Nayajj 1983 maranwa nasta. Wawäkasajj sumaw jilsuskayäta, ukampis tunka maranirojja, cuerppachaw wal usjjetäna. Mä pä maranak qhepatsti, ikit sartasajj janiw onjjtañ puedjjayätti. Kayunak onjjtayañsa munkchiyätjja, janiw puedkayätti. Ukhat jichhakamajj janipuniw sarnaqjjtti. Uka usunïsajj janirakiw jiltjjayätti. Mä jiskʼa wawa ukchʼakïtwa.

Mä qhawqha phajjsinakaw utat jan mistjjayätti, ukhamaruw pä Testigonakajj visittʼapjjetäna, uka kullakanakat maynejj Florence satänwa. Utar khitis visittʼapjjerïtu ukhajja, jilapartejj imantasirïyätwa, ukampis uka urojj janiw imantaskayätti, jan ukasti jupanakampejj parlayätwa. Paraíso toqet parlapkitäna ukhajja, Jethro sat mä misionerotwa amtasta. Phesqa maranïkayäta ukhaw jupajj Surinam markat phajjsin mä kuti jutirïna, jupajj tatajaruw Bibliat yatichirïna. Jethro jilatajj wali munasirïnwa, ukatwa jupan visitatäñ wal munirïta. Ukhamarusa, comunidadajan Testigonakajj tantachasipkäna ukarojj abuelitonakajajj awisajj irpapjjerïtuwa. Ukhamajj Florence kullakajj ‘janit Bibliat jukʼamp yatjjatañ munkasma’ sasin sitäna ukhajja, ‘yatjjatañ muniristwa’ sasaw sayäta.

Florence kullakajj Justus esposopampiw kuttʼanïna, jupanakampiw Bibliat yateqañ qalltayäta. Nayajj janiw liyiñ yatkayätti, uk amuyasaw jupanakajj liyiñ yatichapjjetäna. Mä qhawqha tiempotsti, jan khitin yanaptʼataw liytʼjjayäta. Mä urojja, jupanakajj akham sapjjetänwa: ‘Surinam markan predicapjjañajatakiw asignapjjetu’ sasa. Sarjjapjjäna ukhajj janiw khitis Bibliat yatichjjetänti. Ukampis Jehová Diosajj janiw nayat armaskänti, ukaw wal kusisiyitäna.

Uka qhepatjja, Floyd sat mä precursor jilataw Orealla comunidadar purinïna. Mä urojja, utat uta predickasaw visittʼitäna. “¿Bibliat yateqañ munasmati?” sasin sitäna ukhajja, lartʼasisaw jupar uñkattʼayäta. “¿Kunatsa larusta?” sasaw jupajj sitäna. Nayajj akham sayätwa: “¿Kunsa Diosax jiwasanakaru mayistu? sat folletot yatjjatañ tukuyjjtwa, El conocimiento que lleva a vida eterna * sat librompiw yatichasipkitäna” sasa. Ukatjja kunatsa Bibliat jan yateqjjayäta ukwa jupar cuenttʼarakiyäta. Ukatsti uka jilatampiw Conocimiento librot faltkäna uk yateqapjjayäta, ukampis juparojj ukhamarakiw yaqha markan serviñapatak khitjjapjjäna. Ukhamasti mayampiw jan yatichirini qheparjjayäta.

 Ukampis 2004 maranjja, Granville jilatampi Joshua jilatampiw purinipjjäna, jupanakajj precursor especialanakäpjjänwa. Utat utwa jupanakajj predicapjjäna, ukatwa nayar visitapjjetäna. “¿Bibliat yateqañ munasmati?” sasin jisktʼapkitäna ukhajja, lartʼasiyätwa. Conocimiento libro qalltatpach yatjjatañatakiw jupanakar mayiyäta. Kunanaktï mayni jilatanakajj yatichapkitäna uka pachparakti yatichapjjetani janicha ukwa yatiñ munayäta. Granville jilatajja, “aka comunidadan tantachäwinakajj apasirakiwa” sasaw sitäna. Niya tunka maranakas utat jan mistjjchiyätjja, sarañ wal munayäta. Ukatwa Granville jilatajj mä silla de ruedat Tantachasiñ Utar apitäna.

Qhepatjja, Diosan Arunakap Yatiyañatak Escuelaru qellqayasiñajatakiw Granville jilatajj chʼamañchtʼitäna. Jupajj akham sitänwa: “Cheqas janiw sartañ puedktati, ukampis parlañ puedisktawa. Amtkitäta, mä urojj mä discurso público arstʼäta” sasa. Uka arunakapajj wal chʼamañchtʼitäna jan ajjsarañatakiw yanaptʼarakitäna.

Granville jilatampiw predikir mistuñ qalltayäta, ukampis laqʼa thakinakajj janiw silla de ruedamp sarañjamäkänti. Ukatwa jilatarojj mä carretillat nayar nukhuñapatak mayiyäta, ukajj wal yanaptʼapjjetäna. 2005 maran abril phajjsinwa bautisasta. Uka qhepatjja, Tantachasiñ Utan publicacionanakat encargasiñajataki ukhamarak sonido apnaqañajatakiw jilatanakajj yatichapjjetäna.

2007 maransti papitujaw umar jalantas jiwäna. Familiajajj wali llakitapunïnwa. Granville jilatajj nanakamp chikaw oración luräna, Bibliampirakiw chuymachtʼapjjetäna. Pä mara qhepatjja, yaqha jan waltʼäwiw pasarakïna. Granville jilataw botempi umar jalantasin jiwäna.

Congregacionan janiw jilïr irpirejj utj-jjänti, congregacionan yanapiri mä jilatakiw utj-jjäna. Granville jilatan jiwatapat wali llakitapuniyätwa, jupajj wali munat amigojänwa. Diosar jukʼamp jakʼachasiñajatakisa, kunatï jakañatak wakiski ukanak jikjjatañatakisa yanaptʼapunitänwa. Jiwatap qhepat apaskäna uka tantachäwinjja, Yatiyañataki revistat liytʼañaw waktʼitäna. Nayrïr pä parrafonak liytʼjjayätwa, ukampis jachañwa qalltayäta, janirakiw amuktʼirjamakayätsa, ukatwa plataformat saraqjjayäta.

Yaqha congregacionankir jilat kullakanakaw congregacionajar yanaptʼir jutapjjäna, ukatwa jan sint llakisjjayätti. Sucursalajja, Kojo sat mä precursor especial jilataruw khitanirakïna. Ukatjja, mamitajampi sullka jilajampiw Bibliat yateqañ qalltapjjäna, qhepat bautisasjjapjjarakïnwa, ukajj walpun kusisiyitäna. 2015 marzo phajjsinsti, congregacionan yanapiripat serviñajatakiw uttʼayapjjetäna. Mä qhawqha tiempotjja, nayrïr discursojwa arstʼayäta. Ukürojja, kuntï Granville jilatajj siskitäta ukwa lartʼasisa jachtʼasisa amtayäta. Jupajj akham sitänwa: “Amtkitäta, mä urojj mä discurso público arstʼäta” sasa.

JW Broadcasting^® programa utjatapatwa nayjama jilat kullakanakan experiencianakap uñtʼawayta. Usutäpkchisa, jupanakajj Diosar serviñatakejj wal chʼamachasisipki, kusisitaw jakasipjjaraki. Nayas ukhamarakiw chʼamachasiskta. Jehová Diosar taqe chʼamajampi serviñwa munta, ukatwa precursor regularat serviñ qalltawayta. 2019 septiembre phajjsinsti, congregacionajan jilïr irpiritwa uttʼayapjjetu, ukhajj walpun kusista. Congregacionajanjja, mä 40 publicadoranakaw utji.

Kunatï cheqäki uk uñtʼañajataki, Jehová Diosar serviñajataki yanaptʼawayapkitu uka munat jilat kullakanakar wal yuspärta. Ukampis Jehová Diosaruw jukʼamp yuspärta, Jupajj janipuniw armaskituti.