1. ¿Jesusajj kunatsa discipulonakapatakejj wali yateqaskayäna, ukat kunsa jupanakajj lurapjjäna? (Nayrïr paginankir dibujo uñjjattʼäta).

JESUSAJJ aka oraqenkkäna ukhajja, kusisit chuymampiw yatiyirïna, discipulonakapajj ukham yatiyaraksna ukwa muni (Juan 4:35, 36). Jesusajj discipulonakapampïskäna ukhajja, jupanakajj kusisitaw yatiyapjjerïna (Luc. 10:1, 5-11, 17). Ukampis Jesusar katuntjjapjjäna, jiwayjjapjjäna ukhajja, mä jukʼa tiempojj janiw predicañ munjjapjjänti (Juan 16:32). Jaktjjäna uka qhepatsti, Jesusajj predicación nayrar uchapjjañapatakiw chʼamañchtʼäna. Alajjpachankjjäna ukhasti, wali kusisitaw yatiyapjjäna, ukatwa enemigonakapajj akham sapjjäna: “Jumanakajj Jerusalén markpacharuw yatichäwinakamamp phoqantapjjtajja” sasa (Hech. 5:28).

2. ¿Kunjamsa Jehová Diosajj predicatasar bendisistu?

² Nayra cristianonakarojj Jesusaw predicapjjañapatakejj yanaptʼäna, Jehová Diosan bendicionapampejj waljaniw suma yatiyäwinak istʼapjjäna. Sañäni, 33 maran Pentecostés urunjja, mä 3.000 jaqenakaw bautisasipjjäna (Hech. 2:41). Discipulonakajj walipuniw jiljjattäna (Hech. 6:7). Qhepa urunakanjja, walja jaqenakaw suma yatiyäwinak istʼapjjani sasaw Jesusajj arsuwayäna (Juan 14:12; Hech. 1:8).

3, 4. 1) ¿Kunatsa yaqhep cheqanakan predicañajj chʼamakïspa? 2) ¿Kunsa aka yatichäwin yatjjataskañäni?

³ Taqeniw kusisit chuymampi yatiyaskakiñatak chʼamachastanjja. Yaqhep cheqanakan yatiyañajj facilakiwa. Kunattejj  walja jaqenakaw Bibliat yatichayasiñ munapjje, ukhamïpansti yaqhepanakan sutinakapjja, mä listarukiw tiemponïñkamajj qellqtʼapjje. Ukampis yaqhep cheqanakanjja, Bibliat yatichayasiñ munirinak jikjjatañajj chʼamawa, jukʼanirukiw jilat kullakanakajj utanakapan jikjjatapjje, jupanakat yaqhepajj janiw Bibliat yatichayasiñ munapkiti.

⁴ Jakasktan ukjantï predicañajj chʼamächi ukhajja, aka yatichäwin kuna ewjjtʼanakattï yatjjatkañäni ukaw yanaptʼistapa. Walja jaqenakampi parlañatakejj kunsa yaqhep jilat kullakanakajj lurapjje, suma yatiyäwinak jan istʼañ munapki ukhas kunjamsa kusisita, jan qarjtasa yatiyaskaksna ukwa yatjjataskañäni.

5. ¿Kuna jan walinakansa walja Testigonakajj uñjasipjje?

⁵ Jaqenakaru utapan parlañajj sapürutjamaw walja Testigonakatakejj jukʼamp chʼamäjje. Yaqhepajj guardian cuidata edificionakajj utjki, mantañajj wali controlatäki uka zonanakanwa jakasipjje. Ukanak cuidirinakajj janiw utanin jan invitatanakarojj mantaykiti. Yaqhep lugaranakanjja, jilat kullakanakatakejj utat uta yatiyañajj janiw chʼamäkiti, ukampis jukʼa jaqenakakwa utapan jikjjatapjje. Yaqhep jilat kullakanakajja, jukʼa jaqek utjki uka jiskʼa markanakanwa predicapjje. Maynimpi parlañatakejj inas wali jaya viajipjjañapächi, ukampis purisajja, janiw khitirus utapan jikjjatapkiti. Jiwasatï ukhaman uñjasstan ukhajja, ¿kunsa jan qarjtañatakisa walja jaqenakampi parlañatakis lursna?

6. ¿Kunansa predicañajj chawlla katuñampi sasejja?

⁶ Jesusajja, predicacionajj chawlla katuñampi sasiwa sänwa (Mar. 1:17). Chawlla katurejj inamayakis awisajj walja horanak chawlla katur sarkchejja, janiw qarjtkiti, jan ukasti yaqha horasana, yaqha lugarana, jan ukajj kunayman toqet katuñatakiw chʼamachasi. Jiwasajj ukhamarakiw predicañatak lursna. Kunjamsa lursna uk mä qhawqha uñjañäni.

7. ¿Kunayman horasan predicsna ukhajj kunas pasaspa?

⁷ Janiw mä pachpa horaruki yatiyañasäkiti. Kuna horasas jaqenakajj utapankki uka horaru yatiyir sarañäni ukhajja, walja jaqenakampiw parlañäni. Jaqenakajj janis utapankchejja, kuttʼanipjjaniwa. Walja jilat kullakanakajja, tardenaka, arumthapinak predicasaw walja jaqenak jikjjatapjje. Uka horasanakaw jaqenakajj tiemponïpjje, parlañsa munapjjaraki. David sat jilïr irpirjamaw luraraksna. Mä rato predicasajja, jan khitis jistʼarkäna uka utanakar wasitamp leqtʼiriw compañeropamp sarapjje. Jilatajj akham siwa: “Payïr kutin sarapkta ukhajja, walja jaqenakwa jikjjatapjjta, ukajj wali musparkañawa” sasa. *

8. ¿Kunjamsa Eclesiastés 11:6 texton siski ukarjam predicacionan lursna?

⁸ Aka yatichäwejj kuna textot apstʼatäkitï ukajja, jan qarjtas kusisita yatiyaskakiñatakiw chʼamañchtʼistu (Eclesiastés 11:6 * liytʼañataki). Párrafo 7, ukan parlaniwayktan uka David jilatajj janiw qarjtkänti. Walja utanakwa leqtʼäna, qhepatsti mä utan Bibliat yatjjatañ munir mä chacharuw jikjjatäna. Uka chachajj akham sänwa: “Kimsaqallqo maraw akan jakjjta, ukampis jichhapuniw mä Testigor punkujan uñjta” sasa. David jilatajj akham siwa: “Walja kuti kuttʼasin maynir utapan jikjjattan  ukhajja, jupanakat jilapartejj wali sumwa istʼapjje, ukwa yateqawayta” sasa.

9. ¿Utanakapan jan jikjjatapki uka jaqenakar yatiyañatakejj kunsa yaqhep jilat kullakanakajj lurapjje?

⁹ Janiw mä pachpa lugaranaki yatiyañasäkiti. Utanakapan jan jikjjatapki ukanakar yatiyañatakejja, yaqhep jilat kullakanakajj kunayman lugaranakan predicañwa yantʼapjje. Sañäni, jachʼa edificionakajj utji uka zonanakanjja, janiw utat uta yatiyañjamäkiti, antisas callenakan predicasa, carritonakamp yatiyasaw jilat kullakanakajj jaqenakar jikjjatapjje. Ukhamatwa ajanuy ajanu uka jaqenakamp parltʼapjje. Yaqhep jilat kullakanakajja, plazanakana, ferianakana, mercadonakanwa jaqenakajj sum istʼapjje, Bibliat apstʼat qellqatanaksa munapjje sasaw sapjjaraki. Bolivia markankiri, Floiran sat jilatajj congregacionanak tumptʼiriwa, jupajj akham siwa: “Una de la tarde, tres de la tarde horasanakaw mercadonakana, tiendanakana yatiyapjjta, uka horasanakajja, aljirinakajj mä jukʼa tiemponïsipkiwa. Jilaparte jaqenakaw sum istʼapjje, yamas yaqhepanakarojj Bibliat yatichañwa qalltapjjta” sasa.

10. ¿Taqe jaqenakampi parlañatakejj kunsa lurañasa?

¹⁰ Kunayman toqetwa yatiyañasa. Mä territorion maynimp parltʼañatak walja kutis visitañatak kutʼksna ukham amuytʼañäni. Uka jaqer jikjjatañatakejj kunayman horaruw utapar sartanjja. Ukampis janiw jikjjatktanti. ¿Kunjamatsa jupar jikjjatsna? Eslovaquia markankir mä kullakajj akham siwa: “Utanakapan jan jikjjatkta ukanakatakejj cartanakwa qellqta, kuntï utapar visitasajj siskiriskayäta ukanakwa qellqta” sasa. ¿Kunsa ukat  yateqsna? Mä territorion taqeniru yatiyañatakejja, kunayman toqet yatiyañatakiw chʼamachasiñasa.

11. ¿Kunatsa yaqhepanakajj predicatajj jan istʼañ munapki?

¹¹ Yaqhepajja, predicatajj janiw istʼañ munapkistuti. Diosatsa, Bibliatsa janiw yatjjatañajajj wakiskiti sasaw amuyapjje. Inas tʼaqesiñanak utjipan Diosat jan yatiñ munapkchiti, inas religión pʼeqtʼirinakan Biblian yatichäwiparjam jan sarnaqapjjepan Bibliat jan yatiñ munapkchiti. Yaqhepajja, trabajopata familiapata jan ukajj problemanakapat llakisisaw kunjamsa Bibliajj yanaptʼaspa uk jan amuyapkiti. ¿Kuntï yatiyktan uk jan istʼañ munapki ukhajj kunjamsa jan qarjtasa kusisita yatiyaskaksna?

12. ¿Kunjamsa predickasajj Filipenses 2:4 texton siski ukarjam lursna?

¹² Jaqenakat llakisiñasawa. Qalltan jan istʼañ munapkäna ukanakat waljanejja, jupanakat cheqapuni llakisitas amuyasajj istʼjjapjjewa (Filipenses 2:4 liytʼañataki). Sañäni, parlaniwayktan uka David jilatajj akham siwa: “Maynejj janiw yatiñ munkti sapjjetu ukhajja, Biblia, Bibliat apstʼat qellqatanak imasjjapjjtwa, kunatsa jan yatiñ munki uk yatjjatañatakiw chʼamachasipjjta” sasa. Maynejj jupanakat llakisi ukjja, jaqenakajj amuyapjjewa. Kuntï siskañäni uk armasipjjaspawa, ukampis kunjamsa jupanakar uñjayätan uk janiw armapkaniti. Maynitï jiwasamp jan parlañ munkani ukhajja, jupat llakisitasajj luratasansa, ajanusansa qhanaw amuyasiñapa.

13. ¿Kuntï yatiyktan uk jaqenakan istʼañ munapjjañapatakejj kunsa lursna?

¹³ Kuna toqetsa jaqenakajj yatiñ munapjjaspa, kunas yanaptʼaspa uka toqenakat parltʼasaw jupanakat llakisitas uñachtʼayaraksna. Sañäni, ¿utanin mä kunap uñjasajj wawanïtapti amuytan? Awk taykanakajja, kunjamsa Biblian ewjjtʼanakapajj wawanak sum uywañataki, familian kusisita jakasiñatak yanaptʼaspa ukanak toqetwa yatiñ munapjjaspa. ¿Utanin punkupajj walja candadonakaniti? ‘Lunthatanakajj walipunëjjewa, wali ajjsarayasisaw jakastanjja, ukampis taqe ukanakajj wiñayatakiw tukusjjani’ sasaw qhanañchtʼsna. Kuna toqetsay parlkchiñänejja, maynitï istʼistani ukhajj kunjamsa Bibliajj jupar yanaptʼaspa uk amuyañapatakiw yanaptʼañasa. Párrafo 10 ukan parlaniwayktan uka kullakajj akham siwa: “Kunjamsa Bibliajj yanaptʼawayitu uka toqetwa lupʼta” sasa. Ukaw kullakarojj jan  pächasisa taqe chuyma parltʼañatak yanaptʼi, uk jaqenakajj amuyapjjewa.

14. Proverbios 27:17 texton kuntï siski ukarjamajja, ¿kunjamsa maynimpi predicañajj yanaptʼistu?

¹⁴ Mayninakampiw yanaptʼayasiñasa. Nayrïr patak maranakanjja, kunjamsa Pablojj jaqenakar yatiyirïna, yatichirïna ukwa Timoteor yatichäna, ukatjja mayni jilat kullakanakar uk yatichañapatakiw chʼamañchtʼäna (1 Cor. 4:17). Jiwasajj Timoteot yateqasisaw congregacionasankir experienciani jilat kullakanakat yateqasiraksna (Proverbios 27:17 liytʼañataki). Shawn sat jilatat parltʼañäni. Jupajj mä jiskʼa markanwa mä qhawqha tiempojj precursorat servïna. Ukan jaqenakajj religionanakapar wal munasipjjäna. ¿Kunas jan aynachtʼañatak yanaptʼäna? Jupajj akham siwa: “Predicañatak compañtʼirejj utjkäna ukhajja, compañtʼayasipunirïtwa. Mä utat yaqha utar visitir sarkasajja, kunjamsa sum yatichapjjerista uka toqetwa parltʼasipjjerïta. Sañäni, maynimpejj kuna toqettï parltʼaniwayapkta uka toqetwa amthapipjjerïta, ukatjja maynitï uka pachpa sapjjetaspa ukhajj kamsapjjeristsa, uka toqetwa parltʼasipjjerïta” sasa.

15. ¿Predikir sarañatakejj kunatsa orasiñasapuni?

¹⁵ Jehová Diosaruw yanaptʼa mayiñasa. Predikir sarañatakejj Diosar yanaptʼa mayisiñasapuniwa. Espíritu santopatï jan yanaptʼkistaspajja, janiw kuns lurañ puedksnati (Sal. 127:1; Luc. 11:13). Kunansa yanaptʼatäñ muntan uk qhanwa Diosar mayiñasa. Sañäni, Diosar uñtʼañ munasipki suma chuymanïpki uka jaqenakar jikjjatañatak yanaptʼita sasaw mayissna. Ukatsti ukarjam lurañataki, taqe jaqenakar yatiyañatakiw chʼamachasiñasa.

16. ¿Bibliat sapaki yatjjatañajj kunjamsa predicacionan yanaptʼistaspa?

¹⁶ Bibliat sapaki yatjjatañatakejj tiempo apsusiñasawa. Bibliajj akham siwa: ‘Jumanak pachpa Diosan munañap yatipjjam. Diosan munañapajj sumawa, perfectowa, jupan chuymapsa kusisiyarakiwa’ sasa (Rom. 12:2). Bibliajj kuntï yatichki ukat jan pächasktan ukhajja, jan pächasisaw predicaraktanjja. Eslovaquia markankir kullakajj akham siwa: “Bibliat kunanaktï qalltan yateqawaykta ukar jukʼamp confiyañajaw wakisïna, uk niya jichhanakakiw amuyasiwayta. Ukatwa mä Lurirejj cheqapuniw utjaski, Bibliajj cheqapuniw Diosan Arupäski, Diosan markapajj jichha tiempon cheqapuniw utjaski sañatakejj kuna razonanakas utji uk sum yatjjatta” sasa. Bibliat sapaki yatjjatañaw Diosar jukʼamp confiyañataki, kusisita predicañatak yanaptʼawayitu sasaw uka kullakajj saraki.

17. ¿Jesusajj kunatsa jan qarjtas kusisita predicaskakïna?

¹⁷ Yaqhep jaqenakajj janis Jesusar istʼañ munapkchïnjja, jan qarjtasa kusisit yatiyaskakïnwa. ¿Kunatsa? Kunatï cheqäki uk jaqenakan yatipjjañap wakisitapwa yatïna, ukatwa walja jaqenakar yanaptʼañ munäna. Yaqhepajj qalltan janiw Diosan Reinopat istʼañ munapkaspänti, ukampis qhepat istʼjjapjjaspänwa, ukwa Jesusajj yatïna. Familiapampejj ukaw pasäna. Kimsa mara chikataniw Jesusajj aka oraqen predicäna, ukapachajja janiw ni mä jilapas discipulopäkänti (Juan 7:5). Ukampis jiwatat jaktjjäna uka qhepatjja, cristianoruw tukjjapjjäna (Hech. 1:14).

18. ¿Kunatsa predicaskaktanjja?

¹⁸ Diosan arunakap yatiyktan ukanakat khitis Diosan serviripar tukuni uk janiw yatktanti. Yaqhepanakajj janiw kuntï yatichktan ukar jankʼak istʼapkiti. Jan istʼañ munapkistu ukanakasa, jiwasar sum sarnaqatas uñjasa,  jan qarjtas kusisita predikir uñjasajja, tiempompejj ‘Diosar jachʼañchjjapjjarakispawa’ (1 Ped. 2:12).

19. 1 Corintios 3:6, 7 textorjamajja, ¿kunsa jan armañasäki?

¹⁹ Jiwasas maynirojj predickstan ukat yaticharakstanjja, ‘Diosaw juparojj jiltayi’ uk janipuniw armañasäkiti (1 Corintios 3:6, 7 liytʼañataki). Etiopía markankiri, Getahun sat jilatajj akham siwa: “Mä territorion awisaki predicaski ukanjja, 20 maranak jilaw naya sapaki Testigoyäta. Ukampis jichhajj 14 publicadoranakaw ukan utj-jje. 13 ukhaniw bautisasjjapjjaraki, uka taypinjja esposajampi kimsa wawanakajampiw jakhutaraki. Sapa tantachäwinakanjja, mä 32 ukhaniw tantachasipjje” sasa. Uka jilatajja, jan qarjtas predicatapata, Jehová Diosaw suma chuyman jaqenakarojj markapar apanini sasin pacienciampi suytʼatapat wal kusisi (Juan 6:44).

20. ¿Kunansa salvir sariri mä grupo jaqenakar uñtasitätanjja?

²⁰ Jehová Diosatakejj taqe jaqenakaw wali valorani. Akapacha janïr tukuskipana jaqenakan Diosan markapar mantapjjañapatak Jesusamp chika trabajiñajj mä suma bendicionawa (Hageo 2:7). Predikir sarktan ukhajja, kunjamtï mä minan allintat jaqenakar mä grupo jaqenakajj salvir sarapki ukhamätanwa. Uka grupot inas mä qhawqhaniki jaqenakar jakkiri jikjjatapjjchini, ukampis taqenin trabajipjjatapaw jukʼamp wakiskirejja. Predicañampejj ukhamarakiwa: Supayan akapachapatjja, qhawqha jaqenakarus salvasiñapatak yanaptʼañäni uk janiw yatktanti, ukampis Diosajj jiwasanakat mayniruw jupanakar yanaptʼayistaspa. Bolivia markan jakasiri, Andreas sat jilatajj akham siwa: “Maynin Diosar uñtʼañapatakisa bautisasiñapatakis taqeniw yanapttʼanjja” sasa. Ukhamajj jan qarjtasa kusisita yatiyañatak chʼamachasiskakiñäni. Ukhamtï lurañänejja, Jehová Diosajj bendisistaniwa, wali kusisitaw yatiyarakiñäni.