1. ¿Kunanakarus niya sapa kutejj atipjañasa?

 ¿DIOSAR jukʼamp serviñatak mä amta uchasirïtati? b Ukampis ¿uk phoqañajj chʼamakïnti? Ukhamächi ukhajja, janiw jumakejj ukhaman uñjasktati. Amuytʼañataki, Philip jilatajj sapa kut chuymatpach orasiñwa amtäna, ukampis Jehová Diosamp parltʼasiñatak tiempo apstʼasiñajj jupatak chʼamakïnwa. Erika kullakajj predikir mistuñatak tantachäwinakajj utjki ukar tiempopar puriñatakiw amtäna. Ukham amtkasasa, niya sapa kutejj qheptʼat puriskakiriwa. Tomáš jilatajja, Biblia phoqatpach liyiñatakiw walja kutejj chʼamachasïna. Jupajj akham siwa: “Biblia liykasajj qarjjakirïtwa. Kimsa kutiw Biblia taqpach liytʼañ amtayäta, ukampis Levítico libronakwa sayantjjerïta” sasa.

2. Diosar jukʼamp serviñ amtktan ukanak jan phoqkstan ukhajj ¿kunatsa jan aynachtʼañasäki?

² Jumatï Diosar jukʼamp serviñatak chʼamachasisksta, ukampis jan uk phoqkaraksta ukhajja, jan aynachtʼamti. Kunanaktï amtktan ukanakajj jiskʼäskpasa, uk phoqañatakejj tiempow munasi, chʼamachasiñasarakiwa. Ukham jan aynachtʼasajja, Jehová Diosamp sum apasitam wali valoranit uñjatam uñachtʼaytajja, kunatï sumäki uk jupar churañ munatamwa uñachtʼayaraktajja. Jehová Diosajj uk uñjaskiwa, kuntï jan lurirjamäkta uk lurañams janirakiw mayktamti (Sal. 103:14; Miq. 6:8). Ukhamajj kunanaktï lurirjamäkta ukanak lurañwa amtañama. Kunanaktï amtkta ukanakatï phoqañjamächejja, ¿kunsa ukanak phoqañatakejj lurasma? Mä qhawqha ewjjtʼanak jichhajj uñjañäni.

3. ¿Kunatsa taqe chuym phoqañ munañasa?

³ Diosar jukʼamp serviñ amtktan uk phoqañatakejja, ¿kunatsa uk taqe chuym phoqañ munañasa? Jiwasatï amtanakas phoqañpun  munañäni ukhajja, amtanakas phoqañatakejj taqe chuymaw chʼamachasiñäni. Taqe chuyma phoqañ munatasajja, kunjamtï thayajj veloni mä boter apki ukhamawa. Thayatï thaytʼaskakchinejja, veloni botejj kawkirutï puriñapäki ukaruw purini. Wali chʼamampi thaytʼanki ukhajja, kawkirutï puriñapäki ukarojj ratukiw purirakini. Jiwasampejj ukhamarakiwa, taqe chuym kuns lurañ munañäni ukhajja, kunanaktï lurañ amtktan ukanak phoqañäniwa. El Salvador markankir David jilatajj akham siwa: “Taqe chuyma lurañ munkta ukhajja, jukʼampiw chʼamachastajja. Kuntï lurañ amtkta ukjja, phoqapuntawa, janiw kunas jarkʼktamti” sasa. Ukhamajj ¿kunas taqe chuym phoqañ munañatakejj yanaptʼiristam?

4. ¿Kunatakis Jehová Diosarojj orassna? (Filipenses 2:13; dibujo uñjjattʼarakïta).

⁴ Taqe chuym phoqañ munañasatakejj Jehová Diosaruw yanaptʼa mayisiñasa. Jehová Diosajj espíritu santop toqew kunanaktï phoqañ amtkta ukanak phoqañ munañamatak yanaptʼiristam (Filipenses 2:13 liytʼäta). Awisajja, jiwasar mä kun lurañ waktʼatap yatisakiw mä kun lurañ amtsna, ukajj janiw jan walïkiti. Ukampis chuymasan inas jan uk lurañ munkstanti. Ukaw Uganda markankir Norina sat kullakar pasäna. Jupajj mayniruw Bibliat yatichañ amtäna, ukampis jan suma yatichirïtap amuyasisajj janiw uk taqe chuym lurañ munkänti. ¿Kunas kullakar yanaptʼäna? Jupajj akham siwa: “Maynir Bibliat taqe chuym yatichañ munañajatakejj Jehová Diosaruw sapür orasirïta, naya pachpas jukʼamp suma yatichirïñatakiw chʼamachasirakiyäta. Mä qhawqha phajjsinak qhepatjja, taqe chuym yatichañ munatajwa amuyasiyäta. Uka pachpa marajja, paniniruw Bibliat yatichjjayäta” sasa.

5. ¿Kunanakatsa taqe chuym phoqañ munañasatakejj lupʼiñasa?

⁵ Kunanaktï Jehová Diosajj juma layku lurawayki ukanakat lupʼim (Sal. 143:5). Jehová Diosajj wali khuyapayasiñampi uñjkäna uka toqetwa apóstol Pablojj lupʼïna, ukaw Diosar taqe chuym serviñatakejj chʼamañchtʼäna (1 Cor. 15:9, 10; 1 Tim. 1:12-14). Jumatï Pabljam kunsa Jehová Diosajj juma layku lurawayi uka toqet jukʼamp lupʼïta ukhajja, jukʼampiw kunanaktï amtkta ukanak taqe chuym phoqañ munäta (Sal. 116:12). Kunas Honduras markankir mä kullakarojj precursora regularat serviñatak yanaptʼäna uk amuytʼañäni. Kullakajj akham siwa: “Qhawqsa Jehová Diosajj munasitu uka toqetwa lupʼirïta. Jupajj markaparuw irpasinitu, jupaw uñjaskitu, jarkʼaqarakituwa. Ukanakat lupʼiñaw Jehová Diosar jukʼamp munasiñatak yanaptʼawayitu, precursora regularat serviñsa jukʼampiw munjjayäta” sasa.

6. ¿Kunas taqe chuym phoqañ munañasatakejj yanaptʼarakistaspa?

⁶ Amtanakam phoqasajj kunanaksa jikjjatasma uka toqet lupʼim. Párrafo 1 ukan parlaniwayktan uka Erika kullakat parltʼaskakiñäni. ¿Kunas horasar puriñatakejj yanaptʼäna? Jupajj akham siwa: “Predicacionar qheptʼat purisajja, waljanak aptʼasiskatajwa amuyasiyäta. Ukampis predicacionar janïrjat purisajja, jilat kullakanakamp arunttʼasisajj jupanakampiw parltʼasirista. Jukʼamp sum predikañatakisa, predicacionan  kusisitäñatakis suma ewjjtʼanakwa istʼirista sasaw amuytʼayäta” sasa. Niyakejjay Erika kullakajj tiempopar purisajj kuna askinaksa jikjjataspa uka toqet lupʼchïnjja, jupajj amtap phoqänwa. ¿Jumajj kuna bendicionanak utjatapatsa lupʼisma? Jumatï Biblia liyiñ toqeta jan ukajj oración toqet mejorañ munsta ukhajja, uk lurasajj kunjamsa Jehová Diosampejj jukʼamp sum apasisma uk amuytʼam (Sal. 145:18, 19). Jumatï cristianjam suma chuymanïñ munsta ukhajja, ukajj kunjamsa mayninakamp jukʼamp sum apasiñatak yanaptʼätam uk amuytʼam (Col. 3:14). ¿Kunanakampsa lurasma? Kunanaktï lurañ amtkta ukanakjja, kunatsa ukanak lurañ munta ukanak qellqtʼasim, qellqtʼasitamjja sapa kutiw wasitat uñjjattʼañama. Qalltan parlaniwayktan uka Tomáš jilatajj akham siwa: “Kuntï amtkta uk phoqañatak walja razonanak utjatap amuyta ukhajja, jukʼampiw uk phoqañatak chʼamachasta” sasa.

7. ¿Kunsa Julio jilatampi esposapampejj amtap phoqañatakejj lurapjjäna?

⁷ Khitinakatï amtanakam phoqañatak yanaptʼapkiristam ukanakamp chikachasim (Prov. 13:20). Julio jilatampi esposapampejj kawkjantï predikirinakajj munaski ukaruw sarañ munapjjäna. Kunas uk phoqañatak yanaptʼäna uk jilatajj akham siwa: “Amtanakaj phoqañatak yanaptʼapkitaspa uka amigonakwa thaqapjjayäta, amtanakajat jupanakampiw parltʼapjjayäta. Niyakejjay jupanakat waljanejj uka kikpa amtanakap phoqapjjchïnjja, suma ewjjtʼanakwa churapjjetäna. Kunjamsa wakichasisipkayäta uksa jisktʼapjjarakitänwa, horasaparurakiw nayrar sarantañatakejj chʼamañchtʼapjjetäna” sasa.

8. Taqe chuyma kun phoqañ munsna ukhak chʼamachassna ukhajj ¿kunas pasaspa? (Dibujo uñjjattʼarakïta).

⁸ Qhan parlkasinjja, yaqhep urunakajj janiw kun lurañatakis ganasajj utjkistaspati, ukajj taqeniruw pasistaspa. ¿Ukajj kuntï amtktan uk janis lurañasäjjaspa ukhamti sañ muni? Janiw ukham sañ munkiti. Thayampit veloni botempit parltʼaskakiñäni. Veloni botejj kawkirutï puriñapäki uksarus thayajj apkchejja, janiw sapa kutejj pachpa chʼamampi thayajj thaytʼankiti, yaqhep urunakajj janiw mä jukʼa thayas utjkiti. Ukhaman uñjasisajj bote apirejj ¿janit kawksarus sarjjani? Janiw ukhamäkaspati. Veloni botenakat yaqhepajj motoranïpjjewa, yaqhepasti remonakanïpjjewa. Ukanakanïsajja, bote apirejj ukanakamp viajiskakispawa. Jiwasampejj ukhamarakiwa, yaqhep urunakajj taqe chuymaw kun lurañs munsna. Awisasti janiw ganasajj utjkarakispati. Ukhamajj janiw taqe chuym kun phoqañ munañakejj wakiskiti. Ukhamäspa ukhajja, janiw kuns lurjjsnati. Kunjamtï bote apirejj thaya jan utjipan kunjamats viajiskakejja, ukhamarakiw jiwasajj jan taqe chuym lurañ munjjañäni ukhas amtanakas phoqañatakejj chʼamachasiskaksna. Cheqas ukatakejj chʼamachasiñasawa, ukampis janiw inamayäkaniti. Kunanakas ukatakejj yanaptʼistaspa uk janïr yatjjatkasajja, kuntï yaqhepajj jisktʼasipkaspa uk nayraqat qhanañchañäni.

9. Janitï Diosar jukʼamp serviñatak ganasanïkstan ukhajj ¿amtas phoqañatak chʼamachasiñasajj walikïskiti?

 ⁹ Jehová Diosajj chuymasat jupar kusisit serviñaswa muni (Sal. 100:2; 2 Cor. 9:7). Janitï Diosar jukʼamp serviñatak ganasajj utjkchistu ukhajja, ¿kunatsa jukʼamp serviñatak chʼamachasiñasa? Apóstol Pablot amuytʼañäni. Jupajj akham sänwa: “Cuerpojarojj cheqañchtwa, mä esclavorjamaw apnaqarakta” sasa (1 Cor. 9:25-27, nota). Apóstol Pablojj janis lurañpun munkchïnjja, kuntï Jehová Diosajj lurañap munkäna uk lurañatakejj chʼamachasïnwa. ¿Jehová Diosajj Pablon luratap uñjasajj kusisïnti? Jïsa, kusisïnwa. Wal chʼamachasitapatsa bendisirakïnwa (2 Tim. 4:7, 8).

10. Awisajj janis lurañpun munkchiñänejja, ¿kunatsa amtas phoqañatakejj chʼamachasiskakiñasa?

¹⁰ Janis chuymatpach lurañ munkstan ukhasa, Jehová Diosajj mä amtas phoqañatak chʼamachasitas uñjasajj wal kusisi. ¿Kunatsa jupajj wal kusisi? Mä kun lurañ amtktan ukajj janis gustkchistojja, jupar munasitasatwa lurtanjja. Jehová Diosajj Pablor bendisïnwa (Sal. 126:5). Jiwasatï chʼamachasiñäni ukhajj bendisirakistaniwa. Kunjamsa Jehová Diosajj chʼamachasitasar bendisi uk uñjasajja, inas kuntï lurañ amtkta uk taqe chuym lurañ munjjchïta. Polonia markankir Lucyna sat mä kullakajj akham siwa: “Awisajj janiw predikirejj sarañ munkti, jukʼampis qaritäkta ukhaw predikir jan sarañ munkti, ukampis predicacionat kusisit kuttʼankta ukajj mä suma regalowa, janiw yaqha ukham suma regalojj utjkaspati” sasa. Kuntï amtktan uk phoqañatak jan ganasajj utj-jjestaspa ukhajj kunsa lursna uk jichhajj uñjañäni.

11. ¿Kunjamsa Jehová Diosajj munañasampi jan apnaqayasiñasatakejj yanaptʼistu?

¹¹ Munañamampi jan apnaqayasiñatakejj Jehová Diosar mayisim. Munañapamp jan apnaqayasir jaqejja, kunjamsa chuymapan jikjjatasi uksa luratanakapsa controlasiwa. Munañasamp jan apnaqayasiñajja, janiw jan walinak lurañatak jarkʼkistaniti. Jan ukasti kunatï walïki uk lurañatakiw yanaptʼistani, jukʼampis jiwasatak chʼamäki jan ukajj mä kun lurañs jan munkañäni ukhaw yanaptʼistani. Amtapuniñäni, munañasampi jan apnaqayasiñajj espíritu santon achup taypinkiwa, ukhamajj Jehová Diosarutï espíritu santop mayisiñäni ukhajja, janiw munañasamp apnaqayaskañäniti (Luc. 11:13; Gál. 5:22, 23). Párrafo 3 ukan parlaniwayktan uka David jilatajj jan jaytas Bibliat sapak yatjjatañatakiw amtäna. Jilatatakejj Diosar orasiñajj wali wakiskirïnwa. Jupajj akham siwa: “Jehová Diosarojj munañajampi jan apnaqayasiñatakiw orasirïta. Jupajj yanaptʼawayituwa, Bibliat sapak yatjjatañatakejj mä program lurasiyäta, jichhas ukarjamaw luraskakta” sasa.

12. ¿Kunjamsa Eclesiastés 11:4 textojj Diosar jukʼamp serviñ amtktan uk phoqañasatak yanaptʼistu?

¹² Jan taqe kunans sumäñappun suyamti. Akapachan janiw taqe kunas sumapunïkaniti. Jiwasatï jan kun luras taqe kunan sumäñap suyaskañäni ukhajja, inas amtanakas janipun phoqkchiñäniti (Eclesiastés 11:4 liytʼäta). Dayniel jilatajj akham siwa: “Janiw kunäkipansa taqe kunas sumapunïkaspati. Ukampis mä kun lurañatak chʼamachasïta ukhajja, taqe kunas sumaruw mistuspa” sasa. Uganda markankir Paul jilatat amuytʼañäni, kunanaktï lurañ amtktan uk kunatsa jan qhepatak jaytañasäki ukjja, akham sasaw qhanañchi: “Jan walinakan uñjaskasas amtanakas phoqañatak chʼamachasiskaktan ukhajja, Jehová Diosajj yanaptʼistaniwa” sasa (Mal. 3:10).

13. ¿Mä jukʼa luras qalltañajj kunatakis yanaptʼistu?

¹³ Mä jukʼak luras qalltam. Kunanaktï Diosar serviñatak amtktan ukajj jiwasatakejj wali jachʼäspawa. Ukatwa awisajj ukanak jan taqe chuyma phoqañ munjjsnati. Jumatakitï ukhamächi ukhajja, ¿janit amtanakam jukʼat jukʼat phoqañ amtkasma? Jumatï cristianjam suma chuymanïñ munsta ukhajja, ¿janit uk jiskʼa luräwinakan uñachtʼayañatak chʼamachaskasma?  Jumatï Biblia phoqatpach liyiñ munsta ukhajj ¿janit sapür mä jukʼa liytʼañatak programaskasma? Aka yatichäwi qalltan parlaniwayktan uka Tomáš jilatajja, janiw kunjamtï amtkäna ukarjamajj mä maran Biblia liyiñ tukuyañ puedkänti. Jupajj akham siwa: “Mä maran taqpach Biblia liyiñ tukuyañajj nayatak wali chʼamänwa, ukatwa Biblia liyiñ wasitat qalltayäta. Qhawqtï nayajj liyiñ puedkirista ukarjam liyiñwa amtayäta. Urun mä qhawqha parrafonak liyiña ukhamarak lupʼiñ amtayäta, urut urutjamaw liyiñajj jukʼamp gustjjetäna” sasa. Niyakejjay Tomáš jilatajj jukʼamp kusisitäjjchïnjja, Biblia liyiñatakejj jukʼamp tiempo apstʼasjjäna. Taqpach Biblia liyiñwa tukuyarakïna. c

14. ¿Kuna jan walinakansa uñjassna?

¹⁴ Taqe chuymas amtanakas phoqañ munkchiñänejja, mä kun utjipan janiw amtas phoqañ puedjjsnati. Inas “akatjamat jan waltʼäwinakan” uñjassna, ukhamïpansti amtanakas phoqañatakejj janiw tiempojj utj-jjestaspati (Ecl. 9:11). Inas mä jan waltʼäwin uñjasiraksna, ukaw aynachtʼayistaspa, jan chʼamaniw uñjasiraksna (Prov. 24:10). Pantjasirïtas laykojja, mä kunan pantjasisajj janiw amtanakas phoqañ puedjjsnati (Rom. 7:23). Jan ukajj inas qaritjam amuyasjjarakstan (Mat. 26:43). ¿Kunas nayrar sartaskakiñatakisa jan ukajj jan walinak atipjañatakis yanaptʼistaspa?

15. ¿Kunatsa jan walinakan uñjaskasas jan aynachtʼañasäki? (Salmo 145:14).

¹⁵ Jan walin uñjasisajj amtanakam phoqañatakejj chʼamachasiskakim. Kunjamtï Bibliajj siskejja, inas walja jan walinakan uñjaschiñäni. Ukampis Jehová Diosan yanaptʼapampejj nayrar sarantasipkakïtawa, kuntï amtapkta uksa phoqapjjätawa sasaw qhanañcharaki (Salmo 145:14 liytʼäta). Qalltan parlaniwayktan uka Philip jilatajj ukhamwa amuyaraki, jupajj akham siwa: “Nayatakejj qhawqha kutis tinkta ukajj janiw importantëkiti, antisas qhawqha  kutis sarthapisin nayrar sarantaskakta ukaw jukʼamp importantejja” sasa. Parlaniwayktan uka David jilatajj akham saskakiwa: “Taqe kunas jan sum mistki jan ukajj jan walin uñjasta ukhajja, amtanakaj phoqañats jarkʼkitaspa ukham janiw uñjkti. Jan ukasti Jehová Diosar wal munasitaj uñachtʼayañatakiw ukajj yanaptʼitu” sasa. Jan waltʼäwinakan uñjaskasas nayrar sarantaskaktan ukhajja, Jehová Diosar kusisiyañ munataswa uñachtʼaytanjja. Jehová Diosajj amtanakas phoqañatak chʼamachasir uñjasajj wal kusispacha, ¿uk amuyasmati?

16. ¿Jan walinakajj paskistu ukajj kunsa yatichistu?

¹⁶ Jan waltʼäwinakat yateqañatak chʼamachasim. Kunatï pasawayktam ukat amuytʼam, akham jisktʼasirakim: “¿Kunsa aka kikpa mayamp nayar jan pasañapatakejj luriristjja?” sasa (Prov. 27:12). Maysa toqetjja, walja kuti chʼamachaskasas kuntï amtktan uk jan phoqkstan ukhajj ¿janit kuntï amtktan uk cambiañajj wakiskaspa? Jumatï amtam jan phoqañ puedksta ukhajja, jumatakejj ukajj phoqañjamati janicha uk amuytʼam. d Kun lurañtï amtkta uk jan phoqatamatjja, Jehová Diosajj janiw jan walit uñjkätamti (2 Cor. 8:12).

17. ¿Kunatsa kuntï jichhakamajj jikjjatawaykta ukanakat amtañama?

¹⁷ Kunanaktï jichhakamajj lurawaykta ukanak amtam. “Diosajj cheqapar uñjir Diosawa, jupajj janiw luratanakamatsa [...] armaskiti” sasaw Bibliajj qhanañchi (Heb. 6:10). Jumajj janirakiw kunanaktï lurawaykta ukanakat armasiñamäkiti. Kawkïr amtanaktï phoqawaykta ukanakat jan armasimti. Ukanakat mä qhawqhajj akanakäspawa: Jehová Diosan amigopäña, predikir mistuña jan ukajj bautisasiña. Jehová Diosar jukʼamp serviñatak amtkayäta ukanak phoqasajja, nayrar sarantaskakismawa, kuntï jichhajj amtkta uksa phoqarakismawa, ukwa ukampejj uñachtʼaytajja (Filip. 3:16).

18. ¿Kuntï lurañ amtkta uk phoqkasajj kunsa lurañama? (Dibujo uñjjattʼarakïta).

¹⁸ Jehová Diosan yanaptʼapampejja, amtam phoqasmawa, bote apirjamarakiw kawkirutï puriñ amtkta ukar purisajj kusisïta. Amtapunim, bote apirinakat waljanejja, viajkasajj kusisitäpjjewa. Kuntï lurañ amtkta uk lurkasajja, kunjamsa Jehová Diosajj yanaptʼtam, bendisiraktam uk uñjasajj kusisitaw amtam phoqarakïta (2 Cor. 4:7). Janitï qarjtkätajja, jukʼamp suma bendicionanak katoqäta (Gál. 6:9).