SARNAQÄWI
“Jehová Diosatakiw trabajiñ munayäta”
GRANBORI sat jiskʼa marka jakʼankir mä qhawqha jaqenakaruw visitapjjayäta, ukajj Surinam markan monte manqhankiwa. Uka mä qhawqha jaqenakat despidtʼasisajja, piragua sat jiskʼa botetwa Tapanahoni jawirnam sarjjapjjayäta. Kunapachatï umajj wali chʼamamp sarki uka cheqnam sarasipkayäta ukhajja, motoran helicepaw mä qalar chocantäna. Ukaratpachaw piragua sat jiskʼa boten puntapajj umar chhaqaranttäna, nanakas uka chikarakiw umar chhaqaranttapjjayäta, chuymas walpun putuqetäna. Superintendente de circuitot walja maranakas nayajj jawirnam viajirïkstjja, janiw nadañ yatkayätti.
Janïr uk cuentañ tukuykasajja, kunas Jehová Diosar sapürunjam serviñatakejj yanaptʼitäna uk cuenttʼapjjäma.
1942 maranwa Caribe toqenkir Curazao sat mä suma islan nasiyäta. Tatajajj Surinam markansa naskchïnjja, Curazao markaruw trabajir sarjjatayna. Nayan nasiñajatakejj mä pä mara faltaskäna ukhaw tatajajj bautizasitayna. Curazao markanjja, nayrïr Testigonakat jupaw mayänjja. a Tatajan wawanakapajj phesqanïpjjayätwa, janis Bibliat yatjjatañatak chʼamachasipkchiyätjja, sapa semanaw tatajajj phesqpachanir Bibliat yatichapjjerïtu. 14 maranïkayäta ukhajja, tatajajj Surinam markaruw mamapar cuidañatak irpapjjetäna, kuna laykutejj awichajajj wali jilïrëjjänwa.
SUMA AMIGONAKAW YANAPTʼAPJJETÄNA
Surinam markanjja, Jehová Diosar taqe chuym servir wayn tawaqonakaw amigonakajäpjjäna. Jupanakajj nayat mä qhawqha maranak jilïrinakakïpjjänwa, precursor regularat servipjjarakïna. Predicacionat parlapjjeri ukhajja, wali kusisitaw cuenttʼapjjeri. Tantachäwinak tukuyarojja, Bibliat jupanakamp parlañajj wali kusiskañänwa, awisajj warawaranak uñchʼukkasaw parlapjjerïta. Uka amigonakaw jakäwijan kunsa luräjja uk amtañatak yanaptʼapjjetäna, nayajj Jehová Diosatakiw trabajiñ munayäta. Ukhamajj 16 maraniw bautisasta, 18 maraniw precursor regularat serviñ qalltarakta.
KUNANAKATÏ YANAPTʼKITASPA UKANAKWA YATEQTA
Paramaribo markan precursorat sirvkayäta ukapacha.
Precursoräkasajja, Jehová Diosar sapürunjam serviñan kunanakatï yanaptʼkitaspa ukanakwa yateqawayta. Nayraqatjja, jilatanakar wakichtʼañajj kunja wakiskirisa ukwa yateqawayta. Precursorat serviñ qalltkayäta ukhajja, Willem van Seijl sat misionero jilataw nayar yanaptʼitäna. b Congregacionan luräwinakajj kunjamas phoqasiñapa ukwa jupat yateqawayta. Uka tiemponjja, wakichtʼkitäna ukajj yanaptʼitaniti janicha uk janiw amuykayätti. Mä mara qhepatjja, precursor especialatwa uttʼayapjjetäna, ukat Surinam markan jaya cheqankir gruponakatwa encargasjjayäta, uka gruponakajj montenkänwa. ¡Jilatanakajj munkayäta ukhapun nayar yatichtʼapjjatapat walpun yuspärta! Ukat aksarojja, uka jilatanakat yateqasisaw mayninakar yatichañatak tiempo apstʼasiyäta.
Payïr toqetjja, kunatï wakiski ukampik jakaña, ukhamarak suma organiztʼat jakañwa yateqawayta. Phajjsi qalltajja, mayni precursor especialampejj kunanakas jutir semananakajj necesitasini ukanakwa amtapjjerïta. Nanakat mayniw markarojj wali jay viajiri, ukhamat kunanaktï necesitapkayäta ukanak alañataki. Diosan markapajj phajjsitak qollqe churapkitäna uk wali sum apnaqapjjañajänwa, alasipkayäta ukajj phajjspachatakiw alcanzañapäna. Mä kunatï monten tukusispäna ukhajja, janiw khiti yanaptʼiris utjkaspänti. Waynitutpachaw kunatï jakañatak wakiski ukampik jakañsa, suma organiztʼatäñsa yateqawayta, ukaw Jehová Diosar serviñ nayrar uchañ yanaptʼawayitu.
Kimsïr toqetjja, jaqenakar pachpa arupat Bibliat yatichañajj kunja wakiskirisa ukwa yateqawayta. Nayajj holandés, inglés, papiamento, surinamés (uka arojj sranan satarakiwa) arunak parlasaw jilsuwayta, surinamés aruw jila partejj Surinam markan parlasi. Ukampis montenjja, akwa amuyayäta: jaqenakar pachpa arupat predicktan ukhaw suma yatiyäwinak wali sum katoqasipjje. Uka arunakat mä qhawqhajj nayatak parlañajj chʼamänwa, ukanakat mayajj saramacano aruwa, uka arojj jachʼata jiskʼata parlasi. Ukampis chʼamachasitajajj janiw inamayäkänti. Jaqenakajj parlapki uka arunak yateqasajja, waljaniruw Jehová Diosar uñtʼapjjañapatak yanaptʼawayta.
Uka arunak parlasajj walja kutiw pantjasirïta, mä phenqʼapunïriwa. Mä kutejja, Bibliat yateqeri mä warmejj purak usumpïskänwa, ukatwa “¿kunjamäsktasa?” sasin jisktʼañat sipans “¿usurïtati?” sasin saramacano arut jisktʼatäta. Ukham jisktʼatajajj janiw jupar gustkänti. Nayajj parlañan ukhamsa pantjaskchiyätjja, jaqenakajj parlapki uka arunak parlañatakejj chʼamachasipunirïtwa.
JUKʼAMP LURAÑANAK KATOQTA
1970 maranjja, superintendente de circuitot uttʼayapjjetu. Uka marajja, monten jaya cheqankir gruponakanwa discursonak arstʼayäta, ukamp chikajja “Visitando la central mundial de los testigos de Jehová” sat diapositivanakwa uñtapjjayäta. Ukham visittʼañatakejja, yaqha jilatanakampejj maderat lurat piragua sat jiskʼa botetwa jawiranak viajipjjerïta. Generador eléctrico, tanque de gasolina, querosenamp nakhir lamparanaka, diapositivanak uñtayañatakejj kunanakatï wakiskäna taqe ukanakampwa apapjjerïta. Kawkjarutï sarapjjañajäkäna ukar purisajja, kawkjantï discurso arstʼañajäkäna ukjakamajj taqe ukanak qʼeptʼataw kayuk sarapjjerïta. Jaqenakajj kunja yuspärasiñampis uka yatichäwinak katoqasipjjäna ukwa uka viajenakat jukʼamp amtta. Jehová Diosar uñtʼapjjañapataki, Diosan
aka oraqenkir markap uñtʼapjjañapatak yanaptʼañajj wal kusisiyitäna. Wal chʼamachasitajatjja, kunjamsa mayninakajj Jehová Diosar jakʼachasipjje uk uñjañaw wal kusisiyitu.KIMSAT KʼANAT CHʼANKHA
Ethel esposajampejj septiembre de 1971 maranwa casarasipjjta.
Solterökasin circuitot serviñajj yanaptʼkchitänsa, nayajj casarasiñwa munayäta. Ukatwa Jehová Diosarojj mä esposa jikjjatañatak mayisirïta, ukhamat nayamp chika monten serviñapataki, kuna lurañtï katoqkayäta uk nayamp chik kusisit phoqañapataki. Mä mara qhepatjja, Ethel sat mä kullakampiw uñtʼasiñ qalltapjjayäta. Jupajj Jehová Diosar serviñatak wal chʼamachasiri precursora especialänwa. Jupajj tawaqetäkäna ukhatpachaw apóstol Pablot yateqasiñ wal munäna, jupjamarakiw predicañatak wal chʼamachasiñ munäna. Septiembre de 1971 maranwa casarasipjjta, panpachanirakiw circuitot servipjjta.
Ethel esposajajj jan taqe kunanïsaw jilsutayna, monten circuitot serviñajj janiw jupatak chʼamäkänti. Monten wali jaya cheqankir congregacionanakar visitir sarapjjerïta ukhajja, janiw walja qʼepinak apapjjerïkti. Jawiranwa isi tʼajjsupjjerïta, jawiranwa bañasipjjarakirïta. Kuntï jilat kullakanakajj churapjjerïkitu ukwa manqʼapjjerïta, awisajj iguananaka, pirañanaka jan ukajj kuntï katupkäna ukwa manqʼapjjerïta. Platonakajj jan utjirïki ukhajja, platanon laphinakapatwa manqʼapjjerïta. Manqʼañatakejj jan cucharas utjirïki ukhajja, amparampikiw manqʼapjjerïta. Ukhamanakan Jehová Diosar serviñan chʼamachasiñajja, jan tʼaqasiri kimsat kʼanat chʼankhar uñtasitäñasatakiw yanaptʼistu sasaw esposajamp amuyapjjta (Ecl. 4:12). ¡Ukham suma experiencianakajj janiw yaqhajj nanakatak utjkaspati!
Qalltan cuentapksma ukajja, jaya cheqankir mä viajit kuttʼanisipkayäta ukhaw pasäna. Kunapachatï piragua sat jiskʼa botejj wal jalaskir umanakar mantäna ukhajja, chhaqaranttänwa, ukampis ratukiw tuysunjjäna. Nanakajj salvavidas
sat chaleconak uchatäpjjayätwa, janirakiw uka jiskʼa botet jalaqtapkayätti. Ukampis boterojj umaw phoqaranttäna, ukatwa manqʼanak jawirar wartasajj uka platonakamp botet uma apsupjjayäta.Niyakejjay manqʼañanakajj jan utj-jjapkchitänjja, jawira sarkasajj pachpa jawiran mä kun katuñatakiw chʼamachasipjjayäta. Ukampis janiw kuns katupkayätti. Ukatwa uka urutak manqʼa churapjjeta sasin Jehová Diosar orasipjjayäta. Orasiñ tukuyapkayäta ukhaw mä jilatajj mä chawlla katüna. Uka chawllsti arumajj phesqpachaniw manqtʼasipjjayäta, sistʼasipjjarakiyätwa.
ESPOSO, AWKI, CIRCUITO UKHAMÄTWA
Phesqa mara circuitot servisipkayäta ukhaw Ethel esposajampejj mä bendición katoqapjjta: esposajajj usurëjjänwa. Uk yatisajj wal kusisiyäta, ukampis jakäwinakajan kunanakas cambiani uk janiw yatkayätti. Ethel esposajampejja, Jehová Diosarojj sapürunjam serviñ munasipkakiyätwa. 1976 maranwa Ethniël sat nayrïr yoqajajj nasïna, pä mara chikatatsti, Giovanni sat yoqajaw nasirakïna.
1983 marana, Tapanahoni jawiran mä bautismo, ukajj Godo Holo jakʼankiwa, Surinam markat inti jalsu toqena.
Uka tiemponjja, Surinam markan yanaptʼajj wal munasïna, ukatwa sucursalajj circuitot serviskakiñajatak mayitäna. Wawanakajj jiskʼäsipkäna ukhajja, minus congregacionanakan circuitonakaruw visitayäta. Ukatwa phajjsin pä semanajj circuitot serviyäta, pä semanasti congregacionajanwa precursorat servirakiyäta. Utaj jakʼankir congregacionanakar visitkayäta ukhajja, Ethel esposajasa wawanakasa nayamp chikaw sarapjjeri. Ukampis monten asambleanakajj apaskäna jan ukajj montenkir congregacionanakar visitañajäkäna ukhajja, sapakiw sarirïta.
Superintendente de circuitökayäta ukhajja, jaya cheqankir congregacionanakar visitañatakejj piragua sat jiskʼa botetwa viajirïta.
Kunanaktï lurañajäkäna taqe ukanakamp phoqañatakejja, sum organiztʼasiñajänwa. Sapa semanapuniw familpachajj Bibliat yatjjatapjjerïta. Monten congregacionanakar visitirïta ukhajja, Ethel esposajaw wawanakampejj Bibliat yatjjatapjjerïna. Kunsa familpach lurañatakiw chʼamachasipjjerïta, wawanakajamp kusistʼañatakejj tiemps apstʼasipjjerïtwa, jupanakampejj anattʼapjjerïtwa jan ukajj uta jakʼan utjkäna uka suma lugaranakaruw pasiytʼir sarapjjerïta. Niya jilapartejja, Diosan markapan kuna lurañanakatï ujkitäna uk phoqañatakejj arumkamaw wakichtʼasirïta. Ethel esposajajj Proverbios 31:15 texton parlki uka suma warmir uñtasitawa. Wawanakajajj escuelar janïr sarapkipan ukürutak ajllit texto familpach liytʼañatakisa, juntʼüm umtʼasiñatakis wali alwatwa esposajajj sartasiri. Ukham chʼamachasiri esposanïtajatjja, walpun yuspärta, kuna lurañanaktï Jehová Diosajj churkitu uk phoqañajatakejja, ¡walpun yanaptʼawayitu!
Ethel esposajampejja, wawanakajajj Jehová Diosar munasipjjañapatakisa predikir sarañ wal munapjjañapatakisa, wal chʼamachasiwayapjjta. Jupanakajj Jehová Diosar sapürunjam servipjjaspa ukwa munapjjayäta. Ukampis janiw nanakan satakejj ukham lurapjjañap munapkayätti, jan ukasti jupanak pachpa amtapjjaspa ukwa munapjjayäta. Sapürunjam Jehová Diosar serviñajj kunja kusiskañasa uka toqet jupanakarojj parlapjjapunirïtwa. Kuna jan walinakansa nanakajj uñjasipjjerïta uk wawanakar cuentapjjerïtwa, ukampis kunjamsa Jehová Diosajj yanaptʼawayapjjetu, familiarus bendisiwayi ukwa qhanstayapjjerïta. Jehová Diosar serviñ nayrar uchapki uka jilat kullakanakamp amigöpjjañapatakiw wawanakarojj chʼamañchapjjerïta.
Jehová Diosan yanaptʼapampejj kunatï wakiskäna ukajj janipuniw faltapkitänti. Familiajar yanaptʼañatakejj kuna lurañatï waktʼkitäna uk lurapunirïtwa. Monten solterökasin precursor especialat sirvkayäta ukajja, janïräkipan kuns amuytʼañataki, qollq sum apnaqañatakiw yanaptʼitäna. Ukampis awisajj wals chʼamachasipjjerïkstjja, kunanaktï necesitapkayäta ukanakat janiw taqe kunpun alasiñ puedipjjerïkti. Ukhamanakan uñjasipjjerïta ukhajja, Jehová Diosajj yanaptʼapjjapunirïtuwa. 1986 marat 1992 marakamajja, Surinam markan guerra civilaw utjäna. Awisajja, kunanakatï jakañatak wakiski ukanak jikjjatañajj wali chʼamänwa. Ukampis Jehová Diosajj cuidapjjapunirïtuwa (Mat. 6:32).
NAYRA MARANAKAN DIOSAR SERVITAJAT JANIW ARMASKTI
Chʼeqat kupiru: Ethel esposajampi nayampi.
Ethniël sat jilïr yoqajampi Natalie sat esposapampi.
Giovanni sat yoqajampi, Christal sat esposapampi.
Jehová Diosajj kusisita sum jakasiñwa churapjjetu, janipuniw jaytjapkituti. Wawanakajajj nanakatak mä jachʼa bendicionawa, Jehová Diosar munasiñ jupanakar yatichapjjatajatsa, wal yuspärapjjarakta. Jupanakajj Jehová Diosar sapürunjam servisipkatap uñjasajj wal kusisipjjta. Ethniël ukhamarak Giovanni yoqanakajajj Jehová Diosan markapan utjki uka escuelanakat graduatäpjjewa, jichhajj esposanakapampiw Surinam markankir sucursalan servisipki.
Ethel esposajampi nayampejj jilïrëjjapjjtwa, ukampis precursor especialatwa Jehová Diosarojj servisipkakta. Cheqas wali ocupatäsipkaktwa, nadañ yateqañajatakis janiw tiempojj utjkituti. Ukampis janiw kunats arrepentiskti. Nayra maranakat amtasisajja, waynäkasajj mä suma amtaruw puriwayta siristwa, ukajj Jehová Diosar sapürunjam serviñawa.
b Willem van Seijl jilatan experienciapajja, ¡Despertad! del 8 de octubre de 1999 revistanwa mistüna, pʼeqeñchäwipajj “La realidad ha superado mis expectativas” satawa.