1, 2. ¿Kuna jan walinakansa walja Testigonakajj uñjasipjje?

APÓSTOL Pablojja, Timoteorusa ukat taqe cristianonakarus suma yatiyäwinak yatiyirjamajj sum phoqapjjañapataki, Diosarus sum servipjjañapatakiw chʼamañchtʼäna (2 Tim. 4:5). Cheqas taqeniw uka ewjjtʼarjam lurañatak chʼamachastanjja, ukampis awisajj uk phoqañajj chʼamakiwa. Walja jilat kullakanakajj predicañ wal ajjsarayasipjje (2 Tim. 4:2). Sañäni, yaqhep jilat kullakanakajja, kawkjantï Diosar serviñajj jarkʼatäki uka cheqanakanwa jakapjje. Predicasajj carcelan jistʼantataw uñjasipjjaspa, ukhamäkchisa predicasipkakiwa.

² Jehová Diosan servirinakapajj kunayman jan walinakanwa uñjasipjje ukaw jupanakar aynachtʼayaspa. Waljanejja familiapar kunatï wakiski uk churañatakikisa walja horanakwa sapüru trabajipjjañapa. Jupanakajj jukʼamp predicañ munasipkiwa, ukampis semana tukuyanakajj wali qaritaw jikjjatasipjje. Yaqhepanakajja, wali usutäpjjatap layku jan ukajj edadanëjjatap laykuw jukʼak predicapjje, yamas yaqhepajj janiw utats mistuñ puedipkiti. Yaqhepasti, Diosajj janis jupar valoranit uñjkaspa ukhamwa amuyasipjje. Oriente Medio toqen jakasiri, Mary * sat mä kullakajj akham siwa: “Diosatakejj janis valoranïkirista ukham jan amuyañajatakejj wal chʼamachasiñajawa, ukaw wal aynachtʼayitu. Predicañat sipansa, ukaruki tiempojsa chʼamajsa aptʼasitajat wal llakisirakta” sasa.

3. ¿Kunanakatsa aka yatichäwin yatjjataskañäni?

³ Kuna jan walinakansay uñjaskstanjja, Jehová Diosaw uka jan walinakar atipjañatakisa qhawqtï puedktan ukarjam serviskakiñatakis chʼam churistani. Aka yatichäwinjja, kunjamsa  Jehová Diosajj yanaptʼistu ukwa yatjjataskañäni. Ukampis nayraqatjja, kunjamsa jan walin uñjasipkäna ukhajj predicaskakiñatak Pablorusa Timoteorus chʼam churäna ukwa uñjaskañäni.

4. ¿Kuna jan walinakansa apóstol Pablojj uñjasïna?

⁴ Pablojj kunayman jan walinakanwa uñjasïna. Jawqʼjata, qalampi kʼupjata, carcelar llawintata uñjaskäna ukhajja, Jehová Diosan yanaptʼapwa munäna (2 Cor. 11:23-25). Pablojj janis Diosatakejj valoranïkaspa ukhamaw awisajj jikjjatasïna, uk sañ janiw pʼenqaskänti (Rom. 7:18, 19, 24). ‘Chʼapir uñtataw’ mä usojj jupar tʼaqesiyäna, uk apaqañapatakiw Diosar wal mayisïna (2 Cor. 12:7, 8).

5. ¿Jan walinakan uñjaskasas kunanaksa Pablojj luräna?

⁵ Apóstol Pablojj jan walinakansa uñjaskchïnjja, Jehová Diosaw predicaskakiñapatakejj chʼam churäna. Jupajj kunanaksa luräna ukanakat amuytʼañäni. Roma markan mä utan jistʼantatäkäna ukhajja, taqe chuymaw judionakan pʼeqtʼirinakap nayraqatan suma yatiyäwinak arjjatäna, inas gobiernon trabajipkäna ukanak nayraqatansa ukham lurarakchïna (Hech. 28:17; Filip. 4:21, 22). Roma marka apnaqeri reyin guardianakaparusa, jupar visitir jutapkäna ukanakarus predicarakïnwa (Hech. 28:30, 31; Filip. 1:13). Uka pacharakiw Diosajj cartanak qellqañapatak Pablor amuytʼayäna, uka cartanakajj nayrïr cristianonakarojj wal yanaptʼäna, jichha tiemponsa ukhamarakiw wal yanaptʼistu. Pablor ukham lurir uñjasajja, Roma markankir jilat kullakanakajj wali chʼamañchtʼataw jikjjatasipjjäna, ‘Diosan arunakapsa jan ajjsartʼasaw taqe chʼamampi yatiyapjjarakïna’ (Filip. 1:14). Pablojj kunanaktï lurañ munkäna uk janis taqpach lurañ puedkchïnjja, qhawqtï puedkäna ukarjamaw luräna, kunanakatï jupar paskäna ukajj suma yatiyäwinak jukʼamp yatiyasiñapatakiw yanaptʼäna (Filip. 1:12).

6. 2 Corintios 12:9, 10 textorjamajja, ¿kunas apóstol Pablorojj lurañanakap sum phoqaskakiñapatak yanaptʼäna?

⁶ Kunanaktï Diosar serviñatak Pablojj lurkäna uk Jehová Diosan yanaptʼapampi luratapwa amuyasïna. Ukatwa jupajj akham sasin qellqäna: ‘Kunapachatï nayajj aynachtʼatäkta ukhaw Diosan chʼamapajj jukʼamp qhan amuyasi’ sasa (2 Corintios 12:9, 10 liytʼañataki). Pablojj arknaqatasa carcelansa yaqha  jan walinakansa uñjaskchïnjja, Jehová Diosajj espíritu santop toqew lurañanakap sum phoqaskakiñapatak chʼam churäna.

7. ¿Lurañanakap sum phoqaskakiñatakejj kuna jan walinakarus Timoteojj atipjäna?

⁷ Timoteo waynajj Diosan yanaptʼapampirakiw lurañanakap sum phoqäna. Sañäni, apóstol Pablojj misionerot wali jayanak viajkäna ukhajja, Timoteojj compañänwa, awisajja yaqhep congregacionanakar visitañapataki chʼamañchtʼañapatakiw Pablojj khitarakïna (1 Cor. 4:17). Inas Timoteojj uka asignacionanak jan phoqerjam amuyaschïna. Inas ukat Pablojj akham sischïna: “Jan khitis jumarojj waynäskatam laykojja jiskʼachpanti” sasa (1 Tim. 4:12). Maysa toqetjja, uka tiempon Timoteojj sapa kutiw usuntäna sasaw Bibliajj qhanañcharaki, ukajj jañchipan mä chʼapïkaspas ukhamänwa (1 Tim. 5:23). Ukampis Timoteojja, Jehová Diosan espíritu santopaw predicaskakiñatakisa jilat kullakanakar yanaptʼaskakiñatakis chʼam churitani sasaw confiyäna (2 Tim. 1:7).

8. ¿Jichhürunakan kunjamsa Jehová Diosajj chʼamañchtʼistu?

⁸ Jichha tiemponjja, Jehová Diosar jan jitheqtas serviskakiñatakejj Jupaw “jaqen chʼamapat jilankki” uka chʼam churistu (2 Cor. 4:7). Jehová Diosajj jiwasar chʼamañchtʼañataki Jupar jan jitheqtas serviskakiñatakejj pusi yanaptʼanakwa churistu, ukanakajj akanakawa: oración, Biblia, jilat kullakanaka, predicación.

9. ¿Orasiñajj kunjamsa yanaptʼistu?

⁹ Oración. Efesios 6:18 textonjja, Pablojj akham sänwa: ‘Taqe horasana, Diosar mayisisipkakim’ sasa. Ukham lurañäni ukhajja, Diosajj chʼamañchtʼistaniwa. Bolivia markan jakasiri, Jonnie sat jilatajj jan walinakan uñjaskäna ukhajj Jehová Diosan yanaptʼapwa uñjäna. Awk taykapampi, esposapampejj kimspachaniw wal usuntapjjäna. Jupanakar cuidañajj wali chʼamänwa, mamitapajj jiwjjänwa, esposapampi papitopampejj wali jaya tiempotwa waliptapjjäna. Jonnie jilatajj akham siwa: “Wali llakita jikjjatasirïta ukhajj kunjamäskayätsa uk Diosar oracionan yatiyañaw wal yanaptʼitäna” sasa. Jehová Diosaw ukanak aguantañatakejj chʼam churäna. Uka pachpa markanjja, Ronald sat jilïr irpirejj mamitapan canceranïtapwa yatïna, mä phajjsi pasatatsti mamitapajj jiwjjänwa. ¿Kunas jupar jan aynachtʼañatakejj yanaptʼäna? Jupajj akham siwa: “Oraskta ukhajj Jehová Diosaruw kunjamas jikjjatasta uk yatiyta, Jupaw taqet sipansa, nayat sipansa sum amuyitu” sasa. Awisajja, wali llakita jikjjatasisajja, janiw Jehová Diosarojj kun mayisiñsa puedjjsnati, ukampis kunjamas jikjjatastan uk sañajj chʼamäkchinisa, Jehová Diosajj jupar orasiñasatakiw invittʼistu (Rom. 8:26, 27).

10. Hebreos 4:12 textorjamajja, ¿kunatsa Biblia liyiñasa kuntï liyktan ukjjat lupʼiñas wali wakiskiri?

¹⁰ Biblia. Chʼam katjjatañataki chuymachtʼatäñatakejja, apóstol Pabljamarakiw Biblia liysna (Rom. 15:4). Bibliat mä cheq liytʼtan, ukarjam lupʼiraktan ukhajja, Jehová Diosaw kunjamsa ukajj problemasan yanaptʼistaspa uk amuyañasatak espíritu santopampi yanaptʼistaspa (Hebreos 4:12 liytʼañataki). Párrafo 9, ukan parlaniwayktan uka Ronald jilatajj akham siwa: “Sapa aruma Biblia liyiñ yatintatajat wal kusista, Jehová Diosajj kunjam Diosasa kunja munasiñampis servirinakaparojj uñji uka toqenakat wal lupʼta, ukaw chʼam katjjatañatak yanaptʼitu” sasa.

11. ¿Llakita uñjaskäna uka kullakarojj kunjamsa Bibliajj chʼamañchtʼäna?

 ¹¹ Diosan arunakapat lupʼiñaw problemanakasat jan sint llakisiñatak yanaptʼistaspa. Mä viuda kullakat amuytʼañäni. Mä jilïr irpirejja, Job libro liyiñapatakiw chʼamañchtʼäna, ukaw yanaptʼätam sasaw sarakïna. Liytʼäna ukhajja, Job chachajj kunjamtï amuykäna ukajj janiw walïkiti sasaw kullakajj amuyäna. Chuymapanjja, “Job, problemanakamatakwa lupʼisktajja” sasaw sarakïna. Ukhaw Job chachjam piensaskatap amuyasïna. Ukajj jan nayrjam amuyjjañatakiw yanaptʼäna, esposopan jiwatapat jan sinti llakisiñatakis chʼam churarakïna.

12. ¿Jehová Diosajj kunjamsa jilat kullakanakas toqe chʼamañchtʼarakistu?

¹² Jilat kullakanaka. Jehová Diosajj jilat kullakanakas toqew chʼamañchtʼarakistu. Jilat kullakanaka, ‘purapat chʼamañchtʼasiñatakejj’ walpun uñjañ munapjjsma sasaw Pablojj qellqäna (Rom. 1:11, 12). Párrafo 2, ukan parlaniwayktan uka Mary kullakarojj jilat kullakanakampïñaw wal gusti. Jupajj akham siwa: “Kunanakatï paskitäna uk janiw jilat kullakanakajj yatipkänti, ukampis Jehová Diosajj jupanak toqew yanaptʼawayitu. Jupanakajj arunakapampi jan ukajj mä tarjeta toqew chʼamañchtʼapjjetäna, ukpunwa munaskayäta. Nayjam problemanakan uñjasiri kullakanakamp parltʼaña, experiencianakapat yateqañaw yanaptʼawayarakitu. Congregacionankir jilat kullakanakajj nayar wal munasipjjatapwa jilïr irpirinakajj amuyayapjjarakitu” sasa.

13. ¿Tantachäwinakan kunjamsa maynit maynikamajj chʼamañchtʼassna?

¹³ Tantachäwinakaw maynit maynikama chʼamañchtʼasiñatakejj yanaptʼarakistu. Tantachäwinakanjja, qhawqsa jilat kullakanakasar munastan, kuntï lurapki ukatsa qhawqsa yuspärtan ukanak sasaw jupanakar chʼamañchtʼsna. Sañäni, janïr tantachäwi qalltkipanjja, Diosar jan serviri esposoni mä kullakarojj Peter sat mä jilïr irpirejj akham sänwa: “Tantachäwinakan jumar uñjañajj wal chʼamañchtʼapjjetu. Sojjta wawanakamarojj wali suma isthaptʼata, arstʼapjjañapatakis suma wakichtʼatwa irpantajja” sasa. Kullakajj wal yuspäräna, niyas jachirjamaw akham sarakïna: “Ukham chʼamañchtʼatäñjja walpun munaskayäta” sasa.

14. ¿Predicañajj kunjamsa jiwasar yanaptʼistu?

¹⁴ Predicación. Jaqenakajj istʼapjjchistusa janisa, predicasajj wal kusistanjja, chʼamañchtʼarakistuwa (Prov. 11:25). Stacy sat mä kullakajj jupa pachpaw uk uñjäna. Mä familiarapajj congregacionat jaqsuta uñjasïna ukhajja, wali llakitaw jikjjatasïna. ¿Jupar yanaptʼañatakejj kunamp lurañajas wakisispäna? sasaw walja kuti jupa pachpa jisktʼasïna, ukatakwa lupʼiskäna. ¿Kunas yanaptʼäna? predicañaw yanaptʼäna, territoriopankir jaqenakarojj kunjamsa yanaptʼaspa, uka toqetwa predikir mistusajj lupʼïna. Kullakajj akham siwa: “Uka tiemponjja, Jehová Diosajj Bibliat yateqasin ratuki nayrar sartiri mä suma yateqerimpiw bendisitu, ukajj walpun chʼamañchtʼawayitu. Jukʼampis predikir sarañaw yanaptʼawayitu” sasa.

15. ¿Kuntï Mary kullakajj siski ukajj kunsa yatichistu?

¹⁵ Awisajj kunaymaninakan uñjasisaw jukʼak predikjjsna. Ukampis jiwasatï qhawqtï puedktan ukarjam lurañatak chʼamachasiñäni ukhajja, Jehová Diosarojj wal kusisiyañäni. Parlaniwayktan uka Mary kullakajj yaqha aru parlir congregacionar cambiasjjäna ukhajja, janis kunans yanaptʼkaspa ukhamaw amuyasïna. Kullakajj akham siwa: “Mä qhawqha tiempojja, predicacionan jukʼakwa parlirïyäta, mä textokwa Bibliat liytʼiriyäta, jan ukajj  mä tratadokwa chuririyäta” sasa. Uka aru parlirinakat sipansa, janis kunan yanaptʼkaspa ukhamaw kullakajj amuyasïna. Ukampis uka aru janis sum parlañ yatkchïnjja, Jehová Diosajj jupar serviñapatakejj yanaptʼaspänwa, ukwa qhepat amuyjjäna. Jupajj akham saskakiwa: “Biblian yatichäwinakapajj qhana amuykañawa, uka cheqa yatichäwinakaw jaqenakar cambiapjjañapatak yanaptʼi” sasa.

16. ¿Utat jan mistuñ puedipki ukanakarojj kunas jan aynachtʼañatak yanaptʼaspa?

¹⁶ Jiwasanakat yaqhepajja, janiw utat mistuñ puedktanti, ukampis predicañ wal muntanjja, uk Jehová Diosajj yatiwa. Ukhamajj Jupaw jiwasar cuidkistu ukanakar predicañataki, doctoranakar predicañatak yanaptʼistaspa. Kunanaktï nayrajj lurkayätan ukanak jichhajj jan lurañ puedjjasajj aynachtʼsnawa. Ukampis, jichhajj kunjamsa Jehová Diosajj yanaptʼaskistu uk amuyañäni ukhajja, jan walinakan uñjaskañäni ukhas jan aynachtʼas aguantañatakejj chʼamanïñäniwa.

17. Kunjamtï Eclesiastés 11:6 textojj qhanañchkejja, ¿jaqenakajj janis Diosar uka ratpach serviñ amtapkchini ukhas kunatsa predicaskakiñasa?

¹⁷ Diosan arunakap satktan ukanakat kawkïris saphintani, kawkïris jiltani uk janiw yatktanti (Eclesiastés 11:6 liytʼañataki). Sañäni, 80 jila marani, Barbara sat kullakajja, teléfono toqe, carta toqew sapüru prediki. Mä urojja, mä sobreruw Yatiyañataki 1 de marzo, 2014 revista uchäna, uka revistan mä yatichäwipajj “¿Kunsa Diosajj jiwas layku lurawayi?” sat pʼeqeñchäwinïnwa. Kullakajj jan yatkasaw jaya tiempo jan Testigöjjäna uka chacha warmir uka carta apayäna. Jupanakasti kutin kutinwa uka revista liyipjjäna. Chachajja, Jehová Dios pachpas jupar parlkaspa ukhamwa amuyasïna. Ukatsti panpachaniw tantachäwinakarojj sarañ qalltjjapjjäna. 27 jila maranak pasatatwa wasitampi Testigöjjapjjäna. Qellqkäna uka cartajj kunjamsa yanaptʼäna uk uñjasajja, Barbara kullakajj wali kusisita chʼamañchtʼata ukhamaw jikjjatasïna.

18. ¿Jehová Diosajj jiwasar chʼama churañapatakejj kun lurañasasa?

¹⁸ Kunjamtï uñjaniwayktanjja, Jehová Diosajj kunayman toqetwa chʼamañchtʼistu. Sañäni, oración toqe, Biblia toqe, jilat kullakanak toqe, predicación toqew yanaptʼistu. Ukanakampi yanaptʼayasiñäni ukhajja, Jehová Diosaw yanaptʼitani, Jupajj yanaptʼañ munituwa sasinwa confiyasktanjja. Alajjpachankir Awkisar confiyapjjapuniñäni, Jupajja khitinakatï ‘phoqat chuymamp servipki ukar chʼamap uñachtʼayañwa’ muni (2 Crón. 16:9, TNM).