1. ¿Kunsa jiwasajj yattanjja, ukat kuna toqetsa jan payachasktanjja?

 YAQHEP jaqenakajj janiw predicañas munapkiti, jutïrin inas predicañ jukʼamp jarkʼapjjchistani, ukanak pasañap jiwasajj yatjjtanwa (Dan. 11:44; 2 Tim. 3:12; Apoc. 16:21). Ukampis Jehová Diosaw yanaptʼistani sasajj janiw payachasktanti. ¿Kunatsa ukham sistanjja? Jehová Diosajj kuna lurañtï servirinakapar churkäna ukajj jupanakatak chʼamäkchïnsa, Diosajj uk phoqapjjañapatak yanaptʼapunirïnwa. Ukatakejj kunanakas Ezequiel profetan jakäwipan pasäna uk yatjjatañäni. Jupajj Babiloniar apat judionakaruw predicäna.

2. 1) ¿Ezequielajj predicañapäkäna uka judionakajj kunjam jaqenakäpjjewa sänsa Jehová Diosajja? (Ezequiel 2:3-6). 2) ¿Kuna toqenakatsa aka yatichäwin yatjjataskañäni?

² ¿Kunjam jaqenakarus Ezequielajj predicañapäna? Uka judionakajj naya ‘contra saytʼiri’, “kutkatasiri qala chuymani” ukhamäpjjewa sasaw Jehová Diosajj säna. Jupanakajj chʼapinakjam jan walinakäpjjänwa, escorpionanakjam jan waltʼayirïpjjarakïnwa. Ukatwa Jehová Diosajj Ezequielar walja kuti akham säna: “Jan jupanakar ajjsaramti” sasa (Ezequiel 2:3-6 liytʼäta). ¿Kunas Ezequielarojj predicacionamp phoqañatak yanaptʼäna? 1) Jehová Diosaw khitäna, 2) espíritu santow chʼam churäna, 3) Diosan arunakapampiw chʼamañchtʼasïna. ¿Kunjamsa ukanakajj Ezequielar yanaptʼäna, kunjamsa jichhürunakan yanaptʼarakistaspa?

3. ¿Kuna arunakas Ezequielar chʼamañchtʼpachäna, ukat kunjamsa Jehová Diosajj jupar yanaptʼatap uñachtʼayäna?

³ ‘Nayaw khitasksma’ sasaw Jehová Diosajj Ezequielar säna  (Ezeq. 2:3, 4). Uka arunakajj Ezequielar wal chʼamañchtʼpachäna. Jehová Diosajj uka pachpa arunakampiw Moisesarus Isaiasarus profetjam ajllkäna ukhajj chʼamañchtʼarakïna, ukwa jupajj amtarakpachäna (Éx. 3:10; Is. 6:8). Uka profetanakarojj chʼama luräwinakamp phoqañatakejj Jehová Diosaw yanaptʼäna, uk Ezequielajj yatirakïnwa. Ukhamajj ‘nayaw khitasksma’ sasin pä kuti siskäna ukajj Diosaw yanaptʼitani sasin confiyañapatakiw yanaptʼäna. Ezequiel libronjja, “Jehová Diosaw nayar parlitäna” siski uka arunakajj walja kutiw uñsti (Ezeq. 14:2). “Mä kutimpiw Jehová Diosajj parlitäna” siski uka arunakajj kutin kutiniw uñstaraki (Ezeq. 6:1). Ukhamajj Jehová Diosajj jupar khitkäna ukat janiw Ezequielajj payachaskänti. Niyakejjay tatapajj sacerdotëchïnjja, kunjamsa Jehová Diosajj nayaw yanaptʼäma sasin profetanakapar siskäna ukwa Ezequielar yatichpachäna. Cheqansa Isaac, Jacob, Jeremías chachanakarojj “nayaw jumampïskta” sasaw Jehová Diosajj säna (Gén. 26:24; 28:15; Jer. 1:8).

4. ¿Kawkïr arunakas Ezequielar chʼamañchtʼäna?

⁴ ¿Ezequielan predicataparojj israelitanakat jilapartejj istʼapjjpachänti? Jehová Diosajj Ezequielar akham sänwa: “Israelitanakajj janiw jumar istʼañ munapkätamti, nayar jan istʼañ munapjjatap layku” sasa (Ezeq. 3:7). Ezequiel profetar jan istʼañ munasajj Jehová Diosaruw jan istʼapkänti. Uka arunakajj jan llakisiñapatakiw Ezequielar yanaptʼpachäna, kuna laykutejj jupar jan istʼañ munapjjatapajj janiw jan wali profetäkaspas ukham sañ munkänti. Ukhamarus Jehová Diosajja, kunapachatï juchañchäwi arunakajj phoqaskani ukhajj “[jiwas] taypin mä profetaw utjäna” sasinwa uka judionakajj amuyapjjani sasaw Ezequielar säna (Ezeq. 2:5; 33:33). Uka chʼamañchtʼkiri arunakaw Ezequielarojj predicacionamp phoqañapatakejj wal chʼamañchtʼpachäna.

5. ¿Kunatsa Isaías 44:8 textojj chʼamañchtʼistu?

⁵ Jehová Diosajj predicañatak jiwasar khitatap yatiñajj chʼamañchtʼarakistuwa. Jehová Diosan Testigopjam uñtʼatäñajj jupan churat mä jachʼa bendicionawa (Is. 43:10). Jehová Diosajj “jan ajjsaramti” sasaw Ezequielar säna, jiwasarojj “jan ajjsarapjjamti” sasaw sarakistu. ¿Kunatsa jiwas contra saytʼapki ukanakarojj jan ajjsarañasäki? Ezequiel profetarjamarakiw Jehová Diosajj khitistu, yanaptʼarakistu (Isaías 44:8 liytʼäta).

6. 1) ¿Kunjamsa Jehová Diosajj jiwasar yanaptʼatap yatiyistu? 2) ¿Kunas jiwasar chuymachtʼistu, chʼamañchtʼarakistu?

⁶ Jehová Diosajj yanaptʼämawa sasaw yatiyistu. Amuytʼañataki, “jumanakaw nayan testigonakajäpjjtajja” sasin janïr siskasajja, akham sasaw säna: “Kunapachatï jumajj umanak paskatkäta ukhajja, nayajj jumampïskäwa, jawiranak paskatkäta ukhajja, janiw uka jawiranakajj chhaqtaykätamti. Kunapachatï nina taypi paskäta ukhajja, janiw uka ninajj nakhantkätamti, janirakiw aqaskir ninas nakharkätamti” sasa (Is. 43:2). Predicktan ukhajja, awisajj jawiranakar uñtat jan walinakanwa uñjastanjja, ninar uñtat yantʼanakanwa uñjasiraktanjja. Ukampis Jehová Diosan yanaptʼapampejj predicaskaktanwa (Is. 41:13). Jiwasajj Ezequieljamarakiw uñjastanjja, jilaparte jaqenakajj janiw suma yatiyäwinak istʼañ munapkiti. Ukham jan istʼañ munapjjatapajja, janis sum prediksna ukham janiw sañ munkiti. Jehová Diosajj predicaskakitas uñjasajj wal kusisi, uk yatiñajj wal chuymachtʼistu, chʼamañchtʼarakistuwa. Apóstol Pablojj akham sänwa: “Sapa mayniruw Diosajj lurataparjam bendisini” sasa (1 Cor. 3:8; 4:1, 2). Walja maranak precursorat serviri mä kullakajj akham siwa: “Jehová Diosajj chʼamachasitasar bendisitap yatiñajj wal kusisiyitu” sasa.

7. ¿Uñjkäna uka visionat lupʼisajj kunjamas Ezequielajj jikjjataspachäna? (Nayrïr paginankir dibujo uñjjattʼäta).

⁷ Diosan espíritu santopajj qhawqha chʼamanisa ukwa Ezequielajj uñjäna. Kunjamsa espíritu santojj chʼamani angelanakar yanaptʼi, kunjamsa alajjpachankir carron jachʼa ruedanakap apnaqe ukwa mä visionan uñjäna (Ezeq. 1:20, 21). ¿Uk uñjasajj kunsa Ezequielajj luräna? Jupajj akham sänwa: “Uk uñjasajj oraqer puriñkamaw nayajj altʼasiyäta” sasa. Jupajj wali musparatänwa, ukatwa oraqer puriñkam altʼasïna (Ezeq. 1:28). Sapa kuti uka musparkañ visionat amtasajja, espíritu santon yanaptʼapampejj predicacionamp phoqäwa sasaw jukʼamp confiypachäna.

8, 9. 1) ¿Kun lurañapsa Jehová Diosajj Ezequielar mayïna? 2) ¿Ezequielar chʼamañchtʼañatakejj kunampsa Jehová Diosajj luräna?

⁸ Jehová Diosajj Ezequielar akham sänwa: “Jaqen yoqapa, jumampi parlañajatakejj kayut saytʼasim” sasa. Uka arunakampi espíritu santompiw Ezequielarojj saytʼasiñapatak chʼam churäna. Jupajj akham sasaw qellqäna: “Jupan espiritupaw nayjjar jutäna, nayarojj kayut saytʼayarakitäna” sasa (Ezeq. 2:1, 2). Qhepatjja, predickäna uka tiempon ‘Jehová Diosan amparapawa’, mä arunjja Diosan espíritu santopaw irpäna (Ezeq. 3:22; 8:1; 33:22; 37:1; 40:1). Uka espíritu santow Ezequielarojj ‘jan istʼasiri, chuymanakapas qalarata’ judionakar predicañatak chʼam churäna (Ezeq. 3:7). Jehová Diosajj jupar akham sänwa: “Ajanumsti jupanakan ajanupjam chʼollqhe tukuysma, paramsti jupanakan parapjam chʼollqhe tukuyaraksma. Paramjja diamante sat qaläkaspas ukham tukuyta, chʼollqhe qalat sipans jukʼamp chʼollqhe. Jan jupanakar ajjsaramti, uñnaqanakapajj jan jumar ajjsaraypanti”  sasa (Ezeq. 3:8, 9). Jehová Diosajj akham sasinsa siskaspa ukhamänwa: “Judionakan jan istʼasirïpjjatap laykojj jan aynachtʼamti. Nayaw jumarojj chʼamanir tukuyäma” sasa.

⁹ Ukat aksarojj Diosan espíritu santopaw Ezequielarojj kawkjantï predicañapäkäna uka lugaranakar irpäna. Ezequielajj akham sänwa: “Jehová Diosan amparapaw wali chʼamampi nayar irpaskitäna” sasa. Kuntï yatiyañapäkäna ukjja, profetajj mä semanatwa chuymapar katoqaskäna, sum amuytʼaskarakïna (Ezeq. 3:14, 15). Ukatjja, mä valle pampar saram sasaw Jehová Diosajj säna, ukanwa ‘Diosan espíritu santopajj jupjjar jutäna’ (Ezeq. 3:23, 24). Ezequielajj predicañ qalltañatak wakichtʼatäjjänwa.

10. ¿Predicacionamp phoqañasatakejj kuna yanaptʼas wakisi, ukat kunatsa?

¹⁰ ¿Predicacionamp phoqañasatakejj kuna yanaptʼas wakisi? Uka jisktʼar qhanañchañatakejj Ezequiel profetat amuytʼañäni. Janïr predicañ qalltkäna ukhajja, espíritu santow juparojj chʼam churäna. Jiwasampejj ukhamarakiwa, janitï espíritu santojj yanaptʼkistaspajja, janiw predicañ puedksnati. ¿Kunatsa ukham sistanjja? Kuna laykutejj Supayaw jiwas contra nuwasi, ukhamat predicación saytʼayañataki (Apoc. 12:17). Jaqenakan amuyupatakejja, Supayajj jiwasatak wali chʼaman enemigökaspas ukhamäspawa. ¡Ukampis predicasajj jupar atipjasktanwa! (Apoc. 12:9-11). Predikir sartan ukhajja, Supayajj kunaymanit amenazkistu ukar jan ajjsarataswa uñachtʼaytanjja. Sapa kut predicktan ukhajja, Supayaruw atipjasktanjja. Jarkʼatpach predicatasajja, espíritu santojj jiwasar chʼam churaskatapa, Jehová Diosajj jiwasar sum uñjaskatapwa uñachtʼayi (Mat. 5:10-12; 1 Ped. 4:14).

11. ¿Kunjamsa espíritu santojj yanaptʼistani, ukat kunsa espíritu santo katoqaskakiñatakejj lurañasa?

¹¹ Jehová Diosajj Ezequielan ajanupa ukhamarak parap chʼollqheptaykäna ukat ¿kunampsa yateqaraksna? Espíritu santow predicacionan kunayman jan walinakar atipjañatakejj  yanaptʼistaspa (2 Cor. 4:7-9). Ukhamajj ¿kunsa Diosan espíritu santop katoqaskakiñatakejj lurañasa? Jan qarjtasaw espíritu santo oracionan wal mayiñasa, Jehová Diosajj istʼitaniwa sasaw confiyañasaraki. Jesusajj “mayisipkakim”, “thaqasipkakim”, “leqtʼasipkakim” sasaw discipulonakapar säna. Jehová Diosasti, “mayipki ukanakarojj espíritu santo” churaniwa (Luc. 11:9, 13; Hech. 1:14; 2:4).

12. Ezequiel 2:9-3:3 textorjamajja, ¿kawkitsa rollojj jutäna, ukat kuna yatiyäwis ukan qellqatänjja?

¹² Ezequielajj janiw espíritu santo toqekejj chʼam katoqkänti, jan ukasti Diosan arunakapampejj chʼamañchtʼasirakïnwa. Mä visionanjja, rollo aptʼat mä ampar uñjäna (Ezequiel 2:9-3:3 liytʼäta). ¿Kawkitsa uk rollojj jutäna? ¿Kuna yatiyäwis ukan qellqatänjja? ¿Kunjamsa uka rollojj Ezequielar chʼamañchtʼäna? Uka rollojj Jehová Diosan tronopatwa jutäna. Uka rollo churañapatakejja, Ezequielajj uñjkäna uka pusi angelanakat inas Diosajj maynir khitchïna (Ezeq. 1:8; 10:7, 20). Uka rollonjja, Diosan arunakapaw qellqatäna, mä arunjja yaqha markar apatäpkäna uka kutkatasir judionakar Ezequielajj yatiyañapäkäna uka juchañchir arunakaw qellqatäna (Ezeq. 2:7). Uka yatiyäwejj rollon purap ladopar qellqatänwa.

13. ¿Jehová Diosajj rollomp kun lurañapsa Ezequielar mayïna, ukat kunatsa uka rollojj jupatak wali mosqʼänjja? 

¹³ Jehová Diosajj Ezequiel profetapar akham sänwa: “Uka rollo manqʼantam, purakam ukamp phoqtʼasim” sasa. Ezequielajj Diosar istʼänwa, taqpachwa uka rollo manqʼantarakïna. ¿Ezequielan taqpach rollo manqʼantatapajj kamsañs muni? Ezequielajj yatiyañapäkäna ukjja, taqpachwa sum amuyañapäna. Uka yatiyäwejj chuymaparuw purtʼañapäna, ukhamat taqe chuyma predicañapataki. Ukatsti jan suykäna ukaw pasäna. Ezequielatakejj uka rollojj ‘miskʼjam wali mosqʼänwa’ (Ezeq. 3:3). ¿Kunatsa ukhamäna? Jupatakejj Jehová Diosan representantepäñajj wali mosqʼänwa jan ukajj sumänwa (Sal. 19:8-11). Jehová Diosajj profetapäñapatak ajllitapatjja, walpun Ezequielajj yuspäräna.

14. ¿Kunas Ezequielarojj predicañatak wakichtʼatäñatakejj yanaptʼäna?

¹⁴ Qhepatjja, Jehová Diosajj akham sasaw Ezequielar säna: “Istʼam, kuntï siskäma taqe uka arunak chuymamar katoqasim” sasa (Ezeq. 3:10). Ukham sasinjja, rollon qellqatäki uka arunak amtam lupʼirakim sasaw Jehová Diosajj saskäna. Ukham lurañajj Diosar jukʼamp confiyañatakiw Ezequielar yanaptʼaspäna, uka yatiyäwi jaqenakar yatiyañ wakisitapwa amuyañaparakïna (Ezeq. 3:11). Diosan yatiyäwipajj lakapankäna chuymapankarakïna ukhajja, Ezequielajj predicañ qalltañatakisa predicacionamp phoqañatakis wakichtʼatäjjänwa (Salmo 19:14 liytʼarakïta).

15. ¿Predicaskakiñatakejj kunsa chuymasar katoqañasa?

¹⁵ Predicaskakiñatakejja, jiwasajj ukhamarakiw Diosan arunakapamp chʼamañchtʼasiskakiñasa. Taqe kunanaktï Jehová Diosajj siskistu ukanakjja, chuymasaruw katoqasiñasa. Jichhürunakanjja, Jehová Diosajj Arup toqe, mä arunjja Biblia toqew parlistu. Kuntï Bibliajj siski ukarjam amuytʼaskakiñatakisa, chuymasar purtʼaskakiñapatakisa, kuntï lurkañäni ukajj Bibliarjamäskakiñapatakis ¿kunsa lursna?

16. ¿Kunjamsa Diosan arunakap chuymasar katoqsna?

¹⁶ Kunapachatï manqʼastan, alimentonakas  cuerposankjjaraki ukhajja, chʼamwa katjjattanjja. Ukhamarakiw Bibliat yatjjattan, uka toqet lupʼiraktan ukhajj Diosar jukʼamp confiytanjja. Ukwa Ezequielajj mä visionan rollo uñjkäna ukajj yatichistu. Jehová Diosajj arunakapamp ‘purakas phoqantsna’, yatiyäwip sum amuytʼaraksna ukwa muni. Ukatakejj orastanwa, liytʼtanwa, lupʼiraktanwa. Nayraqatjja, chuymas wakichtʼañatakiw orastanjja, ukhamat Diosan amuyunakap katoqañataki. Ukatjja Bibliat mä cheqa liytʼtanjja. Ukjjarusti liytʼktan ukjjat lupʼiñataki, sum amuytʼañatakiw saytʼtanjja. ¿Ukham lurasajj kunsa jikjjatañäni? Sapa kuti jukʼamp lupʼisajja, Diosan arunakap jukʼamp sumwa chuymasar katoqañäni.

17. ¿Kunatsa Biblia liytʼktan ukjjat lupʼiñajj wali wakiskirejja?

¹⁷ ¿Kunatsa Biblia liytʼañasa, liyktan ukjjat lupʼiñas wali wakiskirejja? Ukham lurañajja, Diosan Reinopat predicañatakiw chʼam churistu, jutïrinjja juchañchäwi arunakani yatiyäwinak predicañajj waktʼkistaspa ukatakiw chʼam churistani. Ukhamarus Jehová Diosajj kunja suma chuymanisa uka toqet lupʼtan ukhajja, jupampejj jukʼamp sumaw apastanjja. Ukatjja, jiwasatakejj mosqʼäniwa sumarakïniwa, mä arunjja chuymasan sumankañaw utjani, kusisitarakïñäniwa (Sal. 119:103).

18. ¿Predicktan uka jaqenakajj kunsa yatipjjani, ukat kunatsa?

¹⁸ Ezequielajj mä profetänwa, jiwasajj janiw profetäktanti, ukampis Jehová Diosan amuytʼayat yatiyäwiw Biblian utjistu. Jehová Diosajj jan predikjjapjjamti siskistani ukhakamajja, jiwasajj predicaskakiñäniwa. Jehová Diosajj juchañchkani uka tiempojj purinkani ukhajja, predicktan uka jaqenakajj janiw nanakajj yatipkayätti jan ukajj Diosajj armasipjjetuwa sasin janiw sapkaniti (Ezeq. 3:19; 18:23). Jan ukasti predickayätan uka yatiyäwejj Diosat jutatapwa yatipjjani.

19. ¿Kunas predicacionamp phoqañatakejj chʼam churistani?

¹⁹ ¿Kunas predicacionamp phoqañatakejj chʼam churistani? Ezequielar chʼamañchtʼkäna uka kimsa yanaptʼanakaw jiwasan utjistu, predicaskakiñatakejj akanakwa yattanjja: Jehová Diosaw khitistu, espíritu santow chʼam churistu, Diosan arunakapampiw chʼamañchtʼastanjja. Jehová Diosan yanaptʼapampejj predicacionamp phoqaskakiñäniwa, ‘tukuykamaw’ aguantarakiñäni (Mat. 24:13).