1. ¿Kun lurañatakis Jehová Diosajj invitistu? (Fotonak uñjjattʼarakïta).

 ¿KHITIRUS yanaptʼayasiñatakis chuymachtʼayasiñatakis orastanjja? Jiwasatakejj uka jisktʼar jaysañajj facilakiwa, Jehová Diosaruw orastanjja. Jehová Dios pachpaw jupar orasiñatak invitistu. Walja kuti jupamp parltʼasna ukwa munaraki, ukatwa jupajj “oración lurapjjapunim” sasin sistu (1 Tes. 5:17). Diosarojj confianzampiw orastanjja, kunayman toqetwa jakäwisan yanaptʼa mayiraksna (Prov. 3:5, 6). Niyakejjay Jehová Diosajj wali khuyaptʼayasirïchejja, qhawqha kutis jupar orasiksnawa.

2. ¿Kunanakatsa aka yatichäwin yatjjataskañäni?

² Oracionajj Jehová Diosan mä suma regalopawa, wali valoranitwa uñjaraktanjja. Ukhamäkchisa, wali ocupatätas laykojj jupamp parltʼasiñatak tiempo apstʼasiñajj awisajj chʼamakïspawa. Inas oracionanakaj jukʼamp sum lurañajawa sasin sarakstan. Ukatakejj Biblian suma ewjjtʼanakapaw yanaptʼistani. Aka yatichäwinjja, kunjamsa Jesusat yateqasisajj orasiñatak tiempo apstʼassna ukwa yatjjataskañäni. Jukʼamp suma oracionanak lurañatakejj phesqa yanaptʼanakampitwa yatjjataskarakiñäni.

3. ¿Kunsa Jesusajj yatïna?

³ Oracionanakasajj Jehová Diosatak wali importantëtap Jesusajj yatïnwa. Janïr aka oraqer jutkäna ukhajja, kunjamsa Awkipajj servirinakapan oracionanakapar jaysäna uk jupajj uñjänwa. Kunapachatï Diosajj Ana warmina, Davidana,  Eliasana, mayni servirinakapan chuymatpach mayisitanakapar jaysäna ukhajja, Jesusajj jakʼapankaskänwa (1 Sam. 1:10, 11, 20; 1 Rey. 19:4-6; Sal. 32:5). Ukatwa Jesusajj sapa kuti orasipjjañapatakisa, taqe confianzampi orasipjjañapatakis discipulonakapar chʼamañchtʼäna (Mat. 7:7-11).

4. ¿Kunsa Jesusat yateqsna?

⁴ Oración lurañ toqetjja, Jesusajj discipulonakapatakejj wali yateqaskañänwa. Aka oraqenkkäna ukhajj oración lurapunirïnwa. Jesusajj wali ocupatäkchïnsa, walja jaqenakas jupan ukar sarapjjchïnjja, orasiñatakejj tiemp apstʼasipunirïnwa (Mar. 6:31, 45, 46). Awkipamp sapakïñatakisa parltʼasiñatakis jupajj wali alwat sartasirïna (Mar. 1:35). Mä kutejja, wali wakiskir mä amtar puriñatakejj arum paqaraw orasïna (Luc. 6:12, 13). Janïr jiwayapkäna uka arumajja, Jesusajj kutin kutiniw Jehová Diosar orasïna, kuna laykutejj jukʼamp chʼama asignacionampiw aka oraqen phoqañapäna (Mat. 26:39, 42, 44).

5. ¿Kunsa orasiñatakejj Jesusat yateqassna?

⁵ Wali ocupatäkchiñänisa, Jehová Diosar orasiñatakejj tiemp apstʼasiñasapuniwa, ukwa Jesusat yateqassna. Jiwasajj Jesusjamarakiw kunapachas orasiñäni uk amtsna, inas wali alwat sartassna jan ukajj janïr ikintkasin orasiraksna. Ukhamatwa Jehová Diosar uka suma regalop wali valoranit uñjatas uñachtʼaysna. Lynne kullakat parltʼañäni, oración toqew Jehová Diosampejj parltʼasisma sasin yatichapjjäna ukhajja, jupajj wal yuspäräna. Kullakajj akham siwa: “Jehová Diosajj kunapachas oracionam istʼakispawa sasin yatichapjjetäna ukhajja, mä suma amigorjamaw Diosar uñj-jjayäta, ukatwa jukʼamp sum orasiñ amtayäta” sasa. Cheqas waljaniw uka kullakjam amuypachätanjja. Jichhajj kuna toqenakatsa oracionan mayissna ukanakat phesqa uñjaskañäni.

6. Apocalipsis 4:10, 11 textorjamajj ¿kun katoqañatakis Jehová Diosajj derechoni?

⁶ Jehová Diosar jachʼañchañataki. Apóstol Juanajj 24 ancianonakaruw mä musparkañ visionan uñjäna, uka ancianonakajj Jehová Diosaruw alajjpachan adorasipkäna. Jupanakajj Diosaruw jachʼañchasipkäna, “jumaw jachʼañchäwi, honra katoqañatakisa, chʼamanïñatakisa derechonïtajja” sasaw sapjjarakïna  (Apocalipsis 4:10, 11 liytʼäta). Angelanakajj walja razonanakatwa Jehová Diosarojj alabapjje, jachʼañchapjjaraki. Jupanakajj Diosampiw alajjpachankapjje, sum uñtʼapjjaraki. Kunanaktï Diosajj lurki ukanak uñjasaw kunjam Diosas uk amuyapjje, chuymatpach jachʼañchapjjaraki (Job 38:4-7).

7. ¿Kunjamanakatsa Jehová Diosarojj oracionanakasan jachʼañchsna?

⁷ Jehová Diosamp parlktan ukhajj jupar jachʼañchañasarakiwa. Kunatsa jupar munastan respetaraktan uk jupar sistan ukhaw jupar jachʼañchtanjja. Bibliat liytʼkasasa yatjjatkasasa, Jehová Diosajj kunjam chuymanis uk amuyañatak chʼamachasipjjañäni (Job 37:23; Rom. 11:33). Ukatjja, kunjam chuymanisa uka toqet lupʼisajj kunjamas jikjjatastan uk Jehová Diosar sarakiñäni. Jehová Diosajj jiwasar yanaptʼkistu jan ukajj taqe jilat kullakanakasar yanaptʼki ukhaw jupar jachʼañcharaksna. Jehová Diosajj cuidapunistuwa, jarkʼaqarakistuwa (1 Sam. 1:27; 2:1, 2).

8. ¿Kuna toqenakatsa Jehová Diosar yuspärsna? (1 Tesalonicenses 5:18).

⁸ Jehová Diosar yuspärañataki. Juparojj waljanakatwa oracionanakasan yuspärsna (1 Tesalonicenses 5:18 liytʼäta). Taqe suma regalonakapat yuspärapjjañäni. Cheqas taqe suma regalonakajj jupatwa juti (Sant. 1:17). Juparojj aka suma oraqetsa, musparkañ luratanakapatsa, jakäwisatsa, familiasatsa, amigonakasatsa, kuntï suytʼasktan ukatsa yuspärañasawa. Jiwasan mä suma amigosätapat yuspärañasarakiwa.

9. ¿Kunatsa yuspärasirïñajj chʼamakïspa?

⁹ Jehová Diosar yuspärañatakejj walja razonanakaw utjistu. Ukampis niyakejjay jan yuspärasir aka jan wali pachan jakstanjja, kunanakatsa yuspärañasa uk amuyañajj chʼamakïspawa. Kunanakatï jupanakan utjki ukanakat yuspärañat sipansa, kunanaktï munapki ukanakatakwa jaqenakajj jukʼamp llakisipjje. Jiwasatï jupanakjam amuyjjsna ukhajja, oracionanakasan kunanaktï munktan ukanakatakwa mayisisksna. Jan ukhamar purtʼasiñatakejja, yuspärasir jaqëñatakejj chʼamachasiskakiñasawa, taqe kunanaktï Jehová Diosajj churkistu ukanakat yuspärañatakis chʼamachasiñasarakiwa (Luc. 6:45).

10. ¿Kunjamsa mä kullakarojj yuspärasirïñajj yanaptʼäna? (Foto uñjjattʼarakïta).

¹⁰ Yuspärasirïñajj jan walinak aguantañatakiw yanaptʼistu. Kyung-sook sat kullakat amuytʼañäni, jupan experienciapajj Yatiyañataki 15 de enero de 2015 revistankiwa. Pulmonapan cancerajj wali avanzatäjjatapwa doctorajj yatiyäna. Kullakajj akham siwa: “Usutätaj yatisiñajj qʼalpun aynachtʼayitäna. Taqe kunsa aptʼaskirista ukhamwa amuyasiyäta, wal ajjsarayasirakiyäta” sasa. ¿Kunas nayrar sarantaskakiñatejj kullakar yanaptʼäna? Kullakajj akham sarakiwa: “Janïr ikintkasajj sapa arumaw Jehová Diosamp parlañatakejj terrazar jan ukajj uta patjjar makatirïta, kuna sumanakatï uka urun paskitäna ukanakat phesqa  toqetwa Jehová Diosar jachʼat yuspärirïta” sasa. Ukaw kullakarojj chuymapan sumak jikjjatasiñatak yanaptʼäna, Jehová Diosarojj qhawqsa munasi uk sañatakis yanaptʼarakïna. Servirinakapajj jan walin uñjasipjje ukhajj kunjamsa Jehová Diosajj yanaptʼi ukwa kullakajj uñjawayi, jakañ vidan jan waltʼäwinakat sipans jukʼamp bendicionanak utjatapwa amuyarakïna. Kyung-sook kullakjamarakiw jiwasajj Jehová Diosarojj walja razonanakat yuspärsna, yantʼanakan uñjasktan ukhas yuspäraskaksnawa. Jehová Diosar yuspärañajja, aguantañataki ukhamarak llakimp jan apayasiñatakiw yanaptʼistu.

11. ¿Kunatsa Jesusan discipulonakapajj jan ajjsarirïpjjañapäna?

¹¹ Jan ajjsartʼas predicañatak Jehová Diosar yanaptʼa mayisiñataki. Jesusajj janïr alajjpachar kuttʼkäna ukhajja, akham sasaw discipulonakapar amtayäna: “Jerusalén markanwa nayat qhanañchapjjarakïta, taqe Judeana, Samariana ukhamarak taqe aka oraqpachana” sasa (Hech. 1:8; Luc. 24:46-48). Mä qhawqha tiempotjja, judionakan pʼeqtʼirinakapajj Pedrompir Juanampir katuntasajj Sanedrín nayraqataruw apapjjäna. Jan jukʼamp predikjjapjjamti sasaw ukan ordenapjjäna, amenazapjjarakïna (Hech. 4:18, 21). ¿Kunsa uka pä apostolonakajj lurapjjäna?

12. Hechos 4:29, 31 textorjamajj ¿kunsa discipulonakajj lurapjjäna?

¹² Ukhamsa amenazapkchïnjja, Pedrompi Juanampejj akham sapjjänwa: “Diosar istʼañat sipans jumanakar istʼañatejj Dios nayraqatan walïchejja, jumanak uk amuytʼjjapjjam. Kunanaktï nanakajj uñjapkta, istʼapkarakta ukanakat parlañ janiw amuktʼapkiristti” sasa (Hech. 4:19, 20). Judionakan religionap pʼeqtʼirinakajj antutjjapjjäna ukhajja, uka pä apostolonakajj mayni discipulonakampiw tantachasipjjäna. Munañam lurañ yanaptʼapjjeta sasaw Jehová Diosar juntuk orasipjjäna. Akham sapjjarakïnwa: “Nanaka esclavonakamarojj yanaptʼapjjeta, ukhamat arunakamat jan ajjsaras parlasipkakiñajataki” sasa. Jehová Diosajj chuymatpach ukham orasipjjataparojj istʼänwa (Hechos 4:29, 31 liytʼäta).

13. ¿Kunsa Jin-hyuk jilatat yateqsna?

¹³ Marka apnaqerinakajj jan jukʼamp predicañasatak mayipjjestani ukhasa, uka discipulonakat yateqasisajj predicaskakiñasawa. Ukwa Jin-hyuk sat jilatajj luräna, juparojj cuartelar jan sarañ munatapatwa carcelar llawintapjjäna. Jilatarojj yaqhachatäpkäna uka presonakar manqʼampi yaqha ukhamanakamp churañapatakiw encargapjjäna. Presonakajj kuns munapjje uk yatiñatakikiw jupanakan ukar sarañapäna. Janiw jupanakamp Bibliat parlañapäkänti. Ukampis jilatajj jan ajjsartʼas suma arunakamp parlañatakiw Jehová Diosar yanaptʼa mayisïna, ukhamat oportunidadajj utjkani ukhajj jupanakar predicañataki (Hech. 5:29). Jilatajj akham siwa: “Jehová Diosajj oracionanakajar istʼitänwa, jan ajjsartʼas parlañatakiw yanaptʼitäna, munkayäta uka yatiñsa churarakitänwa. Celdanakan punkupan waljaniruw Bibliat yatichañ qalltayäta, jupanakarojj phesqa minutonakakiw yatichirïta. Arumanakajj presonakatakiw cartanak qellqerïta, ukhamat qhepürojj jupanakar churañataki” sasa. Jiwasajj Jin-hyuk jilatjamarakiw predicacionamp phoqañatakejj Jehová Diosaw yanaptʼitani sasin taqe chuyma confiysna, yatiñampi jan ajjsartʼas predicañatakejj juparuw orasiraksna.

14. ¿Kunas jan waltʼäwinakar saykatañatakejj yanaptʼiristam? (Salmo 37:3, 5).

¹⁴ Jan waltʼäwinakar saykatañatak Jehová Diosar yanap mayisiñataki. Jiwasanakat waljanejja, mä familiarasana jan ukajj mä  amigosan jiwatapata, arknaqat uñjasitasata, usutätasata, llakitätasata jan ukajj familiasan jan walin uñjasipjjatapatwa tʼaqesisktanjja. Pandemianakasa guerranakasa jukʼamp jan walinakanwa uñjasiyarakistu. Ukatwa Jehová Diosarojj kunjamas chuymaman jikjjatasta taqe ukanak yatiyañama, kunjamtï mä suma amigorojj yatiykasma ukhamwa yatiyañama. Jehová Diosajj yanaptʼapunïtamwa, janiw ukat payachasiñamäkiti (Salmo 37:3, 5 liytʼäta).

15. ¿Kunjamsa orasiñajj jan walinak aguantañatak yanaptʼistu? Mä experienciamp uk qhanañchtʼam.

¹⁵ Jan walinak aguantañatakejj oración luraskakiñaw yanaptʼistani (Rom. 12:12). Jehová Diosajj kuna jan walinakantï servirinakapajj uñjasipki taqe ukanakwa yati, ‘yanap mayiñatak artʼasitanakaparojj istʼarakiwa’ (Sal. 145:18, 19). 29 marani Kristie sat mä precursora kullakajj uka arunakan cheqätapwa uñjawayi. Jupajj mä akatjamatwa wali usuntat uñjasïna. Ukhamätapat wal llakisjjäna. Tiempompejj mamapan jan qollkañ usunïtapwa yatïna. Kristie kullakajj akham siwa: “Uka jan waltʼäwir saykatañatakejj sapüruw Jehová Diosarojj chʼam churañapatak orasirïta. Tantachäwinakar jan faltasis sarañataki, Bibliat sapak yatjjatañatakiw chʼamachasirïta” sasa. Kullakajj akham saskakiwa: “Jachʼa llakinakan uñjaskayäta ukhaw orasiñajj yanaptʼawayitu. Jehová Diosajj nayampïskatap yatiñaw wal chuymachtʼitäna. Janis ukaratpach waliptkchiyätjja, Jehová Diosajj oracionajar istʼitänwa, ukaw chuymajan sumak jikjjatasiñatakejj yanaptʼitäna” sasa. Ak janipun armapjjañäniti: “Jehová Diosajja, yantʼan uñjasipki uka Dios chuyma jaqenakarojj kunjam salvañsa yatiwa” (2 Ped. 2:9).

16. ¿Kunatsa yantʼanakar saykatañatakejj Jehová Diosan yanaptʼap muntanjja?

¹⁶ Yantʼanakar saykatañatak Jehová Diosar yanap mayisiñataki. Niyakejjay pantjasirïstanjja, kunatï jan walïki ukamp jan apayasiñatakejj sapa kutiw chʼamachasiñasa. Supayajj  uka jan walinak jaytañajj wali chʼamäkaspas ukham amuyañasatakiw chʼamachasi. Cheqansa jan waltʼaykistaspa uka kusistʼañanakampiw amuyus qʼañuchi. Uka kusistʼañanakajj qʼañu amuyunak pʼeqesar phoqantasajja, Jehová Dios nayraqatan qʼañutwa uñjayistu, jachʼa jucha lurañaruw aparakistaspa (Mar. 7:21-23; Sant. 1:14, 15).

17. Oracionan yanaptʼa mayisisajj ¿kunampsa yantʼanakar saykatañatakejj lurañasa? (Fotonak uñjjattʼarakïta).

¹⁷ Yantʼanakarojj janiw sapak saykatksnati, Jehová Diosan yanaptʼapwa muntanjja. Jesusajj orasiñ yatichkäna ukhajj akham sänwa: “Janirak yantʼarus puriyapjjestati, jan ukasti Supayat salvapjjeta” sasa (Mat. 6:13). Jehová Diosajj wal yanaptʼañ munistu, ukampis jiwasaw mayiñasa. Ukatakejj janiw orasiñakejj wakiskiti. Supayan apnaqat aka jan wali pachanjja, wali uñtʼat jan wali amuyunakamp jan apayasiñatakejj jiwasaw wal chʼamachasiñasa (Sal. 97:10). Ukhamajj ¿kunsa amuyus jarkʼaqañatakis suma amuyunakamp phoqantañatakis lurañasa? Biblia liyiñasawa, Bibliat yatjjatañasawa, tantachäwinakarus predicacionarus sarañasawa. ‘Nayajj janiw munkäti jumanakajj jan aguantirjamäpkta ukat jukʼampi yantʼatäpjjañamjja’ sasaw Diosajj sarakistu (1 Cor. 10:12, 13).

18. ¿Kunsa taqenejj lurañasa?

¹⁸ Chʼama tukuña aka qhepa urunakan Diosat jan jitheqtañatakejj nayrat sipans jukʼampiw Diosar orasiñasa. Jehová Diosajj ‘jupa nayraqatan chuymas jistʼarañaswa’ muni (Sal. 62:8). Ukhamajj jupar chuymatpach orasiñatakejj sapüruw tiempo apstʼasiñama. Taqe kunanaktï lurki ukanakat Diosar jachʼañchañamawa, yuspärañamarakiwa. Predicañatakisa, jan walinakar saykatañatakisa, yantʼanakar saykatañatakisa, jan ajjsarañatak yanaptʼita sasaw Diosar orasiñamaraki. Janipun kunasa ni khitisa Jehová Diosar sapa kuti orasiñat jarkʼistpanti. Ukampis ¿kunjamsa Diosajj oracionanakasar jaysistu? Jutïr yatichäwinwa uka wakiskir toqet yatjjataskañäni.