1. ¿Kuna wakiskir amtarus taqenis puripjjañapa?

 JICHHA tiemponjja, taqeniw aka amtar puripjjañapa: ¿taqe kunjjar apnaqañatak derechonïki uka Jehová Diosarut apoyapjjani, jan ukajj Diosan jan wali enemigopäki uka Supayaruch apoyapjjani? Taqeniw mayniruki apoyañ amtapjjañapa, janiw paypacharojj apoyapkaspati. Kuntï jaqenakajj amtapkani ukarjamaw wiñay jakañ katoqapjjani, jan ukajj janisa (Mat. 25:31-33, 46). ‘Jachʼa tʼaqesiña’ tiemponjja, Jehová Diosan jan jitheqtir servirinakapajj jakaskakiñatakiw mä marca katoqapjjani (Apoc. 7:14; Ezeq. 9:4, 6). Ukampis khitinakatï salvaje animalan marcap katoqapkani ukanakajj tukjatäpjjaniwa (Apoc. 14:9-11).

2. 1) Hebreos 10:35-39 textojj ¿kun lurañatakis chʼamañchistu? 2) ¿Kunjamsa Apocalipsis librojj yanaptʼistu?

² (Hebreos 10:35-39 liytʼäta). Jumatï Jehová Diosan gobiernop toqet saytʼasjjsta ukhajja, mä suma amtaruw puriwaytajja. Mayninakarojj uk lurapjjañapatakiw yanaptʼañ munarakpachätajja. Uk lurañatakejja, kuntï Apocalipsis librojj siski ukaw wali sum yanaptʼiristam. Mä toqetjja, uka librojj kunas Jehová Dios contra saytʼasirinakarojj pasani ukwa yatiyistu. Maysa toqetsti, Diosan gobiernopat jan jitheqtirinakajj kuna bendicionanaksa katoqapjjani ukwa yatiyarakistu. ¿Kunatsa uka yatichäwinakat yatjjatañajj wali importantejja? Jehová Diosar serviskakiñatakiw yanaptʼistani. Ukatjja kuntï yateqkañäni ukampiw mayninakarojj Diosar serviñ amtapjjañapatakisa, servisipkakiñapatakis yanaptʼsna.

3. ¿Kawkïr jisktʼanakarus aka yatichäwin qhanañchaskañäni?

³ Aka yatichäwin aka jisktʼanakaruw qhanañchtʼaskañäni: ¿Diosan gobiernopar apoyirinakajj kunsa katoqapjjani? ¿Apocalipsis libron parlki uka llijkir wila color salvaje animalar apoyañ amtapkani ukanakarojj kunas pasani?

4. ¿Apóstol Juanajj kawkïr gruporus Jesusamp chika alajjpachan saytʼatäskir uñjäna?

⁴ Apóstol Juanajja, Jehová Diosan gobiernopar apoyiri pä grupo jaqenakaruw mä visionan uñji, jupanakaw wiñay jakañsa taqpach bendicionanakapsa katoqapjje. Nayrïr gruponjja 144.000 jaqenakaw utji (Apoc. 7:4). Jupanakajj aka oraqetäpjjewa, Jesusamp chika mä gobierno jan ukajj mä Reino utjayañatakiw alajjpachar sarapjje. Taqeniw oraqjjarojj apnaqapjjarakini (Apoc. 5:9, 10; 14:3, 4). Apóstol Juanajj uñjkäna uka visionarjamajja, jupanakajj alajjpachankir Sion Qollu patjjanwa Jesusamp chika saytʼatäsipkäna (Apoc. 14:1).

5. ¿Aka oraqen jakasipki uka ajllit cristianonakampejj kunas akat mä jukʼarojj pasani?

⁵ Apostolonakan urunakapatpach jichhürunakkamajja, 144.000 jaqenak taypinkapjjañapatakejj walja jaqenakaruw ajllisiwayjje (Luc. 12:32; Rom. 8:17). Ukampis qhepa urunakanjja, 144.000 jaqenakat mä jukʼanikiw aka oraqen jakjjapjjani sasaw Juanarojj qhanañchasïna. Janïr jachʼa tʼaqesiñ tiempojj qalltkani ukhajja, ‘jiltʼapkani’ uka ajllit cristianonakajj Jehová Diosamp sumat uñjatäña qhep qhepa ‘sello’ katoqapjjani (Apoc. 7:2, 3; 12:17). Ukatjja jachʼa tʼaqesiñ tiemponwa jupanakajj alajjpachar apatäjjapjjani, ukhamat 144.000 ajllitanakat jan jitheqtas jiwawayapki ukhamarak alajjpachankjjapjje ukanakamp chikäjjañataki. Jupanakajj Diosan Reinopan Jesusamp chikaw apnaqjjapjjani (Mat. 24:31; Apoc. 5:9, 10).

6, 7. 1) ¿Kuna gruporus apóstol Juanajj uñjarakïna, ukat jupanakajj khitinakäpjjesa? 2) Aka oraqen jakasipki uka ajllit cristianonakasa ‘walja jaqenakasa’, ¿kunatsa Apocalipsis capítulo 7 ukan utjki uka arunakan phoqasiñap suyapjjañapa?

⁶ Alajjpachankapki uka grupor uñjkäna uka qhepatjja, “walja jaqenakaruw” Juanajj uñjarakïna. 144.000 ajllitanakat sipansa, uka payïr grupojj jan jaktʼkayänwa (Apoc. 7:9, 10). ¿Jupanakajj khitinakäpjjesa? Apóstol Juanarojj akham sasaw yatiyasïna: “Jupanakajj jachʼa tʼaqesiñatwa mistunipjje, kayukam purir isinakapsa tʼajjsusipjjarakiwa, Corderon wilapampiw uka isinakap janqʼoptayapjje” sasa (Apoc. 7:14). Jachʼa tʼaqesiñ tiempo jakkirpach pasasinjja, uka ‘walja jaqenakajj’ aka oraqenwa jakapjjani, wali suma bendicionanak katoqasajj kusisitäpjjarakiniwa (Sal. 37:9-11, 27-29; Prov. 2:21, 22; Apoc. 7:16, 17).

⁷ Alajjpachar sarañatak ajllitäskstansa jan ukajj aka oraqensa jakchiñänejja, ¿Apocalipsis capítulo 7 ukan utjki uka arunak phoqasir uñjañäniwa sasin creytanti? Uka tiempojja, Diosar servipki uka paypach gruponakatakejj wali kusiskañäniwa. Jehová Diosan gobiernopar apoyañ amtatasatjja, walpun kusisiñäni. ¿Kunampsa Apocalipsis librojj jachʼa tʼaqesiñ tiempot yatiyistu? (Mat. 24:21).

8. ¿Kunjamsa jachʼa tʼaqesiñajj qalltani, uk pasipan jilaparte jaqenakajj kamachapjjanisa?

⁸ Kunjamtï pasïr yatichäwin uñjawayktanjja, aka mundonkir politiconakajj niyaw Jachʼa Babiloniaru, mä arunjja oraqpachankir taqe falso religionanakar tʼunjapjjani (Apoc. 17:16, 17). Ukampiw jachʼa tʼaqesiñ tiempojj qalltani. Ukham pasatapatjja, ¿walja jaqenakat Jehová Diosar adorapjjpachäni? Janiwa. Jan ukasti, kunjamantï Apocalipsis capítulo 6 ukan siskejja, Diosar jan servipki ukanakajj aka mundonkir politiconakaru ukat negocionak luririnakaruw jarkʼaqasiñatak thaqapjjani. Uka capitulorjamajja, jupanakajj qollunakampi sasipjjewa. Niyakejjay jupanakajj Diosan Reinop toqet jan saytʼasipkchinejja, Jehová Diosajj enemigonakaparjamaw uñj-jjani (Luc. 11:23; Apoc. 6:15-17).

9. Jachʼa tʼaqesiñ tiemponjja, ¿kunatsa Jehová Diosan markapan mayjäpjjatapajj qhan amuyasini, ukat kunas pasani?

 ⁹ Jan wali jachʼa tʼaqesiñ tiemponjja, Jehová Diosar jan jitheqtas servirinakan mayjäpjjatapajj qhanaw amuyasini. Jupanakakiw aka oraqen Diosar servisipkani, janirakiw ‘salvaje animalarus’ apoyapkaniti (Apoc. 13:14-17). Jehová Diosat jan jitheqtapjjatap uñjasinjja, Dios conträpki ukanakajj colerasipjjaniwa. Ukhamïpanjja markanakajj mayachtʼasisaw oraqpachan Diosan markapar tʼunjañatak sartapjjani. Bibliajja kuntï uka mayachtʼat markanakajj lurapkani uka toqet parlkasinjja, kunjamsa Magog oraqenkiri Gog sasin uñtʼatäki ukajj Diosan markapar jan waltʼayañatak sartani uka toqetwa parlaski (Ezeq. 38:14-16). 

10. Apocalipsis 19:19-21 textorjamajja, ¿markapar atacapkani ukhajj kunsa Jehová Diosajj lurani?

¹⁰ ¿Markapar atacapkani ukhajj kunsa Jehová Diosajj lurani? Jupajj akham siwa: “Nayajj walpun colerasëjja” sasa (Ezeq. 38:18, 21-23). Ukjjarojj kunas pasani ukajj Apocalipsis capítulo 19 ukanwa qhanañchasi. Jehová Diosajj Yoqaparuw markapar jarkʼaqañataki, enemigonakapar tukjañatak khitanini. Jesusajj janiw sapakïkaniti, ‘alajjpachankir ejercitonakaw’ jupamp chikäpjjani, mä arunjja Diosat jan jitheqtir angelanakampi, 144.000 ajllitanakampiw jupamp chikäpjjani (Apoc. 17:14; 19:11-15). ¿Kunjamsa uka guerrajj tukuyani? Jehová Dios conträpki uka jaqenakasa organizacionanakasa, qʼala tʼunjatäpjjaniwa (Apocalipsis 19:19-21 liytʼäta).

11. Apocalipsis libron parlki ukanakatjja, ¿kawknïris jukʼamp kusiskañajja?

¹¹ Diosan enemigonakapajj tʼunjat uñjasipkani ukhajj Diosat jan jitheqtir cristianonakajj aka oraqen jakasipkakiniwa, ¿kunjamas uk uñjasajj jupanakajj jikjjatasipjjani? ¡Wal kusisipjjani! Jachʼa Babiloniajj jan utj-jjani ukhajj wali kusisiñaw alajjpachan utjani, ukatjja jukʼamp kusisiñaw utjani (Apoc. 19:1-3). Apocalipsis libron parlki ukanakatjja, ‘Corderon casarasïwipaw’ jukʼamp kusiskañajja (Apoc. 19:6-9).

12. ¿Kunapachas Corderon casarasïwipajj apasini? (Apocalipsis 21:1, 2).

¹² ¿Kunapachas casarasïwejj apasini? Armagedonajj janïr qalltkani ukhajj 144.000 ajllitanakajj alajjpachankjjapjjchinisa, janiw Corderon casarasiñap tiempökaniti (Apocalipsis 21:1, 2 liytʼäta). Diosan taqe enemigonakapajj Armagedón guerran tukjat uñjasipkani uka qhepatwa Corderon casarasïwipajj apasini (Sal. 45:3, 4, 13-17).

13. ¿Corderojj casaraskani ukhajj kunas pasani?

¹³ ¿Corderojj casaraskani ukhajj kunas pasani? Mä casarasïwejja, mä chachampiru mä warmimpiruw mayachtʼi. Ukhamarakiw Corderon casarasïwipan Jesucristo Reyimpi, 144.000 ‘noviapampi’ mayachthapisipjjani. Ukhamatwa Jesusampi 144.000 ajllitanakampejj 1.000 maranak aka oraqjjar apnaqañ qalltapjjani (Apoc. 20:6).

14, 15. ¿Apocalipsis capítulo 21 ukan parlki uka 144.000 ajllitanakajj kunamp sasipjjesa? (Nayrïr paginankir dibujo uñjjattʼäta).

¹⁴ Apocalipsis capítulo 21 ukanjja, 144.000 ajllitanakajj ‘Machaq Jerusalén’ sat mä suma markäkaspas ukhamwa uñachtʼayasi (Apoc. 21:2, 9). Uka markajja, “12 cimiento qalanakanïnwa”, uka qalanakansti, “Corderon 12 apostolonakapan 12 sutinaka[paw]” qellqantatäna. Uk uñjasajj apóstol Juanajj wal musparpachäna. ¿Kunatsa? Mä qalan sutip qellqantatwa uñjäna. ¡Ukajj mä jachʼa privilegiowa! (Apoc. 21:10-14; Efes. 2:20).

 ¹⁵ Uka Machaq Jerusalén markajja, janiw yaqha markanakjamäkiti. Uka markan jachʼa thakipajj suma qorit luratawa, 12 punkunakapajja 12 perlanakawa, murallapasa cimientonakapasa, kunayman suma qalanakamp kʼachachtʼatawa, largorusa, anchorusa, altorus mä pachpa medidanikiwa (Apoc. 21:15-21). Ukampis apóstol Juanajja, uka markan may faltatapwa amuyi. ¿Kunäpachasa? Jupajj akham siwa: “Uka markanjja janiw nayajj mä templo uñjkti, kuna laykutejj Taqe Chʼamani Jehová Diosaw uka markan templopajja, Corderos ukhamaraki. Uka markjjar intina, phajjsina qhantʼaniñapajj janiw wakiskänti, kuna laykutejj Diosan kʼajatapaw uka markar qhanjjatäna, lamparapajj Corderorakïnwa” sasa (Apoc. 21:22, 23). Machaq Jerusalén taypinkapki ukanakajja, Jehová Diosampëjjapjjaniwa (Heb. 7:27; Apoc. 22:3, 4). Ukatwa Jehová Diosampi Jesusampiw uka markan templopajja sasin qhanañchasi.

16. Diosan Reinopajj Waranqa Maranak apnaqkani uka tiemponjja, ¿kuna bendicionanaksa jaqenakajj katoqapjjani?

¹⁶ Ajllit cristianonakajj uka markat lupʼisajj wal kusisipjje. Ukampis aka oraqen jakañ suytʼasipki uka cristianonakas uka markat yatiñ munapjjañaparakiwa. Diosan Reinopajj Waranqa Maranak apnaqkani uka tiemponjja, Machaq Jerusalenajj walja bendicionanakwa aka oraqjjar apanini. Apóstol Juanajj akwa uñjäna: uka bendicionanakajj “jakañ churir umani mä [jawirjamaw]” jaläna, jawiran purap thiyapanjja, “jakañ qoqanakaw” utjäna, uka qoqanakan laphinakapajj “markanakar qollañatakïnwa” (Apoc. 22:1, 2). Uka tiempon jakapkani taqe uka jaqenakajja, taqe uka bendicionanak katoqasajj kusisitaw jakasipjjani. Istʼasir jaqenakajja, jukʼat jukʼatwa perfectöjjapjjani. Janiw usuntañanakasa, ni usuyasiñasa, ni llakisiñat jachañas utj-jjaniti (Apoc. 21:3-5).

17. Diosan Reinopajj Waranqa Maranak apnaqkani ukhajja, ¿khitinakas bendicionanak katoqapjjani? (Apocalipsis 20:11-13).

¹⁷ ¿Khitinakas uka suma bendicionanak katoqapjjani? Nayraqatjja Armagedón jakkir pasapkani uka walja jaqenakampi, machaq mundon nasipkani uka wawanakampiw katoqapjjani. Ukampis janiw jupanakakejj uka bendicionanak katoqapkaniti. Apocalipsis capítulo 20 ukanjja, jiwatanakajj jaktanipjjaniwa sasaw qhanañchi (Apocalipsis 20:11-13 liytʼäta). ¿Khitinakas aka oraqen jaktanipjjani? “Cheqapar sarnaqer” jaqenakaw jaktanipjjani, mä  arunjja Jehová Diosar jan jitheqtas servirinakapajj nayrajj jiwapkäna ukanakaw jaktanipjjani. Ukatjja “jan cheqapar sarnaqer” jaqenakaw jaktanipjjani, mä arunjja Jehová Diosar jan uñtʼapkäna ukanakaw jaktanipjjani (Hech. 24:15; Juan 5:28, 29). Ukampejja, ¿Diosan Reinopajj Waranqa Maranak aka oraqjjar apnaqkani ukhajj taqpach jaqenakaw jaktanipjjani sañti munasktanjja? Janiwa. Janïr jiwkasin Jehová Diosar jan serviñ munapkäna uka jan wali jaqenakajj janiw jaktanipkaniti. Jupanakarojj mä oportunidadajj churasjjänwa, ukampis jutïr Paraison jakapjjañapajj jan wakisitapwa uñachtʼayapjjäna (Mat. 25:46; 2 Tes. 1:9; Apoc. 17:8; 20:15).

18. ¿1.000 maranak tukuyatarojj kunjamas jaqenakajj jakasipjjani?

¹⁸ 1.000 maranak tukuyatarojja, aka oraqen taqe jakirinakajj perfectöjjapjjaniwa. Adanan juchap kawsajj kuna jan walinakantï uñjasktan ukanakajj janiw utj-jjaniti (Rom. 5:12). Adanan juchap kawsa maldisitäktan ukajj janiw ni mä jukʼas utj-jjaniti. Ukhamatwa 1.000 maranak tukuyarojj aka oraqen jakirinakajj ‘jakañ katoqapjjani’, kuna laykutejj perfectöjjapjjaniwa (Apoc. 20:5).

19. ¿Kunatsa qhep qhepa yantʼa utjañapajj wakisini?

¹⁹ Jiwasajj yattanwa, Jesusajj perfecto jaqënwa, Supayajj kunaymanitsa jupar yantʼkchïnjja, janiw Jehová Diosat jitheqtkänti. Ukampis Supayajj wasitat jaqenakar yantʼkani ukhajja, ¿perfecto jaqenakajj Jesusjamat Jehová Diosat jan jitheqtapkpachäni? 1.000 maranakajj tukuyjjani, Supayas mikʼayat antutatäjjani ukhaw sapa maynejj Diosat jan jitheqtirïtap uñachtʼayañapäni (Apoc. 20:7). Qhep qhepa yantʼajj utjkani ukhajj Diosat jan jitheqtirinakajj wiñay jakañ katoqapjjani, libre jakasipjjarakini (Rom. 8:21). Ukampis Dios contra saytʼirinakajja, wiñayatakiw Supayjama demonionakapjam tukjat uñjasipjjani (Apoc. 20:8-10).

20. ¿Apocalipsis libron profecianakap yatjjatasajj kunjamakis jumajj jikjjatasta?

²⁰ ¿Apocalipsis librot mä jukʼa yatjjatasajj kunjamakis jumajj jikjjatasta? ¿Kunjamsa uka musparkañ profecianakajj phoqasini uk amuytʼañajj wali kusiskañajjaya? Mayninakarojj Jehová Dios saparuki jiwasamp chika adorapjjañapatak wal invittʼañ munpachätajja (Apoc. 22:17). Kuna musparkañanakatï jutïrin paskani ukanak yatjjatasajj wali kusisitapunïtanwa, apóstol Juanjamarakiw akham sañ muntanjja: “¡Amén! Jutaskakim, Tatit Jesús” sasa (Apoc. 22:20).