1, 2. ¿Kunsa maynejj janïr bautisaskasajj lurañapa?

 PASÏR phesqa maranakanjja, mä millonats jilaw Jehová Diosan Testigopjam bautisasiwayapjje. Jupanakat jilapartejj Timoteo discipuljamaw Biblian cheqa yatichäwinakap ‘wawatpach’ yateqapjjäna (2 Tim. 3:14, 15). Yaqhepanakajj jilïrëjjasa jan ukajj jukʼamp jilïrëjjasaw Jehová Diosat yateqapjjarakïna. Niya jichhanakakiw mä warmejj Testigonakamp Bibliat yateqasajj 97 maranejj bautisasiwayi.

² ¿Jumajj Bibliat yateqasktati? Jan ukajj ¿Testigo awk taykamach Bibliat yatichasipktam? Ukhamächi ukhajj inas bautisasiñ amtasksta. ¡Ukajj wali askiwa! Ukampis janïr bautisaskasajj Jehová Diosaruw nayraqat jakäwim katuyasiñama. Aka yatichäwinjja, Diosar jakäwis katuyasiñajj kamsañs muni ukaw qhanañchasiskani. Wakichtʼatäjjäta ukhajj Diosar jakäwim katuyasiñatakisa bautisasiñatakis kunatsa jan ajjsarañamäki uka toqets yatjjataskarakiñäniwa.

DIOSAR JAKÄW KATUYASIÑAJJ ¿KAMSAÑSA MUNI?

3. Jehová Diosar jakäwip katuyasipkäna ukanakat mä qhawqhanit qhanañchtʼam.

³ Bibliarjamajja, Diosar jakäw katuyasiñajj mä sagrado luräwitak yaqhachatäña sañ muni. Israelitanakajj Jehová Diosar katuyat markäpjjänwa. Ukampis yaqhep israelitanakajj mä suma luräwi phoqañatak Jehová Diosar katuyatäpjjänwa. Jupanakat maynejj Aaronänwa, Jehová Diosajj jachʼa jilïr sacerdotëñapatakiw jupar ajllïna. Ukatwa turbantep nayräjjarojj qorit lurat llijkir mä placanïna, “Diosajj Aaronar jupatak yaqhachatapwa  ukajj uñachtʼayarakïna” (Lev. 8:9). Nazareonakajj mä suma luräwi phoqañatak Jehová Diosar katuyatäpjjarakïnwa. Nazareo arojja, nazir siski uka hebreo arutwa juti, “yaqhachata” jan ukajj “katuyata” sañ muni. Nazareonakajj kuna mandatonakatï Moisesan Leyiparjamajj jupanakatak utjkäna ukarjamaw lurapjjañapäna (Núm. 6:2-8).

4. 1) ¿Kunatakis Jehová Diosar jakäwis katuyastanjja? 2) “Jupa pachpat armtʼaspan” siski ukajj ¿kamsañsa muni? (Dibujo uñjjattʼarakïta).

⁴ Jehová Diosar jakäwis katuyastan ukhajja, Jesusan discipulopäñwa amttanjja, Jehová Diosan munañap lurañaw jakäwisan nayrankaraki. ¿Kunamp lurañas wakisiraki? Jesusajj akham sänwa: “Maynitejj nayar arkañ munchitojja, jupa pachpat armtʼaspan” sasa (Mat. 16:24). “Jupa pachpat armtʼaspan” sasin traducitäki uka griego arojja, “jan jupatakik jakjjpanti” sasaw traducisirakispa. Jehová Diosar jakäwim katuyasjjäta ukhajja, kunanakatï jupan munañap lurañat jarkʼkiristam ukanak apanukjjañamawa (2 Cor. 5:14, 15). “Jañchin lurañanakapsa apanukjjañamawa”, ukanakat mayajj qʼañu jucha lurañawa (Gál. 5:19-21; 1 Cor. 6:18). ¿Ukanakamp phoqañajj chʼamäpachati? Jumatï Jehová Diosar munassta, mandatonakapajj nayan askijatakiwa sasin amuyaraksta ukhajj janiw kuna chʼamäkanisa (Sal. 119:97; Is. 48:17, 18). Nicolas jilatajj akham siwa: “Jehová Diosan mandatonakapjja, munañam jan lurayktam uka celdan rejanakaparjamaw uñjasma, jan ukajj zoologicon leonanakat jarkʼaqer rejanakaparjamaw uñjasma” sasa.

5. 1) ¿Kunjamsa maynejj Jehová Diosar jakäwip katuyi? 2) Diosar jakäw katuyasiñampi bautisasiñampejj ¿kunansa jan kikpäpki? (Fotonak uñjjattʼarakïta).

⁵ ¿Kunjamsa maynejj Jehová Diosar jakäwip katuyasispa? “Jumarukiw adoräma, jakäwijan juman munañam lurañaw nayrankani” sasaw mä oracionan mä promesa Diosar lurañapa.  Mä arunjja, taqe chuymapampi, taqe almapampi, taqe amuyupampi, taqe chʼamapamp jupar munasiñatakiw mä promesa luraski (Mar. 12:30). Jan khitin uñjkataw Diosar jakäwim katuyasiñama, Jehová Diosampikiw uk parltʼasiñama. Ukampis bautismojj taqenin uñjkataw lurasi. Ukhamatwa mayninakajj Jehová Diosar jakäwim katuyasjjatam yatipjjani. Jehová Diosar jakäwim katuyasiñatak mä promesa luratamajj wali sagradowa. Uka arsutam phoqañatakiw chʼamachasiñama, ukham lurañamwa Jehová Diosajj munaraki (Ecl. 5:4, 5).

¿KUNAS JEHOVÁ DIOSAR JAKÄWIM KATUYASIÑATAK YANAPTʼIRISTAM?

6. ¿Kunatsa maynejj Jehová Diosar jakäwip katuyasi?

⁶ Jehová Diosar munasitamatwa jakäwim jupar katuyäta. Diosar munasitamajj janiw aleq ukhamakïkiti, jan ukasti jukʼat jukʼat jupat yateqasasa, ‘yatiñanïsasa’, ‘jupar jukʼamp uñtʼjjasas’ jukʼampiw jupar munasitamajj jilti (Col. 1:9). Bibliat yatjjatasajja, 1) Jehová Diosan cheqapun utjatapatsa, 2) espíritu santopamp Biblia qellqayatapatsa, 3) mä markanïtapatsa, uka markap toqe munañap phoqasiyatapats janiw payachasktanti.

7. ¿Kunanaksa Jehová Diosar jakäwip katuyasiñ munirejj lurañapa?

⁷ Maynitï Jehová Diosar jakäwip katuyasiñ munchi ukhajja, Biblian fácil amuykañ yatichäwinakap sum yatiñapawa, Diosan mandatonakaps phoqañapawa, yateqki ukanakat yaqhanakar parlañatakis chʼamachasiñaparakiwa (Mat. 28:19, 20). Ukhamarus Jehová Diosar wal munasiñapa, taqe chuymaw jupa saparuk adorañ munañaparaki. Jumatï Jehová Diosar taqe chʼamamamp munasjjsta ukhajja,  janiw Bibliat yatichirimar kusisiyañ laykukejj Diosar jakäwim katuyasiñsa bautisasiñs amtkätati. Jumatï waynästa jan ukajj tawaqösta ukhajja, janirakiw awk taykamar kusisiyañ laykukisa jan ukajj amigonakaman bautisasipjjatap laykukis uk lurkätati.

8. Yuspärañampi Diosar jakäw katuyasiñampejj ¿kunansa niya pachpakïpjje? (Salmo 116:12-14).

⁸ Kunanaksa Jehová Diosajj juma layku lurawayi uka toqet lupʼïta ukhajja, yuspärañatwa jakäwim jupar katuyasiñ munäta (Salmo 116:12-14 liytʼäta). Bibliajja “taqe suma regalonakasa perfectöki taqe uka regalonakasa” Jehová Diosatwa juti siwa (Sant. 1:17). Diosajj churawaykistu uka suma regalojj Jesús Yoqapan sacrificiot loqtasitapawa. Uka suma regalo utjatapatwa jumajj Diosan amigopäsma, wiñayatakis jakarakisma (1 Juan 4:9, 10, 19). Ukhamajj Diosan jumar wal munasitapatsa taqe kuntï juma laykojj lurawayki ukats jupar jakäwim katuyasisaw yuspärasma (Deut. 16:17; 2 Cor. 5:15). Uka toqetwa “¡Wiñayatakiw kusisit jakasisma!” sat libron parli, ukajj 46 yatichäwi, punto 4 ukankiwa. Ukanjja, kimsa minutonakan mä videow utjaraki, “¿Kunanaksa Diosarojj mä regaljam chursna?” satawa.

¿DIOSAR JAKÄWIM KATUYASIÑATAKISA BAUTISASIÑATAKIS WAKICHTʼATÄJJTATI?

9. ¿Kunatsa maynejj chuymapat Jehová Diosar jakäwip katuyasiñ amtañapa?

⁹ Diosar katuyasiñatakisa bautisasiñatakis janis wakichtʼatäkasma ukham inas amuyassta. Inas Jehová Diosar istʼañatakejj jakäwiman cambionak lurañamajj wakischi, jan ukajj inas Diosar jukʼamp confiyañatakejj walja tiempojj wakisirakchi (Col. 2:6, 7). Ak amtapunim: Bibliat yateqerinakajj janiw taqenejj mä pachpak Diosar serviñan jiltapkiti. Janirakiw taqe wayn tawaqonakajj mä pachpa maranikejj Diosar serviñan jiltapkiti. Ukhamajj Diosar serviñan jiltañatakejj kuna cambionak lurañamas wakisi uk sum amuytʼasim, ukarjam lurarakim, janipun mayninakamp igualasimti (Gál. 6:4, 5).

10. ¿Diosar jakäwim katuyasiñatakisa bautisasiñatakis janïr wakichtʼatätam amuyassta ukhajj kunsa lurasma? (“ Testigo awk taykanïpki uka wayn tawaqonakataki” sat recuadro liytʼarakïta).

¹⁰ Jehová Diosar jakäwim katuyasiñatak janïr wakichtʼatätam amuyassta ukhajja, uka amtam phoqañatakejj chʼamachasiskakim. Jehová Diosaruw wakiski uka cambionak lurañatakejj yanaptʼa mayiñama (Filip. 2:13; 3:16). Jupajj oracionanakam istʼaniwa jaysarakiniwa, janiw ukat payachasiñamäkiti (1 Juan 5:14).

¿KUNATSA YAQHEPAJJ AJJSARAYASIPJJE?

11. ¿Kunjamsa Jehová Diosajj jupat jan jitheqtañasatakejj yanaptʼistani?

¹¹ Yaqhepajj Diosar katuyasiñatakisa bautisasiñatakis wakichtʼatäjjapjjewa, ukampis ajjsarayasipjjewa. Inas mä jachʼa juchar purtʼasiña, expulsat uñjasiñ ajjsarayasipjjchi. Ukampis Bibliajja, Jehová Diosajj ‘jupatakjam sarnaqapjjañapataki, jupar wal kusisiyapjjañapatakiw’ servirinakapar kunatï wakiski uk churani sasaw qhanañchi (Col. 1:10). Ukhamajj cheqaparjam kuns lurañatakejj Diosaw chʼam churätam, jan ukat payachasimti. Jehová Diosajj waljaniruw ukham yanaptʼawayi (1 Cor. 10:13). Ukhamïpanwa jukʼanikejj expulsat uñjasipjje. Jehová Diosan yanaptʼapampejj janiw jupat jitheqtksnati.

12. ¿Kunas mä jachʼa juchar jan purtʼasiñatakejj yanaptʼistani?

¹² Pantjasirinakjamajja, taqeniw jan wali lurañanakamp yantʼat uñjastanjja (Sant. 1:14). Ukampis mä tentacionan uñjasisajja, jumaw kunsa luräta uk amtjjañama. Kunsa jakäwiman  luräta jan ukajj jan lurkäta ukajj jumatäjjewa. Yaqhep jaqenakajj kunjamas jikjjatastan kunsa lurañäni uk janis jiwas pachpajj controlañ puedksna ukhamsa amuyapkchejja, ukajj janiw cheqäkiti. Kunjamas jikjjatastan kunsa lurañäni ukanak controlañ yateqsnawa. Ukatakejj walja yanaptʼanakaw utjistu: sapüru Jehová Diosar oraña, Bibliat yatjjatañatak mä programanïña, tantachäwinakampir predicacionampir saraña. Ukanak lurañäni ukhajj Diosar jakäwis katuyaskañäni uk sumwa phoqañäni. Janiw sapäktanti, Jehová Diosaw jiwasampïski (Gál. 5:16).

13. ¿Kunsa Joseat yateqsna?

¹³ Janïr mä tentacionan uñjaskasajj kunsa lursna ukwa amuytʼasiñasa, ukaw Jehová Diosat jan jitheqtañatakejj yanaptʼistani. Ukham lurapkäna uka jaqenakan sarnaqäwipajj Bibliankiwa, jupanakajj jiwasjam pantjasir jaqenakäpjjarakïnwa. Jupanakat maynejj Joseänwa. Potifaran esposapajj kutin kutiniw ikintasiñäni sasin jupar säna. Ukampis Joseajj uka warmir kamsanisa uk sum yatïna. Bibliajja, “Joseajj janiw jupamp ikintasiñ munkänti” siwa. “¿Kunjamarak nayajj uka jan wal luririststi, ukat Dios contra juch lurarakiriststi?” sasaw Joseajj säna (Gén. 39:8-10). Ukhaman uñjasisajj kunsa lurani uk Joseajj sum yatjjäna, Potifaran esposapajj janïr jupar kamskipanwa kunsa lurani uk Joseajj yatjjäna. Yantʼat uñjasjjäna ukhajja, janiw sañajj jupatak facilakëjjänwa.

14. ¿Kunjamsa Jehová Diosajj uñiski ukanak rechazañ yateqsna?

¹⁴ Joseat yateqasisajj ¿kunsa Diosat jan jitheqtañatakejj lursna? Mä tentacionan uñjasisajj kunsa lurañäni uk jichhatpachaw sum amuytʼasiñasa. Kunanaktï Jehová Diosajj uñiski ukanak jankʼak rechazañwa yateqañasa, janipuniw ukanak lurañ mä jukʼsa piensañasäkiti (Sal. 97:10; 119:165). Ukaw mä jachʼa juchar jan purtʼasiñatak yanaptʼistani. Mä tentacionan uñjasiñäni ukhajj kunsa lurañäni uk sum yatjjañäni.

15. ¿Kunjamsa Jehová Diosar ‘taqe chuym thaqaskatam’ uñachtʼayasma? (Hebreos 11:6).

¹⁵ Kunatï cheqäki uk jikjjatatam amuyjjpachätawa, Jehová Diosar taqe chuyma serviñs munjjarakpachätawa. Ukampis inas Diosar katuyasiñamatakisa bautisasiñamatakis mä kunas jarkʼaskstam. Ukhamächi ukhajja, kuntï David reyejj lurkäna ukwa lurasma, akham sasaw Jehová Diosar ruwtʼasirakisma: “Dios  Tata, chuymaj uñantita, chuymajsa uñtʼarakim. Chuymaj uñantita, llakisiykitu uka amuyunakajsa uñtʼarakim. Kuna jan wali lurañ amuyunakas nayan utji uk uñjam, wiñay thaknam irpita” sasa (Sal. 139:23, 24). Diosar jakäwim katuyasiñataki bautisasiñatak chʼamachasisajja, Jehová Diosar ‘taqe chuym thaqaskatamwa’ uñachtʼayäta. Ukham luririnakarojj Diosajj bendisiwa siw Bibliajja (Hebreos 11:6 liytʼäta).

JEHOVÁ DIOSAR JAKʼACHASISKAKIM

16, 17. ¿Kunjamsa Jehová Diosajj Testigonakan wawanakaparojj congregacionar irpani? (Juan 6:44).

¹⁶ Jesusajja, Jehová Diosaw jaqenakarojj markapar irpani sasaw säna (Juan 6:44 liytʼäta). ¡Ukajj wali sumapuniwa! ¿Uk yatiñajj jumatak kunjamakis uk lupʼirïtati? Jehová Diosajj markapar irpanki taqe uka jaqenakan kunatï walïki ukwa uñji. Jupatakejj sapa mayni servirinakapaw ‘wali munatäpjje’ jan ukajj ‘wali valoranit uñjatäpjje’ (Deut. 7:6, nota). Jumarojj ukham uñjaraktamjja.

¹⁷ Wayn tawaqo, papit mamitamatï Bibliat yatichaskstam ukhajja, papit mamitajaw congregacionar irpanitu, janiw Jehová Diosajj irpankituti sasin inas amuysta. Ukampis Bibliajj akham siwa: “Diosar jakʼachasipjjam, jupajj jumanakar jakʼachasirakiniwa” sasa (Sant. 4:8; 1 Crón. 28:9). Ukhamajj jumaw nayraqat Diosar jakʼachasiñama, ukatsti jupajj jumar jakʼachasirakiniwa. Jehová Diosajj janiw mä grupo taypinkkasmas ukhamak uñjktamti. Taqe khitinakatï congregacionankapki ukanakarojja, Jehová Diosaw sapa maynir irpani. Testigonakan wawanakaparus jupaw irpaniraki. Kunapachatï maynejj nayraqat Jehová Diosar jakʼachasi ukhajja, kunjamtï Santiago 4:8 textojj siski ukarjamajj jupajj jakʼachasirakiwa (2 Tesalonicenses 2:13 liytʼarakïta).

18. ¿Kuna toqetsa jutïr yatichäwin yatjjataskañäni? (Salmo 40:8).

¹⁸ Jesusajj bautisaskäna ukhajja, taqe kunanaktï Awkipajj jupar maykäna ukanak lurañatakiw jupar presentasïna (Salmo 40:8 liytʼäta; Heb. 10:7). Kunapachatï jumajj Jehová Diosar jakäwim katuyasïta bautisasirakïta ukhajja, Jesusat yateqasitamwa uñachtʼayäta. Jutïr yatichäwinjja, bautisasjjasin Jehová Diosat jan jitheqtas serviskakiñatakiw yanaptʼätam.