1, 2. ¿Kunatsa Biblian yaqhep wiñay yatichäwinakapajj jiwasatakejj jukʼamp importantëjje?

 CASARASIPKANI uka urojj purinjje ukhajja, noviompi noviampejj wali suma isthaptʼatäpjjewa, kuna ewjjtʼanaktï discurso arstʼir jilatajj churki ukanaksa wali atencionampiw istʼapjjaraki. Jupanakajj wali sumwa uka ewjjtʼanak uñtʼjjapjje, ukampis uka urut uksarojja kunanaktï uka discurson istʼawayapki ukajja jukʼamp importantëjjewa, kuna laykutejj ukarjamaw matrimoniopan sarnaqjjapjjani.

² Wawanakar uywañajja niya ukhamarakiwa. Inas mä matrimoniojj wawanak uywañ toqet walja discursonak istʼawayjjchi. Ukampis wawanëjjapjje ukhajja, taqe kunas janiw nayrjamäjjeti. Wawanak uywañ toqet parlki taqe uka wiñay yatichäwinakapajja, jupanakatakejj jukʼamp importantëjjewa. ¡Awk taykjamajj jukʼamp jachʼa responsabilidadanëjjapjjaniwa! Kunapachatï jakäwisan cambionakajj utjki ukhajja, sum uñtʼkayätan uka wiñay yatichäwinakarojj janiw nayrjam uñj-jjtanti. Ukatwa Jehová Diosan servirinakapajj kunjamtï Israel markan reyinakapajj lurapjjañapäkäna ukham Biblia ‘sapüru’ liytanjja, ukat lupʼiraktanjja (Deut. 17:19).

3. ¿Kunanaksa aka yatichäwin yatjjataskañäni?

³ Awk taykanaka, cristianjamajj Jehová Diosar uñtʼapjjañapatakiw wawanakamar yanaptʼapjjañama, ukajj mä jachʼa privilegiowa. Ukampis janiw Diosat aleq ukhamak yatichapjjañamäkiti, jan ukasti Jehová Diosar taqe chuyma munasipjjañapatakiw yanaptʼapjjañama. ¿Kunjamsa uk lurapjjasma? Aka yatichäwinjja, Biblian pusi wiñay yatichäwinakapatwa yatjjataskañäni,  ukaw uk lurañatakejj yanaptʼapjjätam (2 Tim. 3:16). Biblian ewjjanakaparjam lurañajj kunjamsa yaqhep cristiano awk taykanakarojj yanaptʼawayi ukwa uñjarakiñäni.

4. Wawanakajj chuymatpach Jehová Diosar munasipjjañapatakejja, ¿Biblian kawknïr wiñay yatichäwinakapas awk taykanakar yanaptʼaspa? (Santiago 1:5).

⁴ Maya: Jehová Diosamp yanaptʼayasipjjam. Wawanakamar Jehová Diosar munasipjjañapatak yanaptʼañatakejja, yatiñanïpjjañamaw wakisi. Ukhamajj Jehová Diosaruw yatiña mayisipjjañama (Santiago 1:5 liytʼäta). Jehová Diosjam wali suma ewjjtʼirejj janiw yaqhajj utjkiti. ¿Kunatsa? Nayraqatjja, Jehová Diosakiw Awkjamajj wali experiencianejja (Sal. 36:9). Ukatjja yatiñani ewjjtʼanakapajj yanaptʼapunistuwa (Is. 48:17).

5. 1) ¿Kuna yanaptʼanaksa Jehová Diosajj awk taykanakarojj markap toqejj churi? 2) Amorim jilat kullakanakat parlki uka videonjja, ¿kunsa wawanak uywañ toqet yateqapjjta?

⁵ Wawanakapar Jehová Diosar munasipjjañapatak yanaptʼapjjañapatakejja, Arup toqe ukhamarak markap toqew Jehová Diosajj Awk taykanakar walja yatichäwinak churi (Mat. 24:45). Sañäni, “Ayuda para las familias” siski uka seccionanjja suma ewjjtʼanakwa jikjjatapjjasma, ukajja ¡Despertad! revistanwa walja maranakajj mistüna, jichhajj Internetan jw.org cheqanwa mistjjaraki. Uka cheqanjja entrevistanakani uñachtʼäwinakani videonakwa jikjjatapjjäta, ukaw Jehová Diosajj wawanak uywañ toqet ewjjtʼanak churkistu ukarjam lurañatak yanaptʼapjjätam (Prov. 2:4-6). *

6. Mä jilatajj esposapamp chikaw Jehová Diosan markapat yanaptʼanak katoqäna, ¿uk katoqasajj kamsis jilatajja?

⁶ Jehová Diosajj markap toqew awk taykanakar yanaptʼi, uk katoqasajj walja awk taykanakaw yuspärapjje. Joseph sat jilatajj akham siwa: “Cheqa yatichäwinakarjam kimsa wawanakajar uywañajj janiw faciläkiti. Esposajampejj Jehová Diosan yanapap mayipjjapuntwa. Yanap munapkayäta ukhampuniw mä yatichäwisa jan ukajj mä videos mistüna. Jehová Diosan ewjjtʼanakaparojja nanakajj confiyapjjapuntwa” sasa. Joseph jilatampi esposapampejj kunjamsa uka yatichäwinakasa uka videonakas Jehová Diosan amigopäpjjañapatak wawanakapar yanaptʼaski ukwa uñjawayapjje.

7. ¿Kunatsa awk taykanakajj wawanakapatak yateqaskay sarnaqañatak wal chʼamachasipjjañapa? (Romanos 2:21).

 ⁷ Paya: luratanakamampi yatichapjjam. Wawanakajj taqe kunwa uñjapjje, kuntï awk taykapajj lurapki ukwa lurapjjaraki. Cheqas janiw khitis perfectökiti (Rom. 3:23). Ukampis yatiñanïpki uka awk taykanakajja, wawanakapatak wali yateqaskay sarnaqañatakiw wal chʼamachasipjje (Romanos 2:21 liytʼäta). Jiskʼa wawanakat parlkasinjja mä awkejj akham siwa: “Kunjamtï esponjajj um chʼamthapkejja, ukhamarakiw wawanakajj taqe kun yateqasipjje” sasa. Ukatjja jilatajj akham sarakiwa: “Kunanaktï wawanakar yatichktan ukarjam jiwasajj jan lurktan ukhajja, wawanakajj sapjjestaniwa” sasa. Ukhamajj jiwasatï wawanakasan Jehová Diosar munasipjjañap munstan ukhajja, Jehová Diosarojj taqe chuymaw munasipjjañasa, ukajj qhanaw amuyasiñaparaki.

8, 9. ¿Kunsa Andrew jilatana ukat Emma kullakan arunakapat yateqsna?

⁸ Awk taykanakajja, wawanakapar Jehová Diosar munasiñ yatichapjjañapatakejj waljanakwa lurapjjaspa. 17 marani Andrew bautisat waynitojj akham siwa: “Oración lurañajj kunja wakiskirisa uk awk taykajajj yatichapjjapunirïtuwa. Nayajj orasjjerïta ukhasa, tatajajj sapa arumaw nayamp chik oración luriri. Papitujampi mamitajampejja, ‘qhawqha kutiy orasiñ munsta ukha kuti orasikismawa’ sasaw sapjjerïtu. Ukatwa nayatakejj orasiñajj wali importantejja. Jichhajja, nayatakejj oración lurañajj janiw chʼamäjjeti, Diosarojj munasiri Awkijarjamaw uñj-jjarakta” sasa. Awk taykanaka, ak amtapjjapunim: jumanakatï Jehová Diosar munasipjjäta ukhajja, ukajj wawanakaman chuymaparuw purtʼaspa.

⁹ Jichhajj Emma kullakat parltʼañäni. Kunapachatï tatapajj familiapar jaytanukuwayjjäna ukhajja, mamaparojj walja manuniw jaytawayäna. Emma kullakajj akham siwa: “Mamajajj walja kutiw jan qollqeni uñjasiri. Ukampis Jehová Diosaw servirinakaparojj uñjaski, kunanakatï wakiski ukanaksa churaraki sasaw sapjjerïtu. Uka toqet jan payachasitapjja, kunanaktï lurañ amtkäna ukanwa nayajj qhan amuyirïta. Mamajajj kunanaktï yatichkitäna ukwa lurarakirïna” sasa. ¿Kunsa jiwasajj yateqtanjja? Jan walinakan uñjaskasasa, awk taykanakajj luratanakapampiw wawanakapar yatichapjjaspa (Gál. 6:9).

10. Israelita awk taykanakajj ¿kuna horasanakansa wawanakapampejj parltʼasipjjaspäna? (Deuteronomio 6:6, 7).

¹⁰ Kimsa: wawanakamampejj parltʼasipjjapunim. Kuntï Jehová Diosajj israelita awk taykanakar siskäna ukarjamajja, sapüruw awk taykanakajj wawanakapamp parltʼasipjjañapäna (Deuteronomio 6:6, 7 liytʼäta). Urunjja taqe horasanwa wawanakapampejj parlapjjaspäna ukhamarak Jehová Diosar munasiñs yatichapjjaspäna. Sañäni, jiskʼa yoqall wawanakajj awkipar satañ yanaptʼkasasa jan ukajj cosecha apthapiñ yanaptʼkasasa, walja horanakwa awkipampïpjjaspäna. Jiskʼa imill wawanakajj utan lurañanakamp yanaptʼkasajj urun walja horanakwa mamapampïpjjaspäna, isinak chʼukusa jan ukajj sawusaw mamapamp chikäpjjaspäna. Mä kunsa juntuk lurasajja walja wakiskir toqenakatwa parltʼasipjjaspäna. Sañäni, kunjamsa Jehová Diosajj jupanakar munasiñamp uñjäna, familiaparus cuidarakïna uka toqenakatwa lupʼipjjaspäna.

11. ¿Kunapachas cristiano awk taykanakajj wawanakamp parltʼasipjjaspa?

¹¹ Jichhürunakanjja taqe kunas janiw nayrjamäjjeti. Walja markanakanjja, awk taykanakas wawanakas urun mä ratukiw juntukëjjapjje, kuna laykutejj trabajonkapjjewa jan ukajj escuelankapjjewa. Ukatwa awk taykanakajj wawanakapampïñatakisa jupanakamp parltʼasiñatakis  tiempo apstʼasiñatak chʼamachasipjjañapa (Efes. 5:15, 16; Filip. 1:10). Familiampi Bibliat Yatjjatasaw uk lurapjjaspa. Alexander waynitojj akham siwa: “Familiampi Bibliat Yatjjatapjjañajatakejja, papitujajj taqe kunwa organiztʼi, juntukïpjjañajäki uka tiempjja janiw kunampis apaqayaskiti. Bibliat yatjjatañ tukuyatarojja parltʼasiñatakiw quedasipjjta” sasa.

12. ¿Familiampi Bibliat Yatjjatkasajj kunsa familia pʼeqtʼirejj amtañapa?

¹² Familiapampi Bibliat Yatjjatkani ukhajja, ¿kunsa familia pʼeqtʼirejj wawanakapan kusisitäpjjañapatakejj luraspa? Wiñayatakiw kusisit jakasisma sat librotwa juntuki yatjjatapjjaspa. Uka librot yatjjatasajja inas wali sum parltʼasipjjchispa. Niyakejjay wawanakamajj kunjamas jikjjatasipjje, kunas llakisiyi uk jumanakar cuenttʼañap munapjjstajja, Familiampi Bibliat Yatjjatapkäta ukhajj janiw wawanakamarojj toqepjjañamäkiti ni cheqañchapjjañamäkisa. Wawanakamatï jan Bibliarjamäki uk arsupjjani ukhajja, janiw colerasipjjañamäkiti, jan ukasti kunas chuymapan utji uk jumanakar yatiyatapatjja yuspärapjjañamawa, uk lurasipkakiñapatakis chʼamañchtʼapjjañamarakiwa. Wawanakamatï kunjamas jikjjatasipjje uk sapjjätam ukhajja, jumanakatakejj jupanakar yanaptʼañajj jukʼamp facilakïniwa.

13. ¿Kuna yaqha horasanakans awk taykanakajj wawanakapar Jehová Diosar jakʼachasipjjañapatak yanaptʼapjjaspa?

¹³ Awk taykanaka, wawanakamar Jehová Diosar jakʼachasipjjañapatak yanaptʼañatakejj urun tiempo apstʼasipjjam. Wawanakamar munasir Dios Awkisat parltʼañatakejja janiw mä mesan qontʼata yatichapjjañamajj wakiskapuniti. Lisa sat mä kullakajj akham siwa: “Diosan luratanakapat parlasaw wawanakajarojj Jehová Diosar jukʼamp sum uñtʼapjjañapatakejj yanaptʼapjjerïta. Anitujajj anattʼasisin wawanakajar lartʼayiri ukhajja, Jehová Diosajj jiwasjam kusisirïtapa, jakañ vidar munasirïtapwa amtayapjjerïta” sasa.

14. Awk taykanakajj suma amigonak ajllipjjañapatakiw wawanakapar yanaptʼapjjañapa, ¿kunatsa ukajj wali wakiskirejja? (Proverbios 13:20).

¹⁴ Pusi: suma amigonakanïpjjañapatak wawanakamar yanaptʼapjjam. Amigonakajja suma thakiru jan ukajj jan wali thakiruw irpistaspa sasaw Bibliajj qhanañchi (Proverbios 13:20 liytʼäta). Awk taykanaka, ¿khitinakäpjjes  wawanakaman amigonakapajj uk yatipjjtati? ¿Amigonakapar uñtʼapjjtati, jupanakampïñatak tiempo apstʼasipjjtati? ¿Jehová Diosar munasiri amigonakanïpjjañapatakejj kunjamsa wawanakamar yanaptʼapjjasma? (1 Cor. 15:33). Mä kunsa familiamamp lurapjjäta ukhajja, Jehová Diosamp sum apasipki ukanakar invittʼapjjam (Sal. 119:63).

15. ¿Kunsa awk taykanakajj wawanakapan suma amigonakanïpjjañapatakejj lurapjjaspa?

¹⁵ Tony jilatampita esposapampit parltʼañäni. Wawanakapan suma amigonak jikjjatapjjañapatakejj kunanaksa lurawayapjje uka toqet akham sasaw jilatajj qhanañchi: “Esposajampejja, nayratpachaw wayn tawaqonakaru, jilïrinakaru, kunayman markanakan jakasiri jilat kullakanakar invittʼañ yatipjjta. Juntuw manqtʼasipjjta, junturakiw Familiampi Bibliat Yatjjatapjjta. Ukham lurañajja, Jehová Diosar munasipki, wali kusisit jupar servipki uka jilat kullakanakar uñtʼañatakiw yanaptʼapjjetu. Utajanjja superintendente de circuito jilatanakaru, misioneronakaru ukat yaqha jilat kullakanakaruw alojtʼapjjerïta. Uka jilat kullakanakan experiencianakapasa, Diosar kusisit servipjjatapasa, Diosar serviñatak wal chʼamachasipjjatapasa, wawanakajarojj wali sumwa yanaptʼawayi, Jehová Diosar jakʼachasipjjañapatakis yanaptʼawayarakiwa” sasa. Awk taykanaka, wawanakamarojj suma amigonak jikjjatapjjañapatak yanaptʼapjjam, ukatakejj wal chʼamachasipjjañamawa.

16. Mä wawatï Jehová Diosar jaytawayjjchi ukhajja, ¿awk taykapajj kamachapjjañapasa?

¹⁶ Walsa chʼamachasiwayapjjstajja, wawanakamat maynejj janiw Jehová Diosar serviñ munjjaspati, ukhaman uñjasisajj ¿kamachapjjätasa? Awk taykjamajj janiw sum uywawaykpachätanti sasajj janiw amuyapjjañamäkiti. Jehová Diosajja, jupar serviñäniti janicha uk jiwas pachpa amtirwa taqenirus lurawayistu. Wawamatï Jehová Diosar jan serviñ amtawaychi ukhajja, mä urojj Jehová Diosan ukar kuttʼanjjaniwa sasin jan qarjtas suytʼasipkakim. Jesusajj herencia tukuntir waynat parlkäna uka uñachtʼäwit amtasipjjam (Luc. 15:11-19, 22-24). Uka waynajj suma thakit saranukchïnsa, qhepat kuttʼanjjänwa. Inas jumajj akham amuysta: “Ukajj mä cuentokiwa, ukajj janiw  cheqpach jakäwisan paskaspati” sasa. Elie sat waynan experienciapajja ukajj cheqäskapunitapwa uñachtʼayistani.

17. ¿Kunjamsa Elie waynan experienciapajj chʼamañchtʼawaytam?

¹⁷ Elie sat waynajja awk taykapat parlkasajj akham siwa: “Jupanakajj Diosaru ukat arunakaparu munasiñajatakejj wal chʼamachasipjje. Ukampis waynitojjayät ukhajja, munañajarukiw sarnaqjjayäta” sasa. Elie waynajj jamasatwa jan walinak lurjjäna, Jehová Diosat jan jitheqtañapatak awk taykapajj yanaptʼapkchïnsa, janiw jupanakar istʼkänti. Utat sarjjasajj janiw Diosan leyinakaparjam sarnaqjjänti. Ukhamäkchïnsa, awisajj mä amigoparuw Bibliat parlirïna. Elie waynajj akham saskakiwa: “Amigojar Jehová Diosat parlasajja, jukʼampiw Diosat lupʼjjayäta. Ukatjja kuna cheqa yatichäwinakatï chuymajan utjkäna, mä arunjja kuntï awk taykajajj yatichañatak wal chʼamachasiwayapkän ukajj jukʼat jukʼatwa jiltjjäna” sasa. Tiempompejja, Elie waynajj Jehová Diosan ukar kuttʼanjjänwa. * Awk taykapajja, yoqapar jiskʼatpach Diosar munasiñ yatichapjjatapatjja wal kusisipjjpachäna (2 Tim. 3:14, 15).

18. Wawanakapar Jehová Diosar munasiñ yatichañatak chʼamachasisipki uka awk taykanakarojja, ¿kunjamsa jumajj uñjta?

¹⁸ Awk taykanaka, Jehová Diosajj mä suma privilegio jumanakar churapjjtamjja, Jehová Diosar jutïrin servipkani uka wawanakaruw jumanakajj uywasipktajja (Sal. 78:4-6). Cheqas uk lurañajj janiw faciläkiti, ukatwa wal trabajipjjatamatsa, wal chʼamachasipjjatamatsa taqe chuyma felicittʼapjjsma. Jehová Diosar munasipjjañapatak wawanakamar yanaptʼañatak chʼamachasisipkakim, kunjamtï Jehová Diosajj munki ukarjam cheqañchasa ewjjtʼasa uywañatakis chʼamachasisipkakim (Efes. 6:4). Ukhamtï lurapjjäta ukhajja, alajjpachankiri munasir Awkisajj jumanakat wal kusisini, jan uka toqet payachasipjjamti.