48 YATICHÄWI
Yantʼat uñjaskañäni ukhajj wali amuyump sarnaqaskakiñäni
“Jumasti taqe kunansa wali amuyump sarnaqaskakim” (2 TIM. 4:5).
CANCIÓN 123 Diosan uttʼayat chachanakar istʼapjjañäni
¿KUNANAKATSA YATJJATASKAÑÄNI? a
1. ¿Wali amuyump sarnaqañajj kamsañsa muni? (2 Timoteo 4:5).
JEHOVÁ DIOSATA markapat jan jitheqtatasajja, kunayman jan walinakan uñjasktan ukhaw yantʼat uñjasispa. ¿Kunas uka jan walinakar saykatañatak yanaptʼistaspa? Wali amuyump sarnaqaskakiña, amuyasiña, ‘Diosar confiyañan suma saytʼatäñaw’ yanaptʼistaspa (2 Timoteo 4:5 liytʼäta). ¿Kunjamsa wali amuyump sarnaqaskatas uñachtʼaysna? Mä kunas pasi ukhajj tranquilokïskasa, sum amuytʼasisa, kunjamsa Jehová Diosajj taqe kuns uñji ukham uñjañatak chʼamachasisa. Ukhamtï lurañänejja, sumwa amuytʼasiñäni, janiw kunjamtï chuymasan jikjjatasktan ukampejj apayaskañäniti.
2. ¿Kunanaksa aka yatichäwin yatjjataskañäni?
2 Pasïr yatichäwinjja, kunjamsa Diosar jan serviri jaqenakajj jan waltʼayistaspa ukwa kimsa toqet yatjjatayätanjja. Aka yatichäwinjja, kuna jan walinakas congregación taypin utjaspa ukwa kimsa toqet yatjjataskañäni, ukanakaw Jehová Diosar jan jitheqtas servitasarojj yantʼistaspa. Uka jan walinakajj akanakäspawa: 1) amuyusarjamajj mä jilatasa jan ukajj mä kullakas jan wal lurkistu ukapacha, 2) cheqañchapkistu ukapacha, 3) Diosan markapan cambionakajj utjki ukar yatinoqtañajj chʼamäki ukapacha. Ukanakatï pasistaspa ukhajj ¿kunsa wali amuyump sarnaqaskakiñatakisa, Jehová Diosata markapat jan jitheqtañatakis lursna?
AMUYUSARJAMAJJ MÄ JILATASA JAN UKAJJ MÄ KULLAKAS JAN WAL LURKISTU UKAPACHA
3. ¿Amuyusatakejj mä jilatasa jan ukajj mä kullakas jan wal lurkistu ukhajj kuns amuyjjsna?
3 ¿Mä jilataw jan ukajj mä kullakaw jan wal luritu sasin amuyirïtati? Jupanakat inas mä anciano jilatächi. Ukampis uka jilatajj janiw jan wali amtamp uk lurkpachätamti (Rom. 3:23; Sant. 3:2). Ukhamäkchisa, kuntï jupajj lurki ukajj chuym usuchjpachätamwa. Uka toqet lupʼisajj inas jan ikiñ puedkchiyätati, ukat inas akham jisktʼasiraksta: “Mä jilatatï jan ukajj mä kullakatï ukham lurchejja, ¿kunjamarak akajj Diosan markapäspasti?” sasa. Jumajj ukham amuyasma ukwa Supayajj muni (2 Cor. 2:11). Ukham jan wali amuyunakajja, Jehová Diosatsa markapatsa jitheqtayistaspawa. Amuyumatakejj mä jilatasa jan ukajj mä kullakas jan wal lurstam ukhajja, ¿wali amuyump sarnaqaskakiñatakisa jan wali amuyunakamp jan apayasiñatakis kunsa lurasma?
4. 1) Jupar jan wal lurapkäna ukhajj ¿kunsa Joseajj wali amuyump sarnaqaskakiñatakejj luräna? (Génesis 50:19-21). 2) ¿Kunsa Joseat yateqassna?
4 Jan chuym ustʼayasimti. Joseajj waynitükäna ukhajja, jilïr jilanakapajj jan wal lurapjjäna. Juparojj uñisipjjänwa, yaqhep jilanakapajj jiwayañ kunwa munapjjäna (Gén. 37:4, 18-22). Esclavot aljapjjarakïna. Ukatwa Joseajj 13 maranakajj kunayman jan walinakan uñjasïna. Ukhaman uñjasisajja, “¿Jehová Diosajj munaspachïtuti?” sasaw payachasjjaspäna. Jan walinakan uñjaskäna ukhajja, “¿Diosajj apanukjjpachïtuti?” sasaw jisktʼasispäna. Ukampis Joseajj janiw chuym ustʼayaskänti. Wali amuyumpiw sarnaqaskakïna, tranquilokïskänwa. Mä kutejja, jilanakapat vengasispänwa, ukampis janiw uk lurkänti, munasiñampiw jupanakar uñjäna, perdonarakïnwa (Gén. 45:4, 5). ¿Kunatsa ukham luräna? Jupajj wali sum amuytʼasïna. Problemanakapat piensaskañat sipansa, kunsa Jehová Diosajj muni uka toqetwa amuytʼäna (Génesis 50:19-21 liytʼäta). ¿Kunsa ukat yateqsna? Maynitï jan wal lurätam ukhajja, jan Jehová Diosatak chuym ustʼayasimti, janirak Diosas apanukkiristam ukham amuyamti. Antisas kunjamsa Jehová Diosajj uka jan waltʼäwi aguantañatak yanaptʼasktam ukjjat lupʼim. Mayninakarus perdonam, ak amtarakim: “Khititejj munasirïki ukajja walja juchanakwa perdoni” (1 Ped. 4:8).
5. Jan wal lurapjjatap amuyasïna ukhajja, ¿kunas Miqueas jilatarojj wali amuyump sarnaqaskakiñatakejj yanaptʼäna?
5 Sudamérica toqenkir Miqueas jilatat parltʼañäni, jupajj ancianotwa serviski. b Mä kutejja, yaqhep ancianonakajj jupar sinti jan wal lurapjjatapwa amuyasïna. Uka jilatajj akham siwa: “Janipuniw kunapachas ukham estresat uñjasirïkti. Wali llakitapunïyätwa. Janiw ikiñs puedirïkti, jan kun kamachtʼirjamäsajj walpun jachirïta” sasa. Ukham llakitäkchïnsa, Miqueas jilatajj wali amuyumpiw sarnaqaskakïna, jan chuyma ustʼatäskakiñatakis chʼamachasïnwa. Jehová Diosaruw espíritu santom churita, aguantañatakis chʼam churita sasin sapa kut mayisirïna. Bibliat apstʼat qellqatanakasansa uka toqet parlir yatichäwinakwa thaqerïna. ¿Kunsa ukat yateqsna? Congregacionan maynejj jumar jan wal luratap amuysta ukhajja, pacienciañamawa, janiw jan wali amuyunakamp apayasiñamäkiti. Uka jilatasa jan ukajj uka kullakas inas kunaymaninakan uñjasisin ukham parlchi jan ukajj lurchi, ukampis janiw uk yatkasmati. Ukhamajj taqe ukanak Jehová Diosar yatiyam, kunsa uka jilatasa jan ukajj kullakas uka toqet amuyi uk amuyañatak yanaptʼa mayirakim. Ukhamtï lurätajja, jupajj janiw kuna jan wali amtampis uk lurkpachati sasaw amuyjjäta, perdonjjarakïtawa (Prov. 19:11). Ak amtapunim: kuna jan walinakansa jumajj uñjasta uk Jehová Diosajj yatiwa, aguantañatakis chʼam churarakïtamwa (2 Crón. 16:9; Ecl. 5:8).
CHEQAÑCHAPKISTU UKAPACHA
6. ¿Jehová Diosajj munasiñatwa cheqañchitu sasin amuyañajj kunatsa wali wakiskirejja? (Hebreos 12:5, 6, 11).
6 Cheqañchapkistu ukhajj chuym ustʼayassna. Ukampis chuym ustʼaykistu ukatak lupʼiskañäni ukhajja, uka cheqañchäwirojj janiw yäqksnati, janis cheqaparjam cheqañchapkistaspa, jan sinttʼasisas cheqañchapkistaspa ukhamwa amuyjjsna. Ukham amuyañajja, kunatï jukʼamp importantëki uk amuyañatwa jarkʼistaspa, mä arunjja Jehová Diosajj munasiñat cheqañchkistu uk janiw amuyjjsnati (Hebreos 12:5, 6, 11 liytʼäta). Kunjamsa chuymasan jikjjatastan ukamp apayassna ukhajja, Supayaruw jiwasar atacañapatak oportunidad churasksna. Supayajj cheqañchäwi jan katoqasiñaswa muni, Jehová Diosatsa congregacionatsa jitheqtañaswa munaraki. Jumarutï cheqañchapjjstamjja, ¿wali amuyump sarnaqaskakiñatakejj kunas yanaptʼiristam?
Pedrojj humilde chuymampiw ewjjtʼanaksa cheqañchäwsa katoqasïna, ukatwa Jehová Diosajj jukʼamp luräwinak jupar churäna. (Párrafo 7).
7. 1) Kunjamtï dibujonakan uñjaskejja, ¿kuna luräwinaksa Jehová Diosajj cheqañchäwi katoqaskäna uka qhepat Pedror churäna? 2) ¿Kunsa Pedrot yateqassna?
7 Cheqañchäw katoqasim, cambiañatakis chʼamachasirakim. Jesusajj walja kutiw Pedrorojj mayni apostolonak nayraqatan cheqañchäna (Mar. 8:33; Luc. 22:31-34). ¡Wali pʼenqachataw Pedrojj uñjaspachäna! Ukampis janiw Jesusat jitheqtkänti, cheqañchäw katoqasïnwa, pantjasitanakapats yateqarakïnwa. Ukham jan jitheqtirïtapatjja, Jehová Diosajj bendisïnwa, congregacionansa wali importante lurañanakwa churäna (Juan 21:15-17; Hech. 10:24-33; 1 Ped. 1:1). ¿Kunsa ukat yateqsna? Cheqañchapkistu ukhajj phenqʼachatas uñjaskstanjja, janiw ukar chuym uchañasäkiti, jan ukasti cheqañchäw katoqasiñasawa, cambiañasarakiwa. Ukhamtï lurañänejja, Jehová Diosajj jukʼamp luräwinakwa churistani, jilat kullakanakarus wal yanaptʼarakiñäni.
8, 9. ¿Cheqañchapkäna ukhajj kunjamsa Bernardo jilatajj qalltan jikjjatasïna, jan ukham amuyañatakejj kunas jupar yanaptʼarakïna?
8 Mozambique markankir Bernardo jilatarojj kunas pasäna uk jichhajj parltʼarakiñäni. Jupajj ancianotsa sirvkchïnjja, ancianot apaqjjapjjänwa. ¿Kunjamakis qalltan jikjjatasïna? Jilatajj akham siwa: “Wali chuyma ustʼatapunïyätwa, cheqañchapkitäna ukajj janiw gustkitänti” sasa. Jilat kullakanakajj nayat jan wal amuyapjjani sasaw llakisïna. Jilatajj akham saskakiwa: “Cheqañchapkitu ukajj walikïskatap uñjañatakisa, Jehová Diosampir markapampir wasitat confiyjjañatakis walja phajjsinakaw pasäna” sasa. ¿Kunas jilatarojj yanaptʼäna?
9 Bernardo jilatajj janiw nayrjam amuyjjänti. Jupajj siwa: “Ancianot sirvkayäta ukhajja, Jehová Diosan cheqañchäwip katoqasipjjañapatakejj Hebreos 12:7 textompiw jilat kullakanakar yanaptʼirïta. Ukatwa nayajj ‘¿khitinakatakis aka textojja?’ sasin jisktʼasiyäta. Cheqas Jehová Diosan taqe servirinakapatakiwa, ukhamajj nayamppachatakiwa” sasa. Jehová Diosaru markaparu jukʼamp confiyañatakejja, Bernardo jilatajj akanakamp luräna: Biblia liyiñataki, liykäna ukat lupʼiñatakiw tiempo apstʼasïna. Jilat kullakanakajj nayat kamsapjjpachasa sasin llakisiskakchïnsa, jupanakamp predicaskakïnwa, tantachäwinakans arstʼaskakïnwa. Tiempompejja, jilatajj wasitatwa ancianot sirvjjäna. Jumatï Bernardo jilatjam cheqañchata uñjassta ukhajja, phenqʼachatas uñjaskstajja jan ukar chuym uchamti, antisas ewjjtʼanak katoqasim, cambiarakim (Prov. 8:33; 22:4). c Ukhamtï lurätajja, Jehová Diosajj jupata markapat jan jitheqtatamat bendisïtamwa.
DIOSAN MARKAPAN CAMBIONAKAJJ UTJKI UKAR YATINOQTAÑAJJ CHʼAMÄKI UKAPACHA
10. ¿Diosan markapan kuna cambio utjatapas yaqhep israelitanakarojj Diosat jitheqtayaspäna?
10 Diosan markapan cambionakajj utjki ukhajja, Diosat jan jitheqtatasajj yantʼataw uñjasispa. Janitï amuyasksnajja, Jehová Diosat jitheqtsnawa. Moisesan katoqat Leyirjamajj kuna cambionakas Diosan markapan utjäna uk amuytʼañäni, uka cambionakjja yaqhep israelitanakajj jan walitwa uñjapjjäna. Moisesajj janïr uka Ley katoqkäna ukhakamajja, familia pʼeqtʼirinakaw familiapatakejj sacerdotëpjjäna, jupanakaw altaranak lurapjjerïna, familiapatakis sacrificionak Jehová Diosar loqtapjjerïna (Gén. 8:20, 21; 12:7; 26:25; 35:1, 6, 7; Job 1:5). Ukampis Moisesar churat Leyirjamajja, familia pʼeqtʼirinakajj janiw ukanak lurjjapjjänti. Jehová Diosajj Aarón chachan familiapat jutir chachanakaruw sacerdotet uttʼayäna, ukhamat sacrificionak loqtapjjañapataki. Ukat aksarojja, mä familia pʼeqtʼiritï Aarón chachan familiapat jan jutirïkasin sacerdotet servispäna ukhajja, jiwaspänwa (Lev. 17:3-6, 8, 9). d Coré, Datán, Abiram ukhamarak markan 250 pʼeqtʼiri chachanakajj ¿uka cambio utjatapatti Moisés ukat Aarón chachanak contrajj saytʼasipjjpachäna? (Núm. 16:1-3). Ukhamapunïnwa sasajj janiw sisksnati. Ukampis Coré chachasa, jupar yanaptʼapkäna uka chachanakas Jehová Diosatwa jitheqtapjjäna. Diosan markapan mä cambiojj utjki ukhajj ¿kunas Diosat jan jitheqtañatakejj yanaptʼistaspa?
Cohatitanakajj cantirinakata porteronakat uttʼayatäjjapjjäna, manqʼañanak imañ utanakat encargatäjjapjjäna ukhajja, taqe chuymaw uka cambionak katoqasipjjäna. (Párrafo 11).
11. ¿Kunsa yaqhep cohatitanakat yateqassna?
11 Diosan markapan cambionakajj utjki ukar taqe chuym yanaptʼam. Israelitanakajj wasarnam viajipjjäna ukhajja, Cohat chachan familiapat jutir levitanakajj mä suma luräwinïpjjänwa. Israelitanakajj mä cheqat yaqha cheqar sarapkäna ukhajja, yaqhep cohatitanakajj taqe israelitanakan uñjkataw pactor mantat arca apapjjäna (Núm. 3:29, 31; 10:33; Jos. 3:2-4). ¡Ukajj mä jachʼa bendicionänwa! Ukampis israelitanakajj Suma Oraqen jakjjapjjäna ukhajja, taqe kunas janiw nayrjamäjjänti. Mä cheqat yaqha cheqar Arca apañajj janiw wakisjjänti. Salomón reyejj apnaqkäna ukhajja, yaqhep cohatitanakajj cantirïpjjänwa, yaqhepajj porteronakäpjjänwa, yaqhepasti manqʼañanak imaski uka utanakat encargatäpjjänwa (1 Crón. 6:31-33; 26:1, 24). Coatitanakajj nayrajj wali suma luräwinïpkchïnsa, Bibliajj janiw cohatitanakajj quejasipjjänwa, jukʼamp suma luräwinakwa munapjjäna sasajj siskiti. ¿Kunsa ukat yateqsna? Kuna cambionaktï Jehová Diosan markapajj lurki ukar taqe chuym yanaptʼam, kuntï jumajj luraskta ukajj mayjtʼkchinisa taqe chuym yanaptʼaskakim. Kuna lurañ churatas kusisit luram. Ak amtapunim: Jehová Diosajj janiw kuna lurañtï markapan katoqkta ukarjam valoranit uñjktamti, jan ukasti mä lurañ katoqañat sipansa jupatakejj istʼasirïtamaw jukʼamp importantejja (1 Sam. 15:22).
12. Betelat sarjjäna ukhajj ¿kunjamsa Zaira kullakajj jikjjatasïna?
12 Oriente Medio toqenkir Zaira sat mä kullakat parltʼarakiñäni. Jupajj Betelan serviñ wali valoranitwa uñjäna, 23 jila maranakaw ukan servirakïna. Ukampis qhepat precursora especialatwa khitjjapjjäna. Jupajj akham siwa: “Nayar cambiapjjetäna ukhajj walpun llakisiyäta. Janis kunatakis sirvkirista ukhamwa amuyasiyäta, ‘¿kuna jan walsa lurpachäta?’ sasaw jisktʼasirakirïta” sasa. Congregacionankir yaqhep jilat kullakanakas jukʼampiw chuym ustʼayapjjäna. Jupanakajj akham sapjjänwa: “Jumatï jukʼamp sum lurañatak chʼamachasismänjja, Diosan markapajj janiw Betelat yaqha cheqar khitkiriskayätamti” sasa. Mä qhawqha tiempojja, Zaira kullakajj wali llakitapunïnwa, sapa arumaw jacharakïna. Ukampis jupajj akham siwa: “Jehová Diosan markapatsa munasiñapatsa janipuniw payachasirïkti” sasa. ¿Kunas kullakarojj wali amuyump sarnaqaskakiñatak yanaptʼäna?
13. ¿Llakimp jan aynachtʼañatakejj kunsa Zaira kullakajj luräna?
13 Llakimp jan aynachtʼañatakejja, Zaira kullakajj kuna jan walintï uñjaskäna uka toqet parlir qellqatanakasatwa liytʼäna. Kullakar yanaptʼkäna uka yatichäwinakat mayajja, La Atalaya del 1 de febrero de 2001 revistankiwa, uka yatichäwejj “Usted puede afrontar el desánimo” satawa. Uka yatichäwinjja, Biblia qellqeri Marcos chachatwa parli, inas jupajj Jehová Diosar serviñan cambio utjatapat Zaira kullakjam jikjjatasirakchïna. Zaira kullakajj akham siwa: “Aynachtʼatäkayäta ukhajja, Marcos chachat yateqañaw jan aynachtʼatäskakiñatak yanaptʼawayitu” sasa. Kullakajj amigonakapampiw yanaptʼayasirakïna, janiw jilat kullakanakat jitheqtkänti, kunatï llakisiykäna ukat janiw jukʼamp piensjjarakïnti. Jehová Diosajj espíritu santopamp markapar irpaskatapa, Diosan markapan irpapki uka jilatanakajj jupat llakisitapwa amuyäna. Jehová Diosan markapatakejja, kuna luräwtï Diosajj churkistu uk lurañaw jukʼamp importantejja, ukwa kullakajj amuyarakïna.
14. ¿Diosan markapan cambionakajj utjki ukanakat kawkïrirus Vlado jilatajj yatinoqtañapäna, ukat kunas yatinoqtañatakejj yanaptʼäna?
14 Eslovenia markankiri 73 marani Vlado jilatat parltʼarakiñäni, jupajj congregacionan ancianotwa serviski. Congregacionapajj yaqha congregacionamp mayar tukuyasjjäna ukasa, jupajj sarkäna uka Tantachasiñ Utan llawintasjjatapas janipuniw jupatakejj walïkänti. Jilatajj akham siwa: “Kunatsa uka wali suma Tantachasiñ Uta llawintapjjäna uk janiw amuykayätti. Ukhakiw uka Tantachasiñ Uta askichañ tukuyasipkayäta, ukatwa wal colerasiyäta. Carpinterösajja, ukan yaqhep mueblenakap lurarakiyäta. Pä congregacionanak mayar tukuyasitapatjja, nayjam jilïr jilat kullakanakatakejj chʼama tukuñ walja cambionakaw utjäna” sasa. ¿Diosan markapajj amtkäna ukarjam lurañatakejj kunas jilatar yanaptʼäna? Jupajj akham siwa: “Kuna cambionaktï Diosan markapajj lurki ukanakar yatinoqtañajja, yanaptʼapunistuwa. Jutïrin cambionakajj utjkani ukatakiw wakichtʼistu” sasa. ¿Pä congregacionan mayar tukuyasitapasa jan ukajj Diosan markapan yaqha luräwi katoqatamas llakisiytamti? Ukhamächi ukhajja, jan llakisimti. Kunjamsa jikjjatasta uk Jehová Diosajj yatiwa. Jumatï uka cambionakar yanaptʼäta, Jehová Diosatsa markapatsa jan jitheqtkäta ukhajja, walja bendicionanakwa katoqäta (Sal. 18:25).
TAQE KUNANSA WALI AMUYUMPIW SARNAQASKAKIÑASA
15. Congregacionan jan waltʼäwinakajj utjkani ukhajj ¿kunsa wali amuyump sarnaqaskakiñatakejj lurañasa?
15 Aka jan wali pachan tukusiñapajj jakʼachasinkipanjja, jan waltʼäwinakajj congregacionan utjakipuniniwa, ukaw Jehová Diosat jitheqtayañ munistaspa. Ukatwa wali amuyump sarnaqaskakiñasa. Amuyusarjamajj mä jilatasa jan ukajj mä kullakas jan wal lurkistu ukhajja, jan chuym ustʼayasiñäniti. Cheqañchapkistu ukhajja, phenqʼachatas uñjaskstanjja jan ukar chuym uchañäniti, antisas ewjjtʼanak katoqasipjjañäni, cambiañatakis chʼamachasipjjarakiñäni. Kuna cambionaktï Diosan markapajj lurki ukanakatï jiwasar jan waltʼaychistu ukhajja, taqe chuyma ukar yanaptʼaskakiñäni, kuntï sapkistani ukarjam luraskakiñäni.
16. ¿Jehová Diosampir markapampir confiyaskakiñatakejj kunsa lurasma?
16 Yantʼat uñjaskäta ukhajja, Jehová Diosarus markaparus confiyaskakiñamawa. Ukampis ukatakejja, wali amuyump sarnaqaskakiñamajj wali wakiskiriwa, mä arunjja tranquilokïñamawa, wali sumwa amuytʼasiñama, kunjamtï Jehová Diosajj taqe kuns uñjki ukhamwa uñjañamaraki. Biblianjja, jumjam jikjjatasir chachanakata warminakatwa parli, jupanakat yatjjatam, sarnaqäwinakapats lupʼirakim. Jehová Diosarus yanaptʼita sasin orasim, janipun congregacionankir jilat kullakanakat jitheqtamti. Ukhamtï lurätajja, kunas kunäskpan janiw Supayajj Jehová Diosatsa ni markapatsa apaqkätamti (Sant. 4:7).
CANCIÓN 126 ‘Wali chʼamani saytʼasipjjañäni’
a Jehová Diosatsa markapatsa jan jitheqtatasajj yantʼataw uñjasispa, jukʼampis congregación taypin jan walinakajj utjki ukhaw yantʼat uñjasispa. Aka yatichäwinjja, uka jan walinakat kimsa yatjjatañäni, Jehová Diosampita markapampit jan jitheqtañasatakejj kunsa lursna uksa yatjjatarakiñäniwa.
b Yaqhep sutinakajj cambiasiwayiwa.
c Uka toqet jukʼamp yanaptʼanak jikjjatañatakejja, “¿Aski luräwinakan wasitat irnaqtʼañ munasmati?” sat yatichäwi Yatiyañataki 15 de agosto de 2009 revistan página 30 liytʼäta.
d Leyirjamajja, mä familia pʼeqtʼiritï manqʼañatak mä animal jiwayañ munchïna ukhajja, santuarioruw apañapäna. Santuariot wali jayan jakapkäna uka familia pʼeqtʼirinakakiw ukanak jan apapkänti (Deut. 12:21).