espíritu santopampiw kunatï walïki uk lurañatak chʼam churätam, jan ukat payachasimti (Luc. 11:11-13). Jehová Diosan yanaptʼapampejja, bautisasjjasajj Jesusar arkaskakïtawa.