1. ¿Kunanaksa awisajj jisktʼassna?

FALSO religionanakajj niyaw tukjatäni, Magog markankir Gog sasin uñtʼatäki ukas niyaw Diosan markap contra sartani, Armagedón guerras niyaw qalltarakini. ¿Ukanakat lupʼisajj mä jukʼa ajjsarayastanti? ¿Taqe ukanakajj paskani ukhajj Jehová Diosar jan jitheqtas serviskakiñäniti? Jiwasatï ukanak jisktʼasstan ukhajja, aka yatichäwitak apstʼat textow yanaptʼistaspa. Ukanjja Jesusajj discipulonakapar akham sänwa: “Jan jumanakajj chuymanakaman llakisipjjamti. Diosar confiyapjjam” sasa (Juan 14:1). Jiwasatï Jehová Diosar jukʼamp confiyañäni ukhajja, kunanakatï jutïrin paskani ukarojj jan ajjsartʼasaw saykatañäni.

2. ¿Jehová Diosar jukʼamp confiyañatakejj kunsa lursna, ukat kunanakatsa aka yatichäwin yatjjataskañäni?

² Diosar confiyatasajj jutïrin yantʼat uñjaskani ukanakar saykatañatakejja, jichha tiempon jan walinakan uñjasisajj kunsa lurtan ukanakat lupʼiñasawa. Ukaw kunansa Jehová Diosar jukʼamp confiyañatakejj chʼamachasiñasa uk amuyañatak yanaptʼistani. Mä jan waltʼäwir atipjtan ukhaw Jehová Diosar jukʼamp confiytanjja. Ukarakiw jutïrin kuna jan walinakantï uñjaskañäni ukanak aguantañatak yanaptʼistani. Aka yatichäwinjja, Jesusan discipulonakapajj kuna pusi toqenakansa Jehová Diosar jukʼamp confiyapjjañapajj wakisïna ukanakatwa yatjjataskañäni. Ukatjja kunjamsa ukar uñtasit jan walinakan uñjasisajj aguantsna ukwa yatjjatarakiñäni. Kunjamsa ukanakajj jutïritak wakichtʼistu uksa yatjjatarakiñäniwa.

3. Mateo 6:30, 33 textorjamajja, ¿kunsa Jehová Diosar jukʼamp confiyañ toqet Jesusajj qhanañchäna?

³ Mä familia pʼeqtʼirejja, esposaparusa wawanakaparusa, manqʼaña isi jan faltañapatakiw llakisi, utanïñsa munarakiwa. Ukanak  jikjjatañajj jichha tiempon wali chʼamawa. Yaqhep jilat kullakanakajj jan trabajoniw uñjasipjje, walsa chʼamachasipkchejja janiw yaqha trabajo jikjjatapkiti. Yaqhepanakasti, cristianonakatak jan walïki uka trabajonak janiw katoqapkiti. Ukhamanakan uñjastan ukhaw ‘kunatï wakiski uk Jehová Diosaw churitani’ sasin jukʼamp confiyañajj wakisi. Jesusajj discipulonakapar Qollun yatichkäna ukhaw uka toqet sum qhanañchäna (Mateo 6:30, 33 liytʼäta). Jehová Diosajj janipuniw jaytjkitaniti sasin taqe chuyma confiyañäni ukhajja, Diosan Reinopwa nayrar uchañäni. Ukatjja kunjamsa Jehová Diosajj jan kuns faltaykistu uk uñjasajja, jukʼampiw Jupar jakʼachasiñäni, jukʼampiw confiyarakiñäni.

4, 5. Kunatï jakañatak munaski uk jikjjatañat llakisipkäna ukhajja, ¿kunas mä familiarojj yanaptʼäna?

⁴ Venezuela markan jakasiri familia Castro jupanakat parltʼañäni. Jupanakajj kunatï jakañatak munaski uk jikjjatañat llakisipkäna ukhajja, Jehová Diosaw jupanakar yanaptʼäna. Uka familiajj oraqepan yapuchasisakiw jakasipjjäna, ukampis mä urojja, wali armantata jaqenakaw oraqep katuntasipjjäna, sarjjapjjañapatakiw obligapjjarakïna. Miguel jilatajj akham siwa: “Jichhajja mä jiskʼa oraqe yapuchañatak maytʼasipkta ukampikiw jakasipjjta. Jehová Diosarojj sapüruw janïr kun lurkasina jan kunsa nanakar faltayañapatak mayista” sasa. Uka familiatakejj jakasiñajj chʼamakiwa, ukampis jupanakajj wali munasiri Awkisaw kunatï jakañatak munaski uk churistani sasaw taqe chuyma confiyapjje. Ukatwa tantachäwinakarusa predicacionarus jan faltasisa sarapjje, jupanakatakejj Diosan Reinopaw nayranki, Jehová Diosaw jupanakar cuidaskaraki.

⁵ Ukhamanakan uñjaskasajja, Miguel jilatampi Yurai sat esposapampejj kunjamsa Jehová Diosajj jupanakar cuidäna ukanakatwa lupʼipjjäna. Awisajja Jehová Diosajj jilat kullakanak toqew kuntï munapkäna uk churäna, jan ukajj Miguel jilatan mä trabajo jikjjatañapatakis yanaptʼäna. Yaqha horasanakasti, sucursal toqew yanaptʼa katoqapjjarakïna. Jehová Diosajj janipuniw jupanakar jaytjkänti. Ukatwa uka familiajj Diosar jukʼamp confiyäna. Kunjamsa Jehová Diosajj jupanakar yanaptʼäna uka toqet parlkasajja, Yoselin sat jilïr phuchapajj akham siwa: “Diosan yanaptʼap qhan uñjañajj chuymajarupuniw purtʼitu. Jupaw nayan amigojajja, Jupajj yanaptʼapunitaniwa, ukat janiw payachaskti” sasa. Ukatsti akham sarakiwa: “Kuna jan walinakantï familiajampi uñjasiwayapkta ukajja, jutïrin jukʼamp jan walinak utjkani ukar saykatañatakiw yanaptʼawayapjjetu” sasa.

6. Jumatï qollqet pistʼata jakasisksta ukhajja, ¿Jehová Diosar jukʼamp confiyañatakejj kunsa lurasma?

⁶ ¿Qollqet pistʼatat jakasiskta? Ukhamächi ukhajja, ukham jakasiñajj chʼamakïpachawa. Ukhaman uñjaskasas Jehová Diosar jukʼamp confiyañatakiw chʼamachasisma. Jehová Diosar mayisim, kuntï Jesusajj Mateo 6:25-34 texton siskäna uka arunak liytʼam ukatsti lupʼirakim. Kunjamsa Jehová Diosajj jichha tiempon servirinakaparojj Jupan Reinop nayrar uchapjjatapat jan kuns faltayki ukanakatsa lupʼirakim (1 Cor. 15:58). Ukaw alajjpachankir  Awkimar jukʼamp confiyañatak yanaptʼätam, jumjam jan walinakan uñjasipkäna ukanakarojj yanaptʼawayiwa, jumarojj yanaptʼarakïtamwa. Diosajj kunansa yanaptʼatäñ munta, kunjamsa yanaptʼiristam uk yatiwa. Jakäwiman kunjamsa yanaptʼtam uk uñjäta ukhajja, jukʼampiw Jupar confiyäta, jutïrin jukʼamp jan walinakan uñjaskäta uksa aguantarakïtawa (Hab. 3:17, 18).

7. Mateo 8:23-26 textorjamajja, ¿kunjamsa Jesusan discipulonakapan Jehová Diosar confiyapjjatapajj yantʼat uñjasïna?

⁷ Mä kutejja, Jesusampi discipulonakapampejj barcotwa viajisipkäna, ukhamaruw qota taypin jachʼa thayajj sartäna. Kunatï ukan paskäna ukampiw Jesusajj discipulonakapar jukʼamp confiyapjjañap wakisitap amuytʼayäna (Mateo 8:23-26 liytʼäta). Jachʼa thayajj wali chʼamampiw thaytʼanïna, oladanakajj barcorus chhaqtayänwa, ukampis Jesusajj sumwa iktʼasiskäna. Discipulonakapasti wali sustjatäsajj Jesusaruw sartayapjjäna, ukhamat jupanakar salvañapataki. Jesusasti jupanakarojj akham sänwa: “Diosar jan taqe chuym confiyir jaqenaka, ¿kunatsa wal sustjasipjjta?” sasa. Jehová Diosatakejj Jesusampiru discipulonakapampir jarkʼaqañajj janiw kuna chʼamäkaspänsa, ukwa jupanakajj amuyapjjañapäna. ¿Kunsa ukat yateqsna? Jehová Diosarutï jukʼamp confiyañäni ukhajja, cheqpach jachʼa thaysa, jachʼa thayar uñtasit jan walinaksa aguantañäniwa.

8, 9. ¿Anel kullakan Diosar confiyatapajj kunjamsa yantʼat uñjasïna, ukat kunas jupar yanaptʼäna?

⁸ Puerto Rico markan jakasiri Anel sat soltera kullakajja, mä jan walin uñjasisajj aguantänwa. Ukhamatwa Jehová Diosar jukʼamp confiyjjäna. 2017 maranjja, Puerto Rico markarojj María sat jachʼa thayaw jan waltʼayäna. Ukhamïpanjja Anel kullakajj jan utani, jan trabajoniw quedasïna. Jupajj akham siwa: “Uka jan wali urunakanjja, walpun ajjsarayasiyäta, ukampis Jehová Diosar oracionan yanaptʼa mayiña, llakimp jan aynachtʼañwa yateqawayta” sasa.

⁹ Uka jan walin uñjaskäna ukhajja, Anel kullakarojj istʼasirïñaw yanaptʼarakïna. Jupajj akham siwa: “Diosan markapan ewjjtʼanakapar istʼañaw llakimpi jan aynachtʼañatakejj yanaptʼawayitu. Jehová Diosajj jilat kullakanak toqew yanaptʼitäna, jupanakaw chʼamañchtʼapjjetäna, kunatï jakañatak munaski uksa churapjjetäna” sasa. Ukatsti akham sarakiwa: “Jehová Diosajj kuntï suykayäta ukat sipans jukʼampwa churitäna, ukatsti jukʼampiw confiyjjayäta” sasa.

10. ¿Jachʼa thayar uñtasita mä jan walimpi tʼaqesisksta ukhajj kunsa lurasma?

¹⁰ ¿Jachʼa thayar uñtasita jan walinti uñjasiskta? Inas terremoto, jachʼa thaya ukat yaqha ukhamanak utjipan tʼaqesisksta. Jan ukajj inas mä jan wali usojj ‘jachʼa thayar’ uñtasita jan waltʼayaskstam, ukhamïpan inas jan kuns lurañ puedkstati. Ukhaman uñjasisajj inas awisajj wal llakissta. Ukampis Jehová Diosar confiyaskakiñamawa. Kunjamas jikjjatasta taqe ukanak  Jupar yatiyam. Ukatjja kunjamsa Jehová Diosajj yanaptʼawaytam ukanakat lupʼisa Jupar jukʼamp confiyam (Sal. 77:11, 12). Jupajj janipuniw jichhasa ni kunapachas jaytanukkätamti.

11. ¿Pʼeqtʼapkistu ukanakar kunatsa istʼasirïñasa?

¹¹ ¿Kunas jan walinak aguantañatakejj yanaptʼarakïtam? Kunjamtï Anel kullakajj siskejja, istʼasirïñaw yanaptʼarakïtam. Jehová Diosasa Jesusas khitinakarutï confiyki ukanakar confiyañwa yateqañama. Awisajja, pʼeqtʼapkistu ukanakajj kuna ewjjtʼanaktï churapkistu ukajj janis walïkaspa ukhamwa amuysna. Ukampis Jehová Diosajj istʼasirinakaruw bendisi, uk amtañamapuniwa. Istʼasirïñajj salvistaspawa, ukwa Bibliasa Diosar jan jitheqtas servirinakan experiencianakapas yatichistu (Éx. 14:1-4; 2 Crón. 20:17). Uka sarnaqäwinakat lupʼïta ukhajja, Diosan markapan ewjjtʼanakapar istʼañajj jichhasa, jutïrinsa janiw chʼamäkaniti (Heb. 13:17). Jachʼa tʼaqesiña uru niya puriniñampïski ukarus janiw ajjsarkätati (Prov. 3:25).

12. Lucas 18:1-8 textorjamajja, ¿kunjamsa Diosar confiyañajj ina chʼusat tʼaqesiyat uñjaskasin aguantañatak yanaptʼistu?

¹² Discipulonakajj ina chʼusat tʼaqesiyata uñjasisajja, Diosar confiyapjjatapajj yantʼataw uñjasiñapäna ukwa Jesusajj yatïna. Uk aguantapjjañapatakejja, Jesusajj Lucas libron qellqatäki uka sarnaqäwitwa cuenttʼäna. Jupajja kunjamsa mä viuda warmejj jan cheqapar uñjir juezaru cheqapar uñjatäñataki kutin kutin wal ruwtʼasïna uka toqetwa parläna. Uka viuda warmejja, ‘juezarutï mayiskakëjja, jupajj yanaptʼitaniwa’ sasaw confiyäna. Juezajj cheqapuniw yanaptʼäna. ¿Kunsa ukat yateqsna? Jehová Diosajj cheqapar uñjiri Diosawa. Ukatwa Jesusajj akham säna: “Ukhamasti ¿janit Diosajj uruy aruma arnaqasir ajllitanakaparojj yanaptʼkani, ukhamat cheqapar uñjatäpjjañapataki?” sasa (Lucas 18:1-8 liytʼäta). Ukatsti Jesusajj akham sarakïnwa: “Jaqen Yoqapajj purinkani ukhajja, ¿Diosar ukham confiyir jaqenak oraqen jikiniti?” sasa. Ina chʼusat tʼaqesiyata uñjasktan ukhajja, paciencianïtasampi aguantatasampejj uka viuda warmjam Diosar wal confiyataswa uñachtʼayañasa. Ukham confiyañäni ukhajja, Jehová Diosan yanaptʼapat janiw payachaskañäniti. Diosar mayisiñajj qhawqha chʼamanisa ukarus confiyañasarakiwa. Awisajja jan suykayätan ukanakampiw Diosajj oracionanakasar jaysistaspa.

13. ¿Ina chʼusat tʼaqesiyat uñjaskäna uka familiarojj kunjamsa oracionajj yanaptʼäna?

¹³ República Democrática del Congo markan jakasiri Vero kullakat parltʼañäni, esposopajj janiw Testigökiti, phuchapajj 15 maraniwa. Jupanakajj markapan jan waltʼäwi utjipanwa escapjjapjjäna. Thakinjja soldadonakaw jarkʼantapjjäna, jiwayapjjämawa sasaw ajjsarayapjjarakïna. Uk uñjasasti, Vero kullakajj wal jachäna, ukampis phuchapajj jan jachañapatakejj jachʼatwa Diosar mayisïna, walja kutiw Diosan Jehová sutip aytäna. Orañ tukuyjjäna ukhajja, encargatäkäna uka oficialajj akham sasaw  jupar jisktʼäna: “Tawaqeta, ¿khitis orañ yatichtam?” sasa. Jupasti, “mamitajaw Mateo 6:9-13 uka textorjam mayisiñ yatichitu” sasaw säna. Uka oficialajj akham sarakïnwa: “Sumak sarjjapjjam, Jehová Diosamajj jumanakar jarkʼaqpan” sasa.

14. ¿Kunapachas Diosar confiyatasajj yantʼat uñjasispa, ukat kunas aguantañatakejj yanaptʼistaspa?

¹⁴ Ukham experiencianakajja, Jehová Diosar mayisiñajj kunja wakiskirisa ukwa yatichistu. Ukampis oracionanakamar Diosajj jan ratuki jayskätam, jan ukajj jan musparkañ jayskätam ukhajj Diosar confiyatamajj yantʼataw uñjasispa. Ukhaman uñjasïta ukhajj ¿kunas aguantañatak yanaptʼätam? Jesusajj parlkäna uka viuda warmjamarakiw Diosajj janiw jaytjkitaniti sasin confiyasa mayisiskakiñama, Jupajj horasaparuw jaysitani sasaw confiyañamaraki, Diosarojj espíritu santopwa mayiñamaraki (Filip. 4:13). Jupajj walja bendicionanak niyaw churätam, qhawqsa tʼaqesiwayta ukanaksa janiw amtjjätati. Jehová Diosan yanaptʼapampi jan walinak aguantasajja, jutïrin kuna jan walinakantï uñjaskäta ukatakejj jukʼamp chʼamanïyätawa (1 Ped. 1:6, 7).

15. Mateo 17:19, 20 textorjamajja, ¿kunatsa mä kutejj Jesusan discipulonakapajj mä demonior jan alissuñ puedipkäna?

¹⁵ Jesusajja Diosar confiyañaw jan waltʼäwinakan uñjaskasas ukanakar atipjañatak yanaptʼapjjätam sasaw discipulonakapar yatichäna (Mateo 17:19, 20 liytʼäta). Jupanakajj walja kutis demonionak nayrajj alissupkchïnjja, mä kutejj janiw uk lurañ puedjjapjjänti. ¿Kunatsa jan puedipkäna? Diosar jukʼamp confiyapjjañamaw faltapjjtam sasaw Jesusajj säna. Jumanakatï Diosar jukʼamp confiyapjjasma ukhajja, qollunakar uñtasit jachʼa jan walinakarojj atipjapjjasmawa sasaw sarakïna. Jichhürunakanjja, ukhamarakiw jan atipjañjam jan walinakan uñjassna.

16. Mä jan waltʼäwin uñjaskäna ukhajja, ¿kunjamsa Diosar confiyañajj Geydi kullakar yanaptʼäna?

¹⁶ Guatemala markan jakasiri Geydi sat kullakat parltʼañäni. Tantachäwit utapar kuttʼanisipkäna ukhaw Edi sat esposoparojj lunthatanakajj jiwayapjjäna. Diosar confiyañajj kunjamsa jan sint llakisiñatak yanaptʼäna uka toqetjja, jupajj akham siwa: “Oración toqew Jehová Diosarojj llakinakaj katuyta, ukaw sumaki jikjjatasiñatak yanaptʼitu. Jupajj familiaj toqe, jilat kullakanak toqew nayar cuiditu. Jehová Diosar serviñ nayrar uchañaw jan sint llakisiñataki, qhepürojj kunatï paskani ukat jan sint llakisiñatakis yanaptʼitu. Kunatï pasawaykitu ukajja, kuna jan walinakantï jutïrin uñjaskä ukanakatakiw yanaptʼawayitu. Jehová Diosana, Jesusana, Diosan markapan yanaptʼapampejj ukanakar atipjäwa” sasa.

17. Qollur uñtasit mä jachʼa jan waltʼäwin uñjasiñäni ukhajja, ¿kunas ukar atipjañatak yanaptʼistani?

¹⁷ Jumantï mä familiaramajj jiwchi ukhajja, jiwatanakajj jaktanipjjaniwa sasin confiyañatakejj Biblian kunjamsa yaqhepanakajj jiwatat jaktapjjäna ukanakwa liyiñama. ¿Mä familiaman  congregacionat jaqsutätap laykuti llakitäskta? Ukhamächi ukhajja, Diosan cheqañchatäñajj kunja wakiskirisa uk amuyañatakejj Bibliat yatjjatam. Kuna jan walinsay uñjaskstajja, ukajj Jehová Diosar jukʼamp confiyañatakiw yanaptʼätam. Kunjamas jikjjatasta uk oracionan Diosar yatiyam. Jilat kullakanakat janipun jitheqtamti (Prov. 18:1). Kunanakatï pasawayktam ukanakat lupʼisajj jachkchïtasa, kunanakatï aguantañatak yanaptʼkiristam ukanak luram (Sal. 126:5, 6). Tantachäwinakarusa, predikirisa saraskakim, Biblsa liyiskakim. Kuna suma bendicionanaktï Jehová Diosajj churkistani ukanakatsa lupʼiskakim. Jehová Diosajj kunjamsa yanaptʼtam uk uñjäta ukhajja, Juparojj jukʼampiw confiyäta.

18. ¿Diosar jukʼak confiyatam amuyassta ukhajj kunsa lurasma?

¹⁸ Kuna jan walinakantï uñjasiwaykta, jan ukajj jichhas uñjasisksta ukatï Diosar jan sint confiyatam uñachtʼaychi ukhajja, jan aynachtʼamti. Ukajj Jehová Diosar jukʼamp confiyañatakiw yanaptʼitani sasaw amuyañama. Jesusan apostolonakapjamaw ‘Jumar jukʼamp confiyañ yanaptʼitaʼ sasin Diosar mayisiñama (Lucas 17:5). Aka yatichäwin walja sarnaqäwinakat yatjjataniwayktan ukanakatwa lupʼirakisma. Miguel jilatjama Yurai esposapjamaw kunjamsa Jehová Diosajj yanaptʼawaytam uka toqenakat lupʼiñama. Vero kullakan phuchapjama, ukat Anel sat kullakjamarakiw Jehová Diosarojj taqe chuyma mayisiñama, yamas jan walinakan uñjaskta ukhajj jukʼampiw mayisiñama. Ukatjja Geydi kullakjamarakiw Jehová Diosajj familiam toqe, jilat kullakanak toqe yanaptʼasktam uk katoqasiñama. Jumatï jichha tiempon jan walin uñjaskasin Jehová Diosampi yanaptʼayasïta ukhajja, jutïrin kuna jan walinakantï uñjaskäta uk aguantañatakejj Jehová Diosaw yanaptʼitani sasaw taqe chuyma confiyarakïta.

19. ¿Jesusajj kunatsa jan payachaskäna, jumajj kunatsa jan payachaskarakisma?

¹⁹ Kunanakansa Jehová Diosar jukʼamp confiyapjjañapäna ukanakwa Jesusajj discipulonakapar amuytʼayäna, ukampis kuna jan walinakantï jutïrin uñjasipkaspäna ukarojj Jehová Diosan yanaptʼapampejj atipjapjjaspänwa, ukat janiw Jesusajj payachaskänti (Juan 14:1; 16:33). Janiw ukakïkiti, walja jaqenakaw Jehová Diosar wal confiyapjjatapat jachʼa tʼaqesiñ uru jakkirpacha pasapjjaspäna, ukat janirakiw Jesusajj payachaskänti (Apoc. 7:9, 14). ¿Jumajj jupanak taypinkätati? Jichhatï Jehová Diosar jukʼamp confiyañatak chʼamachasïta ukhajja, Jupan yanaptʼapampejj uka taypinkarakïtawa (Heb. 10:39).