47 YATICHÄWI
Janipun kunas Jehová Diosat apaqestpanti
“Jehová Dios Tata, nayajj jumaruw confiysma” (SAL. 31:14).
CANCIÓN 122 ¡Suma saytʼatäpjjañäni!
¿KUNANAKATSA YATJJATASKAÑÄNI? a
1. Jehová Diosajj jakʼapankañaswa muni, ¿kunjamatsa uk yattanjja?
JEHOVÁ DIOSAJJ jakʼapankañasatakiw invitistu (Sant. 4:8). Jupajj Diosasäña, Awkisäña, amigosäñwa muni. Jupajj oracionanakas jaysistuwa, jan walinakan uñjasktan ukhas yanaptʼarakistuwa. Janiw ukakïkiti, markap toqew yatichistu, cuidarakistu. Ukampis ¿jakʼapankañatakejj kunsa lurañasa?
2. ¿Kunjamatsa Jehová Diosar jakʼachassna?
2 Jehová Diosarojj oración lurasa, Arup liyisa, liytʼktan ukat lupʼisaw jakʼachassna. Ukhamatwa jupar munasiñäni, yuspärarakiñäni. Juparojj taqe kunanwa istʼañ munañäni, kunjam jachʼañchañatï wakiski ukhamwa jachʼañchañäni (Apoc. 4:11). Jehová Diosar jukʼamp uñtʼañäni ukhajja, juparusa cuidkistu uka markaparus jukʼampwa confiyañäni.
3. 1) ¿Kunjamsa Supayajj Jehová Diosat apaqañ munistu? 2) ¿Jehová Diosarus markaparus janipun apanukuñatakejj kunas munasi? (Salmo 31:13, 14).
3 Supayajj Jehová Diosat apaqañwa munistu, jukʼampis jan walinakan uñjasktan ukhaw apaqañ munistu. ¿Kunjamsa uk luri? Jehová Diosampiru markapampir jukʼat jukʼat jan confiyjjañasatakiw yantʼistu. Ukampis uka yantʼanakaparojj saykatsnawa. Jiwasatï Jehová Diosar taqe chuyma confiyañänejja, juparus markaparus janipuniw kunäkipans apanukkañäniti (Salmo 31:13, 14 liytʼäta).
4. ¿Kunanakatsa aka yatichäwin yatjjataskañäni?
4 Aka yatichäwinjja, Diosar jan servirinakajj kuna jan walinakansa uñjasiyistaspa ukwa kimsa toqet yatjjataskañäni, ukanakaw Jehová Diosampiru markapampir confiyatas jan waltʼayaspa. ¿Kunjamsa uka yantʼanakajj Jehová Diosat apaqestaspa? ¿Kunsa Supay contra saytʼasiñatakejj lursna?
JAN WALINAKAN UÑJASKTAN UKAPACHA
5. ¿Kunjamsa jan walinakajj Jehová Diosampiru markapampir confiyatas jan waltʼayaspa?
5 Inas awisajj familiaranakasajj jiwas contra saytʼapjjchi jan ukajj jan trabajoni uñjasstan. ¿Kunjamsa uka jan walinakajj Jehová Diosan markapar confiyatas jan waltʼayaspa, jupatsa apaqarakistaspa? Walja tiempo mä jan walin uñjastan ukhajja, ukajj janiw askichaskaniti sasin inas amuyjjsna, ukat llakisjjaraksna. Ukhamanakan uñjasktan ukhaw Supayajj janis Jehová Diosajj munaskistaspa ukham amuyañas muni. Ukham jan walinakan uñjasiñasatakejj Jehová Diosasa jan ukajj markapas juchanïkaspa ukham amuyañaswa Supayajj munaraki. Egipto markankapkäna uka yaqhep israelitanakarojj niya ukhamaw pasarakïna. Qalltanjja Jehová Diosas jupanakar esclavöñat salvañatakejj Moisesampir Aaronampir ajllkaspäna ukhamwa amuyapjjäna (Éx. 4:29-31). Ukampis faraonajj jupanakar wal tʼaqesiykäna ukhajja, Moisesampiru Aaronampiruw juchañchjjapjjäna, akham sasa: “Jumanak kawsaw faraonasa servirinakapas uñisipjjetu. Mä espadsa nanakar jiwayañatakejj amparanakapar uchapkasma ukhamawa” sasa (Éx. 5:19-21). ¡Jehová Diosat jan jitheqtiri servirinakapar ukham juchañchapjjatapajj janipuniw walïkänti! Jumatï walja tiempo jan walinak aguantasksta ukhajja, ¿Jehová Diosampiru markapampir taqe chuyma confiyaskakiñatakejj kunsa lurasma?
6. ¿Kunsa Habacuc profetat yateqtanjja? (Habacuc 3:17-19).
6 Jehová Diosarojj chuymatpach orasim, yanaptʼap thaqarakim. Habacuc profetajj walja jan waltʼäwinakanwa uñjasïna. Amuyatajja, Jehová Diosajj janiw nayat llakiskiti sasaw mä kutejj payachasjjäna. Ukatwa kunjamas chuymapan jikjjatasïna ukanak taqpach mä oracionan Jehová Diosar yatiyäna. Jupajj akham sänwa: “Jehová Dios Tata, ¿kunapachkamarak yanap mayiñatak artʼasinkakïmasti? […] ¿Kunatsa jaqe masipar tʼaqesiyirinakarojj ukhamak uñchʼukta?” sasa (Hab. 1:2, 3). Jehová Diosasti, jupat jan jitheqtiri uka serviripan chuymatpach orasitaparojj jaysänwa (Hab. 2:2, 3). Kunjamsa Jehová Diosajj markapar salväna uk amuykiptʼasajja, Habacuc profetajj wasitatwa kusisitäjjäna. Jehová Diosajj cheqpachapuniw nayat llakisi, kunayman yantʼanak aguantañatakis yanaptʼarakitaniwa sasaw confiyjjäna (Habacuc 3:17-19 liytʼäta). ¿Kunsa ukat yateqsna? Jan walinakan uñjaskäta ukhajja, Jehová Diosar orasim, kunjamsa chuymaman jikjjatasta uk jupar yatiyam, yanaptʼaps thaqarakim. Jehová Diosaw aguantañatakejj chʼam churätam, jan ukat payachasimti. Kunjamsa yanaptʼasktam uk yatisajja jukʼampiw jupar confiyjjarakïta.
7. ¿Diosar jan confiyjjañapatakejj kunsa mä familiarapajj Shirley kullakar säna, ukat kunas kullakarojj Jehová Diosar confiyaskakiñatak yanaptʼäna?
7 Kunanakatï Jehová Diosan jakʼapankaskakiñatak yanaptʼktam ukanak luraskakim. Ukaw jan walinakan uñjaskäna ukhajj Shirley kullakar yanaptʼäna, jupajj Papúa Nueva Guinea markatawa. b Familiapajj pobrënwa, awisajja manqʼañanak jikjjatañajj jupanakatak chʼamakïnwa. Jehová Diosar jan jukʼamp confiyjjañapatakejja, mä familiarapajj akham sänwa: “Jumajj Diosan espíritu santopaw yanaptʼaskitu sistawa. Ukampis ¿kawkirak uka yanaptʼasti? Jumanakajj pobrekïsipktawa. Predicasajj tiempo aptʼasisktajja” sasa. Ukatwa Shirley kullakajj “¿Jehová Diosajj nayatsa familiajatsa armasjjpachati?” sasin jisktʼasïna. Kullakajj akham siwa: “Ukaratpachaw Jehová Diosar orasiyäta, kunjamas chuymajan jikjjatasiyäta ukwa jupar awistʼasiyäta. Bibliatsa Bibliat apstʼat qellqatanakatsa liytʼaskakiyätwa. Janiw predicañ jaytkayätti, tantachäwinakarus saraskakiyätwa” sasa. Jehová Diosajj kunjamsa familiapar cuidaskäna uk Shirley kullakajj amuyasjjänwa, kuna laykutejj janiw jan manqʼatajj uñjasipkänti, kusisitäpjjarakïnwa. Kullakajj akham saskakiwa: “Kunjamsa Jehová Diosajj oracionanakaj jaysäna ukwa uñjayäta” sasa (1 Tim. 6:6-8). Kunanakatï Jehová Diosan jakʼapankaskakiñatak yanaptʼistani ukanak luraskakiñäni ukhajja, janiw kuna jan walinakasa ni payachasiñanakas Jehová Diosat apaqkistaniti.
DIOSAN MARKAPAN IRPAPKI UKA JILATANAKAR TʼAQESIYAPKI UKAPACHA
8. ¿Diosan markapan irpapki uka jilatanakarojj kunas pasaspa?
8 Televisionansa, radionsa, yaqha ukhamanakansa, redes sociales ukanakansa, Jehová Diosan markapan sarayapki uka jilatanakatwa enemigonakasajj kʼarinaka jan ukajj kʼari yatiyäwinak parlapjje (Sal. 31:13). Yaqhep jilatanakarojj jan wali jaqenakäpkaspas ukhamwa arrestapjje, juchañchapjjaraki. Nayrïr patak maranakanjja, niya ukhamaw pasarakïna. Apóstol Pablorojj ina chʼusat juchañchasaw arrestapjjarakïna. ¿Kunsa uka tiemponkir cristianonakajj lurapjjäna?
9. ¿Apóstol Pablor arrestapkäna ukhajj kunsa yaqhep cristianonakajj lurapjjäna?
9 Apóstol Pablojj Roma markan arrestatäkäna ukhajja, yaqhep cristianonakajj jupar jaytanukupjjänwa (2 Tim. 1:8, 15). ¿Apóstol Pablor jan wali jaqet uñjapjjatapatti jupat phenqʼasipjjpachäna? (2 Tim. 2:8, 9). Jan ukajj ¿arknaqapjjarakistaniwa sasincha ajjsarayasipjjpachäna? Kunjamächïnjjaya, apóstol Pablorojj wal ukajj chuym ustʼaypachäna. Jupajj kunaymaninak aguantäna, jupanak laykojj niyaw vidaps aptʼasirakïna (Hech. 20:18-21; 2 Cor. 1:8). Janipun uka cristianonakjamäñäniti, Pablojj yanaptʼatäñ wal munkäna ukhaw jupanakajj jupar jaytanukupjjäna. Diosan markapan sarayir jilatanakar arknaqapki ukhajj ¿kun amtañasas wakisi?
10. Diosan markapan irpapki uka jilatanakar arknaqapki ukhajj ¿kunsa amtañasa, ukat kunatsa uk amtañasa?
10 Kunatsa arknaqapjjestu, khitis ukar chʼamañchi uk amtapunim. 2 Timoteo 3:12 texton akham siwa: “Taqe khitinakatejj Cristo Jesusan arkiripjam jakañ munapki, Dios chuym jakañ munapkaraki ukanakajja, jan waltʼayañatak arknaqataw uñjasipjjarakini” sasa. Cheqas jiwasajj yatjjtanwa, Supayajj khitinakatï Diosan markapan irpapki uka jilatanakaruw jukʼamp jan waltʼayi. Uka jilatanakajj Jehová Diosat jitheqtapjjaspa, jiwasajj ajjsarayasiraksna ukwa Supayajj muni (1 Ped. 5:8).
Apóstol Pablojj carcelankchïnsa, Onesíforo jilatajj jan ajjsartʼasaw jupar yanaptʼäna. Jichhürunakanjja, jilat kullakanakajj ukhamarakiw carcelankapki uka cristiano jilat kullakanakarojj yanaptʼapjje, ukaw dibujonsa fotonsa uñjasiraki. (Párrafos 11, 12).
11. ¿Kunsa Onesíforo jilatat yateqassna? (2 Timoteo 1:16-18).
11 Diosan markapan irpapki uka jilatanakarojj jan jitheqtas yanaptʼaskakim (2 Timoteo 1:16-18 liytʼäta). Nayrïr patak maranakanjja, apóstol Pablojj carcelankkäna ukhajj mä cristiano jilataw jupar yanaptʼäna. Jupajj Onesíforo satänwa. Apóstol Pablojj akham sasaw jupat säna: ‘Janiw cadenanakampi chinuntatätaj laykojj phenqʼaskänti’ sasa. Cheqas Onesíforo jilatajj Pablomp jikisiñatakejj wal chʼamachasïna. Jupamp jikisisajja, kunan yanaptʼatäñtï munkäna ukampiw yanaptʼäna. ¡Jupa laykojj niyaw vidaps aptʼasïna! ¿Kunsa ukat yateqsna? Jaqenakar ajjsaratam laykojja, arknaqat uñjasipki uka jilatanakar yanaptʼañ jan jaytamti. Jupanakar arjjatañatakisa, yanaptʼañatakis chʼamachasipunim (Prov. 17:17). Jupanakar munassna yanaptʼaraksna ukwa uka jilatanakajj munapjje.
12. ¿Kunsa Rusia markankir jilat kullakanakasat yateqsna?
12 Munat jilat kullakanakapar carcelar llawintapki ukhajj kunsa Rusia markankir jilat kullakanakajj lurapjje uk amuytʼañäni. Jupanakat yaqhepajj juchañchatäñatak tribunalar sarapki ukhajja, walja jilat kullakanakaw jupanakar apoyañatakejj ukar sarapjje. ¿Kunsa ukat yateqsna? Diosan markapan irpapki uka jilatanakarutï kʼarintapjjani, arrestapjjani jan ukajj arknaqapjjani ukhajja, jan sustjasimti. Jupanakatak orarapim, familianakaparojj yanaptʼam, jupanakarojj kunjamats yanaptʼapunim (Hech. 12:5; 2 Cor. 1:10, 11).
JIWASAT BURLASIPKI UKAPACHA
13. ¿Kunjamsa mayninakan jiwasat burlasipjjatapajj Jehová Diosampiru markapampir confiyatas jan waltʼayaspa?
13 Predicatasatsa jan ukajj Jehová Diosajj sum sarnaqañatak churkistu uka leyinakar respetatasatsa jan Testigöpki uka yaqhep familiaranakasasa, jiwasamp chik trabajirinakasa jan ukajj escuel masinakasas jiwasat burlasipjjaspawa (1 Ped. 4:4). Inas akham sapjjchistaspa: “Jumajj suma jaqëtawa, ukampis religionaman mayitanakap phoqañajj wali chʼamawa, janiw jichha tiempotakjamäkiti” sasa. Inas yaqhepanakajj kunjamsa congregacionat jaqsutanakarojj uñjtan uka toqet jan wal parlapjjchispa, ukatwa akham jisktʼapjjestaspa: “¿Kunjamarak nayajj jaqer munastwa sasmasti?” sasa. Jaqenakan ukham parlapjjatapajj payachasiyistaspawa, akham sasaw jisktʼasjjaraksna: “¿Jehová Diosajj jan pantjasiñajti munpacha? ¿Jan phoqañjamäki ukanakti markapajj maypachïtu?” sasa. Jumatï ukhaman uñjassta ukhajja, ¿kunsa Jehová Diosatsa markapatsa jan jitheqtañatakejj lurasma?
Job chachajja, jupat burlasipkäna uka falso amigonakapan kʼarinakap janiw creykänti. Jupajj janipuniw Jehová Diosat jitheqtañ munkänti. (Párrafo 14).
14. ¿Jehová Diosan leyinakapar respetatasat jiwasat burlasipjjani ukhajj kunsa lurañasa? (Salmo 119:50-52).
14 Jehová Diosan leyinakap toqet taqe chuym saytʼasim. Job chachat burlasipkchïnsa, jupajj taqe chuymaw Jehová Diosan leyinakap toqet saytʼasïna. Falso amigonakapat maynejja, Diosan leyinakap respettati janicha ukajj janiw Diosar importkiti sasin creyiñapwa munäna (Job 4:17, 18; 22:3). Ukampis Job chachajj janiw uka kʼarinak creykänti, kunatï walïki jan walïkaraki uka toqet parlir Diosan leyinakapajj cheqapätapjja jupajj yatïnwa, taqe chuymaw uka leyinakap toqet saytʼasirakïna. Diosar taqpach chuymamp servitapjja, janiw mayninak kawsajj jaytkänti (Job 27:5, 6). ¿Kunsa ukat yateqsna? Mayninakajj jumat burlasipkchisa, janipun ukajj Jehová Diosan leyinakapat jumar payachasiypanti. Diosan leyinakapar istʼatamat kunjamas jakasjjta uk amuytʼam. Kunjamsa yanaptʼawaytam uk walja kutiw uñjpachätajja. Diosan leyinakap arjjatki uka markap toqet taqe chuyma saytʼasim. Ukhamtï lurätajja, jaqenakajj wals jumat burlasipkchinejj janipuniw kunäkipans ukajj Jehová Diosat apaqkätamti (Salmo 119:50-52 liytʼäta).
15. ¿Kunatsa familiaranakapajj Brizit kullakat burlasipjjäna?
15 India markankir Brizit sat kullakan experienciapat parltʼañäni. Testigötapatjja, familiaranakapajj wal jupat burlasipjjäna. Jupajj 1997 maranwa bautisasïna, mä jukʼa tiempotjja, jan Testigökäna uka esposopajj jan trabajoniw uñjasïna, ukatwa esposopajj kullakarusa phuchanakaparus tatap mamapan ukar irpañ amtäna, ukhamatwa jupanakajj tatap mamapamp yaqha markan jakjjapjjäna. Ukampis Brizit kullakan llakinakapajj janiw tukuskänti. Niyakejjay esposopajj jan trabajonïskakchïnjja, kullakaw familiapar mantiniñatakejj sapür trabajiñapäna. Sarañapäkäna uka congregacionajj mä 350 kilometronak jayankänwa. Janiw ukakïkänti, kullakan Testigötap laykojja, esposopan familiaranakapajj jupa contraw saytʼapjjäna. Niyakejjay jukʼamp jan walinakajj utjchïnjja, Brizit kullakajj wasitatwa familiapampejj yaqha cheqar jakir sarjjapjjäna, ukhamaruw mä akatjamat esposopajj jiwjjäna. Phuchanakapat maynïrejj 12 maranïkasaw cáncer usump jiwjjarakïna. Janiw ukakïkänti, jumaw taqe uka jan waltʼäwinakat juchanïtajja sasaw familiapajj Brizit kullakar juchañchäna. Jumatï jan Testigökasmänjja, janiw kunas paskaspänti sasaw jupar sapjjarakïna. Ukampis kullakajj Jehová Diosar confiyaskakïnwa, janirakiw Diosan markapats jitheqtkänti.
16. Jehová Diosampita markapampit jan jitheqtatapatjja, ¿kuna bendicionanaksa Brizit kullakajj katoqäna?
16 Brizit kullakajj congregacionat wali jayanwa jakäna, ukatwa superintendente de circuito jilatajj jakkäna uka zonan predicañapataki, utapan tantachäwinak apañapatak chʼamañchtʼäna. Qalltanjja janjamakiw taqe ukanakamp phoqañ puedkäti sasaw amuyäna. Ukampis kunanaktï circuito jilatajj siskäna ukarjamaw luräna, kullakajj predicañwa qalltäna, utapanwa tantachäwinakajj apasïna, phuchanakapampiw familjam Bibliat yatjjatapjjarakïna. Ukham luratapatjja, Brizit kullakajj waljaniruw Bibliat yatichañ qalltäna, Bibliat yateqerinakapat waljaniw bautisasipjjarakïna. 2005 maranjja, precursora regularat sirvjjarakïna. Jehová Diosar confiyatapatsa, Diosan markapat jan jitheqtatapatsa, bendicionanakwa katoqäna. Phuchanakapajj Jehová Diosat jan jitheqtasaw servisipki, jakapki uka zonansa jichhajj pä congregacionaw utj-jjaraki. Yantʼanak aguantañatakisa familiaranakajan nayat burlasipjjatap aguantañatakis Jehová Diosaw chʼam churitäna sasaw Brizit kullakajj taqe chuym saraki.
JEHOVÁ DIOSATSA MARKAPATSA JAN JITHEQTAÑÄNITI
17. ¿Kun lurañsa amtañasa?
17 Jan walin uñjasktan ukhajj Jehová Diosajj apanukjjestuwa, Diosan markapar yanaptʼasajj jukʼamp jan walinakanwa uñjastanjja sasin amuyañaswa Supayajj muni. Diosan markapan irpapki uka jilatanakar kʼarintapki, arknaqapki jan ukajj carcelar llawintapki ukhajj ajjsarayassna ukwa muni. Jehová Diosan leyinakaparu markaparu jan jukʼamp confiyjjañasatakejja, mayninakan burlasitapampiw aynachtʼayañ munistu. Ukampis jiwasajj Supayan jan wali amtanakap yattanwa, janiw engañjayasktanti (2 Cor. 2:11). Supayan kʼarisitanakaparojj janipun istʼañäniti, Jehová Diosatsa markapatsa janipun jitheqtañäniti. Amtapjjapuniñäni, Jehová Diosajj janipuniw apanukkistaniti (Sal. 28:7). Ukhamajj ¡janipun kunampis Jehová Diosat apaqayasiñäniti! (Rom. 8:35-39).
18. ¿Kunsa jutïr yatichäwin yatjjataskañäni?
18 Aka yatichäwinjja, Diosar jan servirinakajj kuna jan walinakansa uñjasiyistu, kunjamsa ukanakajj Jehová Diosampiru markapampir confiyatas aynachtʼayaspa ukwa yatjjatawaytanjja. Ukampis congregación taypinjja, yaqha jan walinakajj utjarakispawa. ¿Kunjamsa uka jan walinakar saykatsna? Jutïr yatichäwin uka toqet yatjjataskañäni.
CANCIÓN 118 Jumar jukʼamp confiyañ yanaptʼapjjeta
a Aka qhepa urunakanjja, aguantaskakiñatakisa Diosat jan jitheqtañatakisa, Jehová Diosarus markaparus confiyaskakiñasawa. Supayajj janiw ukham confiyañas munkiti. Aka yatichäwinjja, Supayajj kuna jan walinakampis yantʼistu uk kimsa toqet yatjjataskañäni, kunanaksa Jehová Diosatsa markapatsa jan jitheqtañatakejj lursna ukanakwa yatjjataskarakiñäni.
b Yaqhep sutinakajj cambiasiwayiwa.