Ukhaman uñjasitajaw jakäwij mayjtʼayäna. Ukhat aksaruw Diosar thaqañ qalltta. Ukampis kunas uka chʼamaka aruman pasäna uk janïr cuentʼkasajja, kunas wawäskayäta ukhajj pasitäna uk cuenttʼapjjäma. Ukaw Diosat yatjjatañ munañatak yanaptʼitäna.

Guesnain sat jiskʼa markanwa 1937 maran nasta, minani uka markajj Francia markat norte toqenkiwa. Papitujajj carbón apsusaw minan trabajïna, trabajiñajj wali wakiskirïtapwa yatichitäna. Taqe kuns cheqapar uñjañwa yaticharakitäna. Mineronakajj wali peligroso lugaranakan trabajipkäna ukanakaruw papitujajj yanaptʼañ munäna, ukatwa sindicatonakaru, huelganakaru mitisïna. Markankir tatakuranakajj janiw kuntï yatichapkäna ukarjam lurapkänti ukatwa papitujajj jupanakatak coleräna. Jupanakat waljanejja, wali suma utanakanwa jakasipjjäna, ukhamäkchïnsa mineronakaruw qollqsa manqʼsa mayipjjäna. Mineronakajj apenasaw manqʼañatakis qollqe jikjjatasipkäna. Ukham lurapjjatapaw papitujar wal colerayäna, ukatwa religionat jan kuns yatichkitänti. Yamas Diosat janipuniw parlapjjerïkti.

 Marat maratjam jilsjjasajja, cheqaparjam jan uñjaskäna ukarojj uñisjjarakiyätwa. Yaqha markat jutasin Francia markan jakapkäna ukanakarojj yaqhachapjjerïnwa, ukajj janipuniw gustkitänti. Yaqha markat jutir wawanakampi pelot anatañajj wal gustitäna. Mamitajajj Polonia markatänwa. Kunayman markat jutir jaqenakajj mä igualaki sumankañan jakasipjjaspa ukwa munayäta.

1957 maranwa cuartelar jawsayapjjetu, ukhamatwa qalltan siskayäta uka Argelia markan qollunakapar puriwayta. “¡Dios Tata yanaptʼita!” sasin wali sustjat siskayäta ukhajja, mä salvaje asnompikiw uñthapista, janiw enemigo soldadökataynati. Uk uñjasajj janiw sustjatäjjayätti. Kunatï ukan paskitäna ukasa, guerrasa akham jisktʼasiñatakiw yanaptʼitäna: ¿kunatakis jaktan?, ¿Diosajj jiwasat llakispachati?, ¿cheqapunit mä urojj suman jakasiñajj utjani? sasa.

Mä qhawqha tiempot awk taykajar visitañatak permiso churapjjetäna ukhajja, mä Testigoruw uñtʼawayta. Jupaw mä Biblia churitäna, ukatsti Argelia markar kuttʼasaw liyiñ qalltta. Apocalipsis 21:3, 4 textow chuymar purtʼitäna, ukan akham siwa: “Diosan tabernaculopajj jaqenakampi chikäjjewa, [...] Diosajj taqe jachanakapwa nayranakapat picharani, janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti” sasa. * Ukham arunak janipuniw liytʼirïkti. Ukatwa ukajj cheqapunïpachati sasin jisktʼasiyäta. Uka tiemponjja, janiw Diosatsa Bibliatsa kuns yatkayätti.

Cuartelat mistunisajja, 1959 maranwa François sat Testigor uñtʼawayta, jupaw Bibliat waljanak yatichitäna, sañäni Diosan sutipajj Jehová satätapwa yatichitäna (Sal. 83:18, TNM). Diosaw jan walinak akapachat chhaqtayani, aka oraqes mä suma Paraisöñapatak yanaptʼani, Apocalipsis 21:3, 4 texton qellqatäki uksa phoqayarakini sasaw yaticharakitäna.

Kuntï yatichkitäna ukajj qhanänwa, chuymaruw purtʼarakitäna. Tatakuranakan Bibliarjam jan yatichatapat wal colerasajj denunciañwa munarakiyäta. Kunjamtï papitujajj pienskäna ukhamwa amuyaskakiyäta, ukatwa uka jan walinak jankʼak chhaqtañapatak mä kuns lurañ munayäta.

François sat jilatana ukat yaqha Testigonakan yanaptʼapampiw jan ukham amuyjjayätti. Uka machaq amigonakaw cristianonakajj janiw jaqenakar juzgañasäkiti, jan ukasti Diosan Reinopat suma yatiyäwinakwa jupanakar yatiyañasa sasin amuytʼayapjjetäna. Jesusajj ukwa luräna discipulonakaparus uk lurapjjañapatakiw mayirakïna (Mat. 24:14; Luc. 4:43). Jaqenakajj kunarusay creyisipkpanjja, munasiñampi respetompi jupanakar parlañwa yateqawayta. Bibliajj akham siwa: “Tatitun esclavopajj janiw kunat chʼajjwañapas wakiskiti, antisas taqenirus munasiñampi uñjañapawa” (2 Tim. 2:24).

Cambionak lurasajja, 1959 maranwa mä asamblean bautisasta. Ukanwa mä tawaq kullakar uñtʼawayta. Jupajj Angèle satänwa. Congregacionapar visitir sarañwa qalltta, ukatsti 1960 maranwa jupamp casarasipjjta. Esposajajj wali munasiri respetasiri warmiwa, Jehová Diosaw wali valorani regalo churawayitu (Prov. 19:14).

Tiempompejja, experienciani jilatanakat waljanakwa yateqawayta. Mä chʼama luräwi sum phoqañatakejj humilde chuymanïñasawa, Proverbios 15:22 texton arunakaparjamaw lurañasaraki, ukan akham siwa: “Walja amuytʼayirinakampiw sumar mistsuñajj utji” sasa.

1964 maranwa Biblian qellqat uka arunakajj cheqäskapunitap uñjawayta. Uka maraw congregacionanak tumptʼirit uttʼayapjjetu, ukhamajj jilat kullakanakar chʼamañchtʼañataki, Jehová Diosar jukʼamp jakʼachasipjjañapatakiw congregacionanakar visittʼayäta. Ukampis 27 maranikïskataj laykojj janiw experiencianïkayätti, ukatwa awisajj jan sum lurkayätti. Ukampis jupanakat yateqasiñatakiw chʼamachasiyäta. Jukʼampis wal yatipkäna, experiencianïpkäna uka jilatanakan ewjjtʼanakapatwa waljanak yateqawayta.

Congregacionanak tumptʼirit ukhak uttʼayatäkayäta ukhajj kunas pasitäna uk amtasipuntwa. París sat markan mä congregacionar visitañ tukuyaskayäta ukhajja, experienciani mä jilatajj ‘panisak mä rato parltʼsnati’ sitänwa, nayasti “jïsa” sayätwa.

Jupajja, “Louis, ¿mä doctorajj khitinakarus qolli, usutanakaruti, jan ukajj sanonakarucha?” sasaw jisktʼitäna.

“Usutanakaruw qolli” sasaw sayäta.

Jupasti akham situwa: “Ukhamawa. Ukampis Diosar serviñan suma saytʼatäsipki uka jilatanakampikiw jukʼamp chikachastajja, jupanakat mayajj superintendente de la congregación jilatawa. Congregacionanjja, walja jilat kullakanakaw machaqäsipki, ajjsarirïpjje, jan ukajj aynachtʼatäsipki. Jupanakatak tiempo apstʼasisma, utapar visitir sarasma, jupanakampis manqtʼasisma ukhajj wal chʼamañchtʼasma” sasa.

Uka munat jilatan nayar ukham ewjjtʼatapat wal yuspärta. Jehová Diosan ovejitanakapat llakisitapajj chuymaruw purtʼitäna. Pantjasitaj amuyasiñajj chʼamäkchïnsa, jankʼakiw ewjjtʼaparjam lurta. Ukham jilatanak utjatapat Jehová Diosar wal yuspärta.

1969 ukat 1973 maranjja, walja markanakat pä jachʼa tantachäwejj Colombes (París) markan apaskäna ukan manqʼañanak toqet encargasiñatakiw uttʼayapjjetäna. 1973 maransti, mä jachʼa tantachäwinjja, mä 60.000 jaqenakaruw phesqa  urunak manqʼañ churapjjta. Kunjamsa lurapjjä uk janiw yatkayätti. Ukatwa wali sustjatayäta. Ukampis Proverbios 15:22 texton ‘amuytʼirinakampiw sumar mistuñajj utji’ siski ukarjam lurañaw mayamp yanaptʼitäna. Ukhamajja, Jehová Diosamp sum apasipki manqʼañanak toqet wali experiencianïpki uka jilatanakan yanaptʼapwa thaqawayta. Jupanakat yaqhepajja, carniceronaka, yapuchirinaka manqʼa phayirinaka, alañ toqet suma yatjjattʼatanakäpjjänwa. Jupanakan yanaptʼapampiw uka chʼama asignación sum phoqapjjta.

1973 maranjja, esposajampirojj Francia markankir Betelan servipjjañajatakiw invittʼapjjetu. Ukanjja, nayrïr asignacionajajj janiw faciläkänti, Camerún markankir jilat kullakanakaruw qellqatanak puriyañajäna. Uka markajj África cheqankiwa. 1970 marat 1993 marakamajj Testigonakan luräwipajj ukan jarkʼatänwa. Uk lurañ janiw puedkiristti sasin mayampiw ajjsarayasiyäta. Francia markan predicañ toqet encargat jilatajj kunjamas jikjjatasiyäta uk amuyitänwa. Ukatwa nayar chʼamañchtʼañatakejj akham sitäna: “Camerún markankir jilat kullakanakajj Bibliat apstʼat qellqatanak wal munapjje. Jupanakar cuidañasawa” sasa. Ukatsti ukarjamaw lurapjjta.

Walja kutiw Camerún markampi colindäkäna uka markanakar viajta, ukhamat Camerún markankir jilïr irpirinakampi tantachasiñataki. Uka jan ajjsartʼiri, wali amuytʼasir jilatanakaw Camerún markankir jilatanakar Bibliat apstʼat qellqatanak sapa kuti puriyañatak yanaptʼapjjetu. Ukham chʼamachasipjjatajat Jehová Diosajj bendisipjjetänwa. Mä 20 maranakaw ukankir jilat kullakanakajj Yatiyañataki sat revista jan falta katoqapjjäna, Nuestro Servicio del Reino sat qellqatajj sapa phajjsi mistkäna uksa jan faltaw katoqapjjarakïna.

Angèle esposajampi uñtʼasiñ qalltapkta ukhatpachaw Jehová Diosamp sum apasitap amuyayäta. Casarasisajj jukʼampiw uk amuyayäta.  Sañäni, casarasipkta uka pachpa arumajja, ‘Jehová Diosar jukʼamp serviñasatak oracionan mayimʼ sasaw sitäna. Jehová Diosajj istʼapjjetänwa.

Jehová Diosar jukʼamp confiyañatakis esposajaw yanaptʼarakitu. Sañäni, 1973 maran Betelan serviñatak invitapkitäna ukhajja, congregacionanak tumptʼirit serviskakiñ munataj laykojj Betelan serviñat pächasiyätwa. Ukampis esposajajj ‘Jehová Diosaruw jakäwis katuyastanjja, ukhamajj Diosan markapajj kuntï maykistu uk lurañasawa’ sasaw amtayitäna (Heb. 13:17). Uk satajj janiw kamsañs puedjjayätti. Ukhamajj invitación katoqasajj Betelaruw servir sarjjapjjta. Esposajajj wali amuytʼasiriwa, Jehová Diosarus cheqapuniw munasiraki. Ukham warmïtapaw chacha warmjam jukʼamp sum apasiñataki, suma amtanakar puriñatak yanaptʼawayapjjetu.

Jichhajj edadanëjjapjjstsa, Angèle esposajajj ukham suma warmikïskiwa, taqe kunanwa yanaptʼaskakitu. Sañäni, Diosan markapan escuelanakajj utjki ukanakat waljanejj inglés arutwa apasi. Ukhamasti uka escuelanakar sarañatakejja, esposajampejj uka aru sum yateqañatakiw chʼamachasipjjta. Ukatakejja, niya 75 maranïpkchiyätsa, inglés aru parlaski uka congregacionaruw cambiasipjjta. Niyakejjay Francia markan Comité de Sucursal ukan trabajstjja, uka aru yateqañatakejj jukʼa tiemponikiyätwa. Ukampis esposajampiw purapat yanaptʼasipjjayäta. Jichhajj 80 mara jilanëjjapjjstsa, tantachäwinakatakejj inglés aruta, francés arut wakichasisipkaktwa. Tantachäwinakansa predicacionansa, qhawqtï puedipkta ukarjam yanaptʼasipkaktwa. Jehová Diosajj inglés aru yateqañatak chʼamachasipjjatajarojj bendisipjjetuwa.

2017 maranjja, mä suma bendicionwa katoqapjjta. Sucursal Sarayirinakataki Esposanakapampitak Escuelaruw esposajampir invittʼapjjetu. Ukajj Centro Educativo de la Watchtower, Patterson (Nueva York) markanwa apasi.

Jehová Diosajj Jachʼa Yatichiriwa (Is. 30:20). Ukatwa servirinakapajj wayn tawaqöskpasa, edadanïskpas taqet sipan sumäki uka yatichäwi katoqapjje (Deut. 4:5-8). Jehová Diosan ewjjtʼanakaparu, experienciani jilat kullakanakan ewjjtʼanakapar istʼiri wayn tawaqonakajj suma amtaruw puripjje, jan jitheqtasaw Diosar servipjjaraki, ukwa uñjawayta. Kunjamtï Proverbios 9:9 textojj siski ukhamawa. Ukan akham siwa: “Yaticham yatiñan jaqeru, ukatsti jukʼampi yatiñanïniwa; yaticham aski jaqeru, ukatsti jukʼampiwa yatiñapajj jiljjatani” sasa.

Khä 60 maranak nayrajj kunatï uka arumajj Argelia markan qollunakapan paskitäna uk awisajj amtapuntwa. Uka arumajja, akham kusisita jakasiñ janiw yatkayätti. ¡Waljanakwa mayninakat yateqawayta! Jehová Diosajj wali suma jakasiñwa esposajampir nayampirojj regalapjjetu. Ukatwa alajjpachankir Awkita, jupar munasiri experienciani jilat kullakanakat yateqaskakiñ amtapjjta.