1. ¿Kamsasas Jehová Diosan yaqhep servirinakapajj amuyapjjaspa?

 “JEHOVÁ DIOSAJJ markapampejj wali kusisitawa”, ¡uk yatiñajj wali kusiskañawa! (Sal. 149:4). Ukampis yaqhepajj desanimasipjjaspawa, akham sasaw amuyapjjarakispa: “Jehová Diosajj markapampejj wali kusisitawa, ukampis ¿nayat kusisitäpachati?” sasa. Diosan nayra servirinakapatjja, waljaniw awisajj Diosajj jupanakat kusisitäpachati janicha uka toqet payachasipjjäna (1 Sam. 1:6-10; Job 29:2, 4; Sal. 51:11).

2. ¿Khitinakatsa Jehová Diosajj wal kusisi?

² Bibliarjamajja, pantjasir jaqëkstansa Diosajj jiwasat kusisispawa. Ukatakejj Jesucristor confiyataswa uñachtʼayañasa, bautisasiñasarakiwa (Juan 3:16). Ukhamatwa juchanakasat arrepentisitassa Diosan munañap lurañatak mä promesa luratassa mayninakar uñachtʼaytanjja (Hech. 2:38; 3:19). Jehová Diosan amigopäñatak ukanak lurtan ukhajja, jupajj wal kusisi. Diosar jakäwis katuyasitasamp phoqañatak wal chʼamachastan ukhajja, jupajj jiwasat wal kusisi, amigosäjjarakiwa (Sal. 25:14).

3. ¿Kuna jisktʼanakarus aka yatichäwin qhanañchaskañäni?

³ ¿Kunatsa yaqhepajj janis Diosajj jupanakat kusiskaspa ukham amuyapjje? ¿Kunjamanakatsa Jehová Diosajj jiwasat kusisitap uñachtʼayistu? Diosajj nayat wal kusisi sasin jan payachasiñatakejj ¿kunas yanaptʼistani?

¿KUNATSA YAQHEPAJJ JANIS DIOSAJJ JUPANAKAT KUSISKASPA UKHAM AMUYAPJJE?

4, 5. Janis kunatakis sirvksna ukham amuyasiñäni ukhajj ¿kuna toqetsa jan payachasiñasäki?

⁴ Jiwasanakat waljanejj janis kunatakis sirvksna ukham amuyasaw jilsuwaytanjja (Sal. 88:15). Adrián jilatajj akham siwa: “Janis kunatakis sirvkirista ukham amuyirïta. Wawäkasajj  Jehová Diosaruw familiajan Paraison jakasiñapatak orasirïta, ukampis janiw ukankañajj nayar waktʼkituti sasaw amuyarakirïta” sasa. Jan Testigo familian jilsuri Tony jilatajj akham sarakiwa: “Tataj mamajajj janipuniw kunapachas ‘jumat wal kusisipjjta’, ‘wal munasipjjsma’ sasin sapjjerïkituti. Janipuniw kuna luratajampis jupanakar kusisiykäti sasaw amuyarakirïta” sasa.

⁵ Awisajj janis kunatakis sirvksna ukham amuyasiñäni ukhajja, Jehová Diosaw markapar irpasinitu sasaw amtañasa (Juan 6:44). Janis jiwasatak ukhamaw sañjamäkchejja, kunja suma chuymanïtansa ukwa jupajj uñji, jiwasat sipans jupaw jukʼamp sum uñtʼistu (1 Sam. 16:7; 2 Crón. 6:30). Ukhamajj wali valoranïpjjtawa siskistu uk creyiñasawa (1 Juan 3:19, 20).

6. Juchanakapat amtasisajj ¿kunjamas Pablojj jikjjatasïna?

⁶ Jiwasanakat yaqhepajja, kunatï cheqäki uk janïr uñtʼkasajj kunanaktï lurkayätan ukanakat inas wal juchañchasstan (1 Ped. 4:3). Yaqhepajj inas Jehová Diosarojj jan jitheqtas walja maranak servisipkchi, ukampis yaqhep jan walinak atipjañatakiw chʼamachasisipkaspa. Jumarutï chuymamajj juchañchaskstam ukhajj kunjamsa Jehová Diosan jan jitheqtir servirinakapajj ukhaman uñjasipjjäna uk yatiñaw chuymachtʼiristam. Apóstol Pablojj pantjasitanakapat amtasisajj wal llakisirïna (Rom. 7:24). Juchanakapat arrepentisisajj bautisaskchïnsa, “apostolonak taypitjja jukʼamp sullkätwa”, juchararanakat “nayaw jukʼamp juchararätjja” sasaw sirïna (1 Cor. 15:9; 1 Tim. 1:15).

7. Jiwasatï arrepentisiñäni ukhajj ¿kuna toqetsa jan payachasiñasäki?

⁷ Jiwasatï arrepentisiñäni ukhajja, Jehová Diosajj jiwasar perdonañwa arsuwayi (Sal. 86:5). Ukhamajj chuymatpach jucha luratasat arrepentisiñäni ukhajja, arsutaparjamajj perdonjjestuwa, janiw ukat payachasiñasäkiti (Col. 2:13).

8, 9. Jehová Diosar kusisiyañatakejj jukʼampinak lurañasas wakiskaspa ukham jan amuyjjañatakejj ¿kunas yanaptʼistani?

⁸ Taqeniw Jehová Diosar serviñatakejj kunaymaninak lurañ muntanjja. Ukampis inas yaqhepajj “Diosajj nayat kusisitäñapatakejj kuntï lurkta ukajj wali jukʼakiwa” sasin amuyapjjchi. Amanda kullakajj akham siwa: “Jehová Diosar jukʼamp serviñatakejj sapa kutis jukʼamp lurañajäkaspa ukham jilapartejj amuyta. Ukatwa qhawqtï lurirjamäkta ukat sipans jukʼamp lurañar uskusta. Ukhamajj ‘qhawqtï lurañajäkäna uk jan lurjjta’ ukhajja, kunjamtï naya pachpat jan kusisitäktjja ukhamarakiw Diosajj nayat jan kusisitäkpachati” sasa.

⁹ Jehová Diosar kusisiyañatakejj jukʼampinak lurañas wakiskaspa ukham jan amuyjjañatakejj ¿kunas yanaptʼistani? Ak amtañasawa: Jehová Diosajj amuytʼiriwa, janipuniw qhawqtï lurirjamäktan ukat jukʼamp lurañas maykistaniti. Jiwasatï qhawqtï lurirjamäktan ukarjam lurañatak chʼamachasiskstan ukhajja, ukajj waljäpas jukʼäpas wali valoranit Jehová Diosajj uñji. Kunjamsa jupan nayra servirinakapajj jupar taqe chuyma servipjjäna uk amuytʼañasarakiwa. Apóstol Pablojj walja maranakaw wali jayanak viajisajj jan qarjtas trabajirïna, walja congregacionanak uttʼayarakïna. Ukampis jakäwipan mayjtʼatapatjja, janiw nayrjamajj wal predicañ puedjjänti. Ukhamajj ¿janit Diosajj jupat kusisjjpachäna? Janiw ukhamäkänti. Pablojj kuntï lurirjamäkäna uk luraskakïnwa, Diosajj bendisirakïnwa (Hech. 28:30, 31). Jiwasampejj ukhamarakiwa, janiw Jehová Diosar serviñatakejj mä pachpak lurkapuniñäniti, ukampis kunatsa mä kuns lurtan  ukaw jupatak jukʼamp importantejja. Jutïr parrafonakanjja, kunjamanakatsa Jehová Diosajj jiwasatak kusisitätap uñachtʼayi ukwa yatjjataskañäni.

¿KUNJAMANAKATS JEHOVÁ DIOSAJJ JIWASAT KUSISITAP UÑACHTʼAYISTU?

10. ¿Kuna toqes Jehová Diosajj jiwasat wal kusisitap qhanañchistu? (Juan 16:27).

¹⁰ Biblia churistu. Jehová Diosajj qhawqsa servirinakapar munasi, jupanakat kusisiraki uk jupanakar uñachtʼayapuniwa. Jesusatjja “jupajj wali munat Wawajawa, nayajj wal jupat kusista” sasaw säna, uka arunakajj pay kutiw Biblian uñsti (Mat. 3:17; 17:5). ¿Qhawqsa Jehová Diosajj jumat kusisi uk istʼañ munasmati? Cheqas jupajj janiw alajjpachat parlankistuti, Biblia toqew parlistu. Kunjamsa Jesusajj discipulonakapar munasiñamp parlirïna uk amuytan ukhajja, Jehová Diosajj jiwasarus ukham parlkistaspa ukhamwa amuyastanjja (Juan 16:27 liytʼäta). Jesusajj Awkipjam chuymanïtap wali sum uñachtʼayäna. Jupat jan jitheqtir discipulonakaparojj pantjasirïpkchïnsa, “munasipjjsmawa” sasaw sirïna. Biblian uk liytʼktan ukhajja, kunjamsa Jehová Diosajj uka pachpa sarakistu ukwa amuytanjja (Juan 15:9, 15).

11. Yantʼanakan uñjasktan ukhajj janis Diosajj jiwasat kusisitäjjaspa ukham ¿kunatsa jan amuyañasäki? (Santiago 1:12).

¹¹ Kuntï necesitktan ukwa churistu. Jehová Diosajj wal yanaptʼañ munistu, ukatwa kunanaktï necesitktan ukanak churistu. Ukampis awisajj jan walinakat janiw jarkʼaqkapunistaspati, ukaw Job chachampejj pasarakïna (Job 1:8-11). Yantʼanakan uñjaskañäni ukhajja, Diosajj janis jiwasat kusisitäkaspa ukham janipun amuyañäniti, antisas qhawqsa jupar munastan, confiyaraktan uk uñachtʼayañatak mä oportunidadäkaspas ukhamwa uñjañasa (Santiago 1:12 liytʼäta). Jan walinakan uñjasktan ukhajj kunjamsa Diosajj aguantañasatak wal yanaptʼistu, munasirakistu ukwa uñjarakiñäni.

12. ¿Kunsa Dimitri jilatan experienciapat yateqsna?

¹² Asia toqenkir Dimitri jilatat amuytʼañäni. Jupajj jan trabajoniw uñjasïna. Walja phajjsinakas trabaj thaqkchïnjja, janiw jikjjatkänti, ukatwa qhawqsa Jehová Diosar confiyäna uk uñachtʼayañatakejj jukʼamp horanak predicäna. Ukampis phajjsinakajj pasaskakïnwa, janïraw trabaj jikjjatkänti. Ukatjja jupajj usuntjjänwa,  janiw ikiñat sartañ puedkänti. Qheparusti janis mä suma awkïkaspa, janis mä suma esposökaspa, Jehová Diosajj janis jupat kusiskaspa ukhamwa amuyjjäna. Ukampis mä arumajja, imill wawapajj Isaías 30:15 textwa mä papelar imprimtʼarapïna, ukan akham siwa: “Jumanakatejj tranquilokïpjjäta, confiyapjjarakïta ukhajja, chʼamanïpjjätawa” sasa. Ukatjja tatapan ukar sarasajj akham sänwa: “Papitu, llakitäkäta ukhajj aka texto amtasïta” sasa. Dimitri jilatajj akwa amuyasïna: Jehová Diosajj janiw familiaparojj issa, manqʼsa, jakañatak mä lugars faltaykänti. Jilatajj akham siwa: “Tranquilokïñajänwa, Diosarus confiyaskakiñajänwa” sasa. Jumatï ukhaman uñjasisksta ukhajja, jan akat payachasimti: Jehová Diosajj jumat llakisiwa, jupaw aguantañatakejj chʼam churarakïtam.

13. ¿Kunjamsa Jehová Diosajj jiwasat wal kusisitap uñachtʼayistaspa?

¹³ Jilat kullakanak churistu. Jehová Diosajj wal necesitktan ukhaw jilat kullakanak toqejj chʼamañchtʼistaspa. Ukaw Asia toqenkir mä kullakarojj pasäna. Jupajj jan trabajoniw uñjasïna, wal usuntarakïna. Ukatsti esposopajj mä jachʼa jucharuw purtʼasïna, janiw ancianöjjänti. Kullakajj wal llakisïna, akham sarakiwa: “Kunatsa taqe ukanakajj pasaskitäna uk janiw amuykayätti. Mä jan wal lurpachätjja, ukatwa Jehová Diosajj nayat jan kusisitäjjeti sasaw amuyayäta” sasa. Ukatwa qhawqsa Jehová Diosajj jupat kusisïna uk amuyañatak orasïna. ¿Kunjamsa Jehová Diosajj oracionapar jaysäna? Kullakajj akham siwa: “Ancianonakaw nayamp parlapjjäna, qhawqsa Jehová Diosajj munasiskakitu uk amuyañatakiw yanaptʼapjjarakitäna” sasa. Mä qhawqha tiempotjja, wasitatwa Jehová Diosarojj yanap mayïna. ¿Kunjamsa Diosajj yanaptʼäna? Kullakajj akham siwa: “Ukürpachaw wali munasiñamp apayanit mä carta katoqayäta, congregacionajankir walja jilat kullakanakaw apayanipjjetäna. Uk liytʼasajja, kunjamsa Jehová Diosajj oracionajar jaysitäna ukwa amuyayäta” sasa. Kunjamtï uñjktanjja, Jehová Diosajj mayninakan munasiñamp arstʼat arunakap toqew jiwasat wal kusisitap uñachtʼayistaspa (Sal. 10:17).

14. ¿Kunjamsa Jehová Diosajj jiwasat wal kusisitap uñachtʼayarakistu?

 ¹⁴ Jilat kullakanakajj necesitktan ukarjam ewjjtʼapkistu ukhajja, Jehová Diosajj jiwasat wal kusisitapwa uñachtʼayarakistu. Nayrïr patak maranakanjja, Jehová Diosajj apóstol Pabloruw 14 cartanak qellqañapatak amuytʼayäna, ukanwa Pablojj jilat kullakanakar munasiñamp qhan ewjjtʼäna. ¿Kunatsa Jehová Diosajj Pablomp jupanakar ewjjtʼayäna? Kuna laykutejj Diosajj wali munasiriwa, wawanakaparojj cheqañcharakiwa, “kunjamtï mä awkejj munat wawapampejj lurki ukhama” (Prov. 3:11, 12). Ukhamajj maynitï Bibliamp ewjjtʼistani ukhajja, janiw ukajj Jehová Diosajj jiwasatak coleratäkaspas ukham sañ munkiti. Antisas jiwasar munasiskakitapwa uñachtʼayi (Heb. 12:6). ¿Kunjamanakatsa Jehová Diosajj jiwasat wal kusisitap uñachtʼayaraki?

¿KUNJAMANAKATS JEHOVÁ DIOSAJJ JIWASAT WAL KUSISITAP UÑACHTʼAYARAKI?

15. ¿Khitinakarus Jehová Diosajj espíritu santop churi, ukat kuna toqetsa jan payachasiñasäki?

¹⁵ Jehová Diosajj khitinakattï wal kusiski ukanakarojja, espíritu santopwa churi (Mat. 12:18). Akham sasaw jisktʼassna: “¿Kunanaktï espíritu santojj utjayki ukarjam sarnaqatajti jakäwijan uñachtʼayasktjja?” sasa. Ak amuytʼañäni, ¿Jehová Diosar janïr uñtʼkayäta ukhat sipans jukʼamp paciencianëjjtati? Jumatï espíritu santon achup taypinkki ukanak taqpach uñachtʼayañatak chʼamachasisksta ukhajja, Jehová Diosajj jukʼampiw jumat kusispacha, janiw ukat payachasiñamäkiti (“ Espíritu santon achupajj akanakawa:” siski uka recuadro liytʼäta).

16. 1 Tesalonicenses 2:4 textorjamajj ¿khitinakarus Jehová Diosajj suma yatiyäwinak yatiyapjjañapatak uttʼayi? ¿Uk yatisajj kunjamas jumajj jikjjatasta?

¹⁶ Jehová Diosajj khitinakattï wal kusiski ukanakarojja, suma yatiyäwinak yatiyapjjañapatakiw uttʼayi (1 Tesalonicenses 2:4 liytʼäta). Kunjamsa Jocelyn kullakajj ukan cheqätap amuyäna uk uñjañäni. Mä urojja, kullakajj wali desanimataw alwajj sartäna. Jupajj akham siwa: “Jan chʼamani, jan kuns lurirjamaw amuyasiyäta. Ukampis precursorat serviskayäta, ukürojj predicañaw waktʼarakitäna. Ukatwa Jehová Diosar orasisajj predikir mistuyäta” sasa. Uka alwajj Mary sat mä warmimpiw Jocelyn kullakajj parläna, suma chuyman uka warmejj “Bibliat yatichäm” satajj iyaw sarakïnwa. Mä qhawqha phajjsinakatjja, utajar leqtʼankta uka alwajj Diosaruw yanaptʼa  mayisiskayäta sasaw uka warmejj Jocelyn kullakar säna. ¿Kunsa kullakajj ukat yateqäna? Jupajj akham siwa: “Jehová Diosajj ‘wal nayajj jumat kusista’ siskitaspas ukhamänwa” sasa. Cheqas janiw taqe jaqenakajj predicacionan istʼapkistaniti, ukampis kunjamsa suma yatiyäwinak yaqha jaqenakar yatiyañatak chʼamachastan uk uñjasajja, Jehová Diosajj wal kusisi, janiw ukat payachasiñasäkiti.

17. ¿Jesusajj juchampit jiwañampit kutsuykistu ukat Vicky kullakajj kamsänsa, ukat kunsa yateqasma? (Salmo 5:12).

¹⁷ Jesusajj juchampit jiwañampit kutsuykistu ukajj valoraniwa, ukarjamaw Jehová Diosajj khitinakattï wal kusiski ukanakarojj uñji (1 Tim. 2:5, 6). Jesusajj juchampit jiwañampit kutsuykistu ukar inas jiwasajj confiystan, bautisatäjjarakstan, ukampis ¿qhawqsa Jehová Diosajj jiwasat kusisi ukat payachasiskaktanti? Ukhamächi ukhajj jan ak armañäniti, janiw chuymasarojj confiyañasapunïkiti, ukampis Jehová Diosarojj confiysnawa. Jesusajj juchampit jiwañampit kutsuyki ukar confiyirinakarojja, Diosajj cheqapar sarnaqer jaqetwa uñji, jupanakar bendisiñwa arsuwayaraki (Salmo 5:12 liytʼäta; Rom. 3:26). Vicky sat mä kullakarojja, Jesusajj juchampit jiwañampit kutsuykistu uka toqet lupʼiñaw wal yanaptʼawayi. Jehová Diosajj nayar wal munasitu sañajj jupatak chʼamäkchïnsa, akham sasaw qhepat säna: “Jehová Diosajj walja tiempow wali pacienciamp uñjitäna [...]. Ukhamäkchïnsa, ‘janiw nayjam jaqerojj munaskasmati, janirakiw Yoqaman sacrificiot loqtasitapajj juchanakaj perdonañatakejj alcanzkaspati’ sasas Diosar sapa kut siskirista ukhamänwa” sasa. Jiwasatï Vicky kullakjam Jesusajj juchampit jiwañampit kutsuykistu ukat lupʼiñäni ukhajja, qhawqsa Jehová Diosajj munasistu uk amuyañäniwa, jiwasat wal kusisitapats janiw payachaskañäniti.

18. Jiwasatï alajjpachankir Awkisar munasiskstan ukhajj ¿kunsa amtañasa?

¹⁸ Aka yatichäwin yateqawayktan ukarjam lurañatakis chʼamachaskchiñänejja, inas awisajj mä jukʼa desanimaschiñäni, “¿Jehová Diosajj nayat kusispachati?” sasin jisktʼasirakchiñäni. Ukhaman uñjasisajj ak amtañamawa: “Jehová Diosajj khitinakatï jupar munasisipkaki” ukanakat wal kusisi (Sant. 1:12). Ukhamajj Jehová Diosar jakʼachasiskakim, kunjamanakats jupajj jumat wal kusisitap uñachtʼaytam uk uñjañatakis chʼamachasiskakim. Janipun ak armamti: Diosajj “janiw sapa mayni jiwasanakat jayankkiti” (Hech. 17:27).