Jesusajj jiwasar juchampit jiwañampit kutsuyañatak wilap wartasiwayki uka toqekiw juchanakasat perdonatäsna (Efes. 1:7). Ukhamäkchisa, “Diosajj wali paciencianïtap laykuw kuna juchanakatï nayrajj luraskäna ukanaksa perdonarakïna” sasaw Bibliajj qhanañchi (Rom. 3:25). Mä arunjja janïr Jesusajj jakäwip sacrificiot loqtaskäna ukhatpachaw Diosajj juchanak perdonjjäna. ¿Kunjamsa cheqap leyinakap jan pʼakintasajj uk luraspäna?

Jehová Diosajj jupar confiyirinakar salvañatakejj mä ‘wawaw’ jutani sasaw mä promesa luräna, uk arskäna ukhatpachaw niyas jaqenakar juchampit jiwañampit kutsuyjjaspa ukhamäna (Gén. 3:15; 22:18). Jaqenakar juchampit jiwañampit kutsuyañatakejja, Jesusajj horasapar jakäwip churañatakejj jankʼakïñapänwa, Jehová Diosajj taqe chuymaw ukar confiyäna (Gál. 4:4; Heb. 10:7-10). Jesusajj aka oraqen Diosan representantepäkäna ukhajja, Diosar confiyirinakan juchanakap perdonañatakejj autoridadanïnwa. Janïras juchampit jiwañampit jaqenakar kutsuykchïnjja, jutïrin sacrificiot loqtasiñapäkäna ukarjamaw Jesusajj juchanak perdonaspäna (Mat. 9:2-6).