46 YATICHÄWI
Jehová Diosaw kusisit aguantañatak yanaptʼistu
“Jehová Diosajj jumanakar sum uñjañatakejj pacienciampiw suytʼaski, jumanakat khuyaptʼayasiñatakiw jupajj sartasirakini” (IS. 30:18).
CANCIÓN 3 Jehová, jumaruw confiyasipjjsma
¿KUNANAKATSA YATJJATASKAÑÄNI? a
1, 2. 1) ¿Kunanakatsa aka yatichäwin yatjjatañäni? 2) ¿Jehová Diosajj jiwasar yanaptʼañ munatap kunas uñachtʼayi?
JEHOVÁ DIOSAW problemanak aguantañatakisa jupar kusisit serviñatakis yanaptʼistaspa. Aka yatichäwinjja, kunjamsa Diosajj yanaptʼistu, yanaptʼap katoqañatakejj kunsa lurañasa ukwa yatjjataskañäni. Ukampis nayraqat aka jisktʼaruw qhanañchañäni: ¿Cheqapunit Jehová Diosajj yanaptʼañ munpachïstu?
2 Uka jisktʼar qhanañchañatakejja, apóstol Pablojj hebreonakar qellqkäna uka cartapan mä aru aytäna, uka toqet yatjjatañäni. Jupajj akham sasaw qellqäna: “Jehová Diosaw yanapirijajja, janiw ajjsarkäti. ¿Jaqejj kamacharakitaspasti?” sasa (Heb. 13:6). Biblia toqet parlir yaqhep diccionarionakajja, uka versiculon ‘yanapiri’ sasin traducitäki uka arojj yanap munki ukar yanaptʼañatak tʼijukam sarki uka jaqet parlaski sasaw qhanañchapjje. Maynejj llakin uñjaski ukar salvañatakejj Jehová Diosajj tʼijukamas sarkaspa ukham amuytʼañäni. Ukajja akwa uñachtʼayistu: Jehová Diosajj janiw yanaptʼañak munkistuti jan ukasti taqe chuymaw yanaptʼañ munistu. Jehová Diosan yanaptʼapampejja, yantʼanak kusisitaw aguantañäni.
3. ¿Kusisit aguantañatakejj kuna kimsa yanaptʼanaksa Jehová Diosajj churistu?
3 ¿Kunjamanakatsa Jehová Diosajj kusisit aguantañatak yanaptʼistu? Uka jisktʼar qhanañchañatakejj Isaías librow yanaptʼistu. ¿Kunatsa? Kuna laykutejj Isaías profetajj Diosan amuytʼayatäsin qellqkäna uka profecianakat jilapartejja, jichha tiempon jakiri Diosan servirinakapatakiw qellqasïna. Ukhamarusa, Isaiasajj walja kutiw Jehová Diosat fácil amuykañ arunakamp parli. Isaías capítulo 30 ukanjja, Jehová Diosajj kunjamsa markapar yanaptʼi uka toqet parlañatakejj wali suma uñachtʼäwinakampiw parli. Ukanjja aka kimsa toqenakatwa parli: 1) Jehová Diosajj wali atencionampiw oracionanakas istʼistu, jaysarakistuwa, 2) Jehová Diosajj irpistuwa, 3) Jehová Diosajj jichha tiempon bendisistuwa, jutïrins bendisirakistaniwa. Uka kimsa toqenakat mayat may yatjjatañäni.
JEHOVÁ DIOSAJJ ISTʼISTUWA
4. 1) ¿Isaiasan tiempopan jakir judionakat Jehová Diosajj kamsänsa, ukat kunas judionakar pasäna? 2) ¿Kuna suytʼäwsa Jehová Diosajj jupat jan jitheqtir judionakar churäna? (Isaías 30:18, 19).
4 Isaías capítulo 30 qalltanjja, Jehová Diosajj ‘jan istʼasir wawanaka’ sasaw judionakar säna, ukatjja ‘jucharojj jukʼamp juchwa yapjjatapjje’ sarakïnwa. Ukjjarojj saskakïnwa: “Jupanakajj kutkatasir markäpjjewa, [...] Jehová Diosan leyip jan istʼañ [munirïpjjewa]” sasa (Is. 30:1, 9). Jan istʼasirïpjjatapatjja, judionakjjarojj mä jan waltʼäwiw jutani, Jehová Diosajj janiw ukat jarkʼaqkaniti sasaw Isaiasajj mä profecía arsüna (Is. 30:5, 17; Jer. 25:8-11). Ukajj ukhamapuniw pasäna, judionakajj Babilonia markar apatäpjjänwa. Ukampis jupanak taypinjja, Diosat jan jitheqtir yaqhep judionakaw utjarakïna. Isaías profetajj mä suma suytʼäwit jupanakar yatiyäna. Uka yatiyäwirjamajja, mä urojj wasitatwa Jehová Diosajj Jerusalenan jakapjjañapatak jupanakar kuttʼayjjañapäna (Isaías 30:18, 19 liytʼäta). Uka arunakajj phoqasïnwa. Jehová Diosajj judionakar Babiloniat apsunjjänwa, ukampis ukatakejj walja maranakaw pasañapäna. “Jehová Diosajj jumanakar sum uñjañatakejj pacienciampiw suytʼaski” siski uka arunakarjamajja, Diosat jan jitheqtir judionakajj Babiloniat sarjjapjjañapatakejj tiempow pasañapäna. Cheqas Jehová Diosajj mä qhawqha judionakar Jerusalenar kuttʼayankäna ukhakamajja, 70 maranakaw pasäna (Is. 10:21; Jer. 29:10). Judionakajj yaqha markar apatäpkäna ukhajja, llakisiñatwa jachapjjäna, ukampis oraqepar kuttʼjjapjjäna ukhajja, kusisiñatwa jachaqtʼasipjjäna.
5. ¿Kunjamsa Isaías 30:19 textonkki uka arunakajj chʼamañchtʼistu?
5 “Yanaptʼa mayiñatak arnaqasïta ukhajja, jupajj cheqpachapuniw jumat khuyaptʼayasini” siski uka arunakajj jichhürunakan wal chʼamañchtʼarakistu (Is. 30:19). Jehová Diosajj wali atencionampiw oracionanakas istʼistu, ukat jankʼakiw jaysarakistu sasaw Isaiasajj säna. Ukat akham sarakïnwa: “Jumar istʼasinjja ukspachaw jaysarakïtam” sasa. Uka chʼamañchtʼkir arunakajja, alajjpachankir Awkisajj yanap munapki ukanakarojj janiw yanaptʼañatakikejj sarkiti, jan ukasti taqe chuymaw yanaptʼañ muni. Uk yatiñajja, kusisit aguantañatakiw yanaptʼistu.
6. ¿Kunjamsa Isaías libronkir arunakajj Jehová Diosajj sapa mayni servirinakapan oracionanakap istʼatap uñachtʼayistu?
6 Uka versiculojja, Jehová Diosajj sapa mayni jiwasanakan oracionanakas wali atencionamp istʼatapwa uñachtʼayistu. ¿Kunatsa ukham sistanjja? Isaías capítulo 30 qalltanjja, Jehová Diosajj waljanit parlañatakejj ‘jumanaka’ sänwa, kuna laykutejj taqpach markaparuw parlaskäna. Ukampis versículo 19 ukanjja, maynit parlañatakejj ‘juma’ sasaw säna, kuna laykutejj sapa mayni servirinakaparuw parlaskäna. Isaiasajj akham sänwa: “janiw mayampis jumajj jachjjätati”, “jupajj cheqpachapuniw jumat khuyaptʼayasini”, ‘jumar jaysarakïtamwa’ sasa. Jehová Diosajj munasir Awkiwa, wawanakapat maynejj aynachtʼatäki ukhajja, jupajj janiw akham siskiti: “Kullakamjam jan ukajj jilamjam jan aynachtʼirïñamawa” sasa. Jan ukasti sapa mayni jiwasanakatwa llakisi, jupa pachpaw oracionanakasarojj istʼi, jaysaraki (Sal. 116:1; Is. 57:15).
¿Jehová Diosar “orasipkakim” sasajj kamsañsa Isaiasajj munäna? (Párrafo 7).
7. Sapa kuti wal orasiñajj wali wakiskirïtap ¿kunjamsa Isaiasan arunakapasa Jesusan arunakapas uñachtʼayistu?
7 Kunatï llakisiykistu uk Jehová Diosar oracionan yatiyktan ukhajja, uka jan waltʼäwi aguantañatakejj chʼamwa nayraqat churistaspa. Uka yantʼatejj munktan ukarjam jan jankʼak chhaqtkani ukhajja, inas aguantañatakejj walja kuti chʼam mayisiñasajj wakischini. Jehová Diosas uk lurañasatakiw chʼamañchtʼarakistu. Ukwa Isaiasan arunakapajj uñachtʼayistu, jupajj Jehová Diosar “orasipkakim” sasaw säna (Is. 62:7). Ukhamajj jan qarjtas Jehová Diosar orasiskakiñasawa. Ukajja, kuntï Jesusajj oración toqet Lucas 11:8-10, 13 texton siskäna ukwa amtayistu. Ukanjja walja uñachtʼäwinakampiw ‘jan ajjsartʼas wal mayisiskakiñataki’, espíritu santo mayiskakiñatak chʼamañchtʼistu. Suma amtanakar puriñatakis Jehová Diosaruw mayisiraksna.
JEHOVÁ DIOSAW IRPISTU
8. ¿Kunjamsa Isaías 30:20, 21 textonkir arunakajj phoqasïna?
8 (Isaías 30:20, 21 liytʼäta). Babilonia markan ejercitopajja, mä mara chikataniw Jerusalén marka muyuntäna. Uka tiemponjja, judionakajj wal tʼaqesipjjäna, sapürus llakitakiw sarnaqapjjäna. Ukampis kunjamtï 20, 21 versiculonakajj siskejja, Jehová Diosajj judionakar salvañwa arsuwayäna, ukampis ukatakejj jupanakajj arrepentisipjjañapänwa, jan wali luräwinakaps jaytanukupjjañapänwa. Jehová Diosajja, markapatakejj ‘Jachʼa Yatichiriwa’ sasaw Isaiasajj säna. Jehová Diosaw kunjamtï jupajj munki ukham adorapjjañamatakejj yanaptʼapjjätam sasaw sarakïna. Kunapachatï judionakajj Babiloniat sarjjapjjäna ukhaw uka arunakajj phoqasïna. Jehová Diosajj jupanakan Jachʼa Yatichiripätapwa uñachtʼayäna. Diosamp irpayasipjjatapatjja, judionakajj Jehová Dios saparukiw wasitat adorjjapjjäna. Jichhürunakanjja, Jehová Diosajj jiwasan Jachʼa Yatichirisarakiwa, ukajj wal kusisiyistu.
9. ¿Kunjamsa Jehová Diosajj jichhürunakan irpistu?
9 Jehová Diosamp yatichatäñajj mä jachʼa bendicionawa. Uka versiculonakanjja, Jehová Diosajj yateqerinakarjamas pä toqet yatichkistaspa ukhamwa Isaiasajj parli. Mä toqetjja, Isaiasajj akham siwa: “Pachpa nayranakamampiw jumajj Jachʼa Yatichirimar uñjäta” sasa. Uka uñachtʼäwirjamajja, yatichirejj yateqerinakap nayraqatan saytʼatäskiwa. ¿Kunjamsa Jehová Diosajj jichhürunakan yatichistu? Markap toqew yatichistu. Jehová Diosan markapajja, tantachäwinak toqe, asambleanak toqe, Bibliat apstʼat qellqatanak toqe, JW Broadcasting® toqe, yaqha ukhamanak toqew wali qhan yatichistu, wal ukat yuspärtanjja. Taqe ukanakaw jan waltʼäwinakan kusisit aguantañatak yanaptʼistu.
10. ¿Kunjamsa Diosan arup qhepäjjasat istʼtanjja?
10 Jehová Diosajj kunjamsa payïr toqet yatichistu ukjja, Isaiasajj akham sasaw qhanañchäna: “Juma qhepäjjamatjja aka arunakwa istʼäta” sasa. Uka arunakampejja, Jehová Diosajj yateqerinakapan qhepap sarir mä yatichirïkaspas ukhamwa uñachtʼayi, yateqerinakapajj kawkjarus taktʼasipki ukwa Diosajj uñji, kawki cheqnamas sarapjjañapa uksa uñachtʼayarakiwa. ¿Kunjamsa jichhürunakan Jehová Diosan arup qhepäjjasat istʼtanjja? Biblia liyisaw istʼtanjja. Cheqas Diosan amuytʼayat arunakapajj walja maranak nayraw ukan qellqasïna. Ukhamajj Biblia liytʼktan ukhajja, nayra tiempotpachas Jehová Diosajj qhepäjjasat parlkistaspa ukhamawa (Is. 51:4).
11. ¿Kusisit aguantañatakejj kunsa lurañasa, ukat kunatsa?
11 ¿Jehová Diosajj markap toqe Arup toqe irpkistu ukamp yanaptʼayasiñatakejj kunsa lurañasa? Isaiasajj aka pä toqetwa parläna. Nayraqatjja, “aka cheqaw thakejja” sasaw säna, ukjjarusti “uka thaknam saraskakim” sarakïnwa (Is. 30:21). Ukhamajja janiw ‘thakik’ uñtʼañasäkiti, jan ukasti uka ‘thakinwa sarnaqañasaraki’. Jehová Diosajj kun lurañassa muni, kunjamsa yateqatarjam sarnaqsna ukanakjja, jupajj Arup toqe ukhamarak kunanaktï markapajj qhanañchkistu uka toqew yatichistu. Uka pä yanaptʼanakarjam lurañaw Jehová Diosar serviñan kusisit aguantaskakiñatak yanaptʼistani. Ukham lurañani ukhakiw Jehová Diosajj bendisistani.
JEHOVÁ DIOSAJJ BENDISISTUWA
12. Isaías 30:23-26 textorjamajja, ¿kunjamsa Jehová Diosajj markapar bendisiñapäna?
12 (Isaías 30:23-26 liytʼäta). ¿Kunjamsa uka profeciajj nayra tiempon phoqasïna? Babiloniat Israel markar kuttʼanipkäna uka judionakajja, walja bendicionanak katoqapjjäna, Diosajj kunanakatï jakañatakisa jupar serviñatakis munaskäna ukanakwa jupanakar churäna. Jehová Diosajj judionakarojj walja manqʼañanakwa churäna. Judionakajj Jehová Diosaruk wasitat adorjjapjjäna ukhajja, Diosajj kunatï jupar jakʼachasiñatak munaskäna ukwa jukʼamp churäna, ukaw jukʼamp importantënjja. Uka tiempon jakir Diosan markapajja, janipuniw nayrajj Diosar serviñan walja bendicionanak katoqapkänti. Kunjamtï versículo 26 texton siskejja, Jehová Diosajj qhanapampiw jupanakjjar jukʼamp qhantʼayanïna, mä arunjja Arup amuytʼapjjañapatakiw yanaptʼäna (Is. 60:2). Uka bendicionanak katoqasajja, markapankirinakajj kusisitäpjjänwa, jupar serviskakiñatakis chʼamanïpjjarakïnwa. ‘Chuymanakapansa wali sumaw jikjjatasipjjäna’ (Is. 65:14).
13. Jehová Dios saparukiw wasitat adorasjjani siski uka profeciajj ¿kunjamsa jichhürunakan phoqasi?
13 ¿Jehová Dios saparukiw wasitat adorasjjani siski uka profeciajj jichhürunakan phoqasiti? ¡Jïsa, phoqasiwa! 1919 marat aksarojja, millón millón jaqenakaw Jachʼa Babiloniat mistunjjapjje, mä arunjja oraqpachankir falso religionanakat mistunjjapjje. Taqe jupanakajj Suma Oraqet sipans jukʼamp suma lugarar apatäjjapjjewa: jupanakajj mä paraisonjamwa jakasipjje (Is. 51:3; 66:8). ¿Kunas mä paraisonjam jakasiñajja?
14. ¿Kunas mä paraisonjam jakasiñajja, khitinakas jichhürunakan ukan jakasipjje? (Amtañataki siski uka qhanañchäwi liytʼam).
14 1919 marat aksarojja, ajllitanakajj wali kusisitaw mä paraisonjam jakasjjapjje. b Tiempompejja, aka oraqen jakañatak suyasipki uka cristianonakajja, mä arun ‘yaqha ovejanakajja’ ajllitanakamp chikaw mä paraisonjam jakasjjapjje, Jehová Diosatsa walja bendicionanakwa katoqapjje (Juan 10:16; Is. 25:6; 65:13).
15. ¿Kawkjansa mä paraisonjam jakasktanjja?
15 ¿Kawkjansa jichhürunakan mä paraisonjam jakasktanjja? Niyakejjay Diosan servirinakapajj oraqpachan jakstanjja, oraqpachanwa mä paraisonjam jakastanjja. Ukhamajj kawkjansay jakaskstanjja, mä paraisonjamwa jakassna, ukampis ukatakejj taqe chuymaw Diosar cheqaparjam adoraski ukar yanaptʼañasa.
Mä paraisonjam jakasktan ukajj jukʼamp sumäñapatakejj ¿kunsa sapa maynis lursna? (Párrafos 16, 17).
16. ¿Mä paraisonjam jakasktan ukajj kunja sumasa uk uñjaskakiñatakejj kunsa lurañasa?
16 Mä paraisonjam jakasiñ munstan ukhajja, oraqpachankir jilat kullakanakasarojj wali valoranit uñjaskakiñasawa. ¿Kunjamsa uk lursna? Jilat kullakanakan pantjasitanakap uñchʼukiñat sipansa suma luratanakapwa uñjañasa (Juan 17:20, 21). ¿Kunatsa uk lurañajj wali wakiskirejja? Aka toqet amuytʼañäni. Mä suma bosquenjja, walja kasta qoqanakaw utji. Ukhamarakiw mä paraisonjam jakasktan uka congregacionanakan kunayman jilat kullakanakajj utji (Is. 44:4; 61:3). Ukhamajj jakʼasankki uka “qoqanakan” jan walinakap uñjañat sipansa, “bosquejj” kunja sumasa uk uñjapjjañäni. Mä arunjja, pantjasitanakasa jan ukajj jilat kullakanakan pantjasitanakap uñchʼukiñat sipansa, oraqpachankir jilat kullakanakajj kunja suma mayachtʼatäpjjesa uk uñjapjjañäni.
17. ¿Congregacionan mayachtʼatäñ utjaskakiñapatakejj kunsa sapa maynejj lursna?
17 ¿Mayachtʼatäskakiñatakejj kunsa sapa maynejj lursna? Ukatakejj sumankaña utjañapatakiw chʼamachasiñasa (Mat. 5:9; Rom. 12:18). Congregacionankir jilat kullakanakamp sum apasiñatak sapa kut chʼamachasktan ukhajja, mä paraisonjam Diosar adorktan ukajj jukʼamp sumawa. Taqe khitinakatï mä paraisonjam Diosar adorapki ukanakarojja, Jehová Diosaw jupa saparuk adorapjjañapatak irpani, uk yattanwa (Juan 6:44). Wali valorani servirinakapajj kunjamsa sumankañatakisa mayachtʼatäñatakis chʼamachasipjje uk uñjasajja Diosajj wal kusispacha (Is. 26:3; Ageo 2:7).
18. ¿Kuna toqetsa sapa kut lupʼiñasa, ukat kunatsa?
18 Jehová Diosajj servirinakaparojj walja bendicionanakwa churi, ¿ukanakat beneficiasiñatakejj kunsa lursna? Kunanaktï Bibliatsa Bibliat apstʼat qellqatanakats yateqktan ukanakat sumwa amuytʼañasa. Jiwasatï yatjjatañäni, uka toqet lupʼirakiñäni ukhajja, cristianjam suma chuymanïñatakiw yanaptʼistani, ukhamatwa congregacionan ‘jilapurjam taqe chuym munasipjjañäni’ (Rom. 12:10). Kuna bendicionanaktï jichha tiempon katoqktan ukanakat lupʼiñajja, Jehová Diosamp jukʼamp sum apasiñatakiw yanaptʼistu. Jehová Diosajj jutïrin churkistani uka bendicionanakat lupʼiñajja, wiñayatak Diosar serviñ munañajj chuymasan utjaskakiñapatakiw yanaptʼistani. Taqe ukanakajj Jehová Diosar jukʼamp kusisit serviñatakiw yanaptʼarakistani.
AGUANTASKAKIÑ AMTAÑÄNI
19. 1) Isaías 30:18 textorjamajj ¿kuna toqetsa jan payachasktanjja? 2) ¿Kunas kusisit aguantañatakejj yanaptʼistani?
19 Aka jan wali pachar tukjkani ukhajja, Jehová Diosajj jiwas favoraw “sartasirakini” (Is. 30:18). Niyakejjay Diosajj ‘cheqapar uñjir Diosächejja’, janiw ni mä urumpis Supayan apnaqat akapach utjaskakiñap permitkaniti, janiw uka toqet payachasktanti (Is. 25:9). Salvaskañäni uka urun puriniñapjja, Jehová Diosas jiwasas wali pacienciampiw suyasktanjja. Ukañkamasti, Jehová Diosar orasiñsa, Arupat yatjjatañsa, ukarjam sarnaqañsa, bendicionanak katoqktan ukat lupʼiñsa, wali valoranitwa uñjtanjja. Jiwasatï taqe ukanak luraskakiñäni ukhajja, Jehová Diosajj jupar serviñan kusisit aguantañatakiw yanaptʼistani.
CANCIÓN 142 Kuntï jutïrin katoqkañäni uk suytʼasipkakiñäni
a Aka yatichäwinjja, problemanak kusisit aguantapjjañapatakejj kuna kimsa yanaptʼanaksa Jehová Diosajj servirinakapar churi uka toqetwa parltʼaskañäni. Ukatakejj Isaías capítulo 30 yatjjatañäni. Uk yatjjatañajja, kunja wakiskiris Jehová Diosar orasiñasa, Arupat yatjjatañasa, kuna bendicionanaktï jichha tiempon churkistu jutïrin churkarakistani ukanakat lupʼiñasa ukwa amtayistani.
b AMTAÑATAKI: Mä paraisonjam jakasiñajja, Jehová Diosar mayachtʼat adorktan ukawa. Ukanjja, Diosan walja yatichäwinakapwa katoqtanjja, janirakiw uka yatichäwinakajj falso religionanakan kʼari yatichäwinakapamp qʼañuchatäkiti. Diosan Reinopat suma yatiyäwinak wali kusisitaw prediktanjja. Taqeniw Diosamp sum apastanjja, jilat kullakanakasampis sum apasiraktanjja, jupanakajj munasipjjestuwa, jan waltʼäwinak kusisit aguantañasatakiw yanaptʼapjjestu. Jehová Diosajj kunjam adoratäñtï munki ukham adorktan, jupat yateqasiñatakis chʼamachastan ukhaw mä paraisonjam jakasiñ qallttanjja.