1, 2. ¿Kunsa awisajj jisktʼassna?

 ¿“JEHOVÁ DIOSAJJ oracionanakaj istʼpachati” sasin jisktʼasirïtati? Jumatï ukham jisktʼasirïsta ukhajj janiw juma sapakejj ukham jisktʼasktati. Walja jilat kullakanakaw ukham jisktʼasipjje, jukʼampis jan walinakan uñjasipki ukhaw ukham jisktʼasipjje, jiwasampejj ukhamarakïspawa. Wal tʼaqesisktan ukhaw kunjamsa Jehová Diosajj oracionanakasar jaysistu uk amuyañajj chʼamäspa.

² Aka yatichäwinjja, kunatsa Jehová Diosajj servirinakapan oracionanakap jaysi ukwa yatjjataskañäni (1 Juan 5:15). Kunatsa Jehová Diosajj janis oracionanakas jayskistaspa ukham awisajj amuysna, kunjamanakatsa jupajj oracionanakas jaysistu ukwa yatjjataskarakiñäni.

3. ¿Kunatsa Jehová Diosajj jupar orasiñas muni?

³ Jehová Diosajj walpun munasistu, jupatakejj wali valoranïtanwa sasaw Bibliajj qhanañchistu (Ageo 2:7; 1 Juan 4:10). Ukatwa jupar orasiñatakisa yanap mayiñatakis invitistu (1 Ped. 5:6, 7). Jupan jakʼapankaskakiñatakisa taqe jan walinak aguantañatakis jupajj wal yanapañ munarakistu.

4. ¿Kunjamatsa Jehová Diosajj servirinakapan oracionanakapar jaysatap yattanjja? (Dibujo uñjjattʼarakïta).

⁴ Kunjamsa Jehová Diosajj servirinakapan oracionanakapar jaysäna ukwa Bibliajj walja uñachtʼäwinakamp qhanañchi. Inas David reyit amtstan, jakäwipanjja Davidajj walja jan wali enemigonakanïnwa, walja kutiw Jehová Diosarojj yanaptʼa mayirakïna. Mä kutejj akham sasaw wal ruwtʼasïna: “Jehová Dios Tata, oracionajarojj istʼakimaya, yanap mayiñatak ruwtʼasitajarojj  istʼakimaya. Jan jaytjasirïtamatsa cheqapar uñjirïtamatsa jaysakitaya” sasa (Sal. 143:1). Jehová Diosajj oracionanakapar istʼänwa, salvarakïnwa (1 Sam. 19:10, 18-20; 2 Sam. 5:17-25). Ukatwa Davidajj jan payachasis akham säna: “Jehová Diosajj taqe khitinakatï jupar artʼasipki ukanakan jakʼapankiwa” sasa. Jiwasajj ukhamarakiw jan payachasiñasäkiti (Sal. 145:18).

5. ¿Kunjamtï munapkäna ukarjampunit Jehová Diosajj servirinakapar jaysäna? Kunatï apóstol Pablor paskäna ukamp qhanañchtʼam. (Dibujo uñjjattʼarakïta).

⁵ Inas Jehová Diosajj kunjamtï munktan ukarjam oracionanakas jan jayskchistaniti. Ukaw apóstol Pablompejj pasäna. ‘Mä chʼapiw jañchipan utjäna’, mä arunjja sinti jan waltʼäwin uñjasïna, uk apaqtʼañapatakejj kimsa kutiw Jehová Diosar wal ruwtʼasirakïna. ¿Jehová Diosajj oracionanakapar jaysänti? Jïsa, jaysänwa, ukampis janiw kunjamtï Pablojj munkäna ukarjam jayskänti. Uka jan waltʼäwi apaqañat sipansa, Jehová Diosajj jupat jan jitheqtas serviskakiñapatakiw chʼam churäna (2 Cor. 12:7-10).

6. ¿Kunatsa awisajj Jehová Diosajj janis oracionanakasar jayskistaspa ukham amuysna?

⁶ Awisajja, Jehová Diosajj janiw kunjamtï munktan ukarjampun jayskarakistaspati. Ukampis Jehová Diosajj kunjamats yanaptʼapunistaniwa, janiw ukat payachasiñasäkiti. “Taqe kunanaktï mayktan jan ukajj amuyktan ukanakat sipansa jukʼampinakwa luraspa” (Efes. 3:20). Ukhamajj jan suyktan jan ukajj jan amuyktan ukhaw Jehová Diosajj oracionanakasar jaysistaspa.

7. ¿Kunatsa oracionanakas mayjtʼayañajj wakisispa? Mä experienciamp uk qhanañchtʼam.

⁷ Kunsa Jehová Diosajj muni uk jukʼamp sum amuytʼasajja, inas oracionanakas mayjtʼayañajj wakischini. Martin Poetzinger jilatat amuytʼañäni. Casaraskäna ukat mä jukʼa tiempotjja, campo de concentración nazi ukaruw jistʼantapjjäna. Qalltanjja, esposajampïñataki predicaskakiñatak akat apsjjeta sasaw Jehová Diosar orasïna. Ukampis pä semananakas pasjjchïnjja, Jehová Diosajj janiw ukat apskaniti sañjamänwa. Ukatwa Martin jilatajj mä oracionan akham sasin mayisirakïna: “Mirä amp suma, kun lurañajsa munta uk amuyañajatak yanaptʼita” sasa. Ukatjja, campo de concentración ukankir jilatanakajj kuna jan waltʼäwinakansa uñjasisipkäna ukwa amuytʼäna. Jupanakat waljanejja esposanakapata wawanakapatwa wal llakisisipkäna. Ukatwa Martin jilatajj Jehová Diosar akham säna: “Aka  machaq asignación churatamat wal yuspärsma. Jilatanakar yanaptʼañataki chuymachtʼañatak yanaptʼita” sasa. Ukwa Martin jilatajj llätunka maranak ukan jistʼantatäkasajj luräna.

8. ¿Orasktan ukhajj kunsa amtañasaraki?

⁸ Jehová Diosajj mä amtaniwa, tiempoparupuniw uk phoqani, ukwa amtañasaraki. Uka amtap taypinjja, taqe kunanakatï tʼaqesiykistu ukanak wiñayatak tukjañawa. Jupajj desastres naturales, usuntañanaka, jiwaña, yaqha ukhamanakwa chhaqtayani. Kunanaktï Jehová Diosajj arsuwayki ukanakjja, Reinop toqew phoqani (Dan. 2:44; Apoc. 21:3, 4). Ukañkamajja Supayaruw aka mundo apnaqañapatakejj permitiski (Juan 12:31; Apoc. 12:9). b Jehová Diosatï jaqenakan taqe jan waltʼäwinakap jichhürunakan askichaspa ukhajja, Supayajj sumsa apnaqkaspa ukhamaw amuyasispa. Jehová Diosan yaqhep promesanakap phoqasiñaps suyaskstanjja, ukajj janiw jiwasarojj janis yanaptʼkistaspa ukham sañ munkiti. Kunanaksa Jehová Diosajj jiwas laykojj luri ukanakat mä qhawqha uñjañäni.

9. ¿Kunjamsa Jehová Diosajj mä suma amtar puriñatakejj yanaptʼistu? Mä experienciamp uk qhanañchtʼam.

⁹ Yatiñ churistu. Suma amtanakar puriñamatak wakiski uka yatiñwa churäma sasaw Jehová Diosajj sistu. Jukʼampis kunanakatï jakäwisan jukʼamp wakiskirïki uka amtanakar puriñatakiw Jehová Diosar yatiñap mayisiñasa, ukanakat yaqhepajj casarasiñäniti janicha uk amtañawa (Sant. 1:5). María c sat mä soltera kullakan experienciapat amuytʼañäni. Kullakajj Jehová Diosar wali kusisit precursora regularat serviskäna ukhaw mä jilatar uñtʼäna. Kullakajj akham siwa: “Tiempompejj suma amigöjjapjjayätwa, jupampejj munasjjapjjarakiyätwa. Nayajj mä amtaruw puriñajäna. Uka toqet Jehová Diosarojj wali jayaw orasiyäta. Jehová Diosan yanaptʼap munkchiyätsa, mä amtarojj nayaw puriñajäna” sasa. Jehová Diosajj oracionanakapar jaysatapsa yatiña churatapsa, María kullakajj amuyänwa. ¿Kunjamanakatsa yanaptʼäna? Jupajj Bibliat apstʼat qellqatanakasanwa yatichäwinak thaqäna, ukansti jisktʼanakapar qhanañchir walja yatichäwinakwa jikjjatarakïna. Niyakejjay mamapajj Testigöchïnjja, kunjamas chuymapan jikjjatasi uk amuytʼasiñapatakiw suma ewjjtʼanak churäna. Ukhamatwa María kullakajj mä suma amtar purïna.

10. Filipenses 4:13 textorjamajj ¿kunsa Jehová Diosajj servirinakapar yanaptʼañatakejj lurani? Mä experienciamp uk qhanañchtʼam. (Foto uñjjattʼarakïta).

¹⁰ Aguantañatakiw chʼam churistu. Kunjamtï Jehová Diosajj apóstol Pablor chʼam churkänjja, ukhamarakiw jiwasarojj jan waltʼäwinak aguantañatakejj chʼam churistani (Filipenses 4:13 liytʼäta). Kunjamsa Benjamin sat mä jilatar  yanaptʼäna uk uñjañäni. Jupajj África markanwa campo de refugiados ukanakan walja maranak jakäna, wali waynitutpachaw familiapamp chikajj ukan jakarakïna. Jilatajj akham siwa: “Jehová Diosarojj sapa kutiw orasirïta, kunatï walïki uk lurañatak chʼam churita sasaw mayisirakirïta. Jupajj Bibliat apstʼat qellqatanak churasaw oracionajar jaysitäna, ukanakaw chuymajan sum jikjjatasiñatakisa, jan ajjsartʼas predicaskakiñatakisa, jupan jakʼapankaskakiñatakis yanaptʼitäna” sasa. Jilatajj saskakiwa: “Mayni Testigonakan experiencianakap liytʼañasa, kunjamsa Jehová Diosajj jupanakar aguantañatak yanaptʼäna uk yatiñasa, jan aynachtʼañataki, Diosar jan jitheqtas serviskakiñatakiw chʼamañchtʼitäna” sasa.

11, 12. ¿Kunjamsa Jehová Diosajj jilat kullakanak toqejj oracionanakasar jaysaspa? (Foto uñjjattʼarakïta).

¹¹ Jilat kullakanak toqew yanaptʼistu. Janïr jiwayapkäna uka arumajja, Jesusajj taqe chuymaw wal orasïna. Dios contras jan wal parlkaspa ukham juchañchatäñat salvañapatakiw Jehová Diosar wal ruwtʼasïna. Salvañat sipansa, Jehová Diosajj Jesusan mä ángel jilaparuw jupar chʼamañchtʼañapatak khitäna (Luc. 22:42, 43). Jehová Diosajj ukhamarakiw jiwasarojj yanaptʼistaspa, inas mä jilatasa jan ukajj mä kullakas jiwasar chʼamañchtʼañatakejj jawstʼanchistaspa jan ukajj visitchistaspa. Kunjamatsa jilat kullakanakasarojj ‘mä suma arump’ chʼamañchtʼsna uk amuyapjjapuniñäni (Prov. 12:25).

¹² Míriam kullakan experienciapat amuytʼañäni. Esposopan jiwatapat mä qhawqha semananak qhepatjja, jupajj sapakiw utankaskäna, chuymas kawkstʼat wali llaktʼatäskarakïnwa. Wal jachaskäna, maynimp parltʼañwa munarakïna. Kullakajj akham siwa: “Janiw khitir jawsañatakis chʼamanïkayätti, ukatwa Jehová Diosar orasiyäta. Jachtʼasis orasiskayäta ukhaw mä ancianojj telefonot jawsanitäna, jupajj mä suma amigönwa” sasa. Uka ancianompi esposapampiw Míriam kullakarojj chuymachtʼapjjäna, Jehová Diosapuniw uka jilatarojj nayar jawsaniñapatak yanaptʼpachäna sasaw kullakajj saraki.

13. Jehová Diosajj kunjamsa jupar jan servipki ukanak toqejj oracionanakasar jaysi uk qhanañchtʼam.

¹³ Diosar jan servir jaqenak toqew yanaptʼistaspa (Prov. 21:1). Awisajja, Jehová Diosajj  jupar jan servir jaqenak toqew servirinakapan oracionanakap jaysi. Mä kutejja, Artajerjes reyimp permiso churayasaw Nehemiasar yanaptʼäna, ukhamatwa Nehemiasajj uka marka wasitat saytʼayañatak yanaptʼarakïna (Neh. 2:3-6). Jichhürunakanjja, ukhamarakiw Jehová Diosajj yanaptʼa wal munktan ukhajj jan Testigöpki ukanakamp yanaptʼayistaspa.

14. ¿Kunjamsa Soo Hing kullakan experienciapajj chʼamañchtʼtamjja? (Foto uñjjattʼarakïta).

¹⁴ Soo Hing kullakajja, Jehová Diosajj doctorap toqe yanaptʼatapwa amuyäna. Yoqapajj pʼeqepan kunayman usunakaniwa, mä accidentew yoqapar pasarakïna. Ukatwa Soo Hing kullakas esposopas yoqapar cuidañatakejj trabajonakap jaytjjapjjäna. Ukhamïpansti qollqet jan waltʼañankjjapjjänwa. Sinti jan walinwa uñjasipjjäna, Soo Hing kullakajj janiw kun lurañatakis chʼamanëjjtti sarakïnwa. Ukatwa Jehová Diosarojj chuymatpach yanaptʼa mayisïna. Doctorasti juparusa familiaparus yanaptʼañwa amtäna, ukhamatwa jupanakajj gobiernot mä yanaptʼa jikjjatapjjäna, jakañatakis wali minusampiw mä lugar jikjjatapjjäna. Soo Hing kullakajj akham siwa: “Kunjamsa Jehová Diosajj yanaptʼapjjetäna ukwa uñjapjjta. Cheqas jupajj ‘oracionanak istʼiriwa’” sasa (Sal. 65:2).

15. Jehová Diosajj oracionanakar jaysatap amuyañatakejj ¿kunas mä kullakar yanaptʼäna?

¹⁵ Niya jilapartejja, Jehová Diosajj janiw oracionanakasar wali musparkañ jayskistuti. Ukampis kunanaktï jupat jan jitheqtañatakejj munkayätan ukwa churistu. Ukhamajj kunjamsa alajjpachankir awkisajj oracionanakas jaysi uk amuyañasapuniwa. Yoko sat kullakajja, Jehová Diosajj janis oracionanakap jayskaspa ukhamwa amuyäna. Ukampis taqe kunanaktï Jehová Diosar mayisirïkäna ukwa qellqtʼasïna. Mä qhawqha tiempotjja, qellqtʼaskäna ukanak uñakiptʼasajj Jehová Diosajj walja oracionanakapar jaysatapwa amuyäna, oraskäna ukanakat yaqhepanaksa janiw kullakajj amtjjänti. Ukhamajj kunjamsa Jehová Diosajj oracionanakasar jaysi uk amuytʼañatakejj tiempo apstʼasiñasapuniwa (Sal. 66:19, 20).

16. ¿Kunjamsa orasktan ukhajj Diosar confiyañajj yanaptʼistu? (Hebreos 11:6).

¹⁶ Jehová Diosar orasiñatakejj jupar confiyañasäkchisa, kunjamsa oracionanakasar jaysi uk katoqañasatakejj jupar confiyañasarakiwa (Hebreos 11:6 liytʼäta). Mike ukat Chrissy jilat  kullakan experienciapat amuytʼañäni, jupanakajj Betelan serviñwa munapjjäna. Mike jilatajj akham siwa: “Walja kutiw Betelan serviñatakejj solicitud phoqantapjjayäta, Jehová Diosarus sapa kutiw uka toqet orasipjjarakiyäta, ukampis janipuniw invitapkitänti” sasa. Mike ukat Chrissy jilat kullakajj kawkinsa jukʼamp servipjjaspa uk Jehová Diosaw yati sasaw confiyapjjäna. Jehová Diosar serviskakiñatakejj kunanak lurañatï wakiskäna taqe ukanakwa jupanakajj lurapjjäna: kawkjantï predikirinakajj munaski ukanwa precursor regularat servipjjäna, construccionanakarus yanaptʼir sarapjjarakirïnwa. Jichhajj circuitot servisipki. Mike jilatajj akham siwa: “Janiw Jehová Diosajj oracionan mayisipkayäta ukarjampun jaysapkitänti, ukampis oracionanakaj jaysapjjapunitänwa, mayipkayäta ukat sipans jukʼamp sum jaysapjjetäna” sasa.

17, 18. Salmo 86:6, 7 qellqatarjamajj ¿kunatsa jan payachasktanjja?

¹⁷ (Salmo 86:6, 7 liytʼäta). Jehová Diosajj Davidan oracionanakapar istʼänwa jaysarakïnwa, taqe chuymaw Davidajj ukar confiyäna. Jumajj jupjamarakiw confiyasma. Aka yatichäwin yatjjatawayktan uka sarnaqäwinakasa experiencianakasa, Jehová Diosajj aguantañatak yatiña chʼama churirïtapwa uñachtʼayistu. Kunjamsa jilat kullakanakas toqesa Diosar jan adorapki uka jaqenak toqes yanaptʼistaspa ukwa uñjawayaraktanjja.

¹⁸ Jehová Diosajj janis oracionanakasarojj munktan ukarjampun jayskchistanejja, jupajj jaysapunistaniwa. Kunatï jiwasatak wakiski ukwa churistani, horasaparuw churarakistani. Ukhamajj Jehová Diosar confiyas orasipkakiñäni. Jehová Diosajj jichha tiempon cuidapunistaniwa, machaq mundonjja “kunanaktï taqe jakirinakajj munapki” ukanak churapuniniwa, taqe ukanakat janipun payachasiñäniti (Sal. 145:16).