1, 2. ¿Kunatsa mä toqet Apocalipsis librojj jiwasatak wali wakiskirejja?

 ¿MAYNIN fotonakap uñjjattʼirïtati? Uka fotonakan inas jan uñtʼat ajanunak uñjsta. Ukampis mä akatjamatwa mä foto uñjtajja. Jïsa, jumaw uka foton uñsttajja. Wali amuyumpi uñjjattʼasajja, kunapachas ukat kawkinsa aka foto apsupjjpachïtu sasaw lupʼiraktajja. Khitinakas uka foton jumamp chikäsipki uksa wali amuyumpiw uñjjattʼaraktajja. Uka fotojj jumatakejj wali wakiskiriwa.

² Apocalipsis librojja uka fotor uñtasitawa. Kunatsa ukham sistan uk pä toqet uñjañäni. Maya, Apocalipsis librojj jiwasatak qellqatawa. Uka libron nayrïr versiculopan akham siwa: “Aka arunakajja Jesucriston qhanañchat arunakawa, Diosaw juparojj qhanañchäna, ukhamat kunatï mä jukʼa tiempot paskani ukanakat Diosan esclavonakapar qhanañchañapataki” sasa (Apoc. 1:1). Ukhamajj uka librojja, janiw taqe jaqenakatak qellqatäkiti, jan ukasti Diosan servirinakapatakiwa, mä arunjja jiwasatakiwa. Niyakejjay Diosan markapankstanjja, Apocalipsis libron parlki uka profecianak phoqasïwi taypinkaraktanwa, mä arunjja uka foto taypinktanwa, uk yatiñajj wali askiwa.

3, 4. Apocalipsis librorjamajja, ¿kuna tiemponsa profecianakapajj phoqasiñapäna, ukat kun lurañatakis jiwasar chʼamañchañapa?

³ Paya, kuna tiemponsa Apocalipsis libron parlki uka profecianakajj phoqasiñapa ukarakiwa. Uka tiempot parlkasajja, apóstol Juanajj akham sasaw qellqäna: “Espíritu santow nayarojj Tatitun urupar irpitäna” sasa (Apoc. 1:10). Uka arunakjja, 96 mara jakʼanakaw apóstol Juanajj qellqäna. Uka tiemponjja, ‘Tatitun urup’ puriniñapatakejj walja tiempow faltaskäna (Mat. 25:14, 19; Luc. 19:12). Ukampis Biblian profecianakapajj 1914 maranwa ‘Tatitun urupajj’ qalltawayi sasaw qhanañchi,  uka maranwa Jesusajj alajjpachan Reyjam uttʼayatäjjäna. Apocalipsis libron parlki uka profecianakajj Diosan markapamp phoqasiñapäki ukanakajja, 1914 marat aksaruw phoqasiñ qalltawayi. Ukhamajj ‘Tatitun urupanwa’ jakasktanjja.

⁴ Jan armkaña tiemponwa jakasktanjja, ukhamasti Apocalipsis 1:3 texton jikjjataski uka wali munasiñampi qellqat ewjja arunakatwa amtasiñasa, ukan akham siwa: “Khititejj aka profecía arunak jachʼat liytʼki ukhamarak khitinakatejj ukan qellqat arunak istʼapki, phoqapkaraki ukanakajja kusisipjjpan. Señalat tiempojj jakʼankjjewa” sasa. Cheqas ‘uka profecía arunak jachʼat liytʼañasawa’, istʼañasarakiwa, phoqañasarakiwa. ¿Uka arunakat kawknïrinaksa phoqañasa?

5. Jehová Diosajj adoracionas katoqasiti janicha uk amuyasiñajj wali wakiskiriwa, ¿kunjamsa Apocalipsis librojj uk uñachtʼayistu?

⁵ Kunanakas congregacionanakan pasaski taqe ukanak Jesusan qhan yatitapajja, Apocalipsis libron nayrïr capitulopatpachwa qhan amuyasi (Apoc. 1:12-16, 20; 2:1). Jesusajj Asia Menor toqenkir paqallqo congregacionanakar apaykäna uka yatiyäwinakaw ukham amuyayistu. Uka yatiyäwinakanjja, qhana ewjjtʼanakwa Jesusajj nayrïr cristianonakar churäna. Uka ewjjanakaw Jehová Diosajj adoracionap katoqasiskiti janicha uk amuyasiñatak jupanakar yanaptʼaspäna. Uka ewjjanakajja, Diosan servirinakaparojj jichha tiempon yanaptʼarakiwa. ¿Kunsa ukajj yatichistu? Pʼeqtʼirisäki uka Jesucristojj Diosar serviñan kunjamäsktansa uk sumwa yati. Jupaw irpistu, jarkʼaqarakistu, nayraqatapan janiw kunas imtʼaskaspati. Jehová Diosamp sum apasktan uk jan aptʼasiñatakejj kunsa lurañasa uks yatirakiwa. Jichhajja Jesusajj churkäna uka ewjjtʼanakat mä qhawqhanakwa uñjaskañäni, ukat kunjamsa jichhürunakan uka ewjjtʼanakarjam phoqsna ukwa uñjaskarakiñäni.

6. 1) Apocalipsis 2:3, 4 textorjamajja, ¿kunas Éfeso markankir cristianonakarojj pasäna? 2) ¿Kunsa ukat yateqsna?

⁶ (Apocalipsis 2:3, 4 liytʼäta). Qalltan Jehová Diosar munaskayätan uka munasiñajj janiw chhaqtañapäkiti. Jesusajj Éfeso markankir cristianonakar apaykäna uka yatiyäwinjja, jupanakan aguantapjjatapa, jan walinakan uñjaskasajj jan qarjtas Diosar servipjjatapwa qhanañchäna. Ukampis janiw kunjamtï qalltan Jehová Diosar munasipkäna ukham munasjjapjjänti. Ukhamajj Jehová Diosajj adoracionap katoqasiñapatakejja, mayampiw uka munasiñ jiltayapjjañapäna. Jichhürunakan ukhamarakiwa. Janiw aguantañasakejj wakiskiti, jan ukasti Diosar munasitasata, jupar yuspäratasatwa aguantañasa. Jupajj janiw kuntï lurktan ukak uñjkiti, jan ukasti kunatsa uk lurtan ukwa uñjaraki. Kunatsa mä kuns lurtanjja ukaw jupatakejj wali importantejja. Jupar yuspäratasata, munasitasat adorsna ukwa Jehová Diosajj muni (Prov. 16:2; Mar. 12:29, 30).

7. 1) Apocalipsis 3:1-3 textorjamajja, ¿kunas Sardis markankir congregacionankirinakarojj pasäna? 2) ¿Kunsa ukat yateqsna?

⁷ (Apocalipsis 3:1-3 liytʼäta). Jan ikjas uñnaqasipkakiñäni. Sardis markankir congregacionankirinakajj yaqha jan walinwa uñjasipjjarakïna. Nayrajj taqe chuymas Jehová Diosar servipkchïnjja, jichhajj thayarjjapjjänwa. Ukatwa Jesusajj sartasipjjañapatak mayïna. ¿Kunsa ukat yateqsna? Kuntï jupa laykojj lurawayktan uk janiw Jehová Diosajj armaskaniti (Heb. 6:10). Ukampis janiw ikiñ horasäkiti, janirakiw janis chʼamachasiñasäjjaspa ukham amuyañ horasäkiti. Inas jichhajj nayrjam jan lurirjamäjjstanti, ukampis ‘Tatitur serviñan  walja lurañanakampi ocupatäpjjañasawa’, akapachajj tukuskani ukhakamajj jan ikjas uñnaqaskakiñasawa (1 Cor. 15:58; Mat. 24:13; Mar. 13:33).

8. ¿Kuntï Jesusajj Laodicea markankir cristianonakar siskäna ukat kunsa yateqsna? (Apocalipsis 3:15-17).

⁸ (Apocalipsis 3:15-17 liytʼäta). Jehová Diosar kusisita ukat taqe chuyma adorapjjañäni. Jesusajj Laodicea markankir cristianonakar apaykäna uka yatiyäwinjja, kuna jan walinsa uñjasipjjäna ukwa qhanstayäna. Jupanakan adoracionapajj ‘llaphikïkaspas ukhamänwa’, mä arunjja jan ganasaniw Diosar servisipkäna. Ukatwa Jesusajj “wali llakkaña, sintkaña” ukhamäpjjtawa sasin jupanakar säna. Ukhamajj mayampiw Jehová Diosar kusisita adorañ qalltapjjañapäna (Apoc. 3:19). ¿Kunsa ukat yateqsna? Janitï Jehová Diosar qalltanjam kusisita sirvjjstan ukhajja, taqe kunanaktï Diosasa markapas churkistu ukanak jukʼamp valoranitwa uñjañasa (Apoc. 3:18). Janiw akapachan sum jakasiñ munañampi apayasiñasäkiti. Jan ukasti Jehová Diosar serviñaw jakäwisan nayrankañapa.

9. Pérgamo ukat Tiatira markanakankir congregacionanakar Jesusajj ewjjtʼkäna ukarjamajja, ¿kuna jan walitsa amuyasiñasa?

⁹ Apostatanakan yatichäwinakap jan istʼapjjañäniti. Jesusajja Pérgamo markankir yaqhep cristianonakarojj cheqañchänwa, kuna laykutejj congregacionan tʼaqa tʼaq sarnaqañanakwa utjayapjjäna, sectanakwa uñstayapjjarakïna (Apoc. 2:14-16). Maysa toqetjja, Tiatira markankir cristianonakarojj felicittʼänwa, jupanakajj “Supayat jutki uka kʼari yatichäwina[karojj]” janiw istʼapkänti, cheqa yatichäwinakat katuntasipjjañapatakiw chʼamañchtʼarakïna (Apoc. 2:24-26). Diosar serviñan aynachtʼatäpkäna, kʼari yatichäwinakamp engañjayasipkäna uka cristianonakajja, arrepentisipjjañapänwa. Jiwasajj ukhamarakiw Jehová Diosan amuyup conträki uka yatichäwinak jan istʼañasäkiti. Inas apostatanakajj “Dios chuymäpkaspas ukham tuku[pjjchispa]”, ukampis janiw Dios chuyma sarnaqapkiti (2 Tim. 3:5). Jiwasatï Diosan Arupat suma yatjjatirïñänejja, kʼari yatichäwinak ratukiw amuyañäni, janirakiw ukanakar istʼkañäniti (2 Tim. 3:14-17; Jud. 3, 4).

10. ¿Pérgamo ukat Tiatira markanakankir congregacionanakar Jesusajj ewjjtʼkäna ukat kunsa yateqsna?

¹⁰ Janiw qʼañu juchanak lurañasäkiti, ni jucha luririnakarus ukhamak uñchʼukiñasäkiti. Pérgamo ukat Tiatira markanakankir congregacionanakajja, jan walinwa uñjasipjjarakïna.  Uka congregacionanakankir yaqhep cristianonakajj qʼañu jucha lurañanak janiw apanukupkänti, ukatwa Jesusajj jupanakar cheqañchäna (Apoc. 2:14, 20). ¿Kunsa ukat yateqsna? Walja maranakas Diosar sirvjjstanjja, jan ukajj walja privilegionaksa jichhajj katoqawaystanjja, qʼañu juchar purtʼasiñäni ukhajj janiw Jehová Diosajj aleq ukhamak uk uñchʼukkaniti (1 Sam. 15:22; 1 Ped. 2:16). Akapachankir jaqenakajj jukʼamp jan walinakansa sarnaqapkchejja, qʼoma sarnaqañ toqet utjki uka leyinakapar respetsna ukwa Diosajj muni (Efes. 6:11-13).

11. ¿Kunsa akhakamajj yateqawaytanjja? (“ ¿Kunanaksa yateqtanjja?” siski uka recuadro liytʼarakïta).

¹¹ ¿Kunsa akhakamajj yateqawaytanjja? Jehová Diosajj adoracionas katoqasiti janicha uk amuyasiñajj wali importantëtapwa yateqawaytanjja. Jiwasatï kuna jan wal luraskstan ukhajja, jankʼakiw Diosamp sumat uñjatäñatakejj cambiañasa (Apoc. 2:5, 16; 3:3, 16). Jesusajj congregacionanakar apaykäna uka ewjjtʼanakanjja maywa sarakïna. ¿Ukajj kunäpachasa?

12. Esmirna ukat Filadelfia markanakankir congregacionanakajj ewjjtʼanak katoqapkäna ukatjja, ¿kunsa yateqsna? (Apocalipsis 2:10).

¹² Esmirna ukat Filadelfia markanakankir congregacionanakajj kuna ewjjtʼanaksa katoqapjjarakïna uk jichhajj uñjañäni. Jesusajja uka markanakankir cristianonakarojj arknaqata uñjasisajj jan ajjsarapjjamti, kuna laykutejj Jehová Diosaw jupat jan jitheqtapjjatamat bendisipjjätam sasaw säna (Apocalipsis 2:10 liytʼäta; 3:10). ¿Kunsa uka ewjjtʼanakat yateqsna? Kunjamats arknaqatajj uñjasikipuniñäniwa, ukhamajj aguantañatak wakichtʼatäñasawa (Mat. 24:9, 13; 2 Cor. 12:10). ¿Kunatsa uk jan armañasäki?

13, 14. Apocalipsis capítulo 12 ukan parlki ukanakajj ¿kunjamansa Diosan servirinakaparojj uñjasiyi?

¹³ Apocalipsis libronjja, ‘Tatitun urupana’, mä arunjja jichhürunakanjja, Diosan servirinakapajj arknaqataw uñjasipjjani sasaw qhanañchi. Apocalipsis capítulo 12 ukanjja, Diosan Reinopajj uttʼayasjjäna uka qhepat ‘alajjpachan mä guerraw sartäna sasaw qhanañchi’. Miguelajja, mä arunjja Jesucristojja angelanakapampiw Supayampi demonionakapamp nuwasipjjäna (Apoc. 12:7, 8). Uka nuwasïwinjja, Diosan enemigonakapaw atipjat uñjasipjjäna, aka oraqer jaqoqanitäpjjarakïnwa, jichhajj aka oraqenwa jaqenakar wal tʼaqesiyasipki (Apoc. 12:9, 12). Ukham pasatapajj ¿kunjamansa Diosan servirinakapar uñjasiyi?

¹⁴ Kunsa Supayajj aka oraqen luraski ukwa Apocalipsis librojj qhanañchi. Niyakejjay alajjpachar kuttʼañ jan puedkchitejja, aka oraqen jiltʼir ajllit cristianonakaruw jan waltʼayi, uka cristianonakajj aka oraqen Diosan Reinopan representantenakapäpjjewa, “jupanakarakiw  Jesusjjat qhanañchañatakejj uttʼayatäpjje” (Apoc. 12:17; 2 Cor. 5:20; Efes. 6:19, 20). ¿Kunjamsa uka profeciajj phoqasiwayjje?

15. ¿Apocalipsis capítulo 11 ukan parlki uka ‘pä testigonakajj’ khitinakäpjjesa, ukat kunas jupanakar pasäna?

¹⁵ Reinon yatiyäwinakap yatiyasiñapatak pʼeqtʼapkäna uka ajllit cristianonakaruw Supayajj Diosan enemigonakapampi jan waltʼayäna. Jupanak taypinjja jachʼa privilegionakani jilatanakaw utjäna. Jupanakajja Apocalipsis libron parlki uka jiwayat ‘pä testigonakäpjjewa’ * (Apoc. 11:3, 7-11). 1918 maranjja, predicación pʼeqtʼapkäna uka kimsaqallqo jilatanakaw kʼarintata uñjasipjjäna, walja tiempow carcelan llawintat uñjasipjjañaparakïna. Jaqen amuyuparjamajja, uka ajllitanakan luräwinakapajj chhaqtayatäjjaspas ukhamänwa.

16. ¿Kuna musparkañas 1919 maran pasäna, ukhat jichhakamajj kunsa Supayajj luraskaki?

¹⁶ Apocalipsis capítulo 11 ukan parlki uka profeciajja, uka ‘pä testigonakajj’ mä jukʼa tiempot jaktjjapjjaniwa sasaw qhanañchi. Predicación pʼeqtʼapkäna uka ajllit jilatanakajj janïr mä mara carcelankapkäna ukhaw uka profeciajj wali musparkañ phoqasïna. Marzo 1919 maranwa jupanakajj carcelat mistjjapjjäna, qhepatjja kunanakatti juchañchapkäna ukanakat janiw juchañchjjapjjänti. Jilatanakajj jankʼakiw wasitat predicañatakisa yatichañatakis chʼamachasipjjäna. Ukampis Supayajj Diosan servirinakaparojj jan waltʼayaskakïnwa. Ukat aksarojj Diosan taqe servirinakaparuw jan waltʼayañatakejj arknaqawayi, ukajj “mä jawirar” uñtasitawa (Apoc. 12:15). Ukatwa taqenin ‘aguantapjjañasasa Diosar confiyapjjañasas’ wakisi (Apoc. 13:10).

17. Diosan servirinakapajj Supayan jan waltʼayañatak arknaqatas uñjasipkchejja, ¿kuna jan suyat yanaptʼsa katoqawayapjje?

¹⁷ Apocalipsis 12 capitulopajj Diosan servirinakapajj jan suyat yanaptʼwa katoqapjjani sasaw qhanañcharaki. Kuna laykutejj oraqejj jawirar uñtasit arknaqäwirojj umantjjänwa sasaw qhanañchi (Apoc. 12:16). Ukhamapuniw pasäna. Awisajj Supayan apnaqat aka jan wali pachan utjki uka institucionanakajja, mä arunjja justicia uñjapki ukanakat yaqhepajja, Diosan markapar yanaptʼawayapjjewa. Diosan servirinakapajj walja kutiw tribunalanakan atipjawayapjje, ukhamatwa mä jukʼa librëpjje. ¿Kunsa librësajj lurapjje? Kuna luräwtï Jehová  Diosajj jupanakar churki uk phoqañatakejj wal chʼamachasipjje (1 Cor. 16:9). ¿Kunanakampsa uka luräwi phoqañatakejj lurapjje?

18. ¿Aka qhepa urunakan kun lurañas waktʼistu?

¹⁸ Janïr akapachan tukusiñap purinkipanjja, discipulonakajajj ‘Reinon suma yatiyäwinakapat’ oraqpachanwa yatiyapjjani sasaw Jesusajj säna (Mat. 24:14). Uk phoqañatakejja jupanakajj mä angelan yanaptʼapampi, jan ukajj walja angelanakan yanaptʼapampiw predicapjje. Angelajja, “oraqen jakirinakaru yatiyañatak wiñay suma yatiyäwinakanïnwa, mä arunjja taqe markanakaru, tribunakaru, kunayman parlani jaqenakaru, kunayman kasta jaqenakaru yatiyañataki” (Apoc. 14:6).

19. Jehová Diosar munasktan ukanakajj ¿kuna yaqha yatiyäwsa predicañasa?

¹⁹ Diosan servirinakapajj janiw Reinon suma yatiyäwinakapak yatiyapkiti. Jan ukasti Apocalipsis 8-10 capitulonakan parlki uka angelanakaruw apoyapjjañaparaki. Uka angelanakajja, khitinakatï Diosan Reinop jan katoqañ munapki ukanakajj kuna jan walinakansa uñjasipjjani ukwa yatiyapjje. Ukatwa Jehová Diosan Testigonakapajj ‘chhijchhimpiru ninampiru’ uñtasitäki uka juchañchäw yatiyäwi yatiyasktanjja. Uka yatiyäwejja Supayan apnaqat aka jan wali pachan kunanakatï utjki ukanakarojj Diosajj kamachanisa ukwa qhanañchi (Apoc. 8:7, 13). Akapachan tukusiñapajj jakʼankatap jaqenakajj yatipjjañapawa. Ukhamatakwa Jehová Diosan wali colerasiñ urupat salvasiñatakejj cambiapjjaspa (Sof. 2:2, 3). Ukampis uka yatiyäwjja, janiw taqenejj istʼañ munapkiti, ukatwa jan ajjsartʼirïñasa. Jachʼa tʼaqesiña tiemponjja, uka juchañchäwi yatiyäwejj jukʼampiw jaqenakar colertʼayani (Apoc. 16:21).

20. ¿Kuna toqenakatsa jutïr pä yatichäwinakan yatjjataskañäni?

²⁰ “Aka profecía arunak” istʼañasajj wali wakiskiriwa, kuna laykutejj Apocalipsis libron parlki uka profecía arunakajj jiwasampitakiwa, mä arunjja uka profecian phoqasïwip taypinktanwa (Apoc. 1:3). Ukampis ¿kunjamsa arknaqat uñjaskasas Diosat jan jitheqtas aguantaskaksna? ¿Kunjamsa uka yatiyäwinak jan ajjsartʼas predicaskaksna? Ukanakamp phoqañatakejj akanakaw yanaptʼistani: maya, kuntï Apocalipsis libron Diosan enemigonakapat siski ukaw yanaptʼistani, paya, Diosat jan jitheqtkañäni ukhajj kuna bendicionanaktï katoqkañäni ukaw yanaptʼarakistani. Uka toqenakatjja, jutïr pä yatichäwinakanwa yatjjataskañäni.