1, 2. ¿Maynit maynikam munasiñat jan jaytjasiñatakejj kuna razonanakas utjistu?

MAYNIT maynikam munasiñampi uñjasiñatakisa jan jaytjasiñatakis walja razonanakaw utjistu. Ukanakat yaqhepjja Biblian utjki uka yatiñamp arsut arunakanwa jikjjatsna, ukanakajj akham siwa: “Munasiñasa jan jaytjasiñasa jan apanukuñasa jan jumar jaytanukupkpanti. [...] ukhamatwa Dios nayraqatansa jaqenak nayraqatansa jumajj suma uñjatäyäta, suma amuytʼasir jaqet uñjatarakïyätawa”; “munasiri jan jaytjasiri jaqejja, jupa pachpaw askinak jikjjati”; ‘kunatï cheqapäki uk lurañataki, munasiña jan jaytjasiña uñachtʼayañatak chʼamachasir jaqejja, jakañwa jikjjatani’ sasa (Prov. 3:3, nota; 3:4; 11:17, nota; 21:21).

² Uka yatiñamp arsut arunakarjamajja, ¿kunatsa munasiñat jan jaytjasiñasäki? Maya, Dios nayraqatanjja valoranitwa uñjayistu. Paya, jiwas pachparuw yanaptʼistu. Sañäni, mayninakamp sum apasiskakiñatakiw yanaptʼistu. Kimsa, jiwasatï munasiñat jan jaytjaskañäni ukhajja, jutïrin walja bendicionanakwa katoqañäni, ukanakat mayajj wiñay jakañawa. Jehová Diosajj “maynit maynikam munasipjjam janirak jaytjasipjjamti, khuyaptʼayasipjjarakim” sasin ewjjtʼkistu uka mandator istʼañatakejj walja razonanakaw utjistu (Zac. 7:9, nota).

3. ¿Kuna jisktʼanakarus aka yatichäwin qhanañchaskañäni?

³ Aka yatichäwinjja aka pusi jisktʼanakaruw qhanañchaskañäni: ¿khitinakarus munasiñat jan jaytjañasäki? ¿Rut librojj  kunsa munasiñat jan jaytjasirïña toqet yatichistu? ¿Kunjamsa jichhürunakan munasirïsna janirak jaytjasirïksna? ¿Kunjamsa uk lurañajj yanaptʼistu?

4. ¿Kunjamsa Jehová Diosat yateqasis munasirïsna janirak jaytjasirïksna? (Marcos 10:29, 30).

⁴ Kunjamtï pasïr yatichäwin yatjjataniwayktanjja, Jehová Diosajj jupar munasipki servipki ukanakarukiw munasirïtapsa jan jaytjasirïtapsa uñachtʼayi (Dan. 9:4). Jiwasajj ‘Diosan munat wawanakapjamajj jupatwa yateqasiñ’ muntanjja (Efes. 5:1). Ukatwa jilat kullakanakar munasiñampi uñjañ muntanjja, janirak jaytjañ munktanti (Marcos 10:29, 30 liytʼäta).

5, 6. ¿Kunsa jan jaytjasirïñ toqet jaqenakajj amuyapjje?

⁵ Munasiñat jan jaytjasiñajj kamsañsa muni uk sum amuyañäni ukhajja, jilat kullakanakar uk uñachtʼayañajj janiw chʼamäkaniti. Ukhamajja munasiñat jan jaytjañajj kamsañsa muni uk sum amuytʼañatakejja, kunsa jaqenakajj jan jaytjasirïñ toqet amuyapjje uk mä uñachtʼäwimp amuytʼañäni.

 ⁶ Maynejj walja maranak mä pachpa empresanak trabaji ukhajja, uka trabajirejj jan jaytjasiriwa sasaw amuysna. Ukampis walja maranakas trabajkchejja, inas empresan ni mä dueñoparus uñtʼkchiti, ni kuntï empresan lurañ amtapki ukanakas gustkchiti. ¿Ukhamajj munasiñatti ukan trabajiskaki? Janiwa, antisas qollqe ganasiñ munasaw ukan trabajiskaki. Jubilasiñkamas uka empresan trabajiskakiniwa, jukʼamp qollqe ganañatak yaqha trabajo jikjjataspa ukhakiw uka empresa jaytjjaspa.

7, 8. 1) ¿Kunas maynirojj munasiñat jan jaytjañatak chʼamañchi? 2) ¿Kunatsa Rut libron mä qhawqha versiculonakap yatjjataskañäni?

⁷  Párrafo 6 ukan parlaniwayktan uka trabajirejj kunatsa uka empresa jan jaytjkäna ukampi, munasiñat jan jaytjasiñampejj kunansa jan pachpäpki uk amuysnawa. Bibliajj qellqaskäna uka tiemponjja, ¿kunatsa Diosan servirinakapajj munasiñampi uñjasipjjäna janirak jaytjasipkäna? Jupanakajj janiw phoqañ laykuki ukham lurapkänti, jan ukasti chuymapaw uk lurañatak chʼamañchäna. David reyit parltʼañäni. Jonatanan awkipajj jiwayañsa Davidar munkchïnjja, Davidajj Jonatanar munasisajj janiw jaytjkänti. Jonatanajj jiwjjäna uka qhepatsa, Davidajj Jonatanan Mefibóset sat yoqaparus ukhamarakiw munasiñat jan jaytjkänti (1 Sam. 20:9, 14, 15; 2 Sam. 4:4; 8:15; 9:1, 6, 7).

⁸ Munasiñat jan jaytjasirïña toqetjja, Bibliankir Rut librot mä qhawqhanak yatjjatasaw jukʼampinak yateqsna. Rut libron parlki uka jaqenakajj ¿kunanaksa munasiñat jan jaytjañ toqet yatichistu? ¿Jupanakat yateqasisajj kunjamsa congregacionasan ukarjam lursna? *

9. ¿Kunatsa Noemí warmejj Jehová Diosajj naya contrawa sasin amuyjjäna?

⁹ Rut librojja Noemí warmita, Rut yojjchʼapata, Boaz chachampitwa parli. Boaz chachajj Diosaruw munasïna, Noemí warmin esposopan familiaraparakïnwa. Israel markan manqʼat pistʼañ utjatapatwa Noemí warmimpi esposopampi, ukat pä yoqanakapampejj Moab oraqer jakiri sarjjapjjäna. Ukansti esposopaw jiwjjäna. Pä yoqanakapajj casarasjjapjjänwa, ukampis jupanakas jiwjjapjjarakïnwa (Rut 1:3-5; 2:1). Ukham jan walinakan uñjasisajja, Noemí warmejj jukʼampiw aynachtʼjjäna. Ukham llakimp aynachtʼatäsajja,  Jehová Diosajj jupa conträkaspas ukhamwa amuyjjäna. Akham sänwa: “Jehová Diosajj naya contrawa”, ‘Taqe Chʼamani Diosajj llakinakampiw nayar aynachtʼayitu’ sasa. Ukatsti akham sarakïnwa: “Taqe Chʼamani Jehová Diosajj naya contrawa, jupaw llakinakan uñjasiyitu” sasa (Rut 1:13, 20, 21).

10. ¿Noemí warmin jan wal parlatapat kunsa Jehová Diosajj luräna?

¹⁰ ¿Noemí warmin ukham parlatapat Jehová Diosajj kunsa luräna? Janiw jupar jaytjkänti, antisas ukham tʼaqesir uñjasajj jupat khuyaptʼayasïnwa. “Yatiñani mä jaqejj tʼaqesiyat uñjasisajj loqheraspawa” uk Jehová Diosajj yatiwa (Ecl. 7:7). Ukampis Noemí warmejja, Diosajj jan jupar jaytjatap amuyañapatakejj yanaptʼatäñapänwa. ¿Kunsa Jehová Diosajj jupar yanaptʼañatak luräna? (1 Sam. 2:8). Rut yojjchʼap toqew yanaptʼäna, jupajj munasiñat janiw Noemí warmirojj jaytanukkänti. Jupat khuyaptʼayasisajja, munasiñampiw suegraparojj yanaptʼäna, ukhamatwa Noemí warmejj kusisitäjjäna, Jehová Diosajj jupar munasiskatapsa amuyjjarakïnwa. ¿Kunsa Rut warmit yateqsna?

11. ¿Kunatsa walja jilat kullakanakajj aynachtʼatanakar yanaptʼapjje?

¹¹ Aynachtʼatäpki ukanakar yanaptʼañatakejja munasirïñasawa jan jaytjasirïñasarakiwa. Kunjamtï Rut warmejj Noemí warmir yanaptʼkänjja, ukhamarakiw jichhürunakan munasiri walja jilat kullakanakajj llakitäpki aynachtʼatäpki uka jilat kullakanakar yanaptʼasipki. Jilat kullakanakarojj wal munasipjje, ukatwa qhawqtï puedipki ukarjam yanaptʼañ munapjje (Prov. 12:25; 24:10). Ukham lurasaw Pablon ewjjtʼaparjam lurapjje, jupajj akham sänwa: “Llakitanakarus chuymachtʼapjjam, jan chʼamaninakarus yanaptʼapjjarakim, taqenirus pacienciampi uñjapjjam” sasa (1 Tes. 5:14).

12. ¿Aynachtʼat mä jilataru jan ukajj mä kullakar yanaptʼañatakejj kunsa lursna?

¹² ¿Kunjamsa aynachtʼat mä jilataru jan ukajj mä kullakar yanaptʼsna? Awisajj istʼañakiw wakisi, jan ukajj ‘munassmawa’ sañaw wakisi. Jehová Diosajja, valorani mä ovejapar yanaptʼañatakejj kunsa lurasktan uk uñjaskiwa (Sal. 41:1). Proverbios 19:17 textojj akham siwa: “Khititï yanaptʼa munir jaqet khuyaptʼayaski ukajja Jehová Diosaruw maytʼaski, ukham luratapatjja Diosajj jupar kuttʼayjjaniwa” sasa.

13. ¿Orpá warmit sipansa kunsa Rut warmejj luräna, kunjamsa munasirïtapsa jan jaytjasirïtapsa uñachtʼayäna? (Nayrïr paginankir dibujo uñjjattʼäta).

¹³ Munasiñat jan jaytjasirïñajj kamsañsa muni uk sumpach amuytʼañatakejja, Noemí warmin esposopajj jiwjjäna, pä yoqanakapas jiwjjäna uka qhepat kunas jupar pasäna uk yatjjatañäni. ‘Jehová Diosajj markapar manqʼañanak churasin wasitat bendisjjatap istʼäna’ ukhajja, Noemí warmejj markapar kuttʼjjañwa amtäna (Rut 1:6). Pä yojjchʼanakapajj jupamp chika jutjjapjjäna ukhajja,  thakin jutkasajj Noemí warmejj kimsa kutiw Moab oraqer kuttʼjjapjjañapatak mayïna. Ukat ¿kunas pasäna? Bibliajj akham siwa: “Orpá warmejj suegrapar jampʼattʼasajj sarjjänwa. Ukampis Rut warmejj janiw suegrapar jaytjkänti” sasa (Rut 1:7-14). Orpá warmejj Noemí suegrapar istʼasajja, Moab oraqeruw kuttʼawayjjäna, ukampis Rut warmejj janiw uk lurkänti. Jupajj utapar kuttʼjjaspänwa, ukampis suegrapar munasiñat jan jaytjañ munasaw jupar yanaptʼañatak quedasïna (Rut 1:16, 17). Janiw obligatak quedaskänti, jan ukasti jupar munasitapata jan jaytjañ munatapatwa quedasïna. ¿Kunsa ukat yateqsna?

14. 1) ¿Kun lurañsa walja jilat kullakanakajj amtapjje? 2) Hebreos 13:16 textorjamajja, ¿kuna sacrificionak luratasas Jehová Diosar kusisiyi?

¹⁴ Munasiñat jan jaytjasirïñäni ukhajja, mayninakar jukʼamp yanaptʼañatakiw chʼamachasiñäni. Kunjamtï Diosan nayra servirinakapajj lurapkänjja, ukhamarakiw jichha tiempon Diosan walja servirinakapajj jilat kullakanakaru munasiñat jan jaytjañ amtapjje, jan uñtʼatäpki ukanakarus ukham uñjañwa amtapjjaraki. Sañäni, oraqen jan waltʼäwinak utjatap yatisajja, kunjamsa yanaptʼapjjaspa uk jankʼakiw jisktʼapjje. Congregacionapankir mä jilatana jan ukajj mä kullakana qollqet pistʼatäskatap yatipjje ukhajja, kunan yanaptʼatäñsa muni uk yatisajj jankʼakiw yanaptʼapjje. Jupanakajj nayra patak maranakan jakir macedonio cristianonakjamaw lurapjje, uka cristianonakajj “qhawqhatï jupanakan utjkäna ukat sipansa jukʼamp churapjjäna” (2 Cor. 8:3). Uka cristianonakjamarakiw mayninakar jukʼamp yanaptʼañatak chʼamachasipjje. Yanaptʼa munapki uka jilat kullakanakar yanaptʼañatakejj walja sacrificionak lurapjje. Jehová Diosajj servirinakapar maynit maynikam munasiri jan jaytjasir uñji ukhajj wal kusisi (Hebreos 13:16 liytʼäta).

15, 16. ¿Kunjamsa Rut warmejj jan qarjtatap uñachtʼayäna?

¹⁵ Rut warmimpita Noemí warmimpit Biblian liytʼasajja, waljanakwa yateqsna. Ukanakat mä qhawqhanak uñjañäni.

¹⁶ Jan qarjtapjjañäniti. Rut warmejj Judá markar compañañ munäna ukhajja, Noemí warmejj janiw qalltan munkänti. Ukampis Rut warmejj jupamp chika sarañ munaskakïnwa. ¿Ukat kunas pasäna? “Noemisti Rut warmin jupamp chika wal sarañ munatap amuyasajja, janiw juparojj utamar kuttʼjjam sisjjänti” (Rut 1:15-18).

17. ¿Kunas jan jankʼaki qarjtañatak yanaptʼistani?

¹⁷ Kunsa yateqsna: Wali llakita uñjasipki ukanakar yanaptʼañatakejja, paciencianïñasawa, janiw qarjtañasäkiti. Sañäni, inas mä kullakajj yanaptʼañ munañäni ukhajj qalltan jan munkchiniti. * Ukampis munasirïña jan jaytjasirïñaw jupamp chikäskakiñatak yanaptʼistani (Gál. 6:2). ‘Tiempompejj yanaptʼatäñsa chuymachtʼatäñsa munjjaniwa’ sasin suytʼaskakiñasawa.

18. ¿Kunas Rut warmirojj chuym wal ustʼaypachäna?

¹⁸ Janiw chuym ustʼayasiñasäkiti. Noemí warmimpi Rut warmimpejj Belén markar puripjjäna ukhajja, Noemí warmejj nayra vecinanakapampi jikisisajj akham sänwa: “Sarjjayät ukhajj taqe kunanïyätwa, jichhasti Jehová Diosajj chʼusa amparak kuttʼayanjjetu” sasa (Rut 1:21). ¿Rut warmejj suegrapar ukham parlir istʼasajj kunjamakis jikjjataspachäna? Jupajj suegrapar yanaptʼañatakejj taqe kunwa luräna, sañäni jupamp chikaw jachäna, chuymachtʼänwa, walja urunakaw jupamp  chika viajirakïna. Ukhamäkchïnsa, “Jehová Diosajj chʼusa amparak kuttʼayanjjetu” sasaw Noemí warmejj säna. Rut warmejj jupamp chikäskchïnsa, Noemí warmejj janis yanaptʼap valoranit uñjkaspa ukhamänwa. Ukajj Rut warmirojj wal chuym ustʼaypachäna. Ukampis suegraparojj janiw jaytjkänti.

19. ¿Kunas llakitäpki ukanakamp chikäskakiñatakejj yanaptʼistaspa?

¹⁹ Kunsa yateqsna: Llakita mä kullakar yanaptʼañatak chʼamachaskchiñänisa, inas kullakajj qalltan arunakapampi chuym ustʼaychistaspa. Ukampis janiw jankʼaki chuym ustʼayasiñasäkiti. Jupamp chikäskakiñasawa, Jehová Diosaruw kunjamsa chuymachtʼsna ukatakejj yanaptʼa mayiñasa (Prov. 17:17).

20. ¿Kunas Rut warmirojj jan qarjtañatak yanaptʼäna?

²⁰ Chʼamañchtʼatäñ munapki ukanakar chʼamañchtʼapjjañäni. Rut warmejj munasiñat janiw Noemí warmir jaytjkänti, ukampis jichhajja, jupaw chʼamañchtʼatäñ munäna. Ukatwa Jehová Diosajj Boaz chachampi akham sasin chuymachtʼayäna: “Ukham luratamat Jehová Diosajj jumar bendispan, Israel markan Jehová Diosapat phoqatpach pago katoqarakim, jupampi jarkʼaqatäñatakiw juttajja” sasa. Uka suma arunakajj Rut warmirojj walpun chuymachtʼäna. Ukatwa jupajj akham säna: “Servirimarjamaw suma arunakamp chuymachtʼistajja” sasa (Rut 2:12, 13). Boaz chachan uka arunakapajj jan qarjtañatakiw Rut warmirojj yanaptʼäna.

21. Isaías 32:1, 2 textorjamajja, ¿kunsa ancianonakajj munasiñat lurapjje?

²¹ Kunsa yateqsna: Mayninakar munasiñat jan jaytjapki ukanakasa, awisajj chʼamañchtʼatäñ munapjjarakiwa. Noemí warmiru munasiñampi uñjatapatjja, Boaz chachajj Rut warmirojj felicittʼänwa. Jichha tiemponjja, ukhamarakiw ancianonakajj kawkïr jilat kullakanakatï munasiñampi mayninakar yanaptʼapki ukanakarojj felicittʼapjje. Ukaw chʼamañchtʼiri jilat kullakanakarojj jan qarjtañatak yanaptʼi (Isaías 32:1, 2 liytʼäta).

22, 23. ¿Kunjamsa Noemí warmejj cambiäna, kunas cambiañapatakejj yanaptʼäna? (Salmo 136:23, 26).

²² Mä qhawqha tiempotjja, Boaz chachajj Rut warmimpiru Noemí warmimpir janipun manqʼañajj faltañapatakiw encargasïna (Rut 2:14-18). Jupanakat ukham khuyaptʼayasitapatjja, Noemí warmejj akham sänwa: “Jehová Diosajj uka jaqer bendispan, Diosajj munasiñampi jan jaytjasiñampiw jakirinakarus jiwirinakarus uñji” sasa (Rut 2:20, nota). Noemí warmejj janiw nayrjam amuyjjänti. Nayrajja wali llakitäsajj “Jehová Diosajj naya contrawa” sasaw säna. Ukampis jichhajj wali kusisitaw akham säna: “Jehová Diosajj munasiñampi jan jaytjasiñampiw [...] uñji” sasa. ¿Kunatsa nayrjam jan amuyjjäna?

²³ Noemí warmejja, kunjamsa Jehová Diosajj jupar yanaptʼaskäna uk amuyjjänwa. Judá markar kuttʼaskäna ukhajja, Jehová Diosajj Rut warmi toqew jupar yanaptʼäna (Rut 1:16). Jupanakar yanaptʼañapajj waktʼkäna ukanakat maynïrejj Boaz chachänwa. * Boaz chachajj munasiñampiw uka pä warminakat khuyaptʼayasïna. Uka chacha toqew Noemí warmejj Jehová Diosan yanaptʼap uñjäna (Rut 2:19, 20b). Jupajj inas akham amuychïna: “Jichhaw amuytjja, Jehová Diosajj janipuniw jaytjkituti. Jupajj nayamp chiktʼatapunïskataynawa” sasa (Salmo 136:23, 26 liytʼäta). Rut warmisa Boaz chachas jan qarjtasa jupar yanaptʼatapatjja, taqe chuymapuniw Noemí warmejj yuspärpachäna. Noemí warmejj jan llakitäjjäna, jan aynachtʼatäjjäna ukhajja, taqeniw kusisitäjjapjjäna.

24. ¿Kunatsa jilat kullakanakar munasiñat jan jaytjasirïtas uñachtʼayaskaktanjja?

²⁴ ¿Kunsa munasiñat jan jaytjaña toqet Rut libron yateqawaytan? Munasiñat jan jaytjasirïñaw aynachtʼatäpki uka jilat kullakanakar yanaptʼaskakiñataki, jan qarjtañatak chʼamañchistu. Jupanakar yanaptʼañatak sacrificionak lurañatakis chʼamañcharakistu. Mayninakar munasiñat jan jaytjapki ukanakarojj munasiñampiw ancianonakajj chʼamañchtʼapjjañapa. Aynachtʼatäpkäna uka jilat kullakanakajj Jehová Diosar kusisita sirvjjapjje ukhajja, wal kusistanjja (Hech. 20:35). ¿Kunatsa munasiñat jan jaytjasirïtas uñachtʼayaskaktanjja? Jehová Diosatwa yateqasiñ muntanjja, Jupan chuymapwa kusisiyañ munaraktanjja, Jupajj “wali munasiri ukhamarak jan jaytjasiri” Diosawa (Éx. 34:6; Sal. 33:22).