WALJA jilat kullakanakaw markap jaytasajj yaqha markar nayrajj sarjjapjjäna. Jupanakat waljanejja, nasipkäna uka markaruw jichhajj kuttʼasipki. Jupanakajja, kawkjantï jukʼamp publicadoranakajj munaski uka lugaranakaruw Jehová Diosaru jaqe masipar munasipjjatap layku kuttʼasipki (Mat. 22:37-39). ¿Kuna sacrificionaksa lurawayapjje, kuna bendicionanaksa katoqawayapjjaraki? Uk yatiñatakejj Camerún (África) markat parltʼañäni.

Onésime sat mä jilatajj 1998 maranwa Camerún markat yaqha markar sarjjäna, 14 maranakaw ukan jakarakïna. Mä tantachäwinjja, predicañ toqet parlir mä uñachtʼäwitwa istʼäna. Arstʼir jilatajj akham sänwa: “Pä amigonakaw chawlla katuri yaqha yaqha lugaranakar sarapjje. Maynejj amigopat sipansa walja chawllanakwa katu. ¿Janit jukʼa chawlla katurejj kawkjantï amigopajj walja chawllanak katkäna uka lugarar sarkaspa?” sasa.

Uka discurso istʼasajja, Onésime jilatajj Camerún markar kuttʼañwa amtäna, ukanwa jilat kullakanakarojj yanaptʼaspäna. Ukanjja walja jaqenakaw Bibliat yateqañ munapjjäna. Ukampis niyakejjay walja maranak yaqha markankjjchïnjja, kunjamsa mayampi markapan yatinoqtaspäna ukaw llakisiyäna. Ukatwa yantʼañatakejj sojjta phajjsinak Camerún markar jakir saräna. Ukampis 2012 maranwa, ukan quedasjjañatak sarjjäna.

Onésime jilatajj akham siwa: “Mayampiw kunjamtï markajan jakasipkayäta ukarusa calorarusa yatinoqtañajäna. Tantachasiñ Utanakan asientonakapas maderatakïnwa, ukarojj mayampiw yatinoqtañajäna” sasa. Ukatjja lartʼasisaw akham saraki: “Kunatï yatichaskäna uk sum istʼañaw suma asientonakat armasiñatak yanaptʼitäna” sasa.

Onésime jilatajj Géraldine kullakampiw 2013 maran casarasïna. Uka kullakajja, Francia markan llätunka maranak jakawayasaw Camerún markar kuttʼjjarakïna. Diosar jukʼamp serviñataki chʼamachasitapatjja, ¿kuna bendicionanaksa katoqawayapjje? Onésime jilatajj akham siwa: “Diosan Reinopat Yatiyirinakataki Escuelaruw sarapjjta, jichhajj Betelanwa servisipkarakta. Pasïr marajj congregacionajanjja, pä tunkaniw bautisasiwayapjje. Jichhajja, kawkjantï walja chawlla katuñajj utjki uka cheqankaskatajwa amuyasta” sasa (Mar. 1:17, 18). Géraldine kullakajj akham sarakiwa: “Pienskayäta ukat sipansa, walja bendicionanakwa katoqawayta” sasa.

Judith sat kullakajja, Camerún markat Estados Unidos markaruw sarjjäna, ukampis Diosar jukʼamp serviñ wal munäna. Jupajj akham siwa: “Sapa kuti Camerún markankir familiajar visitasina Estados Unidos markar kuttʼjjayäta ukhajja, Bibliat walja yateqerinakar jaytasajj jachayätwa” sasa. Ukampis Judith kullakajj Camerún markar kuttʼañ pächasïnwa. Jupajj wali suma pagat mä trabajonïnwa, ukampiw tatapan qollayasiñapatak yanaptʼäna. Ukampis Jehová Diosar wal confiyasisaw  Camerún markar kuttʼjjäna. Jupajj akham siwa: “Estados Unidos markan kunja sumas jakasiyäta ukwa awisajj amtayäta” sasa. Ukampis yatinoqtañatakejj Jehová Diosaruw mayisïna, congregacionanak tumptʼir jilatampi esposapampiw jupar chʼamañchtʼapjjarakïna.

Camerún markar kuttʼjjäna ukhajja, kunas pasäna uk amtasajj Judith kullakajj akham siwa: “Qallta kimsa maranakanjja pusiniruw bautisasiñapatak yanaptʼawayta, ukajj wal kusisiyitäna” sasa. Judith kullakajj precursor especialat serviñwa qalltäna. Jichhasti, Sam-Castel esposopampiw congregacionanak tumptʼirit servisipki. ¿Kunas tatapampejj pasäna? Kullakampi familiapampejja, yaqha markanwa mä hospital jikjjatapjjäna, ukanwa tataparojj gratisaki operapjjäna, operacionajj walikiw misturakïna.

Victor sat mä jilatajj Canadá markaruw sarjjäna. Yatiyañataki revistan mä yatichäwipajj universidadar sarañ toqetwa parläna. Uk liytʼasajj kuntï jupajj luraskäna ukanakatwa pienstʼasïna. Ukatwa universidadan estudiaskakiñat sipansa, mä instituton estudiañ amtäna. Jupajj akham siwa: “Instituton estudiasajj jankʼakiw mä trabajo jikjjatayäta, ukhamatwa precursoräñ munkayäta uka amtaj phoqayäta” sasa. Qhepatjja, Victor jilatajj Caroline kullakampiw casarasïna, panipaw Camerún markar visitir sarapjjäna. Ukansti Betelaruw visitir sarapjjäna, ukankir jilatanakajj Camerún markan servipjjañapatakiw chʼamañchtʼapjjäna. Victor jilatajj akham siwa: “Janiw sañatakejj janiw kuna razonas utjkänti, niyakejjay kunatï wakiski ukampiki jakasipjjchiyätjja, ukar iyaw sañajj janiw chʼamäkänti” sasa. Caroline kullakajj mä jukʼa usutäkchïnsa, uka markar sarjjañwa amtapjjäna.

Waljaniw ukan Bibliat yateqañ munapjjäna, ukatwa Victor jilatampi esposapampejj precursor regularat serviñ qalltapjjäna. Mä qhawqha tiempojja, imatäkäna uka qollqepampikiw precursorat servipjjäna. Qhepatjja, Canadá markaruw mä qhawqha phajjsi trabajir sarapjjäna, ukan ganasipkäna uka qollqempiw Camerún markan precursorat servisipkakïna. ¿Kuna bendicionanaksa katoqapjjäna? Diosan Reinopat Yatiyirinakataki Escuelaruw sarapjjäna, precursor especialatwa servipjjarakïna, jichhasti siervos de construcción ukhamaw servisipkaraki. Victor jilatajj akham siwa: “Suma jakasiñ apanukusajja, Jehová Diosan yanaptʼapwa katoqawayapjjta” sasa.

Alain sat mä jilatajj Alemania markanwa mä universidadan estudiaskäna. Jupajj 2002 maranwa Joven, ¿qué harás con tu vida? sat tratado liytʼäna. Kuntï ukan liytʼkäna ukaw vidapan machaq amtanakar puriñatak yanaptʼäna. 2006 maranjja, Escuela de Entrenamiento Ministerial ukaruw saräna, ukatjja Camerún markan serviñapatakiw asignapjjäna, jupajj uka markanwa nasïna.

Camerún markanjja, Alain jilatajj semanan mä qhawqha urukiw trabajïna. Qhepatjja, mä suma pagat trabajonëjjarakïnwa, ukampis jukʼamp tiemp trabajisajj janiw walja horanak predicjjäti sasaw llakisïna. Ukhamaruw precursor especialat serviñatak invittʼapjjäna, jupasti jan pächasisaw ukar iyaw säna. Uk yatisajja, jefepajj jukʼamp sueldo pagañwa munäna, ukampis Alain jilatajj precursor especialat serviñwa amtäna. Mä qhawqha tiempotjja, Stéphanie sat kullakampiw casarasïna. Jupajj walja maranakaw Francia markan jakäna. Camerún markar sarjjasajj ¿kuna jan walinakansa kullakajj uñjasïna?

Jupajj akham siwa: “Walja kutiw usuntta, alergianakas churarakitänwa, ukampis tratamientonakwa katoqayäta, ukampiw qollasiyäta” sasa. Uka kullakampi esposopampejj aguantapjjatapat walja bendicionanakwa katoqapjjäna. Alain jilatajj  akham siwa: “Katé sat jiskʼa markar predikir sarapjjayäta ukhajja, waljaniw Bibliat yateqañ munapjjäna. Qhepatjja, jupanakarojj teléfono toqew Bibliat yatichapjjayäta. Jupanakat paniniw bautisasipjjäna, mä grupow uka markan uttʼayasirakïna” sasa. Stéphanie kullakajj akham sarakiwa: “Jehová Diosar vidap katuyasipjjañapatak mayninakar yanaptʼañajj wali kusiskañawa, janiw ukham kusisiñajj kawkins utjkiti. Akan servisajja, walja kutiw jaqenakar ukham yanaptʼasajj kusisipjjta” sasa. Jichhajja, Alain jilatampi esposapampejj congregacionanak tumptʼiritwa servisipki.

Gisèle kullakajja, Italia markan doctoräñatak estudiaskäna ukhaw bautisasïna. Jupar Bibliat yatichapkäna uka precursor chacha warmejja, kunatï wakiskäna ukampikiw jakasipjjäna, uk uñjañaw chuymapar purtʼäna, Diosarus jukʼamp serviñwa munarakïna. Ukatwa Gisèle kullakajj estudiañ niya tukuyañampëjjäna ukhajj precursora regularat serviñ qalltäna.

Gisèle kullakajj Camerún markanwa Jehová Diosar jukʼamp serviñ munäna, ukampis ajjsarayasïnwa. Jupajj akham siwa: “Italia markan jakañatak permiso churapkitäna ukjja aptʼañajänwa, familiajajj Italia markanwa jakarakïna ukhamajj jupanakarusa ukankir amigonakajarus jaytañajarakïnwa” sasa. Ukhamäkchïnsa, 2016 maranwa mayo phajjsin Gisèle kullakajj Camerún markar kuttʼjjäna. Mä qhawqha tiempotjja, Léonce jilatampiw casarasjjäna. Camerún markankir sucursalajj Ayos jiskʼa markar sarapjjañapatakiw jupanakar invittʼäna, uka markanjja jukʼamp publicadoranakaw munasïna.

¿Kunjamsa Ayos markan jakasipjjäna? Gisèle kullakajj akham siwa: “Awisajja walja semananakaw luzajj jan utjkänti, celularanaksa janiw cargayañ puedipkayätti, ukatwa ukanak jan apnaqjjapjjayätti. Lawanakampi phayañwa yateqayäta, um aptirejj arumanakaw carretillampi linternampi sarapjjerïta, uka horarojj jukʼa jaqekiw um aptirejj sarapjjerïna” sasa. ¿Kunas aguantañatakejj jupanakar yanaptʼäna? Gisèle kullakajj akham siwa: “Jehová Diosan espiritupaw aguantañ yanaptʼapjjetäna. Esposojampejj purapatwa yanaptʼasipjjayäta. Familiajasa amigonakajasa wal chʼamañchtʼapjjetäna, awisajj qollqempis yanaptʼapjjarakitänwa” sasa.

¿Gisèle kullakajj markapar kuttʼasajj kusisitat jakasi? Jïsa. Jupajj akham siwa: “Qalltanjja nanakatakejj chʼamakïnwa, llakisiñas utjarakïnwa, ukampis ukanak pasjjäna ukhajja, kuntï lurapjjañajäkäna uk lurasipkatajwa amuyasipjjayäta. Jichhajj Jehová Diosarojj jukʼampiw confiyapjjta, jukʼampirakiw jakʼachasipjjta” sasa. Léonce jilatampi esposapampejj Diosan Reinopat Yatiyirinakataki Escuelaruw sarapjjäna, jichhajj precursor especial temporerotwa servisipkaraki.

Kunjamtï chawlla katurinakajj jan wali tiemponsa jan ajjsartʼas walja chawlla katuñataki chʼamachasipkejja, ukhamarakiw markapar kuttʼiri jilat kullakanakajj chʼamachasipjje, ukhamatwa Diosan arunakap istʼañ munirinakarojj taqe chuym yanaptʼapjje. Jehová Diosajja, sutipar munasipjjatapat chʼamachasipki uka jilat kullakanakarojj janipuniw armkaniti (Neh. 5:19; Heb. 6:10). Jumatï yaqha markan jakassta, ukampis markaman jukʼamp publicadoranakajj munaschi ukhajja, ¿janit markamar kuttʼkasma? Ukhamtï lurätajja, Jehová Diosajj wal bendisïtamjja (Prov. 10:22).